იმერეთი. 2 მაისს, ქუთასის №25 საჯარო სკოლის სამოქალაქო კლუბის „არკადიმიას" წევრებმა წყალწითელას მოხუცთა თავშესაფარში მყოფ ბენეფიციარებს ორმაისობა და დამდეგი აღდგომის დღესასწაული მიულოცეს. ტკბილეული, პასქები და სააღდგომოდ კვერცხები გადასცეს. კლუბის წევრებმა მოხუცებისათვის კონცერტი მოაწყვეს შეასრულეს ქართული ხალხური სიმღერები, წაიკითხეს ლექსები. წყარო: ორგანიზაციის გვერდი სოციალურ ქსელში

თბილისი.ორგანიზაცია საქართველოს დემოკრატიული ინიციატივა 1 მაისის აქციის დროს განვითარებულ მოვლენებს ეხმიანება და განცხადებას ავრცელებს. „აქციის მონაწილეთა მხრიდან ინდივიდუალურ შემთხვევებში შესაძლოა მართლაც ჰქონოდა ადგილი სხვადასხვა ადმინისტრაციული სამართალდარღვევათა ჩადენას. თუმცა, იმავდროულად, გავრცელებული ვიდეომასალით იქმნება შთაბეჭდილება, რომ პოლიციელთა ნაწილს ავიწყდებოდა საკუთარი ქმედების მიზანი – ავტოტრანსპორტის სავალი ნაწილის გათავისუფლება – და მათი მოქმედებები ძირითადად ორიენტირებული იყო აქციაში მონაწილე პირების დაკავებაზე", ნათქვამია განცხადებაში. ორგანიზაცია სათანადო უწყებებიდან გამოითხოვს ინფორმაცია და მას შემდეგ გააკეთებს ფაქტის სამართლებლივ ანალიზს. სრულად წყარო: gdi.ge

თბილისი. საერთაშორისო გამჭვირვალობა – საქართველო ეხმაურება შსს–ს ანტიკორუფციული სააგენტოს მიერ სოფლის მეურნეობისა და სახელმწიფო შპს „მექანიზატორის" მაღალი თანამდებობის პირების დაკავებას. „ვფიქრობთ, რომ თანამდებობის პირების კორუფციულ გარიგებებში მონაწილეობისა და საბიუჯეტო თანხების გაფლანგვის ფაქტების გამოვლენა და პრევენცია ნებისმიერი ხელისუფლების პრიორიტეტი უნდა იყოს. მიგვაჩნია, რომ ამ მხრივ საჭიროა კიდევ უფრო ეფექტური მექანიზმების შემუშავება. ერთ-ერთი მნიშვნელოვანი ინიციატივა მამხილებლების დაცვის გარანტიების უზრუნველყოფა იქნებოდა, რაც დადებით ეფექტს იქონიებს სახელმწიფო ანტიკორუფციული პოლიტიკის განხორციელებაზე", ნათქვამია ორგანიზაციის ვებგვერდზე. სრულად წყარო: transparency.ge

კახეთი.თელავში განთლების განვითარების და დასაქმების ცენტრმა პროექტ „საქართველოში ეროვნული ინტეგრაციის განვითარების" ფარგლებში, უპოვართა სახლში დახმარების აქცია მოაწყო. აღნიშნულ აქტივობაში ჩართულები იყვნენ ახალგაზრდა მოხალისეები. ნატალი ზარაფიშვილი–ახალგაზრდული ცენტრის მოხალისე:„ჩვენთვის მნიშვნელოვანია დღეს აქ ყოფნა, რადგან ვეხმარებით ამ საოცარ ადამინებს და ვაკეთებთ ერთ დიდი საქმეს. სამომავლოდ დიდი იმედი მაქვს, რომ შევძლებთ კიდევ მოვაწყოთ ასეთი სასიამოვნო აქტივობები". მერი პაპუნაშვილი–ახალგაზრდული ცენტრის კორდინატორი: „ჩვენმა ორგანიზაციამ ანალოგიური აქცია წინა წელსაც მოაწყო და სწორედ მაშინ მომსახურე პერსონალმა გამოთქვა სურვილი, რომ სწორედ ასეთ სადღესასწაულო დღეებში დავდგომოდით გვერდით ამ ადამიანებს".

