რა არის დამოუკიდებლობა? თავისუფლება? იდენტობა? ილია ჭავჭავაძე ამ თემებზე ჯერ კიდევ დიდი ხნის წინ იწყებს საუბარს და თუ მის შემოქმედებას კარგად გავეცნობით, მივხვდებით, რომ ის ჩვენი თანამედროვეა. ხოლო ამ საკითხებთან დაკავშირებული პრობლემები დღესაც არსებობს. შეხვედრა ლაშა ბუღაძესთან, ნესტან ნენე კვინიკაძესთან და ტორესა მოსისთან ყვარელში, ილია ჭავჭავაძის სახლ-მუზეუმში, კამპანია #ესქვეყანაშენიას ფარგლებში.

ავტორები: თეკლე ქაროსანიძე, ლალი შალვაშვილი კოვიდ–19–ის კონტექსტში რუსეთი და ჩინეთი აქტიურად მონაწილეობენ დეზინფორმაციის გავრცელებაში, ამის შესახებ არაერთი განცხადება და ანგარიში გაავრცელეს აშშ–სა და ევროკავშირის ქვეყნებში მომუშავე კვლევითმა ორგანიზაციებმა. პანდემიის თემატიკას რუსეთი და ჩინეთი გეოპოლიტიკური მიზნების მისაღწევად იყენებენ. მიზანი უნდობლობისა და ეჭვის გაღვივებაა, სადაც კი ეს შესაძლებელია. მოკლედ რომ ვთქვათ, რუსეთმა და ჩინეთმა კოვიდ–19–ის პანდემიაც კი ანტიდასავლური განწყობების ფორმირებისთვის გამოიყენეს.  ტაქტიკა ასეთია: დეზინფორმაცია ან ყალბი ინფორმაცია, რაც შეიძლება ხშირად უნდა განმეორდეს, მშობლიურ ენაზე უნდა მოაწოდონ მომხმარებელს, თან ილუზია უნდა შეიქნას, რომ აღნიშნული ყველასთვის არ არის ხელმისაწვდომი... ამის ერთ–ერთი კლასიკური მაგალითია პოლონეთის მიმართ ცრუ ბრალდება, რომლის თანახმად პოლონეთმა იტალიის დასახმარებლად განკუთვნილი საშუალებებით დატვირთულ რუსეთის თვითმფრინავს პოლონეთის საჰაერო სივრცის გამოყენების უფლება არ მისცა. პოლონეთის ხელისუფლებამ სწრაფად გამოაქვეყნა პასუხი და ტყუილი უწოდა რუსი დეპუტატის ალექსეი პუშკოვის მიერ გამოქვეყნებულ ინფორმაციას. „პუშკოვმა ტვიტი წაშალა, თუმცა გავრცელების არეალი ფართო იყო“. რონდელის ფონდის ანალიტიკოსი ატლანტიკური საბჭოს ლაბორატორიის ინფორმაციაზე დაყრდნობით წერს, რომ აღნიშნულ განცხადებას 3,000,000 მილიონი ნახვა (Twitter impressions) ჰქონდა.  ევროკავშირის აღმოსავლეთ სამეზობლოს სტრატეგიული კომუნიკაციის სამუშაო ჯგუფის (EUvsDisinfo) მონიტორინგის შედეგების მიხედვით 19 მაისის მდგომარეობით იტალიურ სპუტნიკზე გამოჩენილი დეზინფორმაციის შემცველი ეს მასალა იყო ყველაზე პოპულარული (იხილეთ სრულად...). ყალბი ინფორმაციით ზიანი დადგა, რადგან „დეპუტატის ეს განცხადება არაერთმა რუსულმა პროკრემლისტურმა გამოცემამ გამოაქვეყნა და პოლონეთის განცხადების შემდეგაც არ დააკორექტირა“, აღნიშნული მედიაჩეკერის ინფორმაციაში.  მაგალითისთვის, აღნიშნული ინფორმაცია ჯერ კიდევ მოიძებნება ქართულ ენაზეც – მყვირალა და ყვითელი შინაარსის სათაურით (იხილეთ ...). ყალბი ამბების შემოქმედნი  პროკრემლისტური ყალბი ამბების გამავრცელებლები 5 ძირითად ჯგუფად შეიძლება დაიყოს. ამის შესახებ ევროკავშირის აღმოსავლეთ სამეზობლოს სტრატეგიული კომუნიკაციის სამუშაო ჯგუფის ანგარიშებშია ნათქვამი, ისინი 2015 წლიდან ადევნებენ თვალყურს დეზინფორმაციის გავრცელებას და საზოგადოებას აწვდიან ინფორმაციას (სრულად...).  