კახეთი. პარტნიორობა ადამიანის უფლებებისთვის (PHR) სამართლებრივი დახმარების შედეგად, საქველმოქმედო კავშირში - „თემი" მცხოვრები ფსიქოსოციალური საჭიროების მქონე 23 პირი მიმდინარე სოციალური პაკეტის მიღებასა და თანხის განკარგვას შეძლებს. „2017 წლის 24 აპრილს გურჯაანის რაიონულ სასამართლოში გამართულ პროცესზე სასამართლომ გაიზიარა PHR-ის იურისტების პოზიცია სათემო მომსახურებაში ჩართული ფსიქოსოციალური საჭიროების მქონე 23 ადამიანისთვის დროებითი მხარდამჭერის დანიშვნისა და მიმდინარე სოციალური პაკეტის (პენსია) მიღებასთან დაკავშირებით", ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

თბილისი. ლიბერალიზმის სასწავლო ცენტრი აქვეყნებს ირაკლი ყიფიანის ვიდეო ლექციას: „საქართველოს სოციალური პოლიტიკა". წყარო: ორგანიზაციის ვებ-გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) კვლევის: „შრომის ინსპექტირების მექანიზმების შეფასება და დასაქმებულთა შრომით უფლებების მდგომარეობა საქართველოში" აქვეყნებს დასაქმებულთა ინტერვიუდან ამონარიდებს. „ზამთრის პერიოდში არის სიცივე. საშინლად ცივა, მართლა, როგორ ცივა იცი? გინდა გარეთ მჯდარხარ, გინდა შიგნით, აზრი არა აქვს. რაღაც პატარა პლიტები და რაღაც, მაგრამ როცა მუშაობ, უკვე ვერც გრძნობ სიცივეს", ამბობს ერთ-ერთი დასაქმებული. სრულად... წყარო: emc.org.ge

თბილისი. ლიბერალიზმის სასწავლო ცენტრი აქვეყნებს გვანცა ფორჩხიძის ბლოგპოსტს: „გარევაჭრობა, პრობლემა და რეალობა". „ამ არგუმენტის გასამყარებლად, რომ გარევაჭრობა ჩვენს ხელისუფლებას მემკვიდრეობით ერგო და კაპიტალიზმი სწორი გზით ვერ განვითარდა გარევაჭრობასთან დაკავშირებული პრობლემების დასახელებაც კმარა. ერთი მხრივ გარევაჭრობა ამ საქმით დაკავებული ადამიანთათვის ხელსაყრელია, რადგან ისედაც დაბალი შემოსავლების მქონე ადამიანებს, საკუთარი ადგილისთვის მინიმალური თანხის გადახდა უწევთ, ან საერთოდ არ იხდიან. მეორე მხრივ, საფრთხის წინაშე დგება მოსახლეობა, რადგან გარევაჭრობის ადგილებში ანტისანიტარიის, ხალხმრავლობის გამო და ასევე ცენტრალური ქუჩების იერსახის დამახინჯების გამო მისი შეზღუდვა აუცილებელ ფაქტორად რჩება ხელისუფლებისთვის", ნათქვამია ორგანიზაციის ვებ-გვერდზე. სრულად... წყარო: libcenter.ge