იმერეთი.2 მაისს, ქუთაისის ცენტრალურ ბაღში სამეცნიერო–ინტელექტუალურმა კლუბმა „თაობათა დიალოგმა" და ქუთაისის მერიასთან არსებულმა ქუთაისის ახალგაზრდულმა პარლამენტმა ერთობლივი ლუშეს (Loesje) აქცია გამართეს. აქცია პროექტ „ანტიბეტის" ფარგლებში მოეწყო, რომელიც ჩეხური არასამთავრობო ორგანიზაციის ნესეხნუტის მიერ არის დაფინანსებული. აქციის მთავარი მიზანია საზოგადოების ყურადღება არასრულწლოვნების აზარტულ თამაშებში მაღალი მონაწილეობის მაჩვენებლის მიმართ მიქცევა იყო. ლუშე მოკლე ტექსტური შეტყობინებაა, რომელიც მცირე წინადადებისგან შედგება და იგი პოზიტიური მესიჯის მატარებელია. მონაწილეებმა აღნიშნული მესიჯები მოქალაქეებს დაურიგეს და ქალაქში გაავრცელეს. წყარო: ორგანიზაციის გვერდი სოციალურ ქსელში

8 მაისს, 18:00 საათზე ფონდ „ღია საზოგადოება - საქართველოს" ღია გალერეაში ჩატარდება მერაბ მამარდაშვილისადმი მიძღვნილი სემინარი თემაზე „კანტი ავტონომიური თავისუფლების შესახებ". მოხსენებელი ილიას სახელმწიფო უნივერსიტეტის სრული პროფესორი მამუკა ბერიაშვილი. მისამართი: თბილისი, ჭოველიძის 10, ფონდი ღია საზოგადოება საქართველო

თბილისი.არასამთავრობო ორგანიზაციები ეხმიანებიან სისხლის სამართლის საპროცესო კოდექსში შესატან ცვლილებებს და მოუწოდებენ საქართველოს პარლამენტს, უზრუნველყოს საკანონმდებლო დონეზე დაცვის უფლების განხორციელების ეფექტიანი გარანტიების შექმნა. „საქართველოს მთავრობის მიერ ინიცირებული კანონპროექტის თავდაპირველი ვარიანტი ითვალისწინებდა დაცვის ეფექტიანი განხორციელებისათვის აუცილებელ და მნიშვნელოვან გარანტიებს...  საქართველოს პარლამენტმა ორი მოსმენით ზემოაღნიშნული კანონპროექტი მიიღო მნიშვნელოვნად სახეშეცვლილი ფორმით", ნათქვამია განცხადებაში. ხელმომწერი არასამთავრობო ორგანიზაციების აზრით, ამ ფორმით კანონის მიღება ხელს შეუშლის დაცვის უფლების ეფექტიან განხორციელებას, „რაც თავის მხრივ მნიშვნელოვნად დასწევს მართლმსაჯულების განხორციელების ხარისხს ჩვენს ქვეყანაში". განცხადება წყარო: gyla.ge

თბილისი. თავისუფლების საერთაშორისო დღის აღსანიშნავად ევროკავშირის წარმომადგენლობა საქართველოში აცხადებს კონკურსის – ,,ევროკავშირის პრიზი ჟურნალისტიკაში" – მეორე რაუნდს. ევროკავშირის პრიზს ოფიციალურად წარადგენს საქართველოში ევროკავშირის ელჩი ფილიპ დიმიტროვი. ჟურნალისტებსა და დამსწრე საზოგადოებას მიეცემა საშუალება ევროკავშირის წარმომადგენლებთან ერთად დეტალურად განიხილონ კონკურსის პირობები და საპრიზო კატეგორიები. „ევროკავშირის პრიზი ჟურნალისტიკაში" მიზნად ისახავს ქართულ პრესაში, ტელევიზიაში, რადიოსა და სოციალურ მედიაში ისეთი ჟურნალისტური ნაშრომების გამოვლენას, რომლებიც ხელს უწყობენ ევროკავშირის ღირებულებების უკეთ გაგებას, შესრულებულია პროფესიულ დონეზე და დაცულია ჟურნალისტური ეთიკის მაღალი სტანდარტი. კონკურსი საქართველოში პირველად 2012 წელს ჩატარდა. 8 მაისსვე 16:00 საათზე, ევროკავშირის წარმომადგენლობა საქართველოში სასტუმრო „ამბასადორიში" გამართავს დისკუსიას თემაზე ჟურნალისტური ეთიკის მთავარი ღირებულებები და პრინციპები. შეხვედრის დროს განიხილება კონკურსის შეფასების კრიტერიუმებიც. წყარო: media.ge

