Csogeorgia.org-ის მონაცემებით, საქართველოში 1289 აქტიური საზოგადოებრივი ორგანიზაციაა. მათი საქმიანობა ცხოვრების, ფაქტობრივად, ყველა მიმართულებას მოიცავს - ადამიანის უფლებებს, სამართალს, ჯანდაცვას, სოციალურ სფეროს, ახალგაზრდობისა და ბავშვების თემატიკას, განათლებას, მეცნიერებას, კულტურას, სოფლის მეურნეობას, სპორტს, ტურიზმს, ახალ ტექნოლოგიებს, მედიას, თვითმმართველობისა და თემის განვითარებას, გენდერს, ეკონომიკას, ბიზნესის გაძლიერებასა და დასაქმების ხელშეწყობას, კონფლიქტების მოგვარებას, დევნილებისა და ლტოლვილების, მიგრაციის საკითხებს, ეკოლოგიას, ცხოველთა უფლებებს, არჩევნებს, ანტიკორუფციულ და მონიტორინგის სეგმენტს, პროფესიულ კავშირებს, დემოკრატიის ხელშეწყობასა და სხვა.  ეს 1289 ორგანიზაცია, წლის განმავლობაში, მუშაობს უამრავ პროექტზე, რომლითაც ქვეყნის განვითარებისთვის არაერთი მნიშვნელოვანი საქმე კეთდება. ამ წერილის მიზანია მოგითხროთ, როგორ და რას საქმიანობდნენ ქართული საზოგადოებრივი ორგანიზაციები გასულ, 2020 წელს. რამდენიმე გვერდი მათ ყველა აქტივობას, ბუნებრივია, ვერ დაიტევს. ჩვენ ვეცდებით მათგან ყველაზე საინტერესო თემები გამოვყოთ, დაგანახოთ ის საქმეებიც, რომელიც, პოლიტიკური სკანდალებით გაჯერებული საინფორმაციო საშუალებების ობიექტივში, ხშირად, ვერ ხვდება და საზოგადოების მხოლოდ მცირე ნაწილისთვის არის ცნობილი.  მაკა ჯაიანი COVID 19 და საპარლამეტო არჩევნები, უდაოდ, ის თემებია, გასულ წელს საქართველოში ყველაზე მნიშვნელოვანი რომ იყო. შესაბამისად, ერთიც და მეორეც სსო-ების დღის წესრიგის მთავარ საკითხებს წარმოადგენდა. როგორ შევამციროთ კორონავირუსის ინფექციის გავრცელების რისკი, პანდემია და სტრესის მართვის სტრატეგიები, ფსიქიკური ჯანმრთელობა და COVID 19, კორონავირუსის პანდემიის გავლენა ოჯახში და ქალთა მიმართ ძალადობაზე, COVID 19-თან დაკავშირებული გამოწვევები შრომით ურთიერთობებში, კორონა ვირუსი, ეკონომიკური კრიზისი და ადამიანის უფლებები - ამ და ბევრ სხვა საკითხზე სსო-ებმა არაერთი საინფორმაციო კამპანია და სწავლება გამართეს, შექმნეს და განახორციელეს პროექტები, რომელიც კორონავირუსით გამოწვეულ ახალ რეალობას შეესაბამებოდა.  8-დან 13 წლამდე ასაკის ბავშვებისა და მოზარდებისთვის სსო-ებმა გახსნეს ონლაინ აგრო სკოლა, სადაც მიწის დამუშავებასა და მცენარეების მოვლას ასწავლიდნენ; საზოგადოების დახმარებითა და ადგილობრივი ბიზნესის მონაწილეობით, სასურსათო კალათებით, მარტო სიღნაღის მუნიციპალიტეტის 12 სოფელში, 150 მარტოხელა ხანდაზმული მოამარაგეს; საჭირო უნარ-ჩვევები შეასწავლეს მოხალისეობის მსურველებს და