თბილისი. საერთაშორისო გამჭვირვალობა საქართველო, სამართლიანი არჩევნები და საქართველოს ახალგაზრდა იურისტთა ასოციაცია (საია) წინასაარჩევნო გარემოს აფასებს. „წინასაარჩევნო პერიოდი, ძირითადად, მშვიდ ვითარებაში მიმდინარეობდა და პოლიტიკური პარტიების აქტივობა შესამჩნევი იყო. ...მთელი ქვეყნის მასშტაბით, აშკარა იყო მმართველი პარტიის დომინანტური მდგომარეობა კამპანიის პერიოდში, რაც პარტიების შემოწირულობებისა და წინასაარჩევნო ხარჯვის მხრივ არსებულ საგრძნობ დისბალანსშიც გამოიკვეთა. მიუხედავად იმისა, რომ ძალადობრივ ინციდენტებს მასიური სახე არ ჰქონია, არჩევნების დღის მოახლოებასთან ერთად, მნიშვნელოვნად იმატა ზეწოლა-მუქარის შემთხვევებმა. კვლავ პრობლემურად რჩება მმართველი პარტიის სასარგებლოდ ადმინისტრაციული რესურსის გამოყენების ტენდენცია. რიგ შემთხვევებში, ადგილი ჰქონდა წინასაარჩევნო კამპანიისთვის ხელის შეშლის, აგიტაციაში კანონდარღვევით მონაწილეობის შემთხვევებს, მათ შორის საჯარო მოხელეებისა და საარჩევნო კომისიის წევრების მიერ. ამომრჩევლის მოსყიდვის მნიშვნელოვანი ფაქტების შესახებ არ გამხდარა ცნობილი", ნათქვამია საერთაშორისო გამჭვირვალობა - საქართველოს ვებ-გვერდზე. სრულად... წყარო: www.transparency.ge

თბილისი. ომბუდსმენი ეხმიანება 19 ოქტომბერს მარნეულის მუნიციპალიტეტის სოფელ ყიზილაჯლოში „ქართული ოცნების" შტაბთან განხორციელებულ თავდასხმას. „უჩა ნანუაშვილი საარჩევნო სუბიექტებსა და ამომრჩეველს სიმშვიდისკენ მოუწოდებს და აცხადებს, რომ არჩევნების პროცესში ძალადობა ყოვლად დაუშვებელია. მითუმეტეს საგანგაშოა, რომ ასეთ მძიმე ფაქტს ადგილი აქვს არჩევნებამდე ორი დღით ადრე. სახალხო დამცველი დაზარალებულებს გამოჯანმრთელებას უსურვებს და იმედს გამოთქვამს, რომ გამოძიება ოპერატიულად და ეფექტურად ჩატარდება და გამოძიების პროცესში არ დარჩება პასუხგაუცემელი კითხვები", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. „საერთაშორისო გამჭვირვალობა-საქართველომ" 2017 წლის ადგილობრივი თვითმმართველობის არჩევნებისთვის პოლიტიკური პარტიების დაფინანსების შესახებ შუალედური კვლევა მოამზადა. „კვლევის თანახმად, 1 ივნისიდან 1 ოქტომბრამდე პერიოდში 10 319 998 ლარის ოდენობის მთლიანი შემოწირულობების 93% მმართველმა პარტიამ მიიღო, რაც 12-ჯერ მეტია დანარჩენი 14 კვალიფიციური სუბიექტის მიერ ჯამურად მიღებულ თანხებზე", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია (საია) თვლის, რომ წლის ადგილობრივი თვითმმართველობის არჩევნების წინასაარჩევნო პროცესები მეტნაკლებად მშვიდ და კონკურენტულ გარემოში წარიმართა. „საარჩევნო სუბიექტებმა შეძლეს საკუთარი პროგრამებისა და დაპირებების ამომრჩევლისათვის გაცნობა ამომრჩეველთან უშუალოდ შეხვედრებისა თუ წინასაარჩევნო მასშტაბური აქციებისა და ღონისძიებების მეშვეობით. ძირითადად პრობლემები ქვემო ქართლის, სამცხე-ჯავახეთისა და სამეგრელოს რეგიონებში დაფიქსირდა, სადაც იდენტიფიცირებულ იქნა როგორც შიდაპარტიული დაპირისპირებები, ასევე მძაფრი კონკურენტული გარემო. საანგარიშო პერიოდში დაფიქსირდა სავარაუდო მუქარა/ზეწოლის 10-ზე მეტი, ფიზიკური დაპირისპირების 5, ადმინისტრაციული რესურსის გამოყენების 9, წინასაარჩევნო აგიტაციაში უკანონო მონაწილეობის 5 ფაქტი", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. 2017 წლის ადგილობრივი თვითმმართველობის არჩევნებამდე ორი დღით ადრე სამართლიანი არჩევნებისა და დემოკრატიის საერთაშორისო საზოგადოებამ წინასაარჩევნო მონიტორინგის მესამე შუალედური ანგარიში გამოაქვეყნა. ანგარიში მოიცავს 26 სექტემბრიდან 16 ოქტომბრის ჩათვლით პერიოდს, რომლის დროსაც წინასაარჩევნო კამპანია შესამჩნევად დინამიური გახდა. „სამართლიანი არჩევნების" დამკვირვებლები საარჩევნო სუბიექტების მიერ გამართულ 379 საჯარო შეხვედრას დააკვირდნენ. სრულად წყარო: ორგანიზაციის ვებგვერდი

