12 ივლისს, 17:00 საათზე ჰაინრიჰ ბიოლის ფონდი მართავს საჯარო დისკუსიას – „შეზღუდული შესაძლებლობების მქონე ადამიანები და საზოგადოება: რა ბარიერები ზღუდავს მათ?" მისამართი: ქუთაისი, აკაკი წერეთლის 13, ქუთაისის უნივერსიტეტის საკონფერენციო დარბაზი

თბილისი. 11 ივლისს ინფორმაციის თავისუფლების განვითარების ინსტუტმა და რეგიონული მაუწყებლების ასოციაციამ რეგიონული ტელეარხების ციფრულ მაუწყებლობაზე გადასვლის მოდელი და საკუთარი ხედვები გააცნეს საზოგადოებას. ორგანიზაციებმა წარმოადგინეს რეგიონული საეთერო მიწისზედა მაუწყებლის ციფრულ მაუწყებლობაზე გადასვლასთან დაკავშირებული ხედვა და რეკომენდაციები. ღონისძიებას ესწრებოდნენ რეგიონული მაუწყებლები, პროვაიდერები და დარგის ექსპერტები.

თბილისი.საქართველოს ახალგაზრდა იურისტთა ასოციაცია მიიჩნევს, რომ მიქაუტაძის გარდაცვალების ფაქტზე მიმდინარე გამოძიება დაუყოვნებლივ უნდა გადაეცეს პროკურატურის გამომძიებლებს. „მივმართავთ საქართველოს შინაგან საქმეთა სამინისტროსა და პროკურატურას, რომ დაიცვან როგორც საქართველოს კანონმდებლობის მოთხოვნები, ასევე ადამიანის უფლებათა ევროპულის სასამართლოს მიერ დადგენილი სტანდარტები და მამუკა მიქაუტაძის თვითმკვლელობამდე მიყვანის საქმეზე დაწყებული გამოძიება დაუყოვნებლივ გადაეცეს საქართველოს პროკურატურას" – აღნიშნულია საიას ვებგვერდზე გამოქვეყნებულ ინფორმაციაში სრულად წყარო: gyla.ge

თბილისი. 11 ივლისს თბილისის მერიის ორგანიზებით არასამთავრობო ორგანიზაციების ფესტივალი გაიმართა. საგამოფენო ცენტრ ექსპო–ჯორჯიაში 100–მდე არასამთავრობო ორგანიზაციის გამოფენა მოეწყო, რომელზედაც თავიანთი საქმიანობა და აქტივობები წარმოაჩინეს. გამოფენის პარალელურად გაიმართა დისკუსიები თბილისის სტრატეგიაზე და მდინარე მტკვრის დაბრუნებაზე. ფესტივალის ფარგლებში არასამთავრობო ორგანიზაციები თბილისის მერიის სამსახურებსა და დონორებს შეხვდნენ და მათთვის საინტერესო საკითხებზე დისკუსია გამართეს.

თბილისი. საერთაშორისო გამჭვირვალობა საქართველო სენაკის გამგებლის დროებითი მოვალეობის შემსრულებლის დანიშვნას გამოეხმაურა. სენაკის გამგებლის თანამდებობა ვაკანტური 24 ივნისს გახდა, მას შემდეგ გამგებელმა  პირადი განცხადების საფუძველზე დატოვა თანამდებობა. „სენაკის საკრებულოს აპარატის უფროსის კობა ბარამიას განმარტებით, საკრებულო ვერ გამოაცხადებდა კონკურსს გამგებლის თანამდებობაზე, რადგანაც თავის დროზე საკონკურსო-საატესტაციო კომისიის შექმნა პროცედურული დარღვევებით მოხდა... მიგვაჩნია, რომ სენაკის მუნიციპალიტეტის საკრებულოს საკმარისი დრო ჰქონდა იმისთვის, რომ გამოესწორებინა ხარვეზები და საკონკურსო-საატესტაციო კომისიის მეშვეობით გამოეცხადებინა კონკურსი ვაკანტურ თანამდებობაზე, რათა ყველა კანდიდატს ჰქონოდა თანაბარი შანსი გამგებლის პოზიციის დასაკავებლად. ამგვარი მიდგომა არ წარმოშობდა კითხვებს და პროცესი გამჭვირვალე და უფრო მეტად სამართლიანი იქნებოდა", ნათქვამია ორგანიზაციის ვებგვერდზე გამოქვეყნებულ ინფორმაციაში. „საერთაშორისო გამჭვირვალობა – საქართველო" ასევე მოუწოდებს სენაკის მუნიციპალიტეტის საკრებულოს, „დროულად აღმოფხვრას სამართლებრივი ხარვეზები, რათა საკონკურსო-საატესტაციო კომისიამ შეძლოს სრულყოფილად ფუნქციონირება, სხვა შემთხვევაში, გაჩნდება საფუძვლიანი ეჭვი იმასთან დაკავშირებით, რომ კომისიის სრულფასოვანი მუშაობა საკრებულოს მმართველი ძალის  ინტერესებში არ შედის". სრულად წყარო: transparency.ge