სხვადასხვა საჭიროებების მქონე ადამიანების დახმარების საქმეში ჩართეს; უფასო ონლაინ კურსების საშუალებით, ახალი ცოდნის მიღების შესაძლებლობა მისცეს ადამიანებს, შექმნეს ვიდეო ტუტორიალები ისეთი აუცილებელის საკითხების ირგვლივ, როგორიცაა სამოტივაციო წერილის წერა, გასაუბრებისთვის თუ საჯარო გამოსვლისთვის მომზადება, ბლოგის შექმნა და სხვა. მათ, ვისაც შესაბანისი ტექნიკა არ ჰქონდა, შეუძინეს და გადასცეს პლანშეტები... უფრო მეტი და შედარებით სრულად იმის შესახებ, თუ რას აკეთებდნენ სსო-ები პანდემიის დროს მოსახლეობისთვის ამ ბმულზე შეგიძლიათ. ამ პროექტების განხორციელება შესაძლებელი გახადეს საერთაშორისო ორგანიზაციებმა და დონორებმა, რომელებიც საქართველოს საჭიროებებს, ამჯერადაც, გულისხმიერად მოეკიდნენ. თუმცა, ფინანსური და მატერიალური დახმარების გარდა, თვალსაჩინო იყო მათი მორალური მხარდაჭერაც. მაგალითად, ამერიკის შეერთებული შტატების საელჩომ გადაწყვიტა, დაკეტილი სკოლების პირობებში, ჩვენს ბავშვებს სწავლის გაგრძელებაში დახმარებოდა. ამ ინიციატივის ფარგლებში, ამერიკელი დიპლომატები ბავშვებს ინგლისურ ენაში ამეცადინებდნენ, რისთვისაც თავიანთ საყვარელ მოთხრობებს წაუკითხავდნენ და ესაუბრებოდნენ. ყოველ სამუშო დღე, ფეისბუქ ლაივის მეშვეობით, საელჩოს თანამშრომელი, ალთეა ქოლი-მერფრი, პრეს-ატაშე, კრის დავენპორტი, ბურკების ოჯახი და სხვები კომპიუტერს წიგნით ხელში უსხდნენ და ქართველი პატარების განწყობასა და განათლებაზე ზრუნავდნენ.  დავუბრუნდეთ სსო-ებს. COVID 19 და არჩევნები ერთ-ერთი გახლდათ იმ თემებს შორის, რომლისკენაც ქართული საზოგადოებირვი ორგანიზაციების განსაკუთრებული ყურადღება იყო მიმართული. პარტიების პროგრამების მიმოხილვა - მათი მიზნები ქვეყნის ჯანდაცვის, სოციალური, საგანმანათლებლობ, გარემოსდაცვითი, შრომითი მოწყობის მიმართულებით, მინასაარჩევნო გარემოს მონიტრინგი, საარჩევნო კანონმდებლობის ცვლილება, მოსახლეობის უფლებები ხმის მიცემის პროცესში და სხვა საკითხებს სსო-ები კვლევებს, ინიციატოვებს, განცხადებებს, პრეს-კონფერენციებს უძღვნიდნენ; მუშაობდნენ უშუალოდ არჩევნების დროს, შემდგომ პერიოდში, თვალ-ყურს ადევნებდნენ ვითარებას, რომ ხალხის ნება, მისი გადაწყვეტილება არჩევნების შედეგებში პირუთვნელად ასახულიყო.  ხელისუფლების კონტროლი სსო-ების ერთი ნაწილის საქმიანობის ძირითადი მიმართულებაა. გასულ წელს ისინი აფასებდნენ: როგორ ასრულებს საქართველო ასოცირების ხელშეკრულებას, რამდენად ქმედითი გამოდგა საჯარო სამსახურის რეფორმა, რამდენად სწორად იხარჯება სახელმწიფო ბიუჯეტის სახსრები, რა მდგომარეობა გვაქვს გამოხატვის, მედიის თავისუფლების, ზოგადად, ადამიანის უფლებების დაცვის კუთხით, ხომ არ ზიანდება გარემო კომერციული ინტერესების სასარგებლოდ და ა.