აჭარა. 18 იანვარს, ბათუმის  #2 საჯარო სკოლის სამოქალაქო კლუბის „ბალავარის"  ინიციატივით გაიმართა აქცია „ფრთხილად მატარებელი! დაიცავი უსაფრთხოების წესები!". რკინიგზის გადასასვლებებზე მძღოლებისა და ფეხითმოსიარულეთა არასწორი მოძრაობით გამოწვეულმა უბედურმა შემთხვევებმა მოსწავლეების ყურადღება მიიქცია და შესაბამისი აქციაც დაგეგმეს. მისი მიზანი იყო საზოგადოების ინფორმირება რკინიგზის გადასასვლელზე უსაფრთხო მოძრაობის წესების დაცვის შესახებ. ბათუმის მანთაშევის სარკინიგზო გადასასვლელზე,  კლუბის წევრებმა მოირგეს რკინიგზის გადასასვლელის მორიგის როლი და რკინიგზაზე გადამსვლელ მძღოლებს და ფეხით მოსიარულეებს ბროშურების სახით მიაწოდეს ინფორმაცია უსაფრთხო მოძრაობის წესების შესახებ  და მოუწოდეს მათი დაცვისკენ. აქცია წარმატებით განხორციელდა, ლიანდაგზე მოსწავლეების უსაფრთხოებას აკონტროლებდნენ საქართველოს სალიანდაგო სამმართველოს წარმომადგენლები. სრულად წყარო: civics.ge

თბილისი. საერთაშორისო გამჭვირვალობა საქართველოს ვებგვერდზე გამოქვეყნა 2013 წლის სახელმწიფო ბიუჯეტში, ახალი მთავრობის პრიორიტეტების მიმოხილვა. „2013 წლის სახელმწიფო ბიუჯეტი (ასიგნებები)  2012 წლის ბიუჯეტთან შედარებით 657 მილიონი ლარით (8.1%) იზრდება. 2013 წლის ბიუჯეტი ქვეყნის ახალი მთავრობის პრიორიტეტებს ასახავს, რაც სოფლის  მეურნეობა, ჯანმრთელობა და სოციალური დაცვა და განათლება და მეცნიერება  იქნება. მთავრობამ ამ სამი ახალი პრიორიტეტის განხორციელება 2012 წლის დეკემბერშივე დაიწყო".    პუბლიკაციში ყურადღება გამახვილებულია ბიუჯეტის როგორც პოზიტიურ, ასევე პრობლემურ ასპექტებზე. მას ახლავს რეკომენდაციის ნაწილიც. სრულად წყარო: transparency.ge

თბილისი.„პირველი ნაბიჯი საქართველო" გთავაზობთ სენსორული ინტეგრაციის ინდივიდუალურ პროგრამას განსაკუთრებულის საჭიროებების მქონე ბავშვებისთვის სპეციალურად აღჭურვილ „სენსორულ ოთახში". სენსორული ოთახი აღჭურვილია სპეციალური განმავითარებელი საშუალებებით, სხვადასხვა ვიზუალური და აუდიო ინვენტარით და სათამაშოებით. სენსორული ინტეგრაციის პროგრამის მიზანს წარმოადგენს ბავშვების სმენითი, მხედველობითი, ყნოსვითი, გემოვნებითი და ტაქტილური შეგრძნებებისაგან მიღებული სტიმულაციაზე ადეკვატური რეაქციის დასწავლა და ბუნებრივ გარემოში გამოყენება სრულად წყარო: ორგანიზაციის გვერდი სოციალურ ქსელში

აჭარა. ხანდაზმულთა სოციალური ცენტრში პერიოდულად იმართება საინფორმაციო სემინარები, რომლებიც ხანდაზმულთათვის აქტუალურ თემებს ეხება. 21 იანვარს ჩატარებული სემინარის თემა ჯანმრთელი დაბერების საკითხებს ეხებოდა. სემინარზე საუბარი შეეხო იმ ფაქტორებს,, რომლებიც ხელს უწყობენ ადამიანების დღეგრძელობას: ცხოვრების ჯანსაღი წესი, ბალანსირებული კვება, ზომიერი ფიზიკური აქტივობა და სხვა. სრულად წყარო: ორგანიზაციის გვერდი სოციალურ ქსელში

