თბილისი. 9 ივლისს აღმოსავლეთ პარტნიორობის საქართველოს ეროვნული პლატფორმის „საზოგადოებრივ ორგანიზაციათა განვითარების ეფექტურობის" ჯგუფთაშორისი ქვე–ჯგუფის მეორე შეხვედრა გაიმართა.  შეხვედრას 11 ორგანიზაციის წარმომადგენელი ესწრებოდა. მონაწილეებმა განიხილეს და მიიღეს ქვე–ჯგუფის დებულება, დაამტკიცეს საერთო სამოქმედო გეგმა. ასევე ისაუბრეს ხელისუფლებასა და სამოქალაქო საზოგადოების ორგანიზაციებს შორის მემორანდუმზე, დონორებსა და სამოქალაქო საზოგადოების ორგანიზაციებს შორის დიალოგზე. შეხვედრაზე შეიქმნა საინიციატივო ჯგუფი, რომელიც სამოქალაქო საზოგადოების ორგანიზაციებისა და დონორების შეხვედრას ორგანიზებას გაუწევს. პირველი შეხვედრის შემდეგ ქვე–ჯგუფთან მუშაობის სურვილი 9 საზოგადოებრივმა ორგანიზაციამ გამოთქვა, ამ დროისთვის ქვე–ჯგუფში 27 ორგანიზაციაა გაერთიანებული.

თბილისი. საერთაშორისო გამჭვირვალობა – საქართველომ საპარლამენტო ამბების მორიგი პოდკასტი გამოაქვეყნა.  პოდკასტის ახალ გამოშვებაში შეგიძლიათ მოისმინოთ ინფორმაცია მიმდინარე კვირის საპარლამენტო განრიგის შესახებ. ასევე გაეცნოთ მოსაზრებებს დაგეგმილი საკონსტიტუციო ცვლილებების შესახებ. საპარლამენტო ამბების პოდკასტი – 8 ივლისი წყარო: transparency.ge

9 ივლისს, 16:00 საათზე ახალგაზრდა იურისტთა ასოციაცია პრესკონფერენციას გამართავს. ორგანიზაცია საზოგადოებას მამუკა მიქაუტაძის საქმის დეტალებს გააცნობს. მისამართი: თბილისი, ჯანო კახიძის 15, საიას ოფისი

თბილისი. კომუნიკაციების ეროვნულმა კომისიამ იმ მაუწყებლებისა და საკაბელო კომპანიების სია გამოაქვეყნა, რომლებსაც საპრეზიდენტო არჩევნების წინ Must Carry-ის ვალდებულება ეხებათ. კანონის თანახმად, საკაბელო კომპანიებმა საკუთარ პაკეტში აუცილებლად უნდა ჩართონ  საზოგადოებრივი მაუწყებელი, საერთო ლიცენზიის მქონე მაუწყებლები, რომლებიც მთელი ქვეყნის არანაკლებ 20%-ს ფარავენ, ასევე ის არხები, რომლებიც იმ სამაუწყებლო ზონაში მაუწყებლობენ, სადაც საკაბელო კომპანიას ერთი აბონენტი მაინც ჰყავს. კომისიის მიერ გამოქვეყნებული ინფორმაციის თანახმად, Must Carry მთელი ქვეყნის მასშტაბით 117 საკაბელო კომპანიას ეხება. სრულად წყარო: media.ge

თბილისი. კონსულტაციებისა და ტრენინგების ცენტრმა საჯარო მოხელეთა გადამზადების პროგრამის ფარგლებში დაიწყო ტრენინგების ციკლი. პირველ ეტაპზე ტრენინგი იმართება ადმიანური რესურსების მართვალში. ჯამურად ტრენინგებში მონაწილეობას მიიღებს 900–მდე მოხელე, რომლებიც ადამიანური რესურსების მართვის გარდა გაივლიან კურსს პრეზენტაციის უნარებისა და წერილობითი კომუნიკაციის საკითხებზე. წყარო:ctc.ge

თბილისი. საია ეხმაურება საქართველოს პრემიერ-მინისტრის განცხადებას, რომელიც შეეხება ვლადიმერ ბედუკაძესთან გაფორმებული საპროცესო შეთანხმებას. „საია ეთანხმება საქართველოს პრემიერ-მინისტრის განცხადებას იმ ნაწილში, რაც წამების ჩამდენი პირის სისხლისსამართლებრივი პასუხისმგებლობისაგან სრულად გათავისუფლების დაუშვებლობას ეხება. ამასთან საია სამართლებრივად უპერსპექტივოდ მიიჩნევს ვლადიმერ ბედუკაძის მიმართ დამდგარი განაჩენის შეცვლის შესაძლებლობას" – ნათვამია ორგანიზაციის ვებგვერდზე, 9 ივლისს, გამოქვეყნებულ განცხადებაში. განცხადება წყარო: gyla.ge

