თბილისი. ამერიკის შეერთებული შტატების საელჩო განცხადებას ავრცელებს საქართველოს აფხაზეთისა და სამხრეთ ოსეთის რეგიონებში განვითარებულ მოვლენებზე. „ამერიკის შეერთებული შტატები სრულად უჭერს მხარს საქართველოს ტერიტორიულ მთლიანობასა და სუვერენიტეტს მის საერთაშორისოდ აღიარებულ საზღვრებში. შესაბამისად, ამერიკის შეერთებული შტატები არ სცნობს არჩევნების შედეგებს, რომელიც არალეგიტიმურად ჩატარდა საქართველოს ტერიტორიაზე, საქართველოს მთავრობის თანხმობის გარეშე; და გმობს გადაწყვეტილებას სამხრეთ ოსეთის არაკონტროლირებადი რეგიონის სამხედრო ძალების რუსეთის ფედერაციის შეიარაღებულ ძალების შემადგენლობაში შესვლის თაობაზე", ნათქვამია საელჩოს ვებ-გვერდზე სოციალურ ქსელში. სრულად... წყარო: საელჩოს ვებ-გვერდი სოციალურ ქსელში

თბილისი. არასამთავრობო ორგანიზაციები ეხმაურებიან არჩევნებთან და საარჩევნო სისტემასთან დაკავშირებით „ქართული ოცნების" უმრავლესობის მიერ საკონსტიტუციო კომისიაში წარმოდგენილი ცვლილებების პროექტს. „შემოთავაზებული ვერსიით, უქმდება საქართველოს პრეზიდენტის პირდაპირი არჩევის წესი და ის არაპირდაპირ, პარლამენტის მიერ აირჩევა. დემოკრატიის განვითარებისა და ამომრჩეველთა ინტერესების გათვალისწინებით, მიგვაჩნია, რომ პრეზიდენტი პირდაპირი წესით უნდა იყოს არჩეული. პრეზიდენტის პირდაპირი წესით არჩევნების გაუქმება არ წარმოადგენს საპარლამენტო მოდელიდან გამომდინარე აუცილებლობას, რადგან საპარლამენტო მმართველობის მქონე ბევრ ევროპულ ქვეყანაშიც, მიუხედავად შეზღუდული უფლებამოსილებებისა, პრეზიდენტი პირდაპირი წესით აირჩევა", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. არასამთავრობო ორგანიზაციები ოკუპირებულ აფხაზეთში დეფაქტო საპარლამენტო არჩევნების ჩატარებას ეხმაურებიან. „ჩვენ, საქართველოს სამოქალაქო საზოგადოების წარმომადგენლები, შეშფოთებას გამოვთქვამთ ოკუპირებულ აფხაზეთში 12 მარტს დაგეგმილი საპარლამენტო არჩევნების ჩატარებასთან დაკავშირებით და მივიჩნევთ, რომ აღნიშნული არჩევნები უკანონოა, ხოლო მის შედეგებს არ ძალუძს არსებითი ცვლილებები შეიტანოს ლეგიტიმურ პოლიტიკურ სივრცეში როგორ ადგილობრივ, ისე საერთაშორისო დონეზე", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. კოალიცია „მედიის ადვოკატირებისთვის” საზოგადოებრივ მაუწყებელზე მიმდინარე პროცესებს ეხმაურება. „კოალიცია მიიჩნევს, რომ საზოგადოებრივი მაუწყებლის არც ერთი გადაცემა არ უნდა დაიხუროს მანამ, სანამ გადაწყვეტილების მიმღები პირები არ დაასაბუთებენ გადაცემების დახურვის გადაწყვეტილებას და არ წარმოადგენენ კონკრეტულ სამაუწყებლო ბადეს თუ რას სთავაზობენ მაყურებელს სანაცვლოდ. 2017 წელს ქვეყანაში ტარდება თვითმმართველობის არჩევნები, მიმდინარეობს საკონსტიტუციო რეფორმა. საზოგადოებრივი მაუწყებელი ამ მნიშვნელოვან პროცესებს უნდა აშუქებდეს ინტენსიურად, უწყვეტ რეჟიმში. კოალიცია კატეგორიულად ეწინააღმდეგება პროცესების ამგვარ განვითარებას და მოუწოდებს საზოგადოებრივი მაუწყებლის სამეურვეო საბჭოს საჯარო გახადოს დაგეგმილი შეხვედრა გენერალურ დირექტორთან და სხდომის ვიდეო განათავსოს მაუწყებლის ვებგვერდზე, რომ დაინტერესებულ საზოგადოებას ჰქონდეს საშუალება გაეცნოს გენერალური დირექტორის გეგმებს", ნათქვამია ერთობლივ განცხადებაში. სრულად... წყარო: gyla.ge

