თბილისი. სახალხო დამცველი ბავშვთა ძალადობისგან დაცვისათვის საჭირო ღონისძიებების შესახებ განცხადებას ავრცელებს. „... 2014–2015 წლების განმავლობაში მკვეთრად გახშირდა ბავშვთა მიმართ სექსუალური ძალადობის ფაქტები. სახალხო დამცველის აპარატის მიერ შესწავლილი საქმეების ანალიზიდან იკვეთება, რომ არასათანადოდ ხორციელდება სექსუალური ძალადობის მსხვერპლ ბავშვთა ფსიქო–სოციალური რეაბილიტაცია, მათი საგანმანათლებლო პროცესში ინტეგრაცია და რეფერირების პროცედურა. ხშირ შემთხვევებში ჭიანურდება გამოძიება/სისხლისსამართლებრივი დევნა და ვერ ხდება პასუხისმგებელი პირების იდენტიფიცირება. სახალხო დამცველი მიიჩნევს, რომ ბავშვთა სექსუალური ძალადობისგან დაცვის აუცილებელი პირობაა შიდა და საერთაშორისო კანონმდებლობის პრაქტიკული იმპლემენტაცია, რისთვისაც საქართველოს მთავრობამ სპეციალური სამოქმედო გეგმა უნდა შეიმუშაოს. ...", ნათქვამია განცხადებაში. სრულად... წყარო: ombudsman.ge

აჭარა. 7 ივლისს, ბათუმში გაიხსნა „მონოპიესების ფესტივალი", რომლის ორგანიზატორები ახალგაზრდული არასამთავრობო ორგანიზაცია „არტ ვეი" და ბათუმის მერია. საზოგადოებამ პირველ დღეს იხილა ირაკლი კაკაბაძის პიესის მიხედვით დადგმული სპექტაკლი „აუტისტი „ტერორისტის" განცხადება". სრულად... წყარო: ორგანიზაციის ვებგვერდი სოციალურ ქსელში

თბილისი. სახალხო დამცველის ბავშვის უფლებების ცენტრმა მოამზადა სპეციალური ანგარიში – ბავშვთა უფლებები. ანგარიში მოიცავს ბავშვთა უფლებების მიმართულებით გადადგმულ ნაბიჯებს, არსებულ მდგომარეობას და ასევე რეკომენდაციებს. სრულად... წყარო: ombudsman.ge

შიდა ქართლი. საზოგადოება „ბილიკთან" არსებული მედია სკოლის მორიგი ჯგუფის შემაჯამებელი ღონისძიება გაიმართა. სამი თვის მანძილზე მედია სკოლის მსმენელები გაეცნენ სატელევიზიო საგაზეთო და ონლაინ მედიას. მათ ტრენინგებს მოქმედი ჟურნალისტები უტარებდნენ. მედია სკოლა პროგრამის „მომავლის თაობის" ფარგლებში, რომელსა ორგანიზაცია PH International, აშშ საერთაშორისო სააგენტოს დაფინანსებით და საქართველოს განათლებისა და მეცნიერების სამინისტროს მხარდაჭერით ახორციელებს. შიდა ქართლში მისი პარტნიორია საზოგადოება „ბილიკი". წყარო: ორგანიზაციის ვებგვერდი სოციალურ ქსელში

აჭარა. 6 ივლისს, ბათუმის დემოკრატიული ჩართულობის ცენტრში, არასამთავრობო ორგანიზაციის ,,ახალგაზრდები საზოგადოებრივი ინტერესებისთვის" ორგანიზებით და IFES-ის ფინანსური მხარდაჭერით დაიწყო პროექტი –,,ახალგაზრდები და სამოქალაქო აქტივიზმი". პროექტის ფარგლებში ახალგაზრდებს ჩაუტარდებათ 4 დღიანი სატრენინგო კურსი დემოკრატიის არსისა და პრინციპების, თვითმმართველობის არსის, სტრუქტურისა და მოქალაქეთა ჩართულობის მექანიზმების შესახებ. ასევე, მათ ექნებათ შესაძლებლობა ესტუმრონ როგორც თვითმმართველობის ორგანოებს, ასევე არასამთავრობო ორგანიზაციებს და უშუალოდ დააკვირდნენ და გაეცნონ მათ საქმიანობას. ტრენინგის ბოლოს მონაწილეები შეიმუშავებენ ინიციატივებს, რომლებსაც წარადგენენ საკრებულოს ღია კარის სხდომაზე და შექმნიან პროექტებს, რომელსაც თავად განახორციელებენ.

