თბილისი. ნამახვანჰესის საკითხზე ენერგოგაერთიანების მიერ ორგანიზებულ შეხვედრებში ჩართული ორგანიზაციები საზოგადოებას მიმდინარე პროცესის შესახებ მათ პოზიციას აცნობენ.  „ხელმომწერი ორგანიზაციები მივესალმებით იმ ფაქტს, რომ ივნისი-ივლისის განმავლობაში მოგვეცა შესაძლებლობა, ჩავრთულიყავით „ტექნიკური დავალების“ შემუშავების პროცესში, რითაც მომავალში დამოუკიდებელმა ექსპერტებმა უნდა იხელმძღვანელონ. თუმცა, სამწუხაროდ, კვლავ გამოწვევად და შესასრულებელ ამოცანად რჩება ექსპერტების შერჩევა პროფესიონალიზმისა და მიუკერძოებლობის პრინციპით, დაფინანსების სანდო წყაროს მოძიება და შეფასების ამ პროცესისადმი მხარეებისა და ფართო საზოგადოებისთვის ნდობის გარანტიების შექმნა“. სრულად... წყარო: socialjustice.org.ge

თბილისი. ომბუდსმენმა საზოგადოებას სპეციალური ანგარიში „გარემოზე ზემოქმედების შეფასების სისტემა - პოლიტიკის, კანონმდებლობისა და აღსრულების გამოწვევები“ წარუდგინა. „სპეციალურ ანგარიშში განხილულია სახელმწიფო პოლიტიკისა და საკანონმდებლო რეგულაციების თვალსაზრისით გამოვლენილი გამოწვევები, რომლებიც გარემოზე ზემოქმედების შეფასების სისტემასა და მსხვილ ენერგეტიკულ ინფრასტრუქტურულ პროექტებს უკავშირდება, მათ შორისაა:  საზოგადოების ინფორმირებულობა-ჩართულობის; გზშ-ს ანგარიშების ხარისხის; სკრინინგის პროცედურის საკითხებთან და გზშ-ს დაქვემდებარებულ საქმიანობებთან დაკავშირებული პრობლემები“... სრულად... წყარო: ombudsman.ge

აჭარა. ორგანიზაცია „ჰელფინგ ჰენდის“ პროექტი „1 დღე ჩვენს გარემოს” საქართველოს მასშტაბით გრძელდება. პროექტის მიზანია საქართველოში გარემოსდაცვითი მოხალისეობის ხელშეწყობა, მოზარდებისა და ახალგაზრდების ჩართულობის გაზრდა. ორგანიზაციის ინფორმაციით, აღნიშნული იდეა ანა კუპრავას ინიციატივით დაიწყო და ასობით მოხალისე შემოუერთდა. 28 ივლისს, მოხალისეები ბათუმის სანაპირო ზოლს დაასუფთავებენ. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ კვლევას ნამახვანი ჰესის პროექტის ისტორიის შესახებ. „მოცემული დოკუმენტი აჯამებს ინფორმაციას ნამახვანის ჰიდროელექტროსადგურის დაგეგმვის და მშენებლობის პროცესში გამოვლენილი ყველა ხარვეზული და უკანონო გადაწყვეტილების შესახებ. ერთის მხრივ, კვლევაში შეფასებულია კომპანიის შერჩევის დახურულობის და ნამახვანის ხელშეკრულების გაფორმების, როგორც კანონიერების ისე სამართლიანობის საკითხი, ხოლო მეორეს მხრივ, წინამდებარე დოკუმენტში მოცემულია გარემოსდაცვითი და მშენებლობის ნებართვების სამართლებრივი შეფასება და მნიშვნელოვანი ინსტიტუციური ჩავარდნების კრიტიკული ანალიზი, რამაც პროექტის უკანონობა განაპირობა“. სრულად... წყარო: socialjustice.org.ge

