4 ივლისს, 12:00 საათზე უფლებადამცველთა გაერთიანება და ლილოს მოსახლეობა ბრიფინგს გამართავს. თემა: ლილოს ნაგავსაყრელის გადატანის მოთხოვნით აქციების დაწყება. მისამართი: თბილისი, პრაიმტაიმის პრესკლუბი

4 ივლისს, 11:30 საათზე სამართლიანი არჩევნებისა და დემოკრატიის საერთაშორისო საზოგადოების აღმასრულებელი დირექტორი ნინო ლომჯარია პრესკონფერენციას გამართავს. თემა: საპრეზიდენტო არჩევნები. მისამართი: თბილისი, პრაიმტაიმის პრესკლუბი

თბილისი. არასამთავრობო ორგანიზაციები მოუწოდებენ საქართველოს პრეზიდენტს არჩვევნების თარიღად ოქტომბრის თვის ერთ–ერთი კვირა დღე გამოაცხადოს. „მიგვაჩნია, რომ საქართველოს პრეზიდენტმა მისი  უფლებამოსილება არჩევნების თარიღის დანიშვნის თაობაზე იმგვარად უნდა გამოიყენოს, რომ მაქსიმალურად შეუწყოს ხელი ამომრჩევლების აქტიურობას, როგორც ქვეყნის შიგნით, ისე მის გარეთ და უზრუნველყოს საქართველოს თითოეული მოქალაქის საარჩევნო უფლების რეალიზების შესაძლებლობა. წინააღმდეგ შემთხვევაში, შესაძლოა, მივიღოთ საქართველოს მოქალაქეების ნიჰილისტური დამოკიდებულება საარჩევნო პროცესების მიმართ, რაც დემოკრატული საზოგადოებისათვის სერიოზულ საფრთხეს წარმოადგენს", ნათქვამია ორგანიზაციების მიერ გავრცელებულ განცხადებაში. განცხადებას ხელს აწერს სამართლიანი არჩევნებისა და დემოკრატიის საერთაშორისო საზოგადოება, საერთაშორისო გამჭვირვალობა – საქართველო საქართველოს ახალგაზრდა იურისტთა ასოციაცია, კონსტიტუციის 42-ე მუხლი, საერთო-სამოქალაქო მოძრაობა - მრავალეროვანი საქართველო, ადამიანის უფლებების სწავლებისა და მონიტორინგის ცენტრი საქართველოს დემოკრატიული ინიციატივა, განვითარებისა და დემოკრატიის ცენტრი, საარჩევნო და პოლიტიკური ტექნოლოგიების კვლევის ცენტრი, სამოქალაქო საზოგადოების და დემოკრატიის განვითარების ცენტრი, ადამიანის უფლებათა ცენტრი, საზოგადოებრივი დამცველი.  სრულად  წყარო:სამართლიანი არჩევნების გვერდი სოციალურ ქსელში

თბილისი. ეკონომიკური პოლიტიკის კვლევის ცენტრმა ახალი პროექტის – „სახელმწიფოს ფასის" ფარგლებში ვებ–გვერდი priceofthestate.ge აამუშავა. ვებ-გვერდზე განთავსებულია ერთად თავმოყრილი ინფორმაცია, რომელიც სხვადასხვა სამინისტროებისა და საჯარო სტრუქტურების ვებ-გვერდებზეა მიმოფანტული, ან საჭიროა მისი გამოთხოვა ფინანსთა სამინისტროდან. მონაცემები წარმოდგენილია სისტემატიზირებულად და იოლი გამოსაყენებელია მომხმარებლისთვის. დაინტერესებულ პირს შეეძლება იხილოს საბიუჯეტო დანახარჯების დაფინანსების წყაროები, შეაფასოს მათი აუცილებლობა, გაანალიზოს ამ დანახარჯების ეკონომიკური მიზანშეწონილობა.  „პროექტის მიზანია მოქალაქეებისთვის ცოდნის გაღრმავება და ინფრომაციის მიწოდება, რათა მათ შეძლონ აქტიურად და კრიტიკულად ჩაერთონ საბიუჯეტო პროცესის ყველა ეტაპზე - ფორმირება, გადანაწილება, შესრულება და მონიტორინგი. საბიუჯეტო პროცესების და სამთავრობო პრიორიტეტების სწორად აღქმა მნიშვნელოვანი ნაბიჯია პოლიტიკურად აქტიური მოქალაქეებისა და ანგარიშვალდებული მთავრობისაკენ", ნათქვამია ვებ–გვერდზე. წყარო:priceofthestate.ge