გურია. 6 ივლისს ,,ახალგაზრდა პედაგოგთა კავშირის" ლიდერთა სკოლის მოსწავლეები ადვოკატირების პროგრამის ფარგლებში ქალაქ ოზურგეთის მერს შეხვდნენ და ოზურგეთის ერთ-ერთი საცხოვრებელი კორპუსის მაცხოვრებელთა პრობლემების შესახებ ისაუბრეს. შეხვედრა ეხებოდა ქ. ოზურგეთში შემოქმედელის 5 – ში მდებარე საცხოვრებელი კორპუსის მაცხოვრებლების პრობლემებს ( კორპუსის მცხოვრებთა მომართვის საფუძველზე დაიგეგმა ადვოკატირების კამპანია). შეხვედრაზე ახალგაზრდებმა წარადგინეს შემოქმედელის 5–ში არსებული მდგომარეობის ამსახველი სიუჟეტი. ქალაქის მერმა გამოთქვა მხარდაჭერის სურვილი ახალგაზრდების ინიციატივის მიმართ და აღნიშნა, რომ პრობლემების იდენტიფიკაციის მიზნით ქალაქის მერიაში შეიქმნება სამუშაო ჯგუფი, რომელიც დეტალურად შეამოწმებს აღნიშნულ საცხოვრებელ კორპუსს და არსებულ პრობლემებს. მორიგი სამუშაო შეხვედრა აღნიშნულ თემაზე ახალგაზრდებსა და ქალაქის მერს შორის უახლოეს დღეებში გაიმართება. სრულად... წყარო: ორგანიზაციის ვებგვერდი

აჭარა. ახალგაზრდული ორგანიზაცია „არტ ვეი" და ბათუმის მერია 7–15 ივლისს, გამართავს „მონოპიესების ფესტივალს". ფესტივალის მიზანია: ახალგაზრდა დრამატურგების, მსახიობებისა და რეჟისორების პროფესიული განვითარების ხელშეწყობა და მოტივაციის ამაღლება,  შემოქმედ ახალგაზრდებს შორის თეატრის მეშვეობით კომუნიკაციის დამყარება, მონო სპექტაკლების მიმართ საზოგადოების ინტერესის ზრდის ხელშეწყობა... სრულად...  წყარო: ორგანიზაციის ვებ-გვერდი სოციალურ ქსელში

თბილისი. საქართველოს ინოვაციების და ტექნოლოგიების სააგენტო აითითისისთან ერთად იწყებს ტრენინგს მოსწავლეებისთვის "ელექტრონიკა ყველასთვის". ტრენინგის მიზანია ელექტრული ინჟინერიის პოპულარიზაცია საქართველოში. ეს ტრენინგი ხელს შეუწყობს ინოვაციური პროდუქტების შექმნას და მათ შემდგომ განვითარებას. პროგრამაში მონაწილეობის მისაღებად საკმარისია იყოთ მოსწავლე მეშვიდე კლასიდან მეთერთმეტე კლასის ჩათვლით. პროგრამა არ მოითხოვს არანაირ საბაზისო ცოდნას ტექნიკურ საგნებში. ტრენინგი მეშვიდე კლასიდან მეთერთმეტე კლასის ჩათვლით წარმოადგენს ელექტრული სქემებისა და რობოტების აწყობის შესწავლას, ასევე მათი მუშაობის პრინციპების ახსნას და ზოგადი ინფორმაციის მიწოდებას ელექტრული ინჟინერიის დარგში. სრულად... წყარო: ორგანიზაციის ვებ-გვერდი სოციალურ ქსელში

კახეთი. ცენტრალური საარჩევნო კომისია საქართველოს ახალგაზრდა იურისტთა ასოციაციასთან თანამშრომლობით, სტუდენტებისთვის ერთობლივ პროექტს ,,საარჩევნო განვითარების სკოლა-2015" იწყებს საქართველოს სხვადასხვა რეგიონში. აღნიშნული პროექტის შესახებ საინფორმაციო შეხვედრა გაიმართა თელავში, იაკობ გოგებაშვილის სახელობის თელავის სახელმწიფო უნივერსიტეტის სტუდენტებთან. „ახალგაზრდა იურისტთ"ა წარმომადგენლის მარეხ მგალობლიშვილის თქმით, პროექტში მონაწილეობის მსურველ 17-დან 25 წლამდე ახალგაზრდებს შეუძლიათ გაიარონ სასწავლო კურსი 13-დან 24 ივლისის ჩათვლით და მიიღონ საჭირო ცოდნა საარჩევნო თემებზე. ,,კურსის გავლის მსურველებმა უნდა შეავსონ სპეციალური აპლკიკაცია და განაცხადი 1-დან 8 ივლისის ჩათვლით შეიტანონ საოლქო-საარჩევნო კომისიებში. საზაფხულო-საარჩევნო სკოლები, რომელიც თელავსა და სიღნაღში იფუნქციონირებს, საარჩევნო საკითხებზე ახალგაზრდების ცნობიერების ამაღლებას ისახავს მიზნად'',- განაცხადა მარეხ მგალობლიშვილმა.