12 ივლისს, 17:00 საათზე ჰაინრიჰ ბიოლის ფონდი მართავს საჯარო დისკუსიას – „შეზღუდული შესაძლებლობების მქონე ადამიანები და საზოგადოება: რა ბარიერები ზღუდავს მათ?". მისამართი: ქუთაისი, აკაკი წერეთლის 13, ქუთაისის უნივერსიტეტის საკონფერენციო დარბაზი

თბილისი.საერთაშორისო გამჭვირვალობა – საქართველომ გლობალური კორუფციის ბარომეტრის კვლევა გამოაქვეყნა, რომელიც საქართველოში 2012 წლის სექტემბერში ჩატარდა. „კვლევის თანახმად, საქართველოს მოსახლეობის მხოლოდ 4% ადასტურებს, რომ ბოლო 12 თვის განმავლობაში ქრთამი გადაუხდია (2010 წლის გამოკითხვის თანახმად, გამოკითხულთა 3%-მა უპასუხა ამ კითხვას დადებითად). კვლევაში შესული 107 ქვეყნიდან საქართველოში ქრთამის გადახდის  ერთ-ერთი ყველაზე დაბალი მაჩვენებელია. ზოგადად, მთელი მსოფლიოს მასშტაბით, ოთხი გამოკითხულიდან ერთ ადამიანზე მეტი (27%) აცხადებს, რომ ბოლო 12 თვის განმავლობაში ქრთამი გადაუხდია”, ნათქვამია ორგანიზაციის ვებ–გვერდზე. სრულად წყარო: transparency.ge

იმერეთი. საია–ს ქუთაისის ფილიალის პროექტის – „ჩემი ხმა პარლამენტში"  – ფარგლებში შეიქმნა იმერეთის მხარის 12–ვე მუნიციპალიტეტის მაჟორიტარი დეპუტატის ბიუროს საერთო გვერდი.  გვერდის საშუალებით ყოველდღიურად შეგიძლიათ მიიღოთ ინფორმაცია ბიუროების საქმიანობის შესახებ. პროექტის მიზანს წარმოადგენს იმერეთის მოსახლეობის პრობლემების ადვოკატირება მათი საარჩევნო პროგრამებში ასახვისა და საპარლამენტო წარმომადგენლობისა და მაჟორიტარი დეპუტატის ბიუროების გაძლიერების და გააქტიურების გზით. ვებგვერდი – „ჩემი ხმა პარლამენტში" წყარო: ორგანიზაციის გვერდი სოციალურ ქსელში

სამეგრელო. 8 ივლისს საქართველოს ახალგაზრდული პარლამენტის გარემოს დაცვისა და ბუნებრივი რესურსების კომიტეტის ორგანიზებით, ზუგდიდში დემოკრატიული ჩართულობის ცენტრში ჩატარდა საჯარო შეხვედრა თემაზე – „ჰესების მშენებლობა - ეკონომიკური სარგებელი თუ ეკოლოგიური საფრთხე". დისკუსია მიზანად ისახავდა გამოეკვეთა ჰესების მშენებლობასთან დაკავშირებული ეკოლოგიური საფრთხეები და ამავდროულად მისი ეკონომიკური სარგებელი, თუ რა შედეგი შეიძლება მიიღოს ქვეყანამ ჰესების აშენებით. ახალგაზრდული პარლამენტის მიერ ორგანიზებულ შეხვედრას ესწრებოდნენ ექსპერტები, რომლებმაც სტუდენტებსა და ყველა დაინტერესებულ პირს გაუზიარეს თავიანთი გამოცდილება ამ კუთხით და ისაუბრეს ჰესების მშენებლობის დადებით და უარყოფით მხარეებზე. წყარო: ორგანიზაციის გვერდი სოციალურ ქსელში