თბილისი. ეროვნულ-დემოკრატიული ინსტიტუტი აქვეყნებს კავკასიის კვლევით რესურსების ცენტრის მიერ განხორციელებული საზოგადოებრივი აზრის კვლევის შედეგებს. „კითხვაზე თუ რატომ წავიდნენ არჩევნებზე, მოსახლეობის 68 პროცენტმა განაცხადა, რომ ეს მათი „მოქალაქეობრივი ვალი” იყო. მაგალითად, ქართული ოცნების მხარდამჭერების 11 პროცენტი აცხადებს, რომ არჩევნებზე პარტიის, ხოლო 8 პროცენტი კი მთავრობის მხარდასაჭერად წავიდა. ეს მაშინ როდესაც ამ პარტიის მხარდამჭერების უმეტესობამ (71 პროცენტი) არჩევნებში მონაწილეობა მოქალაქეობრივი ვალის მოხდის მიზნით მიიღო. ასევე უნდა აღინიშნოს, რომ არჩევნებიდან მოკლე ხანში მოქალაქეების მესამედმა არასწორად დაასახელა მისი მაჟორიტარის სახელი, რაც ამომრჩევლებსა და მაჟორიტარ კანდიდატებს შორის სუსტ ურთიერთკავშირზე მიუთითებს", ნათქვამია კვლევაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 7 დეკემბერს, საქართველოს ახალგაზრდა იურისტთა ასოციაციამ კვლევის - „2016 წლის საპარლამენტო არჩევნების გენდერული ანალიზი, ძირითადი მიგნებები და გამოწვევები" შუალედური შედეგების პრეზენტაცია გამართა. „მიზნის მისაღწევად, კვლევის ფარგლებში შესწავლილი და გაანალიზებული იქნება საქართველოს კანონმდებლობა (მათ შორის, პოლიტიკის დოკუმენტები), მიმოხილული იქნება საერთაშორისო სტანდარტები და საქართველოს მიერ ნაკისრი საერთაშორისო ვალდებულებები პოლიტიკურ-საარჩევნო პროცესებში ქალთა ჩართულობასთან დაკავშირებით. ასევე, მოხდება პრაქტიკის შესწავლა ქალთა პოლიტიკური და საარჩევნო უფლებების განხორციელების თაობაზე. კვლევა ეტაპობრივად, 2016-2018 საარჩევნო ციკლის ფარგლებში განხორციელდება", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია საარჩევნო საჩივრების განხილვის, შედეგების შეჯამების პროცედურების მონიტორინგის შედეგებს აქვეყნებს. „საარჩევნო დავების განხილვისას გამოვლინდა საარჩევნო კანონმდებლობის ვიწროდ განმარტებისა და საჩივრების დაუკმაყოფილებლობის ტენდენცია. როგორც საარჩევნო კომისიები, ასევე სასამართლოები საარჩევნო კანონმდებლობის ჩანაწერებს ძალიან ვიწროდ განმარტავდნენ, რაც ფაქტობრივად, მათთან წარდგენილი საჩივრების დაუკმაყოფილებლად დატოვების საფუძველი ხდებოდა. რჩებოდა შთაბეჭდილება, რომ ასეთი მიდგომა არა საქმეზე კანონიერების/მართლმსაჯულების დადგენას, არამედ საჩივრების თავიდან არიდებას ისახავდა მიზნად. მიუხედავად დარღვევის სიმძიმისა, ზემდგომი საარჩევნო კომისიები მხოლოდ დისციპლინური პასუხისმგებლობის ზომებს უფარდებდნენ საუბნო საარჩევნო კომისიების წევრებს და არ ახდენდნენ საჩივარში დაყენებული სხვა კანონიერი