23 იანვარს, 19:00 საათზე ჰაინრიჰ ბიოლის ფონდის აწყობს საჯარო დისკუსიას – ჟენევის პროცესი და კონფლიქტების მშვიდობიანი  ტრანსფორმაცია: ახალი პოლიტიკური რეალობა. მისამართი: თბილისი, ზოვრეთის 38, ჰაინრიჰ ბიოლის ფონდი

23 იანვარს, 11 საათზე კავკასიის ეკონომიკური და სოციალური კვლევითი ინსტიტუტში  პროექტის  - „V4 С3- ევროინტეგრაციისთვის"  – ფარგლებში გაიმართება შეხვედრა–სემინარი  მედიის წარმომადგენლებისთვის. მისამართი: თბილისი, ირაკლი აბაშიძის 43–15, კავკასიის ეკონომიკური და სოციალური კვლევითი ინსტიტუტის ოფისი

თბილისი.საქართველოს ჟურნალისტური ეთიკის ქარტიის” წევრი ჟურნალისტების ნაწილის მოსაზრებით, ქარტიის წესდებაში ცვლილება უნდა შევიდეს, რის მიხედვითაც ქარტიის საბჭოს წევრს არჩევისას ერთი წლის მანძილზე არ უნდა ჰქონდეს დარღვეული ეთიკის პრინციპები. ამის შესახებ დისკუსია წევრებმა ქარტიის Facebook- ის გვერდზე დაიწყეს. ქარტიის თავმჯდომარის, გიორგი მგელაძის განმარტებით, ამ თემაზე ქარტიის საბჭოს წევრებს არ უმსჯელიათ, თუმცა მისი პირადი მოსაზრებაა, რომ ასეთი ცვლილება, მართლაც შეუწყობს ხელს საბჭოს მიმართ ნდობის გაზრდას. „ჟურნალისტებისთვისაც იქნება სამაგალითო, რომ საბჭოში  არიან ადამიანები, ვისაც ეთიკასთან პრობლემები არ აქვთ” ამბობს მგელაძე. სრულად წყარო:media.ge

თბილისი.„საერთაშორისო გამჭვირვალობა – საქართველო" ყოველკვირეულად უშვებს აუდიო პოდკასტს, სადაც ქვეყნის მთავარ საკანონმდებლო ორგანოში მიმდინარე ყველაზე საინტერესო მოვლენებს მიმოვიხილავთ. პოდკასტის გამოყენება და გავრცელება ნებისმიერ მედიასაშუალებას, ბლოგერს და დაინტერესებულ პირს ჩვენი ნებართვის გარეშე შეუძლია.  21 იანვრის პოდკასტის თემები: პრეზიდენტობის ვადა, მაუწყებლობის შესახებ კანონში ცვლილებები, დებატები აჭარის ტელევიზიის სტატუსზე, ნაფიცი მსაჯულების განსჯადი საქმეების გაზრდა, საბავშვო ბაღები, დასუფთავების გადასახადის საკითხი, სტუდენტების ინიციატივა თსუ-ის სტატუსის შეცვლაზე. საპარლამენტო ამბების პოდკასტი – 21 იანვარი წყარო: transparency.ge

აჭარა. 18 იანვარს, ახალგაზრდულმა ორგანიზაციამ „არტ ვეიმ", პროეტ რე-ანიმაციის ფარგლებში, მორიგი თეატრალიზირებული აქცია გამართა. აქციის მონაწილეებმა ხმოვანი შუქნიშნების იმიტირებით საზოგადოების დიდ ნაწილს  ხმა მიაწვდინეს უსინათლოთა პრობლემების შესახებ. სამინისტროებს, რომელთა უშუალო კომპეტენციაშია შშმ პირების უფლებების დაცვა შედის, მოუწოდეს, რომ კანონი, რომელიც მათ სოციალური მდგომარეობის გაუმჯობესებას გულისხმობს, სრულფასოვნად შესრულდეს. აღნიშნულ აქტივობაში „არტ ვეის" კლუბის წევრების გარდა, ადგილობრივი საზოგადოებრივი ორგანიზაციების წარმომადგენლებიც მონაწილებდნენ.