თბილისი. ინფორმაციის თავისუფლების განვითარების ინსტიტუმა ხულოს, ადიგენის, ახალქალაქისა და ხონის მუნიციპალიტეტების გამგეობებიდან მიღებული ინფორმაცია გამოაქვეყნა. ვებგვერდზე განთავსდა დოკუმენტები ორგანიზაციის ბალანსის, თანამდებობის პირების პრემიების, თანამშრომლების პრემიების შესახებ, სახელმწიფო შესყიდვების შესახებ. ინფორმაცია ხულოს მუნიციპალიტეტის გამგეობიდან ინფორმაცია ადიგენის მუნიციპალიტეტის გამგეობიდან ინფორმაცია ახალქალაქის მუნიციპალიტტის გამგეობიდან ინფორმაცია ხონის მუნიციპალიტეტის გამგეობიდან  წყარო: opendata.ge

ქვემო ქართლი. სიქას ფოლკლორული გუნდი პოლონეთში გაემართა ქალაქ ლოძიში 30-ე საერთაშორისო კულტურულ ფესტივალში მონაწილეობის მისაღებად. ფესტივალში მონაწილეობას 8 ქვეყნის ფოლკლორული გუნდი იღებს, რომლებიც პოლონეთის სხვადასხვა ქალაქების მაცხოვრებლებს მშობლიური ქვეყნის ცეკვებსა და სიმღერებს გააცნობენ. წყარო:ორგანიზაციის გვერდი სოციალურ ქსელში

თბილისი. ორგანიზაცია იდენტობამ თექაზე მუშაობის სემინარი ჩაატარა. თექაზე ერთდროულად იმუშავეს ამ საქმეში გამოცდილებმა და სრულიად ახალბედებმა. თავიანთ ნამუშევრებს მათ ჯერ პირველადი ფორმები მისცეს, შემდეგ უშუალოდ მოთექვის პროცესზე გადავიდნენ და ნამუშევრებმაც საბოლოო სახე მიიღო. ორგანიზაციამ სემინარის შესახებ ინფორმაცია სოციალური ქსელის მეშვეობით გაავრცელა და მასზე დასწრება ნებისმიერ მსურველს შეეძლო. წყარო:identoba.com

თბილისი. კავკასიურმა სახლმა ინტერნეტ დღიურის მორიგი გამოშვება გამოაქვეყნა. გამოშვება რუსულენოვანი პოეტების ვიდეოპორტრეტებს დაეთმო. ეთერი აგარონოვასთან ინტერვიუ ნიკა ჯინჭარაძემ ჩაწერა. წყარო:ორგანიზაციის გვერდი სოციალურ ქსელში

თბილისი. ქალთა საინფორმაციო ცენტრმა დიდი ბრიტანეთის საქველმოქმედო ორგანიზაცია OXMFAM-ის მხარდაჭერით მოაწყო სპეციალური შეხვედრა 2014 წლის ადგილობრივ არჩევნებში მონაწილეობის მსურველ ქალებთან. სრულად  წყარო:ორგანიზაციის გვერდი სოციალურ ქსელში

თბილისი. „საქართველოს ახალგაზრდა კონსტიტუციონალისტთა ასოციაცია" უარყოფითად აფასებს საქართველოს პრეზიდენტის მიერ 2013 წლის პირველ ივლისს გამოცემულ განკარგულებას, რომლის თანახმადაც საპრეზიდენტო არჩევნების თარიღად განისაზღვრა 2013 წლის 31 ოქტომბერი. ასოციაცია მოუწოდებს საქართველოს პრეზიდენტს პატივი სცეს ქვეყანაში მოქმედ კანონმდებლობას და მორიგი საპრეზიდენტო არჩევნების ლეგიტიმურობის კითხვის ნიშნის ქვეშ აღმოჩენის პრევენციისათვის შეცვალოს საპრეზიდენტო არჩევნების თარიღი. სრულად წყარო: gyca.ge

