თბილისი. ადამიანის უფლებების სწავლებისა და მონიტორინგის ცენტრმა მალხაზ რეხვიაშვილის სახელით, აჭარის საზოგადოებრივი მაუწყებლის წინააღმდეგ ბათუმის საქალაქო სასამართლოს სარჩელით მიმართა. „მალხაზ რეხვიაშვილი საავტორო-შემოქმედებითი გადაცემების ყოფილი თანამშრომელი, გადაცემა „ჰეშთეგის“ წამყვანი და ალტერნატიული პროფესიული გაერთიანების თავმჯდომარე, მისი სამსახურიდან გათავისუფლების გადაწყვეტილების ბათილად ცნობას, სამსახურში აღდგენას და იძულებითი განაცდურის ანაზღაურებას ითხოვს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საზოგადოებრივი ორგანიზაციები ანა დოლიძეს მოუწოდებენ, რომ თუ ის უახლოეს მომავალში პოლიტიკურ საქმიანობას აპირებს, დროულად მიიღოს გადაწყვეტილება თანამდებობის დატოვების შესახებ. „ხელმომწერი ორგანიზაციები ეხმიანებიან საქართველოს იუსტიციის უმაღლესი საბჭოს არამოსამართლე წევრის - ანა დოლიძის მიერ სამოქალაქო მოძრაობა „ხალხისთვის” დაფუძნებას, რამაც საზოგადოების ნაწილში მოლოდინები გააჩინა მის სამომავლო პარტიულ საქმიანობასა და აქტიურ პოლიტიკაში ჩართვასთან დაკავშირებით, რაც შეუთავსებელია მის მიერ ამჟამად დაკავებულ თანამდებობასთან“. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) მოუწოდებს საქართველოს პარლამენტს, დროულად განიხილოს შრომის კანონმდებლობის ცვლილებათა ინიცირებული პაკეტი, რომელიც, რიგი ხარვეზების მიუხედავად, მშრომელთა უფლებების არსებით გარანტიებს ითვალისწინებს. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) კოვიდ 19-ის დროს რუსეთის ფედერაციის კანონმდებლობაში შეტანილ ცვლილებებს მიმოიხილავს. „კორონავირუსის ეპიდემიის გამო, რუსეთის პრეზიდენტმა ვლადიმერ პუტინმა, 2020 წლის 22 აპრილისთვის დანიშნული, რუსეთის კონსტიტუციაში შესატანი ცვლილებების შესახებ ხმის მიცემის თარიღი გაურკვეველი ვადით გადადო. თუმცა ამ პერიოდში რუსეთის ფედერაციის საკანონმდებლო ორგანომ (დუმამ) მოასწრო მთელი რიგი საკანონმდებლო ცვლილებების ინიცირება, რომლებიც დამოუკიდებელი ექსპერტების, იურისტების და ოპოზიციონერი პოლიტიკოსების აზრით, კიდევ უფრო შეზღუდავს ქვეყანაში ისედაც შეზღუდულ ადამიანის უფლებებს“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. „მითების დეტექტორი“ აქვეყნებს ბლოგპოსტს: ვინ გააყალბა სახალხო დამცველის კომენტარი „ვეფხისტყაოსნის” აკრძალვაზე. „11 ივნისს ფეისბუქ გვერდებსა და ჯგუფებში გავრცელდა ონლაინ გამოცემა on.ge-ის სტატიის სქრინი, სათაურით პოემა „ვეფხისტყაოსანი“ რასისტულია და უნდა აიკრძალოს, რადგან ხშირადაა გამოყენებული „მონა ზანგი“. სქრინზე სახალხო დამცველი ნინო ლომჯარიას ფოტოა განთავსებული და აღნიშნულ ციტატაც სწორედ მას მიეწერება. აღნიშნული სქრინი თავდაპირველად 11 ივნისს 9:51 საათზე ფეისბუქ პროფილმა „მრისხანე. ბაბუაწვერა” გამოაქვეყნა, რომელიც საკუთარ ვინაობას მალავს და სამუშაო ადგილად on.ge-ის რედაქცია აქვს მითითებული. „მრისხანე.ბაბუაწვერას” პოსტი სატირა იყო, რომლითაც ის Netflix-ის მიერ ფილმ „ქარწაღებულნის” ჩვენებიდან დროებით ამოღებას გამოეხმაურა. აღნიშნული ხუმრობა მოგვიანებით როგორც სახალხო დამცველის რეალური კომენტარი ფეისბუკში ვირუსულად გავრცელდა და ის გარკვეულმა ონლაინ პლატფორმებმაც აიტაცეს“. სრულად... წყარო: mythdetector.ge

