თბილისი. 10 ოქტომბერს, საქართველოს პირველმა ლედიმ ბავშვთა პირველი ჰოსპისის მშენებლობის დაწყებას ჩაუყარა საფუძველი. აღნიშნული სოციალური პროექტის ინიციატორი ფონდი „ღია საზოგადოება-საქართველოა", რომელსაც საქართველოს პრეზიდენტის სარეზერვო ფონდი, „სამედიცინო კორპორაცია ევექსი" და ინდივიდუალური დონორები აფინანსებენ. „ჰოსპისის" პროექტი სოციალური პასუხისმგებლობის კარგი მაგალითია - შეიქმნა პრეცედენტი, როდესაც მიზნის მისაღწევად გაერთიანდა სამთავრობო, არასამთავრობო, ბიზნეს და სამოქალაქო სექტორები", აღნიშნა პირველმა ლედიმ. „ბავშვთა ჰოსპისი სამი ძირითადი მიმართულებით იმუშავებს: 24 საათიანი მომსახურება ერთდროულად 10 ბავშვისთვის, დღის ცენტრი, სადაც ბავშვები და მათი მშობლები დღის განმავლობაში მიიღებენ საჭირო მომსახურებას და შინ ზრუნვის სამსახური, რომელიც ბინაზე მოემსახურება ბავშვებს. ბავშვთა ჰოსპისის მშენებლობა 2016 წლის ბოლოს დასრულდება", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. შინ ზრუნვის სამსახური შეიქმნა პალიატიური მზრუნველობის საჭიროების მქონე ბავშვებისთვის. შინ ზრუნვის მიზანია უკურნებელი დაავადების მქონე ბავშვების ფიზიკური მოვლა და ფსიქოლოგიური მხარდაჭერა. მომსახურება 18 წლამდე ასაკის ბავშვებისთვის უფასოა. შინ ზრუნვის სამსახური ფონდი „ღია საზოგადოება-საქართველოს” მხარდაჭერით მუშაობს. სრულად... წყარო: www.osgf.ge

თბილისი. არასამთავრობო ორგანიზაციების საკოორდინაციო ჯგუფი „ადამიანის უფლებათა ცენტრს" შეხვდა. შეხვედრა გაეროს უნივერსალური პერიოდული მიმოხილვის ფარგლებში შედგა. არასამთავრობო ორგანიზაციების საკოორდინაციო ჯგუფი, სქესობრივი განათლების შვედური ასოციაციის (RFSU) მხარდაჭერით, გაეროს უნივერსალური პერიოდული მიმოხილვის (UPR) ფარგლებში გეგმავს სქესობრივი, რეპროდუქციული და ჯანმრთელობის უფლებების (SRHR) დაცვის ხელშეწყობას. ამ მიზნით, საკოორდინაციო ჯგუფს დაგეგმილი აქვს ადვოკატირების ღონისძიებების განხორციელება ეროვნულ და საერთაშორისო დონეზე. 7 ოქტომბერს, საკოორდინაციო ჯგუფი მონაწილეობას მიიღებს ჟენევაში დაგეგმილ წინასასესიო განხილვებში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორის გამჭვირვალობა საქართველო ბლოგპოსტს აქვეყნებს. კვლევა შეეხება მოქალაქეთა დამოკიდებულების ანალიზს საყოველთაო ჯანდაცვის პროგრამასთან დაკავშირებით. „2015 წელს ჩატარებული კვლევის მიხედვით, ქვეყანაში ჯანდაცვასთან დაკავშირებულ ორ უმთავრეს მიგნებას წარმოადგენს ის, რომ: 1. საქართველოს მინიმუმ 1.5 მილიონი ზრდასრული მოქალაქე მზად არის საკუთარი ჯანმრთელობის დაზღვევის ფინანსური ტვირთი სახელმწიფოსთან ერთად გაინაწილოს 2. საყოველთაო ჯანდაცვის გამოკითხული ბენეფიციარების 36% ჯერ კიდევ არ სარგებლობს გეგმიური ამბულატორიის მომსახურებებით, რაც ნიშნავს რომ სულ ცოტა 1.1 მილიონი ლარი იხარჯება 1.1 ბენეფიციარზე ისე, რომ ისინი ამ მომსახურებებით არ სარგებლობენ", ნათქვამია კვლევაში. სრულად... წყარო: www.transparency.ge