მოთხოვნების დაკმაყოფილებას", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. არასამთავრობო ორგანიზაციები ეხმაურებიან ცესკოს თავმჯდომარის განკარგულებას, რომელიც ბიუჯეტიდან პირდაპირ პარტიებზე გასანაწილებელი დაფინანსების ოდენობებს ეხება. „აღნიშნული განკარგულება წინააღმდეგობაში მოდის კანონმდებლობის მოთხოვნებთან და უსაფუძვლოდ, პრივილეგირებულ მდგომარეობაში აყენებს მხოლოდ ერთ პოლიტიკურ გაერთიანებას - „მრეწველობა გადაარჩენს საქართველოს." მიუხედავად იმისა, რომ ამ პარტიამ ვერ გადალახა კანონით დადგენილი 3%-იანი ბარიერი და 2016 წლის საპარლამენტო არჩევნების შედეგად დაფინანსება ვერ მოიპოვა, კანონის არასწორი განმარტების პირობებში, აღნიშული განკარგულების საფუძველზე, ის მიიღებს დამატებით დაფინანსებას 300 000 ლარის ოდენობით და საარჩევნო ადმინისტრაციებში კომისიის წევრის ყოლის უფლებასაც მოიპოვებს. აღნიშნულის გამო, მაგალითად, პოლიტიკური გაერთიანება „თავისუფალი დემოკრატები", რომელმაც გადალახა კანონით დადგენილი 3%-იანი ბარიერი და 2016 წლის საპარლამენტო არჩევნების შედეგად დაფინანსებაც მოიპოვა, საარჩევნო ადმინისტრაციებში კომისიის წევრის ყოლის უფლებას დაკარგავს”, ნათქვამია ერთობლივ განცხადებაში. სრულად... წყარო: gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოებამ ახალი პოლიტიკის დოკუმენტი მოამზადა. გიორგი ნონიაშვილი, პოლიტიკის მკვლევარი, მუშაობდა თემაზე: საარჩევნო ხმის უფლება შეზღუდული შესაძლებლობის მქონე პირთათვის. „დოკუმენტი მიმოიხილავს 2016 წლის საპარლამენტო არჩევნების მიმდინარეობისას, საარჩევნო გარემოს მისაწვდომობას შეზღუდული შესაძლებლობის მქონე პირთათვის: საარჩევნო ხმის უფლებით სარგებლობისას შექმნილ დაბრკოლებებს, დამკვიდრებული სტანდარტების შესაბამისობას შშმ პირთა უფლებების დაცვის კონვენციასთან და სხვა საკითხებს", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. საარჩევნო სისტემების განვითარების, რეფორმირებისა და სწავლების ცენტრის მიერ გამოცხადებულ საგრანტო კონკურსში განხორციელებული საქმიანობის პრეზენტაცია გაიმართა 17 ნოემბერს. კონკურსის ფარგლებში დაფინანსებულმა 9 არასამთავრობო ორგანიზაციამ წარადგინა პრეზენტაცია. სულ კონკურსის ფარგლებში, რომელიც 17 ივნისს იყო გამოცხადებული, დაფინანსდა 41 არასამთავრობო ორგანიზაცია, რომლებიც განხორციელებული პროექტების შესახებ პრეზენტაციებს ეტაპობრივად მართავენ – 17–20 ნოემბერს. შეგახსენებთ, რომ არასამთავრობო ორგანიზაციების მიერ განხორციელებული პროექტები მიზნად ისახავდა ელექტორატის, მათ შორის მოწყვლადი ჯგუფების წარმომადგენელთა საარჩევნო ცნობიერებისა და სამოქალაქო ჩართულობის დონის ამაღლების ხელშეწყობას საქართველოს პარლამენტის არჩევნებისთვის. სრულად... წყარო: electionreforms.ge