თბილისი. ინფორმაციის თავისუფლების განვითარების ინსტიტუტმა თბილისის მერის სარეზერვო ფონდიდან გადარიცხული თანხების შესახებ ინფორმაცია გამოაქვეყნა. „2013 წლის 2 მაისს  IDFI-იმ ქალაქ თბილის მერიიდან მიიღო დეტალური ინფორმაცია თბილისის მერის სარეზერვო ფონდიდან გამოყოფილი და გადარიცხული თანხების შესახებ. აღნიშნული ინფორმაციის მიღებას ინსტიტუტი ცდილობდა წინა წლებშიც, თუმცა თბილისის მერია თავს არიდებდა დეტალური ინფორმაციის გასაჯაროებისგან  და აღნიშნული მოთხოვნის პასუხად ინსტიტუტს ამისამართებდა საკუთარ ვებ-გვერდზე განთავსებულ ბიუჯეტის შესრულების ანგარიშებზე,  საიდანაც შეუძლებელი იყო სარეზერვო ფონდის ხარჯვის შესახებ დეტალური ინფორმაციის მიღება", ნათქამია ვებ–გვერდზე. როგორც მიღებული დოკუმენტაციიდან ირკვევა 2012 წლის 1 იანვრიდან 2013 წლის 15 აპრილამდე თბილისის მერის სარეზერვო ფონდიდან ათვისებულია  4 734 342 ლარი. სრულად  წყარო: opendatablog.wordpress.com

გურია. 3 ივლისს გურიის ახალგაზრდულ რესურსცენტრში გაიმართა ფორუმ თეატრის სპექტაკლის – „ზურგს ნუ შეაქცევ" – ჩვენება. სპექტაკლის მიზანია საზოგადოების დამოკიდებულების, ცნობიერების შეცვლა პირობითმსჯავრდებულებისა და ყოფილი პატიმრების რესოციალიზაციის საკითხებზე და არსებული სტიგმის მოხსნა. სპექტაკლს ესწრებოდნენ პირობითმსჯავრდებულები, ადგილობრივი მას მედია, ადგილობრივი თვითმმართველობისა საზოგადოებრივი ორგანიზაციების წარმომადგენლები. აღნიშნული სპექტაკლით ფორუმ თეატრის დასმა გურიის რეგიონის 18 თემში იმოგზაურა. ახალი სპექტაკლის მომზადება და ჩვენება მიმდინარე წლის შემოდგომაზეა გათვალისწინებული.  სპექტაკლი "ნუ შეაქცევთ ზუგრს" ეხება პირობითმსჯავრდებულებისა და ყოფილი პატიმრების რესოციალიზაციას და მომზადდა პროექტის "პირობითმსჯავრდებული ახალგაზრდების რესოციალიზაციის ხელშეწყობა გურიის რეგიონში- ფარგლებში რომელსაც ახორციელებს გურიის ახალგაზრდული რესურსცენტრი ევროკავშირის ფინანსური მხარდაჭერით. პროექტის პარტნიორია საქართველოს დემოკრატიული განვითარების კავშირი.

თბილისი. სოციალური მობილიზაციის პროგრამის ფარგლებში, UN Women ორგანიზებით მეორე რეგიონული სემინარი გაიმართა. მას პოსტსაბჭოთა სივრცეში მოქმედი ქალთა ორგანიზაციების წარმომადგენლები ესწრებოდნენ. შეხვედრა დამირა სარტბაევამ გახსნა, რომელიც გაეროს ქალთა ორგანზიაციის აღმოსავლეთ ევროპისა და შუა აზიის რეგიონული პროგრამის დირექტორია.  შეხვედრას საქართველოდან იმ სათემო ორგანიზაციებიდანაც ესწრებოდნენ, რომლებიც პროექტის, ქალები თანასწორობის, მშვიდობისა და განვითარებისათვის ფარგლებში, საკუთარ დასახლებებში გარკვეულ აქტივობებს ახორციელებენ.  შეხვედრაში მონაწილეობას ყირგიზეთიდან, მოლდოვასა და უზბეკეთიდანაც იღებდნენ. შეხვედრის მთავარი მიზანი იმ გამოცდილებების ერთმანეთისათვის გაზიარებაა, რომლებიც ამ ქვეყნებში მომუშავე ქალთა ორგანიზაციებს დაუგროვდათ. ეს მსგავსი ტიპის მეორე შეხვედრაა. პირველი, დაახლოებით, ორი წლის წინ, სტამბულში შედგა და მას, უმეტესად, გაცნობითი ხასიათი ჰქონდა. როგორც ორგანიზატორები აღნიშნავენ, შეხვედრები კვლავ გაგრძლედება. წყარო: ginsc.net

