ქვემო ქართლი. საქართველოს ფერმერთა ასოციაციის ორგანიზებით, პროექტის „ეს წალკაა“ პარტნიორობის ფარგლებში, წალკის რაიონის ფერმერებისთვის და მცირე ბიზნესის წარმომადგენლებისთვის ტრენინგები მიმდინარეობს. „ბენეფიციარებმა უკვე გიარეს ტრენინგები ენერგოეფექტურობასა და კლიმატგონივრულ მეწარმეობაში, ელექტრონულ კომერციასა და ციფრულ მარკეტინგში და ინოვაციურ სტარტაპმეწარმეობაში; 11 მაისის ჩათვლით, ტრენინგის მონაწილეებისთვის შეხვედრები გაიმართება: აგროტურიზმის მენეჯმენტი და საკანონმდებლო ჩარჩო; სურსათის უვნებლობის სტანდარტები პირველადი და გადამუშავებული პროდუქტის წარმოებაში; ტყის არამერქნული პროდუქტების მდგრადი მართვა“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ მარიამ დევიძის სტატიას -„ხილული თუ უხილავი: კლიმატის ცვლილება და სოფლად მცხოვრები ქალების შრომა“. „კლიმატის ცვლილება გლობალური პრობლემაა, რომელიც მრავალი გამოწვევის წინაშე აყენებს მსოფლიოს ყველა ქვეყანას. კლიმატის ცვლილების მთავრობათაშორისი პანელის (IPCC-ის) მიხედვით, კლიმატის ცვლილებით გამოწვეული შედეგები აფერხებს სასოფლო-სამეურნეო საქმიანობების წარმოებასა და წყლის მიწოდებას, რაც აისახება საკვების უვნებლობის, ხელმისაწვდომობისა და ფასის შენარჩუნების საკითხებზე.  აღსანიშნავია, რომ კლიმატის შეცვლაში მთავარი წვლილი მდიდარ ქვეყნებსა და მოსახლეობას მიუძღვით, მაშინ როცა მისი მავნე შედეგები ღარიბ ქვეყნებსა (მათ შორის, საქართველოსაც) და მოსახლეობის მარგინალურ და მოწყვლად ჯგუფებს უფრო აზარალებს, და მათ შორის ქალებიც არიან. ამის შედეგად კი სოციალური და გლობალური უთანასწორობა კიდევ უფრო მწვავდება“, ნათქვამია სტატიაში. სრულად... წყარო: socialjustice.org.ge