სამცხე–ჯავახეთი. 18 იანვარს, ახალციხის მუნიციპალიტეტის FACEBOOK-ის ოფიციალურ გვერდზე, პროექტ ,,გამჭირვალე თვითმმართველობის" ფარგლებში,  გაიმართა ახალციხის მუნიციპალიტეტის გამგებლის ბესიკ ხითარიშვილის  ონლაინ–კონფერენცია მოსახლეობასთან. კონფერენციის მსვლელობისას მოქალაქეებს შესაძლებლობა მიეცათ, ერთი საათის განმავლობაში, დაესვათ მათთვის მნიშვნელოვანი შეკითხვები და მიეღოთ კომპეტენტური პასუხები, უშუალოდ მუნიციპალიტეტის გამგებლისაგან. პროექტი „გამჭვირვალე თვითმმართველობა" ხორციელდება არასამთავრობო ორგანიზაცია „დემოკრატ მესხთა კავშირის" მიერ. მისი მიზანია გააადვილოს  თანამშრომლობა თვითმმართველობის წარმომადგენლებსა და მოსახლეობას შორის.

აჭარა. 18 იანვარს, ბათუმის დემოკრატიული ჩართულობის ცენტრში, სამოქალაქო მრჩეველთა საბჭოს ინიციატივით, მემედ აბაშიძის ძეგლის ადგილმდებარეობის შესახებ საჯარო გახილვა მოეწყო.  შეხვედრაზე წარმოდგენილ იქნა მრჩეველთა საბჭოს მიერ ჩატარებული გამოკითხვის შედეგები. კვლევა გულისხმობდა, იმ სავარაუდო ადგილების დადგენას, სადაც ამ საკითხით დაინტერესებული საზოგადოება ისურვებდა ძეგლის გადატანას.  გამომდინარე იქიდან, რომ მოწვეულ სტუმრებს განსხვავებული შეხედულებები ჰქონდათ, განხილვა ცხარე კამათში გადაიზარდა, დამსწრეთა ნაწილი მიიჩნევდა, რომ ძეგლი ბათუმის 6 მაისის პარკში უნდა განთავსდეს, ხოლო მეორე ნაწილი, აღნიშნულ პარკს შეუფერებლად მიიჩნევს. შეხვედრის მონაწილეები საბოლოოდ მივიდნენ იმ აზრამდე, რომ ქალაქში აუცილებელი ჩატარდეს ფართომასშტაბიანი გამოკითხვა და გამოკითხვის პასუხების  მიხედვით კომპეტენტურმა კომისიამ მიიღოს გადაწყვეტილება. შეხვედრას ესწრებოდნენ „არქიტექტორთა საბჭოს" წევრები, საზოგადოებრივი და მედია ორგანიზაციები, აჭარის მწერალთა კავშირი. თვითმმართველი ქალაქი ბათუმის საკრებულოს/ მერიის წარმომადგენლები, აჭარის ა.რ. უმაღლესი საბჭო, სტუდენტები და სხვა დაინტერესებული მოქალაქეები.

თბილისი. 17 იანვარს სასტუმროში „ბეტსში" ოქსფამ დიდი ბრიტანეთის ორგანიზებითა და სოფლის მეურნეობის სამინისტროს ინიციატივით, გაიმართა სასოფლო–სამეურნეო კოოპერტივების მხარდაჭერის შესახებ კანონპროექტის განხილვა. შეხვედრას ესწრებოდნენ სოფლის მეურნეობის მინისტრის მოადგილე დავით შერვაშიძე, სამინისტროს სამართლებრივი დეპარტამენტის,  საზოგადოებრივი და დონორი ორგანიზაციების წარმომადგენლები. სამინისტროს სამართლებრივი დეპარტამენტის ხელმძღვანელის მიერ კანონპროექტის პრეზენტირების შემდგომ გაიმართა ხანგრძლივი დისკუსია კანონპროექტის საბოლოო რედაქციის შესახებ. შეხვედრის შემდეგ, მონაწილეები შეთანმხდნენ, რომ დამატებითი კონსულტაციები, თავდაპირველად, ელექტრონული ფრომით გაგრძელდება, ხოლო კანონპროექტის პარლამენტში წარდგენამდე გაიმართება მსგავსი ტიპის შეხვედრა.