თბილისი. არჩევნებზე დაკვირვების გამო, საქართველოს ახალგაზრდა იურისტთა ასოციაცია დროებით წყვეტს იურიდიულ კონსულტაციებს, რის შესახებაც საზოგადოებას აფრთხილებს და ბოდიშს უხდის. სრულად  წყარო: ორგანიზაციის ვებგვერდი

თბილისი. 17 ოქტომბერს, სამოქალაქო განვითარების სააგენტომ (CiDA) ქალი ამომრჩევლების საჭიროებების კვლევის პრეზენტაცია გაიმართა. კვლევა სექტემბერში ჩატარდა და საქართველოს 10 რეგიონში სამოქალაქო საზოგადოების რეგიონული ქსელის (R-CSN) წევრმა არასამთავრობო ორგანიზაციებმა სულ 1106 ქალი გამოკითხეს. კვლევის მიზანი იყო რეგიონებში მცხოვრები ქალების პრიორიტეტების და საჭიროებების გამოვლენა. რეგიონებში მცხოვრები ქალი ამომრჩევლების მიერ დასახელებული ყველაზე პრობლემური საკითხების პირველი ხუთეული ასე გამოიყურება: გზებისა და ტროტუარების მოწესრიგება; სასმელი წყლის ხელმისაწვდომობა; პარკები, სკვერები და სხვა საჯარო ადგილები, გამწვანება, გარე განათება; ბაღებისა და სკოლამდელი აღზრდის დაწესებულებების ხელმისაწვდომობა და გაუმჯობესება; ნარჩენების მართვა; სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) წინასაარჩევნო პერიოდს სათაო და რეგიონული ოფისების მეშვეობით, თბილისსა და საქართველოს 8 რეგიონში აკვირდება. „მონიტორინგის მიზანს წარმოადგენს ხელი შეუწყოს: ობიექტური, სამართლიანი, დამოუკიდებელი და ეფექტური გამოძიების, სამართლიანი სასამართლოსა და ერთგვაროვანი პრაქტიკის დამკვიდრებას. ასევე, უზრუნველყოს ინკლუზიური და კონკურენტული საარჩევნო გარემოს ხელშეწყობა ქალების, შშმ პირებისა და ეთნიკური უმცირესობის წარმომადგენლებისთვის", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. „საერთაშორისო გამჭვირვალობა - საქართველო” საარჩევნოდ ადმინისტრაციული რესურსების გამოყენების მონიტორინგის შუალედურ შედეგებს აქვეყნებს. ორგანიზაციის დაკვირვებით, ადგილობრივი თვითმმართველობის არჩევნებისთვის 2017 წლის 1 ივნისიდან 10 ოქტომბრამდე პერიოდში, ადმინისტრაციული რესურსების გამოყენების თვალსაზრისით, გამოიკვეთა რამდენიმე ნეგატიური ტენდენცია, რასაც, შესაძლოა, უარყოფითი გავლენა მოეხდინა საარჩევნო პროცესზე. მათ შორის, განსაკუთრებით პრობლემური იყო საბიუჯეტო ორგანიზაციებში დასაქმებული თანამშრომლების საარჩევნო კამპანიაში ჩართვა. სრულად წყარო: ორგანიზაციის ვებგვერდი