ქვემო ქართლი. გასულ კვირას სოციალური სამართლიანობის ცენტრის (ყოფილი EMC) ორგანიზებით სოფელ ვახტანგისში გაიმართა შეხვედრები ადგილობრივ გლეხებთან და ახალგაზრდებთან.  „მოხსენებების თემატიკა მოიცავდა გლეხთა კოოპერატივებისა და სახელმწიფოს მიერ აგრარული სუბსიდირების შესახებ ლექციას, 1 + 4 პროგრამის, პროფესიის არჩევის, უნივერსიტეტში ჩაბარებისა და სწავლის შესახებ კვლევის დაკვირვებებისა და პირადი გამოცდილებების გაზიარებას. შეხვედრები გაიმართა სოფელი ვახტანგისის ახლადგახსნილ სათემო ცენტრში“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეო სიუჟეტს: ქალების შრომა შინ და გარეთ. „საქართველოში ქალები კაცებთან შედარებით სამჯერ მეტ დროს უთმობენ საოჯახო საქმეებს. ნადის ტრადიცია ზემო აჭარაში დღემდეა შემორჩენილი. შრომითი ურთიერთდახმარება თავდაპირველად დახმარების ნებაყოფლობით პრინციპს ემყარებოდა, ყოველგვარი ვალდებულებებისა და შრომა-მიგების გარეშე. ქალები ერთმანეთის შრომას უსასყიდლოდ იზიარებენ“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) სასამართლოში იცავს ადიგენის მუნიციპალიტეტის სოფელ კიკიბოსა და დერცელში მცხოვრები ქართველი მუსლიმი გლეხების ინტერესებს. „სოფლის საძოვარი მიწები, რომელსაც გლეხები წლების განმავლობაში მართლზომიერად და კეთილსინდისიერად იყენებდნენ, ქონების ეროვნულმა სააგენტომ და მთავრობამ მოულოდნელად საპატრიარქოს გადასცა საკუთრებაში. რამდენიმეთვიანი სასამართლო განხილვების შემდეგ თბილისის სააპელაციო სასამართლომ ჩვენი სარჩელი ნაწილობრივ დააკმაყოფილა და ერთი მოსარჩელის მიმართ, რომლის საკუთრებაში არსებული მიწის ზუსტი იდენტიფიკაცია შესაძლებელი გახდა ექსპერტიზით, აღმასრულებელი ხელისუფლების მიერ საძოვრების გასხვისებასთან დაკავშირებით მიღებული გადაწყვეტილებები ბათილად ცნო. EMC აგრძელებს ბრძოლას ზემდგომ სასამართლოში სხვა გლეხების ინტერესების დაცვისთვის“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეოს: გლეხები მარნეულიდან - უფლება და საჭიროება მიწაზე. „სოფელი მეორე ქესალო მარნეულის მუნიციპალიტეტში, წითელი ხიდის საზღვართან მდებარეობს. მოსახლეობა უკვე რამდენიმე წელია ითხოვს სასოფლო-სამეურნეო მიწების სარგებლობაში გადმოცემას. მიწა ადგილობრივი გლეხებისთვის არსებობისა და თვითგადარჩენის საბაზისო რესურსია. სამწუხაროდ, ადგილობრივი გლეხებისთვის მიწით სარგებლობის პროცესს ამ რეგიონში მიწების გადანაწილების უსამართლო პრაქტიკა, მიწის დაუსრულებელი რეფორმა და ასევე, ადგილობრივი ეპარქიის გავლენები აფერხებს“, ნათქვამია ორგანიზაციის ვებგვერდზე. წყარო: emc.org.ge

საგანმანათლებლო პროცესის დასახმარებლად, გაეროს განვითარების პროგრამამ 6 კოლეჯს 800,000 ლარის ღირებულების სასოფლო-სამეურნეო ტექნიკა გადასცა.  ამ აღჭურვილობის გამოყენებით სტუდენტები პრაქტიკულ სწავლებას გაივლიან, ხოლო პროფესიული კოლეჯები თავისი ნაკვეთების დამუშავებას შეძლებენ.  სრულად...   წყარო: გვერდი სოციალურ ქსელში

საქართველო. 2020 წელს, საქართველოში, 700-ზე მეტმა ფერმერმა მიიღო მონაწილეობა ევროკავშირის მხარდაჭერით გაეროს სურსათისა და სოფლის მეურნეობის ორგანიზაციის (FAO) მიერ ENPARD-ის პროგრამის ფარგლებში ორგანიზებულ ტრენინგებში. FAO-ს ადგილობრივებმა და საერთაშორისო აგრონომებმა პრაქტიკული განათლების მეთოდზე დაფუძნებული ტრენინგები ქვეყნის სხვადასხვა რეგიონში ჩაატარეს. სასწავლო შეხვედრების თემატიკა მრავალფეროვნებით გამოირჩეოდა, ნიადაგის მომზადებით და სათესლე მასალის შერჩევით დაწყებული, ირიგაციით, მოსავლის აღება-შენახვითა და ბაზრამდე ტრანსპორტირებით დამთავრებული. ფერმერებს საშუალება ჰქონდათ პროცესებს დაკვირვებოდნენ და საუკეთესო სასოფლო-სამეურნეო პრაქტიკები შეესწავლათ საქართველოს სხვადასხვა რეგიონში მოწყობილ 40-ზე მეტ სადემონსტრაციო ნაკვეთზე. ფერმერებმა მიღებული ცოდნა და გამოცდილება საკუთარ მეურნეობებშიც წარმატებით დანერგეს. სრულად...  წყარო: europa.eu

