თბილისი. სამართლიანი არჩევნებისა და დემოკრატიის საერთაშორისო საზოგადოებამ, დღეს, 2017 წლის ადგილობრივი თვითმმართველობის არჩევნების წინასაარჩევნო გარემოს შეფასება გამოაქვეყნა. „დოკუმენტში განხილულია რამდენიმე მნიშვნელოვანი საკითხი, მათ შორის საკონსტიტუციო ცვლილებები და მეტწილად ინკლუზიურად დაწყებული პროცესი, რომელიც ივნისის ბოლოს ერთგვარ ჩიხში მას შემდეგ შევიდა, რაც მმართველმა პარტიამ საარჩევნო სისტემის ცვლილების 2024 წლამდე გადავადების შესახებ გადაწყვეტილება მოულოდნელად მიიღო. წინასაარჩევნო გარემოს შეფასების დოკუმენტში საუბარია 14 მუნიციპალიტეტის გაერთიანებასა და 7 თვითმმართველი ქალაქისთვის სტატუსის გაუქმების გადაწყვეტილებაზე, რომელსაც, ასევე, მოულოდნელად და ფართო საზოგადოების ჩართულობის გარეშე დაუჭირა მხარი პარლამენტმა. დოკუმენტში, ასევე, შეფასებულია მედია გარემო და ის ცვლილებები, რომელიც არჩევნებამდე რამდენიმე თვით ადრე მიმდინარეობდა ნაციონალურ მაუწყებლებში", - ნათქვამია შეფასებაში. დოკუმენტის მომზადება შესაძლებელი გახდა ამერიკელი ხალხის მხარდაჭერით, შეერთებული შტატების საერთაშორისო განვითარების სააგენტოს (USAID) და ფონდ „ეროვნული წვლილი დემოკრატიისთვის" (NED) მეშვეობით. ანგარიშში გამოთქმული მოსაზრებები ეკუთვნის მხოლოდ „სამართლიან არჩევნებს" და შესაძლოა არ გამოხატავდეს USAID-ის, აშშ მთავრობის ან NED-ის შეხედულებებს. სრულად  წყარო: ორგანიზაციის ვებგვერდი

სამცხე-ჯავახეთი. ახალციხის დემოკრატიული ჩართულობის ცენტრის ორგანიზებით, სამცხე-ჯავახეთში მოქმედი მედიასაშუალებებისთვის, დღეს გაიმართა ტრენინგი თემაზე: "2017 წლის არჩევნები და მედიის როლი". ტრენინგს „საქართველოს ახალგაზრდა იურისტთა ასოციაციის" წარმომადგენელი უძღვებოდა. შეხვედრის ძირითად მიზანს წარმოადგენდა ჟურნალისტების ინფორმირება ისეთ საკითხებზე, როგორიცაა: საარჩევნო დავები და მოსარჩელეთა წრე, დისციპლინური პასუხისმგებლობა, დისციპლინური პასუხისმგებლობის დაკისრების წესი, ადმინისტრაციული პასუხისმგებლობა, ადმინისტრაციული პასუხისმგებლობის საქმისწარმოება, კენჭისყრის დღის გაშუქების პრინციპები. სრულად წყარო: ორგანიზაციის გვერდი სოციალურ ქსელში

სამეგრელო-ზემო სვანეთი. „ქალები უფრო მეტს იტყვიან ქართულ პოლიტიკაში, ვიდრე დღეს ამბობენ მამაკაცები. ეს პროცესი უკვე დაწყებულია და ამას ვერაფერი შეაჩერებს. ის, რომ ქალები უნდა იყოვნენ სამზარეულოში, მოძველდა უკვე. მეტი ქალის პოლიტიკაში ყოფნით, ლიბერალული გახდება პოლიტიკა. ყველა პარტიამ უნდა წარადგინოს ქალები მერის კანდიდატებად. ქალი არის კარგი ორგანიზატორი, მენეჯერი”, - ეს განცხადებები გაკეთდა ფოთის გენდერული მედიაცენტრის მიერ ორგანიზებულ შეხვედრა-დისკუსიაზე, რომლშიც პოლიტიკური პარტიების ლიდერებმა, სხვადასხვა სფეროში წარმატებულმა და აქტიურმა ქალებმა მიიღეს მონაწილეობა. შეხვედრის მიზანი თვითმართველობის არჩევნებში ქალი კანდიდატების გაძლიერება და მხარდაჭერა იყო. დისკუსია გაიმართა პროექტის - ,,თანასწორობა იგებს" ფარგლებში, რომელსაც ,,ჟურნალისტთა ქსელი გენდერული თანასწორობისთვის" აშშ-ს საერთაშორისო განვითარების სააგენტოსა (USAID) და საარჩევნო სისტემების საერთაშორისო ფონდის (IFES) მხარდაჭერით ახორციელებს. სრულად  წყარო: ორგანიზაციის გვერდი სოციალურ ქსელში

