ქვემო ქართლი. 2023 წლის 27 და 28 აპრილს სოციალური სამართლიანობის ცენტრის თანამშრომლებმა დმანისისა და ბოლნისის მოსახლეობას იურიდიული დახმარების მობილური კლინიკის ფარგლებში სამართლებრივი კონსულტაციები გაუწიეს. შეხვედრები ჩატარდა USAID სამართლის უზენაესობის პროგრამის მხარდაჭერით. „მოქალაქეებთან შეხვედრის შედეგად გამოიკვეთა, რომ დმანისელებისთვის მნიშვნელოვან პრობლემას წარმოადგენს რაიონში არსებული ინფრასტრუქტურული პრობლემები, კერძოდ საავტომობილო გზების მოუწესრიგებლობა და სასმელი წყლის ხარისხი. მათი შეფასებით, პრობლემურია პოლიციის თანამშრომლების მუშაობა, რაც მათ მიერ უფლებამოსილების ბოროტად გამოყენებაში გამოიხატება. მოქალაქეთა განმარტებით, ადგილზე ხშირად არის ადგილობრივი თვითმმართველობის მიერ დაფინანსებული პროექტებით გათვალისწინებული ბენეფიტებით უსამართლოდ სარგებლობის შემთხვევები. რაც შეეხება ბოლნისის მოსახლეობას, გაწეული სამართლებრივი კონსულტაციების დროს მოქალაქეები უმეტესად დაინტერესებულები იყვნენ სასოფლო-სამეურნეო მიწის ნაკვეთების საკუთრებაში რეგისტრაციითა და სახელმწიფოს საკუთრებაში არსებულ მიწებზე იჯარის მიღების საკითხებით. შეხვედრაში მონაწილეებისთვის აგრეთვე საინტერესო აღმოჩნდა მეუღლეთა თანასაკუთრების, განქორწინების შემდგომ ალიმენტის დანიშვნისა და სოციალური დახმარების მიღების საკითხები“. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ორგანიზაციები ნიკა გვარამიას საქმესთან დაკავშირებით ერთობლივ განცხადებას ავრცელებენ. „3 მაისი პრესის თავისუფლების საერთაშორისო დღეა. 1993 წლიდან დღემდე ეს თარიღი სიმბოლური მანიფესტია ყველა ხელისუფლებისთვის, რათა პატივი სცენ პრესას, როგორც თავისუფლების ერთ-ერთ მთავარ საყრდენ კედელს. ამ დღესთან დაკავშირებით, სამოქალაქო საზოგადოების ორგანიზაციები კიდევ ერთხელ ვეხმიანებით „მთავარი არხის“ გენერალური დირექტორის ნიკა გვარამიას საქმეს. მოვუწოდებთ: საქართველოს უზენაეს სასამართლოს დროულად, ობიექტურად და მიუკერძოებლად განიხილოს ნიკა გვარამიას წინააღმდეგ მიმდინარე სისხლის სამართლის საქმე; საქართველოს პრეზიდენტს, საქართველოს მიმართ ევროკომისიის რეკომენდაციების გათვალისწინებით, და საქმეზე საერთაშორისო და ადგილობრივი ორგანიზაციების, სახალხო დამცველის შეფასებების შესაბამისად, მიიღოს გადაწყვეტილება ნიკა გვარამიას შეწყალების თაობაზე“. სრულად... წყარო: gyla.ge

თბილისი. საერთაშორისო გამჭვირვალობა - საქართველოს იურისტებმა ჟურნალისტ მიხეილ სესიაშვილის საქმე სამივე ინსტანციის სასამართლოში მოიგეს. რუსთავი 2 სესიაშვილს კუთვნილ ხელფასსაც გადაუხდის და კომპენსაციასაც. სრულად... წყარო: ორგანიზაციის გვერდი სოციალურ ქსელში

