აჭარა. ახალგაზრდა მეცნიერთა კავშირმა „ინტელექტმა" შრომითი მიგრანტებისთვის საინფორმაციო ბუკლეტი მომაზადა. მასში მოცემულია ინფორმაცია იმის შესახებ, თუ როგორ უნდა დაიცვან შრომითმა მიგრანტებმა თავიანთი უფლებები ლეგალური და არალეგალური შრომითი მიგრაციის დროს. ბუკლეტები ევროკავშირის ფინანსური მხარდაჭერით განხორციელებული პროექტის - „მიგრანტთა მდგომარეობის გაუმჯობესება აჭარის რეგიონში" - ფარგლებში მომზადდა და სარფის საბაჟო გამშვებ პუნქტთან დარიგდა. სრულად  წყარო: ორგანიზაციის გვერდი სოციალურ ქსელში

თბილისი. 2017 წლის ივლისიდან ადამიანის უფლებების სწავლებისა და მონიტორინგის ცენტრი (EMC) ახორციელებს პროექტს, რომელიც მიზნად ისახავს სათანადო საცხოვრისის უფლების დაცვის ხელშეწყობას, უსალკაროთა პრობლემატიკის აქტუალიზებისა და სახელმწიფო პოლიტიკის ცვლილების გზით. პროექტის ფარგლებში დაგეგმილი საქმიანობები ორი ძირითადი მიმართულებით განხორციელდება: 1 - საცხოვრისის უფლებრივი სტანდარტებისა და არსებული პოლიტიკის მოწყვლად ჯგუფებზე გავლენის შესწავლა; 2 - საცხოვრისის უფლების ადვოკატირება და პრობლემის ხილვადობის გაზრდა, საკითხის ცენტრალური ხელისუფლების მიერ აღიარების და ადგილობრივი მუნიციპალიტეტების პოლიტიკის გაუმჯობესების ხელშეწყობა. პროექტის ფარგლებში გამოკვლეული იქნება საცხოვრებლის უფლებრივი სტანდარტებისა და არსებული პოლიტიკის გავლენა მოწყვლად ჯგუფებზე; საცხოვრისის უფლების შინაარსი და უფლებრივი სტანდარტი, საერთაშორისო სამართლებრივ აქტებსა და სხვადასხვა ქვეყნების სასამართლო პრაქტიკაზე დაყრდნობით; გამოსახლების წესი და პროცედურა,მისი შედარება საერთაშორისო სტანდარტებთან. პროექტი ხორციელდება ფონდ „ღია საზოგადოება-საქართველოს” ხელშეწყობით. სრულად  წყარო: ადამიანის უფლებების სწავლებისა და მონიტორინგის ცენტრის ვებგვერდი

იმერეთი. ქუთაისში, პროექტის „HOME - გზად საბინაო სექტორის რეფორმებისკენ: ბინათმესაკუთრეთა გაერთიანებების პოტენციალის ამაღლება აზერბაიჯანში, ბელარუსში, მოლდოვაში, უკრაინასა და საქართველოში" ფარგლებში, მრგვალი მაგიდის დისკუსიის ფორმატში, შეხვედრა გაიმართა. შეხვედრის თემა იყო „ბინათმესაკუთრეთა ამხანაგობების კუთხით არსებული მდგომარეობა და განხორციელებული აქტივობები". ღონისძიებას ესწრებოდნენ პროექტის პარტნიორები, პროექტის რესურსცენტრების წარმომადგენლები, ადგილობრივი თვითმმართველობის თანამშრომლები და დარგის ექსპერტები. დისკუსია, რომელიც პროექტის ქუთაისის პარტნიორის „ადგილობრივი დემოკრატიის სააგენტო საქართველოს" მიერ იქნა ორგანიზებული, აგრძელებს დაგეგმილი ღონისძიებების ციკლს, რომელთა მიზანია მონაწილე ქვეყნებში საცხოვრისის მართვის გაუმჯობესება და ენერგოეფექტურობის შესახებ ცნობიერების ამაღლება. ევროკავშირის ფინანსური მხარდაჭერითა და გერმანული ორგანიზაციის - „ინიციატივა საბინაო მეურნეობა აღმოსავლეთ ევროპაში" (IWO) ხელმძღვანელობით, პროექტი აღმოსავლეთ პარტნიორობის ქვეყნებში ხორციელდება. თბილისში პროექტის პარტნიორია საქველმოქმედო ჰუმანიტარული ცენტრი „აფხაზეთი". სრულად  წყარო: CHCA-ის გვერდი სოციალურ ქსელში