USAID თანამშრომლობს ფერმერებთან, მოსავლის აღების შემდგომ მენეჯმენტში ეხმარება და ქვეყანაში თანამედროვე და მომგებიანი სოფლის მეურნეობის სექტორის შექმნას უწყობს ხელს. სრულად...   წყარო: გვერდი სოციალურ ქსელში

ადგილობრივი დემოკრატიის სააგენტო საქართველო გრანტის „რაჭა-ლეჩხუმი ქვემო სვანეთის მხარის განვითარების ინიციატივა“ ფარგლებში აგრძელებს აგროტურების ორგანიზებას მთავრობის მიერ დადგენილი რეგულაციების სრული დაცვით. „ამჯერად, ლენტეხის მუნიციპალიტეტში მცხოვრები ფერმერები ამბროლაურისა და ონის მუნიციპალიტეტს ესტუმრნენ და შემდეგი წარმატებული საწარმოები მოინახულეს: “Blauenstein Georgia/ ბლაუენშტაინ საქართველო“-ს კუთვნილი ფერმა და რაჭული ლორის საწარმო; თაფლის გადამამუშავებელი საწარმო ამბროლაურში; „გეო-ფლაუერი“-ს ჩირის გადამამუშავებელი საწარმო. აგრო ტურის განმავლობაში ფერმერები გაეცნენ თაფლის გადამუშავების მეთოდებს, სხვადასხვა სახეობის ლორის წარმოებისა და ჩირის დამზადების ტექნოლოგიას“. სრულად... წყარო: ორგანიზაციის გვერდი სოციალურ ქსელში

თბილისი. სოფლად მცხოვრები ქალების შესაძლებლობების გაზრდის მიზნით, სოფლის განვითარების სააგენტოსა და გაეროს ქალთა ორგანიზაციას შორის მემორანდუმი გაფორმდა.  შეთანხმების მიზანი სოფლის განვითარების სააგენტოს პროგრამებში ქალების ჩართულობა და ამ გზით მათი ეკონომიკური გაძლიერების მხარდაჭერაა. ერთ-ერთი მიზანია სპეციალური პროგრამის შემუშავებაც, რომელიც ქალთა მოწყვლადი ჯგუფებისთვის იქნება განკუთვნილი.  სრულად...  წყარო: გვერდი სოციალურ ქსელში

სამეგრელო. განათლების განვითარების და დასაქმების ცენტრის (EDEC) ინფორმაციით, 18 სექტემბერს, ლურჯი მოცვის აგრო კონსულტანტის პროგრამის კურსდამთავრებულებს სერტიფიცირება ჩაუტარდათ. „აღნიშნული პროგრამა დუალური პროფესიული განათლების სასწავლო პროგრამის ფარგლებში ხორციელდება. მასში სამეგრელოში მცხოვრები იძულებით გადაადგილებული და კონფლიქტის შედეგად დაზარალებული 23 ახალგაზრდა მონაწილეობს“. სრულად... წყარო: ორგანიზაციის გვერდი სოციალურ ქსელში

წნორის აგრო სკოლის პატარა ფერმერები საკუთარ მოსავალს ხვალ, 7 აგვისტოს, საღამოს 17:00 საათიდან, თბილისურ აგრო ბაზარზე, კაფე „მზიურში“ გაიტანენ.  8-13 წლის პატარა ფერმერებმა „ცოდნის კაფეს“ ონლაინ აგრო სკოლაში 5 კულტურის მოყვანა ისწავლეს და პარასკევს, მზიურის კაფეს ეზოში, აგრო ბაზარზე დაგახვედრებენ: კიტრს, პომიდორს, კარტოფილს, ბროკოლს.  აგრო ბაზრის პატარა სტუმრებისთვის გაიმართება სახალისო აგრო ვიქტორინა, რომლის გამარჯვებულები აგრო სტიკერებით დასაჩუქრდებიან. აგრო მარკეტიდან შემოსულ თანხას კი, ქიზიყელი პატარა ფერმერები „ცოდნის კაფესთვის“ შენობის ასაშენებლად გადარიცხავენ.  სრულად...  წყარო: გვერდი სოციალურ ქსელში