თბილისი. 21 აპრილს, სოციალური სამართლიანობის ცენტრმა საჯარო დისკუსია გამართა. „საქართველოში, სხვა ქვეყნების მსგავსად, ბოლო წლებში გაძლიერდნენ მემარჯვენე, კონსერვატიული ძალები. აღნიშნული ჯგუფების ანტილიბერალური და ანტიდემოკრატიული დისკურსები, როგორც წესი, ისეთ მგრძნობიარე საკითხებს მოიცავს, როგორიცაა ოჯახი, რელიგია, ბავშვთა უფლებები, გენდერული იდენტობის და სექსუალობის საკითხები. მათ მიერ გავრცელებული მთავარი გზავნილები ხშირად მიზოგინიური და ჰომოფობიურია და ძალადობის უმძიმეს ფაქტებშიც ვლინდება“. წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი თვლის, რომ 1 მაისი, შრომის საერთაშორისო დღე, კიდევ ერთხელ შეხსენებაა იმისა, რომ საქართველოში მშრომელთა ინტერესები უგულებელყოფილი, ხოლო უფლებები - დაუცველია. „მიუხედავად იმისა, რომ ბოლო წლებში შრომითი კანონმდებლობა გაუმჯობესდა, ხოლო შრომის ინსპექციამ კვლავ დაიწყო ფუნქციონირება, სამუშაო ადგილებზე ბევრი არაფერი შეცვლილა: 2020 წლის შრომის რეფორმიდან სამი წლის შემდეგ, რომელიც, თავის დროზე, მეტ-ნაკლებად დადებითად შეფასდა, ჩვენ კვლავ ვერ ვხედავთ არსებით გაუმჯობესებას პრაქტიკაში, ხოლო გარკვეული საკითხები პრობლემურად რჩება კანონმდებლობის დონეზეც კი“, ნათქვამია განცხადებაში. სრულად... წყარო: ocialjustice.org.ge

სამცხე-ჯავახეთი. 5 მაისს სოციალური სამართლიანობის ცენტრი ნინოწმინდის მუნიციპალიტეტის სოფელ გორელოვკას მოსახლეობისთვის სამართლებრივი დახმარების შეხვედრებს გამართავს. სოციალური სამართლიანობის ცენტრის იურისტები ადგილობრივ მოსახლეობას სთავაზობენ უფასო სამართლებრივ კონსულტაციას მათთვის პრობლემატურ სამართლებრივ საკითხებზე. მათ შორის, ეთნიკური, რელიგიური ნიშნით დისკრიმინაციის, პოლიციის თანამშრომლების მხრიდან არასათანადო მოპყრობის, მოქალაქეობის, მიწაზე საკუთრების უფლების რეგისტრაციის საკითხებზე, ოჯახში ძალადობისა და იძულებით ქორწინების საკითხებზე. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია გმობს „ტელეკომპანია პირველის” საგამოძიებო გუნდზე თავდასხმას და მოუწოდებს სპეციალურ საგამოძიებო სამსახურს დროულად გამოიძიოს ჟურნალისტების წინააღმდეგ ჩადენილი კიდევ ერთი უკანონობა.  „ტელეკომპანია პირველის“ მიერ 2023 წლის 29 აპრილს გავრცელებულ მასალაში ცალსახად ჩანს, როგორ აყენებენ სიტყვიერ და ფიზიკურ შეურაცხყოფას ტელევიზიის საგამოძიებო გუნდის წევრებს და ხელს უშლიდნენ პროფესიული საქმიანობის განხორციელებას. მედიის ადვოკატირების კოალიცია მიიჩნევს, რომ ზემოაღნიშნული ინციდენტის სწრაფ გამოძიებასთან ერთად, ხელისუფლება ვალდებულია უზრუნველყოს უსაფრთხო სამუშაო გარემოს შექმნა მედიის ყველა წარმომადგენლისთვის“. სრულად... წყარო: mediacoalition.ge