თბილისი. გერმანიის კარიტასის საერთაშორისო ურთიერთობათა დეპარტამენტის რედაქტორი მონიკა ჰოფმანი ჯანმრთელობის და სოციალური დაცვის პროგრამას სტუმრობდა. ვიზიტის დროს სტუმარი გაეცნო შინმოვლის პროექტის მუშობას თბილისსა და გორში.  წყარო:ორგანიზაციის გვერდი სოციალურ ქსელში

საერთაშორისო ორგანიზაცია „ფრიდომ ჰაუსმა" 2013 წლის ანგარიში გამოაქვეყნა, სადაც საქართველო მედიის თავისუფლების კუთხით „ნაწილობრივ თავისუფალი" ქვეყნების სიაშია. ანგარიშში აღნიშნულია, რომ საქართველომ წინა წელთან შედარებით მედიის თვისუფლების მხრივ მდგომაროება გაიუმჯობესა. დღევანდელი მდგომარეობა 49 ქულით შეფასდა, შარშან ეს მაჩვენებელი 52 ქულას შეადგენდა.ორგანიზაცია წერს, რომ საქართველოს კონსტიტუციით მედიის თავისუფლება გარანტირებულია და ეს არის რეგიონში ყველაზე პროგრესული კანონმდებლობა ამ მიმართულებით. ანგარიშში აღნიშნულია, რომ ხელისუფლების გავლენა 2012 წლის განმავლობაში შენარჩუნებული იყო კერძო მედიასაშუალებებზე, განსაკუთრებით კი მაუწყებლებზე და ეს გავლენა წინასაარჩევნო პერიოდშიც გრძელდებოდა. ანგარიში წყარო:media.ge

თბილისი. სამოქალაქო განათლებისა და პედაგოგთა გადამზადების პროგრამის ფარგლებში მორიგი ონლაინ კონფერენცია გაიმართა. კონფერენციის სტუმარი იყო სახალხო დამცველი უჩა ნანუაშვილი.   წყარო:სამოქალაქო ინიციატივების გვერდი სოციალურ ქსელში

თბილისი. საქართველოს განვითარების კვლევითი ინსტიტუტმა და კონკურსისთვის შექმნილმა შესაბამისმა კომისიამ ჟურნალისტების კონკურსში გამარჯვებულები გამოავლინა. კონკურსში – „კონკურენციის პოლიტიკა და რეფორმები საქართველოში"  – პირველი ადგილი  ინტერპრესნიუსის ჟურნალისტმა ანა ცხოვებოვამ დაიკავა, მეორე  ადილი, რუსიკო უშიკიშვილი - for.ge, გურიანიუსის ჟურნალისტ თამარ ლეფსვერიძეს მესამე ადგილი ერგო. გამარჯვებულ ჟურნალისტებს გადაეცათ ფულადი ჯილდო. პროექტი განხორციელდა გერმანიის საერთაშორისო თანამშრომლობის საზოგადოების (GIZ) სამართლის პროგრამის ხელშეწყობით. წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა ხულოს მუნიციპალიტეტის გამგეობიდან მიღებული ინფორმაცია გამოაქვეყნა. ვებგვერდზე განთავსდა ინფორმაცია ორგანიზაციის ბალანსის, თანამდებობის პირების პრემიების, თანამშრომლების პრემიების, სახელმწიფო შესყიდვების შესახებ. გამგეობამ უპასუხოდ დატოვა მოთხოვნები 10 დეკემბრის ანგარიშების, ავტოპარკისა და განთავისუფლებული თანამშრომლების შესახებ. სრულად  წყარო: opendata.ge