შ. ამასთან, მუშობდნენ შრომის კანონში დაგეგმილ ცვლილებებზე, „შშმ პირთა უფლებების შესახებ“ კანონის პროექტზე, „ინფორმაციული უსაფრთხოების შესახებ“ კანონზე და სხვა, მიუთითებდნენ ხარვეზებზე, რომელიც ამ დოკუმენტებში დააფიქსირეს და მათი აღმოფხვრის გზებზე.  სსო-ების მიერ სასამართლოში მოგებულ საქმეებს შორის იყო ასეთიც - საქმე, რომლის მიხედვითაც, მაღალი თანამდებობის პირებზე ქალთა მიმართ ან ოჯახური ძალადობის გამო გაცემული ორდერების შესახებ ინფორმაცია საჯარო გახდება. ეს არის უპრეცენდენტო გადაწყვეტილება, რაც ქალთა მიმართ ძალადობის და ოჯახში ძალადობის შემთხვევაში, ინფორმაციის საჯაროობის გზით, პოლიტიკური თანამდებობის პირების მიმართ უმაღლესი საზოგადოებრივი კონტროლის სტანდარტს ამკვიდრებს. ამ გამარჯვების შედეგად, საქართველოს ნებისმიერ მოქალაქეს აქვს უფლება გაიგოს, არიან თუ არა პოლიტიკური თანამდებობის პირები ოჯახში მოძალადეები ან, ძალადობის გამო, გამოცემულა თუ არა ოდესმე მათ მიმართ შემაკავებელი ან/და დამცავი ორდერი.  სასამართლო, როგორც მესამე ხელისუფლება, ახალი მოსამართლეების შერჩევის წესი და მიმდინარეობა, საპროკურორო საბჭოს მიერ გენერალური პროკურორის კანდიდატურის შერჩევის პროცესი, შეწყალების წესი და პრაქტიკა საქართველოში, არასრულწლოვანთა დაკითხვის წესი და ამ მხრივ არსებული პრობლემები, დამოუკიდებელი ინსპექტორის შერჩევის წესი - სამართლის სფეროს არაერთი სხვა მიმართულება გასულ წელსაც საზოგადოებრივი ორგანიზაციების მუდმივი ყურადღების ქვეშ იყო. მათი აქტიურობითა დაპ რინციპული დამოკიდებულებით, ამ უმნიშვნელოვანეს სეგმენტს არც ქართული და არც საერთაშორისო საზოგადოების ყურადღება აკლდა.  სახელმწიფოებირივი მნიშვნელობის საქმეების გარდა, სსო-ების საქაღალდეებში ინახება ათასობით საქმე, რომელიც მოქალაქეების ყოფითი პრობლემების მოგვარებას, სხვადასხვა ინსტანციის სასამართლოში მათ უფასო ადვოკატირებას, მათი უფლებების დაცვას ეხება. სსო-ები იდგნენ სოციალური მუშაკების გვერდით, სამსახურიდან მათი გათავისუფლების დროს, იბრძოდნენ მაღაროებში დასაქმებული მამაკაცებისა და სამკერვალოებში დასაქმებული ქალების შრომით ექსპლუატაციის წინააღმდეგ, მუშაობდნენ მსხვერპლის სტატუსის მოსაპოვებლად ოჯახურ ძალადობას გარიდებული ქალებისთვის, არკვევდნენ და შესაბამისი ორგანოების წინაშე აყენებდნენ სამუშაო ადგილებზე დასაქმებულთა შევიწროების საკითხებს, ქვეყანაში უსახლკარობის მაჩვენებლებს, სწავლობდნენ შრომით ურთიერთობებში შეზღუდული შესაძლებლობების მქონე პირების მდგომარეობას, იბრძოდნენ მის გასაუმჯობელსებლად და ა.