სამეგრელო. ასოციაცია HERA XXI - ი გთავაზობთ ვიდეოების ციკლს საკუთარი საქმიანობის საზოგადოებისთვის გაცნობის მიზნით. ვიდეოში საუბრობს ანა აბულაძე, რომელიც სამეგრელო ზემო-სვანეთის სათემო მუშაკია. ის ზრუნავს რეგიონის მკვიდრი მოსახლეობის ინფორმირებაზე, სექსუალური და რეპროდუქციული ჯანმრთელობის შესახებ. მუშაობს ძალადობის მსხვერპლ ქალებთან, შშმ პირებთან, კონფლიქტის შედეგად დაზარალებულ და ე.წ საზღვრისპირა სოფლების მცხოვრებლებთან. სამეგრელოსა და ოკუპირებული აფხაზეთის რეგიონში HERA XXI-ის მუშაობა შესაძლებელი გახდა ევროკავშირის ქვეყნებში არსებული ფონდების ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველომ კიდევ ერთი საქმე მოიგო. ორგანიზაციის დახმარებით, „რუსთავი ორის“ სამი ყოფილი თანამშრომელი კუთვნილ ხელფასსაც მიიღებს და კომპენსაციასაც. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. 4 მაისს სოციალური სამართლიანობის ცენტრი USAID-ის სამართლის უზენაესობის პროგრამა მხარდაჭერით, ახალქალაქის მუნიციპალიტეტის სოფელ ტურცხში სამართლებრივი დახმარების შეხვედრას გამართავს. სოციალური სამართლიანობის ცენტრის იურისტები ადგილობრივ მოსახლეობას სთავაზობენ უფასო სამართლებრივ კონსულტაციას მათთვის პრობლემატურ სამართლებრივ საკითხებზე. მათ შორის პოლიციის თანამშრომლების მხრიდან არასათანადო მოპყრობის, მიწაზე საკუთრების უფლების რეგისტრაციის  საკითხებზე, სოციალურ დაცვის მექანიზმებზე, ოჯახში და ქალთა მიმართ ძალადობის  და სხვა საკითხებზე. სრულად... წყარო: სოციალური სამართლიანობის ცენტრის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) დავის განმავლობაში, ითხოვდა რომ დაუყოვნებლივ საქართველოს მთავრობას დავალებოდა, შეექმნა ისეთი მექანიზმი, რომელიც გამონაკლისის გარეშე, 30 დღიანი მოცდის ვადის გარეშე, დააფინანსებდა ყველა შემთხვევას, როდესაც სახეზე იყო ქცევითი გამოწვევების და/ან კომუნიკაციის სირთულის მქონე შშმ პირებისათვის ზოგადი ანესთეზიის ე.წ. „ნარკოზით“ სტომატოლოგიური მომსახურების გაწევის საჭიროება. აღნიშნული მოთხოვნა სასამართლომ 3 დღეში განიხილა და დროებითი განჩინებით დააკმაყოფილა. „რაც შეეხება ძირითად მოთხოვნას, საჭირო იყო ამ მომსახურების პროგრამად ჩამოყალიბება, შესაბამისად ვითხოვდით სპეციალური მექანიზმის/პროგრამის/სერვისის/ შექმნას კომუნიკაციის სირთულისა და ქცევის დარღვევის მქონე შშმ პირებისთვის, სტომატოლოგიური მომსახურების შეუფერხებელი მიღებისთვის. PHR-ის სტრატეგიული სამართალწარმოების შედეგად, თბილისის საქალაქო სასამართლოს განჩინების აღსრულების მიზნით, საქართველოს მთავრობამ და ჯანდაცვის სამინისტრომ 2022 წლის 13 ივნისს განახორციელეს ცვლილებები „საყოველთაო ჯანდაცვაზე გადასვლის მიზნით გასატარებელ ზოგიერთ ღონისძიებათა შესახებ“ საქართველოს მთავრობის 2013 წლის 21 თებერვლის #36 დადგენილებაში, კერძოდ, პროგრამებს ჯანდაცვის ახალი პროგრამა: „სტომატოლოგიური მომსახურება ზოგადი ანესთეზიით“ დაემატა. რაც ნიშნავს იმას, რომ, ქცევითი გამოწვევისა და/ან კომუნიკაციის სირთულის მქონე შშმ პირებისათვის შეიქმნა ახალი  პროგრამა -  რომლითაც შშმ პირებმა ყოველგვარი მოცდის გარეშე უნდა მიიღონ საშუალოდ 1500 ლარის ღირებულების (ან უფრო მეტის) სტომატოლოგიურ მომსახურება უფასოდ“, ნათქვამია ორგანიზაციის ვებგვერდზე. სრულად... წყარო: phr.ge