იმერეთი. 2 ივლისს, შშმ ბავშვთა დღის ცენტრის ,,ჯადოსნური სამყაროს’’ პრეზენტაცია გაიმართა. პრეზენტაციაზე მოწვეული სტუმრები გაეცვნენ დღის ცენტრის სერვისებს, ჯგუფური და ინდივიდუალური მუშაობის პროცესს. დღის ცენტრში არსებული ფოტო სკოლის ფარგლებში შექმნილ ბავშვთა ფოტონამუშევრებს. პრეზენტაციის დღეს, დღის ცენტრში ახალი პროგრამა ,,მეზღაპრე ერთი დღით’’ დაიწყო. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს სასამართლოების მოხელეთა პროფესიული ასოციაცია, თბილისის სააპელაციო სასამართლო გერმანიის საერთაშორისო თანამშრომლობის საზოგადოების მხარდაჭერით ახორციელებენ ერთობლივ პროექტს. მის ფარგლებში შეიქმნა ვებგვერდი: teen.court.ge – რომელიც მომავალი თაობების მართლშეგნების ამაღლების ხელშეწყობისკენ არის მიმართული. საიტზე მოზარდები შეძლებენ ნახონ სპეციალურად მათთვის შექმნილი: სამართლებრივი კაზუსები, ილუსტრირებული წიგნები გასართობი და ინფორმაციული შინაარსით; სამართლებრივი ლექსიკონი ბავშვებისათვის (ლექსიკონი ინტეგრირებულია ვებ-გვერდთან); ტესტები (სხვადასხვა თემატიკის და სირთულის რამდენიმე დონე), რომელთა გამოყენებით მოსწავლეები შეძლებენ გამოცადონ საკუთარი ცოდნა; საიტზე განთავსდება სამართლის კურსი, რომლის გავლის შემდეგ მომხმარებლები მიიღებენ სერტიფიკატს სასამართლოსგან; აქვე ნებისმიერი ვიზიტორი შეძლებს მოიძიოს: სამართლებრივი შინაარსის გასართობი და მიმზიდველი თამაშები, ვიქტორინები და მრავალი სხვა საინტერესო ინფორმაცია. სრულად... წყარო: teen.court.ge

სამეგრელო. აშშ–ის საერთაშორისო განვითარების სააგენტოს (USAID) საქართველოს მისიის ხელმძღვანელი სტეფან ჰაიკინი ასოციაცია „ათინათს" ესტუმრა. სტუმრები გაეცნენ ახალგაზრდული მიმართულებების მუშაობას და დაათვალიერეს მცირე საგრანტო კონკურსში გამარჯვებული სამი სხვადასხვა პროექტის შედეგები: სკოლის ბუფეტი, პანდუსი შშმ მოსწავლეთათვის და სპეციალური საგანმანათლებლო საჭიროების მქონე მოსწავლეთა ოთახი. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს განათლებისა და მეცნიერების სამინისტრომ, ევროპის კვირეულთან დაკავშირებით ვიდეორგოლების კონკურსი „ევროპა ჩემს ობიექტივში" ჩაატარა. კონკურსში მონაწილეობდნენ საქართველოს საჯარო და კერძო სკოლის საბაზო-საშუალო საფეხურის მოსწავლეები. გამარჯვებული სკოლები, საქართველოს განათლებისა და მეცნიერების მინისტრმა თამარ სანიკიძემ და ევროკავშირის ელჩის მოადგილემ საქართველოში ბორის იაროშევიჩმა დააჯილდოეს. კონკურსის მიზანია მოზარდებმა გაიაზრონ ევროპული ღირებულებების არსი და მნიშვნელობა. სრულად... წყარო: ორგანიზაციის ვებ-გვერდი სოციალურ ქსელში