თბილისი. ICOM საქართველო მანუს ბრინკმანის ფონდსა და თიბისი ბანკთან პარტნიორობით იწყებს კვლევას ორი მიმართულებით: ყრუ და სმენადაქვეითებული აუდიტორიის სერვისები საქართველოს მუზეუმებში; სამუზეუმო მარკეტინგისა და ფანდრეიზინგის (დამატებითი სახსრების მოძიება) საკითხები საქართველოს მუზეუმებში. „პროექტის საწყის ეტაპზე, შემუშავდა სპეციალური კითხვარები, რომელთა მეშვეობით მოხდება თეორიულ-ვიზუალური ინფორმაციის შეგროვება საქართველოს მუზეუმებში ამ ორი მიმართულებით არსებული გამოცდილებისა და პრაქტიკის შესახებ. მიღებული მონაცემების საფუძველზე შესაბამისი მიმართულებების სპეციალისტებთან ერთად გაანალიზდება საქართველოს მუზეუმებში ამ მხრივ არსებული სიტუაცია პრობლემებისა და განვითარების პერსპექტივების გამოკვეთის მიზნით. პროექტის ფარგლებში, ჩატარებული კვლევების საფუძველზე ორივე მიმართულებით გამოიცემა 2 ორენოვანი (ქართულ-ინგლისური) პუბლიკაცია. პროექტში მონაწილეობის მისაღებად ვიწვევთ საქართველოს მუზეუმების შესაბამისი მიმართულების სპეციალისტებს საკუთარი გამოცდილების გაზიარების მიზნით“. სრულად... წყარო: ორგანიზაციის გვერდი სოციალურ ქსელში

თბილისი. ევროკავშრის და გაეროს განვითარების პროგრამის (UNDP) მხარდაჭერით, სოფლის განვითარებისთვის ადვოკატირების პირველი სახელმძღვანელო „ადვოკატირება სოფლის მდგრადი და ინკლუზიური განვითარებისთვის“ უკვე შემუშავდა. „სახელმძღვანელო მოქალაქეებს დაეხმარება შეიძინონ პრაქტიკული ცოდნა და უნარები, რათა საკუთარ მუნიციპალიტეტებში ადგილობრივ საჭიროებებზე დაფუძნებული პოლიტიკის ეფექტიანი ადვოკატირება შეძლონ.“ სრულად... წყარო: ევროკავშირის გვერდი სოციალურ ქსელში

თბილისი. ხელმომწერი ორგანიზაციები და აქტივისტები ეხმიანებიან 14 ივნისს, საქართველოში შეზღუდული შესაძლებლობის მქონე პირთა უფლებების დაცვის დღეს და მიმართავენ მთავრობას, შექმნას შშმ პირთა მხარდაჭერის მყარი საკანონმდებლო თუ ინსტიტუციური მექანიზმები და უზრუნველყოს მათი ეფექტიანი ჩართულობა საზოგადოებრივ ცხოვრებაში. სრულად... წყარო: emc.org.ge

15 ივნისს, 11:00 საათზე საქართველოს სახალხო დამცველი გამართავს ონლაინ კონფერენციას - შშმ პირთა მიზნობრივი პროგრამები პანდემიის პირობებში. სრულად...