თბილისი. გენდერული საინფორმაციო პორტალი აქვეყნებს JamNews-ის რეპორტაჟს მარნეულის რაიონში გოგონების მოტაცების თემაზე. „ვიდეო მასალებში საუბრია ქალების პირად გამოცდილებაზე, როცა ისინი მომავალმა მეუღლეებმა მოიტაცეს. ნაადრევი ქორწინების უარყოფით შედეგებზე საუბრობს ჟურნალისტი კამილა მამედოვა. მისი აზრით, რეგიონებში ნაადრევი ქორწინება განათლების ნაკლებობის ბრალია. მათ სკოლაშიც კი იმავე ღირებულებების მასწავლებლები ასწავლიან, რაც სოფელში არსებობს. გოგონების მოტაცებაზე საკუთარ აზრს გამოხატავენ მარნეულის რაიონში მცხოვრები ახალგაზრდებიც", ნათქვამია ორგანიზაციის ვებ-გვერდზე. სრულად... წყარო: ginsc.net

სამეგრელო. 30 ივნისს ასოციაცია „ათინათის" ახალგაზრდული ცენტრის წევრების ინიციატივით და ორგანიზებით მოეწყო სათემო და მოხალისეობრივი აქტივობა ოჭანის დედათა მონასტერში. „ახალგაზრდებმა მოხალისეობრივად დაასუფთავეს და დაალაგეს მონასტრის მიმდებარე ტერიტორია. ღონისძიება ორგანიზებულია „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

აჭარა. ახალგაზრდა მეცნიერთა კავშირმა „ინტელექტი" პროექტის - „მიგრანტთა მდგომარეობის გაუმჯობესება აჭარის რეგიონში" - შედეგების შემაჯამებელ ღონისძიება ქობულეთში, საზოგადოებრივ კოლეჯ „ახალ ტალღაში" გამართა. ამ პროექტის ფარგლებში, აჭარაში მცხოვრებ ეკოლოგიურ და შრომით მიგრანტებს „ინტელექტი" სთავაზობდა უფასო პროფესიულ სწავლება-გადამზადებას, უფასო იურიდიულ კონსულტაციასა და გრანტებს, მცირე ბიზნესის დაწყება-განვითარებისთვის. პროექტის მიმდინარეობის განმავლობაში დაფინანსდა 19 მცირე ბიზნესი და 2 სოციალური საწარმო; პროფესიული სწავლების საგრანტო პროგრამით, ორგანიზაციას 143 კურსდამთავრებული ყავს და სასწავლო პროგრამებს კიდევ 40 ბენეფიციარი გადის; იურიდიულ კონსულტაციებითა და სამართლებრივ დახმარებით 200-ზე მეტმა ბენეფიციარმა ისარგებლა. „ინტელექტის" ხელშეწყობით, ამავე პროექტის ფარგლებში, ე.წ. „ოცნების ქალაქში" ჩამოყალიბდა საზოგადოებრივი ორგანიზაცია „ოცნების ქალაქი", რომელიც იქ მცხოვრები მიგრანტების სოციალური და ეკონომიკური შესაძლებლობების გაძლიერებაზე იმუშავებს. „მიგრანტთა მდგომარეობის გაუმჯობესება აჭარის რეგიონში" ევროკავშირის ფინანსური მხარდაჭერით ხორციელდებოდა. პროექტს პარტნიორობას უწევდა დემოკრატიის ინსტიტუტი და ხანდაზმულ ქალთა ასოციაცია „ღირსეული სიბერე". სრულად  წყარო: ორგანიზაციის გვერდი სოციაკლურ ქსელში