აჭარა. ბათუმის დემოკრატიული ჩართულობის ცენტრში ხელვაჩაურის მუნიციპალიტეტში მცხოვრებ ახალგაზრდებს საინფორმაციო ხასიათის შეხვედრა ჩაუტარდათ. „სემინარი მიზნად ისახავდა 2017 წლის თვითმმართველობის არჩევნებთან დაკავშირებით ამომრჩეველთა ინფორმირებას, არჩენებში მონაწილეობის მოტივაციის გაზრდას და ამომრჩევლებს შორის კომუნიკაციის გაძლიერებას. ა/ო სამართლიანი არჩევნების აჭარა-გურიის კოორდინატორმა, მადონა ბერიძემ ახალგაზრდებს თვითმმართველობის არჩევნების შესახებ მიაწოდა ინფორმაცია, დაურიგდათ საინფორმაციო ბარათები და გაიმათა დისკუსია", ნათქვამია დემოკრატიული ჩართულობის ცენტრის ვებ-გვერდზე სოციალურ ქსელში. სრულად... წყარო: ცენტრის ვებ-გვერდი სოციალურ ქსელში

ქვემო ქართლი. რუსთავის გენდერის მედია ცენტრში გაიმართა დისკუსია, რომელშიც ქვემო ქართლის რეგიონში სხვადასხვა სფეროში მოღვაწე ეთნიკურად აზერბაიჯანელმა და ქართველმა ქალებმა მიიღეს მონაწილეობა. შეხვედრის მიზანი იყო ქალთა პოლიტიკურ გაძლიერება, არჩევნებში ქალთა მონაწილეობის გაზრდა და მოსალოდნელ შედეგებზე საზოგადოების ცნობიერების ამაღლება. სრულად... წყარო: ორგანიზაციის ვებ-გვერდი სოციალურ ქსელში

ქვემო ქართლი. „ჟურნალისტთა ქსელი გენდერული თანასწორობისთვის" წარმომადგენლები გარდაბნის მუნიციპალიტეტის სოფელ ნაზარლოში მცხოვრებ ეთნიკურ აზერბაიჯანლებს შეხვდნენ. „შეხვედრაზე მოსახლეობას ქალების უფლებებისა და თანასწორობის საკითხებზე მიეწოდა ინფორმაცია, საუბარი იყო საარჩევნო ძალადობასა და არჩევანის თავისუფლებაზე", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. არასამთავრობო ორგანიზაციამ - „ჟურნალისტთა ქსელი გენდერული თანასწორობისათვის", IFES-ის და USAID-ის მხარდაჭერით, ქალაქ ოზურგეთში დისკუსია გამართა. დისკუსიაზე განიხილეს ყველა ის საკითხი და გამოწვევა, რომლის წინაშეც დგებიან შშმპ პირები არჩევნების დროს, ასევე მიმოიხილეს სოციალური პაკეტები, რომლებსაც შშმ პირებს ადგილობრივი ხელისუფლება სთავაზობს. „საარჩევნო გარემო შეზღუდული შესაძლებლობის მქონე პირებისათვის (შშმპ) უნდა იყოს ადაპტირებული. შშმ ქალები ოზურგეთში საკმაოდ აქტიურები არიან. შარშან ერთ-ერთ საარჩევნო უბანზე დასაქმებული იყო შეზღუდული შესაძლებლობის მქონე პირი (შშმპ) და წელსაც გვსურს გავაგრძელოთ ეს ტრადიცია", - განაცხადა დისკუსიაზე ოზურგეთის #60 საოლქო საარჩევნო კომისიის თავმჯდომარემ, ზვიად თენიეშვილმა. შეხევდრას საქველმოქმედო ფონდ „გურიას" 15 შშმ ბენეფიციარი, ოზურგეთის მუნიციპალიტეტის მმართველობისა და თვითთმართველობის სამსახურებისა და ადგილობრივი არასამთავრობო ორგანიზაციების წარმომადგებელები ესწრებოდნენ. სრულად  წყარო: ორგანიზაციის გვერდი სოციალურ ქსელში

