10 მაისს, 11 საათზე, „გერმანულ სახლში"  საზოგადოებრივი ორგანიზაცია „21–ე საუკუნე" კონდრად ადენაუერის ფონდის საქართველოს წარმომადგენლობის მხარდაჭერით გამართავს მრგვალ მაგიდას  – დიალოგი სახელმწიფოსა და რელიგიურ გაერთიანებებს შორის.

თბილისი. საქართველოში წინასარჩევნო, საარჩევნო და პოსტსაარჩევნო პროცესს დააკვირდება საერთაშორისო ორგანიზაცია „ღია დემოკრატიის საზოგადოება". ამისთვის, სადამკვირვებლო მისიას სხვადასხვა ქვეყნიდან 20–დან 25–მდე დამკვირვებელი შეურთდება. მათ საქართველოს სხვადასხვა რეგიონში გადაანაწილებენ. ასევე იგეგმება საპარლამენტო არჩევნების მონიტორინგის პროცესში 200 –დან  300 –მდე ადგილობრივი დამკვირვებლის ჩართვა. „ჩვენ მეთოდოლოგიად გამოვიყენებთ იმავე პროცედურებს, რასაც ევროკავშირში და სხვა ქვეყნებში იყენებენ. ჩვენ ვიწყებთ შეხვედრებს საზოგადოებრივ ორგანიზაციებთან, არჩევნებში მონაწილე სუბიექტებთან, მედიასა და ყველა დაინტერესებულ მხარესთან. ანუ, ვხვდებით ყველა იმ აქტორს, რომლებიც ჩართულნი არიან არჩევნების პროცესში. თუმცა, რა თქმა უნდა, ჩვენი დაკვირვების ძირითადი ობიექტი არის საარჩევნო ადმინისტრირების პროცესი" – ამბობს ორგანიზაციის ერთ–ერთი წარმომადგენელი. „ღია დემოკრატიის საზოგადოება"  საქართველოში საქართველოს პრეზიდენტის და საგარეო საქმეთა სამინისტროს მოწვევით იმყოფება.

იმერეთი. კლიმატის ზეგავლენის  თემაზე სამეცნიერო-ინტელექტუალური კლუბის „თაობათა დიალოგის" წევრებმა ქუთაისში აქცია გამართეს. „წერტილთა შეერთება", „გლობალური მოქმედების დღე" - ამ თემებს მიეძღვნა ფოტო სესიაც, რომელიც ღია ცის ქვეშ ჩატარდა. მოეწყო იმპროვიზირებული ”ფოტო სტუდია”. ფოტო სესიის მიზანი იყო კლიმატის ცვლილებების თაობაზე საზოგადოებისთვის ინფორმაციის მიწოდება. გამვლელებს და აქციის მონაწილეებს საშუალება ჰქონდათ იმპროვიზირებულ სესიაში ჩართულიყვნენ.

შიდა ქართლი. გორის საინფორმაციო ცენტრის ოფისში გაიმართა სამუშაო შეხვედრა გორისა და კასპის მუნიციპალიტეტების ეთნიკური ოსებით დასახლებული სოფლების წარმომადგენლებთან. შეხვედრაში მონაწილეობდა კასპის მუნიციპალიტეტიდან 8 სოფლის, ხოლო გორის მუნიციპალიტეტიდან ერთი სოფლის წარმომადგენლები. აღნიშნული შეხვედრები იმართება პროექტის – „ინტეგრაცია ასიმილაციის ნაცვლად" (დონორი  – IFES Georgia) – ფარგლებში, რომელსაც ახორციელებენ გორის საინფორმაციო ცენტრი და შიდა ქართლის დემოკრატიული განვითარების ინსტიტუტი. ერთობლივი მუშაობის შედეგად ანალიზი გაუკეთდა პრობლემებსა და დალაგდა კომპეტენციების მიხედვით: პრობლემები, რომელთა მოგვარებაც შედის ადგილობრივი თვითმმართველობის უფლებამოსილებაში, პრობლემები, რომელთა მოგვარებაც ცენტრალური ხელისუფლების პრეროგატივაა. შეხვედრაზე იდენტიფიცირებულ პრობლემებზე სასაუბროდ დაიგეგმა შეხვედრები მუნიციპალიტეტების საკრებულოებთან და სამხარეო ადმინისტრაციის წარმომადგენლებთან.