თბილისი. პროექტ „დამოუკიდებლობის" ფარგლებში 30 აპრილიდან 18 მაისის ჩათვლით პოლონელი სპეციალისტები ფონდ „არი არის" ორგანიზებით მართავენ ტრენინგებს უსინათლო ადამიანებისათვის სივრცითი ორიენტაციის სწავლების შესახებ. რაც ითვალისწინებს უსინათლო ადამიანებისათვის სივრცითი ორიენტაციის სწავლებას, სმენის გამოყენებას ორიენტაციის დროს და ბინაურალური ჩანაწერების მომზადებას, შეხებითი რუკების მომზადებას. პოლონელ სპეციალისტებს შორის არიან უსინათლო და მცირემხედველი ადამიანები, რომელთა გამოცდილებაც მნიშვნელოვანია უსინათლოებისთვის. ბინაურალური ჩანაწერები პოლონურმა ფონდმა „არი არიმ" და არასამთავრობო ორგანიზაცია „მარიანიმ" ერთობლივად მოამზადეს. მასში შესულია თბილისის სხვადასხვა ქუჩაზე, მეტროსადგურებში, ასევე ღირსშესანიშნავ ადგილებზე გაკეთებული ჩანაწერები. წყარო: არასამთავრობო ორგანიზაცია მარიანის გვერდი სოციალურ ქსელში

კახეთი.თელავის დემოკრატიული ჩართულობის ცენტრში არასამთავრობო ორგანიზაციამ „თანადგომამ" ჩაატარა  ტრენინგი, რომელიც ითვალისწინებდა რეპროდუქციული ჯანმრთელობისა და ნარკომანიის პრევენციას. ასევე მცირე საოჯახო ტიპის ბავშვთა სახლებში მცხოვრებ ახალგაზრდებთან ურთიერთობის პროცესის გაუმჯობესებას. შეხვედრას ესწრებოდნენ სპეციალურად შერჩეული მიზნობრივი ჯგუფის წარმომადგენლები. ტრენინგის მონაწილე ია კლდიაშვილი: „ტრენინგი შეეხებოდა რეპროდუქციულ ჯანმრთელობას.  ჩვენ აქ თავდაპირველად გავიარეთ გადამზადება მაღალი ხარისხის მენეჯერებად. ეს ყველაფერი მნიშვნელოვანია რათა გავაუმჯობესოთ ჩვენი კომუნიკაციის მეთოდები მცირე საოჯახო ტიპის სახლებში მცხოვრებ ახლგაზრდებთან".

თბილისი. საჯარო პოლიტიკის, ადვოკატირებისა და სამოქალაქო საზოგადოების განვითარების პროგრამის ფარგლებში, აღმოსავლეთ–დასავლეთის მართივს ინსტიტუტმა ადვოკატირების შესახებ სოციალური ფოტო კოლაჟი გაავრცელა. სიტყვა „ადვოკატირება" ხშირად დაბნეულობას იწვევს და სხვადასხვაი ურიდიულ ტერმინთან ასოცირდება, თუმცა მისი მნიშვნელობა სრულიად სხვაა, აღნიშნულია პროგრამის გვერდზე სოციალურ ქსელში, ინსტიტუტმა ამ კუთხით პარტნიორების გამოცდილება შესთავაზა საზოგადოებას. კამპანიაში მონაწილეობას იღებენ და თავიანთ გამოცდილებას უზიარებენ საზოგადოებას: ინფორმაციის თავისუფლების განვითარებისინსტიტუტის, ეკონომიკური პოლიტიკის კვლევის ცენტრის, უსაფრთხო სივრცის, სიდას, სოციალური ფოტოგრაფიის ფონდ კავკასიის, რადარამის, საერთაშორისო გამჭვირვალობა – საქართველოს, მრავალეროვანი საქართველოს, მწვანე ალტერნატივის, სამოქალაქო საზოგადოების ინსტიტუტის წარმომადგენლები. რა არის ადვოკატირება? წყარო: პროგრამის გვერდი სოციალურ ქსელში

არასამთავრობო ორგანიზაცია  „ფრიდომ ჰაუსმა" (Freedom House) პრესის თავისუფლების 2013 წლის რეიტინგი გამოაქვეყნა. იგი მსოფლიოში პრესის მდგომარეობას ასახავს. რეიტინგში საქართველოს მდგომარეობა 15 პუნქტით გაუმჯობესდა და 111-ე ადგილიდან 96 ადგილზე გადაინაცვლა. წყარო: media.ge