იმერეთი. 8 ივლისს, ქუთაისის დემოკრატიული ჩართულობის ცენტრში პროექტის - „მეტი ქალის ხმა ადგილობრივ თვითმმართველობაში" პრეზენტაცია გამართა. „პრეზენტაციას ესწრებოდნენ იმერეთის მხარეში მოქმედი პოლიტიკური პარტიების, საარჩევნო სუბიექტების, არასამთავრობო და მედია ორგანიზაციების წარმომადგენლები, რომლებიც მომავალში თავადაც ჩაერთვებიან პროექტის განხორციელების ფარგლებში. პროექტის მიზანია იმერეთის მხარეში პოლიტიკური პარტიებისა და კანდიდატების წინასაარჩევნო პროგრამებში ქალი ამომრჩევლებისთვის მნიშვნელოვანი საკითხების ასახვის ხელშეწყობა და მათი ადვოკატირება", ნათქვამია ადგილობრივი დემოკრატიის სააგენტოს ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ჟურნალისტური ეთიკის ქარტია არჩევნების გაშუქების სახელმძღვანელო დოკუმენტს აქვეყნებს. „წინასაარჩევნო კამპანია და კენჭისყრის დღე ქვეყანაში მიმდინარე მნიშვნელოვანი ამბავია, რომლის გაშუქებამაც შესაძლებელია გავლენა იქონიოს არამხოლოდ იმაზე, თუ რა გადაწყვეტილებას მიიღებს ამომრჩეველი საბოლოოდ, არამედ ზოგადად საარჩევნო გარემოზე. სწორედ ამიტომ იზრდება მედიის პასუხისმგებლობა, რათა საარჩევნო სუბიექტები გააშუქონ მიუკერძოებლად, არადისკრიმინაციულად და სამართლიანად", ნათქვამია ქარტიის ვებ-გვერდზე. სრულად... წყარო: qartia.org.ge

თბილისი. სამართლიანი არჩვენებისა და დემოკრატიის საერთაშორისო საზოგადოება (ISFED) აქვეყნებს დოკუმენტს: „საარჩევნო ადმინისტრაციის დაკომპლექტების რეფორმა". „დოკუმენტში განხილულია საარჩევნო ადმინისტრაციის დაკომპლექტებასთან დაკავშირებით არსებული პრობლემები. აღნიშნულ ორგანოს წამყვანი როლი აქვს სამართლიანი, გამჭვირვალე და დემოკრატიული არჩევ ნების ჩატარების პროცეს ში, რაც მნიშვნელოვანია ქვეყნის შემდგომი განვითარებისა და ევროატლანტიკურ სივრცეში ინტეგრაციისთვის. აქედან გამომდინარე, მნიშვნელოვანია საარჩევნო ადმინისტრაცია საზოგადოე ბის მაღალი ნდობით სარგებლობდეს", ნათქვამია დოკუმენტში. სრულად... წყარო: www.isfed.ge