გურია. 29 ივნისს, ,,ახალგაზრდა პედაგოგთა კავშირის" ოფისში ორგანიზაციის ბაზაზე არსებული ოზურგეთისა და ლანჩხუთის ლიდერთა სკოლების ორი საჩვენებელი დებატი გაიმართა. ახალგაზრდებმა განიხილეს რეზოლუცია „გენდერული თანასწორობა გამართლებულია". მოზარდები საინტერესოდ ახერხებდნენ საკუთარი პოზიციების დაცვასა და საზოგადოების მათ მხარეს გადაბირებას. სრულად... წყარო: ორგანიზაციის ვებ-გვერდი სოციალურ ქსელში

აჭარა. 27 ივნისს, პროექტის „დემოკრატიის აგენტების” ფარგლებში განხორციელებული ღონისძიებები შეაჯამეს. პირველ ეტაპზე მეცხრე, მეათე და მეთერთმეთე კლასის მოსწავლეებისთვის ტრენინგები გაიმართა. ისინი ასევე აჭარაში მოქმედ სამთავრობო და არასამთავრობო ორგანიზაციების წარმომადგენლებს შეხვდნენ და მათი მუშაობის სტილს გაეცვნენ. ახალგაზრდებს შესაძლებლობა ჰქონდათ ერთი თვის განმავლობაში მოხალისეებად ჩართულიყვნენ აღნიშნულ ორგანიზაციებსა და დაწესებულებების საქმიანობაში. პროექტის მიზანი არასრულწლოვნებში დემოკრატიული იდეებისა და სამოქალაქო ღირებულებების პოპულარიზაცია იყო. პროექტი ექვსი თვის განმავლობაში არასამთავრობო ორგანიზაცია „ბორჯღალისა" და ,,ჯი ქოლს" პროგრამის ფარგლებში განხორციელდა.

აჭარა. 25 ივნისს, ბათუმის დემოკრატიული ჩართულობის ცენტრისა და ახალგაზრდა იურისტთა ასოციაციის ორგანიზებით, საკვირაო სკოლის მოსწავლეებისთვის საინფორმაციო შეხვედრა გაიმართა. შეხვედრის ფარგლებში, ახალგაზრდული ორგანიზაცია ცვლილებები თანაბარი უფლებებისათვის წარმომადგენლებმა -"გავიგოთ მეტი შეზღუდული შესაძლებლობის შესახებ"– შშმ პირებთან დაკავშირებულ ტერმინებსა და საზოგადოებაში გავრცელებულ სტერეოტიპებზე ისაუბრეს. ასევე, განიხილეს საქართველოში შეზღუდული შესაძლებლობის მქონე პირთა მდგომარეობა, მათ წინაშე არსებული პრობლემები და ქვეყნის მიერ გადადგმული ნაბიჯები. სკოლის მოსწავლეებმა მომხსენებლებთან ერთად იმსჯელეს ადგილობრივ დონეზე სამოქალაქო საზოგადოების ჩართულობასთან დაკავშირებით. რა როლი აკისრია საზოგადოებას აღნიშნული თემის პრობლემების მოგვარებაში. შეხვედრის ბოლოს ახალგაზრდებმა სიტუაციური ამოცანა გააკეთეს, რომლის საფუძველზე თეორიულად მიღებული ცონდის პრაქტიკაში გადმოტანას შეეცადენ.

შიდა ქართლი. 24 ივნისს, დემოკრატიის ჩართულობის ცენტრში, მათემატიკისა და ფიზიკის თემებზე მოსწავლეთა კონფერენცია ჩატარდა. კონფერენციას გორის მუნიციპალიტეტის 8 საჯარო სკოლის მოსწავლეები დაესწრნენ. მოზარდებმა 12 ნამუშევარი წარადგინეს ორი მიმართულებით - „გეომეტრიული ფიგურები, ორნამენტები და პროპორციები ქართული ხუროთმოძღვრების ძეგლებში" და „ექსპერიმენტების როლი ფიზიკის განვითარებაში". სრულად... წყარო: ორგანიზაციის ვებ-გვერდი სოციალურ ქსელში

