თბილისი. ნიუ იორკის უნივერსიტეტი და აშშ–ის საელჩო საქართველოში კვლევის შესწავლის პროგრამას იწყებენ. აშშ–ის საელჩოს მიერ დაფინანსებული კვლევის შესწავლის პროგრამის მიზანია, გააძლიეროს აკადემიური კვლევის შესაძლებლობები ჯანდაცვის პროფესიებში და ხელი შეუწყოს ჯანდაცვის პოლიტიკის შემუშავების პროცესს. ნიუ იორკის უნივერსიტეტის პროფესორების ჯგუფი თბილისში ჩამოდის, რათა სადოქტოროს 18 სტუდენტ–მკვლევარსა და ჯანდაცვის სისტემის 50–ზე მეტ თანამშრომელს თბილისსა და დასავლეთ საქართველოში კვლევების პრაქტიკაში დანერგვის შესახებ სპეციალური კურსი წაუკითხოს. ლექციების კურსი საქართველოში კვლევის შესწავლის პროგრამის ნაწილია. პროგრამას აშშ–ის საელჩო აფინანსებს. სრულად წყარო: აშშ–ს საელჩოს გვერდი სოციალურ ქსელში

სამცხე–ჯავახეთი. თანატოლთა განათლების ფარგლებში ახალციხის ახალგაზრდული ცენტრის წევრებმა გასვლითი ტრენინგი ჩაუტარეს ურაველის საჯარო სკოლის მოსწავლეებს, ტრენინგის თემა იყო „სოციალური ქსელები - სამოქალაქო ჟურნალისტიკა". ღონისძიება ჩატარდა დემოკრატ მესხთა კავშირის ორგანიზებით, პროექტის "ეროვნული ინტეგრაციის გაძლიერება საქართველოში" ფარგლებში, რომელიც ხორციელდება საქართველოს გაეროს ასოციაციის მიერ, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო: ორგანიზაციის გვერდი სოციალურ ქსელში

შიდა ქართლი. 6 ივნისს, გორის დემოკრატიული ჩართულობის ცენტრში, ასოციაცია „ბილიკმა" პროექტ „თანადგომის" ფარგლებში პარტნიორ საჯარო სკოლებთან ურთიერთთანამშრომლობის მემორანდუმი გაფორმდა. პროექტში, რომელიც მშვიდობის, დემოკრატიის და განვითარების კავკასიური ინსტიტუტის მხარდაჭერით ხორციელდება, გორის მუნიციპალიტეტის 10 სოფლის – ზემო ნიქოზის, ქვემო ხვითის, ხურვალეთის, შავშვების, ერგნეთის, წითელუბნის, ძევერის, ყელქცეულის, დიცის და ბერშუეთის საჯარო სკოლებია ჩართული და მოზარდების სამოქალაქო ცნობიერების ამაღლებას გააქტიურებას, საზოგადოებაში ინტეგრაციის და სამოქალაქო ინიციატივების ხელშეწყობას ისახავს მიზნად. წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა ეკონომისტთა ასოციაცია 18-დან 25 წლამდე ეკონომიკით დაინტერესებულ აქტიურ და ინიციატივიან ახალგაზრდებს სთავაზობს საზაფხულო ეკონომიკურ სკოლაში მონაწილეობის მიღებას. საზაფხულო ეკონომიკური სკოლის მიზანია ახალგაზრდებში მეწარმეობრივი და თავისუფალი ეკონომიკური აზროვნების განვითარება, მათი მიზანსწრაფულობის და მოტივაციის დონის ამაღლებით. საზაფხულო სკოლა სთავაზობს ახალგაზრდებს, მეწარმეობრივ, მაკროეკონომიკურ და საჯარო ფინანსების თემატიკაზე ტრენინგებსა და განხილვებს, და ასევე უქმნის ახალგაზრდებს ურთიერთობების ჩამოყალიბებისათვის და სამომავლო თანამშრომლობისთვის მიმზიდველ გარემოს. მსურველებმა უნდა შეავსონ ელექტრონული აპლიკაცია, რომელიც შეგიძლიათ იხილოთ საეას ვებ-გვერდზე www.economists.ge წყარო: economists.ge

