თბილისი. 30 იანვარს, ღამით მინდელის შახტაში მომხდარი აფეთქების შედეგად ერთი დასაქმებული გარდაიცვალა, ხოლო ცხრა კი დაშავდა. ომბუდსმენი ღრმა მწუხარებას გამოთქვამს მომხდარის გამო, უსამძიმრებს დაღუპულის ოჯახს და დაშავებულებს მალე გამოჯანმრთელებას უსურვებს. „სახალხო დამცველი მოუწოდებს საქართველოს შინაგან საქმეთა სამინიტროს და შრომის ინსპექციას, განხორციელდეს დროული და ეფექტიანი რეაგირება მომხდარზე, მათ შორის დადგინდეს ტრაგედიის მიზეზები, რათა მომავალში მსგავსი შემთხვევების თავიდან არიდება შევძლოთ. ასევე მიმართავს შრომის ინსპექციას - მიმდინარე ინსპექტირების ფარგლებში მოხდეს ყველა დარღვევის და რისკის იდენტიფიცირება და მათი გამოსწორების მიზნით ყველა კანონმდებლობით მინიჭებული ბერკეტის გამოყენება“. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაციის ინფორმაციით, პაციენტმა, რომლის ინტერესებსაც სასამართლოში ორგანიზაციის გორის ოფისი იცავდა, გიორგი აბრამაშვილის სახელობის სამხედრო ჰოსპიტალს სასამართლო დავა მოუგო. „სასამართლომ სამედიცინო დაწესებულებას პაციენტის სასარგებლოდ სამედიცინო მომსახურების ხარჯების და მორალური ზიანის ანაზღაურება დააკისრა“. სრულად... წყარო: gyla.ge

თბილისი. თუ გაქვთ კითხვები ბავშვის განვითარების შესახებ, მშობლის სკივრი ოკუპაციურ თერაპევტთან უფასო კონსულტაციას გთავაზობთ. „მიიღეთ კვალიფიციური რჩევები და რეკომენდაციები ენისა და მეტყველების თერაპევტისგან. შეარჩიეთ თქვენთვის სასურველი დრო, კონსულტაცია გაიმართება ხუთშაბათს, 3 თებერვალს, 12:00, 13:00, 14:00 საათებზე. ოკუპაციურ თერაპევტთან კონსულტაციის დასაჯავშნად მიყევით ბმულს... კონსულტაცია დაფინანსებულია MAC Georgia-ს მიერ, „მაკ ჯორჯია“ მუდმივად ზრუნავს შშმ ბავშვებისა და მათი ოჯახების საჭიროებების დაკმაყოფილებაზე მათზე მორგებული სანდო, მაღალკვალიფიციური და ეფექტიანი სერვისების უზრუნველყოფით“. სრულად... წყარო: პლატფორმის გვერდი სოციალურ ქსელში

აფხაზეთი-ცხინვალი. რონდელის ფონდი აქვეყნებს ანი ზირაქაშვილის სტატიას „COVID-19-თან ბრძოლა: როგორ დაეხმარა რუსეთი აფხაზეთსა და ცხინვალის რეგიონს“. „კორონავირუსული ინფექციით დაინფიცირების პირველი შემთხვევა აფხაზეთში 2020 წლის 7 აპრილს დაფიქსირდა, ხოლო ერთი თვის შემდეგ, 6 მაისს დაინფიცირების პირველი შემთხვევა ცხინვალის რეგიონშიც დადასტურდა. გამწვავებული ეპიდემიოლოგიური ვითარებისა და მწირი სამედიცინო რესურსების გამო დე ფაქტო მთავრობებმა დახმარება რუსეთისგან მიიღეს“. სრულად... წყარო: kremlin-roadmap.gfsis.org

აჭარა. 28 იანვარს, აჭარის ჯანდაცვის სამინისტროს მხარდაჭერით, ბათუმში გაიმართა სამუშაო შეხვედრა, რომლის მთავარი თემებიც რუტინული იმუნიზაცია და ბავშვების სისხლში ტყვიის შემცველობის მაღალი დონე იყო. „2018 წლის მრავალინდიკატორულმა კლასტერულმა კვლევამ საქართველოში ბავშვების სისხლში ტყვიის მაღალი დონე გამოავლინა. კვლევის შედეგებს მოჰყვა ტყვიით მოშხამვის პრევენციის სახელმწიფო პროგრამის შემუშავება. სამუშაო შეხვედრის ფარგლებში მოხდა პროგრამის ეფექტიანობის შეფასება და მომდევნო ნაბიჯების დაგეგმვა 2022 წლისათვის. აუცილებელია, მთავრობამ გადადგას მნიშვნელოვანი ნაბიჯები ტყვიით მოშხამვის პრევენციისათვის“. სრულად... წყარო: ორგანიზაციის გვერდი სოციალურ ქსელში