თბილისი. კავკასიის ეკონომიკური და სოციალური კვლევითი ინსტიტუტი (CIESR) 21–23 იანვარს, პროექტის ფარგლებში - „V4 С3-ის ევროინტეგრაციისთვის" - აწყობს საჯარო ლექციების ციკლს საქართველოს სხვადასხვა უმაღლესი სასწავლებლების სტუდენტების, აკადემიური პერსონალისა და მედიის წარმომადგენლებისთვის. საჯარო ლექციის მიზანია უმაღლესი სასწავლებლების სტუდენტებს, და აკადემიურ პერსონალსა და მედიის წარმომადგენლებს მიაწოდოს ინფორმაცია ზემოაღნიშნული პროექტის შესახებ, ასევე „აღმოსავლეთის პარტნიორობის" კონტექსტში საქართველოს სოციალურ-ეკონომიკური პოლიტიკის საკითხები ევროინტეგრაციასთან მიმართებით. „აღმოსავლეთის პარტნიორობაში" საქართველოს მონაწილეობა ქვეყანას მრავალი გამოწვევისა და რეფორმის გატარების აუცილებლობის წინაშე აყენებს. ერთის მხრივ, ჰარმონიზაციის უპრეცენდენტო შესაძლებლობები და, მეორე მხრივ, ამისთვის საჭირო რესურსების აკუმულირება, მიმდინარე პერიოდის მნიშვნელოვანი გამოწვევებია. საჯარო ლექციები ტარდება პროექტის ფარგლებში - „V4 С3-ის ევროინტეგრაციისთვის".  პროექტის ხანგრძლივობა შეადგენს 12 თვეს და ხორციელდება საერთაშორისო ფონდ „ვიშეგრადის" (International Visegrad Fund) ფინანსური მხარდაჭერით.

თბილისი. საქართველოს მცირე და საშუალო საწარმოთა ასოციაციამ, 18 იანვარს,  განცხადება გაავრცელა პრეზიდენტის მიერ გაჟღერებული ინიციატივის – ეკონომიკური დანაშაულის დეკრიმინალიზაციის შესახებ. განცხადებაში ნათქვამია: „ჩვენი ასოციაციის მიერ წელიწადნახევრის წინ დაწყებული იყო კამპანია ამ მოთხოვნით. ასოციაციამ საგადასახადო და სისხლის სამართლის კოდექსების შესაბამისი ანალიზიც ჩაატარა (USAID, EWMI, EPF-ის მხარდაჭერით) და გამოვიდა კონკრეტული რეკომენდაციებით, რაც მიწოდებული იყო ხელისუფლებისთვის ჯერ კიდევ 2011 წელს.  სამწუხაროდ მაშინ არ მოხერხდა ცვლილებების მიღება, ანუ არ აღმოჩნდა საკმარისი ნება ხელისუფლებაში გადაედგათ ეს ნაბიჯი". სრულად 

იმერეთი.ქუთაისის დემოკრატიული ჩართულობის ცენტრში, 18 იანვარს „მაკლეინის ასოციაცია ბავშვებისთვის" ინიციატივით გაიმართა ლექსცია. იგი ინკლუზიური განათლების საკითხებს ეხებოდა. შეხვედრას ესწრებოდნენ დღის ცენტრების, სკოლებისა და საბავშვო ბაგა–ბაღების პედაგოგები. რომლებიც ტრენინგის ფარგლებში შეზღუდული შესაძლებლობების მქონე ადამიანების განვითარებისა და ემოციური სფეროს დარღვევების შესახებ ინფორმაციას გაეცნენ. ტრენინგი ოთხი დღე გაგრძელდება.

თბილისი.  საქართველოში პროექტების განსახორციელებლად ევროკავშირმა 15 ქართული და ევროპული არასამთავრობო ორგანიზაცია შეარჩია. პროექტების ფარგლებში დაგეგმილი ღონისძიებების მიზანი არის სამოქალაქო საზოგადოების მხარდაჭერის გზით ადამიანის უფლებების, დემოკრატიული რეფორმების, კანონის უზენაესობისა და კარგი მმართველობის ხელშეწყობა. ამ ორგანიზაციებმა „დემოკრატიისა და ადამიანის უფლებებისთვის ევროპული ინსტრუმენტის" ფარგლებში 2012 წელს გამართულ საგრანტო კონკურსში გაიმარჯვეს. საგრანტო თანხის საერთო მოცულობა დაახლოებით 1 335 000 ევროა. 17 იანვარს გამართულ სპეციალურ ცერემონიაზე ევროკავშირის წარმომადგენლობის ხელმძღვანელის მოადგილემ ბორის იაროშევიჩმა  წარადგინა „დემოკრატიისა და ადამიანის უფლებებისთვის ევროპული ინსტრუმენტის” ფარგლებში, 2012 წლის მარტში გამოცხადებული საგრანტო კონკურსის გამარჯვებული თხუთმეტი არასამთავრობო ორგანიზაცია, ესენია: სამცხე-ჯავახეთის ასოციაცია „ტოლერანტი", გლობალური ინიციატივა ფსიქიატრიაში, საქართველოს წამების მსხვერპლთა ფსიქოლოგიური და სამედიცინო რეაბილიტაციის ცენტრი, გურიის აგრობიზნეს ცენტრი, სამოქალაქო განვითარების სააგენტო,  გურიის ახალგაზრდული ცენტრი, ფონდი Accion Contra El Hambre ACF, დემოკრატიის ინსტიტუტი, კავშირი „Step Forward", ასოციაცია „დეა", საქართველოს პროფკავშირების კონფედერაცია, ინოვაციისა და რეფორმის ცენტრი,  დევნილ ქალთა ასოციაცია „თანხმობა", საქართველოს უსინათლოთა კავშირი, არასამთავრობო ორგანიზაცია „ფარსა". წყარო: eeas.europa.eu