მარტი–აპრილში აქტიური დეზინფორმაციის წყაროები პირველი ჯგუფი – დეზინფორმაციის გამავრცელებლები  რუსეთის სახელმწიფო სტრუქტურების მფლობელობაში არსებული ან მათთან აფილირებული ვებ–გვერდები. მაგალითად, RT (link is external), Sputnik (link is external), Pervy Kanal (link is external), rubaltic.ru (link is external);  რუსეთში რეგისტრირებული ვებ–გვერდები, რომლებიც ღიად არიან დაკავშირებული პროკრემლისტურ წრეებთან. როგორებიცა geopolitica.ru (link is external) და News Front (link is external);  რუსეთში რეგისტრირებული ვებ–გვერდები, რომლებსაც არ აქვთ აშკარა კავშირები კრემლთან. მაგალითად: Strategic Culture Foundation (link is external), South Front (link is external) და One World (link is external); დანარჩენი ორი ჯგუფი ყალბი ინფორმაციის წყარო და გამავრცელებელი:  რუსეთის ფარგლებს გარეთ რეგისტრირებული ვებ–გვერდები, რომელთაც არ აქვთ აშკარა კავშირები რუსეთის ხელისუფლებასთან, თუმცა ძირითადად განიხილავენ რუსეთთან დაკავშირებულ საკითხებს და ღიად ემსახურებიან კრემლის დღის წესრიგს. მაგალითად: Russia-Insider, Russian-Faith, The Duran, The Saker.  რუსეთის ფარგლებს გარეთ რეგისტრირებული ვებ–გვერდები, რომელთაც არ აქვთ აშკარა კავშირები რუსეთთან და განხილული საკითხების სპექტრი საკმაოდ ფართოა, თუმცა გამოირჩევიან პროკრემლისტური ნარატივით. მაგალითად: Global Research, Unz Review, Veterans Today, The Alt World ... რუსეთის აღნიშნული ვებგვერდები ყალბი ინფორმაციების სივრცეს ქმნიან. იზიარებენ ერთსა და იმავე შინაარსს, შეხედულებას, ნარატივს და ავრცელებენ სხვადასხვა აუდიტორიაზე მორგებულ ერთი და იმავე დეზინფორმაციას.  რა ხდებოდა და ხდება ამ მხრივ საქართველოში  ონლაინ სივრცელში ყალბი ინფორმაციის გავრცელების საკითხებზე ვესაუბრეთ მითების დეტექტორის წარმომადგენელს სოფო გელავას  „მითების დეტექტორი“  – ფაქტების გადამოწმების პლატფორმა, რომელიც არასამთავრობო ორგანიზაციის მედიის განვითარების ფონდის  მიერ არის შექმნილი.  რამდენი ცრუ ინფორმაცია, დეზინფორმაცია გავრცელდა კოვიდის ირგვლივ საქართველოში? და რას ისახავდა მიზნად?  სოფო გელავა – რაოდენობრივი მონაცემები არ დაგვითვლია, თუმცა ყალბი ინფორმაციის მასშტაბი საკმაოდ გაიზარდა. კოვიდზე დეზინფორმაციას როგორც პროკრემლიტური მედია საშუალებები, ასევე ახლად შექმნილი კლიკბაიტ საიტები ავრცელებდნენ, რომლებიც კოვიდის თემაზე კაპიტალიზებას ეკონომიკური მიზნისთვის ახდენდნენ.  ღიად პრორუსული მედიები და ფეისბუქ გვერდები კორონავირუსის შესახებ დეზინფორმაციას პოლიტიკური მიზნით ავრცელებდნენ. ისინი ცდილობდნენ, რომ დაეკნინებინათ ლუგარის ლაბორატორიის როლი კორონავირუსის დიაგნოსტირებაში, ასევე გაევრცელებინათ შეთქმულების თეორიები და კონსპირაციები. ეს კონსპირაციებიც ხშირად ურთიერთგამომრიცხავიც იყო. ერთი მხრივ, ეს წყაროები ავრცელებდნენ დეზინფორმაციას, რომ კორონავირუსი ხელოვნურად გამოყვანილი ვირუსი იყო და ის ჩინეთში ამერიკელმა სამხედროებმა განზრახ შეიტანეს, მეორე მხრივ კი, ამბობდნენ, რომ ვირუსი არსებობს, თუმცა არ არის იმდენად საშიში და ძლიერი, რამდენადაც ამას „ლიბერალური“ მედია აშუქებდა.  