თბილისი. მშობლის სკივრი გვიხსნის თუ რას ნიშნავს შეზღუდული შესაძლებლობების სტატუსი და რატომ არის საჭირო პირისთვის ამ სტატუსის მინიჭება. „შეზღუდული შესაძლებლობის სტატუსის დადასტურების შემდეგ, პირი ხდება სახელმწიფოსგან იმ დამატებითი მხარდაჭერის მიმღები, რომლის საფუძველზეც უნდა შემცირდეს ის სირთულეები, რომელსაც ის განიცდის ყოველდღიურ ცხოვრებაში“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ანალიტიკურ დოკუმენტში, მარნეულის მუნიციპალიტეტისა და აჭარის მაგალითზე, აღწერს ჯანდაცვის სფეროში არსებულ გამოწვევებსა და ბარიერებს, რომლებსაც რეგიონებში მცხოვრები ქალები ყოველდღიურად აწყდებიან. „შეიძლება რამე გტკიოდეს მაგრამ ითმენ იმის გამო, რომ ექიმთან მისვლით უფრო მეტი ხარჯებია. არ არის ჩვენთან ის სიტუაცია რომ ფული გქონდეს და [ექიმთან] გაიქცე საკუთარი თავისთვის … მართალია, ჯერ საკუთარი თავისთვის უნდა იზრუნო, მაგრამ უკან როცა ოჯახს ხედავ, [რომელსაც] არ აქ საშუალება ... თავს არ აძლევ უფლებას, რომ მიხვიდე და წინასწარ ჩაიტარო კვლევა საკუთარ თავზე". (რესპონდენტი მაღალმთიანი აჭარიდან) “სახელმწიფო ზოგადად პრევენციაში არ დებს რესურსს, და ეს ხელმიუწვდომელი რჩება მოსახლეობისთვის, იმდენად ძვირია ... სახელმწიფო დაფინანსება არის უკიდურესი ზომისთვის განკუთვნილი". (რესპონდენტი მარნეულის მუნიციპალიტეტიდან) „ვერ ვუმკლავდები [მედიკამენტების ყიდვას], რადგან მაქვს ფინანსური პრობლემები. ზოგჯერ დროულად ვერ ვყიდულობ მედიკამენტებს ან ნახევარს ვყიდულობ და ნაწილს ვერა“. (რესპონდენტი მარნეულის მუნიციპალიტეტიდან) სრულად... წყარო: socialjustice.org.ge

თბილისი. სოციალური სამართლიანობის ცენტრი წარმოგიდგენთ სტატიას: COVID დახმარებები მსოფლიოში (მეორე ნაწილი). „სტატიის მიხედვით, COVID-19-ის კრიზისმა აჩვენა, რომ საყოველთაო სოციალური დაცვის სისტემაში არსებული კლასიკური ბარიერები დაძლევადია, განსაკუთრებით, სოციალური დაცვის ბენეფიციარების გაფართოების, სოციალური დაცვის ახალი პროგრამების დაწყების, ახალი ინოვაციური საოჯახო პოლიტიკის შექმნისა და ყველაზე მოწყვლადებისთვის შემოსავლის უზრუნველყოფის გზით. კრიზისს მიღმა, უნივერსალური სოციალური დაცვის მისაღწევად არსებითია, რომ მოცემული პოლიტიკების სულისკვეთება კიდევ უფრო განვითარდეს“. სრულად... წყარო: socialjustice.org.ge

თბილისი. სახალხო დამცველმა სქესის ნიშნით დისკრიმინაციის საქმის ფარგლებში რეკომენდაციით მიმართა საქართველოს ფეხბურთის ფედერაციას (სფფ-ს). „ომბუდსმენმა დისკრიმინაციად მიიჩნია ის გარემოება, რომ სფფ-ს რეგულაციებში არ არის გათვალისწინებული ქალების სპეციალური საჭიროებები რეპროდუქციული ჯანმრთელობის მიმართულებით.  სახალხო დამცველმა საქართველოს ფეხბურთის ფედერაციას მოუწოდა, რომ ქალი ფეხბურთელების სექსუალური და რეპროდუქციული უფლების, ასევე შრომის უფლების დაცვის მიზნით, შემოიღოს რეგულაციები, რომელთა დარღვევისას გამოიყენებს მის ხელთ არსებულ სპორტულ სანქციებს. გარდა ამისა, საჭიროების შემთხვევაში, მიიღოს სახელმძღვანელო დოკუმენტები და გაატაროს სხვა ღონისძიებები“. სრულად... წყარო: ombudsman.ge