თბილისი. სახალხო დამცველი ბავშვთა ინფექციურ საავადმყოფოს სქესის ნიშნით დისკრიმინაციის ფაქტზე რეკომენდაციით მიმართავს. საჩივრის თანახმად, მამაკაცებს პაციენტებთან თავდგომის უფლება ეკრძალებათ. ომბუდსმენი თლის, რომ შპს „თბილისის ბავშვთა ინფექციურმა კლინიკურმა საავადმყოფომ" უნდა „დასახოს ერთიანი სამოქმედო პოლიტიკა და შეიმუშავოს შიდა დოკუმენტი, რომლითაც უზრუნველყოფილი იქნება საავადმყოფოს ყველა განყოფილებაში თავდგომასთან დაკავშირებით პაციენტთა და მშობელთა, მეურვეთა თუ წარმომადგენელთა მიმართ თანასწორი მოპყრობა", ნათქვამია განცხადებაში. სრულად... წყარო: www.ombudsman.ge

თბილისი. „საერთაშორისო გამჭვირვალობა საქართველო" მედიკამენტებთან და რეცეპტების სისტემასთან დაკავშირებით საზოგადოებრივი აზრის კვლევის შედეგებს აქვეყნებს. კვლევის თანახმად „1. გამოკითხულთა დაახლოებით ნახევრის შეფასებით მათზე და მათ ოჯახზე რეცეპტების სისტემაში განხორციელებულმა ცვლილებებმა უარყოფითი გავლენა მოახდინა. 2.წამლებზე ყოველთვიური დანახარჯები კვლავ საკმაოდ მაღალია", ნათქვამია ორგანიზაციის ვებ-გვერდზე. სრულად... წყარო: www.transparency.ge

სამეგრელო. 31 აგვისტოს, ზუგდიდში, ახალგაზრდა ფსიქოლოგთა და ექიმთა ასოციაცია „ქსენონის" ორგანიზებით, ტრადიციულად აღინიშნა ზედოზირების შესახებ ცნობიერების ამაღლების საერთაშორისო დღე (International Overdose Awareness Day). ღონისძიების მიზანია საზოგადოების ინფორმირების დონის ამაღლება ნარკოტიკული ზედოზირების, მისი პრევენციისა და მართვის საკითხებთან დაკავშირებით. ეროვნული კამპანიის "გადავარჩინოთ სიცოცხლე" ფარგლებში, ზუგდიდში სხვადასხვა ღონისძიებები გაიმართა… სრულად... წყარო: ორგანიზაციის ვებ-გვერდი სოციალურ ქსელში

აჭარა. 28 ივლისს, მსოფლიოში ჰეპატიტის დაძლევის დღე აღინიშნა. ამ თარიღს ბათუმში მრგვალი მაგიდა მიეძღვნა. ჯანდაცვის სამინისტრომ, დაავადებათა კონტროლის ცენტრთან ერთად, ის საქმიანობა შეაჯამა, რაც სახელმწიფომ ბოლო წლებში დაავადებასთან საბრძოლველად გასწია. გასულ წელს სახელმწიფომ მსჯავრდებულებისთვის უფასო გამოკვლევები დაიწყო, სამკურნალო პრეპარატებზე დაწესდა ფასდაკლებები. მიმდინარე წლიდან კი, 5 000 პაციენტისთვის ახალი პრეპარატით უფასო მკურნალობა დაიწყო. „ცოტა ცე" - ელიმინაციის გრძელვადიანი პროგრამის შემუშავების მიზნით, პაციენტთა და ზიანის შემცირების საქართველოს ქსელის ორგანიზაციებმა კამპანიაც დაიწყო. კამპანიის ფარგლებში ბულვარის ტერიტორიაზე მსვლელობაც გაიმართა. 29 ივლისის დილიდან კი ბულვარის კოლონადებთან გაიშლება კარავი, სადაც ცე ჰეპატიტის შემოწმება უფასო იქნება. ჰეპატიტთან ბრძოლის საერთაშორისო დღეს შეუერთდნენ ხულოშიც. რაიონულ ჰოსპიტალში დილიდან დაიწყო უფასო გამოკვლევები. უფასო აქცია ხულოს მუნიციპალიტეტში პირველად ტარდება და იგი ორი დღის განმავლობაში გაგრძელდება.