აჭარა. არასამთავრობო ორგანიზაცია „სამართლიანი არჩევნებისა და დემოკრატიის საერთაშორისო საზოგადოება" (ISFED) ევროკავშირის დაფინანსებით ახორციელებს პროექტს „თვითმმართველობის არჩევნების შესახებ ცნობიერების ამაღლება ადგილობრივი სამოქალაქო ორგანიზაციებისა და თვითმმართველობების ჩართულობით". „პროექტი მიზნად ისახავს ადგილობრივი არჩევნების შესახებ საზოგადოების ცნობიერების ამაღლებას რეგიონებში მცხოვრები ახალგაზრდების, საჯარო მოხელეებისა და ეთნიკური უმცირესობის წარმომადგენელი ქალებისათვის. პროექტის ფარგლებში, ხულოს მუნიციპალიტეტის გამგეობისა და საკრებულოს თანამშრომლებთან საარჩევნო თემატიკაზე შეხვედრა გაიმართა. შეხვედრაზე განხილული იქნა ისეთი მნიშვნელოვანი საკითხები, როგორიცაა - თვითმმართველობის ორგანოების ვალდებულებები წინასაარჩევნო პერიოდში, მათი ურთიერთობა საარჩევნო ადმინისტრაციასთან, საარჩევნო კანონმდებლობით დადგენილი აკრძალვები ადმინისტრაციული რესურსების გამოყენების თაობაზე, ამომრჩევლის მოსყიდვის ცნება და სხვა", ნათქვამია ხულოს მუნიციპალიტეტის ოფიციალურ საინფორმაციო პორტალზე. სრულად... წყარო: khulo.ge

აჭარა. ქობულეთის მუნიციპალიტეტის სააქტო დარბაზში პროექტის „თვითმმართველობის არჩევნების შესახებ ცნობიერების ამაღლება ადგილობრივი სამოქალაქო ორგანიზაციებისა და თვითმმართველობების ჩართულობით" ფარგლებში სემინარი ჩატარდა. „შეხვედრა მიზნად ისახავდა ადგილობრივი თვითმმართველობის არჩევნების შესახებ საზოგადოების ცნობიერების ამაღლებას რეგიონებში მცხოვრები ახალგაზრდების, ადგილობრივი თვითმმართველობების წარმომადგენლობებისა და ეთნიკური უმცირესობების წარმომადგენელი ქალებისათვის. პროექტი „თვითმმართველობის არჩევნების შესახებ ცნობიერების ამაღლება ადგილობრივი სამოქალაქო ორგანიზაციებისა და თვითმმართველობების ჩართულობით" ევროკავშირის ფინანსური მხარდაჭერით ხორციელდება", ნათქვამია ქობულეთის მუნიციპალიტეტის ვებ-გვერდზე სოციალურ ქსელში. სრულად... წყარო: მუნიციპალიტეტის ვებ-გვერდი სოციალურ ქსელში

აჭარა. ხელვაჩაურის მუნიციპალიტეტის სააქტო დარბაზში პროექტის „თვითმმართველობის არჩევნების შესახებ ცნობიერების ამაღლება ადგილობრივი სამოქალაქო ორგანიზაციებისა და თვითმმართველობების ჩართულობით" ფარგლებში სემინარი ჩატარდა. „სემინარი საქართველოს ყველა მუნიციპალიტეტში ტარდება და მოიცავს ისეთ თემებს, როგორიცაა ადგილობრივი თვითმმართველობის არჩევნების მნიშვნელობა, ადგილობრივი თვითმმართველობის უფლებამოსილება წინასაარჩევნო პერიოდში, ადმინისტრაციული რესურსის არამიზნობრივი გამოყენება, ამომრჩევლის მოსყიდვა. ტრენინგს გამგეობისა და საკრებულოს თანამშრომლები ესწრებოდნენ. შეხვედრის მიზანი იყო ადგილობრივი თვითმმართველობის არჩევნების შესახებ საზოგადოების ცნობიერების ამაღლება რეგიონებში მცხოვრები ახალგაზრდების, ადგილობრივი თვითმმართველობების წარმომადგენლობებისა და ეთნიკური უმცირესობების წარმომადგენელი ქალებისათვის", ნათქვამია ხელვაჩაურის მუნიციპალიტეტის ვებ-გვერდზე სოციალურ ქსელში. სრულად... წყარო: მუნიციპალიტეტის ვებ-გვერდი სოციალურ ქსელში