სამცხე-ჯავახეთი. 24 ივნისს, არასამთავრობო ორგანიზაციამ "ახალგაზრდები სამოქალაქო პროგრესისკენ", სამოქალაქო განათლების პროგრამის „მომავლის თაობის" მოსწავლეებისთვის სიმულაციური თამაშების ციკლი ჩაატარა და მოაწყო დისკუსია ინტეგრაციის თემაზე. შეხვედრა ახალციხის დემოკრატიული ჩართულობის ცენტრში შედგა. მას „მომავლის თაობის" მოსწავლეები და კურსდამთავრებულები ესწრებოდნენ. პროექტის მიზანია ახალგაზრდების ცნობიერების ამაღლება ინტეგრაციის საკითხებზე და უნარ-ჩვევებისა და კომპეტენციების განვითარება პრაქტიკული სავარჯიშოებით. „მომავლის თაობის" მოსწავლეებს საშუალება მიეცათ გაცნობოდნენ საინტერესო თემებს. ასევე საინტერსო იყო მათი მოსაზრებები და გადაწყვეტილებები, რომელიც ამ სიმულაციურ თამაშების დროს გამოიკვეთა", – თქვა ახალციხის ახალგაზრდული ცენტრის კოორდინატორმა მზია ინასარიძემ. არასამთავრობო ორგანიზაციამ "ახალგაზრდები სამოქალაქო პროგრესისკენ" მსგავსი შეხვედრები უკვე გამართა წალკასა და მარნეულში.

თბილისი. 23 ივნისს, სამოქალაქო განათლების პროგრამის „მომავლის თაობა" თბილისის პარტნიორი სკოლების წლის შემაჯამებელი ღონისძიება გაიმართა. ღონისძიებაზე თბილისის სასკოლო სამოქალაქო კლუბების წევრმა მოსწავლეებმა დამსწრე საზოგადოებას აკადემიური წლის მანძილზე განხორციელებული აქტივობები, ინიციატივები და მცირე საგრანტო პროექტები წარუდგინეს. მოსწავლეებმა, ასევე, მოაწყვეს კლუბების საქმიანობის ამსახველი ფოტო გამოფენა. შეხვედრაზე წარმოდგენილი იყო კლუბების მიერ მომზადებული ჟურნალები და საინფორმაციო მასალა. სრულად... წყარო: ორგანიზაციის ვებ-გვერდი სოციალურ ქსელში

თბილისი. ფრონტლაინ კლუბში გამართული დისკუსიის: „როგორი მოქალაქე უნდა გაზარდოს სკოლამ" – ვიდეოჩანაწერს აქვეყნებს „ლიბერალი". დისკუსია გაიმართა პროექტის: „დისკუსიები ბავშვთა უფლებების თემაზე", რომელსაც ფრონტლაინ კლუბი და ჟურნალი „ლიბერალი" გაეროს ბავშვთა ფონდის მხარდაჭერით ახორციელებენ. დისკუსია... წყარო: liberali.ge

გაეროს ბავშვთა ფონდმა მსოფლიო მასშტაბით ბავშვთა მდგომარეობის შესახებ ანგარიში გამოაქვეყნა. „მსოფლიო საზოგადოებრიობა მილიონობით ბავშვს დაკარგავს, თუ მომავალი, 15-წლიანი განვითარების გზაზე განსაკუთრებულ ყურადღებას არ დაუთმობს ყველაზე დაუცველ ჯგუფებს", ნათქვამია გაეროს ბავშვთა ფონდის ვებგვერდზე. სრულად... წყარო: unicef.ge

სამცხე-ჯავახეთი. 20 ივნისს, ახალციხის ახალგაზრდული ცენტრის მიერ დაგეგმილი „თანადგომის კვირეულის" ფარგლებში, პროგრამა „მომავლის თაობის" კურსდამთავრებულებმა ქალაქის ცენტრში საქველმოქმედო კონცერტი გამართეს. აქვე დადგმული იყო ყუთები შემოწირულობის შესაგროვებლად და დადიოდნენ ახალგაზრდები წარწერებიანი ფურცლებით: „თბილისო, სამცხე-ჯავახეთი თქვენთანაა". სამოქალაქო პროგრამა „მომავლის თაობის" კურსდამთავრებულები 13 ივნისის სტიქიის შედეგად დაზარალებული თბილისის დასახმარებლად მთელი კვირის განმავლობაში აგროვებდნენ პროდუქტებს. გუშინ, დღის განმავლობაში, მათ ეს პროდუქტიც გადაახარისხეს. აქციაში რეგიონის მასშტაბით არაერთი სკოლა იყო ჩართული. მათ შორის, ასპინძის მუნიციპალიტეტის სოფელ რუსთავის საჯარო სკოლის სამოქალაქო კლუბი „ხელი ხელს". კლუბის წევრებმა მოსახლეობაში 271 ლარი შეაგროვეს დაზარალებულთა ფონდში გადასარიცხად. ნინოწმინდის მუნიციპალიტეტის სოფელ ჰეშტიის N1 საჯარო სკოლის მოსწავლეებმა და მასწავლებლებმა კი საკუთარი სახსრებით დაზარალებულებისთვის საკვები პროდუქტები და სარეცხი საშუალებები შეიძინეს.