იმერეთი. 2 მაისს, 2013 წლის ახალგაზრდული პარლამენტის პირველი სხდომას მართავს ახალგაზრდებს საქართველოს პარლამენტის თავმჯდომარე დავით უსუფაშვილი და პარლამენტის უმრავლესობისა და უმცირესობის წევრები უმასპინძლებენ. ახალგაზრდული პარლამენტის სხდომა დაესწრებიან დიპლომატიური კორპუსის, გაეროსა და სხვა საერთაშორისო ორგანიზაციების წარმომადგენლები. 2013 წლის ახალგაზრდული პარლამენტის მუშაობისთვის 100 ახალგაზრდა შეირჩა, მათ შორის სამოქალაქო საზოგადოების ინსტიტუტის სამი თანამშრომელი: თამარ ბოჭორიშვილი, ნინო მღვდელაძე (სტაჟიორები), ქეთი ფოტოვა (სი–ეს–აის ბათუმის ფილიალი).

აჭარა. 1 მაისს, ბათუმის დემოკრატიული ჩართულობის ცენტრის ინიციატივით საჯარო დისკუსია გაიმართა, სადაც დამსწრე საზოგადოებამ  ტექნოლოგიური უნივერსიტეტის შენობის შემდგომ ბედზე იმსჯელა. ბათუმის ბულვარის ცენტრალურ შესასვლელში მდებარე შენობის ბედი ოფიციალურად საქართველოს ეკონომიკის სამინისტრომ უნდა გადაწყვიტოს. შენობის მესაკუთრეობის სურვილი უკვე გამოთქვა ბათუმის საკრებულოს თავმჯდომარემ, იგი შენობის გადაცემას ბათუმის მერიისთვის გეგმავს. სამოქალაქო მრჩეველთა საბჭოს მიერ ჩატარებულმა გამოკითხვამ სოციალურ ქსელში  აჩვენა რომ საზოგადოების დიდი ნაწილი ეწინააღმდეგება აღნიშნული შენობის მერიისთვის გადაცემას. ხანგრძლივი მსჯელობის  შემდეგ დისკუსიის მონაწილეები იმ დასკვნამდე მივიდნენ, რომ შენობის  ბედი საზოგადოებამ უნდა გადაწყვიტოს. აუცილებელია, საკითხის განხილვაში, საზოგადოების ყველა ფენის წარმომადგენელი იყოს ჩართული.

თბილისი. ადამიანის უფლებების სწავლებისა და მონიტორინგის ცენტრი 1 მაისის დემონსტრაციის შემდეგ მიმდინარე მოვლენებს ეხმაურება და განცხადებას ავრცელებს, „ცენტრი გამოხატავს შეშფოთებას დემონსტრანტების მიმართ გამოყენებული არაპროპორციული ძალის გამო. მედია საშუალებების მიერ გავრცელებულ კადრებში ჩანს, რომ ცალკეულ შემთხვევებში დაკავების, როგორც უკანონო ქმედების აღკვეთის ფორმის გამოყენება, თავისთავად წარმოადგენდა არაპროპორციულ საშუალებას.", ნათქვამია განცხადებაში. ცენტრი მოუწოდებს საქართველოს შინაგანსაქმეთა სამინისტროს, მისცეს ადეკვატური შეფასება პოლიციის თანამშრომლების მიერ განხორციელებულ ქმედებებს და გამოიყენოს პასუხისმგებლობის შესაბამისი ზომა. ადამიანის უფლებების სწვალებისა და მონიტორინგის ცენტრი გეგმავს აღნიშნული ფაქტის დეტალურ შესწავლას და უახლოეს მომავალში საზოგადოებას წარუდგენს ანგარიშს. სრულად წყარო: ცენტრის გვერდი სოციალურ ქსელში

იმერეთი. ქუთაისის ახალაგზრდული ცენტრი 2 მაისობის დღესასწაულს აღნიშნავს. 2 მაისს - ქალაქის დღის აღნიშვნას საფუძველი საუკუნის წინ „გვირილობის" დღესასწაულმა ჩაუყარა. XX საუკუნის დასაწყისში, ამ დღეს გიმნაზიელი გოგონები, ბულვარში სეირნობის დროს გვირილებს ყიდდნენ. მათი მყიდველი, რომელსაც შეძენილ გვირილას გოგონები მკერდზე უმაგრებდნენ, ავტომატურად საქველმოქმედო აქციის მონაწილე ხდებოდა, რადგან აღებული შემოწირულობა ტუბერკულოზით დაავადებული ადამიანების მკურნალობას ხმარდებოდა. ამ ტრადიციას საფუძველი სილამაზის დედოფლად აღიარებულმა, ვექილ ჩიქოვანის მეუღლე საშა ჩიქოვანმა ჩაუყარა. წყარო: ქუთაისის ახალაგზრდული ცენტრი