თბილისი. განვითარების და დემოკრატიის ცენტრის (CDD) პოლიტიკური პარტიების წარმომადგენელების ტრენინგი დაიწყო. „კვალიფიციური ტრენერები სამეგრელო და ზემო სვანეთის რეგიონის ხუთი თვითმმართველი ერთეულის (აბაშა, მარტვილი, სენაკი, ჩხოროწყუ, ხობი) პოლიტიკური პარტიების წარმომადგენელებს გადაამზადებენ. ტრენინგი პროექტ „პოლიტიკური პარტიების რესურსების გაძლიერება დემოკრატიული პროცესების ხელშეწყობისათვის" ფარგლებში საარჩევნო სისტემების განვითარების, რეფორმებისა და სწავლების ცენტრი მხარდაჭერით ხორციელდება", ნათქვამია ორგანიზაციის ვებ-გვერდზე სოციალურ ქსელში სრულად... წყარო: ორგანიზაციის ვებ-გვერდი სოციალურ ქსელში

რუსთავი. საქართველოს ახალგაზრდა იურისტთა ასოციაცია აგრძელებს შეხვედრებს საარჩევნო საკითხებთან დაკავშირებით. დღეს შეხვედრა „დემოკრატიული ჩართულობის ცენტრის" რუსთავის ოფისში, პოლიტიკური პარტიების, მედიისა და საზოგადოებრივი ორგანიზაციების წარმომადგენლებისთვის გაიმართა. შეხვედრაზე საუბარი წინასაარჩევნო გარემოსა და არსებული გამოწვევების თაობაზე წარიმართა. არჩევნების მონიტორინგის დიდ ნაწილს საია პროექტის - „საქართველოში კონკურენტული, სამართლიანი და ინკლუზიური საარჩევნო გარემოს ხელშეწყობა 2016-2018 საარჩევნო ციკლისთვის" - ფარგლებში, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით ახორციელებს. პროექტის მიზანს საქართველოში ინკლუზიური, კონკურენტული და გამჭვირვალე საარჩევნო პროცესების ხელშეწყობა წარმოადგენს. სრულად  წყარო: საია-ს გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) აქვეყნებს კვლევას: „ქალები ქართულ პოლიტიკაში", რომელიც 2016-2018 წლებში საარჩევნო ციკლის პერიოდში ქალთა პოლიტიკურ პროცესებში ჩართულობას სწავლობს. კვლევის ძირითადი მიგნებებია: საქართველოში ქალთა პოლიტიკურ პროცესებში მონაწილეობის ზრდა არ არის შეუქცევადი პროცესი - ქალთა პოლიტიკური მონაწილეობა მუდმივად ქნება დამოკიდებული რომელიმე პოლიტიკური ჯგუფის კეთილ ნებაზე; საარჩევნო სისტემა ხელს არ უწყობს ქალთა პოლიტიკური მონაწილეობის ზრდას; მაჟორიტარული საარჩევნო სისტემა ნაკლებად აძლებს ქალ პოლიტიკოსებს საშუალებას ნომინირებულნი იყვნენ კანდიდატებად; არჩევნებში მონაწილეობის მისაღებად და გამარჯვების შემაფერხებელი ფაქტორია ფინანსების არ ქონა; სიებში ქალების არასწორი პოზიციონირება ხელს უშლის მათ გამარჯვებას; სრულად... წყარო: gyla.ge

თბილისი. 11 ივლისს, დემოკრატიული ჩართულობის ცენტრებში 2017 წლის თვითმმართველობის არჩევნებთან დაკავშირებით მედიაცენტრები გაიხსნება. „მედიაცენტრები მოქალაქეებს, ჟურნალისტებს, არასამთავრობო ორგანიზაციებს, კანდიდატებსა და პოლიტიკურ პარტიებს შესთავაზებს ღია და ნეიტრალურ სივრცეებს ინფორმაციის გავრცელებისა და დისკუსიებისთვის. მედიაცენტრები ხელს შეუწყობს კანდიდატებსა და მათ ამომრჩევლებს შორის დიალოგის წარმართვას, რათა მოქალაქეები გაეცნონ კანდიდატების საარჩევნო პროგრამებს და ინფორმირებული არჩევანი გააკეთონ", ნათქვამია დემოკრატიული ჩართულობის ცენტრების ვებ-გვერდზე სოციალურ ქსელში. სრულად... წყარო: ცენტრის ვებ-გვერდები სოციალურ ქსელში