თბილისი.  3 ივნისს, სასტუმრო „რედისონ ბლუ ივერიაში"  ჩატარდა სახალხო დამცველთან არსებული ტოლერანტობის ცენტრის მიერ ორგანიზებული ვიქტორინა „რელიგიები და ეთნოსები საქართველოში". ვიქტორინაში მონაწილეობა მიიღეს სამოქალაქო განათლებისა და პედაგოგთა გადამზადების პროგრამის თბილისის, მცხეთა-მთიანეთის, შიდა ქართლის და ქვემო ქართლის რეგიონების პარტნიორი სკოლების სამოქალაქო კლუბის წევრებმა. ვიქტორინის მიზანს წარმოადგენდა საქართველოში ტოლერანტობის კულტურის ხელშეწყობა, უფროსკლასელთა შორის საქართველოს რელიგიური და ეთნიკური მრავალფეროვნების შესახებ ცოდნის ამაღლება და ტოლერანტობის ცენტრის მიერ მომზადებული და გამოცემული ენციკლოპედიების – ,,რელიგიები საქართველოში" და ,,ეთნოსები საქართველოში" – პოპულარიზაცია. ვიქტორინაში მონაწილოების მისაღებად მოსწავლეებს  ეს ენციკლოპედიები უნდა შეესწავლათ.  სამრაუნდიანი ასპარეზობის შედეგად, გამარჯვება წილად  ხვდა მარნეულის #5 საჯარო სკოლის გუნდს.  გამარჯვებული გუნდის წევრები დაჯილდოვდნენ სპეციალური პრიზებითა და სიგელებით. ყველა მონაწილეს გადაეცა სამახსოვრო საჩუქარი.  ვიქტორინის დასრულების შემდეგ მონაწილეებისათვის მოეწყო ექსკურსია. მოსწავლეებმა და მათმა მხარდამჭერებმა  მოინახულეს გრიგორიანული ეკლესია, მეჩეთი და სინაგოგა.  თოთოეულ სალოცავში მოსწავლეებს ადგილობრივმა სასულიერო პირებმა უმასპინძლეს და საქართველოში მათი არსებობის ისტორიისა და ტრადიციების შესახებ ესაუბრნენ. წყარო: civics.ge

თბილისი. თავისუფალი დებატების ლიგა აცხადებს შესარჩევ ტურს თბილისის ჩემოპიონატისთვის ლინკოლნ–დუგლასის ფორმატის დებატებში მოსწავლეებს შორის.  შესარჩევი ტურის რეზოლუციაა: Hate speech-ის აკრძალვა გამართლებულია. შესარჩევი ტური ჩატარდება 3 ეტაპად. სრულად წყარო: ორგანიზაციის გვერდი სოციალურ ქსელში

თბილისი. 3 ივნისს, ცენტრალურ საარჩევნო კომისიას გარდაბნის, მარნეულის და დმანისის ახალგაზრდული ცენტრის წევრები ესტუმრნენ. ახალგაზრდები გაეცნენ ცესკოს მუშაობის პრინციპებს, დაათვალიერეს საარჩევნო ადმინისტრაცია. სხვადასხვა დეპარტამენტების უფროსებმა მოსწავლეებს კომისიის აქტივობების შესახებ გააცნეს ინფორმაცია. კოორდინაციისა და მართვის დეპარტამენტის უფროსმა ახალგაზრდებს დეტალურად წარუდგინა ინფორმაცია კომისიის საქმიანობების შესახებ, ხოლო სსიპ-საარჩევნო სისტემების განვითარების, რეფორმებისა და სწავლების ცენტრის ხელმძღვანელის მოადგილე სემინარის ფარგლებში მათ არჩევნებში აქტიური ჩართულობის მნიშვნელობაზე ესაუბრა. წყარო:სამოქალაქო აქტივიზმის ახალგაზრდული ქსელის გვერდი სოციალურ ქსელში

თბილისი. 30 მაისს სამოქალაქო განათლებისა და პედაგოგთა გადამზადების პროგრამის მხარდაჭერით და სამოქალაქო განათლების პედაგოგთა ფორუმის ინიციტივით დაფუძნდა  ა(ა)იპ „სამოქალაქო განათლების პედაგოგთა ფორუმი". დამფუძნებელთა კრება კონსულტაციისა და ტრენინგის ცენტრში გაიმართა. კრებამ ახლადდაფუძნებული ორგანიზაციის მთავარ ამოცანებად განსაზღვრა: პედაგოგთა პროფესიული განვითარების ხელშეწყობა და მათ შორის გამოცდილების გაზიარების გარემოს შექმნა სფეროში  სიახლეებისა და ინოვაციების დანერგვის გზით. ფორუმი თავის უმთავრეს მიზნად ისახავს საზოგადოებაში და საგანმანათლებლო სისტემაში სამოქალაქო განათლების მნიშვნელობის წარმოჩენასა და სამოქალაქო განათლების პედაგოგის პრესტიჟის ზრდას. გამგეობის წევრებმა გამგეობის თავმჯდომარის პოზიციაზე კენჭი ნინო ბესელიას უყარეს. წყარო:civics.ge