თბილისი. შეზღუდული შესაძლებლობის მქონე პირები და  მათ საკითხებზე მომუშავე ორგანიზაციები საერთო განცხადებას ავრცელებენ. „აქონდროპლაზიის მქონე ბავშვები კარგად იაზრებენ იმ რეალობას, რომლის წინაშეც დგანან, ხედავენ საკუთარი მშობლების ბრძოლასა და დარდს, რაც ფსიქოლოგიურ ზიანს აყენებს ბავშვებს; მათ იციან, რომ არსებობს რეალური მედიკამენტი, რაც მათ ცხოვრებას რადიკალურად შეცვლის, და უწევთ მოლოდინსა და შიშში ყოფნა, მშობლების განცდების გაზიარებასთან ერთად, მათი პირადი შეგრძნებები და ემოციები არ უნდა იყოს უგულებელყოფილი. სახელმწიფო ვალდებულია უზრუნველყოს ჯანდაცვის ხელმისაწვდომობა და იმოქმედოს ბავშვის საუკეთესო ინტერესებიდან გამომდინარე. სამკურნალო პრეპარატს Voxzogo Vosorotide 2021 წელს „ამერიკის წამლისა და საკვების ადმინისტრაციამ“ (FDA) მიანიჭა ავტორიზაცია, რაც მის უსაფრთხოებასა და ეფექტურობას ადასტურებს. ამავე წელს მედიკამენტი შეაფასა და ავტორიზაცია მიანიჭა „ევროპის მედიცინის სააგენტომ“ (EMA). ამ ორი ყველაზე ავტორიტეტული ინსტიტუტის მიერ ავტორიზაციის მინიჭება, ცალსახად მეტყველებს მედიკამენტის უსაფრთხოებასა და ეფექტურობაზე. ცხადია, ყველა მედიკამენტის გამოყენებას სჭირდება შესაბამისი მართვა და ყველას აქვს გვერდითი ეფექტები, რაც სათანადო მართვის პირობებში უნდა დარეგულირდეს - ეს არ გახდეს მედიკამენტის შემოტანაზე უარის თქმის მიზეზი“, ნათქვამია განცხადებაში. სრულად... წყარო: socialjustice.org.ge

თბილისი. სოციალური სამართლიანობის ცენტრი ეხმაურება აქონდროპლაზიის მქონე ბავშვების ოჯახის წევრების რამდენიმეთვიან პროტესტს და საქართველოს მთავრობას მოუწოდებს, მიიღოს ყველა ღონისძიება არასრულწლოვნების სიცოცხლისა და ჯანმრთელობის გარანტირებისათვის. სახელმწიფომ უნდა გაიაზროს საკუთარი ვალდებულებები აქონდროპლაზიის მქონე ბავშვების მიმართ და: ინტენსიურად დაიწყოს მშობლებთან დიალოგი, ბავშვების საჭიროებებისა და გამოწვევების უკეთ იდენტიფიცირებისათვის; უმოკლეს ვადებში შეიმუშაოს და საზოგადოებასა და მშობლებს გააცნოს ზუსტი ხედვა (მათ შორის, საბიუჯეტო სახსრების გამოყოფის მიმართულებით) მედიკამენტის ქვეყანაში შემოტანასა და მასზე წვდომასთან დაკავშირებით; უმოკლეს ვადებში უზრუნველყოს მედიკამენტზე წვდომა, სულ მცირე, ყველაზე მწვავე საჭიროების მქონე ბავშვებისათვის. სრულად... წყარო: socialjustice.org.ge ფოტო: პუბლიკა