შ.  ცალკე უნდა აღინიშნოს სამუშაო, რომელიც საზოგადოებრივმა ორგანიზაციებმა პრაქტიკული განათლების თვალსაზრისით გასწიეს. იქნება ეს გზამკვლევი სოციალური საწარმოებისა და არასამეწარმეო იურიდიული პირებისთვის თუ მოძრავი ბიბლიოთეკა, რომელიც სამეგრელოში, მდინარე ჯუმის ხეობაში მდებარეობს ამავე სახელწოდების სოფელში განთავსდა, სხვადასხვა პლათფორმები, რომელიც მოქალაქეებს ახალი ცოდნის მიღების შესაძლებლობას აძლევს თუ ცოდნის კაფეები, რომელიც ქვეყნის სხვდასხვა წერტილში ქმნის უნიკალურ სივრცეებს საზოგადოებრივ ცხოვრებაში ახალგაზრდებისა და ხანდაზმულების ჩასართავად. და ეს მხოლოდ მცირე ნაწილია იმ საქმიანობისა, რომელსაც საზოგადოებრივი ორგანიზაციები ადამიანების უკეთესი ცხოვრებისთვის აკეთებენ.  უფრო მეტი და უფრო ვრცლად, სსო-ების საქმიანობის შესახებ, წაიკითხეთ ჩვენს პორტალზე ან სოციალური კამპანიის, „ეს ქვეყანა შენია“, გვერდზე სოციალურ ქსელში. ამ კამპანიის მიზანია საზოგადოებას სამოქალაქო ღირებულებები, საზოგადოებრივი ორგანიზაციების საქმიანობა, სამოქალაქო სექტორის ფუნქცია და როლი გააცნოს. კამპანია მიმდინარეობს პროექტის - „სამოქალაქო საზოგადოების განვითარების ინიციატივის“ - ფარგლებში და საერთაშორისო ინსტიტუტების ხელშეწყობით ხორციელდება. ევროკავშირი და კონრად ადენაუერის ფონდი (KAS) არიან ის ორგანიზაციები, რომელთა თანადგომით ეს კამპანია საზოგადოებასა და მისი განვითარებისთვის მომუშავე ორგანიზაციებს შორის თვალსაჩინო ხიდებს აგებს.

გთავაზობთ პოსტერების სერიას ჰაერის ხარისხის შესახებ – დაიცავი ბუნება, რადგან #ესქვეყანაშენია თბილისი – ჰაერის დაბინძურების მაჩვენებლითკრიტიკულ ზღვარზეა. დაიცავი შენი ქალაქი, რათა გაუმჯობესდეს ატმოსფერული ჰაერის ხარისხი. ბათუმი – ჰაერში მტვრის ნაწილაკების შემცველობა დასაშვებ ნორმას აღემატება. იარე ეკოლოგიური ტრანსპორტით ან ფეხით, დაიცავი გარემო. რუსთავი – ჰაერის ხარისხი საგანგაშოა. შეიტანე შენი წვლილი გარემო პირობების გაუმჯობესებაში.  ზესტაფონი და მის შემოგარენი – ექიმთა მიმართვიანობა მზარდია სხვადასხვა დაავადებების გამო, რაც ჰაერის დაბინძურების მაღალ მაჩვენებლთან პირდაპირ კავშირშია. ნუ დააბინძურებ, იზრუნე საკუთარ თავსა და გარშემო მყოფებზე.

საქართველოში ბევრი ადამიანი იღუპება და ხდება შშმ პირი საგზაო შემთხვევების გამო. ფონდი "პარტნიორობა საგზაო უსაფრთხოებისთვის" ახორციელებს პროექტებს, რომელიც ემსახურება საზოგადოებაში ცნობიერების ამაღლებას, ტრავმატიზმისა და სიკვდილიანობის შემცირებას გზებზე.