თბილისი. ადამიანის უფლებების სწავლებისა და მონიტორინგის ცენტრმა (EMC) სოციალური უფლებების მკვლევრებთან და სახელმწიფო საკონსტიტუციო კომისიის წევრებთან თანამშრომლობით საქართველოს კონსტიტუციაში შესატანი ცვლილებების კანონის პროექტი შეიმუშავა. „შეთავაზებები სახელმწიფო საკონსტიტუციო კომისიაშია ინიცირებული. წარდგენილი პროექტის მიზანია სოციალური სამართლიანობისა და თანასწორობის დამკვიდრებისათვის საქართველოს კონსტიტუციაში სათანადო გარანტიების გათვალისწინება", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ლელა რეხვიაშვილის ბლოგპოსტს: „გარემოვაჭრეები და კაპიტალისტური წესრიგი". „სახელმწიფო ვერ განდევნის მოვაჭრეებს და თუ მოწესრიგება სურს, მაშინ: უნდა აღიაროს მოვაჭრეების სოციალური მოწყვლადობა, ზოგად სახელმწიფო დონეზე უნდა გაზარდოს სოციალური დახმარების პროგრამების მოცულობა. მიკრო დონეზე უნდა ჩაერიოს კომერციული ფართის ფასების დარეგულირებაში, ბაზრებისა და სავაჭრო ცენტრების მფლობელებსა და მოვაჭრეებს შორის მოლაპარაკებებში, უნდა გამოყოს საჯარო სივრცეები, სადაც მოვაჭრეებს უფასოდ ან დაბალი და სტაბილური გადასახადის ნაცვლად შეეძლებათ ვაჭრობა. უნდა გახსნას სახელმწიფო მფლობელობაში არსებული ბაზრები და სხვა სახის სავაჭრო სივრცეები”, ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. 27 ნოემბერს, თბილისის მუნიციპალიტეტში უსახლკაროდ რეგისტრაციისა და თავშესაფრით უზრუნველყოფის კომისია შეიქმნა, რომელიც პერიოდულად იკრიბება და სწავლობს განაცხადებს. „კომისიის მუშაობის შესახებ მოყვანილი სტატისტიკა ცხადად აჩვენებს ქ. თბილისის მუნიციპალიტეტის არასაკმარის და არაეფექტიან პოლიტიკას უსახლკარო ჯგუფებთან მიმართებით. ხოლო მერიისათვის მოქალაქეთა მიმართვიანობის მაღალი მაჩვენებელი და ის ფაქტი, რომ განხილული განცხადებების თითქმის ნახევარი უსახლკარო პირის სტატუსისათვის დადგენილ კრიტერიუმებს აკმაყოფილებს, უსახლკარობის პრობლემის სისტემურობას უსვამს ხაზს. სტატისტიკური მონაცემები აჩვენებს, რომ კომისია ვერ ახერხებს განცხადებების დროულად შესწავლას და ადეკვატურად რეაგირებას", ნათქვამია ორგანიზაციის ვებ-გევრდზე. სრულად... წყარო: emc.org.ge

აჭარა. ასოციაცია „ღირსეული სიბერე გიწვევთ გამოფენაზე, სადაც გაიყიდება ქალთა კლუბის ბენეფიციართა მიერ შექმნილი სააღდგომო სუვენირები. თანხა მოხმარდება სააღდგომო საქველმოქმედო აქციისთვის პასკების და კვერცხების შეძენას. „აქტივობა მიმდინარეობს ევროკავშირის მიერ დაფინანსებული კოალიციური პროექტის „ხანდაზმულთა უფლებების დაცვის ხელშეწყობისა და სოციალურ-ეკონომიკური გაძლიერების კამპანია აჭარის რეგიონში" ფარგლებში. პროექტის პარტნიორებია დემოკრატიის ინსტიტუტი და გურიის აგრობიზნესცენტრი", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

აჭარა. ასოციაცია „ღირსეული სიბერის" ქალთა კლუბის წევრებმა და მოხალისეებმა კულტურულ-ისტორიული ტურები დაგეგმეს. „ამჯერად ხანდაზმულთა ჯგუფი სოფელ ზენითში ელინისტური პერიოდის საწნახელსა და ადრე შუასაუკუნეების თეთროსნის ეკლესიას ეწვია. კულტურული მემკვიდრეობის შესახებ მათ შესაბამისი ინფორმაცია ქობულეთის მუზეუმის დირექტორმა მიაწოდა. ტურში სოფელ ჭახათის საჯარო სკოლის მოსწავლეებიც მონაწილებდნენ. აქტივობები მიმდინარეობს ევროკავშირის მიერ დაფინანსებული კოალიციური პროექტის „ხანდაზმულთა უფლებების დაცვის ხელშეწყობისა და სოციალურ-ეკონომიკური გაძლიერების კამპანია აჭარის რეგიონში" ფარგლებში", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