13 ივნისს, 12:00 საათზე, გაიმართება ვებინარი თემაზე: როგორ აღმოვუჩინოთ მხადაჭერა ძალადობის მსხვერპლ მოსწავლეს. ვებინარს გაუძღვება პშემისლავ სტარონი 2018 წლის საუკეთესო მასწავლებელი პოლონეთში და Global Teacher Prize 2020 წლის ფინალისტი. ვებინარის თარგმანი განხორციელდება სინქრონულად პოლონურიდან ქართულ ენაზე. სრულად...

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება 9 ივნისს ტყიბულში მომხდარ საწარმოო ინციდენტს, რომელმაც 22 მეშახტის სიცოცხლეს საფრთხე შეუქმნა. ორგანიზაცია ახელმწიფოს მოუწოდებს, სასწრაფოდ გამოიკვლიოს, როგორც მომხდარი ინციდენტი, ისე შახტებში დღეს არსებული მდგომარეობა და არ დაუშვას ქვანახშირის მოპოვების სიცოცხლისთვის საფრთხის შემცველ გარემოში გაგრძელება. „9 ივნისს მომხდარი ინციდენტი, რომლის შესახებაც ცნობილი ორი დღის შემდეგ გახდა, შახტში ჩასასვლელ ლიფტს, ე.წ. „კლეტს” უკავშირდება, რომელიც მწყობრიდან გამოვიდა და მეშახტეები რამდენიმე საათით გვირაბში მოაქცია. შესაბამისი შემოწმების ჩატარებისა და ლიფტის გარემონტებამდე შახტში დასაქმებულები მუშაობაზე უარს აცხადებენ. ხაზგასასმელია, რომ საფრთხის შემცველ გარემოში მუშაობაზე უარის თქმა მათი შრომის კოდექსით გარანტირებული უფლებაა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. მწვანე ალტერნატივამ და საიამ თბილისის საქალაქო სასამართლოს სარჩელით მიმართეს და გარემოს დაცვისა და სოფლის მეურნეობის მინისტრის 2020 წლის 17 მარტის ბრძანების ბათილად ცნობა მოითხოვეს, რომლითაც „ონის ჰიდროელექტროსადგურების კასკადის“ პროექტზე გარემოსდაცვითი გადაწყვეტილება გაიცა. „ჰესის მშენებელმა კომპანიამ – სს „ონის კასკადმა“, არ უზრუნველყო ადამიანების ჯანმრთელობასა და გარემოს უსაფრთხოებისათვის არსებული რისკების შესამოწმებლად კანონით სავალდებულო კვლევების ჩატარება“. სრულად... წყარო: greenalt.org

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: საგანგებო ბიუჯეტის ბიუროკრატიული ხარჯების ანალიზი. „2020 წლის ბიუჯეტის ცვლილების პროექტში გათვალისწინებული ადმინისტრაციული ხარჯების ანალიზი აჩვენებს, რომ პანდემიით გამოწვეული კრიზისული მდგომარეობის ფონზე საქართველოს ხელისუფლება გეგმავს ბიუროკრატიული ხარჯების გარკვეულ შემცირებას. თუმცა, IDFI მიიჩნევს, რომ დაგეგმილი შემცირება არ არის შესაბამისობაში ქვეყნაში არსებულ ეკონომიკურ გამოწვევებთან. კერძოდ, ადმინისტრაციული ხარჯების მუხლით დაგეგმილი ზოგიერთო ცვლილება (სამივლინებო ხარჯები, წარმომადგენლობითი ხარჯები) განპირობებულია პანდემიის შედეგად ბუნებრივ შემცირებასთან და ნაკლებად კავშირშია ე.წ. ქამრების შემოჭერის პოლიტიკასთან“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. მიგრაციის საერთაშორისო ორგანიზაცია (IOM UN MIGRATION) კოვიდ 19 მიგრაციის სახეების ფარგლებში კორონავირუსის პანდემიის შედეგად ქვეყანაში დაბრუნებული მიგრანტების ისტორიებს გვიზიარებს. „მიგრანტებისთვის ხელმისაწვდომ დასაქმების სექტორებში გაზრდილი უმუშევრობა მსოფლიოს მასშტაბით და გლობალური რეცესიით გამოწვეული შემცირებული შემოსავლები, ხშირად აიძულებს მიგრანტ მშობლებს ოჯახის საჭიროებების დასაკმაყოფილებლად იმუშაონ სარისკო გარემოში. ეს შეიძლება ასევე შეეხოს იმ მშობლებსაც, რომლებიც სამუშაოდ უცხო ქვეყნებში გაემგზავრნენ, მაგრამ შვილებს და ოჯახებს, რომლებიც სახლში ელოდებიან, ფულს ვეღარ უგზავნიან, რის გამოც საკუთარ ქვეყნებში დაბრუნება უწევთ“, ნათქვამია ორგანიზაციის ვებგვერდზე. სრულად... წყარო: georgia.iom.int