თბილისი. 16 ოქტომბერს, თვითმმართველობის არჩევნებზე მაღალი ხარისხით დაკვირვების უზრუნველსაყოფად, სამართლიანი არჩევნებისა და დემოკრატიის საერთაშორისო საზოგადოებამ (ISFED) არჩევნების დღის სიმულაცია განახორციელა. სიმულაცია ISFED-ის სადამკვირვებლო მისიის წინასაარჩევნო მომზადების ნაწილი იყო და მიზნად ისახავდა დამკვირვებლების, ცენტრალური ოფისის ოპერატორების, მონაცემთა ბაზისა და კომუნიკაციის სისტემის გამოცდას. სიმულაციაში მონაწილეობა ორგანიზაციის თითოეული დამკვირვებლისთვის აუცილებელი წინაპირობაა არჩევნების დღის მისიაში მოსახვედრად. 21 ოქტომბერს, არჩევნების დღის მიმდინარეობას „სამართლიანი არჩევნების" 1200-მდე მოკლევადიანი დამკვირვებელი საარჩევნო უბნებზე ხმების პარალელური დათვლის (PVT) მეთოდოლოგიით დააკვირდება. მათ შორის 350 დამკვირვებელი თბილისის მასშტაბით შემთხვევითი შერჩევით გამოვლენილ უბნებზე განთავსდება ხოლო 300-ზე მეტი დამკვირვებელი საარჩევნო უბნებზე შემთხვევითი შერჩევით მთელი საქართველოს მასშტაბით იქნება გადანაწილებული. ამასთან, ISFED-ის დამკვირვებლები სრულად იქნებიან წარმოდგენილი ყველა საარჩევნო უბანზე ქუთაისში, ბათუმში, ფოთში, რუსთავში, მარნეულსა და ახალციხეში. ადგილობრივი თვითმმართველობის არჩევნების დღის სადამკვირვებლო მისიას ISFED შეერთებული შტატების საერთაშორისო განვითარების სააგენტოს (USAID), გერმანიის ფედერალური საგარეო საქმეთა სამინისტროს, და ფონდ „ეროვნული წვლილი დემოკრატიისთვის" (NED) მხარდაჭერით ახორციელებს. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო" წარმოგიდგენთ თბილისის მერობის კანდიდატებისა და საკრებულოს პარტიული სიების პირველი ნომრების ქონებასა და ბიზნესინტერესებს, რომელთა მოკვლევა საჯარო რეესტრის ბაზებითა და შესაბამისი პირების ქონებრივი დეკლარაციების შესწავლით გახდა შესაძლებელი. სრულად  წყარო: ორგანიზაციის ვებგვერდი

ქვემო ქართლი. საზოგადოებრივი ორგანიზაციების ნაწილი თეთრიწყაროს მუნიციპალიტეტის საარჩევნო ოლქში განვითარებულ მოვლენებს ეხმაურება. საქმე ეხება საარჩევნო სუბიექტ „ბაქრაძე, უგულავა - ევროპული საქართველოს" ყველა კანდიდატის მიერ არჩევნებში მონაწილეობაზე უარის თქმას, რამაც პარტიის საარჩევნო სიის გაუქმება გამოიწვია. „ევროპული საქართველოს" ინფორმაციით, თეთრიწყაროს გარდა, სხვა მუნიციპალიტეტებშიც მოხდა კანდიდატების გადარწმუნება, რიგ შემთხვევებში - დაშინება, რათა მათ რეგისტრაციიდან თავი მოეხსნათ. აღსანიშნავია, რომ, გარდა თეთრიწყაროს მუნიციპალიტეტისა, ინფორმაცია სავარაუდო ზეწოლისა იძულების ფაქტებზე, ასევე, ვრცელდება სხვა პარტიების კანდიდატების მიმართაც, მათ შორის, ასპინძაში და დმანისში", - ნათქვამია ორგანიზაციების მიერ გავრცელებულ განცხადებაში, - „მსგავსი ფაქტები, მიუღებელია და, დადასტურების შემთხვევაში, ჩრდილს მიაყენებს მშვიდ, თანაბარ, სამართლიან და კონკურენტულ საარჩევნო გარემოს. ამავდროულად, ვინაიდან გავრცელებული ინფორმაციები სავარაუდოდ შეიცავს სისხლის სამართლის დანაშაულის ნიშნებს, აუცილებელია მათზე მყისიერი რეაგირება”. სრულად წყარო: ორგანიზაციის ვებგვერდი