სამცხე-ჯავახეთი. 26-29 აპრილს, ბაკურიანში, „სამოქალაქო ინტეგრაციისა და ეროვნებათშორისი ურთიერთობების ცენტრმა" (CCIIR) პროფესიულ გაცვლით პროგრამაში მონაწილე მასწავლებლებისთვის საერთო საინფორმაციო ტრენინგები ჩაატარა. პროგრამის მიზანია ხელი შეუწყოს არაქართულენოვანი სკოლების დაწყებითი კლასის მასწავლებლების პროფესიულ განვითარებას და საქართველოს ქართულენოვანი და არაქართულენოვანი სკოლების თანამშრომლობას. პროგრამის ფარგლებში ეთნიკური უმცირესობების დაწყებითი კლასების 40 მასწავლებელი 1 თვით გაემგზავრა თბილისისა და საქართველოს სხვადასხვა რეგიონის სკოლებში. ამ პერიოდის განმავლობაში სომეხი და აზერბაიჯანელი მასწავლებლები ქართულ სკოლებში დაწყებითი კლასის ქართველ მასწავლებელთან ერთად იმუშავებენ. გაცვლითი პროგრამა „ურთიერთთანამშრომლობა ქვემო ქართლის, სამცხე-ჯავახეთისა და საქართველოს სხვა რეგიონების მასწავლებლებს შორის" დაფინანსებულია ეუთოს ეროვნული უმცირესობების უმაღლესი კომისრის ოფისის მიერ.

2 მაისს, 12:00 საათზე, არასამთავრობო ორგანიზაციები სისხლის სამართლის საპროცესო კოდექსში შესატან ცვლილებებთან დაკავშირებით გამართავენ პრესკონფერენციას. მისამართი: თბილისი, კონსტიტუციის 42-ე მუხლის ახალ ოფისში.

2 მაისს, 15:00–20:00 საათზე, ორგანიზაცია „ვიმეგობროთ" იწვევს ყველას უსინათლო და მცირემხედველ ბავშვთა და მათ მეგობართა მიერ დამზადებული ხელნაკეთი ნივთების გამოფენა–გაყიდვაზე. მისამართი: თბილისი. კოსტავას 38, კინოთეატრი „ამირანი".

2 მაისს, 12:00 საათზე, ფონდი „ღია საზოგადოება – საქართველო" და „ეკონომიკური პოლიტიკის კვლევის ცენტრი" გამართავს ახალი ანგარიშის პრეზენტაციას. ანგარიშის სახელწოდება – „საქართველოს ეკონომიკივს პერსპექტივა – 2012 წლის მიმოხილვა და 2013 წლის მთავარი გამოწვევების ანალიზი და რეკომენდაციები". მისამართი: თბილისი, სასტუმრო თბილისი მარიოტი

თბილისი.საია 1 მაისს, სტუდენტების მიერ ორგანიზებული მანიფესტაციისას განვითარებულ მოვლენებს ეხმაურება და განცხადებას ავრცელებს. „ამ დროისათვის გავრცელებული ინფორმაცია აჩენს ეჭვებს, რომ ცალკეულ შემთხვევებში პოლიციელების მხრიდან ადგილი ჰქონდა არაპროპორციული ძალის გამოყენებას", – აღნიშნულია განცხადებაში. ორგანიზაცია აგრძელებს ფაქტის დეტალურ შესწავლას და მოუწოდებს შესაბამის ორგანოებას შეისწავლონ ფაქტები და მოახდინონ ჯეროვანი რეაგირება. სრულად წყარო: gyla.ge

თბილისი.ინფორმაციის თავისუფლების განვითარების ინსტიტუტმა გურიის გუბერნატორის ადმინისტრაციიდან მიღებული საჯარო ინფორმაცია გამოაქვეყნა. დაინტერესებულ პირებს შეუძლიათ გაეცნონ ინფორმაციას პრემიების, მოქმედი აშტატო ნუსხისა და თანამდებობრივი სარგოს, ბიუჯეტის, ინფორმაციის გაცემის ანგარიშების, ავტოპარკის ხარჯების და 2012 წლის 20 ოქტომბრიდან გათავისუფლებული თანამშრომლების შესახებ. სრულად წყარო: opendata.ge