თბილისი. 11 ივლისი მოსახლეობის მსოფლიო დღეა, 2013 წელს მისი თემა მოზარდთა ორსულობაა. ამ საკითხს მიეძღვნა სასტუმრო  ,,ქორთიარდ მარიოტში”  გამართული პრესკონფერენცია სახელწოდებით ,,ადრეული ქორწინების პრევენცია -  გენდერული თანასწორობისა და რეპროდუქციული ჯანმრთელობის ხელშეწყობისათვის". პრესკონფერენციაში მონაწილეობდა გაეროს მოსახლეობის ფონდის საქართველოს ოფისის ხელმძღვანელი. მსოფლიოში ყოველწლიურად 15-დან 19 წლის ასაკის დაახლოებით 16 მილიონი გოგონა აჩენს ბავშვს. უმრავლეს შემთხვევაში გოგონებისთვის ადრეული ქორწინება ნიშნავს სწავლისა და განვითარების შეწყვეტას. ფიზიკურად და ემოციურად მოუმწიფებელ გოგონას აკისრებს ზრდასრული ადამიანის  პასუხისმგებლობას და განსაკუთრებით უარყოფითად მოქმედებს მის რეპროდუქციულ ჯანმრთელობაზე. ადრეული ორსულობა და მშობიარობა უდიდესი რისკია როგორც დედისათვის, ასევე ჩვილისთვის. სრულად წყარო: ginsc.net

თბილისი. საქართველოს დემოკრატიულმა ინიციატივამ „სისხლის სამართლის საპროცესო კოდექსში ცვლილების შეტანის შესახებ" კანონპროეტის შესახებ მოსაზრებები გამოაქვეყნა. „საქართველოს პარლამენტში საქართველოს მთავრობის მიერ განსახილველად წარდგენილ იქნა კანონპროექტი  „საქართველოს სისხლის სამართლის საპროცესო კოდექსში ცვლილებების შეტანის შესახებ". აღნიშნული კანონპროექტით ცვლილებები შედის საქართველოს სისხლის სამართლის საპროცესო კოდექსის 332-ე მუხლში და დაკითხვის ახალი წესის ამოქმედებას, რომელიც  მოწმის დაკითხვას  დასაშვებად მხოლოდ სასამართლოს წინაშე მიიჩნევს, ნაცვლად 2013 წლის 01 სექტემბრისა 2014 წლის 01 დეკემბრიდან ითვალისწინებს. მიგვაჩნია, რომ წარმოდგენილი კანონპროექტის მიღება უარყოფითად აისახება ადამიანის უფლებათა დაცვის მდგომარეობაზე საქართველოში და კვლავ საფრთხის ქვეშ დატოვებს ბრალდებისა და დაცვის მხარის საპროცესო თანასწორობისა და შეჯიბრობითობის პრინციპის რეალურ განხორციელებას", ნათქვამია დემოკრატიული ინიციატივის ვეგვერდზე გამოქვეყნებულ პუბლიკაციაში. სრულად წყარო gdi.ge

კახეთი. სათემო კავშირმა „ნუკრიანმა" და „სამოქალაქო ინიციატივამ" სოფელ ერისიმედის ბიბლიოთეკის საცავის შევსების მიზნით გაზაფხულზე აქცია დაიწყეს. კამპანია სხვადასხვა ინსტრუმენტებს მოიცავდა: სოციალურ მედიას, კარდაკარის პრინციპს და ა.შ. კამპანიას სხვადასხვა ორგანიზაციები შეუერთდნენ და სოფელ ერისიმედის ბიბლიოთეკას 500–ზე მეტი წიგნი გადაეცა. სრულად წყარო: სამოქალაქო ინიციატივის გვერდის სოციალურ ქსელში