იმერეთი. ქუთაისის ახალგაზრდული ცენტრის ორგანიზებით ქუთაისის ხანდაზმულთა სახლში მოეწყო ჩვენება ჩაიხანას დოკუმენტური ფილმისა - „ნაირას და ნორას მეგობრობა, ახალი ტექნოლოგიები". ჩვენების მიზანს წარმოადგენდა ხანდაზმული პირების სოციალიზაცია, ინტეგრაცია და კულტურულ პროგრამებში ჩართვა. ღონისძიება ორგანიზებული იყო ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) ფინანსური მხარდაჭერით. პროგრამის პარტნიორია განათლების განვითარების და დასაქმების ცენტრი (KEDEC). სრულად  წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ხელმძღვანელმა ანა აბაშიძემ შშმ ბავშვთა მშობლებისთვის ტრენინგი – „გაეროს შეზღუდული შესაძლებლობის მქონე პირთა უფლებების კონვენცია და მისი პრაქტიკული გამოყენება" ჩაატარა. „ორგანიზაციამ კოალიციის წევრ მშობლებს სამედიცინო და სოციალური მოდელის მიხედვით შეზღუდული შესაძლებლობის კლასიფიკაციის შესახებ მიაწოდა ინფორმაცია და გაეროს შეზღუდული შესაძლებლობის მქონე პირთა უფლებების კონვენციის წარმოშობასა და სტრუქტურაზე ესაუბრა”, ნათქვამია PHR-ის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს სოციალურ მუშაკთა ასოციაციაში სოციალურ მუშაკთა კლუბის შეხვედრა გაიმართა. შეხვედრაზე ასოციაციის წევრმა, ქეთი ხუციშვილმა წარადგინა პრეზენტაცია: „ლგბტ ჯგუფის საჭიროებების ცოდნა და გათვალისწინება სოციალური მუშაობის ეფექტიანი პრაქტიკის განხორციელების საწინდარია". სოციალურმა მუშაკებმა არაერთი აქტუალური საკითხი წამოჭრეს და განიხილეს. სრულად... წყარო: ორგანიზაციის ვებ-გვერდი სოციალურ ქსელში

კახეთი. „... დრო მოვა და ეს ადგილი ერთ სოფელს შეინახავს", – ეს ფილმ „ნუცას სკოლის" ერთ–ერთი გმირის ოცნებაა. ამ ფილმის გმირების ცხოვრება რაღაცით ჰგავს გრემის თემის ცხოვრებას... რომელიც 20 წლის წინათ დაიწყო... საზოგადოებრივი მუწყებლის გადაცემა „ფერმა" თემს ესტუმრა... გაიცანით „თემი" და „თემელები"... საქველმოქმედო კავშირი „თემი", ესაა სათემო ორგანიზაცია საქართველოში, სადაც შესაძლებლობაშეზღუდულ ადამიანებთან ერთად, ერთ ოჯახად ცხოვრობენ უსახლკარონი, მოხუცები, მარტოხელა დედები და ა.შ.    წყარო: საზოგადოებრივი მაუწყებელი

ქვემო ქართლი. საქართველოს სოციალურ მუშაკთა ასოციაციამ რუსთავის დემოკრატიული ჩართულობის ცენტრში სოციალური მომსახურების სააგენტოსა და ქვემო ქართლის რეგიონული მედიის წარმომადგენლების შეხვედრა გამართა. შეხვედრაზე, რომელიც პროექტის - „ეფექტური მინდობით აღზრდის მომსახურების განვითარება" - ფარგლებში გაიმართა, სოციალური მომსახურების სააგენტოს თანამშრომლებმა ჟურნალისტებს მინდობით აღზრდის დეტალები, პროექტის მიზნები და ამოცანები გააცნეს და სამომავლო თანამშრომლობის გეგემები დასახეს. სრულად  წყარო: ორგანიზაციის გვერდი სოციალურ ქსელში