თბილისი. ახალგაზრდა ფინანსისტთა და ბიზნესმენთა ასოციაცია ეხმაურება საქართველოს ჯანდაცვის მინისტრის, დავით სერგეენკოს მიერ გამოცხადებულ ჯანდაცვის პირველადი რგოლის რეფორმას. „ჯანდაცვის პირველადი რგოლის რეფორმის პროცესში რეალური ეკონომიკური ეფექტის მისაღწევად აუცილებელია სექტორში დასაქმებული მედიკოსების შრომის ღირსეული ანაზღაურება და სისტემაში ხარჯეფექტურობის მიღწევა. ეს უნდა იყოს ორმხრივი ეკონომიკური ეფექტი, რამდენადაც, ერთი მხრივ, პირველადი ჯანდაცვის სისტემის გამართულად ფუნქციონირების შემთხვევაში, ანუ, ადგილზე სწორი დიაგნოსტირებისა და სწორი მკურნალობის დანიშვნისას, პაციენტებს შეუმცირდებათ დანახარჯები მედიკამენტებზე და მეორეს მხრივ, დაიკლებს მიმართვიანობა ჰოსპიტალური სექტორისადმი, რაც თავის მხრივ, შეამცირებს ჯანდაცვის საყოველთაო პროგრამის ფინანსურ მოცულობას, ნათქვამია განცხადებაში. სრულად... წყარო: ორგანიზაციის ვებ-გვერდი სოციალურ ქსელში

სამეგრელო. 13 ივლისს, ასოციაცია „ქსენონის" ორგანიზებით პაციენტის სკოლის „ყველაფერი с ჰეპატიტის შესახებ" მორიგი შეხვედრა გაიმართა. შეხვედრას ესწრებოდნენ ქ. ზუგდიდის მერიისა და ზუგდიდის მუნიციპალიტეტის გამგეობის ჯანდაცვის სამსახურის უფროსები, რომლებმაც მოწვეულ აუდიტორიას მიაწოდეს ინფორმაცია დაავადების დიაგნოსტიკის დაფინანსებასთან დაკავშირებულ ყველა საკითზე: საჭირო დოკუმენტაცია, დაფინანსების ოდენობა ... სრულად... წყარო: ორგანიზაციის ვებ-გვერდი სოციალურ ქსელში

აჭარა. 26 ივნისს, ბათუმის დემოკრატიული ჩართულობის ცენტრის ორგანიზებით საინფორმაციო ხასიათის შეხვედრა გაიმართა. „არა ნარკოტიკს" – ასე ერქვა დისკუსიას, რომლითაც ბათუმში ნარკომანიასთან ბრძოლის საერთაშორისო დღე აღნიშნეს. შეხვედრას ადგილობრივი მედიკოსები, საზოგადოებრივი ორგანიზაციებისა და ჯანდაცვის სამინისტროსა და მერიის განყოფილების წარმომადგენლები ესწრებოდნენ. შეხვედრის მონაწილეებმა აჭარაში არსებულ პროგრამებსა და სტატისტიკის შესახებ იმსჯელეს. თუ როგორია რეგიონის პოლიტიკა აღნიშნულ საკითხთან დაკავშირებით. როგორ ეხმარება ადგილობრივი ხელისუფლება ნარკოდამოკიდებულებსა და ნარკომომხმარებლებს, რა შედეგი არის დღეს და სამომავლოდ ნარკომანიის შესამცირებლად რა ნაბიჯების გადადგმას გეგმავს სახელმწიფო, ეს საკითხები კითხვა-პასუხის რეჟიმში განიხილეს.

იმერეთი. ,,მომავლის თაობა'' სამოქალაქო განათლების პროგრამის ფარგლებში, კლუბმა ,,ორთოდოქსები'' საერთაშორისო ასოციაციის ,,საქართველოს ქალები მშვიდობისა და სიცოცხლისათვის'' დახმარებით უფასო პირველადი სამედიცინო კვლევა მოაწყვეს ქალაქ ჭიათურის სოციალურად დაუცველი მოსწავლეებისა და პედაგოგებისთვის. სამედიცინო კვლევა 1000-მდე ადამიანს ჩაუტარდა, უფასოდ დარიგდა პირველადი მოხმარების მედიკამენტები. სრულად... წყარო: ორგანიზაციის ვებ-გვერდი სოციალურ ქსელში

თბილისი. „ახალგაზრდა ფინანსისტთა და ბიზნესმენთა ასოციაცია" – აფბა აგრძელებს ჯანდაცვის სექტორის ეკონომიკური და ფინანსური მაჩვენებლების შესწავლას. ამ საკითხზე ორგანიზაციამ ბრიფინგი გამართა და ჯანდაცვის სექტორის ეკონომიკური და ფინანსური მაჩვენებლების შესწავლის შედეგები წარადგინა. სრულად... წყარო: afba.ge