თბილისი. სურსათის უვნებლობის მარეგულირებელი კანონმდებლობის ცვლილებების პროექტის შესახებ, ევრაზიის თანამშრომლობის ფონდის ინიციატივით, საზოგადოებრივმა ორგანიზაციებმა გაავრცელეს განცხადება 15 ივლისს. ევრაზიის თანამშრომლობის ფონდმა ასევე მიმართა საქართველოში ევროკავშირის წარმომადგენლობას და სთხოვა გამოეხატა პოზიცია „თუ რამდენად შეუწყობს ხელს ამ ცვლილებების მიღება საქართველოს ევროკავშირთან ინტეგრაციის მიმდინარე პროცესს...". 8 ივლისს ევროკავშირის წარმომადგენლობამ საქართველოში ფონდს ოფიციალური წერილით უპასუხა, სადაც ნათქვამია, რომ „აღნიშნული ცვლილება წინააღმდეგობაში მოდის ევროკავშირის შესაბამის რეგულაციებთან და მას შეუძლია ხელი შეუშალოს საქართველოს კანონმდებლობის ევროპულ რეგულაციებთან დაახლოების მიმდინარე პროცესს". სრულად წყარო: epfound.ge

ქვემო ქართლი. 10 ივლისს, „სიდას" ინიციატივითა და არასაპატიმრო სასჯელაღსრულებისა და პრობაციის ეროვნული სააგენტოს ქვემო ქართლის პრობაციის ბიუროს მხარდაჭერით, კანონთან კონფლიქტში მყოფი არასრულწლოვნები სხვა რუსთაველ ახალგაზრდებთან ერთად თბილისში ყვავილების ულამაზეს ორანჟერეას–გარდენიეს ესტუმრნენ. ღონისძიება ჩატარდა პროექტ „არასრულწლოვანთა მარლთმსაჯულების რეფორმის მხარდაჭერა ქვემო ქართლსა და სამცხე ჯავახეთის ეროვნული უმცირესობების თემებში" ფარგლებში, რომელიც დაფინანსებულია ევროკავშირის მიერ. წყარო: ორგანიზაციის გვერდი სოციალურ ქსელში

გურია. 10 ივლისს სამოქალაქო განათლებისა და პედაგოგთა გადამზადების პროგრამის ფარგლებში გურიაში მომუშავე სამოქალაქო კლუბებისა და საინიციატივო ჯგუფების წევრი მოსწავლეების მონაწილეობით ერთდღიანი გასვლისი ბანაკი მოეწყო. მოსწავლეებმა მოინახულეს ბჟუჟჰესის ჰიდროელექტროსადგურის სათავე ნაგებობა, შემდეგ კი მდინარე ბჟუჟის ხეობაში დაბანაკდნენ. დღის მანძილზე მონაწილეებმა მოისმინეს საინტერესო პრეზენტაციები, ჩაერთნენ სახალისო აქტივობებში. სამოქალაქო განათლებისა და პედაგოგთა გადამზადების პროგრამას ახორციელებს PH International-ი ამერიკის საერთაშორისო განვითარების სააგენტოს დაფინანსებით (USAID). გურიის ახალგაზრდული რესურსცენტრი პროგრამის განმახორციელებელი პარტნიორია გურიაში. წყარო: ორგანიზაციის გვერდი სოციალურ ქსელში

11 ივლისს 15:00 საათზე  ახალგაზრდა იურისტთა ასოციაცია, კონსტიტუციის 42–ე მუხლი და ადვოკატთა ასოციაცია გამართავენ პრესკონფერენციას. თემა: სისხლის სამართლის საპროცესო კოდექსში შესატანი ცვლილებების, კერძოდ, მოწმის დაკითხვის წესის შესახებ. მისამართი: თბილისი, ზუბალაშვილების 36

თბილისი. საერთაშორისო გამჭვირვალობა – საქართველო მობილური ტელეფონების საშუალებით გავრცელებულ სარეკლამო „მესიჯებს" გამოეხმაურა. „საქართველოში მსგავსი ტიპის რეკლამას კანონი არ არეგულირებს, მაშინ, როცა ბევრმა ქვეყანამ უკვე შემოიღო ანტი-სპამ კანონმდებლობა, რომელიც კრძალავს ან არეგულირებს პირდაპირ მარკეტინგს ტელეფონით, იმეილით, SMS-ითა და MMS-ით", ნათქვამია ორგანიზაციის პუბლიკაციაში, რომელიც სხვა ქვეყნების გამოცდილებასაც მიმოიხილავს. „ანტი–სპამ" რეგულაციების გარდა ორგანიზაცია ყურადღებას ამახვილებს პერსონალური მონაცემების დაცვის საკითხზეც. სრულად საერთაშორისო გამჭვირვალობა – საქართველო სოციალურ ქსელში გამოკითხვას ტარებს: საჭიროა თუ არა საქართველოში ანტი-სპამ რეგულაციის შემოღებ? წყარო: transparency.ge