თბილისი. „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა“ (CRRC) საზოგადოებრივი აზრის კვლევა ჩაატარა 2020 წლის 27 თებერვლიდან 18 მარტამდე პერიოდში. „გამოკითხულთა უმრავლესობას სმენია ყალბი ინფორმაციის გავრცელების მიზნით შექმნილი „ფეისბუკის“ გვერდების შესახებ. მოსახლეობის დიდი ნაწილი ასევე, ფიქრობს, რომ ხელისუფლება მედიის საქმიანობაში ერევა. სოციალურ მედიაში დეზინფორმაციასთან ბრძოლა ერთ-ერთი დიდი გამოწვევაა. საქართველოში ეს პრობლება განსაკუთრებით წინასაარჩევნოდ მძაფრდება, როცა პოლიტიკური ძალები, მათ შორის ყველაზე აქტიურად მმართველი პარტია, ყალბ გვერდებს ოპონენტების და არა მხოლოდ მათი დისკრედიტაციის მიზნით იყენებენ“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაცია (საია) დღემდე განაგრძობს 13 ივნისის სტიქიის შედეგად დაზარალებული პირების სამართლებრივ დახმარებას და მათ უფლებებს სასამართლოში იცავს. „საია-ს წარმოებაში არსებული საქმეების მაგალითზე, გამოიკვეთა სტიქიის დაწყებამდე, უშუალოდ სტიქიის დროს და მის შემდგომ, სახელმწიფო უწყებების მუშაობის ხარვეზები და დადგინდა, რომ სახელმწიფო უწყებების მოქმედებები არადროული და არაეფექტიანი იყო“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აფასებს თემირლან მაჩალიკაშვილის მიმართ საქართველოს სახელმწიფო უსაფრთხოების სამსახურში (შემდგომში სუს), საქართველოს სისხლის სამართლის კოდექსის 331-ე პრიმა მუხლით (ტერორიზმის მხარდაჭერა) მიმდინარე გამოძიებისა და სისხლისსამართლებრივი დევნის დაწყებაზე უარის თქმის პროცესს. „ნაცვლად იმისა, რომ საგამოძიებო ორგანოებს სუს-ის მიერ დაგეგმილი და ჩატარებული სპეცოპერაციის დროს კანონის მოთხოვნებისა და უფლების სტანდარტების დარღვევის საკითხი სათანადოდ შეეფასებინა, მათ სრულიად უსაფუძვლოდ თ. მაჩალიკაშვილის სიცოცხლის ხელყოფის საქმეთან დაკავშირებული გამოძიება დახურეს და არ უპასუხეს ამ საქმეში დაგროვებულ ლეგიტიმურ კითხვებს, ეჭვებსა და კრიტიკას. ამ ფონზე სუს-ი მუდმივად ცდილობდა თ. მაჩალიკაშვილის დეჰუმანიზებას, მის ტერორიზმთან კავშირში განხილვას და ამ გზით მისი სიცოცხლის ფასის დაკნინებას თუმცა, 2 წლის შემდეგ საქმის მასალების გაცნობის შემდეგ, ჩვენთვის აშკარა გახდა, რომ ეს ინფორმაცია საეჭვო, არასათანადოდ შესწავლილი და არაზუსტია და მთლიანობაში სათანადო დასაბუთებით სტანდარტით თ. მაჩალიკაშვილის ბრალეულობაზე არ მიუთითებს“, ნათქვამია ორგანიზაციის ვებგვერდზე. სრულად... წყარო: emc.org.ge