თბილისი. 4 ივლისს საქართველოს ახალგაზრდა იურისტთა ასოციაციამ (საია) გამართა კონფერენცია - „2016 წლის საპარლამენტო არჩევნებზე მიღებული გამოცდილება და სამომავლო ნაბიჯები 2017 წლის ადგილობრივი თვითმმართველობის არჩევნებისთვის". კონფერენციაში მონაწილეობდნენ საარჩევნო პროცესებში ჩართული მხარეები, მათ შორის, საარჩევნო ადმინისტრაციის, იუსტიციისა და შინაგან საქმეთა სამინისტროს, სახელმწიფო აუდიტის სამსახურის, სადამკვირვებლო ორგანიზაციებისა და საელჩოების წარმომადგენლები. კონფერენციაზე მსჯელობა წარიმართა 2016 წლის საპარლამენტო არჩევნებზე საარჩევნო და პოლიტიკური უფლებების რეალიზებისას საკანონმდებლო და პრაქტიკის კუთხით იდენტიფიცირებული გამოწვევებისა და მათ გადაჭრის გზების შესახებ, რომელიც ხელს შეუწყობს საქართველოში კონკურენტული, სამართლიანი და ინკლუზიური საარჩევნო გარემოს დამკვიდრებას. საიამ საკუთარი მიგნებები და რეკომენდაციები წარმოადგინა 5 ძირითადი თემატური მიმართულებით: წინასაარჩევნო, არჩევნების დღე და შემდგომი პერიოდის დარღვევები (წინასაარჩევნო აგიტაცია, ადმინისტრაციული რესურსის გამოყენება და სხვა); არჩევნებში ჩართული უწყებების (საარჩევნო ადმინისტრაცია, აუდიტის სამსახური, უწყებათშორისი კომისია და სხვა) საქმიანობა; ობიექტური, სამართლიანი, დამოუკიდებელი და ეფექტური გამოძიების ხელშეწყობა სისხლის სამართლისა და ადმინისტრაციული პასუხისმგელობის ზომების გამოყენებისას პოლიტიკურად აქტიური პირების მიმართ; სამართლიანი სასამართლოს ხელმისაწვდომობისა და ერთგვაროვანი პრაქტიკის დამკვიდრების ხელშეწყობა; ინკლუზიური და კონკურენტული საარჩევნო გარემოს ხელშეწყობა ქალების, შშმ პირებისა და ეთნიკური უმცირესობის წარმომადგენლებისთვის. თითოეული თემატური ჯგუფის წარმომადგენლებმა კონფერენციის მსვლელობისას იმსჯელეს და წარმოადგინეს ძირითადი მიგნებები და ერთიანი ხედვები, რომელიც ზემოაღნიშნული მიმართულებების მიხედვით, შესაძლებლობას მოგვცემს როგორც საკანონმდებლო, ასევე არსებული მანკიერი პრაქტიკის გაუმჯობესების კუთხით დავგეგმოთ სამომავლო ნაბიჯები სამართლიანი, კონკურენტული და ინკლუზიური საარჩევნო გარემოს შესაქმნელად. სრულად წყარო: საქართველოს ახალგაზრდა იურისტთა ასოციაციის ვებგვერდი

თბილისი. განვითარებისა და დემოკრატიის ცენტრი (CDD) აქვეყნებს რეკომენდაციებს საარჩევნო გარემოს გაუმჯობესებისთვის. „მიგვაჩნია, რომ მოახლოებული 2017 წლის ადგილობრივი თვითმმართველობის წარმომადგენლობითი და აღმასრულებელი ორგანოების არჩევნებისთვის საარჩევნო გარემოს გაუმჯობესება და საკანონმდებლო ბაზის დახვეწა კვლავაც აქტუალურია. ეს კი მოითხოვს ღია დისკუსიების წარმართვას, საარჩევნო პროცესში მონაწილე მხარეთა მაქსიმალურ ჩართულობას, საერთაშორისო გამოცდილების გაზიარებასა და ეფექტიან კონსენსუსს", ნათქვამია ორგანიზაციის ვებ-გვერდზე. სრულად... წყარო: cdd.ge