შიდა ქართლი. დუალური პროფესიული განათლების სასწავლო პროგრამის ფარგლებში, შიდა ქართლში მცხოვრები იძულებით გადაადგილებული და კონფლიქტის შედეგად დაზარალებული ახალგაზრდებისთვის ტექნიკოსი ვეტერინარის მოკლევადიანი მომზადება–გადამზადების პროფესიული პროგრამა მიმდინარეობს. პროგრამაში 13 ადამიანი მონაწილეობს. პროექტი „ევროკავშირი ახალგაზრდებისთვის - ახალგაზრდების განათლების, დასაქმებისა და ჩართულობის ხელშეწყობა საქართველოსა და უკრაინის კონფლიქტით დაზარალებულ რეგიონებში“ ლტოლვილთა დანიის საბჭოსა (DRC) და განათლების განვითარებისა და დასაქმების ცენტრის (EDEC) მიერ, ევროკავშირის ფინანსური მხარდაჭერით ხორციელდება. სრულად  წყარო: გვერდი სოციალურ ქსელში

ევროკავშირის წარმომადგენლობა საქართველოში იწყებს საინფორმაციო კამპანიას ევროკავშირის მიერ ფერმერების მხარდაჭერის შესახებ - „კარგი მოსავალი“. „მომდევნო ორი კვირის განმავლობაში, ჩვენ მოგიყვებით, თუ როგორ შეძლეს ფერმერებმა მოსავლიანობის 40% -ით გაზრდა და წარმოების ღირებულების 30% -მდე შემცირება, ამასთან სხვადასხვა გამოწვევებთან, მაგალითად გვალვასთან გამკლავება. ევროკავშირი FAO-სთან ერთად მუშაობს ქვეყნის მასშტაბით, ასწავლის თანამედროვე სოფლის მეურნეობის მიდგომებს, რომლის შედეგებსაც ფერმერები უკვე ხედავენ“, - ნათქვამია, ევროკავშირის წარმომადგენლობის მიერ გავრცელებულ ინფორმაციაში. სრულად  წყარო: ორგანიზაციის ვებგვერდი

თბილისი. „მრავალეროვანი საქართველოს“ ორგანიზებით, თბილისში გაიმართა ტრეინინგი ნინოწმინდის, ახალქალაქის, ახალციხის, გარდაბნის, მარნეულისა და ბოლნისის მუნიციპალიტეტებში მცხოვრები, ეთნიკური უმცირესობის წარმომადგენელი მეწარმეთათვის.  შესაძლებლობების განვითარების პროგრამის ფარგლებში, მაღალკვალიფიციურმა და გამოცდილმა ექსპერტებმა, ტრეინინგის მონაწილეებს გააცნეს ბიზნეს გეგმის შემუშავების, დაგეგმვისა და განხორციელების ეტაპები და გზები. მონაწილეებმა, რომელთა შორის იყვნენ, სოფლის მეურნეობის წარმომადგენლები, ამომწურავი ინფორმაცია მიიღეს ფინანსური სახსრების მოძიების მექანიზმების შესახებ, როგორც სახელმწიფო და არასახელმწიფო პროგრამების მეშვეობით, ისე - ევროკავშირთან დადებული თავისუფალი ვაჭრობის ხელშეკრულების ფარგლებში.  სრულად   წყარო: გვერდი სოციალურ ქსელში

თბილისი. მარკეტერმა ერთ ბლოგპოსტში მოუყარა თავი ამერიკის შეერთებული შტატების საერთაშორისო განვითარების სააგენტოს მიერ გამოცხადებულ გრანტებს. გაეცანით საგრანტო კონკურსებს და დაინტერესების შემთხვევაში, შეიტანეთ განაცხადი. სრულად... წყარო: www.marketer.ge