აჭარა. საერთაშორისო კვლევისა და გაცვლების საბჭოს (IREX) პროგრამა „ქართული მედია აძლიერებს დემოკრატიას, ანგარიშვალდებულებას და მოქალაქეების ინფორმირებულობას" იწვევს ბათუმში მომუშავე ჟურნალისტებს ზოგად ტრენინგზე ახალ მედიაში. სამდღიან ტრენინგზე ჟურნალისტები შეისწავლიან ახალი მედიის კონცეფციას, მისი ინსტრუმენტების გამოყენებას, აითვისებენ სოციალური ქსელებს და მოახდენენ მის ინტეგრაციას ვებთან. ასევე, იმუშავებენ ვებ ტელევიზიის, ბლოგისა და მულტიმედიური პროდუქტის დაგეგმვასა და შექმნაზე. ტრენინგის მეორე ნაწილი დაეთმობა ტექნიკურ საკითხებს: ვიდეო ფორმატები, ენკოდინგი, ვიდეო გადაღება და მონტაჟი, ტიტრები და გრაფიკა მონტაჟისას, პროგრამული ინსტრუმენტები, მასალის განთავსება ვებზე და მისი არქივიზაცია. სრულად  წყარო: media.ge

თბილისი. საქართველოს სოციალურ მუშაკთა ასოციაციას ესაჭიროება მოხალისეები, რომლებიც შეძლებენ დაეხმარონ ბავშვებს ინგლისური ენის შესწავლაში.  მოხალისეობრივი საქმიანობა განხორციელდება გლდანი–ნაძალადევის რაიონში და მოიცავს მიმდინარე სასწავლო წლის დასრულებამდე პერიოდს (დაახლოებით ერთი თვე). დაინტერესებული პირებმა ასოციაციას  ელექტრონული ფოსტის საშუალების უნდა აცნობონ გადაწყვეტილება ელ–ფოსტა: gasw@gasw.org  სრულად წყარო: ორგანიზაციის გვერდი სოციალურ ქსელში

ქვემო ქართლი. სამოქალაქო განათლებისა და პედაგოგთა გადამზადების პროგრამის ფარგლებში 25 მაისს სიქა-მ ორგანიზება გაუწია სასკოლო სამოქალაქო კლუბების წევრთა შეხვედრას მწერალ დათო ტურაშვილთან. მწერალმა ისაუბრა წიგნიერების სასიცოცხლო მნიშვნელობაზე, თუ რამდენად აუცილებელია პიროვნების ზრდისთვის წიგნის კითხვა და ამ პროცესის ყოველდღიურ ქცევაში დანერგვა. შეხვედრის ბოლოს გაიმართა დისკუსია. წყარო: ორგანიზაციის გვერდი სოციალურ ქსელში

შიდა ქართლი. 25 მაისს საზოგადოება „ბილიკში" ბლოგერების კონკურსის გამარჯვებულები დააცილდოვეს. კონკურსი სამოქალაქო განათლებისა და პედაგოგთა გადამზადების პროგრამის მონაწილე სკოლების მოსწავლეებისთვის იყო განკუთვნილი და მიზნად ისახავდა მოზარდთა გააქტიურებას, სოციალური მედიის პოპულარიზაციას. კონკურსში მონაწილეობა მიიღო 14–მა ბლოგერმა და 4 გამარჯვებული გამოვლინდა. წყარო: ორგანიზაციის გვერდი სოციალურ ქსელში

იმერეთი.  სამოქალაქო განათლებისა და პედაგოგთა გადამზადების პროგრამის ფარგლებში, ქუთაისის სამმიზნე სკოლების სამოქალაქო კლუბების წევრებისათვის ტრენინგი ჩატარდა ბულინგის თემაზე. ტრენინგს უძებოდა აკაკი წერეთლის სახელმწიფო უნივერსიტეტის უწყვეტი განათლების ცენტრის ხელმძღვანელი აკადემიური დოქტორი. მსმენელებმა განიხილეს ჯგუფური და ინდივიდუალური ძალადობა, მოზარდების ასაკისთვის დამახასიათებელი საინტერესო თემები, გაეცვნენ სტატისტიკას ნორვეგიის და საქართველოს მაგალითზე, ნახეს ანიმაციური ფილმი და  გამართეს დისკუსია. როლური თამაშის მეთოდის გამოყენებით გაითამაშეს ბულინგის თემატიკაზე სიტუაცია. შეასრულეს პრაქტიკული სავარჯიშოები. წყარო:kedec.ge