თბილისი. საზოგადოებრივმა ორგანიზზაციებმა დღეს ერთობლივ პრესკონფერენციაზე წარადგინეს ღია წერილი, რომელიც გაეგზავნება საქართველოში მოქმედ ყველა დიპლომატიურ წარმომადგენლობას, ევროპის პარლამენტს, ევროკავშირის უმაღლეს წარმომადგენელ ფედერიკა მოგერინის, ევროკომისარ იოჰანეს ჰანსს, ამერიკის სახელმწიფო დეპარტამენტს. წერილი საკონსტიტუციო კომისიის მუშაობასა და პროპორციული საარჩევნო სისტემის გადავადებას შეეხება. „გიგზავნით ამ წერილს, რათა შეგატყობინოთ საქართველოს მმართველი პოლიტიკური პარტიის მეტად საზიანო ქმედებების შესახებ, რომლებსაც აუცილებლად უარყოფითი ზეგავლენა ექნება ქვეყანაში დემოკრატიის ხარისხზე და რაც, საბოლოო ჯამში, პოლიტიკური ძალაუფლების კონსოლიდაციის საშიშ მცდელობას წარმოადგენს. კერძოდ, ჩვენ ვგულისხმობთ საქართველოში მიმდინარე საკონსტიტუციო რეფორმის პროცესთან დაკავშირებულ ბოლო დროს განვითარებულ მოვლენებს", - ნათქვამია წერილში. „„ქართული ოცნება" საზოგადოებას დაპირდა, რომ 2020 წლისთვის საარჩევნო სისტემა შეიცვლებოდა და გახდებოდა უფრო სამართლიანი. ზუსტად ამ მოლოდინით ჩვენ, საქართველოს სამოქალაქო საზოგადოების ორგანიზაციები, დავთანხმდით საკონსტიტუციო კომისიის წევრობას. კომისიის მუშაობის განმავლობაში, ღიად დავაფიქსირეთ ყველა ჩვენი რეკომენდაცია და წუხილი როგორც საკონსტიტუციო კომისიის წინაშე, ისე ეროვნული მედიის საშუალებით და საჯარო შეხვედრებზე. ასევე, ჩვენი მოსაზრებები მივაწოდეთ ვენეციის კომისიას და არ დავიშურეთ ძალისხმევა, რათა ხელი შეგვეწყო კონსტრუქციული, ყოვლისმომცველი და კონსენსუსზე დაფუძნებული კონსტიტუციის მიღების პროცესისთვის" - აცხადებენ წერილის ხელმომწერი საზოგადოებრივი ორგანიზაციები. „მმართველმა პარტიამ გადაწყვიტა უგულებელყო არამარტო ვენეციის კომისიისგან მიღებული პასუხი, არამედ ასევე საკონსტიტუციო კომისიის მუშაობის მთელი პროცესი, სამოქალაქო საზოგადოებისა და ყველა პოლიტიკური პარტიის შეხედულებები; და არსებული ყველა მოლოდინის და პროექტის თავდაპირველი ვარიანტის საწინააღმდეგოდ, ცვლილებების დანერგვა საარჩევნო სისტემაში გადადო 2024 წლამდე (მომდევნო არჩევნების შემდგომ მორიგ ან რიგგარეშე საყოველთაო არჩევნებამდე). სხვა სიტყვებით რომ ვთქვათ, "ქართულმა ოცნებამ" თავიდან კი განაცხადა, რომ არსებული საარჩევნო სისტემა რეფორმირებულ უნდა იქნეს, რათა უფრო სამართლიანი გახდეს, მაგრამ შემდეგ გადაწყვიტა, შეენარჩუნებინა იგი მოქალაქეებისთვის, სამოქალაქო საზოგადოებისა და სხვა პოლიტიკური პარტიებისთვის მიცემული დაპირებების, მათ მიერ ინიცირებული საკონსტიტუციო კომისიის რამდენიმეთვიანი მუშაობის მიუხედავად და ვენეციის კომისიის რეკომენდაციების საწინააღმდეგოდ; და ეს ყველაფერი გაკეთდა მხოლოდ ერთადერთი მიზნით - მმართველ პარტიას ძალაუფლების შენარჩუნება სურს" - ვკითხულობთ წერილში. საზოგადოებრივი ორგანიზაციები მოუწოდებენ საერთაშორისო საზოგადოებას, გამოიყენოს მის ხელთ არსებული ყველა ბერკეტი, რომ შემოდგომაზე საქართველოს პარლამენტმა საბოლოოდ არ დაამტკიცოს ცვლილებები ქვეყნის კონსტიტუციაში. სრულად წყარო: „საერთაშორისო გამჭვირვალობა - საქართველოს" ვებგვერდი