როგორ შევიტანოთ განაცხადი სოფლის განვითარების საგრანტო პროგრამაზე? ყველა ტექნიკური საკითხი აღწერილია აპლიკანტის სახელმძღვანელოში. საგრანტო პროგრამა ხორცილდება ევროკავშირის დაფინანსებით, პროგრამა ENPARD-ის ფარგლებში, ხოლო მისი უშუალო განმახორციელებლები არიან გაეროს განვითარების პროგრამა და სოფლისა და სოფლის მეურნეობის განვითარების სააგენტო. სრულად… წყარო: ევროკავშირის გვერდი სოციალურ ქსელში

თბილისი. ევროკავშრის და გაეროს განვითარების პროგრამის (UNDP) მხარდაჭერით, სოფლის განვითარებისთვის ადვოკატირების პირველი სახელმძღვანელო „ადვოკატირება სოფლის მდგრადი და ინკლუზიური განვითარებისთვის“ უკვე შემუშავდა. „სახელმძღვანელო მოქალაქეებს დაეხმარება შეიძინონ პრაქტიკული ცოდნა და უნარები, რათა საკუთარ მუნიციპალიტეტებში ადგილობრივ საჭიროებებზე დაფუძნებული პოლიტიკის ეფექტიანი ადვოკატირება შეძლონ.“ სრულად... წყარო: ევროკავშირის გვერდი სოციალურ ქსელში

თბილისი. საერთაშორისო გამჭვირვალობა - საქართველოს განცხადებით, სოფლის მხარდაჭერის პროგრამიდან 40 მილიონი ლარი ტენდერების გარეშე იხარჯება. „სოფლის პროგრამის შემთხვევამ შექმნა სახიფათო პრეცედენტი, როდესაც მრავალ შესყიდვაზე შეიძლება გაიცეს გამარტივებული შესყიდვის ერთიანი ნებართვა. გარდა იმისა, რომ ეს ეწინააღმდეგება კანონის მოთხოვნებს, ის პირდაპირ ეწინააღმდეგება შესყიდვების სააგენტოს გაცხადებულ მიზანს, შემცირდეს გამარტივებული შესყიდვების წილი სახელმწიფო შესყიდვებში. ბოლო წლების განმავლობაში ამ მიმართულებით გადადგმულმა ნაბიჯებმა შთამბეჭდავი შედეგი გამოიღო – 2016-2018 წლებში გამარტივებული შესყიდვის წილი სახელმწიფო შესყიდვებში 37%-დან 19%-მდე შემცირდა. ამ ფონზე, გაუგებარია, რატომ გასცემს შესყიდვების სააგენტო კანონთან შეუსაბამო ერთიან თანხმობას სოფლის პროგრამის მთლიანად გამარტივებული შესყიდვით გახარჯვაზე“. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება მთავრობის გაცხადებულ სოფლის მეურნეობის ანტიკრიზისულ გეგმას და მოუწოდებს ხელისუფლებას სამართლიანად გადაანაწილოს მხარდაჭერისთვის გამოყოფილი რესურსები ფერმერთა ყველაზე მოწყვლადი ჯგუფებისთვის. სრულად... წყარო: emc.org.ge

თბილისი. ამერიკის შეერთებული შტატების მთავრობა აქტიურად უჭერს მხარს საქართველოს სოფლის მეურნეობის განვითარებას. „USAID/Georgia-ს სოფლის მეურნეობის პროგრამის ინოვაციის გრანტები ერთ-ერთი გზაა, რომლის მეშვეობითაც შეერთებული შტატები საქართველოს სოფლის მეურნეობის განვითარებაში ეხმარება. თუ ხართ მეწარმე ან წარმოადგენთ საწარმოს, მიიღეთ მონაწილეობა ინოვაციის საგრანტო კონკურსში 2020 წლის 31 დეკემბრამდე“. სრულად... წყარო: ორგანიზაციის გვერდი სოციალურ ქსელში