იმერეთი. ქუთაისში ახალი, საოჯახო ტიპის სპეციალიზებული მომსახურება შრომის, ჯანმრთელობისა და სოციალური დაცვის სამინისტროს მიერ ამერიკის შეერთებული შტატების საერთაშორისო განვითარების სააგენტოს (USAID) და გაეროს ბავშვთა ფონდის (იუნისეფის) მხარდაჭერით შეიქმნა. ახალი მომსახურება აშშ-ს ელჩმა იან კელიმ, შრომის, ჯანმრთელობისა და სოციალური დაცვის მინისტრმა დავით სერგეენკომ, USAID-ის მისიის დირექტორმა დაგლას ბოლმა და გაეროს ბავშვთა ფონდის წარმომადგენელმა საქართველოში ლაილა ომარ გადიმ გახსნეს.  სპეციალიზებული საოჯახო ტიპის მომსახურება თემში ინტეგრირებული პირველი  მომსახურებაა მძიმე და ღრმა შეზღუდული შესაძლებლობის და ჯანმრთელობის პრობლემის  მქონე ბავშვებისთვის. დიდი ზომის სახელმწიფო დაწესებულებებიდან გადაყვანილი ბავშვები აქ 24 საათიან საექთნო მომსახურებას, რეაბილიტაციას, ინდივიდუალური განვითარების  და თემში ინტეგრირების სერვისებს იღებენ. სრულად... წყარო: unicef.ge

თბილისი. 21 მარტს, სახალხო დამცველმა რეკომენდაციით მიმართა ჯანდაცვის სამინისტროს, გაატაროს საჭირო ღონისძიებები „ბროწლიანის სათნოების სახლში" არსებული პრობლემების მოსაგვარებლად . „შესწავლის შედეგად გამოვლინდა, რომ მომსახურების მიწოდება არ ხორციელდება ბენეფიციარებზე ორიენტირებულ გარემოში. სერვისი არ არის მორგებული ინდივიდუალურ საჭიროებებზე, არ არის დაცული უსაფრთხოება და სანიტარულ-ჰიგიენური მდგომარეობა. სათანადო ყურადღება არ ექცევა ბენეფიციართა ჯანმრთელობის მდგომარეობას, ამასთან არ ხდება მათი სოციალური აქტიურობის ხელშეწყობა. დაუყოვნებელ ცვლილებას საჭიროებს რთული ქცევის მართვის კუთხით დაწესებულებაში დამკვიდრებული ნეგატიური პრაქტიკა", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თამუნა ქებურიას პუბლიკაციას: „რატომ გაჰყავთ გარემოვაჭრეები საჯარო სივრციდან? სიმპტომების და რისკების შესახებ". „...სახელმწიფოს ხისტი და ერთგვაროვანი პოლიტიკა – არაფორმალურის სწორხაზოვანი ფორმალიზება, გარევაჭრობის აკრძალვა სხვადასხვა არგუმენტით (იქნება ეს ანტისანიტარიის მაღალი დონე თუ ქალაქის იერსახის დამახინჯება), ეკონომიკურად მოწყვლადი ჯგუფების მრავალმხრივი სოციალური პრობლემების იგნორირება და ნეოლიბერალური პოლიტიკური იდეოლოგიის გეზის გაყოლა ინტენსიური მარკეტიზაციითა და პრივატიზაციით – უფრო მეტი საფრთხის შემცველი შეიძლება იყოს და გაცილებით უფრო მწვავე უკუშედეგი გამოიღოს", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. პარტნიორობა ადამიანის უფლებებისთვის (PHR) საჯარო სამსახურში დასაქმებულ შშმ პირთა მიმართ დისკრიმინაციის თაობაზე საკონსტიტუციო სასამართლოს მიმართავს. „PHR მიიჩნევს, რომ ყველა მნიშვნელოვნად გამოხატულ შეზღუდული შესაძლებლობის სტატუსის მქონე პირს უნდა მიეცეს შესაძლებლობა, საჯარო სამსახურში დასაქმების შემთხვევაში ისევე ისარგებლონ სოციალური პაკეტის მიღების უფლებით, როგორც ეს ხდება მხედველობის გამო მნიშვნელოვნად გამოხატული შეზღუდული შესაძლებლობის სტატუსის მქონე პირების შემთხვევაში, ვინაიდან შესადარებელი ჯგუფები წარმოადგენენ არსებითად თანასწორ პირებს და სახელმწიფოს მხრიდან მათ მიმართ უნდა მოხდეს თვითრეალიზაციისათვის თანაბარი შესაძლებლობების უზრუნველყოფა", ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