აჭარა. 24 მაისს, ბათუმის ევროპის მოედანზე, არასამთავრობო ორგანიზაციის „კავშირი იმედის'', ზიანის შემცირების საქართველოს ქსელისა და შიდსის დაავადებულთა დახმარების ფონდის ორგანიზებით – შიდსით გარდაცვლილთა საერთაშორისო დღე აღნიშნეს. მოედანზე შიდსით გარდაცვლილთა ხსოვნის პატივსაცემად სანთლები დაანთეს. ასევე, იმ პრევენციულ ზომებზე ისაუბრეს, რაც ინფექციის თავიდან ასაცილებლად საზოგადოებამ აუცილებლად უნდა იცოდეს. მსგავსი აქცია საქართველოს ყველა დიდ ქალაქში ჩატარდა.

თბილისი. ახალგაზრდა ფინანსისტთა და ბიზნესმენთა ასოციაცია ფარმაცევტული ბაზრის კვლევას იწყებს, ამის შესახებ აფბას ვიცე-პრეზიდენტმა გიორგი კაპანაძემ, საინფორმაციო სააგენტო ,,პირველის" პრესკლუბში ისაუბრა: „კვლევის პირველსავე ეტაპზე გამოიკვეთა შემაშფოთებელი ტენდენცია. კერძოდ, დოლარისა და ევროს მიმართ ლარის დევალვაციის გამო იზრდება სოციალურად დაუცველი ადამიანების რიცხვი, რომელთათვისაც სულ უფრო ძნელი ხდება საჭირო მედიკამენტებისა და სამედიცინო მომსახურებების მიღება. ამდენად, ფასების მოსალოდნელი მატება კიდევ უფრო ამძიმებს მოსახლეობის სოციალურ ყოფას და სახელმწიფომ ყველა ღონე უნდა იხმაროს მდგომარეობის შესამსუბუქებლად”... სრულად... წყარო: afba.ge

აჭარა. 5 მაისს, აჭარის ჯანდაცვის სამინისტროში 2016-2019 წლების პროგრამების საშუალოვადიანი გეგმის განიხილვა საზოგადოებრივი ორგანიზაციების წარმომადგენლებთან შედგა. ჯანდაცვის მინისტრის განცხადებით, გრძელვადიან პროგრამაში მიზნობრივი პროგრამები გაფართოვდება. სამინისტროს ბიუჯეტი 2015 წელს 641 000 ლარით გაიზრდება, საერთო ჯამში, 18 პროგრამა გაგრძელდება, ერთი ახალი კი დაემატება. საკუთარი სამოქმედო გეგმა წარმოადგინა საზოგადოებრივი ჯანდაცვის ცენტრმა და დასაქმების სააგენტომ. შეხვედრას არასამთავრობო ორგანიზაციების გარდა სამედიცინო დაწესებულებების წარმომადგენლებიც დაესწრნენ.

იმერეთი. 29 აპრილს ქუთაისის ახალგაზრდული ცენტრის წევრებმა გლობალური კამპანიის „დავიცვათ ბავშვების სიცოცხლე" ფარგლებში, ქუთაისის # 38 საჯარო სკოლაში ბავშვთა საგზაო უსაფრთხოებასთან დაკავშირებით პრეზენტაცია ჩაატარეს. სრულად... წყარო: ორგანიზაციის ვებ-გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა (IDFI) საქართველოს შრომის, ჯანმრთელობისა და სოციალური დაცვის სამინისტროდან მიიღო ინფორმაცია 2013-2014 წლებში საქართველოში ჩატარებული აბორტების რაოდენობის შესახებ. განვლილ წლებში იმავე სამინისტროდან მიღებული ანალოგიური შინაარსის მაჩვენებლები საშუალებას გვაძლევს წარმოგიდგინოთ 2004-2014 წლებში საქართველოში ორსულობის შეწყვეტის ფაქტების ტენდენციები. 2013 წელს ინსტიტუტის მიერ გამოქვეყნებულმა სტატიამ აბორტების სტატისტიკა საქართველოში 2004-2012 „ნათლად აჩვენა, რომ საქართველოში 2012 წლამდე ყოველწლიურად შეინიშნებოდა აბორტების რაოდენობის მატების მზარდი ტენდენცია და 2012 წელს ოფიციალურად ორსულობის შეწყვეტის 39 225 ფაქტი დაფიქსირდა. როგორც მიღებული დოკუმენტაციით ირკვევა მომდევნო წლებში გარკვეულწილად აბორტების კლებადი ტენდენცია ფიქსირდება. 2013 წელს აღნიშნული 36 537 შემთხვევამდე შემცირდა, ხოლო 2014 წელს წინასწარი მონაცემებით 31 908 შემთხვევა არის დაფიქსირებული", ნათქვამია პუბლიკაციაში. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაციამ, ჯანმრთელობის მსოფლიო დღესთან დაკავშირებით, ქუჩის გამოკითხვა ჩაატარა. მისი მიზანი იყო რამდენად იციან მოქალაქეებმა რას ნიშნავს ჯანმრთელობის უფლება და დაცულია თუ არა ის საქართველოში. ამ დღესთან დაკავშირებით საიამ სამ ქალაქში – თბილისში, ქუთაისსა და ზუგდიდში – საზოგადოებისთვის ჯანდაცვის სფეროში მათი უფლებების ინფორმირების მიზნით აქციები გამართა. წყარო: ორგანიზაციის ვებგვერდი სოციალურ ქსელში