თბილისი. ახალგაზრდულმა პარლამენტმა საკონსტიტუციო კომისიაში ჩართვის თხოვნით საქართველოს პარლამენტს მიმართა. მათ საქართველოს პარლამენტის იურიდიულ საკითხთა კომიტეტის თავმჯდომარეს, ვახტანგ ხმალაძეს წერილობით უკვე მიმართეს. ახალგაზრდული პარლამენტის ადმინისტრაცია საკონსტიტუციო კომისიის შექმნის ინიციატივას დადებითად აფასებს და აცხადებს, რომ მიშვნელოვანია, კომისიაში მრავალმხრივი ჩართულობის უზრუნველყოფა, თუმცა რა თქმა უნდა, გარკვეულ საზღვრებში, რათა მისი საქმიანობა ქმედითი და ეფექტური გახდეს.  „მიგვაჩნია, რომ აღნიშნული საკითხი ძალიან მნიშვნელოვანია და საჭიროა, კომისიაში უზრუველყოფილი იყოს მრავალმხრივი ჩართულობა. ასეთი მიდგომით საკონსტიტუციო კომისიის საქმიანობის ლეგიტიმაცია მოიმატებს და პროცესი უფრო გამჭირვალე გახდება. ჩვენ მივმართეთ იურიდიულ საკითხთა კომიტეტს თხოვნით და იმედი გვაქვს, მოგვეცემა შესაძლებლობა საკონსტიტუციო კომისიის საქმიანობაში ჩავერთოთ. თხოვნაზე დადებითი პასუხის შემთხვევაში, საქართველოს ახალგაზრდული პარლამენტი უზრუნველყოფს არა მხოლოდ 100 დეპუტატის აზრის გამოხატვას, არამედ აქტიური განხილვის პროცესში ახალგაზრდობის ფართო სპექტრის ჩართვას". წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა ზესტაფონის, ზუგდიდისა და თეთრიწყაროს მუნიციპალიტეტების გამგეობებიდან მიღებული ინფორმაცია გამოაქვეყნა. ვებგვერდზე განთავსდა დოკუმენტები ორგანიზაციის ბალანსის, პრემიების, სახელმწიფო შესყიდვების, საჯარო ინფორმაციის გაცემის ანგარიშების, ავტოპარკის, განთავისუფლებული თანამშრომლების შესახებ. ინფორმაცია ზესტაფონის მუნიციპალიტეტის გამგეობიდან ინფორმაცია ზუგდიდის მუნიციპალიტეტის გამგეობიდან ინფორმაცია თეთრიწყაროს  მუნიციპალიტეტის გამგეობიდან წყარო: opendata.ge

აჭარა. 10 ივლისს, ბათუმის დემოკრატიული ჩართულობის ცენტრში, საქართველოს ახალგაზრდა იურისტთა ასოციაციის, საერთაშორისო გაჭვირვალობა - საქართველოსა და სამართლიანი არჩევნებისა და დემოკრატიის საერთაშორისო საზოგადოების  ორგანიზებით გამართა მრგვალი მაგიდა.  სადაც განხილულ იქნა  მათ მიერ მომზადებული და პარლამენტის ინტერფრაქციულ ჯგუფებში წარდგენილი საკანონმდებლო ცვლილებები შემდეგ საკითხებზე: ამომრჩეველთა სიების ფორმირება, ადმინისტრაციული რესურსის გამოყენება, მედიის მიერ წინასაარჩევნო კამპანიის გაშუქება და „პოლიტიკური გაერთიანებების შესახებ" საქართველოს ორგანულ კანონში განსახორციელებელი ცვლილებები. მრგვალი მაგიდის მონაწილეებს მიეწოდათ ინფორმაცია ინტერფრაქციული ჯგუფის მიერ აღნიშნულ საკითხებზე მომზადებული საკანონმდებლო ცვლილებების შესახებ. 

