თბილისი. 1 მაისს ფონდ „ღია საზოგადოება – საქართველოს" ოფისში გაიმართა თვითმმართველობის მიმდინარე რეფორმის საზოგადოებრივი საბჭოს სამდივნოს და ახალი ვებგვერდის – www.droa.ge  – პრეზენტაცია. პრეზენტაციას ესწრებოდნენ ხელისუფლების, საერთაშორისო და საზოგადოებრივი ორგანიზაციების წარმომადგენლები. „თვითმმართველობის დროა" – ამ დევიზით შეიქმნა მრჩეველთა საზოგადოებრივი საბჭოს სამდივნო, რომლის მიზანია თვითმმარველობის მიმდინარე რეფორმის ხელშეწყობა და რეფორმაში ჩართული მონაწილეების მუშაობის კოორდინაცია. მრჩეველთა საზოგადოებრივი საბჭოს სამდივნო აშშ–ს განვითარების სააგენტოს და მართვის საერთაშორისო სისტემის მხარდაჭერით შეიქმნა. პროექტს ახორციელებს ფონდი „ღია საზოგადოება – საქართველო". სამდივნოს ფუნქციაა უზრუნველყოს ინფორმაციის დროული და ადეკვატური მიწოდება და გაცვლა თვითმმართველობის რეფორმის პროცესში ჩართულ მონაწილეებს შორის. რეგიონული თვითმმართველობისა და ინფრასტრუქტურის მინისტრის ბრძანებულების საფუძველზე უკვე შექმნილია დამოუკიდებელი ორგანო – ადგილობრივი თვითმმართველობის მრჩეველთა საბჭო და სამუშაო ჯგუფები. სწორედ მათ შორის ინფორმაციის გაცვლა და რეკომენდაციების მიწოდება ევალება მრჩეველთა საზოგადოებრივი საბჭოს ახლადშექმნილ სამდივნოს. ამ ინფორმაციას სამდივნო, ასევე გადასცემს რეფორმის პროცესში ჩართულ აღმასრულებელ და საკანონმდებლო ორგანოს წევრებს, რაც საბოლოო ჯამში რეფორმის გამჭვირვალე მიმდინარეობას უზრუნველყოფს. ვებგვერდზე  www.droa.ge – დაინტერესებულ პირებს შესაძლებლობა აქვთ გაეცნონ რეფორმის შესახებ ყველა საჭირო ინფორმაციას.

თბილისი. მშვიდობის, დემოკრატიის და განვითარების კავკასიური ინსტიტუტის ორგანიზებით და ევროპის საბჭოს ფინანსური მხარდაჭერით ეწყობა სტუდენტური დებატები თემაზე: სამართლიანი არჩევნების როლი დემოკრატიული განვითარების პროცესში. სტუდენტური დებატები ჩატარდება საქართველოს ხუთ საუნივერსიტეტო ქალაქში: ახალციხე, ბათუმი, თბილისი, თელავი, ქუთაისი. ყოველ ქალაქში გამოვლინდება გამარჯვებული გუნდი, რომლის წევრებს დააჯილდოვებენ და მიიწვევენ საზაფხულო სკოლაში 2013 წლის აგვისტოში. დებატების მიზანია სტუდენტებს შორის არჩევნების თემაზე მსჯელობის წახალისება; სამოქალაქო მონაწილეობისა და არგუმენტირებული საჯარო დისკუსიის პოპულარიზაცია; ახალგაზრდებში არგუმენტირებული დისკუსიის უნარ-ჩვევების განვითარება. დებატებში მონაწილეობის მიღება შეუძლიათ ბაკალავრიატის სტუდენტებს. მასში მონაწილეობის მსურველებს სრული ინფორმაციის გაცნობა და რეგისტრაციის ფორმის ნახვა შეუძლიათ ვებ-გვერდზე www.participare.ge ან www.cipdd.org. სრულად წყარო: ინსტიტუტის გვერდი სოციალურ ქსელში