თბილისი. ევროკავშირის ფინანსური მხარდაჭერით მიმდინარე პროექტის - „საზოგადოებრივი ორგანიზაციების შესაძლებლობების გაძლიერება სოციალური სერვისების პოლიტიკის დიალოგში წვლილის შეტანისთვის საქართველოსა და უკრაინაში" - ფარგლებში, რომელსაც საქართველოს არბაითერ-სამარიტერ-ბუნდი (ASB Georgia) მართავს, ასოციაცია „ანიკა" ახორციელებს პროექტს - „შეზღუდული შესაძლებლობის მქონე ბავშვთა/პირთა პერსონალური ასისტენტის სერვისი”. ამ პროექტის ფარგლებში ასოციაცია „ანიკა", წინასწარ შეთანხმებული ლიმიტით, შეზღუდული შესაძლებლობის მქონე ბავშვებს/პირებს პერსონალური ასისტენტის უფასო სერვისს სთავაზობს. დამატებითი ინფორმაციისთვის ეწვიეთ ბმულს - http://anika.ge/?p=2109 სერვისით სარგებლობის სურვილის შემთხვევაში, გთხოვთ, შეავსოთ სარეგისტრაციო ფორმა - https://docs.google.com/…/1FAIpQLSeErbcPZWJPlpY_kt…/viewform სრულად  წყარო: ასოციაცია „ანიკას" ოფიციალური ფეისბუქგვერდი

7 ივლისს, 16:00 საათზე ადამიანის უფლებათა დაცვისა და სამოქალაქო ინტეგრაციის კომიტეტის ინიციატივით ჩატარდება სამუშაო შეხვედრა, შრომის უსაფრთხოების კანონის პროექტთან დაკავშირებით. შეხვედრას დაესწრებიან: საქართველოს შრომის, ჯანმრთელობისა და სოციალური დაცვის, ეკონომიკისა და მდგრადი განვითარების სამინისტროების, დამსაქმებელთა და ბიზნესსექტორისა და არასამთავრობო ორგანიზაციების წარმომადგენლები. მისამართი: თბილისი, ილია ჭავჭავაძის სახელობის დარბაზი (C კორპუსი, V სართული).

6 ივლისს, 16:00 საათზე, ახალგაზრდული ორგანიზაცია „ცვლილებები თანაბარი უფლებებისათვის" ორგანიზებით, აჭარის ჯანდაცვის მინისტრთან გაიმართება შეხვედრა, რომელსაც დაესწრებიან შეზღუდული შესაძლებლობის მქონე პირები, მათი მშობლები და DPO ორგანიზაციების წარმომადგენლები. მისმართი: ბათუმი, ზვიად გამსახურდიას #6

თბილისი. ევროკავშირის მიერ დაფინანსებული პროექტის - „შშმ პირთა განათლებისა და დასაქმების თანაბარი შესაძლებლობების ადვოკატირება და ლობირება'' - ფარგლებში, განათლების განვითარებისა და დასაქმების ცენტრის მრჩეველთა საბჭომ მორიგი შეხვედრა გამართა. შეხვედრაზე განხილული იქნა შშმ პირებთან დაკავშირებული საკითხები, მათ შორის, გასულ სხდომაზე მიღებული გადაწყვეტილებები. პროექტს - „შშმ პირთა განათლებისა და დასაქმების თანაბარი შესაძლებლობების ადვოკატირება და ლობირება'' - განათლების განვითარებისა და დასაქმების ცენტრი, ევროკავშირის დაფინანსებით, თელავის განათლების განვითარებისა და დასაქმების ცენტრთან და ორგანიზაცია „ოტავა 98"-თან პარტნიორობით ახორციელებს. სრულად წყარო: განათლების განვითარებისა და დასაქმების ცენტრის ოფიციალური ფეისბუქგვერდი