7 მაისს, 13 საათზე,  სასტუმრო „თბილისი მარიოტში" საერთაშორისო ორგანიზაცია „ღია დემოკრატიის საზოგადოება" გამართავს პრესკონფერენციას. ორგანიზაცია საქართველოში საპარლამენტო არჩევნების მონიტორნგის მისიითაა ჩამოსული.

გურია. სტუდენტურ-ახალგაზრდულმა სათათბირომ პროექტის – „ახალი სტრატეგია: თანაბარი შესაძლებლობები და აქტიური თანამონაწილეობა" – ფარგლებში ბენეფიციარებს უმასპინძლა. შეხვედრისა და პროექტის მიზანია სამიზნე სკოლების პედაგოგთა და მოსწავლეთა აღჭურვა ისეთი უნარ-ჩვევებით, როგორიცაა  „ლიდერობა და გუნდური მუშაობა", „ეფექტური კომუნიკაცია". აღნიშნულ პროექტს მხარს უჭერს ბავშვთა და ახალგაზრდობის ფონდი. პროექტით გათვალისწინებული საქმიანობები მოიცავს ოზურგეთის მუნიციპალიტეტის 10 სკოლას.

5 მაისს, გორის საინფორმაციო ცენტრის ოფისში გაიმართება სამუშაო შეხვედრა გორისა და კასპის მუნიციპალიტეტების ეთნიკური ოსებით დასახლებული სოფლების წარმომადგენლებთან. შეხვედრის მიზანია მათ თემებში არსებული პრობლემების განხილვა\იდენტიფიცირება. შეხვედრის ორგანიზატორები: გორის საინფორმაციო ცენტრი, შიდა ქართლის დემოკრატიული განვითარების ინსტიტუტი

თბილისი. ქართული მედიის სამართლებრივი დაცვის ცენტრი შეშფოთებას გამოთქვამს ჟურნალისტებისთვის პროფესიულ საქმიანობისას უკანონოდ ხელშეშლის ფაქტებთან დაკავშირებით. წყარო: www.gyla.ge ვრცლად

კახეთი. 3 მაისს, სიღნაღში კახეთის განვითარების სამუშაო ჯგუფის შეხვედრა გაიმართა, სადაც სახელმწიფო უწყების, კერძო სექტორის, დონორი და საზოგადოებრივი ორგანიზაციების წარმომადგენლებმა კახეთის ტურისტული შესაძლებლობებზე ისაუბრეს. შეხვედრას საქართველოს სოფლის მეურნეობის სამინისტროს, სტრატეგიული განვითარებისა და ტურიზმის სააგენტოს ერთად მსოფლიო ბანკის, აშშ–ს საერთაშორისო განვითარების სააგენტოს წარმომადგენლები ესწრებოდნენ. სტრატეგიული განვითარების სააგენტოს ხელმძღვანელის ივა დავითაიას თქმით, სამუშაო ჯგუფების შეხვედრა და კონკრეტული მიზნობრივი ბაზრების განსაზღვრა კახეთში ტურისტული პროექტების წარმატებით განხორციელებას ემსახურება.

შიდა ქართლი. საზოგადოებრივი ორგანიზაცია „ბილიკმა" – „სამოქალაქო განათლებისა და პედაგოგთა გადამზადების პროგრამის"ფარგლებში (PH International /USAID) შიდა ქართლის 29 სკოლაში ჩამოაყალიბა სამოქალაქო კლუბები, რომლებიც მრავალ საინტერესო აქტივობებს ახორცილებენ. პროგრამის ფარგლებში, სურამის მე–3 საჯარო სკოლაში სამოქალაქო განათლების კვირეული მოეწყო, რომლის ფარგლებში გაიმართა აქცია –  „სუფთა სკოლა". ასევე ადგილობრივ თვითმმართველობასთან ერთად დასუფთავდა სურამის რკინიგზის სადგურის მიმდებარე ტერიტორია და ზინდისის ტყის მონაკვეთი. აქციაში მონაწილეობდნენ როგორც სკოლის მოსწავლეები და მასწავლებლები, ასევე თვითმმართველობის წარმომადგენლები. 3 მაისს სკოლაში მოეწყო ანტინარკოტიკული და აზარტული თამაშების საწინააღმდეგო აქცია–გამოფენა.

შიდა ქართლი. საქართველოს ახალგაზრდა იურისტთა ასოციაცია გორის ფილიალის ოფისში გაიმართა ადგილობრივი საზოგადოებრივი ორგანიზაციების შეხვედრა, რომლის მიზანიც იყო მომავალი საპარლამენტო არჩევნების წინ არსებული საარჩევნო გარემოს შეფასება. განიხილებოდა შიდა ქართლის რეგიონში არსებული სიტუაცია. შეხვედრას ასევე ესწრებოდა საქართველოში ამერიკის შეერთებული შტატების საელჩოს წარმომადგენელი.