სვანეთი.  კონსულტაციებისა და ტრენინგების ცენტრის პროექტის  „ზემო სვანეთში ადგილობრივი ინიციატივების ხელშეწყობა ახალგაზრდებისა და ორგანიზებული ჯგუფების გაძლიერების მეშვეობით" ფარგლებში ყოველწლიურად ტარდება საგრანტო კონკურსი სვანეთის მუნიციპალიტეტში მომუშავე არასამთავრობო ორგანიზაციებისა და ახალგაზრდებისთვის. საგრანტო კონკურსის მიზანია ხელი შეუწყოს ზემო სვანეთში მომუშავე სამოქალაქო ორგანიზაციების გაძლიერებას და ზემო სვანეთის თემების გააქტიურება. ასევე მცირე გრანტები ხელს უწყობს საზოგადოებრივი საჭიროებების მოგვარებაში ახალგაზრდების ჩართულობას და ამ მიზნით მხარს უჭერს ახალგაზრდულ ინიციატივებს. 2013 წლის რაუნდში დაფინანსდა 4 პროექტი, რომლებიც ადგილობრივისამოქალაქო ორგანიზაციების მიერ განხორციელდება დაბა მესტიაში, ლატალსა და ჭუბერში. წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველო, თავდაცვის სამინისტროს ტენდერებით დაინტერესდა, 23 აპრილს გამოაქვეყნა ბლოგპოსტი „თავდაცვის სამინისტროს ტენდერები და პარლამენტარ ირინა იმერლიშვილის ოჯახის ინტერესები? მასობრივი ინფორმაციის საშუალებებში ამ საკითხის ირგვლივ დაინტერესების შემდეგ, გამჭვირვალობამ მოიძია დოკუმენტები და საზოგადოებას გააცნო იგი. დღეს გამჭვირვალობა გამოაქვეყნა ამ საკითხის ირგვლივ ახალი ინფორმაცია, რომ „ფუდ ლაინ ჯორჯია" (კომპანიის დირექტორი პარლამენტარ ირინა იმერლიშვილის მეუღლეა) თავდაცვის სამინისტროს ტენდერს ვერ მიიღებს და დისკვალიფიცირებულია დოკუმენტაციის სატენდერო პირობებთან შეუსაბამობის გამო. წყარო: ორგანიზაციის გვერდი სოციალურ ქსელში

იმერეთი.არასამთავრობო ორგანიზაციის „ლიბერალური კლუბის" დახმარებით ქუთაისის საქალაქო სასამართლოში, 27 აპრილს, ანდრია რაზმაძის სახელობის 41 საჯარო სკოლის მეცხრეკლასელებთან ერთად, ჭაბუა  ამირეჯიბის რომანის „დათა თუთაშხიას" მიხედვით იმიტირებული სასამართლო პროცესი გამართეს. ღონისძიების მიმდინარეობისას მსჯელობა ეხებოდა ნაწარმოების ერთ-ერთი მთავარი გმირის არქიფო სეთურის მიერ, სხვა პერსონაჟების უფლებების დარღვევას. სხდომის დასრულებისას დამწრე პირებმა და მოსწავლეებმა  პროცესი დადებითად შეაფასეს და მსგავსი ღონისძიებების ხშირად გამართვის სურვილი გამოთქვეს. წყარო: ლიბერალური კლუბის გვერდი სოციალურ ქსელში

თბილისი.ინფორმაციის თავისუფლების განვითარების ინსტიტუტმა სასაზღვრო პოლიციიდან მიღებული საჯარო ინფორმაცია გამოაქვეყნა. დაინტერესებულ პირებს შეუძლია მიიღოს ინფორმაცია უწყების თანამშრომლების პრემიების, ბიუჯეტის ბალანსის, საჯარო ინფორმაციის გაცემის ანგარიშების, გათავისუფლებული თანამშრომლების, საშტატო ნუსხი, ავტოპარკისთვის გაწეული ხარჯების და დაფინანსებული ღონისძიებების შესახებ. სრულად წყარო: opendata.ge

თბილისი. 2 მაისს, ქუთაისში, საქართველოს პარლამენტის შენობაში ოფიციალურად გაიხსნება „საქართველოს ახალგაზრდული პარლამენტის" სხდომა. ამის შესახებ, 30 აპრილს „საქართველოს ახალგაზრდა პარლამენტარების" პროექტის ხელმძღვანელმა თეონა ლავრელაშვილმა და რობაქიძის სახელობის უნივერსიტეტის სამართლის დოქტორმა დევი ხვედელიანმა პრესკონფერენციაზე განაცხადეს. ახალგაზრდული პარლამენტის წევრებს მასპინძლობას გაუწევს საქართველოს პარლამენტის თავმჯდომარე დავით უსუფაშვილი. წყარო: საქართველოს ახალგაზრდული პარლამენტის გვერდი სოციალურ ქსელში