თბილისი. ჰაინრიხ ბიოლის ფონდის სამხრეთ კავკასიის ბიუროს ფემინისტური ვებ-გვერდი აქვეყნებს ანა ილურიძის ბლოგპოსტს: „შინაარსის კრიზისი ქართულ პოლიტიკაში". „არჩევნების შემდგომი მოვლენები თავისი არსით არის შინაარსის, მნიშვნელობის კრიზისი ქართულ პოლიტიკურ პროცესში. მდგომარეობა დასაფიქრებელია, რადგან პარლამენტში გაურკვეველი პოლიტიკური პრეფერენციების, სუსტი პოლიტიკური იდეოლოგიის მქონე ერთ პარტიას აქვს საკონსტიტუციო უმრავლესობისათვის საჭირო ხმებზე მეტი. ამავდროულად, მისი პირველივე განცხადება ადამიანის უფლებების შეზღუდვისაკენ და ხელისუფლებაში ძალთა არათანაბარი განაწილებისაკენ არის მიმართული. პარლამენტს გარეთ დარჩენილი ოპოზიციური ველი დაიშალა და მოვლენების მთელი სიმძიმე მესამე სექტორზე გადმოვიდა. თუმცა ამ სტატიაში საკონსტიტუციო უმრავლესობასთან დაკავშირებულ მსჯელობებს თავს ავარიდებ და იმ საკითხებზე გავამახვილებ ყურადღებას, რაც პარტიების პროგრამების ანალიზიდან უშუალოდ გამომდინარეობდა", ნათქვამია ბლოგპოსტში. სრულად... წყარო: www.feminism-boell.org

თბილისი. გენდერული საინფორმაციო პორტალი აქვეყნებს ინფოგრაფიკას, სადაც ამერიკის შეერთებული შტატების საპრეზიდენტო არჩევნების სოციალური ეგზიტპოლის შედეგებია წარმოდგენილი. იხ. ინფოგრაფიკა... წყარო: ginsc.net

თბილისი. ლიბცენტრის ინიციატივით ჟურნალისტმა ნიკო ნერგაძემ წაიკითხა ლექცია: პოლიტიკური იუმორის გავლენა არჩევნებზე. მათ ვინც ვერ შეძლო ლექციაზე დასწრება, ცენტრი საშუალებას აძლევს იხილოს მისი ვიდეოჩანაწერი. წყარო: ლიბცენტრის ვებგვერდი სოციალურ ქსელში

თბილისი. გენდერული საინფორმაციო პორტალი 2016 წლის მოწვევის პარლამენტში ქალთა პროცენტულ მაჩვენებელზე ინფოგრაფიკას აქვეყნებს. „მეორე ტურის შემდეგ, ბოლო მონაცემების მიხედვით, პარლამენტში 24 ქალი და 126 კაცი მოხვდა", ნათქვამია პორტალზე. სრულად... წყარო: ginsc.net

თბილისი. „საერთაშორისო გამჭვირვალობა - საქართველო" 30 ოქტომბრის საპარლამენტო არჩევნების მეორე ტურს 250 ადგილობრივი დამკვირვებლით უწევდა მონიტორინგს. „ჩვენმა დამკვირვებლებმა მთელი დღის განმავლობაში 70-მდე მეტნაკლებად სერიოზული ძირითადად პროცედურული დარღვევა აღმოაჩინეს. ჩვენ მიერ დაიწერა 11 საჩივარი. აღნიშნულ დარღვევებს ამომრჩევლის ნების ფორმირებასა და არჩევნების შედეგებზე მნიშვნელოვანი გავლენა ვერ ექნებოდა. საარჩევნო ადმინისტრაციამ სამივე დონეზე ძირითადად დამაკმაყოფილებლად იმუშავა. ცესკო მთლიანობაში დროულად უზრუნველყოფს კენჭისყრის შედეგების შეჯამებას და გამოქვეყნებას. ეს უწყება პერიოდულად ატარებდა ბრიფინგებს ამომრჩევლების ინფორმირების მიზნით", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება აქვეყნებს ბლოგპოსტს ხმების პარალელური დათვლის შედეგებზე. „...ხმების პარალელური დათვლის საფუძველზე მიღებული მონაცემებით შეგვიძლია განვაცხადოთ, რომ ხმის დათვლის პროცესში გამოვლენილი დარღვევები წარმოადგენდა ცალკეულ საყურადღებო შემთხვევებს, თუმცა, მას არ ჰქონდა სისტემური ხასიათი და ვერ მოახდენდა მაჟორიტარული არჩევნების შედეგებზე არსებითი ხასიათის ზეგავლენას," ნათქვამია ორგანიზაციის ვებ-გვერდზე. სრულად... წყარო: www.isfed.ge