თბილისი. საქართველოს სახალხო დამცველმა 2017 წლის 20 ივნისს საქართველოს განათლებისა და მეცნიერების სამინისტროს მიმართა რეკომენდაციით საჯარო სკოლების რესურს-ოთახების საარჩევნო მიზნებისთვის გამოყენების პრაქტიკის აღმოფხვრის თაობაზე. როგორც სახალხო დამცველის აპარატში აცხადებენ, საქმის შესწავლის შედეგად დადასტურდა, რომ 2016 წლის 8 ოქტომბრის საპარლამენტო არჩევნების პერიოდში, საქართველოს რამდენიმე საჯარო სკოლაში რესურს-ოთახები, დროებით, საუბნო საარჩევნო კომისიებისთვის იყო გადაცემული. შესაბამისად, სპეციალური საგანმანათლებლო საჭიროების მქონე მოსწავლეები მოკლებული იყვნენ შესაძლებლობას ესარგებლათ განათლების მიღების დროს მათთვის განსაზღვრული ინდივიდუალური მიდგომის მნიშვნელოვანი კომპონენტით. აღნიშნულ ფაქტებთან დაკავშირებით, საქართველოს განათლებისა და მეცნიერების სამინისტროს სათანადო რეაგირება არ მოუხდენია, რამაც სახალხო დამცველის აზით, შესაძლოა ხელი შეუწყოს საუბნო საარჩევნო კომისიების საქმიანობისთვის რესურს–ოთახების გამოყენების მანკიერი პრაქტიკის დამკვიდრებას. სახალხო დამცველის აზრით, საკითხი განსაკუთრებულ მნიშვნელობას იძენს 2017 წლის ოქტომბერში დაგეგმილ ადგილობრივი თვითმმართველობის არჩევნებთან მიმართებით. სრულად წყარო: საქართველოს სახალხო დამცველის ვებგვერდი

თბილისი. საია, „საერთაშორისო გამჭვირვალობა - საქართველო", „სამართლიანი არჩევნებისა და დემოკრატიის საერთაშრისო საზოგადოება", „საქართველოს საარჩევნო კოდექსში" შესატან ცვლილებებთან დაკავშირებით, მოსაზრებებს აქვეყნებენ. „აღნიშნული ცვლილებებიდან დადებით შეფასებას იმსახურებს ის რეგულაციები, რომლითაც მარტივდება საარჩევნო სუბიექტიების, სადამკვირვებლო და მედია ორგანიზაიების საარჩევნო ადმინისტრაციებში რეგისტრაცია (შემოდის ნებაყოფლობითი ხასიათის ელექტრონული რეგისტრაცია); აგრეთვე, პოზიტიურ შეფასებას იმსახურებს ის რეგულაციები, რომელიც ემსახურება საარჩევნო სუბიექტების რეგისტრაციის პროცესის გაუმჯობესებას (მათ შორის, კოორდინაციას სახელმწიფო უწყებებს შორის, საარჩევნო სუბიექტებისგან განახლებული ინფორმაციის მიღებას და სხვა); თუმცა, აღნიშნული ცვლილებების პარალალურად, უარყოფით შეფასებას იმსახურებს საარჩევნო კომისიების დაკომპლექტების ახალი წესი, აგრეთვე - რეგულაციები, რომელიც გარკვეულ შეზღუდვებს ადგენს საარჩევნო ადმინისტრაციის გამჭვირვალობისა და ანგარიშვალდებულების კუთხით (ცვლილებები მედიის მიერ საარჩევნო კომისიების სხდომების გაშუქების, აგრეთვე, საჯარო ინფორმაციის გაცემის კუთხით)", - ნათქვამია ორგანიზაციების მიერ გამოქვეყნებულ დოკუმენტში. სრულად წყარო: „საერთაშორისო გამჭვირვალობა - საქართველოს" ვებგვერდი