თბილისი. 30 აპრილს მედიის მონიტორინგის მორიგი პროექტის პრეზენტაცია გაიმართა. ოთხი არასამთავრობო ორგანიზაცია 2013 წლის მაისიდან საპრეზიდენტო არჩევნების წინასაარჩევნო პერიოდში ორმოცამდე მედიასაშუალების მუშაობას დააკვირდება. მედიის მონიტორინგის პროექტი ევროკავშირისა და გაეროს განვითარებისლ პროგრამის მიერ ფინანსდება და მას არასამთავრობო ორგანიზაციები – სამართლიანი არჩევნებისა და დემოკრატიის საერთაშორისო საზოგადოება, კავკასიის კვლევითი რესურსების ცენტრი, ინტერნიუსი და სამოქალაქო განვითარების ინსტიტუტი განახორციელებენ. შეხვედრას ესწრებოდა ევროკავშირის ელჩი საქართველოში, ფილიპ დიმიტროვი. მან ხაზი გაუსვა მედიის მონიტორინგის მნიშვნელობას. მონიტორინგის შედეგების ნახვა დაინტერესებულ პირებს შეეძლებათ შემდეგ ვებგვერდებზე: www.mediamonitor.ge და www.facebook.com/mediamonitor. წყარო: media.ge

თბილისი. საქართველოს ახალგაზრდა მწვანეები უერთდებიან 1 მაისის მშრომელთა გაძლიერებისა და ერთობის საერთაშორისო დღეს და ამის თაობაზე განცხადებას ავრცელებენ. „ქართულ შრომის ბაზარზე არსებული სიტუაციიდან გამომდინარე, რაც გამოიხატება იმაში, რომ დასაქმებულ პირთა უფლებები ყოველდღიურად ირღვევა და არც განახლებული შრომის კოდექსი უზრუნველყოფს დაქირავებულთ ღირსეული სამუშაო პირობებით, საქართველოს ახალგაზრდა მწვანეები ვუერთდებით 1 მაისის მშრომელთა გაძლიერებისა და ერთობის საერთაშორისო დღეს", ნათქვამია განცხადებაში სრულად წყარო: georgianyounggreens.wordpress.com

შიდა ქართლი. „გორის ინვალიდთა კლუბთან" არსებულმა ახალგაზრდულმა ცენტრა, 29 აპრილს, ინტელექტუალური თამაშის რა? სად? როდის? –მეორე ტური გამართა თამაშში მონაწილება 6 გუნდმა მიიღო და მათგან ნახევარფინალში მხოლოდ 5 გადავიდა. შეხვედრა საკმაოდ დაძაბულად და საინტერესოდ მიმდინარეობდა. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი" . წყარო: სამოქალაქო აქტივიზმის ახალგაზრდული ქსელის გვერდი სოციალურ ქსელში

გურია.ოჯახური ძალადობის მსხვერპლთა სარეაბილიტაციო ცენტრ „აისის" ინიციატივით გამწვანების აქცია მოეწყო ჯუმათის საჯარო სკოლის ეზოში. აქციაში მონაწილეობდნენ ცენტრის თანამშრომლები და საჯარო სკოლის მასწავლებლები, მოსწავლეები. მათ დარგეს ნეკერჩხლის ხის ნერგები. აქციის მონაწილეებს დაურიგდათ ოჯახური ძალადობის თემაზე ცენტრის მიერ მომზადებული სხვადასხვა სახის საინფორმაციო მასალა. წყარო: გურიის აგრობიზნესცენტრი

იმერეთი. ქუთაისის ახალგაზრული ცენტრის წევრებისთვის მოეწყო ჯორჯ მილერის ფილმის „ლორენცოს ზეთის" ჩვენება. ფილმი პატარა ბიჭის ლორენცოს ისტორიაზეა აგებული, რომელიც იშვიათი დაავადებით არის დაავადებული, მისი მშობლები შვილის გადასარჩენად მსოფლიო დონის სემინარებს აწყობენ და საბოლოოდ მიაგნებენ ზეთს, რომელსაც მედიცინაში ლორენცოს ზეთი ეწოდა. ახალგაზრდული ცენტრის წევრებმა ფილმების დასრულების შემდეგ გამოთქვეს საკუთარი შეხედულებები ფილმის შესახებ. ფილმის ჩვენება ორგანიზებული იქნა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: ქუთაისის ახალგაზრდული ცენტრის გვერდი სოციალურ ქსელში