გამოიკვეთა ასევე ეკონომიკური მიზნის მქონე საიტები, რომლებიც კორონავირუსის შესახებ ავრცელებდნენ ყალბ ინფორმაციას. ერთი მხრივ თავად საიტები ცდილობდნენ მყვირალა, ყვითელი სათაურებით მკითხველის ყურადღების მიქცევას და კლიკების რაოდენობით თანხის გამომუშავებას, მეორე მხრივ კი ტრადიციული მედია უთმობდა სივრცეს ე.წ. ექიმებს, რომლებიც ამტკიცებდნენ, რომ მათ კორონავირუსის საწინააღმდეგო წამლები ჰქონდათ გამოგონებული. აქაც კონკრეტულად ამ „ექიმების“ კომერციული მიზანი იკვეთებოდა, რომ საზოგადოებაში გაევრცელებინათ ე.წ. წამლები, არადა წამლის რის შექმნაზე ახლაც მთელი მსოფლიოს სამედიცინო წრეები მუშაობენ.  უმეტესობის პირველწყარო საქართველოში იყო?  სოფო გელავა – უმეტესობის პირველწყარო საქართველოში იყო, თუმცა იკვეთებოდა ღიად პრორუსული მედია დეზინფორმაციის გამავრცელებლად. კლიკბაიტები საიტების ნაწილი საქართველოდან იმართებოდა, ასევე შეგხვდა ქართულენოვანი კლიკბაიტ საიტი, რომელიც იმართებოდა რუსეთიდან, ასევე ქართულენოვანი საიტი, რომელთა IP მისამართები ევროპაში იყო რეგისტრირებული.  როგორ ვრცელდება? და ვინ ავრცელებს ყალბ ინფორმაციას? სოფო გელავა – როგორც კლიკბაიტ, ასევე პრორუსულ მედიას აქვს ინფორმაციის გავრცელების სქემა. საიტები და მასთან დაკავშირებული ადმინისტრატორები (როგორც წესი, ყალბი ანგარიშები) ქმნიან სხვადასხვა თემატურ ჯგუფებს, რომლებშიც ათასობით ადამიანია გაწევრიანებული. ჯგუფების თავდაპირველი თემატიკა საკმაოდ მრავალფეროვანია და საზოგადოების ნებისმიერ ინტერესს შეიძლება მოერგოს, იქნება ეს სპორტი თუ ხელოვნება. ეს ჯგუფები გამზადებული აუდიტორიაა, სადაც შემდეგ დეზინფორმაციული საიტებიდან ხდება ინფორმაციის გადაზიარება. პანდემიის გეოპოლიტიკურ ჭრილზე ვესაუბრეთ რონდელის ფონდის მკვლევარს გიორგი ბილანიშვილს.  საქართველოს სტრატეგიისა და საერთაშორისო ურთიერთობების კვლევის ფონდი (რონდელის ფონდი), რომელიც 1998 წელს დაარსდა, არის პოლიტიკის ანალიზის დამოუკიდებელი, არამომგებიანი ცენტრი. პანდემია, გეოპოლიტიკა და დეზინფორმაცია – რომელმა ქვეყნებმა გამოიყენა, რატომ და მიაღწიეს თუ არა მიზანს? გიორგი ბილანიშვილი – პანდემიაზე დეზინფორმაციის კონტექსტში ყველაზე ხშირად რუსეთის ფედერაციას, ჩინეთს და ირანის ისლამურ რესპუბლიკას ახსენებენ. განსაკუთრებით ევროპაში პანდემიის გავრცელების საწყის ეტაპზე, ამ ქვეყნების მხრიდან დეზინფორმაციის გავრცელების აქტიურ მცდელობას ჰქონდა ადგილი.  თუ დავკონკრეტდებით რუსეთზე, უნდა ითქვას, რომ COVID 19-ის გავრცელების ფონზე, მოსკოვის დეზინფორმაციის მოკლევადიანი მიზანი საკუთარი სიძლიერის წარმოჩენა იყო, დასავლეთის ქვეყნებში პანდემიის გავრცელებით გამოწვეული სერიოზული პრობლემების ფონზე. ეს მოკლევადიანი მიზანი ვერ შესრულდა, რადგან რუსეთი სულ მალე თავად აღმოჩნდა პანდემიის ფართოდ გავრცელების მსხვერპლი.  