კოალიცია "დამოუკიდებელი ცხოვრებისათვის" მუშაობს ისეთ პროექტებზე, რომლებიც შეზღუდული შესაძლებლობის მქონე პირებს, ხელს შეუწყობს სრულფასოვანი ცხოვრების ჩამოყალიბებაში. გაეცანით მის საქმიანობას ჩვენს ვიდეოში.

ის, რაც შენთვის მინიმალურ ძალისხმევას მოითხოვს, ვიღაცისთვის სასიცოცხლოდ აუცილებელია. გახდი მოხალისე, დაეხმარე მას, ვისაც ყველაზე მეტად სჭირდები. #გაიზიარეპასუხისმგებლობა, რადგან  #ესქვეყანაშენია

48 საათიანი დამღლელი მორიგეობის შემდეგ, მოხალისეობრივად, კოვიდ პაციენტებს პირადად, ბინებში აკითხავს და ეხმარება. უმცროსი ექიმი - რეანიმატოლოგი ნანა სხილაძე, გვიყვება რამდენად მნიშვნელოვანია ახლა, კოვიდ პანდემიის დროს, ექიმების მოხალისეობრივი ინიციატივები.

სოფელ სკრაში მოხალისეები ველოსიპედებით აკითხავენ ხანდაზმულებს, აგროვებენ სარეცხს და სოციალურ სამრეცხაოში მიაქვთ, გარეცხილს კი უკან უბრუნებენ. პროექტს „გვიყვარხართ ბებია–ბაბუებო“ საზოგადოებრივი ორგანიზაცია „ბეთლემი“ 2017 წლიდან ახორციელებს, რომლის მიზანია ხანდაზმულთა ინტეგრაცია საზოგადოებაში და მათი პირობების გაუმჯობესება. სოციალური სამრეცხაო, სწორედ ამ პროექტის ფარგლებში შეიქმნა, რომელმაც ხანდაზმულთა ცხოვრება შეცვალა, ხოლო ზრუნვამ და ყურადღებამ მათი ცხოვრება შეამსუბუქა. ბებია, რომელის შთაგონებითაც პროექტი შეიქმნა, დღემდე ჩართულია ყველა აქტივობაში, რაც ყველასთვის თვალსაჩინო მაგალითია იმისა, რომ თითოეულ ადამიანს შეუძლია სხივი ცხოვრების გალამაზება, თუ ამის სურვილი და შესაძლებლობა აქვს. „ბეთლემი” 2000 წლიდან არსებობდა საინიციატივო ჯგუფის სახით, რომელში გაერთიანებული ადგილობრივი მაცხოვრებლები ყველაზე უკეთ იცნობდნენ გორის მუნიციპალიტეტში მდებარე სოფელ სკრის პრობლემებს. შემდეგ კი, საინიციატივო ჯგუფმა არასამთავრობო ორგანიზაცია ჩამოყალიბა. ჩატარებულმა მოკვლევამ აჩვენა, რომ ეპიდვითარებამ განსაკუთრებულად მწვავე ზემოქმედება იქონია სკრის თემში სოციალურად დაუცველ როგორც მარტოხელა მოხუცებზე, ისე სხვა სოციალურ ჯგუფებზე და ოჯახებზე. პენსიის ამარა დარჩენილები ვერ უმკლავდებიან კვების, მედიკამენტების, გადასახადების და გაუთვალისწინებელ ხარჯებს, რასაც თან ერთვის ასაკისგან გამოწვეული შეზღუდული ფიზიკური შესაძლებლობები, ახლობელი ადამიანების დაკარგვისგან მიღებული ტრავმა ან ოჯახური ძალადობის გაზრდილი შემთხვევები. ორგანიზაცია „ბეთლემი“ გეგმავს სკრის თემში დაეხმაროს კიდევ უფრო მეტ სოცალურად დაუცველ, დევნილ,მარტოხელა მოხუცს. ზამთარში გაუარესებული ამინდის გამო, ისინი გეგმავენ რომ ველოსიპედები დროებით ჩაანაცვლონ სამარშუტო მანქანით, სადაც დამონტაჟდება სარეცხის მანქანა და თითოეულ მოხუცს მოემსახურებიან საკუთარ ბინაზე მისვლით.  #გაიზიარეპასუხისმგებლობა და დაეხმარე მას, ვისაც ყველაზე მეტად სჭირდები, რადგან #ესქვეყანაშენია