ქვემო ქართლი. სიქა-ს სამიზნე სკოლის - მარნეულის #5 და #8 სკოლების სამოქალაქო კლუბების წევრებმა „ახალგაზრდული ფორუმის" ფარგლებში განახორციელეს პროექტი „ერთად ვებრძოლოთ ძალადობას". ფორუმზე სამუშაო თემად ბავშვთა უფლებების დაცვა აირჩიეს და საზოგადოების ცნობიერების ამაღლების მიზნით დაგეგმეს და ჩაატარეს სხვადასხვა ღონისძიებები. მოსწავლეებმა მოამზადეს თემატური პუბლიკაციები და პოსტერები, რომლებიც მოსახლეობას დაურიგეს და საჯარო დაწესებულებებში – სკოლებში, მუნიციპალიტეტში, კულტურის სახლში გააკრეს. მარნეულის დემოკრატიული ჩართულობის ცენტრში ჩატარდა ტრენინი თემაზე – „რა არის ძალადობა?". ტრენინგის დროს მოსწავლეებმა წარმოადგინეს მინისპექტაკლები: „ჟალადობა ოჯახში", „ძალადობა ქუჩაში" და „ძალადობა სკოლაში". მარნეულის კულტურის სახლის წინ მოსწავლეებმა წარმოადგინეს ფლეშმობი,  რომელიც დასრულდა სლოგანით „არა ძალადობას". წყარო: civics.ge

თბილისი.ორგანიზაცია იდენტობამ შეზღუდული შესაძლებლობის მქონე პირთა საშემოსავლო საკითხების შესახებ ინფორმაცია გაავრცელა. „საქართველოს პარლამენტი განიხილავს ახალ კანონპროექტს, რომელიც შშმ პირების საშემოსავლო გადასახადისგან გათავისუფლებას ითვალისწინებს. იმ შემთხვევაში, თუ კანონპროექტი დამტკიცდება, იგი გავრცელდება ბავშვობიდან შეზღუდული შესაძლებლობის მქონე პირებზე, ასევე მნიშვნელოვნად გამოხატული შეზღუდული შესაძლებლობის მქონე პირებზე, ვისი წლიური დასაბეგრი შემოსავალიც 600 ლარს უტოლდება ან ნაკლებია", ნათქვამია ორგანიზაციის გვერდზე. სრულად წყარო: ორგანიზაციის გვერდი სოციალურ ქსელში

ქვემო ქართლი.  თეთრიწყაროს რაიონის სოფელ მარაბდაში არასამთავრობო ორგანიზაციამ „სტუდენტურმა საერთაშორისო ინიციატივამ" და სსიპ ბავშვთა და ახალგაზრდობის განვითარების ფონდმა მარაბდის „ინტენსიური ბაღის" პრეზენტაცია გამართეს 8 ივლისს. ღონისძიება ფონდის პირველი საგრანტო კონკურსის ფარგლებში დაფინანსებული პროექტის „ახალგაზრდები მდგრადი აგრარული და გარემოსდაცვითი განვითარებისათვის” შედეგად განხორციელდა. პროექტი, მიზნად ისახავს აგრარულ სექტორში მეხილეობის სფეროს მდგრადი განვითარების ხელშეწყობას, მრავალწლიანი კულტურების მოვლისა და განვითარების თანამედროვე, პროგრესული ფორმების დამკვიდრებას, მწირი მიწიანი ბაღების ოპტიმალურად დატვირთვასა და პოპულარიზაციას, აღნიშნულ პროცესში ახალგაზრდობის როლის ზრდას და წახალისებას. სრულად წყარო: ბავშვთა და ახალგაზრდობის განვითარების ფონდის გვერდი სოციალურ ქსელში

9 ივლისს 14:00 საათზე, საქართველოს დემოკრატიული ინიციატივის გამგეობის წევრი გიორგი მშვენიერაძე პრესკონფერენციას გამართავს. თემა: მამუკა მიქაუტაძის მკვლელობა. მისამართი:თბილისი, პრაიმტაიმის პრესკლუბი

9 ივლისს, 12:00 საათზე, გაეროს ქალთა ორგანიზაციისა (UN Woman) და საქართველოს რეგიონული განვითარებისა და ინფრასტრუქტურის სამინისტროს ინიციატივით საინფორმაციო შეხვედრა გაიმართება. მისამართი:გორი, გორის მუნიციპალიტეტის სააქტო დარბაზი

9 ივლისს, 12:00 საათზე, ევროპის საბჭო და ევროკავშირი სასჯელაღსრულების დაწესებულებებში ადამიანის უფლებების დაცვის საკითხზე ერთობლივი პროგრამის დაწყებისადმი მიძღვნილ ღონისძიებას გამართავს, რომელსაც საქართველოს მთავრობის წევრებიც დაესწრებიან. მისამართი:თბილისი, სასტუმრო ჰოლიდეი ინი