რაც შეეხება გრძელვადიან მიზანს, ეს არის დასავლეთის დისკრედიტაცია, რისთვისაც რუსეთი, როგორც COVID 19-ის გავრცელების, ისე სხვა ტიპის საბაბის გამოყენებას ცდილობს ხოლმე პერმანენტულად. ზოგადად მიზნების მიღწევაზე საუბარი მაინც ჯერ-ჯერობით ნაადრევია, რადგან პანდემია არ დასრულებულა და როგორც რუსეთის, ისე სხვა ქვეყნების მხრიდან ისევ არის მოსალოდნელი, რომ შექმნილი ფონის გამოყენება მოხდეს დეზინფორმაციის მიზნით.  რა ტენდენციები გამოიკვეთა საქართველოს მიმართ?  გიორგი ბილანიშვილი – საქართველოშიც, პრინციპში იგივე თემები გამოიკვეთა რაც ბევრ სხვა ქვეყანაში. მათ შორის შეიძლება გამოვყოთ:  COVID 19-ის ხელოვნურად გავრცელება ვაქცინაციის ჩატარების მიზნით, რომელსაც ადამიანების ე.წ. დაჩიპვასთან და „მართვასთან“ აკავშირებენ;  ახალ ტექნოლოგიებთან, კერძოდ G5-თან COVID 19-ის გავრცელების დაკავშირება; დედამიწის მოსახლეობის შემცირების მიზნით COVID 19-ის გავრცელება, რასაც უფრო ხშირად ბილ გეიტსთან აკავშირებენ. თუ შევაჯამებთ, გავრცელებული დეზინფორმაციული ნარატივი სამივე შემთხვევაში პროგრესის და თუ პირდაპირ არა ირიბად მაინც დასავლეთის წინააღმდეგ არის მიმართული.  ასევე, შედარებით სუსტად, მაგრამ მაინც იყო გარკვეული მცდელობა COVID 19-ის გავრცელება ლუგარის ლაბორატორიასთან და შესაბამისად აშშ-სთან დაეკავშირებინათ. თუმცა, ამან გასაგები მიზეზების გამო, ყველაზე ნაკლებად იმუშავა.  თქვენი აზრით, რატომ წამოწიეს ახლაც ლუგარის ლაბორატორიის თემა? მით უმეტეს, რომ კოვიდმა ქვეყანაში ამ ლაბორატორიის არსებობის საჭიროება კარგად გამოკვეთა?  გიორგი ბილანიშვილი – რუსეთმა, როგორც ჩანს, საწყის ეტაპზე მაინც, COVID 19-ის გავრცელება ხელსაყრელ გარემოებად ჩათვალა ლუგარის ლაბორატორიის თემის წამოსაწევად, რათა მასთან ინფექციის გავრცელება დაეკავშირებინა, მსგავსი რამის მცდელობაც მას წარსულშიც არაერთხელ ჰქონია და მომავალშიც ექნება. აქვე უნდა ითქვას ისიც, რომ ასეთივე მცდელობას ქონდა ადგილი რამდენიმე პოსტ-საბჭოთა ქვეყანაში, სადაც მსგავსი ლაბორატორიები მოქმედებს. მაგალითად, დეზინფორმაციის ფართო კამპანია იყო გაშლილი ყაზახეთში, კერძოდ ალმა-ათში არსებული რეფერალური ლაბორატორიის წინააღმდეგ, რომელსაც პირდაპირ უკავშირებდნენ COVID 19-ის გავრცელებას ჩინეთში. ანალოგიურად, უკრაინაშიც გაიშალა დეზინფორმაციის კამპანია ე.წ. აშშ-ის ლაბორატორიების წინააღმდეგ (ამ თემაზე შეგიძლიათ იხილოთ სტატია). ამ თემას თუ შევაჯამებთ, რუსეთის მხრიდან ადგილი ჰქონდა აშშ-ის წინააღმდეგ მიმართულ დეზინფორმაციის კამპანიას არა მხოლოდ საქართველოში, არამედ უფრო ფართოდ პოსტ-საბჭოთა სივრცეში. ამით რუსეთი ასევე შეეცადა მიენიშნებინა, რომ მას შეუძლია აშშ-ის კონკრეტული პრობლემები შეუქმნას, რათა ეს თემა ორმხრივ ურთიერთობებში ვაჭრობის საგნად ექცია.