პანდემიის პირობებში, განსაკუთრებით დაუცველები აღმოჩნდნენ ყველაზე მოწყვლადი ჯგუფები, ადამიანები, რომლებსაც გვერდში დგომა ისე სჭირდებათ, როგორც არასდროს. არასამთავრობო ორგანიზაციამ „სამოქალაქო საზოგადოების განვითარების ცენტრმა (CSDC)” წამოიწყო მიუსაფარი და მარტოხელა ქალების მხარდასაჭერი, მოხალისეობრივი კამპანია “ჩაერთე და ჩართე”. მოხალისეებისა და მხარდამჭერების ჩართულობით ისინი დაუკავშირდენენ 100 ქალს, რომელსაც შეზღუდვების პირობებშიც კი, მოხალისეებთან ერთად, აწვდიან პირველადი ჰიგიენის ნივთებსა და პროდუქტებს. აღნიშნული პროექტის განხორციელებაში უმნიშვნელოვანესი წვილილი მიუძღვის იმ 25 მოხალისეს, რომელიც ჩართულია კამპანიაში. ორგანიზაციის წარმომადგენლები ფიქრობენ, რომ მათი ერთ-ერთი მიღწევა ყველაზე რთულ პირობებში მარტოხელა ქალების მდგომარეობის შემსუბუქებაა. “საზოგადოების განვითარების ცენტრს (CSDC)” არაერთი მნიშვნელოვანი და წარმატებული პროექტი აქვს განხორციელებული. ერთ-ერთი მათგანი მიზნად ისახავდა საქართველოს ოკუპირებულ რეგიონში სკოლის მოსწავლეების ინფორმაციულ და ტექნოლოგიურ განვითარებას, ამ გზით ბავშვები ჩამოვიდნენ თბილისში და მოხალისეების ხელშეწყობით მეგობრული ურთიერთობები დაამყარეს თბილისში მცხოვრებ თანატოლებთან. ასევე ორგანიზაციისთვის ურთულესი პროექტი და გამოწვევა იყო, რომ მიუსაფარი ბავშვები ქუჩისთვის მოეწყვიტათ და დისტანციურ სწავლებაში ჩაერთოთ. მათი დაუღალავი შრომის შედეგად, ათობით ბავშვი სკოლაში ჩაირიცხა და დღესაც აქტიურად არიან სწავლებაში ჩართულნი. პანდემიის შედეგად არსებული შეზღუდვების მიუხედავად, კამპანია “ჩაერთე და ჩართე” გრძელდება და უსაფრთხოების ნორმების სრული დაცვით, მოხალისეებისა და მხარდამჭერების ჩართულობით, ისინი ყველაზე მძიმე ყოფას უმსუბუქებენ მარტოხელა და მიუსაფარ ქალებსა და ბავშვებს. #გაიზიარეპასუხისმგებლობა რადგან #ესქვეყანაშენია

საქართველოში მოხალისეობრივი აქტივობები გასული საუკუნიდან იღებს სათავეს. იდეალური მაგალითია პატარა გოგონას საქველმოქმედო წამოწყება, რომელიც ფართომასშტაბიან აქციად იქცა და დღემდე გრძელდება, რადგან ქალაქის დღესასწაულის სახე მიიღო. მე–20 საუკუნის დასაწყისში, ქუთაისში ალექსანდრა ჩიქოვოვანმა და მისმა მოხალისე მეგობარმა გოგონებმა საქველმოქმედო აქცია გამართეს, ისინი ყიდდნენ გვირილებს და შემოსული თანხით, ტუბერკულოზით დაავადებულ ადამიანებს ეხმარებოდნენ. გაიზიარე მათი სულისკვეთება, რადგან #ესქვეყანაშენია

მიტოვებული ადგილი, რომელიც გორის მთავარ სახელოვნებო სივრცედ გადაიქცა. იხილეთ ვიდეო გორელ ფოტოგრაფთა კლუბის უნიკალური მოხალისეობრივი პროექტის შესახებ.