თბილისი. შინ ზრუნვა პალიატიური მზრუნველობის საჭიროების ბავშვებისთვის სერვისს სთავაზობს მათ, ვისაც დახმარება სჭირდება. „ჩვენ გვინდა, რომ არცერთ ბავშვს არ დასჭირდეს ჩვენი სერვისი... ჩვენი ბავშვები განიცდიან სხვადასხვა სახის რთულ დაავადებებს, რაც მოზარდებში არ აღინიშნება... ის დაავადებებიც კი, რომლებიც მოზრდილებში გვხვდება, შეიძლება ბავშვებში განსხვავებულად გამოიხატებოდეს... ჩვენ გვინდა, რომ არცერთ ბავშვს არ დასჭირდეს ჩვენი სერვისი, მაგრამ თუ დაგჭირდათ, იცოდეთ რომ თქვენს სამსახურში ვართ". სრულად...

თბილისი. 24 მარტს, საქართველოს წითელი ჯვრის საზოგადოებამ და „საქართველოს კოალიცია ტუბერკულოზის წინააღმდეგ" სოლიდარობის აქცია–მსვლელობა გამართეს ლოზუნგით „გამოვავლინოთ, ვუმკურნალოთ, დავამარცხოთ ტუბერკულოზი". აქციის მიზანს ტუბერკულოზის პრობლემისადმი საზოგადოების ინტერესის გაზრდას და ტუბდაავადებულთა მხარდაჭერას წარმოადგენდა. აქციაში მონაწილეობა მიიღეს წითელი ჯვრის მოხალისეებმა, საზოგადოებისთვის ცნობადმა სახეებმა, სამთავრობო და არასამთავრობო სექტორის წარმომადგენლებმა, ტუბერკულოზით დაზარალებულმა ადამიანებმა, ღონისძიებაში იყო ჩართული ასევე მოზარდთა სახლი - რომელშიც გაერთიანებულია 21 საჯარო სკოლა, ასევე სტუდენტები და ახალგაზრდებმა. საქართველოს წითელი ჯვრის საზოგადოება 2008 წლიდან ჩართულია ტუბერკულოზის წინააღმდეგ ბრძოლის პროცესში და მის ძირითად მიზანს წარმოადგენს ტუბერკულოზით დაავადებული პაციენტების გაძლიერება, მკურნალობაზე დამყოლობის მხარდაჭერა და ტუბერკულოზითან ასოცირებული სტიგმისა და დისკრიმინაციის შემცირება. წყარო: ორგანიზაციის ვებგვერდი სოციალურ ქსელში  

კახეთი. საზოგადოებრივი გაერთიანება „ბემონის” და აღმოსავლეთ-დასავლეთის შიდსის ფონდის (AFEW, Netherlands) ორგანიზებით თელავში გაიმართა დისკუსია თემაზე: „მეტადონის ჩანაცვლებითი თერაპია და ადვოკატირება”. შეხვედრას ნარკოტიკების მოხმარების პრობლემებზე მომუშავე თელავის მუნიციპალიტეტის, არასამთავრობო და სამთავრობო ორგანიზაციების წარმომადგენლები ესწრებოდნენ. საზოგადოებრივი გაერთიანება „ბემონის” თელავის ოფისის ხელმძღვანელის, დავით ღონღაძეს თქმით, შეხვედრა მიზნად ისახავდა ნარკოკანონმდებლობასთან დაკავშირებული პრობლემების მიმოხილვას, მეტადონის ჩანაცვლებითი თერაპიის არსებული ვითარების განხილვას, ნარკოტიკების მომხმარებელთა უფლებების დაცვასა და ადვოკატირებასთან დაკავშირებულ საკითხებზე მსჯელობას.