ქვემო ქართლი. 2023 წლის 27 აპრილს სოციალური სამართლიანობის ცენტრის ინიციატივით და USAID-ის სამართლის უზენაესობის პროგრამის მხარდაჭერით, დმანისელებისთვის სამართლებრივი დახმარების შეხვედრა გაიმართება. „ჩვენი იურისტები ადგილობრივ მოსახლეობას სთავაზობენ უფასო სამართლებრივ კონსულტაციას მათთვის პრობლემატურ სამართლებრივ საკითხებზე. მათ შორის პოლიციის თანამშრომლების მხრიდან არასათანადო მოპყრობის, მიწაზე საკუთრების უფლების რეგისტრაციის საკითხებზე, სოციალურ დაცვის მექანიზმებზე, ოჯახში და ქალთა მიმართ ძალადობის  და სხვა საკითხებზე. ჩვენი ორგანიზაციის წარმომადგენლები უზრუნველყოფენ მოსახლეობის სოციალური პრობლემების იდენტიფიცირებას და გაზიარებული პრობლემების შესახებ ინფორმაციის მიწოდებას შესაბამისი სახელმწიფო უწყებებისთვის“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის ინფორმაციით, სახელმწიფო ზრუნვის სააგენტოს 11 წლის ბავშვის საქმეზე სამართალდარღვევა დაუდგინდა. „როდესაც 11 წლის ანას (სახელი შეცვლილია) მიმართ სექსუალური ძალადობის ფაქტზე გამოძიება დაიწყო, იგი სასამართლო გადაწყვეტილებით, მშობლისგან განცალკევდა და  სახელმწიფო ზრუნვაში გადავიდა. ანამ სააგენტოს წერილი მიწერა და მის შესახებ ინფორმაციის მიწოდება ითხოვა.  ბავშვმა ინფორმაციის გაგზავნა  მისი ადვოკატის მისამართზე მოითხოვა. ანას უფლებებს სისხლის სამართლის და ადმინისტრაციული წესით სასამართლოში #PHR-ი იცავს.  სააგენტოდან მიღებული უარის შემდეგ, ანამ პერსონალურ მონაცემთა დაცვის სამსახურს მიმართა და მის მიმართ მასალების გადაცემაზე უარის კანონიერების შემოწმება მოითხოვა. პერსონალურ მონაცემთა დაცვის სამსახურმა, საქმის შესწავლის შემდეგ,  ზრუნვის სააგენტო სამართალდამრღვევად ცნო. გადაწყვეტილება მნიშვნელოვანი და გასათავლისწინებელია, რადგან აღნიშნული გადაწყვეტილების თანხმად, როდესაც ბავშვს სურს ინფორმაცია მის შესახებ თავის ადვოკატებს გაეგზავნოს, საჯარო/კერძო უწყება ვალდებულია გაითვალისწინოს ბავშვის აზრი და მოთხოვნა განიხილოს ბავშვის სამართლის სუბიექტად აღიარების ჭრილში“, ნათქვამია ორგანიზაციის ვებგვერდზე. სრულად... წყარო: phr.ge

თბილისი. მედიის ადვოკატირების კოალიცია შეშფოთებულია თბილისის საქალაქო სასამართლოს მიერ რუსული კანონის წინააღმდეგ პროტესტის დროს დაკავებული ჟურნალისტების დაჯარიმების ფაქტით. ცნობილია, რომ ონლაინ-გამოცემა „პუბლიკას“ დირექტორი, ზურა ვარდიაშვილი და ონლაინ-გამოცემა „ტაბულას“ ჟურნალისტი, ბექა ჯიქურაშვილი 2200-2200 ლარით დაჯარიმდნენ.  „ჟურნალისტების დაჯარიმება სახიფათო პრეცენდენტს ქმნის და მედიაგარემოსთვის დამაზიანებელია. ცალსახაა, რომ აღნიშნული გადაწყვეტილება  პროფესიული საქმიანობის ხელშეშლასა და შეზღუდვას ისახავს მიზნად“, ნათქვამია განცხადებაში. განცხადება ვრცლად იხილეთ ბმულზე... წყარო: კოალიციის გვერდი სოციალურ ქსელში