თავიდან მხოლოდ ოთხი წევრი ჰყავდა სოფელ მარადისის ეკოკლუბს. მისი შექმნის იდეა ერთ-ერთ სკოლის მოსწავლეს გაუჩნდა, რაც მალევე იქცა რეალობად და კლუბის შექმნის პირველივე წელს მათ ნიკო კეცხოველის სასკოლო კონკურსში მეორე ადგილი დაიკავეს. ბავშვებმა დაიწყეს თანამშრომლობა ევროპის ფონდთან, მარნეულის მერიასთან, ტელევიზიებთან, რადიოსთან, დემოკრატიული ჩართულობის ცენტრთან და სხვადასხვა არასამთავრობო ორგნიზაციებთან.  პირველივე წელს, ეკოკლუბის ინიციატივით 1600 კგ მაკულატურა ჩაბარდა და ამით კლუბის წევრებმა სკოლის ბიბლიოთეკისთვის წიგნები შეიძინეს. მათ ასევე გაიმარჯვეს პროექტში, რომლის ფარგლებშიც სოფელში ნაგვის ურნები დადგეს და ასევე წამოიწყეს გამწვანების ინიციატივა - სოფლის თითქმის ყველა მაცხოვრებელმა თითო ხე დარგო თავის სახელზე. მას შემდეგ, რაც ეკოკლუბის დამაარსებლებმა სკოლა დაამთავრეს, კლუბის მართვა მეათე, მეთერთმეტე და მეთორმეტე კლასელებმა განაგრძეს. 2019 წელს მათ შემოდგომის ფესტივალი გააკეთეს, სადაც საკუთარი ხელით გაკეთებული ნივთები გაყიდეს და შემოსული თანხაც პირველად ჩადეს ქველმოქმედებაში. ამის შემდეგ კლუბმა მემორანდუმი გააფორმა დეკორატიული მცენარეებისა და ტყის ენდემური სახეობების მწარმოებელ ასოციაციასთან და მათი დახმარებით სათბურში დარგეს კომბოსტო, სალათის ფურცლები და სხვადასხვა ყვავილები.  2020 წელს ეკოკლუბი "მაი" რთული მდგომაროების წინაშე აღმოჩნდა, რადგან პანდემიის გამო მარნეული წითელ ზონაში მოყვა, თუმცა სკოლის მოსწავლეებმა ეს შემთხვევა ახალ გამოწვევად მიიღეს და ისინი სათბურიდან აღებული მოსავლით სოციალურად დაუცველ ოჯახებსა და შეზღუდული შესაძლებლობების მქონე პირებს საკვები პროდუქტებით დაეხმარნენ. სულ ცოტა ხნის წინ, ეკოკლუბის წევრებმა სოციალური ქსელის მეშვეობით შეიტყეს რომ სოციალურად დაუცველ ბავშვებს სათამაშოები უნდოდათ… ეკოკლუბელებს ბევრი არც უფიქრით, მათ მალევე მოიტანეს სახლებიდან თავიანთი სათამაშოები და ამ ინიციატივას მთელი სოფელი შეუერთდა.  თუ მოსწავლეები მოიდომებენ, ყველაფერი გამოვა!

„თავიდან ყოველთვის ძალიან რთულია… გაქვს მომენტები, როცა ვერ ეგუები, თითქოს არ აღიარებ რომ ეს შენს თავს ხდება. იბნევი და არ იცი რა გააკეთო, ვის მიმართო დასახმარებლად მაშინ, როდესაც გარშემო ამდენი დაბრკოლებაა. გიგი აუტისტური სპექტრის მქონე ბავშვია, 4 წლის რომ იყო, ამის შესახებ ჩვენ მაშინ გავიგეთ.  ყველაზე მნიშვნელოვანი და რთული პრობლემები სწორედ აქედან იწყება, როცა სვამენ საკმაოდ რთულ დიაგნოზს, გარშემო კი გხვდება საოცრად არაჯანსაღი დამოკიდებულება, სოციალური ბარიერები, არასაკმარისი ცნობიერება საზოგადოების მხრიდან. გარდა ამისა, ჩვენ ზუგდიდში ვცხოვრობთ, ამ რეგიონში კი თერაპიული ცენტრი არ არსებობდა. წლების განმავლობაში, ჩვენ მუდმივად დავდიოდით თბილისში თერაპიისთვის, რაც საკმაოდ დიდ ხარჯებთან იყო დაკავშირებული, ბევრს კი საერთოდ არ აქვს ამის შესაძლებლობა.  ის საჭიროებები, რაც აუტისტური სპექტრის მქონე ბავშვებს აქვთ, ყველაზე უკეთ სწორედ ამ ბავშვების მშობლებმა იციან, ამიტომ 2015 წელს, მე, მაკა დგებუაძემ და ირმა ნოდიამ გადავწყვიტეთ ჩვენს რეგიონში პირველი, სასიცოცხლოდ მნიშვნელოვანი ცენტრი დაგვეარსებინა, რომელიც სწორედ განსაკუთრებული საჭიროებების მქონე ბავშვებს დაეხმარებოდა, გაუწევდა მათ თერაპიულ მომსახურებას.  