11 ივლისს, 11:45 საათზე საია სოფლის მეურნეობის სამინისტროს საქმესთან დაკავშირებით პრესკონფერენციას გამართავს. მისამართი: თბილისი, ჯანო კახიძის 15, საიას ოფისი

11 ივლისს, 10:00 საათზე ინფორმაციის თავისუფლების განვითარების ინსტიტუტი გამართავს რეგიონული მაუწყელის ციფრულ საეთერო მაუწყებლობაზე გადასვლის მოდელის პრეზენტაციას. მისამართი: თბილისი, ჭოველიძის 10, ფონდი „ღია საზოგადოება – საქართველო"

11 ივლისს, 10:00–18:30 საათი, თბილისის მერიის ორგანიზებით გაიმართება არასამთავრობო ორგანიზაციების ფესტივალი. მისამართი: თბილისი, ექსპო–ჯორჯია

თბილისი. სამოქალაქო საზოგადოების ინსტიტუტი საზოგადოებრივი ორგანიზაციების ფინანსისტებისა და იურისტებისთვის 19–20 ივლისს, 6–7 და 9–10 აგვისტოს საგადასახადო კოდექსის თემაზე უფასო ტრენინგებს ჩაატარებს. ღონისძიება ფოკუსირებული იქნება არასამთავრობო ორგანიზაციების დაბეგვრის საკითხებზე. ორდღიან ტრენინგს საგადასახადო სამართლის სპეციალისტი, შპს „აი–ენ აუდიტის" დირექტორი – ირაკლი შავიშვილი გაუძღვება.  მონაწილეობის მიღება შეუძლიათ საზოგადოებრივი ორგანიზაციების ფინანსისტებსა და იურისტებს. მსურველებმა დაგვიდასტურეთ მონაწილეობა არაუგვიანეს 15 ივლისისა ელექტრონული ფოსტის მეშვეობით: irakli_mkheidze@civilin.org ღონისძიება ხორციელდება USAID-ის ფინანსური მხარდაჭერით, აღმოსავლეთ-დასავლეთის მართვის ინსტიტუტის (EWMI) პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

თბილისი. საქართველოს ახალგაზრდა კონსტიტუციონალისტთა ასოციაციამ სოციალურ ქსელში განცხადება გაავრცელა. „დღეს გავრცელებული ინფორმაციით, რუსი ჯარისკაცები კვლავ აგრძელებენ სოფელ დიცთან მავთულხლართების გაბმას. როგორც ირკვევა, რუსმა ჯარისკაცებმა უკანონო საქმიანობა დღეს დილით განაახლეს. მოსახლეობის განცხადებით, ოკუპანტები ცდილობენ ე.წ. „საზღვრის" შიგნით მოაქციონ სოფლის კუთვნილი სასაფლაო. ასევე დიდი საფრთხე იკვეთება მოსახლეობის კუთვნილი ბაღებისა და საცხოვრებელი სახლების დაკარგვასთან დაკავშირებით. მოსახლეობა დახმარებისათვის მიმართავს როგორც ხელისუფლებას, ასევე საერთაშორისო ორგანიზაციებს.  ტერიტორიული მოწყობის საკითხი უკვე მრავალი წელია ერთ-ერთ უმნიშვნელოვანეს პრობლემას წარმოადგენს ქართული სახელმწიფოსთვის და დღეს დგება რეალური საფრთხე, რომ ეს პრობლემა კიდევ უფრო მასშტაბური და რთულად გადასაჭრელი გახდეს. საქართველოს ახალგაზრდა კონსტიტუციონალისტთა ასოციაცია ხაზს უსვამს ტერიტორიული მთლიანობისა და სახელმწიფო საზღვრების ურღვევობის კონსტიტუციური პრინციპის მნიშვნელობას და მოუწოდებს საქართველოს ხელისუფლებას, მოახდინოს დროული რეაგირება აღნიშნულ პრობლემის გადასაჭრელად". წყარო:ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველომ პრემიერ–მინისტრის ვიდეომიმართვასთან დაკავშირებით განცხადება გაავრცელა. „პრემიერმინისტრმა დღევანდელ ვიდეომიმართვაში განაცხადა, რომ ახალი ხელისუფლების ამბიციაა, საპრეზიდენტო არჩევნები სამართლიან და თავისუფალ გარემოში წარიმართოს და მმართველი გუნდის მიერ ადმინისტრაციული რესურსის წინასაარჩევნოდ გამოყენების პრაქტიკა დასრულდეს. „საერთაშორისო გამჭვირვალობა – საქართველო" მიესალმება პრემიერმინისტრის განცხადებას და მნიშვნელოვნად მიიჩნევს, რომ ხელისუფლების მიერ აღებული ვალდებულებები პრაქტიკაშიც აღსრულდეს. ჩვენი ორგანიზაცია დააკვირდება 2013 წლის საპრეზიდენტო არჩევნებისწინა გარემოს და გააგრძელებს საზოგადოების ინფორმირებას კამპანიის მიმდინარეობის შესახებ", ნათქვამია ორგანიზაციის გვერდზე სოციალურ ქსელში. წყარო:ორგანიზაციის გვერდი სოციალურ ქსელში