იხილეთ ვიდეო, საქართველოსა და ევროპის საერთო ღირებულებების შესახებ

იმ დროს, როდესაც ქალაქი გაურკვევლობამ მოიცვა, ოთხმა მეგობარმა, ოთხმმა მარიამმა, გადაწყვიტა რომ ადამიანები სიკეთის გარშემო გაეერთიანებინა. როცა კორონავირუსის პირველი შემთხვევა დაფიქსირდა თბილისში, ადამიანებს შიში გაუჩნდათ, რომ საკვები და სხვა პროდუქტი ამოიწურებოდა, მაღაზიებში რიგები დადგა. ყველა კომპანია თუ დაწესებულება სხვა რეჟიმზე გადავიდა. ამ დროს, უფასო სასადილოებშიც შეიცვალა ყველაფერი, ზოგიერთი კი, საერთოდ დაიხურა. მოხუცები, ვინც სასადილოებით სარგებლობდნენ, ლუკმა–პურის გარეშე დარჩნენ. ეს ფაქტი გახდა მარიამებისთვის მთავარი შთაგონება, რომ შეექმნათ Facebook-ზე ჯგუფი, რომლის თავდაპირველი მიზანი იყო „კათარზისის“ მოხუცების დახმარება, ჯგუფის სახელი იყო “დავეხმაროთ კათარზისის მოხუცებს”. ქალაქში სიკეთის კეთებას მოწყურებული ბევრი ადამიანი აღმოჩნდა და სოციალურ ქსელში, მარიამების შექმნილი ჯგუფის წევრების რაოდენობა სწრაფად გაიზარდა, რამაც კამპანიის მასშტაბების გაზრდა და არა მხოლოდ „კათარზისის“ ბენეფიციარების დახმარება, არამედ ბევრი სხვა ხანდაზმულის დახმარება გახდა შესაძლებელი. ახლა ჯგუფის სახელია “დავეხმაროთ მოხუცებს”. სირთულეების მიუხედავად მოხალისეებმა შეძლეს ბენეფიციარების საკვებით, წამლებით თუ სხვა საჭირო ნივთებით მომარაგება ისე, რომ კამპანიაში ჩართული არც ერთი პირის ჯანმრთელობა საფრთხის წინაშე არ დამდგარა. როგორც მარიამები ამბობენ, მოხალისეობა პასუხისმგებლობასთან ერთად, უდიდესი ბედნიერებაა. დასძენენ, რომ ყოველდღიურ ცხოვრებაში ვერ აღვიქვამთ თუ როგორ უჭირთ სხვა ადამიანებს, როგორ სჭირდებათ მათ დახმარება და რა სირთულეების გადალახვა უწევთ. „თუ ერთხელ მაინც იქნებით მოხალისე და დაეხმარებით სხვებს, გაახარებთ მათ, იგრძნობთ თუ როგორი მნიშვნელოვანია თითოეული ადამიანი სამყაროსთვის და ამავე დროს მიხვდებით თუ როგორ ცვლის ეს გარემოება თქვენს ცხოვრებას  #გახდიმოხალისე #გააზიარეპასუხისმგებლობა რადგან  #ესქვეყანაშენია