თბილისი. სოციალური სამართლიანობის ცენტრი წარმოგიდგენთ სტატიას: COVID დახმარებები მსოფლიოში (პირველი ნაწილი). „სტატიის მიხედვით, პანდემიამ გამოიწვია სოციალური დაცვის ზომების ყველაზე დიდი მობილიზება, რაც კი ოდესმე ყოფილა, ხალხის ჯანმრთელობის, სამუშაო ადგილების და შემოსავლების დასაცავად. თუმცა, მსოფლიოში 4 მილიარდზე მეტ ადამიანს ჯერ კიდევ არ მიუწვდება ხელი სოციალურ დაცვაზე. შრომის საერთაშორისო ორგანიზაციის განცხადებით, პანდემიაზე სოციალური რეაგირება არასაკმარისი იყო, რამაც გაზარდა უფსკრული განვითარებულ ქვეყნებსა და განვითარებად ქვეყნებს შორის. ამრიგად, COVID-19 კრიზისი უნდა განიხილებოდეს, როგორც „გაღვიძების მოწოდება“ ქვეყნებისთვის, რათა პრიორიტეტულად ჩადონ ინვესტიციები თავიანთ სოციალურ დაცვის სისტემებში, დაეხმარონ კრიზისის შეჩერებას ან შერბილებას და გააძლიერონ სოციალური დაცვის სისტემები, მომავალი გამოწვევების უკეთ დასაძლევად“. სრულად... წყარო: socialjustice.org.ge

თბილისი. ფაქტ-მეტრის ინფორმაციით, ჯანმრთელობის გაზომვისა და შეფასების ინსტიტუტის მონაცემების მიხედვით, საქართველოში მოსახლეობის 35% ატარებს პირბადეს. თებერვლის დასაწყისში კი კორონავირუსით დაინფიცირების შემთხვევების რაოდენობამ შესაძლოა, დღეში საშუალოდ 60 000-ს მიაღწიოს. სრულად... წყარო: ფაქტ-მეტრის გვერდი სოციალურ ქსელში

თბილისი. სახალხო დამცველი მის მიერ შექმნილ სპეციალისტთა/ექსპერტთა ჯგუფის N5 დასკვნას აქვეყნებს მიხეილ სააკაშვილის სამედიცინო მდგომარეობის მონიტორინგის შედეგების შესახებ.  „პაციენტის მკურნალობისა და სრულფასოვანი რეაბილიტაციის მიზნით ექსპერტთა ჯგუფი მიიჩნევს, რომ აუცილებელია: ფსიქოთერაპია - რაც დეპრესიისა და პოსტტრავმული სტრესული აშლილობის მკურნალობის პირველი რიგის მიდგომაა, და სავარაუდოდ ხელს შეუწყობს ადეკვატური კვების რეჟიმის განახლებას;  ფიზიკური რეაბილიტაცია; დამატებითი კვლევის თვალსაზრისით, რეკომენდირებულია თავის MRT კვლევა; ნევროლოგიური მო­ნი­ტორირება და პროგრესირების შემთხვევაში ელექტრონეირომიოგრაფიული კვლევის ჩატარება”. სრულად... წყარო: ombudsman.ge

თბილისი. პარტნიორობა ადამიანის უფლებებისთვის (PHR) მოთხოვნის შედეგად, სმენის არმქონე და სმენადაქვეითებულ პირებისთვის მომსახურების გაწევისას ექიმი ვალდებულია გამოიყენოს გამჭვირვალე პირბადე. „სამინისტროს მიერ, გათვალისწინებული იქნა PHR-ის მოთხოვნა და პირბადის ტარების წესის შესახებ დადგენილებას დაემატა ქვეპუნქტი, რომლის თანახმად, საგანმანათლებლო და სამედიცინო სერვისის გამწევი, ვალდებულია სმენის არმქონე და სმენადაქვეითებულ პირებთან გამოიყენოს გამჭვირვალე პირბადე ან სახის ფარი“. ვრცლად... წყარო: phr.ge