ასოციაცია "გზამკვლევს" დღეს 18 ბენეფიციარი ჰყავს, რომლებსაც მუნიციპალიტეტი თვეში თერაპიის 18 საათს უფინანსებს. თუმცა ძალიან მნიშვნელოვანია რომ თბილისის მსგავსად, რეგიონშიც ბოლომდე დაფინანსებული იყოს თერაპიული მომსახურება (20 საათი), რადგან სწორედ ABA თერაპია, ქცევის გამოყენებითი ანალიზი, ერთ-ერთი ყველაზე წარმატებული მეთოდია აუტიზმის მდგომარეობის გასაუმჯობესებლად.  დღესდღეობით პრობლემები ძალიან კომპლექსურია, ხშირად თავად მშობლებსაც კი არ აქვთ საკმარისი ინფორმაცია, ამას ემატება საზოგადოებრივი სტიგმებიც, მაგრამ მე, გიგის მაგალითზე შემიძლია ვთქვა, რომ არასდროს უნდა შევწყვიტოთ ბრძოლა ჩვენი შვილების მომავლისთვის.  გიგი ძალიან კარგად ხატავს, საყვარელი ადგილი კი თავისი სახელოსნოა. შექმნილ თითოეულ ნამუშევარს თავისი ისტორია აქვს, რაც მე კიდევ ერთხელ მარწმუნებს, რომ ჩვენ აუცილებლად უნდა ვიზრუნოთ ჩვენი შვილების განვითარებაზე და აღმოვაჩინოთ მათში უნიკალური უნარები“, ნათია სახოკია, გიგი სიჭინავას დედა.

აფასებ უამრავ ფოტოს?  ადევნებ თვალს მეგობრების ისტორიებს?  შემთხვევით მოგონილ ახალ ამბებსაც ხომ არ კითხულობ?  არადა, ამ 20 წუთში შეგიძლია ისწავლო მეტი https://bit.ly/ისწავლემეტი

5G და კორონა? (X) ნუთუ გვჩიპავენ? (X) სოციალურ ქსელებსა და სხვადასხვა ვებ-გვერდებზე ხშირად შეხვდებით აქტუალურ, საჭირბოროტო თემებზე სტატიებს, დისკუსიებსა თუ უბრალოდ ფოტო/ვიდეო მასალას. რომელიც შეიძლება სულაც არ შეესაბამებოდეს სიმართლეს. მეტიც, ის დეზინფორმაცია და ხელოვნურად შექმნილი ფოტო/ვიდეო მანიპულაცია იყოს.  მითების დეტექტორი მედიის განვითარების ფონდის ფაქტების გადამოწმების პორტალია, სადაც შენ შეგიძლია გაეცნო სხვადასხვა კვლევებს, მიიღო ინფორმაცია იმაზე, თუ ვინ შეიძლება იდგეს პროპაგანდის უკან, ვის შეიძლება სჭირდებოდეს ყალბი გვერდებისა და ტროლების მიერ გავრცელებული ამბები და ასევე გადაამოწმო შეესაბამება თუ არა სიმართლეს რამდენიმე წუთის წინ წაკითხული შოკისმომგვრელი ამბავი.  არა, არ გვჩიპავენ  არც 5G ანტენა ასხივებს კორონავირუსს  არ გახდე დეზინფორმაციის მსხვერპლი  #ესქვეყანაშენია

მიხეილ მუსხელიშვილი (მიშელ მუსხელი) ერთ-ერთი იმ ქართველთაგანი იყო, რომელიც ევროკავშირის შექმნამდე, ერთიანი ევროპის იდეაზე საუბრობდა. ის 1903 წლის 8 ივლისს თბილისში, ვახტანგ მუსხელიშვილისა და ნატალია მირზაშვილის ოჯახში დაიბადა. მიხეილ მუსხელიშვილი იურისტი, მეცნიერი, საერთაშორისო სამართლის დარგის სპეციალისტი, ევროპის ხალხთა კონგრესის პრეზიდენტი, ევროპის ფედერალისტური მოძრაობის ცენტრალური კომიტეტის წევრი, ევროპული ფორმაციის ინტერნაციონალური ცენტრის ბიუროს ვიცე–პრეზიდენტი, სპორტსმენი, მთამსვლელი და "აკადემიური პალმის" ჯილდოს კავალერი იყო. 921 წელს, 18 წლის ასაკში ემიგრაციაში წავიდა და უმაღლეს განათლებას გეტინგენის, მიუნხენის, ლიონის და პარიზის სასწავლებლებში ეუფლებოდა. 1932-1933 წლებში, უკვე მიშელ მუსხელად მონათლულმა, მოღვაწეობა პარიზის უნივერსიტეტის საერთაშორისო გამოკვლევათა უმაღლეს ინსტიტუტში გააგრძელა, 1935-1948 წლებში კი კაიროს სამართლის ფრანგული სკოლისა და კაიროს უნივერსიტეტის პროფესორი გახდა. 1948 წლიდან გარდაცვალებამდე სტრასბურგის უნივერსიტეტის სამართლის, პოლიტიკურ და ეკონომიკურ მეცნიერებათა ფაკულტეტის საერთაშორისო საჯარო სამართლის კათედრას ხელმძღვანელობდა. ევროგაერთიანების იდეით აღტაცებულმა მეცნიერმა მრავალი ნაშრომი მიუძღვნა ერთიანი ევროპის იდეას, მათ შორის, თანამოაზრეებთან ერთად შექმნა ევროპის ფედერალი კონსტიტუციის პროექტი. მრავალი წლის შემდგომ მუსხელის და მისი თანამოაზრე მეცნიერების იდეა – ერთიან ევროპაზე რეალობად იქცა... მან გაუსწრო დროს.