12 ივნისს, 11:30-დან 13:30-მდე, ეროვნულ-დემოკრატიული ინსტიტუტის (NDI) ორგანიზებით გაიმართება საჯარო ვებინარი თემაზე „2020 წლის არჩევნები და ქალთა პოლიტიკური მონაწილეობა“. სრულად...

თბილისი. ადამიანის უფლებების სწავლებისა და მონიტორინგის ცენტრი ამერიკის შეერთებული შტაბების სახელმწიფო დეპარტამენტის მიერ 10 ივნისს გამოქვეყნებული ანგარიშის მიმოხილვას გთავაზობთ, რომელიც საქართველოში რელიგიის თავისუფლების თვალსაზრისით არსებულ ვითარებას შეეხება. „ზოგადი საკანონმდებლო მდგომარეობის აღწერისას ანგარიშში ხაზგასმულია, რომ საქართველოში კონსტიტუციით გარანტირებულია რელიგიის თავისუფლება და აკრძალულია რელიგიური ნიშნით დევნა. აქვე პარალელურად აღნიშნულია, რომ საქართველოს კონსტიტუცია აღიარებს საქართველოს მართლმადიდებელი ეკლესიის განსაკუთრებულ როლს და სახელმწიფოსა და ეკლესიას შორის ურთიერთობა რეგულირდება კონკორდატის საფუძველზე. ანგარიშში აღნიშნულია, რომ კონკორდატი იმგვარ პრივილეგიებს აძლევს დომინანტ რელიგიურ ორგანიზაციას, რომელიც სხვა ორგანიზაციებს არ აქვთ“, ნათქვამია ორგანიზაციის ვებგვერდზე. სრულად... წყარო: emc.org.ge