გურია. ლანჩხუთის მუნიციპალიტეტის საკრებულომ მუნიციპალური არასამეწარმეო იურიდიული პირების (აიპ) აგრობიზნეს–ცენტრ ლანჩხუთის, ტურიზმის განვითარების ცენტრისა და საზოგადოებრივი ჯანდაცვის ცენტრის 2012-2015 წლების სტრატეგიული განვითარების გეგმები დაამტკიცა. გეგმები აღნიშნულმა ორგანიზაციებმა შეიმუშავეს პროექტის – "ჩვენთან ერთად დაგეგმეთ რაში დახარჯავთ ჩვენს ფულს" – ფარგლებში. პროექტი დაფინანსდა აღმოსავლეთ-დასავლეთის მართვის ინსტიტუტის მიერ პროგრამა G–PAC ფარგლებში. პროექტი განახორციელა „ოზურგეთის ახალგაზრდა მეცნიერთა კლუბმა" „ლანჩხუთის საინფორმაციო ცენტრთან" პარტნიორობით.

იმერეთი. საქართველოს ახალგაზრდა იურისტთა ასოციაცია შეკრებისა და გამოხატვის თავისუფლებაში გაუმართლებელ ჩარევად აფასებს გუშინ ღამით ქუთაისის მერიის მიერ განხორციელებულ ქმედებას. კერძოდ, დასუფთავების სამსახურის წყალსატყორცნი მანქანების გამოყენებას ახალგაზრდების საპროტესტო აქციის წინააღმდეგ. წყარო: www.gyla.ge სრულად  

4–5 მაისს სამცხე–ჯავახეთის რეგიონული ასოციაცია „ტოლერანტი" ადგილობრივი უმაღლესი სასწავლებლის სტუდენტებისთვის გამართავს სემინარს თემაზე – „ადამიანის უფლებები და საერთაშორისო კანონმდებლობა".

იმერეთი. ქალები მშვიდობის ძიებაში – ამ სახელწოდების პუბლიკაციის პრეზენტაცია გაიმართა ქუთაისში, დემოკრატიული ჩართულობის ცენტრში. პუბლიკაცია  ქართულ აფხაზური პროექტის ერთობლივი შემაჯამებელი დოკუმენტია საქართველოში მცხოვრებ ქალთა მშვიდობიან მომავალზე. პუბლიკაცია  ხუთი ნაწილისაგან შედგება და ის ქართულ, რუსულ და ინგლისურ ენებზე გამოიცა. ერთობლივი ქართულ-აფხაზური პროექტის გრძელვადიანი მიზანია გენდერული მიდგომის დამკვიდრება ქართულ-აფხაზური კონფლიქტის მოგვარებაში. პროექტი განხორციელდა კულტურულ-ჰუმანიტარულ ფონდ  „სოხუმისა" და აფხაზეთის ქალთა ასოციაციის მიერ, შვედეთის საერთაშორისო ქალთა ფონდის Kvinna ill Kvinna-ს მხარდაჭერით.

სამცხე–ჯავახეთი. ახალციხის დემოკრატიული ჩართულობის ცენტრში ჟურნალისტმა თემო ბარძიმაშვილმა წარმოადგინა 20–მდე ფოტონამუშევარი სახელწოდებით – „არააფქმული მიწა – მესხების გრძელი გზა შინისაკენ". ნამუშევრები ასახავს მათ ყოფას საქართველოში, აზერბაიჯანში, ყირგიზეთსა და თურქეთში და იკვლევს მათი კულტურის, თვითმყოფადობის, რელიგიისა და სამშობლოს აღქმის სხვადასხვა ასპექტებს. ფოტოგამოფენა გაიმართა უმცირესობის საკითხთა ევროპული ცენტრის ინიციატივით, ევროკავშირის მიერ დაფინანსებული პროექტის – „1940–იან წლებში საქართველოდან გადასახლებულ პირთა და მათი შთამომავლების რეპატრიაციის" – ფარგლებში. ფოტოგამოფენის ორგანიზებაში აქტიურად იყო ჩართული სამცხე–ჯავახეთის რეგიონალური ასოციაცია „ტოლერანტი", რომელიც მჭიდროდ თანამშრომლობს უმცირესობის საკითხთა ეროვპულ ცენტრთან. უახლოს მომავალში გამოფენაზე წარმოდგენილი ნამუშევრები საქართველოს სხვა ქალაქებში გამოიფინება.