სიცოცხლისუნარიანი სამოქალაქო საზოგადოებისთვის მნიშვნელოვანია, რომ აქტიურ ადამიანებს და საზოგადოებრივ ჯგუფებს ისეთ ცოდნაზე მიუწვდებოდეთ ხელი, რომელიც საშუალებას მისცემს გაძლიერდნენ და საზოგადოებისთვის სასარგებლო საქმე უკეთესად აკეთონ. კონსულტაციისა და ტრენინგის ცენტრი - CTC უკვე 20 წელია რაც არსებობს და ის რამდენიმე მიმართულებით მუშაობს, ესენია: 1.სამოქალაქო საზოგადოება 2.კარგი მმართველობა და ძლიერი თვითმმართველობა 3.თემის განვითარება და მეწარმეობა 4.ინიციატივები განათლებაში აქტიური საზოგადოების გარეშე შეუძლებელია ქვეყნის განვითარება – ასე ფიქრობენ CTC-ში და მათი საქმიანობა სწორედ ძლიერი სამოქალაქო საზოგადოების ფორმირებისკენ არის მიმართული. #განვითარებაცვლილებებისთვის აუცილებელია, რადგან #ესქვეყანაშენია

„ადამიანი, ისევე როგორც სხვა ცოცხალი ორგანიზმები, ბიომრავალფეროვნების ნაწილს წარმოვადგენთ. ეს არის ერთი სისტემა, ჯაჭვი, სადაც ყველა რგოლი პირდაპირ თუ არაპირდაპირ ერთმანეთზეა დამოკიდებული. ბიომრავალფეროვნება სამი დონის მიხედვით არის წარმოდგენილი: გენეტიკური, სახეობრივი და ეკოსისტემური. ჯანსაღი ეკოსისტემების შენარჩუნება მნიშვნელოვან როლს თამაშობს სუფთა ჰაერის, სუფთა წყლის წარმოქმნაში და ბუნებრივი კატასტროფების შემცირებასა და თავიდან არიდებაში. საბუკო 2008 წლიდან ჩართულია ველური ბუნების დაცვაში, თუმცა თავდაპირველად ჩვენ მოღვაწეობა ბათუმში დავიწყეთ, სადაც მტაცებელ ფრინველთა გადაფრენას ვაკვირდებოდით და არალეგალური ნადირობის შესამცირებლად ვმუშაობდით. დღესდღეობით ეს პრობლემა და მიმართულება კვლავ აქტუალურია, თუმცა ერთ-ერთ დიდ პროექტს საბუკოსთვის ჭაჭუნას აღკვეთილის და მიმდებარე ტერიტორიების აღდგენა და კონსერვაცია წარმოადგენს. უახლოეს მომავალში მდინარეების მონიტორინგის პროექტსაც ვიწყებთ." - ნათია ჯავახიშვილი, ორგანიზაცია საბუკოს ხელმძღვანელი. მნიშვნელოვანია, თითოეულმა ჩვენგანმა იზრუნოს ბიომრავალფეროვნების შენარჩუნებაში, რადგან #ესქვეყანაშენია

ხელოვნების საერთაშორისო ცენტრი1995 წელს დაარსდა, რომლის მთავარი მისიაა არამხოლოდ ჩვენი კულტურისა და კულტურული მემკვიდრეობის შენარჩუნება, არამედ ამ სფეროში არსებული პრობლემების გადაჭრაც. ხელოვნების საერთაშორისო ცენტრს 4 ძირითადი პროგრამა აქვს: 1. ტრადიციული რეწვისა და შემოქმედებითი ინდუსტრიების განვითარების პროგრამა 2. კულტურული მემკვიდრეობის დაცვის და შესაბამისი გამოყენების პროგრამა 3. საგამოფენო საქმიანობის პროგრამა 4. ქართული კვლევების საერთაშორისო ინიციატივის პროგრამა 25 წლის განმავლობაში ცენტრმა საკმაოდ ბევრ მიღწევას მოუყარა თავი, მონაწილეობა მიიღო ქართული სახელოვნებო სფეროს გავნითარებაში და განახორციელა მსხვილმასშტაბიანი პროგრამები ევროკავშირის თანადაფინანსებით.