თბილისი. ორგანიზაცია „პარტნიორობა ადამიანის უფლებებისთვის" (PHR) რეკომენდაციით, შეზღუდული შესაძლებლობის მქონე ამომრჩეველთან საუბრის ეტიკეტისა და ქცევის ნორმების დასაცავად, ცესკომ საუბნო საარჩევნო კომისიის წევრების სასწავლო მოდულში ცვლილებები შეიტანა. PHR ცენტრალურ საარჩევნო კომისიაში შეზღუდული შესაძლებლობის მქონე პირთა საკითხებზე მომუშავე ჯგუფის წევრია. ამ ფორმატის ფარგლებში, ორგანიზაციამ მხარდაჭერის მიმღები პირების არჩევნებში მონაწილეობის რეკომენდაციები 2016 წლის საპარლამენტო არჩევნებისთვის შეიმუშავა. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა – საქართველო" წარმოგიდგენთ ინფორმაციას იმერეთის მუნიციპალიტეტებში კვალიფიციური საარჩევნო სუბიექტების მიერ წარდგენილ მერობის კანდიდატებსა და საკრებულოს არჩევნებისათვის პარტიული სიების პირველ ნომრებზე. ინფორმაცია ეფუძნება საჯარო რეესტრის მონაცემებსა და ზოგიერთი კანდიდატის მიერ შევსებული ქონებრივი დეკლარაციების ანალიზს. სრულად... წყარო: www.transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს განცხადებას სახელისუფლებო პარტიის თბილისის მერობის კანდიდატის კახა კალაძის მიერ შუალედური ანგარიშის არასწორ ინტერპრეტაციაზე. „10 ოქტომბერს, ტელეკომპანია „იმედის" ეთერში „სამართლიანი არჩევნების" შუალედური ანგარიშიდან წინასაარჩევნო შეხვედრების შესახებ მონაცემების არასწორი ინტერპრეტაცია მოახდინა. ანგარიშის მიხედვით, „ქართულმა ოცნებამ" წინასაარჩევნოდ 163 შეხვედრა ჩაატარა, დამოუკიდებელმა კანდიდატმა ალექსანდრე ელისაშვილმა კი მხოლოდ 7 შეხვედრა. კახი კალაძის მხრიდან ეს ინფორმაცია იმგვარად იყო გაჟღერებული, რომ მაყურებელს უქმნიდა არასწორ შთაბეჭდილებას კახი კალაძისა და თბილისის მერობის დამოუკიდებელ კანდიდატ ალექსანდრე ელისაშვილის საჯარო შეხვედრების რაოდენობაში არსებული მნიშვნელოვანი განსხვავების შესახებ", ნათქვამია ორგანიზაციის განცხადებაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „ზუგდიდსა და სამეგრელო-ზემო სვანეთის მუნიციპალიტეტების თვითმმართველობის არჩევნებისთვის წარდგენილი კანდიდატების ქონება". თანამდებობის პირთა თუ არჩევნებისას პარტიების მიერ წარდგენილ კანდიდატთა კვალიფიკაცია, მათი ქონებრივი მდგომარეობა და ბიზნესინტერესები მაღალი საზოგადოებრივი ინტერესის საგანია. „საერთაშორისო გამჭვირვალობა – საქართველო" ამჯერად წარმოგიდგენთ ინფორმაციას შემდეგ პირებზე: ზუგდიდის მერობის კანდიდატები; პარტიების მიერ ზუგდიდის საკრებულოში წარდგენილი საარჩევნო სიების პირველ ნომრები; პარტია "ქართული ოცნება-დემოკრატიული საქართველოს” მიერ სამეგრელო-ზემო სვანეთის მუნიციპალიტეტებში წარდგენილ მერობის კანდიდატები", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. „საერთაშორისო გამჭვირვალობა - საქართველომ” (TI) შექმნა ვებგვერდი Chemikhma.ge, რომლის მიზანია, საქართველოს მოქალაქეებს 2017 წლის თბილისის მერის არჩევნებში მათთვის სასურველი არჩევანის გაკეთებაში დაეხმაროს. ვებგვერდზე განთავსებულია სპეციალური კითხვარი, რომელიც საჯარო პოლიტიკასთან დაკავშირებული 20 დახურული კითხვისგან შედგება. ასევე, მოცემულია ამ კითხვებზე თბილისის მერობის შემდეგი 6 კანდიდატის პასუხები. ამომრჩეველს საშუალება აქვს, შეავსოს იგივე კითხვარი და გაიგოს, თუ მერობის რომელი კანდიდატის მოსაზრებებთან დგას იგი ყველაზე ახლოს. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია (საია) წარმოადგენს საინფორმაციო ბიულეტენს #3, რომელშიც მოცემულია საქართველოში არსებული წინასაარჩევნო გარემოს მონიტორინგის შედეგები. მონიტორინგი ხორციელდება USAID-ის მიერ მხარდაჭერილი პროექტის, „საქართველოში კონკურენტული, სამართლიანი და ინკლუზიური საარჩევნო გარემოს ხელშეწყობა 2016-2018 საარჩევნო ციკლისთვის" ფარგლებში, საქართველოს 8 რეგიონში: აჭარაში, გურიაში, იმერეთში, შიდა ქართლში, ქვემო ქართლში, კახეთში, მცხეთა-მთიანეთსა და სამეგრელოში. ახალი საინფორმაციო ბიულეტენი მოიცავს შემდეგ საკითხებს: საარჩევნო შტაბზე თავდასხმის ფაქტი; თავისუფლების უკანონო აღკვეთის სავარაუდო ფაქტი; პარლამენტში გენდერული კვოტის შესახებ კანონპროექტის საკომიტეტო განხილვები და სხვა. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია (საია) აქვეყნებს ხშირად დასმულ კითხვებზე პასუხებს. „რას ნიშნავს დამოუკიდებელი კანდიდატი? დამოუკიდებელ კანდიდატს უწოდებენ საარჩევნო სუბიექტს, რომელიც მერობის/მაჟორიტარობის კანდიდატად წარდგენილია საინიციატივო ჯგუფის მიერ", ნათქვამია ორგანიზაციის ვებ-გვერდზე. იხ.სრულად დოკუმენტი... წყარო: gyla.ge