თბილისი. 13 აპრილს ორგანიზაცია „საფარმა“ ნინოწმინდის მზრუნველობამოკლებული ბავშვთა პანსიონის 5 ყოფილი ბენეფიციარის სახელით ადამიანის უფლებათა ევროპულ სასამართლოს მიმართა. „ადამიანის უფლებათა ევროპული სასამართლოსგან ვითხოვთ ადამიანის უფლებათა ევროპული კონვენციის მე-3 (წამებისა და არაადამიანური/დამამცირებელი მოპყრობის აკრძალვა) და მე-8 (პირადი და ოჯახური ცხოვრების დაცულობის უფლება) მუხლების დარღვევის დადგენას“. სრულად... წყარო: ორგანიზაციის გვერდი სოციალურ ქსელში

თბილისი. კოალიციამ ინფორმაციის სანდოობისთვის იწყებს ახალ კამპანიას „ახლა“. „ახლა, როდესაც საქართველოს აქვს უნიკალური შესაძლებლობა კიდევ უფრო დაუახლოვდეს ევროკავშირს და მიმდინარე წლის ბოლოს მიიღოს ევროკავშირის წევრობის კანდიდატის სტატუსი, კამპანია მიზნად ისახავს, რომ დამატებითი სტიმული მისცეს საზოგადოების ძალისხმევას მოითხოვოს კანდიდატის სტატუსის მისაღებად საჭირო ქმედითი ნაბიჯები და რეფორმები ახლა. საქართველო იყო და არის ევროპულ სახელმწიფოთა ოჯახის ნაწილი. მაისის თვეში, ევროპის დღის მოახლოებასთან ერთად, კამპანიის ოფიციალური გახსნის ღონისძიება გაიმართება. ახლა მოქმედების დროა! მოითხოვე რეფორმები დაპირებების ნაცვლად“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს დახმარებით, 2016-2022 წლებში, მოქალაქეებმა მათი დარღვეული უფლებების საკომპენსაციოდ ბიუჯეტიდან 5 797 240 ლარი მიიღეს. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს მარიამ ჯანიაშვილის კვლევას: ქვემო ქართლში მცხოვრები აზერბაიჯანელი შშმ თემის გამოცდილება - წვდომა სოციალური დაცვის მექანიზმებზე. „შშმ პირების სოციალურ-ეკონომიკური მოწყვლადობა და შესაბამის სერვისებზე მათი წვდომა მწვავე პრობლემად იკვეთება საქართველოში. მეორე მხრივ, ეთნიკური უმცირესობის წარმომადგენლებს დისკრიმინაციული კანონმდებლობის, პოლიტიკისა და პრაქტიკის გამო, ხშირად არ მიუწვდებათ ხელი მათთვის უმნიშვნელოვანეს სერვისებსა და მომსახურებებზე, მოკლებულნი არიან მთელი რიგი უფლებებითა და თავისუფლებებით სრულად და დაუბრკოლებლად სარგებლობის შესაძლებლობას და განსაკუთრებით მოწყვლადნი ხდებიან სიღარიბის მიმართ. ამ გამოწვევების გათვალისწინებით, სოციალური სამართლიანობის ცენტრის მოცემული კვლევის მიზანია, გამოავლინოს ის ძირითადი ბარიერები, რომელთა წინაშეც ეთნიკური უმცირესობის წარმომადგენელი შშმ პირები დგანან ცენტრალური ხელისუფლების დონეზე არსებული სოციალური დაცვისა და დამოუკიდებელი ცხოვრების ხელშემწყობ მექანიზმებზე წვდომის ნაწილში“. სრულად... წყარო: socialjustice.org.ge