9 ივლისს, 16:00 საათზე ბათუმის დემოკრატიული ჩართულობის ცენტრის ინიციატივით გაიართება დისკუსია მდინარე ჭოროხზე კირნათი ჰესის მშვენელობის და მისი გარემოზე ზემოქმედების რისკების შესახებ. მისამართი: ბათუმი, დემოკრატიული ჩართულობის ცენტრი

9 ივლისს, 14:00 საათზე ჰაინრიჰ ბიოლის ფონდი გამართავს საჯარო დისკუსიას – „ვის ეშინია ფემინიზმის?" მისამართი: ოზურგეთი, ჭავჭავაძის 14, დემოკრატიული ჩართულობის ცენტრი

9 ივლისს, 11:00 საათზე „საერთაშორისო გამჭვირვალობა – საქართველო" გამოაქვეყნებს გლობალური კორუფციის ბარომეტრის უახლესი კვლევაში საქართველოს მიერ მიღებულ შედეგებს. მისამართი:თბილისი, სასტუმრო თბილისი მარიოტი

თბილისი. ევროკავშირის წარმომადგენლობამ საქართველოში გამოაცხადა საგრანტო კონკურსი – „ევროპული ინსტრუმენტი დემოკრატიისა და ადამიანის უფლებებისთვის". მცირე მოცულობის დაფინანსება გათვალისწინებულია იმ ღონისძიებებისათვის, რომლებიც მიზნად ისახავს სამოქალაქო საზოგადოების როლის განმტკიცებას ისეთ სფეროებში როგორიაცც ადამიანის უფლებები და დემოკრატიული რეფორმების ხელშეწყობა, კანონის უზენაესობა. საგრანტო კონკურსის ფარგლებში კონსულტაციები გაიმართება თბილისსა და ბათუმში. 9 ივლისს, 11:00 საათი მისამართი: ბათუმი, მელაშვილის 2, პრესკაფე 12 ივლისი, 14:00 საათი მისამართი: თბილისი, ნინო ჩხეიძის 28, ევროკავშირის წარმომადგენლობა საქართველოში საგრანტო განაცხადი წყარო: presscafe.ge

თბილისი. ქალთა საინფორმაციო ცენტრისა და საქართველოს თავდაცვის სამინისტროს ერთობლივი ინიციატივით, თავდაცვის აკადემიაში გენდერული თანასწორობასა და გაეროს უშიშროების საბჭოს 1325–ე რეზოლუციაზე ტრენინგი ჩატარდა. ტრენინგის მიზანი იყო გენდერული თანასწორობის კუთხით აკადემიის სტუდენტების ცნობიერების ამაღლება და მათი ინფორმირება. სრულად წყარო: GINSC

თბილისი. საერთაშორისო გამჭვირვალობა – საქართველო სოციალურ ქსელში ორგანიზაციის გვერდზე პრემიერ მინისტრს ეხმიანება. „ვეხმაურებით პრემიერმინისტრის თხოვნას მთავარი პროკურორისადმი ვლადიმერ ბედუკაძისთვის საპროცესო შეთანხმების გადახედვის თაობაზე. „საერთაშორისო გამჭვირვალობა – საქართველო" განმარტავს, რომ საპროცესო შეთანხმება მტკიცდება სასამართლოს განაჩენით და მას შემდეგ, რაც სასამართლო დაამტკიცებს საპროცესო შეთანხმებას, მისი შეცვლა შესაძლებელია მხოლოდ და მხოლოდ სააპელაციო სასამართლოში გასაჩივრების გზით. გასაჩივრების უფლება გააჩნია მხოლოდ მსჯავრდებულს. ამ შემთხვევაში მოქმედებს სისხლის სამართლის საპროცესო კოდექსის 215-ე მუხლით დადგენილი სპეციალური წესი. საპროცესო შეთანხმების დამტკიცების შესახებ სასამართლოს განაჩენის ძალაში შესვლიდან მისი გადასინჯვის ერთადერთი შესაძლებლობა არსებობს, რაც სისხლის სამართლის საპროცესო კოდექსის 310-ე მუხლით რეგულირდება (ახლად გამოვლენილ გარემოებათა გამო)", ნათქვამია ორგანიზაციის გვერდზე სოციალურ ქსელში. წყარო: ორგანიზაციის გვერდი სოციალურ ქსელში