თბილისი. მითების დეტექტორი ფეისბუქში გავრცელებულ ვიდეოს ეხმაურება, რომელშიც მომხმარებელი კორონავირუსის სწრაფ ტესტზე ფორთოხლის წვენს ასხამს, ცოტა ხნის შემდეგ კი ტესტი დადებით პასუხს აჩვენებს. „ვიდეოში ნაჩვენები ტესტი, რომელიც ფორთოხლის წვენზე დადებით შედეგს აჩვენებს, წესების დარღვევითაა ჩატარებული. ტესტის ჩატარებისას აუცილებელია ბუფერული ხსნარის გამოყენება, რომელიც ტესტზე სწორ მჟვავიანობას აღადგენს და ისეთ სითხეებზე, როგორებიცაა სხვადასხვა ხილის წვენი, კოკა-კოლა და ყავა, ტესტი უარყოფით შედეგს აჩვენებს“. სრულად... წყარო: mythdetector.ge

თბილისი. საქართველოს გაეროს ასოციაცია (UNA Georgia) კამპანიის „ავიცრათ ერთმანეთისთვის“ ფარგლებში, აქვეყნებს ალერგოლოგ-იმუნოლოგის, მედიცინის დოქტორის ნინო ლომიძის ვიდეო პოსტს: ალერგია და ვაქცინაცია. „ერთადერთი გამონაკლისი ვაქცინაციის არ ჩატარებისა არის - მის პირველ დოზაზე განვითარებული სისტემური ალერგიული რეაქცია და ალერგია ვაქცინაში შემავალი კომპონეტების მიმართ“, გვიხსნის რესპონდენტი. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) აქვეყნებს „თანადგომა“-ს სრჯუ საკითხების ადვოკატირების მენეჯერისა და ფსიქოლოგის მაია ჯიბუტის ბლოგპოსტს: ონკოპაციენტი ქალები და სექსუალური ჯანმრთელობა და უფლებები. „2021 წელს ორგანიზაციამ „თანადგომა” განახორციელა თვისებრივი კვლევა, რომლის მიზანი იყო: რეპროდუქციული სისტემის ონკოლოგიური დაავადებების მქონე ქალებში სექსუალური ჯანმრთელობის სფეროში არსებული პრობლემების შესწავლა. მასალაში მიმოხილულია კვლევის შედეგად გამოვლენილი პრობლემები“. სრულად... წყარო: phr.ge

თბილისი. ინფორმაციის თავისუფლების განვითარების ინსტიტუტი (IDFI) მოუწოდებს საქართველოს ჯანდაცვის სამინიტროს, საზოგადოების მაღალი ინტერესის გათვალისწინებით, უზრუნველყოს covid 19-ით გარდაცვლილ პირთა სტატისტიკური მონაცემების, სტატიაში განხილული მახასიათებლის მიხედვით საჯაროობა. ასევე, განმარტოს ინფიცირებიდან გარდაცვალებამდე და კლინიკაში დაყოვნების დღეებთან დაკავშირებით IDFI-თვის მოწოდებული ურთიერთგამომრიცხავი მონაცემების მიზეზები. სრულად... წყარო: idfi.ge

თბილისი. სოციალური სამართლიანობის ცენტრი აქვეყნებს დოკუმენტს: სტაციონარული სერვისები ფსიქიკური ჯანმრთელობის პროგრამაში: სახელმწიფო ზედამხედველობის გარეშე. „2021 წლის აგვისტოში ივანე ბოკერიას სახელობის თბილისის რეფერალურ ჰოსპიტალში („ევექსი“) ფსიქიკური ჯანმრთელობის განყოფილების გაუქმება, - დედაქალაქში არსებული სამიდან უკვე მეორე სასიცოცხლოდ მნიშვნელოვანი ცენტრის გაქრობა, - მორიგი მძიმე დარტყმა აღმოჩნდა ფსიქიკური ჯანმრთელობის სისტემის დეინსტიტუციონალიზაციის პროცესისათვის. განყოფილების დახურვამ კიდევ ერთხელ გააშიშვლა ის სისტემური ხარვეზები, რომელთა გამოც ფსიქოსოციალური საჭიროებების მქონე ადამიანები ზარალდებიან და კვლავ დღის წესრიგში დააყენა ფსიქიკური ჯანმრთელობის სახელმწიფო პროგრამის ფარგლებში სტაციონარული ადგილების დაფინანსების წესის გადახედვის საჭიროება“. სრულად... წყარო: socialjustice.org.ge