გურია. 3-4 ივლისს, ახალგაზრდა პედაგოგთა კავშირის მიერ ადმინისტრირებული ხანდაზმულთა სათემო მომსახურების თანამშრომლებს ჩაუტარდათ საგანმანათლებლო ტრენინგი თემაზე - „ხანდაზმულებთან მუშაობის თანამედროვე მიდგომები”. ორდღიან სამუშაო პროცესში განხილულ იქნა თემები, რომლებიც დაკავშირებულია ხანდაზმულთა მომსახურების შემადგენელ კომპონენტებთან. სრულად... წყარო: ორგანიზაციის ვებ-გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ-კავკასიის ბიურო აქვეყნებს ნენსი ფრეიზერის კრებულის „ფემინიზმის თავგადასავალი" ქართული თარგმანის წინასიტყვაობას. წიგნი 1985-2010 წლებში დაწერილ 10 ესეს აერთიანებს და აქტუალურია როგორც გლობალურ, ასევე, ქართულ კონტექსტშიც. „მასში თავმოყრილი ათი ესე ბოლო 40-50 წლის განმავლობაში ფემინისტურ თეორიაში დასმულ თითქმის ყველა მნიშვნელოვან პრობლემას ეხება – პირდაპირ თუ არა, ირიბად მაინც. წიგნში განხილულია ისეთი საკვანძო თემები, როგორიცაა გენდერული იერარქიის მიმართება პოლიტეკონომია / კულტურა (თუ კლასი / სტა­ტუსი) დიქოტომიასთან, სოციალური სახელმწიფოს ინსტიტუტების თუ პრაქტიკების პატერნალისტური და მასტიგმატიზებელი მხარეები, კა­პიტალიზმის ყველაზე მნიშვნელოვანი კრიტიკოსების (განსაკუთრებით, ჰაბერმასისა და პოლანის) თეორიებში გენდერის მიმართ სიბრმავით გა­მოწვეული შეზღუდვები...," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ge.boell.org

კახეთი. ხელი ხელს მცირე საოჯახო ტიპის საცხოვრისების თანამშრომლებმა 3 დღიან ტრენინგზე 5 წლის მუშაობა შეაჯამეს და სამომავლო მიზნები დაისახეს. „ხელი ხელს პირველი საოჯახო ტიპის სახლია ქალაქ გურჯაანში, სადაც დიდი ზომის ინსტიტუციებიდან შეზღუდული შესაძლებლობის მქონე პირები გადმოვიდნენ საცხოვრებლად და სოციალური ინკლუზიის გზას დაადგნენ. ამჟამად ხელი ხელს 6 საოჯახო ტიპის სახლს აერთიანებს ქალაქ გურჯაანსა და თბილისში. თითო სახლში 3 დან არაუმეტეს 5 ადამიანისა ცხოვრობს. ინფორმაციის და გამოცდილების გაზიარება ჩვენი მუშაობის ძირეული პრინციპია", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

სამეგრელო. ზუგდიდის მუნიციპალიტეტის გამგეობაში, PIN-ის სოციალური პროექტის ფარგლებში მხარდაჭერილი ახალი, უნიკალური პროექტის, „ხანდაზმულებზე მზრუნველი მობილური ჯგუფის" პრეზენტაცია გაიმართა. პროექტის სამიზნე ჯგუფს წარმოადგენენ ზუგდიდის მუნიციპალიტეტის ტერიტორიაზე მცხოვრები მარტოხელა ხანდაზმულები, რომელთაც არა აქვთ ფიზიკური და ეკონომიკური საშუალება, მოიწესრიგონ საცხოვრებელი გარემო-პირობები და ჰიგიენა. საცხოვრებელი პირობების გაუმჯობესებით, პროექტი ზუგდიდის ხანდაზმულ მოსახლეობას თავს უფრო ღირსეულად და საზოგადოების სრულფასოვან წევრად აგრძნობინებს. პროექტს PIN-ი ზუგდიდის ადგილობრივ თვითმმართველობასთან თანამშრომლობით, ევროკავშირისა და ჩეხეთის მთავრობის ფინანსური მხარდაჭერით ახორციელებს. სრულად წყარო: PIN-ის ოფიციალური ფეისბუქგვერდი