თბილისი. საჯარო მოხელეთა გადამზადების პროექტის ფარგლებში, რომელიც ხორციელდება USAID-ის დემოკრატიული მმართველობისპროგრამის ინიციატივითა და დაფინანსებით, კონსულტაციის და ტრენინგის ცენტრმა დაიწყო ტრენინგების ციკლის ჩატარება. პირველი ტრენინგი ადამიანური რესურსების მართვაში ჩატარდება 3-5 ივლისს. საერთო ჯამში, კონსულტაციის და ტრენინგის ცენტრში, 900 -მდე მოხელე გაივლის ტრენინგებს ადამიანური რესურსების მართვის, პრეზენტაციის უნარებისა და წერილობით კომუნიკაციის თემებზე . წყარო:ტრენინგებისა და კონსულტაციიბის ცენტრის გვერდი სოციალურ ქსელში

იმერეთი. წითელი ჯვრის საზოგადოებამ 11-14 და 25-26 ივნისს, „სამხრეთ კავკასიაში უსაფრთხო ადგილობრივი თემების განვითარების რეგიონული პროგრამის" ფარგლებში, ლენტეხში, ცაგერში, ამბროლაურში, ონში, ტყიბულსა და საჩხერეში ჩატარდა სიმულაციური ვარჯიშები. ვარჯიშები ითვალისწინებდა მუნიციპალიტეტების კატასტროფებზე რეაგირების გეგმების ამოქმედებას. საქმიანობები განხორციელდა საქართველოს შსს საგანგებო სიტუაციების მართვის დეპარტამენტის წარმომადგენლისა და საქართველოს წითელი ჯვრის საზოგადოების (სწჯს) კატასტროფების მართვის დეპარტამენეტის თანამშრომლების მხარდაჭერით. სიმულაციების განმავლობაში შესაბამისს სამსახურებს მიეცათ სპეციალური დავალებები. დავალებების განაწილების შემდეგ შტაბის წევრები გავიდნენ ველზე, სადაც შექმნილი იყო საველე ოპერატიული ცენტრი და იმიტირებული ხანძრისა და წყალდიდობის ფონზე ჩატარდა პრაქტიკული სიმულაციური ვარჯიშები. შტაბის წევრებმა გამოიძახეს საგანგებო და სასწრაფო დახმარების სამსახურები, ისევე როგორც სწჯს თემის მოხალისეთა კატასტროფებზე მზადების და რეაგირების ჯგუფები. უსაფრხო ადგილებში გაშლილი იყო სწჯს-ის კარვები, სადაც თემის მოხალისეებმა აღმოუჩინეს პირველადი სამედიციო და ფსიქოსოციალური დახმარება „დაზარალებულ" პირებს. თითოეულ მუნიციპალიტეტში ყველა ადგილობრივმა სამსახურმა მოახდინა შესაბამისი რეაგირება თავისი კომპეტენციის ფარგლებში.  წყარო:ორგანიზაციის გვერდი სოციალურ ქსელში

3 ივლისს, 14:00 საათზე, ახალგაზრდა ადვოკატები ბრიფინგს გამართავენ.თემა: პრეზიდენტის გადაწყვეტილებით, ემიგრანტ ქართველებს არჩევნებში მონაწილეობის უფლება ეზღუდებათ.  მისამართი:თბილისი, ვაზისუბნის 7 (ყოფილი გაგარინის მოედნის ტერიტორია) 

3 ივლისს, 12:00 საათზე, საქართველოს განათლებისა და მეცნიერების მინისტრი გიორგი მარგველაშვილი სახელმწიფო უწყებების, არასამთავრობო სექტორისა და საერთაშორისო ორგანიზაციების წარმომადგენლებს სამინისტროში წარუდგენს ახალ პროექტს – განათლების მიღების მეორე შესაძლებლობა სოციალურად დაუცველი, ქცევითი პრობლემების მქონე და სასწავლო პროცესის მიღმა დარჩენილი მოსწავლეებისთვის საქართველოში. მისამართი:თბილისი, უზნაძის 52