აჭარა. სოციალური სამართლიანობის ცენტრის ინფორმაციით, მაღალმთიან აჭარაში, სხვა რეგიონების მსგავსად ბოლო დღეებში ძლიერად მოთოვა და 2-3 დღეა სოფლების ნაწილს არ მიეწოდება ელექტროენერგია, ჩაკეტილია გზებიც. „მაღალმთიანი აჭარისთვის მკაცრი ზამთარია დამახასიათებელი და ზედა სოფლები ცუდი ინფრასტრუქტურის გამო ხშირად იზოლაციაში ხვდება. ამ კლიმატური პირობების მიუხედავად, მაღალმთიან აჭარას არ ემსახურება საკუთარი რეანომობილი, რომელიც ჯანმრთელობის საჭიროების დროს მოქალაქეების სასწრაფო სამედიცინო მხარდაჭერას დროულად შეძლებდა“. ორგანიზაცია უკვე მერამდენედ მოითხოვს, სახელმწიფომ მაღალმთიანი აჭარისთვის შესაბამისი სამედიცინო ინფრასტრუქტურა შექმნას მოქალაქეების სასწრაფო სამედიცინო მხარდაჭერის უზრუნველსაყოფად. სრულად... წყარო: ორგანიზაციის გვერდი სოციალურ ქსელში ფოტო: შორენა შავაძე

თბილისი. სოციალური სამართლიანობის ცენტრის ინფორმაციით, კორონავირუსის პრევენციისთვის შეზღუდვების შემოღების უფლებამოსილება მთავრობას 2023 წლამდე უგრძელდება. „ადამიანის უფლებებთან დაკავშირებული ასეთი ფუნდამენტური საკითხების გადაწყვეტა საქართველოს პარლამენტის კონსტიტუციური უფლებამოსილებაა. „საზოგადოებრივი ჯანმრთელობის დაცვის შესახებ“ კანონი კი ითვალისწინებს ამ უფლებამოსილების მთლიანად მთავრობაზე გადანდობას, რაც პარლამენტის მიერ საკანონმდებლო ფუნქციის შესრულებაზე უარის თქმასა და ქვეყანაში დე-ფაქტო საგანგებო მდგომარეობის დაკანონებას უტოლდება“. ორგანიზაციის აზრით, პარლამენტი არ უნდა შემოიფარგლოს მთავრობაზე უფლებამოსილების დელეგირების ვადის ავტომატური გაგრძელებით და დეტალურად უნდა მოწესრიგდეს პანდემიის მართვის პროცესში მთავრობის უფლებამოსილების ფარგლები. სრულად... წყარო: socialjustice.org.ge ფოტო: parliament.ge

თბილისი. მოძრაობამ „ხელმისაწვდომი გარემო ყველასათვის“ პროექტის - „სოციალური დაცვა უხილავი შშმ პირებისთვის COVID-19-ის პირობებში“ ფარგლებში, შეზღუდული შესაძლებლობების მქონე პირებისთვის დამხმარე საშუალება - ნაწოლების რისკის შესამცირებელი ბალიშები (Roho Cusion) შეიძინა. „დამხმარე საშუალება - ბალიში (Roho Cusion) აუმჯობესებს მობილობის შეზღუდვის მქონე პირების ყოველდღიურ ცხოვრებას და ახდენს ნაწოლების პრევენციას, რაც შემცირებული მობილობის და სახელმწიფოს მხრიდან სათანადო პოლიტიკის არარსებობის პირობებში, ეტლით მოსარგებლე პირებისთვის სასიცოცხლო მნიშვნელობის მატარებელია“. სრულად... წყარო: ორგანიზაციის გვერდი სოციალურ ქსელში

თბილისი. კონსულტაციისა და ტრენინგის ცენტრის (CTC) მხარდაჭერით, „საქართველოს ზრუნვის პლატფორმამ“ ჩაატარა კონფერენცია „კულტურული ცვლილებები ჯანდაცვის სისტემაში“.  „კონფერენციის მიზანი იყო საქართველოს ჯანდაცვის სისტემაში ბიოფსიქოსოციალური მიდგომისა და ინტეგრირებული ზრუნვის დანერგვის შესაძლებლობების განხილვა და დაინტერესებულ პირებს შორის დიალოგის ხელშეწყობა“. სრულად... წყარო: ორგანიზაციის გვერდი სოციალურ ქსელში