თბილისი. საერთაშორისო ასოციაცია კივიტას გეორგიკა  27-დან-31 მაისის ჩათვლით არასამთავრობო ორგანიზაციებისთვის CONNECT+ტრეინგებს გამართავს, რომელსაც ჩეხი, პოლონელი და სლოვაკი ექსპერტები გაუძღვებიან.  მე-5 დღეს ბიზნეს სექტორისა და ადგილობრივი თვითმმართველობების წარმომადგენლებიც დაესწრებიან. ტრენინგები სამოქალაქო, ბიზნეს და სამთავრობო სექტორს შორის თანამშრომლობისა და კომუნიკიაციის გაუმჯობესების საკითხებს დაეთმობა. ტრენინგები გაიმართება ვიშეგრადის მიერ დაფინანსებული პროექტის ,,V4 transition experience transfer for enhancing EaP CSOs' sustainability’’ ფარგლებში.

სამცხე–ჯავახეთი. 14 მაისიდან არასამთავრობო ორგანიზაცია დემოკრატ მესხთა კავშირმა, ევრაზიის თანამშრომლობის ფონდის ფინანსური მხარდაჭერით სამცხე-ჯავახეთის სამ: ახალციხის, ახალქალაქის და ნინოწმინდის მუნიციპალიტეტებში, ახალი იურიდიული პროქტის განხორციელება დაიწყო. პროექტის მიზანია: სამცხე-ჯავახეთის სამ მუნიციპალიტეტში გაზარდოს მოსახლეობისათვის მარლთმსაჯულობის ხელმისაწვდომობა და ხელი შეუწყოს ადამიანის უფლებების შესახებ ცნობიერების ამაღლებას. წყარო:ორგანიზაციის გვერდი სოციალურ ქსელში

სამცხე–ჯავახეთი. დემოკრატ მესხთა კავშირის ორგანიზებით ახალციხის ახალგაზრდული ცენტრის წევრებმა, სოფელ ურაველის ახალგაზრდებს ფოტოგრაფიის შესახებ ტრენინგი ჩაუტარეს. შეხვედრას 15–ზე მეტი ახალგაზრდა დაესწრო. ღონისძიება ჩატარდა, პროექტის „ეროვნული ინტეგრაციის გაძლიერება საქართველოში" ფარგლებში, რომელიც ხორციელდება საქართველოს გაეროს ასოციაციის მიერ, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

სამეგრელო. 22 მაისს ასოციაცია „ათინათის" ახალგაზრდულ ცენტრ „ორტუსის" წევრებმა ზუგდიდის #12 საჯარო სკოლის ბავშვებს ჩაუტარეს თანატოლთა ტრენინგი, თემაზე „ლიდერობა". ტრენინგი დამყარებული იყო დისკუსიაზე, პრაქტიკულ დავალებებზე და სახალისო სავარჯოშოებზე. ტრენერებმა ბავშვებს მიაწოდეს ინფორმაცია ლიდერის ტიპებზე და მათ მნიშვნელოვან თვისებებზე. ღონისძიება ჩატარდა პროექტ –  „ეროვნული ინტეგრაციის გაძლიერება საქართველოში" –  ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებეული შტატების საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში

სამცხე–ჯავახეთი. სოციალური მედიის ტრენინგი, რომელიც სამოქალაქო განათლებისა და პერდაგოგთა გადამზადების პროგრამის ფარგლებში ხორციელდება, ამჯერად  დაბა წაღვერის საჯარო სკოლაში ჩატარდა. ტრენინგს აღნიშნული  სკოლის სამოქალაქო განათლების პედაგოგი და სამოქალაქო კლუბის წევრები ესწრებოდნენ ტრენინგის მსვლელობისას მონაწილეები გაეცნენ ვიდეო პორტალ Civics.ge, შემქმნეს ელექტრონული ფოსტა, შემდეგ განიხილეს სხვადასხვა საკითხები და სასურველ თემებზე შექმნეს ბლოგები. ასევე შეიქმნა დაბა წაღვერის საჯარო სკოლის სამოქალაქო კლუბის ბლოგი, სადაც მოხდება იმ ღონისძიებებისა და აქტივობების განთავსება, რომელსაც განახორციელებენ სკოლაში. მოსწავლეებში სოციალური მედიის ცოდნისა და უნარ-ჩვევების განვითარება სამოქალაქო განათლებისა და პედაგოგთა გადამზადების პროგრამის ერთ–ერთი მნიშვნელოვანი ნაწილია.  აღნიშნული ტრენინგები  პროგრამაში მონაწილე ყველა საჯარო სკოლაში გაიმართება.