2021 წლის 8 ივლისს ევროკომისიამ თავისი პროგრამის, EU4Energy ახალი ეტაპის - „სუფთა ენერგიაზე გადასვლის მხარდაჭერა აღმოსავლეთ პარტნიორობის ქვეყნებში: პროგრამის, EU4Energy II ფაზის“ დაწყება აღნიშნა. პროგრამა, რომელიც 2024 წლამდე გაგრძელდება, მიზნად ისახავს ენერგეტიკის სანდო საკანონმდებლო და სარეგულაციო ჩარჩოების შემუშავებას, რაც რეგიონის სუფთა ენერგიაზე გადასვლას და ენერგეტიკული ბაზრის ლიბერალიზაციას შეუწყობს ხელს. პროგრამის, EU4Energy მთლიანი ბიუჯეტი 8.5 მილიონი ევროა და მას ევროკავშირი აფინანსებს. სრულად... წყარო: euneighbours.eu

თბილისი. სოციალური სამართლიანობის ცენტრის მიერ მომზადებულ საინფორმაციო ვიდეოში ორგანიზაცია პასუხობს ნამახვანჰესის პროექტთან დაკავშირებით, პროექტის მხარდამჭერების მიერ გავრცელებულ არაზუსტ, მცდარ და მანიპულაციურ არგუმენტებს. წყარო: socialjustice.org.ge

ევროკავშირის მწვანე კვირეულის ფარგლებში CENN-მა მასშტაბურ კამპანიას - იმოქმედე კლიმატისთვის უმასპინძლა. „კამპანიის მონაწილეებს შემეცნებით და სახალისო აქტივობებში ჩართვის შესაძლებლობა ჰქონდათ. კლიმატის ცვლილების წინააღმდეგ ბრძოლა და გარემოს დაცვა ჩვენი საერთო პასუხისმგებლობაა. თითოეული ჩვენგანის მიერ განხორციელებული ნებისმიერი მცირე ქმედება ისეთივე მნიშვნელოვანია, როგორც ამ თემაზე მიმდინარე მაღალი დონის მრავალმხრივი მოლაპარაკებები“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი (ყოფილი EMC) ნამახვანი ჰესის მიერ გამომუშავებული ელექტროენერგიის ექსპორტის შესაძლებლობის შესახებ ანალიზს გთავაზობთ. „სახელმწიფო უწყებების წარმომადგენლები ნამახვანი ჰესის სარგებლიანობაზე საუბრისას, სხვა საკითხებთან ერთად, ხშირად, ხაზს უსვამენ პროექტის მნიშვნელობას ქვეყნის ენერგოდამოუკიდებლობის განმტკიცებაში. ეს მტკიცება ენერგოდამოუკიდებლობის შესახებ, მორიგია ხმამაღალ განცხადებებს შორის, რომელიც ხშირად ისმის ხელისუფლების წარმომადგენლების მხრიდან და რომელსაც ხელშეკრულების ტექსტი – ინვესტორსა და მთავრობას შორის გაფორმებული შეთანხმების შინაარსი – ზურგს არ უმაგრებს“. სრულად... წყარო: socialjustice.org.ge

თბილისი. პროგრამა „ევროკავშირის გარემოსთვის“ რუსთავსა და ზესტაფონში საწარმოო ნარჩენების მონიტორინგს იწყებს. „მონიტორინგის მიზანია განსაზღვროს, შეაფასოს და აღრიცხოს ადგილობრივი სამრეწველო საწარმოების ნარჩენების ნაკადები. პროექტი ნარჩენების გადამუშავების ეფექტიანი მეთოდების დანერგვისა და ცირკულარული ეკონომიკის პრინციპების და პრაქტიკის განხორციელებისთვის მოამზადებს ნიადაგს“. სრულად... წყარო: www.eu4environment.org

თბილისი. სოციალური სამართლიანობის ცენტრის განცხადებით, „ჯორჯიან მანგანეზი,” რომელიც წლების განმავლობაში ირიდებდა შეკითხვებს მოპოვების შედეგად მიყენებულ ზიანზე, შუქრუთის მოსახლეობის პროტესტის შედეგად იძულებული გახდა თავად გამხდარიყო მოლაპარაკების მხარე და ამით საკუთარი პასუხისმგებლობა ეღიარებინა. „სამწუხაროდ, საკანონმდებლო დონეზე სასარგებლო წიაღისეულის მოპოვების შედეგად დაზარალებული ადგილობრივი მოსახლეობისთვის ზიანის ანაზღაურების წესი და პირობები განსაზღვრული კვლავ არ არის. შესაბამისად, შუქრუთის მოსახლეობას, მიყენებული ზიანის კომპენსირების წესსა და ოდენობაზე უშუალოდ კომპანიასთან, კერძო ხასიათის მოლაპარაკებების გამართვა და სამოქალაქო წესით შეთანხმება მოუხდათ. ასევე, შეთანხმების შესახებ გავრცელებული ცნობები, ისევე როგორც მოლაპარაკებების პროცესის უთანასწორო და გაუმჭვირვალე ხასიათი, არსებითად პრობლემურია, რადგან კომპენსაციის შეთანხმებული მექანიზმის სამართლიანობა და სანდოობა საეჭვო რჩება, ხოლო პროტესტის მონაწილეთა მიმართ მიმდინარე სისხლისსამართლებრივი დევნის ფაქტები დამატებით კითხვებს აჩენს შეთანხმების საგანზე“, ნათქვამია ორგანიზაციის განცხადებაში. სრულად... წყარო: socialjustice.org.ge