თბილისი. ორგანიზაცია, „კავშირი ადამიანებისათვის განსაკუთრებულ ზრუნვას რომ საჭიროებენ" სოციალურ თერაპიაში სემინარის დასრულების შემდეგ კურსდამთავრებულთა მეთოთხმეტე ნაკადი გამოუშვა. „2001 წლიდან 150-მდე დაინტერესებულ და მოტივირებულ ადამიანს მიანიჭა სოციალ თერაპევტის სპეციალობა. ბევრმა მათგანმა დააარსა დღის ცენტრი, მუშაობენ სკოლებში სპეც. პედაგოგებად, ინდივიდუალურ მომსახურეობას უწევენ შეზღუდული შესაძლებლობების მქონე ადამიანებს სასწავლო დაწესებულებებსა და ოჯახებში. გარდა ამისა, ჩვენს სემინარში მიღებული ცოდნისა და გამოცდილების შემდეგ, მათ ეძლევათ საშუალება მესამე წელი გაიარონ და ცოდნა გაიღრმავონ ვალდორფის სკოლასა და ბაღში არსებულ სემინარში”, ნათქვამია ორგანიზაციის ვებ-გვერდზე სოციალურ ქსელში. წყარო: ორგანიზაციის ვებ-გვერდი სოციალურ ქსელში

შიდა ქართლი. გორში გამართული შეხვედრის მიზანს ჟენევაში, გალსა და ერგნეთში IPRM-ის სამშვიდობო მოლაპარაკებების დღის წესრიგისა და შედეგების გაცნობა წარმოადგენდა. შეხვედრის მონაწილეებმა, ასევე, განიხილეს შიდა ქართლში უსაფრთხოების კუთხით არსებული გამოწვევები და გამყოფი ხაზის მიმდებარე სოფლების დაზარალებული მოსახლების საჭიროებები. საინფორმაციო შეხვედრას, საქართველოს შერიგებისა და სამოქალაქო თანასწორობის საკითხებში სახელმწიფო მინისტრის აპარატის, სახელმწიფო უსაფთხოების სამსახურის, რეგიონალური განვითარებისა და ინფრასტრუქტურის სამინისტროს, არასამთავრობო ორგანიზაციებისა და გაეროს ქალთა ორგანიზაციის წარმომადგენლები ესწრებოდნენ. სახელმწიფო უწყებების წარმომადგენლებმა უპასუხეს ადგილობრივი მოსახლეობისა და არასამთავრობო ორგანიზაციების მიერ დასმულ შეკითხვებს და მოისმინეს მათი რეკომენდაციები. სრულად წყარო: ორგანიზაციის ოფიციალური ფეისბუქგვერდი

თბილისი. 2017 წლის 14 ივნისს საქართველოს სახალხო დამცველმა გაეროს შეზღუდული შესაძლებლობის მქონე პირთა კომიტეტში ალტერნატიული ანგარიში წარადგინა. ანგარიში მომზადდა სახალხო დამცველისთვის „შეზღუდული შესაძლებლობის მქონე პირთა უფლებების შესახებ" გაეროს კონვენციის 33–ე მუხლის მე–2 პუნქტის შესაბამისად მინიჭებული მანდატის – კონვენციის პოპულარიზაციის, დაცვისა და იმპლემენტაციის მონიტორინგის დამოუკიდებელი ეროვნული მექანიზმის საქმიანობის ფარგლებში. ანგარიშში საუბარია საქართველოში შეზღუდული შესაძლებლობის მქონე პირთა უფლებების კონვენციის იმპლემენტაციის მიმართულებით არსებულ ძირითად გამოწვევებზე. დოკუმენტის მიზანია გაეროს შეზღუდული შესაძლებლობის მქონე პირთა კომიტეტს მიაწოდოს ინფორმაცია იმ მნიშვნელოვანი საკითხების თაობაზე, რომლებზეც ყურადღების გამახვილებას სახალხო დამცველი მიიჩნევს რელევანტურად საქართველოში კონვენციის იმპლემენტაციაზე მსჯელობის დროს. სრულად წყარო: საქართველოს სახალხო დაცველის ვებგვერდი