შიდა ქართლი. 20 მარტს, საქართველოს ოკუპირებულ ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დევნილებს ახალი ბინის გასაღები გადასცა. „გორში, ხუთსართულიან კორპუსში, საცხოვრებელი ბინები კიდევ 28 დევნილმა ოჯახმა მიიღო, ისინიც ტურბაზის დევნილთა ჩასახლებაში უმძიმეს პირობებში ცხოვრობდნენ. ... გორში კომბინატის დასახლებაში რვასართულიანი კორპუსის მშენებლობა მიმდინარეობს, რომელიც რამდენიმე თვეში დასრულდება და 480 დევნილი ოჯახი ახალ ბინას მიიღებს. ამის პარალელურად გორის საკრებულომ დევნილთა სამინისტროს ოთხი საბავშვო ბაღის შენობა გადასცა, სადაც იძულებით გადაადგილებული პირები ცხოვრობდნენ და მინისტრის თქმით, უკვე დაიწყება მათთვის საცხოვრებელი ფართების დაკანონების პროცესი", ნათქვამია ორგანიზაციის ვებ-გვერდზე. სრულად... წყარო: www.humanrights.ge

თბილისი. 17 მარტს, საქართველოს წითელი ჯვრის საზოგადოებასა და უნგრეთის მთავრობას შორის გაფორმდა ხელშეკრულება, რომელიც მიზნად ისახავს 13-14 ივნისის თბილისის წყალდიდობით დაზარალებული ადამიანების დახმარებას. „დაზარალებული მოსახლეობის ფსიქოსოციალური მხარდაჭერისთვის მოეწყო ფსიქოსოციალური დახმარების ცენტრი, სადაც პროფესიონალ ფსიქოლოგებთან ერთად ბენეფიციარებს ეძლევათ შესაძლებლობა ჩაერთონ სხვადასხვა აქტივობებში, რაც მათ ეხმარება სტრესთან გამკლავებისათვის საჭირო სპეციალური უნარების განვითარებასა და სტრესის შემსუბუქებაში", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

აჭარა. ასოციაცია „ღირსეული სიბერე" გთხოვთ მხარი დაუჭიროთ სოციალურ პროექტს, რომელიც ასოციაცია „ღირსეული სიბერის" უმწეო ბენეფიციარებისთვის მუნიციპალური ტრანსპორტით უფასოდ მგზავრობას გულისხმობს. „ქობულეთის მუნიციპალიტეტის გამგეობას ვთავაზობთ განიხილოს შემდეგი ვერსიები: ერთი თვის განმავლობაში უფასოდ რვა მგზავრობა, ან მუნიციპალური ავტობუსით მგზავრობისას განახევრებული ტარიფით სარგებლობა. საუბარია ქობულეთის მუნიციპალიტეტის ტერიტორიაზე მოძრავ მუნიციპალურ ტრანსპორტზე: N1 და N2. პროგრამით მოსარგებლეთა სავარაუდო რაოდენობა: 100 ხანდაზმული", ნათქვამია ორგანიზაციის ვებ-გვერდზე. სრულად... წყარო: manifest.ge

თბილისი. სამოქალაქო საზოგადოების ინსტიტუტმა (CSI) ჩეხური ორგანიზაცია „ადამიანი გაჭირვებაში" (PIN) დაკვეთით, ტყიბულში, გორში, ზუგდიდსა და ხონში სოციალური მომსახურების ხელმისაწვდომობის კვლევა ჩაატარა. „კვლევის მიზანი იყო გაკეთებულიყო სოციალურ სფეროში არსებული გამოწვევების ექსპერტული ანალიზი ცენტრალურ და რეგიონალურ დონეზე. რა შედეგები აჩვენა გამოკვლევამ და რა რეკომენდაცია აქვთ გამოკვლევის ავტორებს ხელისუფლების მიმართ?", ნათქვამია რადიო თავისუფლების ვებ-გვერდზე. სრულად... წყარო: www.radiotavisupleba.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ლელა რეხვიაშვილის საჯარო მოხსენება – თბილისის „მარშუტკის" მძღოლები: როგორ ვიფიქროთ ინდმეწარმეების და თვითდასაქმებულების კლასობრივ პოზიციაზე?. „მოხსენებაზე იმსჯელეს შემდეგ საკითხებზე: რა როლი შეიძლება ჰქონდეს ამ პროცესებს მძღოლების სამუშაო მდგომარეობის ცვლილებაში? რამდენად ზღუდავს ან ხელს უწყობს არსებული მდგომარეობა მძღოლების პოტენციურ მობილიზაციას? როგორი როლი შეიძლება ჰქონდეთ თვითდასაქმებულებსა და ინდმეწარმეებს მემარცხენე ძალების მობილიზაციის პროცესში და რომელი კონკრეტული ბარიერები არსებობს მათი შრომითი უფლებებისთვის ბრძოლას", ნათქვამია ორგანიზაციის ვებ-გვერდზე. სრულად... წყარო: emc.org.ge