თბილისი. უფლებები საქართველოს ინფორმაციით, თბილისის სააპელაციო სასამართლოში იწყება ქმრის მიერ, ავტობუსში, 31 წლის ქალის მკვლელობის საქმის განხილვა.  2022 წლის მაისში თბილისში, გურამიშვილის გამზირზე №323 ავტობუსში, არასრულწლოვანი შვილების და სხვა მგზავრების თვალწინ, ქმარმა ქალი სასიკვდილოდ დაჭრა. თბილისის საქალაქო სასამართლომ განზრახ მკვლელობაში ბრალდებული 39 წლის მამაკაცი დამნაშავედ ცნო. სასამართლოს განაჩენით, ბრალდებულს 20 წლით თავისუფლების აღკვეთა განესაზღვრა.  „პირველი ინსტანციის სასამართლოს გადაწყვეტილება, თბილისის სააპელაციო სასამართლოში გაასაჩივრა, როგორც საქმის პროკურორმა, ასევე მსჯავრდებული მამაკაცის ადვოკატმა. პროკურორი ითხოვს, სასჯელის სახედ და ზომად, მსჯავრდებულისთვის უვადო თავისუფლების აღკვეთის განსაზღვრას. ყველაზე მკაცრი სასჯელის გამოყენებას ეთანხმება ფემიციდის მსხვერპლის დედაც, რომლის ინტერესების დაცვაშიც „უფლებები საქართველო“ 2023 წლის მარტის ბოლოს ჩაერთო. ორგანიზაცია იმედს გამოთქვამს, რომ თბილისის სააპელაციო სასამართლოში საქმის განხილვისას გათვალისწინებული იქნება ფემიციდის მსხვერპლის დედის პოზიცია უმკაცრესი სასჯელის გამოყენების თაობაზე და არ დაკმაყოფილდება მსჯავრდებული ადვოკატის შესაძლო შუამდგომლობა სამართალწარმოების შეწყვეტის შესახებ“. სრულად... წყარო: rights.ge

თბილისი. საბჭოთა წარსულის კვლევის ლაბორატორიის განცხადებით, ორგანიზაცია განაგრძობს საქართველოს სახელმწიფო არქივების კანონიერი გზით იძულებას უზრუნველყონ არქივებში დაცული ინფორმაციის ღიაობა და ხელმისაწვდომობა. „სამწუხაროდ, ფრაგმენტირებული მეხსიერების აღდგენის მხარდაჭერისა და ტოტალიტარული წარსულის კვლევის ხელშეწყობის ნაცვლად სახელმწიფოს პოლიტიკა გულისხმობს არქივებზე წვდომის ნაბიჯ-ნაბიჯ შეზღუდვასა და მკვლევართათვის ხელის შეშლას. საარქივო დოკუმენტების ასლების გადასაღებად ასტრონომიული გადასახადის დაწესება (მაშინ როცა დღევანდელ ცივილიზებულ მსოფლიოში დოკუმენტებზე უფასო წვდომა მიღებული პრაქტიკაა), პერსონალურ მონაცემთა დაცვის კანონმდებლობის ბოროტად გამოყენება და მკვლევართათვის სამკითხველო სივრცეებში მაქსიმალური დისკომფორტის შექმნა ამ პოლიტიკის მდგენელთა არასრული ჩამონათვალია. ხსენებული პოლიტიკის კიდევ ერთი საკვანძო კომპონენტია საარქივო ფონდებში დაცული მასალების კატალოგების, ანაწერებისა და ბარათების პროაქტიული გამოქვეყნების ნაცვლად მათზე წვდომის სისტემატური შეზღუდვა და კატალოგებს სხვადასხვა ნაწილების განზრახ დამალვა. ამგვარი მიდგომით სახელმწიფო და კერძოდ ეროვნული არქივი განზრახ ხელს უშლის საქართველოს უახლესი ისტორიის შესწავლასა და რუსული საინფორმაციო ომის მიმართ საზოგადოების მედეგობის ზრდას. 2023 წლის 6 აპრილს ეროვნული არქივის წინააღმდეგ სოვლაბმა სარჩელი შეიტანა მოთხოვნილი საჯარო ინფორმაციის გადაცემაზე უარის გამოცხადებისა და მისი არასრულად გამოქვეყნების გამო. სარჩელის მიზანია კატალოგის სხვადასხვა კომპონენტის საჯარო ინფორმაციის სახით გამოთხოვა, შეგროვება და ერთიანად ონლაინ გამოქვეყნება, რაც უახლესი ისტორიის საკვანძო მოვლენების ზუსტი სურათის აღდგენასა და მკვლევართა მუშაობას მნიშვნელოვნად გაადვილებს“. სრულად... წყარო: sovlab.ge