თბილისი. „სამართლიანმა არჩევნებმა" 8 ოქტომბრის საპარლამენტო არჩევნების კენჭისყრის დღის, ხმის დათვლის პროცესისა და არჩევნების შემდგომ დარღვევებზე 244 საჩივარი წარადგინა. „უნდა აღინიშნოს, რომ, ძირითადად, „სამართლიანი არჩვენების" საჩივრების განხილვა საარჩევნო კანონმდებლობის მოთხოვნების დაცვით მიმდინარეობდა. ორგანიზაციის წარმომადგენლებს შესაძლებლობა ჰქონდათ დასწრებოდნენ საჩივრების განხილვას და სრულყოფილად დაეფიქსირებინათ ორგანიზაციის პოზიცია წარდგენილ საჩივრებზე. თუმცა, საჩივრების განხილვასთან და საოლქო კომისიების მიერ მიღებულ გადაწყვეტილებებთან დაკავშირებით გამოიკვეთა შემდეგი პრობლემები...", ნათქვამია ორგანიზაციის ვებ-გვერდზე. სრულად... წყარო: www.isfed.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „ბათილი ბიულეტენების სტატისტიკა 2002 – 2016". „ყოველ არჩევნებზე ხმების დათვლისას ბიულეტენების გარკვეული რაოდენობა ბათილად ცხადდება. წარმოგიდგენთ 2016 წლის 8 ოქტომბრის არჩევნებზე მაჟორიტარული და პროპორციული და ასევე 2002 წლიდან ჩატარებულ არჩევნებზე გაბათილებული ბიულეტენების სტატისტიკას", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. პროექტის „სამოქალაქო მონაწილეობის გაძლიერება საარჩევნო პროცესებში" შემაჯამებელი ღონისძიება გაიმართა. „პროექტის ფარგლებში ქვემო ქართლისა და სამცხე-ჯავახეთის რეგიონში მცხოვრები ახალგაზრდა თაობის ეთნიკური უმცირესობათა წარმომადგენელებისათვის განხორციელდა სხვადასხვა სახის საგანმანათლებლო - საინფორმაციო ხასიათის ღონისძიებები, რომლის მეშვეობითაც ახალგაზრდებს მიეწოდათ ინფორმაცია ისეთ საკითხებზე როგორიცაა: არჩევნების გზით ქვეყნის მართვის პროცესში მოქალაქეთა მონაწილეობის მნიშვნელობა, საარჩევნო უფლებების რეალიზების საკანონმდებლო მექანიზმები, არჩევნითი ინსტიტუტის კომპეტენციები, გენდერული ასპექტები და კენჭისყრის პროცედურები. მომზადდა ვიდეო რგოლები (ქართულ, სომხურ და აზერბაიჯანულ ენებზე), რომელიც განთავსდა რეგიონში არსებულ მედია საშუალებებში", ნათქვამია ორგანზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 26 ოქტომბერს, საზოგადოებრივი დამცველის დამკვირვებელმა საქართველოს პარლამენტის არჩევნების მეორე ტურისთვის, საარჩევნო ბიულეტინებისა და შემაჯამებელი ოქმების ბეჭდვის პროცესზე მონიტორინგი განახორციელა. „საქართველოს პარლამენტის არჩევნების მეორე ტურებისთვის 50 მაჟორიტარულ საარჩევნო ოლქში სულ 2 226 600 ბიულეტენი იბეჭდება, მათ შორის სომხურ-ქართული, აზერბაიჯანულ-ქართული და სომხურ-ქართულ-აზერბაიჯანული”, ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია აქვეყნებს ვიდეო რგოლს „რა არის ამომრჩევლის მოსყიდვა". წყარო: ორგანიზაციის ვებ-გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია აქვეყნებს ვიდეო რგოლს, სადაც წინასაარჩევნო აგიტაციის წესებზეა საუბარი. წყარო: ორგანიზაციის ვებ-გვერდი სოციალურ ქსელში