 თბილისი. მწვანე ალტერნატივამ საქართველოს პარლამენტს მორიგი საკანონმდებლო ინიციატივით მიმართა. „2017 წლის 22 თებერვლის განცხადებით, მწვანე ალტერნატივამ თხოვა საქართველოს პარლამენტის თავმჯდომარეს, განხორციელდეს კანონმდებლობაში შესაბამისი ცვლილებების ინიცირება. რომელთა შედეგად დაწესდება სოციალური შეღავათები/კომპენსაციები სამსახურებრივი მოვალეობის დროს დაღუპული გარემოს დაცვის სფეროს მუშაკების (გარემოსა და ბუნებრივი რესურსების დაცვის სამინისტროს სისტემაში შემავალი უწყებები – დაცულის ტერიტორიების სააგენტოს, ეროვნული სატყეო სააგენტოს, გარემოსდაცვითი ზედამხედველობის დეპარტამენტის/გარემოს დაცვის ინსპექციის თანამშრომლები) ოჯახებისათვის", ნათქვამია ორგანიზაციის ვებ-გვერდზე. სრულად... წყარო: greenalt.org

აჭარა. „დემოკრატიის ინსტიტუტი" ევროკავშირის მხარდაჭერით ყოფილი პატიმრების გასაძლიერებლად პარტნიორ ორგანიზაციებთან ერთად ახალ პროექტს იწყებს. „ჩვენი ინოვაციური მიზნებია: ავამოქმედოთ სოციალური საწარმოები და დავასაქმოთ ყოფილი პატიმრები, პატიმართა ოჯახის წევრები და პრობაციონერები, ხელი შევუწყოთ ბენეფიციარების სტაჟირებას დასაქმების პირობით...", ნათქვამია ორგანიზაციის ვებ-გვერდზე. სრულად... წყარო: iod.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თამუნა ქებურიას ბლოგპოსტს: „რა შეიძლება მოხდეს იმ დემონსტრაციაზე, სადაც ყველა მოვა?". „კაპიტალისტურ რეალიზმში კატასტროფა ყოველთვის ახლოსაა, თუმცა ის არასდროს არ დგება. ამგვარ სისტემაში ცხოვრების დონე დღითი დღე უარესდება, ფასები იზრდება და ხელფასები იგივე რჩება, მდიდრდები უფრო მდიდრდებიან და ღარიბები უფრო ღარიბდებიან; თუმცა, ამის მიუხედავად, სისტემას დასასრული მაინც არ უწერია. კაპიტალისტური რეალიზმი უზრუნველყოფს იმას, რომ ხვალ ისევ ისე ვაგრძელებთ ცხოვრებას, როგორც გუშინ", ნათქვამია ბლოგპოსტში. სრულად... წყარო: emc.org.ge

თბილისი. ადამიანის უფლებებს სწავლებისა და მონიტორინგის ცენტრი (EMC) აქვეყნებს მაია ბარქაიას ბლოგპოსტს: „შრომა, თავისუფლება და პროტესტის დრო". „ჩვენ დიდი ხანია დაგვაჯერეს, რომ თითოეული ადამიანი წარმოადგენს  არა თავისთავად მიზანს, არამედ სხვათა ანუ ფინანსური ელიტების მიზნების განსახორციელებლად გამოსაყენებელ საშუალებას. გვიჩიჩინებენ, რომ თანასწორობის სურვილი მხოლოდ შურიანთა გონებაში შეიძლება გაჩნდეს, რომ მდიდრის სიმდიდრე მისი განსკუთრებული შესაძლებლობებისა და უნარების დამსახურებაა, რომ გასაქანი უნდა მივცეთ სახელმწიფოს, რათა მან ხელი შეუწყოს მდიდართა უფრო გამდიდრებას, რადგან თავისუფალი ბაზრის აპოლოგეტებს სჯერათ რომ  მდიდარი აუცილებლად დაასაქმებს ხალხს (პირობებს არ აქვს მნიშვნელობა)  და ამგვარად, ბევრს შემოსავლის წყარო გაუჩნდება", ნათქვამია ორგანიზაციის ვებ-გვერდზე. სრულად... წყარო: emc.org.ge