გურია. ოზურგეთის ახალგაზრდა მეცნიერთა კლუბის და ლანჩხუთის საინფორმაციო ცენტრის წარმომადგენლებმა, ერთობლივი პროექტის – „ადვოკატირება ცვლილებებისთვის" – ფარგლებში, სოფელ დვაბზუში, ადგილობრივი თემის ლიდერებთან ერთად გამართეს შეხვედრა სოფლის წარმომადგენლებთან. შეხვედრის მიზანი იყო სოფელ დვაბზუს გრძელვადიანი სტრატეგიული გეგმის შემუშავებისათვის ხედვისა და სტრატეგიული მიმართულებების განსაზღვრა. როგორც აღვნიშნეთ, შეხვედრაში მონაწილეობა მიიღეს სოფლის წარმომადგენლებმა (20 მაცხოვრებელი). სადაც განისაზღვრა ის ძირითადი სტრატეგიული მიმართულებები, რომელთა მიხედვითაც სტრატეგიულ გეგმაზე მომუშავე ჯგუფი კონკრეტულ პროექტებს შეიმუშავებს. სტრატეგიულ გეგმაზე მუშაობა მაისში დასრულდება და გაიმართება მისი საჯარო განხილვა სოფელ დვაბზუს მოსახლეობასთან ერთად. გეგმის საბოლოო ვარიანტი წარედგინება ოზურგეთის მუნიციპალიტეტის საკრებულოს.

კახეთი. საზოგადოებრივი გაერთიანება ,,ბემონის" წარმომადგენლებმა ქალაქ თელავში მოსახლეობასთან საინფორმაციო შეხვედრა გამართეს. რომლის მიზანი იყო საზოგადოების ინფორმირება ნარკომანიის პრევენციის გზების შესახებ. „დღეს ყველაზე გავრცელებული დაავადებაა ნარკომანიაა. მოსახლეობამ დიდი ყურადღებით მოგვისმინა, ვისაუბრეთ თუ როგორ ხდებიან ადამიანები მასზე დამოკიდებულნი და ასევე, რა გზით შეიძლება ვებრძოლოთ დაავადებას", აცხადებს „ბემონის" თელავის ოფისის ხელმძღვანელი დავით ღონღაძე.

კახეთი. ,,მედია ცენტრ კახეთის" ორგანიზებით  ქალაქ გურჯაანში მდებარე ტყე პარკში მასშტაბური დასუფთავების აქცია გაიმართა. ტყე–პარკი 10 ჰექტარს მოიცავს. აქ, გასული საუკუნის 80-იან წლებში ფუნქციონირებდა ატრაქციონები, გასართობი ცენტრები, ამფითეატრი, დახურული და ღია კინოთეატრი. ამჟამად მხოლოდ ძველი ატრაქციონებისა და ღია თეატრის ნანგრევებია შემორჩენილი. პარკთან ახლოს მდებარეობს გენერალ ჯონ მალხაზ შალიკაშვილის სახელობის სამხედრო მუზეუმი. ,,პარკის ტერიტორიის დიდი ნაწილი ამჟამად გამოუყენებელია და განადგურების პირასაა. ჩვენი მიზანია, პარკს დაუბრუნდეს ძველი იერსახე. ვცდილობთ საზოგადოებას მოვაწვდინოთ ჩვენი ხმა, რათა სამომავლოდ კიდევ ერთი, კარგი დასასვენებელი ადგილი შევმატოთ ქალაქს", აცხადებს პროექტის კოორდინატორი მაკა ხაზიური.პარკის ტერიტორიის დასუფთავების აქციაში მონაწილეობა მიიღეს როგორც ორგანიზაციის თანამშორმლებმა, ასევე ,,მედია ცენტრი კახეთის" მოხალისეებმა. ,,ჩვენს ქალაქში ბევრი არაფერი კეთდება იმისათვის, რომ ახალგაზრდები ჩართულნი ვიყოთ სამოქალაქო აქტივობებში. ვფიქროთ, შეგვიძლია ამ სიტუაციის შეცვლა და იმედი გვაქვს, ჩვენი მონდომებით ბევრს შევცვლით ქალაქისა და ჩვენს სასიკეთოდ’’, აცხადებს ანი სპარსიაშვილი, მედია ცენტრის მოხალისე. ,,მედია ცენტრი კახეთი" ძირითადად, ახალგაზრდულ  პროექტებს ახორციელებს. აქცია ,,სათემო განვითარების ცენტრის’’ პროექტის –  ,,შემოსავლების მომტანი საქმიანობებისა და რეგიონული განვითარების ხელშეწყობა კულტურულ-საგანმანათლებლო პროგრამების მეშვეობით’’ – ფარგლებში მოეწყო.