ევროკომისიის 10 ივნისის ანგარიშის თანახმად, კოვიდ 19-ის პანდემია ცრუ და შეცდომაში შემყვანი ინფორმაციების მასობრივი ტალღის თანხლებით მიმდინარეობს. ჯანდაცვის საკითხებთან დაკავშირებით შეცდომაში შემყვანმა ინფორმაციებმა, სახიფათო, ცრუ მტკიცებებმა, კონსპირაციის თეორიებმა და სამომხმარებლო თაღლითობამ მნიშვნელოვანი საფრთხე შეუქმნა საზოგადოებრივ ჯანმრთელობას. ყალბი ან შეცდომაში შემყვანი ინფორმაციები კორონა ვირუსის შესახებ, აზიანებს სოციეტალურ ერთობას, თუმცა უპირველესად ჯანდაცვას. ცრუ და შეცდომაში შემყვანი ნარატივები სხვადასხვა ფორმით შეიძლება გავცელდეს, ისინი ვარირებს მიზანმიმართული, წინასწარ განზრახული დეზინფორმაციიდან არასწორ ინფორმაციამდე და განსხვავებულ საპასუხო ქმედებებს მოითხოვს. ევროკომისიის განცხადებით, გარეშე აქტორები, კონკრეტულად, რუსეთი და ჩინეთი მონაწილეობენ მიზანმიმართულ, გავლენის გამავრცელებელ ქმედებებში და დეზინფორმაციის კამპანიებში ევროკავშირში, მის სამეზობლოში და მთელ მსოფლიოში. დეზინფორმაციების მაგალითებად ევროკომისიას მოჰყავს ისეთი მცდარი მტკიცებები, როგორიცაა „ძლიერი ქიმიური საყოფაცხოვრებო ხსნარების და სამედიცინო (ეთილის) სპირტის დალევა კურნავს კორონავირუსს“, რა თქმა უნდა, ეს მტკიცება არასწორია და საზიანოა ჯანმრთელობისთვის. Belgium’s Poison Control Centre-ზე დაყრდნობით, ამ პერიოდში, ქიმიურ საყოფაცხოვრებო ხსნარებთან დაკავშირებული ინციდენტები 15%-ით გაიზარდა. კონსპირაციის ერთ-ერთი თეორიის მტკიცებით: კორონავირუსი „არის ინფექცია, რომელიც მსოფლიო ელიტების მიერ მოსახლეობის ზრდის შესამცირებლად გავრცელდა“. სამეცნიერო მტკიცებულება კი ცხადყოფს, რომ კოვიდ 19 მიეკუთვნება ცხოველური წარმოშობის ვირუსების ოჯახს, რომელიც მოიცავს SARS და MERS ვირუსებსაც. მტკიცება, რომ თითქოს „5G ინსტალაციები ავრცელებს ვირუსს“ შორსაა მეცნიერული დასაბუთებებისგან და ანძებზე თავდასხმისთვის გამოიყენეს. ევროკავშირი გააგრძელებს დეზინფორმაციასთან ბრძოლას, ხელს შეუწყობს მოქალაქეების გაძლიერებას, ცნობიერების ამაღლებას და სოციეტალური მედეგობის ზრდას. ევროკომისია მხარს დაუჭერს მედია-წიგნიერების პროექტებს, კრიტიკული აზროვნების, ციფრული უნარების განვითარების შესაძლებლობების გაზრდას. კომისია ასევე, ყურადღებას გაამახვილებს ისეთ ჯგუფებზე (ბავშვები, ახალგაზრდები), რომლებიც უფრო მოწყვლადები არიან ცრუ, შეცდომაში შემყვანი ინფორმაციების მიმართ. სრულად... წყარო: ec.europa.eu

თბილისი. ინფორმაციის თავისუფლების განვითარების ინსტიტუტი (IDFI) მთელ მსოფლიოში საარჩევნო პროცესებზე კოვიდ 19-ის გავლენას აფასებს. „პანდემიასთან დაკავშირებული რისკების საფუძველზე, ამ ეტაპზე უკვე 60-მდე ქვეყანაში გადაიდო საპრეზიდენტო, საპარლამენტო ან ადგილობრივი დონის არჩევნები. თუმცა, ცალკეულ ქვეყნებში, საფრთხის მიუხედავად, არჩევნები მაინც ჩატარდა. ამ სტატიაში განვიხილავთ ორივე ტიპის მაგალითებს და მათ ფონზე წარმოვადგენთ 2020 წლის საქართველოს საპარლამენტო არჩევნების წინასწარ ანალიზს“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) და საქართველოს ახალგაზრდა იურისტთა ასოციაცია მოუწოდებენ პარლამეტს, დააჩქაროს შრომის რეფორმა. „ხელმომწერი ორგანიზაციები ვეხმიანებით, ბოლო ერთი კვირის განმავლობაში, სამუშაო ადგილზე სამი ადამიანის დაღუპვის ფაქტსა და ტყიბულის ნახშირმომპოვებელ საწარმოში სიცოცხლისათვის საშიში შრომითი პირობების გამო მომხდარ მორიგ ინციდენტს და მოვუწოდებთ საქართველოს პარლამენტს, დააჩქაროს საკანონმდებლო ორგანოში წარდგენილი კანონპროექტების განხილვა, რომელიც მოიცავს მშრომელთა უფლებების მნიშვნელოვან გარანტიებსა და შრომის კანონმდებლობის ეფექტური აღსრულებისთვის აუცილებელ საკანონმდებლო ცვლილებებს“, ნათქვამია განცხადებაში. სრულად... წყარო: gyla.ge