კახეთი. თელავის სახელმწიფო უნივერსიტეტში ტომ დემარკოს წიგნის ,,დედლაინის" ქართული თარგმანის პრეზენტაცია გაიმართა.წიგნი აუდიტორიას, პროექტის ,, BUMAP"–is მენეჯმენტის კოორდინატორმა, დანიელ ბირკენ მაიერმა წარუდგინა. წიგნი აშშ–ს საელჩოს „წიგნების თარგმნის პროგრამის" ფარგლებში გამოიცა და იგი ინგლისურიდან სოფო არსენიშვილმა თარგმნა. იგი გათვალისწინებულია იმ სტუდენტებისთვის, რომლებიც მენეჯმენტის კუთხით იღებენ განათლებას.

იმერეთი.სამოქალაქო განათლებისა და პედაგოგთა გადამზადების პროგრამის ფარგლებში ქუთაისის სამიზნე სკოლების მოსწავლეებისათვის ჩატარდა ტრენინგი თემაზე: „პრეზენტაციის ტექნიკები და საჯარო გამოსვლები, დროის მართვა". ტრენინგზე მსმენელები გაეცნენ საჯარო გამოსვლის ტექნიკებს, დაეუფლნენ პრეზენტაციის უნდარ-ჩევებს, მოამზადეს წარმატებული გამოსვლის ქეისები. იმუშავეს დროის ეფექტურ გამოყენებასა და აუდიტორიის მართვის თემებზე. სხეულის ენასა და მისი მართვის მნიშვნელობაზე საჯარო გამოსვლების დროს. წყარო: ორგანიზაციის გვერდი სოციალურ ქსელში

ქვემო ქართლი. 19 მაისს მარნეულის ახალგაზრდული ცენტრის ორგანიზებით და ეროვნული გამოცდების ცენტრის მხარდაჭერით აზერბაიჯანელი აბიტურიენტებისთვის ზოგად უნარებში საცდელი გამოცდები ჩატარდა. რეგიონში გამოცდები ეთნიკური უმცირესობებისთვის პირველად ჩატარდა და მასში ორასმა აზერბაიჯანელმა აბიტურიენტმა მიიღო მონაწილეობა. გამოცდები პროექტ „ეროვნული ინტეგრაციის გაძლიერება საქართველოშის" ფარგლებში ჩატარდა, პროექტს საქართველოს გაეროს ასოციაცია (UNAG) ახორციელებს პარტნიორ საზოგადოებრივ ორგანიზაციებთან ერთად (მარნეულში, მარნეულის ახალგაზრდული ცენტრი). წყარო:ორგანიზაციის გვერდი სოციალურ ქსელში

სამცხე–ჯავახეთი. 18–19 მაისს, ახალციხის დემოკრატიული ჩართულობის ცენტრში, გაიმართა ტრენინგის პირველი ეტაპი სამცხე–ჯავახეთის პრობაციის ბიუროს თანამშრომლებისათვის. ტრენინგი მიზნად ისახავდა პრობაციის ბიუროს შესაძლებლობებისა და საჭიროებების ანალიზის ფარგლებში გამოვლენილი საკითხების შესახებ მონაწილეთა ცოდნის გაღრმავებასა და მიღებული ცოდნის პრაქტიკაში გამოყენების ხელშეწყობას. ტრენინგები პრობაციის ბიუროს თანამშრომლებისთვის ხორციელდება პროექტის „არასრულწლოვანთა მართლმსაჯულების რეფორმის მხარდაჭერა ქვემო ქართლისა და სამხცხე–ჯავახეთის ეროვნული უმცირესოებების თემებში" ფარგლებში, რომელიც მიმდინარეობს ევროკავშირის მხარდაჭერით. წყარო: „სიდას" გვერდი სოციალურ ქსელში