სამცხე–ჯავახეთი. საზოგადოებრივმა ორგანიზაციამ „დემოკრატ ქალთა საზოგადოებამ", ახალციხის დემოკრატიული ჩართულობის ცენტრში საინფორმაციო შეხვედრა გამართა და დამსწრე საზოგადოებას მიაწოდა ინფორმაცია ტრენინგების შესახებ. იგი პროექტის „დემოკრატიის სკოლის" ფარგლებში გაიმართება და მისი მიზანია ხელი შეუწყოს ქალების ჩართულობას დემოკრატიულ პროცესებში. აღნიშნული პროექტი გასულ წელს დაიწყო და მიმდინარე წლის ივნისში დასრულდება. პროექტს „დემოკრატიის სკოლა" საქართველოში ამერიკის შეერთებული შტატების საელჩო აფინანსებს. პროექტის ფარგლებში სხვადასხვა ასაკის 60–მდე ახალციხეში მაცხოვრებელმა გაიმარა ტრენინგი ისეთ საკითხებზე როგორიცაა – დემოკრატიის არსი, არჩევნების მნიშვნელობა დემოკრატიის განვითარებისთვის, საერთაშორისო ურთიერთობები, ქალი პოლიტიკაში, ქალთა ლიდერობა, გენდერული საკითხები, ოჯახური ძალადობა და სხვა.

გურია. 1-4 მაისი, საზოგადოებრივი ორგანიზაციის ლანჩხუთის საინფორმაციო ცენტრის ორგანიზებით, ოზურგეთსა და ლანჩხუთში, სათემო ლიდერებისა და ჟურნალისტებისთვის ჩატარდა ტრენინგ–კურსი. რომელიც მოიცავდა ისეთ საკითხებს, როგორიცაა საზოგადოებრივი მონიტორინგი, ეფექტური კომუნიკაცია და სოციოლოგიური კვლევების წარმოება. კურსის დასრულების შემდეგ მონაწილეები მზად არიან საკუთარ სოფლებში განახორციელონ 2011 წელს წარმოებული მუნიციპალური სერვისების მონიტორინგი და აღნიშნული სერვისებით მოსახლეობის დამოკიდებულების ხარისხის კვლევა, მოამზადონ ანალიზი და წარუდგინონ იგი საზოგადოებას. პროცესი ჩატარდება ოზურგეთისა და ლანჩხუთის 5-5 სოფელში. ტრენინგ–კურსი ჩატარდა პროექტის –  "საზოგადოებრივი მონიტორინგი ცვლილებებისთვის" – ფარგლებში, რომელიც დაფინანსებულია ევრაზიის თანამშრომლობის ფონდის მიერ.

თბილისი. გაეროს განვითარების პროგრამა (UNDP) და ევროკავშირი 2012 წლის საპარლამენტო არჩევნებისთვის იწყებენ მედიის მონიტორინგის ახალ ეტაპს. პროექტის განხორციელებაში მონაწილეობას მიიღებს ოთხი ორგანიზაცია: კავკასიის კვლევითი რესურსების ცენტრი (CRRC) სამართლიანი არჩევნებისა და დემოკრატიის საერთაშორისო საზოგადოება (ISFED); ინტერნიუსი საქართველო და საქართველოს საზოგადოებრივ საქმეთა ინსტიტუტი (GIPA). მონიტორინგი უახლოეს მომავალში დაიწყება და დეკემბრამდე გაგრძელდება. ახალი პროექტის წარდგენის პარალელურად, გაეროს განვითარების პროგრამამ წარმოადგინა 2011 წელს არასამთავრობო ორგანიზაციების მიერ ჩატარებული და დასრულებული მედია მონიტორინგის შედეგები, რომელიც მოიცავდა სოციალურ, საარჩევნო, სამოქალაქო საზოგადოების, თვითმმართველობის, ადამიანის უფლებების საკითხების მედიაში გაშუქების ხარისხობრივ და თვისობრივ ანგარიშებს.