აჭარა. 17 იანვარს, ბათუმის დემოკრატიული ჩართულობის ცენტრში, საქართველოს ახალგაზრდა იურისტთა ასოციაციამ ჩაატარა ლექცია თემაზე: „საქართველოს ტერიტორიულ-ადმინისტრაციული მოწყობა". შეხვედრაზე ასევე განხილულ იქნა  ავტონომიებისა და თვითმმართველობის საკითხები საქართველოს კანონმდებლობის მიხედვით. მომხენებლებმა, სულხან ფალავანდიშვილმა და აკაკი ჩაგრეიშვილმა, დამსწრე საზოგადოებას საქართველოს ერთიანობის კონტექსტში აჭარის ავტონომიური რესპუბლიკისა და აფხაზეთის ოკუპირებული ტერიტორიების საკითხიც განიხილეს. ადგილობრივმა საზოგადოებრივი ორგანიზაციების და მედიის წარმომადგენლებმა, ასევე სტუდენტებმა ლექციის დასრულების შემდეგ  შეხვედრა დისკუსიის რეჟიმში გააგრძელეს.

გურია.  17 იანვარს, ოზურგეთის დემოკრატიული ჩართულობის ცენტრში გაიმართა ინგლისური ენის შესწავლის ხელმისაწვდომობის სასტიპენდიო პროგრამის პირველი ნაკადის კურსდამთავრებულთა დაჯილდოვების ცერემონია. ინგლისური ენის შესწავლის ხელმისაწვდომობის სასტიპენდიო პროგრამა ხორციელდება ამერიკული ორგანიზაცია PH –ინტერნატინალის მიერ და გურიაში მისი პარტნიორია „გურიის ახალგაზრდული რესურს ცენტრი". აღნიშნული პროგრამა გახორციელდა საქართველოს ოთხ ქალაქში: რუსთავში, გორში, ახალციხესა და ოზურგეთში. იგი მიზნად ისახავს ხელმისაწვდომი გახადოს ინგლისური ენის შესწავლა  მოზარდებისთვის სოციალურად დაუცველი და ეკონომიკურად შეჭირვებული ოჯახებიდან. სასწავლო კურსი ორი წელი მიმდინარეობდა და მოიცავდა სწავლების 4 სემესტრს 2011 წლის მარტიდან 2012 წლის დეკემბრის ჩათვლით. პროგრამაში მონაწილეობდა 14-18 წლამდე 25 მოზარდი სოციალურად დაუცველი ოჯახებიდან. ინგლისური ენის გაკვეთილებთან ერთად, მათთვის ჩატარდა 10-მდე დამატებითი ღონისძიება ამერიკული კულტურის, ტრადიციების, ისტორიისა და წეს-ჩვეულებების შესახებ. მოეწყო ორი საზაფხულო ბანაკი. გარდა იმისა, რომ ბავშვებმა შეისწავლეს ინგლისური ენა, მათ გაიცნეს ამერიკულ კულტურასა და წეს-ჩვეულებებს, განივითარეს ლიდერის თვისებები