თბილისი. სოციალური სამართლიანობის ცენტრის მიერ საჯარო ინფორმაციის სახით მიღებული დოკუმენტაციით დგინდება, რომ ეკონომიკის სამინისტრომ კომპანია “ენკას” ქვემო ნამახვანი ჰესის სამშენებლო დოკუმენტაციის წარდგენის ვადა კიდევ ერთი წლით გაუხანგრძლივა. „მიგვაჩნია, რომ სამინისტროს ეს გადაწყვეტილება “ენკა-სთვის” მინიჭებული კიდევ ერთი დაუსაბუთებელი შეღავათია, რომელიც ადასტურებს, რომ განცხადებები პროექტის სათანადოდ შესწავლის შესახებ, მცდარი და საფუძველს მოკლებულია. ამასთან, ეს პროცესი ხსნის კაშხლის მშენებლობაზე 9-12 თვიანი “მორატორიუმის” გამოცხადების რეალურ მოტივს. კაშხლის ნაგებობის მშენებლობის გადავადება სინამდვილეში უკავშირდება არა მთავრობისა და კომპანიის კომპრომისს, არამედ იმ ფაქტს, რომ კომპანიამ სრულყოფილი საპროექტო დოკუმენტაციის ჩაბარება თავად დააგვიანა და ამავე პერიოდით მოითხოვა სახელმწიფოსგან ვადის გახანგრძლივება“. სრულად... წყარო: socialjustice.org.ge

თბილისი. როგორ გავხადოთ კომპანია მეტად ეკომეგობრული? გაიგეთ UNIDO-სა და EU4Environment პროგრამის მხარდაჭერით შექმნილ საინფორმაციო ბარათებზე… წყარო: www.euneighbours.eu