1 მაისს, 18:30 საათზე, გაიმართება ახალი ეკონომიკური სკოლის საჯარო დისკუსიების ციკლიდან, ლექცია–დისკუსია თემაზე: ადამიანის უფლებები: რეალური თუ მოჩვენებითი გარანტიები. მომხსენებელი გიორგი ჩიქოვანი. მისამართი: თბილისი, გუდიაშვილის 7, საქართველოს პარლამენტის ეროვნული ბიბლიოთეკის საკონფერენციო დარბაზი.

1 მაისს, 15:00 საათზე, ბათუმის დეოკრატიული ჩართულობის ცენტრი გამართავს საჯარო შეხვედრას ტექნოლოგიურ უნივერსიტეტის შენობაში ქალაქ ბათუმის მერიის განთავსებასთან დაკავშირებით. მისამართი: ბათუმი, ფარნავაზ მეფის 62-64, დემოკრატიული ჩართულობის ცენტრი

1 მაისს, 13:00 საათზე ინფორმაციის თავისუფლების განვითარების ინსტიტუტი გამართავს დისკუსიას თემაზე: საჯარო დაწესებულებების საზოგადოებასთან ურთიერთობის სტრატეგია. მისამართი: თბილისი, მარჯანიშვილის 5, აღმოსავლეთ–დასავლეთის მართვის ინსტიტუტი

1 მაისს, 13:00 საათზე გაიმართება თვითმმართველობის მიმდინარე რეფორმის საზოგადოებრივი საბჭოს სამდივნოს და ახალი ვებ გვერდის – WWW.DROA.GE – პრეზენტაცია. მისამართი: თბილისი, ჭოველიძის 10, ფონდ ღია საზოგადოება – საქართველოს ოფისი

თბილისი. საქართველოს პარლამენტი განიხილავს მთავრობის მიერ ინიცირებულ კანონპროექტს სისხლის სამართლის საპროცესო კოდექსში ცვლილების შეტანის შესახებ. იგი ითვალისწინებს მნიშვნელოვან ცვლილებებს, რომლებსაც არსებითი გავლენა ექნებათ სისხლის სამართალწარმოებასა და მართლმსაჯულებაზე. საზოგადოებრივი ორგანიზაციები მიმართავენ საქართველოს პარლამენტს გამოიყენოს მის ხელთ არსებული საშუალება და „არ დაუშვას კანონპროექტის ინიცირებული ვერსიის გაუარესება და იმუშაოს კანონპროექტის ინიცირებული ვერსიის გაუმჯობესების მიმართულებით". სრულად წყარო: gyla.ge

აჭარა. 30 აპრილს, საქართველოს ახალგაზრდა იურისტთა ასოციაციის ბათუმის ფილიალმა  კვლევის – „აჭარის ავტონომიური რესპუბლიკის საკუთრებაში არსებული ქონების ერთ ლარად გასხვისების მონიტორინგის" – შედეგების პრეზენტაცია გამართა. მონიტორინგის შედეგად გამოიკვეთა, რომ 1 ლარად გასხვისების შესახებ გაფორმებული ხელშეკრულებების ნაწილი მოკლებული იყო სათანადო ეფექტური კონტროლის მექანიზმებს. ასევე ადგილი ჰქონდა ხელშეკრულების პირობების ხშირ ცვალებადობას. ხელშეკრულებების ნაწილის შემთხვევაში სახელშეკრულებო პირობები ბუნდოვანია. მონიტორინგი განხორციელდა საიას აჭარის ფილიალის მიერ, კოალიციურ პროექტს - „ელიტური კორუფციისა და ბიზნესზე სახელმწიფო ზეწოლის შემთხვევების გამოვლენა", რომელიც დაფინანსებულია ფონდი „ღია საზოგადოება საქართველოს" (OSGF ) მიერ. სრულად წყარო: gyla.ge