სტრატეგიისა და საერთაშორისო ურთიერთობების კვლევის ფონდი 1998 წელს, ალექსანდრე რონდელის ინიციატივით შეიქმნა. ხშირად ორგანიზაციას რონდელის ფონდსაც უწოდებენ. ის ანალიტიკური ორგანიზაციაა, რომელიც სხვადასხვა მიმართულებით მუშაობს: საგარეო და უსაფრთხოების პოლიტიკის საკითხები, კვლევები, საჯარო მოხელეების, ახალგაზრდების სწავლება და სხვა. "ახალგაზრდებით უნდა დავიწყოთ" – ასე ფიქრობდა ალექსანდრე რონდელი, რომელიც ყოველთვის დიდ ყურადღებას უთმობდა სტუდენტებსა და ახალგაზრდებს.

გაიცანით ახალგაზრდები, რომლებიც აქტიურად ეხმარებოდნენ საზოგადოებას covid-19-ის წინააღმდეგ ბრძოლაში. „ჩვენ ვთქვით: მოდი, კი არ გავჩერდეთ, არამედ ადგილობრივ ხელისუფლებას და მოსახლეობას გვერდში დავუდგეთ და covid-19-ის წინააღმდეგ ბრძოლაში დავეხმაროთ... დასაწყისისთვის აქცენტი მრავალშვილიან ოჯახებზე გავაკეთეთ, გაეროს ბავშვთა ფონდის მეშვეობით, მთავრობის ადმინისტრაციამ ჰუმანიტარული დახმარების ყუთები გამოგვიგზავნა, რაც სწორედ ამ ოჯახებში დავარიგეთ. ასევე გაეროს განვითარების პროგრამისგან მივიღეთ სტიკერები “დაიცავი დისტანცია,” რომლებიც ჩვენი ორგანიზაციის წარმომადგენლებმა თეთრიწყაროს აფთიაქებსა და სუპერმარკეტებში გააკრეს. პარალელურად ჩართულები ვიყავით ვებსაიტ StopCov.ge-ის სომხურ ენაზე თარგმნაში, შემდეგ კი საფრანგეთის საელჩოს დახმარებით ეთნიკურ უმცირესობებს, თვითდასაქმებულებს, მარტოხელა დედებს და მოცუხებს, ჯამში 73 ოჯახს, ჰიგიენური საშუალებები და პროდუქტები მივუტანეთ. ეს მხოლოდ ჩვენ მიერ განხორციელებული აქტივობების მცირე ნაწილია, თუმცა, რაც ყველაზე მეტად მახარებს, არის ის, რომ ამ პერიოდმა მთლიანად საზოგადოება გაგვაერთიანა, ერთ გუნდად შეგვკრა და გაგვხადა უფრო მოტივირებულები. ახალგაზრდები კი ისე, როგორც არასდროს ვიბრძვით ერთმანეთის დასაცავად და გასამხნევებლად.” - ლუსო დოსტიბეგიანი, თეთრიწყაროს ახალგაზრდული ცენტრის დამფუძნებელი. ფართო ხედვის მქონე საზოგადოება ქმნის ჯანსაღ და თანაბარ გარემოს. სამოქალაქო პასუხისმგებლობა კი შენი მისიაა, რადგან #ესქვეყანაშენია