თბილისი. გენდერული საინფორმაციო პორტალის ბლოგპოსტის თანახმად, თბილისში მაჟორიტარი კანდიდატების სიებში ქალების რაოდენობა 25%ს ქვემოთაა. „2017 წლის ივლისში გამოქვეყნებულ NDI-ს კვლევის მიხედვით დასახელებულ ყველაზე რეიტინგული პარტიების მაჟორიტარულ სიებში ქალები ისევ უმცირესობაში არიან", ნათქვამია პორტალზე. სრულად... წყარო: ginsc.net

თბილისი. საკონსტიტუციო რეფორმის ირგვლივ, ხელისუფლებასა და პოლიტიკურ პარტიებს შორის დღეს დაგეგმილ კონსულტაციებთან დაკავშირებით, საზოგადოებრივი ორგანიზაციები განცხადებას აქვეყნებენ. „დღევანდელი კონსულტაცია იძლევა ჩიხური სიტუაციიდან გამოსვლის შესაძლებლობას, რაც მისასალმებელია. მიგვაჩნია, რომ საკვანძო საკითხს კონსტიტუციის პროექტში პროპორციულ საარჩევნო სისტემაზე 2020 წელს გადასვლა წარმოადგენს", - წერია განცხადებაში, - „მიუხედავად იმისა, რომ საკონსტიტუციო ცვლილებების პროექტში აზრთა სერიოზულ სხვადასხვაობას არაერთი საკითხი იწვევს, მათ შორის კვლავაც პრობლემურია დებულებები პრეზიდენტის არჩევის, მართლმსაჯულებისა და ადამიანის უფლებების შესახებ, მივიჩნევთ, რომ პირველ რიგში აუცილებელია კონსენსუსი შედგეს საპარლამენტო საარჩევნო სისტემის გარშემო". განცხადების ხელმომწერი საზოგადოებრივი ორგანიზაციები მოუწოდებენ მხარეებს, მოვუწოდებთ მხარეებს, არ იხელმძღვანელონ ვიწრო პარტიული პოზიციებიდან გამომდინარე და გადაწყვეტილება ქვეყნის ინტერესების შესაბამისად მიიღონ. სრულად  წყარო: TI-ის ვებგვერდი

აჭარა. კონფერენცია „აქტიური მოქალაქეობა, მოხალისეობა და ინიციატივები” ბათუმის განათლების განვითარებისა და დასაქმების ცენტრმა „მომავლის თაობის” პროგრამის მონაწილეებთან ერთად გამართა. ღონისძიებაზე სამოქალაქო საზოგადოების გაძლიერების, მოსახლეობის ცნობიერების ამაღლებისა და ინიციატივების მნიშვნელობის თაობაზე ისაუბრეს. პროექტის ფარგლებში, თავიანთი ინიციატივები მონაწილეებს პოლონეთის ახალგაზრდული პარლამენტის წევრებმა გააცნეს. პროექტი ხორციელდება აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით, საქართველოს 9 რეგიონის 12 ქალაქში და მიზნად ისახავს ქალთა პოლიტიკური მონაწილეობის მნიშვნელობის შესახებ არჩევნებში ჩართული ყველა მხარის ცნობიერების ამაღლებით. სრულად წყარო: ორგანიზაციის გვერდი სოციალურ ქსელში