თბილისი. საზოგადოებასთან ურთიერთიერთობის საინფორმაციო რესურს ცენტრმა „გააცანი ამერიკა შენს სკოლას” პროექტის მონაწილეებს უმასპინძლა. პროექტი ამერიკასთან მეგობრობის ახალგაზრდულმა კლუბმა განახორციელა. სხვადასხვა უნივერსიტეტის 76 სტუდენტმა თბილისის და რეგიონების 76 სკოლაში ამერიკის შეერთებული შტატების შესახებ პრეზენტაციები მოაწყო. ახალგაზრდული კლუბის და პროექტის მონაწილეები მაიკლ ტერნერს, საზოგადოებასთნ ურთიერთობის განყოფილების უფროსს, ჯერემი რიჩართს, პრეს ატაშეს და ლოლა პეტროვას, კულტურის ატაშეს შეხვდნენ. პროექტის მონაწილეებს საქართველოში საელჩოს მისიის შესახებ თავად თანამშრომლებმა სტუდენტები ამერიკის საინფორმაციო ცენტრის რესურსებს გაეცნენ და ვიზიტის ბოლოს საელჩო დაათვალიერეს. წყარო: აშშ–ს საელჩოს გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) კახეთის გუბერნატორის ადმინისტრაციიდან მიღებულ საჯარო ინფორმაციას აქვეყნებს. დაინტერესებულ პირებს შეუძლიათ გაეცნონ ინფორმაციას პრემიების, მოქმედი საშტატო ნუსხისა და თანამდებობრივი სარგოს შესახებ, ასევე ბიუჯეტის, საჯარო ინფორმაციის გაცემის ანგარიშების, ავტოპარკის ხარჯების, დაფინანსებული ღონისძიებების შესახებ. სრულად წყარო: opendata.ge

თბილისი. საქართველოს რეფორმების ასოციაცია იწყებს პროექტს www.factcheck.ge, რომლის მიზანია პოლიტიკოსთა მიერ გაკეთებული განცხადებების შემოწმება ფაქტობრივი უზუსტობების დადგენის მიზნით. აღნიშნული პროექტი დაფუძნებულია ისეთ საერთაშორისო მაგალითებზე, როგორიცაა wwww.factcheck.org და www.politifact.com (2009 წლის პულიცერის პრემიერ პრიზიორი).  მიზნის მისაღწევად იგეგმება პოლიტიკოსთა გამოსვლების მონიტორინგი და ფაქტების შემოწმება საპარლამენტო და საპრეზიდენტო დებატების განმავლობაში. წყარო: საქართველოს რეფორმების ასოციაციის გვერდი სოციალურ ქსელში

კახეთი.თელავის დემოკრატიული ჩართულობის ცენტრში შეზღუდული შესაძლებლობის მქონე პირთა საკითხებზე მომუშავე საკოორდინაციო საბჭოს წევრი არასამთავრობო ორგანიზაციების და საბჭოს სამდივნოს წარმომადგენლების მონაწილეობით შეხვედრა გაიმართა. მომუშავე საკოორდინაციო საბჭოს წევრის, მაია ბიბილეიშვილის თქმით, დღეს როდესაც საქართველო მიისწრაფის გახდეს დემოკრატიული თანამეგობრობის ღირსეული წევრი, შეზღუდული შესაძლებლობის მქონე პირთა უფლებების დაცვა სახელმწიფოს ერთ-ერთი უპირატესი მოვალეობაა,  რადგან ყველა სახელმწიფოს სახელი, კულტურა და ღირსება განისაზღვრება იმით, თუ როგორ ექცევა ის შეზღუდული შესაძლებლობების მქონე პირებს. მაია ბიბილეიშვილის თქმითვე, შშმ პირთა თანაბარი შესაძლებლობების უზრუნველყოფის შესახებ 2013-2016 წლების სამთავრობო-სამოქმედო გეგმის შემუშავების პროცესი მიმდინარეობს შშმ პირთა საკითხებზე მომუშავე საკოორდინაციო სახელმწიფო საბჭოს ეგიდით, გაეროს განვითარების პროგრამის (UNDP) ქვეპროექტის „შშმ პირთა საკითხებზე მომუშავე სახელმწიფი საკოორდინაციო საბჭოს მხარდაჭერა" ფარგლებში.