აჭარა. 17 იანვარს, ბათუმის დეომკრატიული ჩართულობის ცენტრში, „ველფეარ ფაუნდეიშენმა" ადგილობრივ საზოგადოებრივ ორგანიზაციებთან და მედიის წარმომადგენლებთან გამართა საინფორმაციო შეხვედრა. რომელიც მიზნად ისახავდა თამბაქოს რეკლამირების შეზღუდვის მოთხოვნას და ლოკალურ დონეზე ამ კამპანიის წარმოებას. პროექტის ავტორების განცხადებით, თამბაქოს მოხმარების, როგორც პირდაპირი, ისე არაპირდაპირი რეკლამა უნდა შეიზღუდოს. ალიანსის ინიციატივით საქრთველოში უკვე დაიწყო პასიური მწეველების უფლებების ადვოკატირება. აღნიშნული კამპანიის წარმოება საჭიროა, რადგანაც მიუხედავად იმის, რომ კანონი არამწეველი ადამიანების უფლებების დასაცავად 2003 წელსაა მიღებული, ის დღემდე არ სრულდება. პროექტი დაფინანსებულია აღოსავლეთ-დასავლეთის მართვის ინსტიტუტის მიერ.

კახეთი. კახეთის რეგიონის სკოლების სამოქალაქო კლუბების წევრები   დედოფლისწყაროს მუნიციპალიტეტის სოფ. საბათლოს სკოლას ესტუმრნენ და სკოლის  ბიბლიოთეკისათვის თანატოლებს  წიგნები ჩაუტანეს.  სოფელი საბათლო მდებარეობს  საქართველო - აზერბაიჯანის საზღვარზე და არის ყველა დასახლებული პუნქტიდან  საკმაოდ მოშორებული. იქ მცხოვრებ აზერბაიჯანელ მოსწავლეებს უჭირთ ქართული ენის კარგად ათვისება და თანატოლებთან ინტეგრაცია.  სწორედ ამ პრობლემის მოგვარებას  ითვალისწინებდა სამოქალაქო კლუბების მოსწაველეების ინიციატივა- განეახლებინათ სკოლის ბიბლიოთეკა ქართული წიგნებით და დაემყარებინათ მჭიდრო ურთიერთობა საბათლოს სკოლი მოსწავლეებთან. კახეთის სხვადასხვა  სკოლის მოსწავლეებმა შეაგროვეს სხვადასხვა სახის მხატვრული ლიტერატურა და ესტუმრნენ საბათლოს საჯარო სკოლას. მოსწავლეებმა ასევე ჩაიტანეს საკლუბო მუშაობისთვის საჭირო ინვენტარი და სამოქალაქო კლუბის მუშაობის პრეზენტაცია ჩაატარეს.  სამოქალაქო კლუბის წევრებმა თანატოლებს გამოცდილება გაუზიარეს. ისუბრეს, როგორ ხდება სკოლაში, თემში პრობლემის გამოვლენა და ამ პრობლემის მოსაგვარებლად საჭირო გზების მოძებნა. შეხვედრის ბოლოს სკოლებს შორის ერთობლივი საქმიანობები დაიგეგმა. წყარო:civics.ge

ქვემო ქართლი. 15 იანვარს დემოკრატიული ჩრთულობის ცენტრში სამოქალაქო განათლების პროგრამის ფარგლებში ჩატარდა შეხვედრა სტუმართან. სტუმარი იყო სიქა-ს ქართველი მოხალისე დათო ოდიკაძე რომელიც ამჟამად არის EVS პროგრამის მოხალისე რუმინეთში. შეხვედრა საინტერესოდ ჩაიარა. სამოქალაქო კლუბების ბავშვებმა და სტუმარმა ისაუბრეს მოხალისეობის საკითხებზე, დამსწრე საზოგადოებამ  ბევრი რამ შეიტყეს იმაზე თუ რას ნიშნავს იყო მოხალისე. წყარო: ორგანიზაციის გვერდი სოციალურ ქსელში

18 იანვარს, 14:00 საათზე  საერთაშორისო კვლევის და გაცვლების საბჭო IREX/G-MEDIA გამართავს ახალი პროგრამის პრეზენტაციას. პროგრამაში ჩართული იქნება 14 მედია ორგანიზაცია (G-MEDIA პარტნიორი) იქნება ჩართული ახალი მედიის ტრენინგისა და კონსულტაციების გრძელვადიან პროცესში.შეხვედრის პირველი ნაწილი დაეთმობა დისკუსიას ახალი მედიის საკითხებზე. მისამართი: თთბილისი, სასტუმრო ქორთიარდ მარიოტი