იმერეთი. სოციალური სამართლიანობის ცენტრმა შეისწავლა ერთი მხრივ, შუქრუთის პროტესტის მონაწილეთა მთავარი მოთხოვნები და კომპანიასთან მათი შეუთანხმებლობის მიზეზები, ხოლო მეორე მხრივ, ამ ფართე სოციალური და ეკოლოგიური კრიზისის განმაპირობებელი გარემოებები, რომელიც წინ უძღოდა ამ პროტესტს ჭიათურის მუნიციპალიტეტში. „მოსახლეობა და კომპანიის წარმომადგენლები ზიანს განსხვავებულად აფასებდნენ - როგორც მეთოდოლოგიის, ისე სხვადასხვა ტიპის ზიანის დაფარვის კუთხით, მნიშვნელოვანია, რომ სახელმწიფო უწყებები და იქ თავმოყრილი დარგობრივი ცოდნა მიიმართოს წიაღისეულის მოპოვებასთან დაკავშირებული ზიანის შეფასებისთვის, როგორც კონკრეტულ მესაკუთრეთა შეთხვევაში, ისე მთლიანად მუნიციპალიტეტის ბუნებრივ გარემოსთან მიმართებაში. ეს ინტერვენცია უნდა განხორციელდეს ზიანის შეფასების საერთო სტანდარტის შემუშავების სახით, რაც სამთო-მოპოვებითი სექტორის შესაძლო ნეგატიურ ზეგავლენას უფრო მდგრადად, სამართლიანად და მეთოდურად მოაქცევდა რეგულირების სივრცეში“. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) ეხმაურება საქართველოს ეკონომიკისა და მდგრადი განვითარების სამინისტროს განცხადებას ნამახვანი ჰესის ეკონომიკური სარგებლიანობის საკითხზე ჩატარებული კვლევების შესახებ, რომელიც სამინისტრომ პროექტზე ხარჯთსარგებლიანობის ანალიზის არსებობის დადასტურების მიზნით გაავრცელა. „თავად სამინისტროს განცხადების შინაარსი ადასტურებს, რომ პროექტის მომზადების ეტაპზე კონკრეტულად ნამახვანი ჰესის პროექტის ხარჯთსარგებლიანობის ანალიზი არ ჩატარებულა, რითიც უხეშად დაირღვა საქართველოს კანონმდებლობის მოთხოვნები. ორგანიზაცია უკვე მერამდენედ მოუწოდებს მთავრობას და შესაბამის უწყებებს, დაუყოვნებლივ გაასაჯაროოს ნამახვანი ჰესის პროექტზე საქართველოს ფინანსთა სამინისტროს დასკვნა და პროექტის ხარჯთარგებლიანობის ანალიზი“. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) ეხმაურება იუსტიციის სამინისტროს მიერ ნამახვანი ჰესის პროექტთან დაკავშირებით ინტერესთა გამოხატვის გამოცხადებას, რომლითაც სამინისტრომ ხელშეკრულების შესაფასებლად საერთაშორისო იურიდიული კომპანია უნდა შეარჩიოს. „მიგვაჩნია, რომ აღნიშნული გადაწყვეტილება მორიგია იმ ინიციატივებს შორის, რომლითაც ხელისუფლება პრობლემის აღიარებას თავს არიდებს და ილუზორული და ფრაგმენტული ინიციატივებით ცდილობს ხელშეკრულების შესახებ არსებული ძირითადი პრობლემების გადაფარვას, რაც არათუ საკითხის რეალურ გადაჭრაზე არაა ორიენტირებული, მეტიც, საბოლოოდ, არსებული კონფლიქტის გაჭიანურებას იწვევს“. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) ეხმიანება შსს-ს მიერ რიონის ხეობის მცველების მიერ სოფელ გუმათის პოლიციის ბლოკპოსტთან გამართულ აქციაზე პოლიციასა და აქციის მონაწილეებს შორის მომხდარ ინციდენტს, რასაც 8 შეკრების მონაწილის დაკავება მოჰყვა. ორგანიზაცია მოუწოდებს ხელისუფლებას, დროულად დაიწყოს დიალოგი პროტესტის ორგანიზატორებთან და გააუქმოს ხეობაში ამ დრომდე მოქმედი დაუსაბუთებელი საპოლიციო შეზღუდვები. სრულად... წყარო: socialjustice.org.ge

თბილისი. სოციალური სამართლიანობის ცენტრის მიიჩნევს, რომ იუსტიციის სამინისტროს დასკვნის მიხედვით, ნამახვანის ხელშეკრულებით მთავრობამ დათმო სახელმწიფოებრივი ინტერესები.  სოციალური სამართლიანობის ცენტრის თანახმად, იუსტიციის სამინისტროს დასკვნა სწორედ იმ საკითხების პრობლემურობას უსვამს ხაზს, რაც ხელშეკრულების გასაჯაროებისთანავე ორგანიზაციის მწვავე კრიტიკის საგანი გახდა და რაც აჩვენებს ხელშეკრულებით სახელმწიფოსა და კერძო კომპანიის ინტერესების უკიდურეს დაუბალანსებელობას. სოციალური სამართლიანობის ცენტრი მოითხოვს, უკიდურესად მაღალი საჯარო ინტერესის გათვალისწინებით, დაუყონებლივ გასაჯაროვდეს: „ხელშეკრულების ის რედაქცია, რომელზეც საქართველოს იუსტიციის სამინისტროს დასკვნა მომზადდა; საქართველოს ფინანსთა სამინისტროს დასკვნა; პროექტის ხარჯ-სარგებლიანობის ანალიზი; საქართველოს მთავრობის 2019 წლის 23 აპრილის განკარგულების (რომლითაც ნამახვანი ჰესის ხელშეკრულება მოიწონა) განმარტებითი ბარათი, ადმინისტრაციული წარმოების სრულ მასალასთან ერთად“. სრულად... წყარო: socialjustice.org.ge

თბილისი. საქართველო შეუმუშავებს გრძელვადიანი დაბალემისიიანი განვითარების სტრატეგიას, რომელშიც აისახება ემისიების შემცირების, კლიმატის ცვლილების შერბილებისა და ეკონომიკის შესაბამისი გარდაქმნის (დეკარბონიზაციის) გზები 2050 წლამდე პერიოდში. „გარემოს დაცვისა და სოფლის მეურნეობის სამინისტრო წამყვან როლს ასრულებს სტრატეგიის შემუშავების პროცესში, ევროკავშირისა და გაეროს განვითარების პროგრამის ხელშეწყობით. ევროკავშირისა და UNDP-ის დახმარება ეყრდნობა რეგიონულ ინიციატივას EU4Climate, რომელიც აღმოსავლეთ პარტნიორობის ქვეყნებში ხორციელდება“. სრულად... წყარო: ორგანიზაციის გვერდი სოციალურ ქსელში

იმერეთი. 15 მაისს სოლიდარობის პლატფორმის წევრები რიონის ხეობის მცველებს ესტუმრნენ. „შეხვედრის ფარგლებში, რიონის ხეობის მცველებმა ისაუბრეს მათი გამოწვევების შესახებ და სოლიდარობის პლატფორმის წევრებს გაუზიარეს მათი პროტესტის არსი და სულისკვეთება. სოლიდარობის პლატფორმის წევრებმა, თავის მხრივ, ისაუბრეს მათ რეგიონებში ჰესების მშენებლობის პრობლემურ პრაქტიკებზე და მის გარემოზე ზეგავლენაზე. ამასთანავე, პლატფორმის წევრებმა მხარდაჭერა გამოუცხადეს ხეობის მცველებს“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. „სოციალური სამართლიანობის ცენტრმა” (ყოფილი EMC) წარადგინა ნამახვანჰესის მშენებლობასთან დაკავშირებული საპროტესტო აქციების დროს გამოყენებული საპოლიციო ღონისძიებების შეფასების დოკუმენტი. დოკუმენტში გაანალიზებულია, რამდენად კანონიერი და პროპორციული იყო სახელმწიფოს მხრიდან გამოყენებული საპოლიციო იძულების ღონისძიებები პროტესტის მიმდინარეობისას. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს ნამახვანის მშენებლობასთან დაკავშირებული დარღვევების შესახებ ვიდეოს. „ნამახვანის ჰიდროელექტროსადგურების კასკადზე გარემოსდაცვითი და მშენებლობის ნებართვები კანონმდებლობით გათვალისწინებული სავალდებულო გამოკვლევებისა და სრულყოფილად შესწავლის გარეშე, კონკრეტული პირობებით გაიცა. ნებართვების გაცემიდან 1 წელზე მეტი დრო გავიდა, თუმცა კომპანიას დამატებითი გამოკვლევები სახელმწიფოსთვის სრულყოფილად ჯერ ისევ არ წარუდგენია. ადგილზე მიმდინარე სამუშაოებით ენკა როგორც გარემოსდაცვით, ისე მშენებლობის ნებართვის პირობებს არღვევს“. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) საქართველოს ფინანსთა და იუსტიციის სამინისტროებისგან ნამახვანი ჰესის ხელშეკრულების თაობაზე მათი დასკვნების გასაჯაროებაზე უარს ადმინისტრაციული საჩივრითა და სასამართლოს გზით ასაჩივრებს. „მიუხედავად იმისა, რომ საქართველოს კანონმდებლობის შესაბამისად, საჯარო ინფორმაცია დაუყოვნებლივ, შესაბამისი საფუძვლების არსებობის შემთხვევაში 10 დღის ვადაში უნდა გაიცეს, არცერთი სამინისტროსგან გამოთხოვილი ინფორმაცია არ მიგვიღია. საჯარო ინფორმაციის მოთხოვნის დაკმაყოფილების მიზნით, ჩვენ თბილისის საქალაქო სასამართლოს სარჩელით მივმართეთ; ამასთან, საქართველოს ფინანსთა მინისტრისგან საჯარო ინფორმაციის გაცემა ადმინისტრაციული საჩივრითაც მოვითხოვეთ“, ნათქვამია ორგანიზაციის ვებგვერდზე. სრულად... წყარო: socialjustice.org.ge