თბილისი. პარტნიორობა ადამიანის უფლებებისთვის (PHR) იურიდიული დახმარებით, ანა გოგუაძის საქმემ პერსონალური ასისტენტის ახალი მომსახურება შექმნა. “აღნიშნული სასამართლო გადაწყვეტილებით, საქართველოში პირველად შეიქმნა ფიზიკური შეზღუდვის მქონე პირებისთვის ბინაზე პერსონალური მოვლის სერვისი. კერძოდ „სოციალური რეაბილიტაციისა და ბავშვზე ზრუნვის 2023 წლის სახელმწიფო პროგრამის” ქვეპროგრამებს დაემატა „შშმ პირთა დამოუკიდებელი ცხოვრების ხელშემწყობი ინდივიდუალური დახმარებით უზრუნველყოფის ქვეკომპონენტი“, რომლითაც ისარგებლებს ყველა შშმ პირი, რომელსაც აქვს „ნერვული სისტემის დაავადებებით გამოწვეული თანდაყოლილი ფიზიკური შეზღუდვა და შეფასების შედეგად დადგინდება, რომ გადაუდებლად საჭიროებს პერსონალურ მომვლელს. PHR - ი აგრძელებს შეზღუდული შესაძლებლობის მქონე პირების, ბავშვებისა და ქალების უფლებების დაცვას“. სრულად... წყარო: phr.ge

თბილისი. სოციალური სამართლიანობის ცენტრი გიზიარებთ ახალ ანალიტიკურ დოკუმენტს, რომელიც მიმოიხილავს ეროვნული უსაფრთხოების საბჭოსა და მის შემადგენლობაში არსებული უწყებების ინსტიტუციურ მოწყობას, ძირითად ფუნქციებს, მართვისა და ანგარიშვალდებულების საკითხებს.   „საქართველოს უსაფრთხოებას არაერთი რეგიონული და გლობალური გამოწვევა აქვს. ამ პირობებში, პრობლემურია, რომ ქვეყნის ეროვნული დონის კონცეფტუალური დოკუმენტები - ეროვნული უსაფრთხოების კონცეფცია, საფრთხეების შეფასების დოკუმენტი და შესაბამისი სტრატეგიები მოძველებულია და ვერ პასუხობს ახალ გამოწვევებს.  უსაფრთხოების სისტემაში შემავალი ინსტიტუტები ფლობენ ჭარბ ძალაუფლებას, აქვთ არაერთი ბერკეტი, რომელთა გამოყენებითაც მათ შეუძლიათ ადამიანის ფუნდამენტური უფლებების შეზღუდვა“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის ინფორმაციით, გაეროს ადამიანის უფლებათა საბჭომ მიიღო ახალი რეზოლუცია (#A/HRC/52/L.7) სუფთა, ჯანსაღ და მდგრად გარემოში ცხოვრების უფლების შესახებ. „რეზოლუცია მნიშვნელოვანი დოკუმენტია, ვინაიდან ის კიდევ ერთხელ აღიარებს, რომ სამმაგი პლანეტარული კრიზისი: (მსოფლიო დაბინძურება, ბიომრავალფეროვნების განადგურება და კლიმატის ცვლილება) ადამიანის უფლებათა დაცვის კუთხით ერთ-ერთ უმნიშვნელოვანეს გამოწვევას წარმოადგენს.  კონკრეტულად, ის საფრთხეს უქმნის ადამიანის სიცოცხლეს, მის ფიზიკურ და მენტალურ ჯანმრთელობას, თავშესაფარზე, საკვებზე, სუფთა სასმელ წყალსა და სანიტარიაზე ხელმისაწვდომობის, კულტურულ და სხვა უფლებებს“. სრულად... წყარო: gyla.ge

კახეთი. 4 და 5 აპრილს სოციალური სამართლიანობის ცენტრის თანამშრომლებმა პანკისის ხეობის მოსახლეობისთვის, სოფელ დუისში და ქორეთში სამართლებრივი დახმარების შეხვედრა გამართეს. სოციალური სამართლიანობის ცენტრის იურისტებმა დაინტერესებულ პირებს მათთვის მნიშვნელოვან საკითხებზე სამართლებრივი კონსულტაცია გაუწიეს. შეხვედრის შედეგად გამოიკვეთა, რომ ადგილობრივებისთვის კვლავ პრობლემურია საქართველოს მოქალაქეობის მიღების საკითხი... ქორეთის მოსახლეობის მიერ მნიშვნელოვან პრობლემად დასახელდა სოფელში არსებული ინფრასტრუქტურული საკითხები. კერძოდ, სოფელში არ არის მოასფალტებული გზა, რის გამოც წვიმიან ამინდში გადაადგილება მნიშვნელოვნად გართულებულია. ამასთან, სოფელში დანიშნული არ არის მუნიციპალური ტრანსპორტი, შესაბამისად, ადგილობრივებს მუნიციპალიტეტის ცენტრამდე  საკვებისა თუ მედიკამენტების შესაძენად გადაადგილება ტაქსით უწევთ, რაც საკმაოდ დიდ თანხებთან არის დაკავშირებული. სრულად... წყარო: ორგანიზაციის გვერდი სოციალურ ქსელში

თბილისი. ამ წუთებში, სოციალური სამართლიანობის ცენტრი მართავს დისკუსიას: „რა შეიძლება გააკეთოს სახელმწიფომ კურიერების და, ზოგადად, პლატფორმული ეკონომიკის მშრომელების მდგომარეობის გასაუმჯობესებლად.“ შეხვედრაზე კურიერებთან და სხვა მომხსენებლებთან ერთად, საუბარია თუ როგორ შეიძლება მოხდეს კანონმდებლობით განსაზღვრული გარანტიების გავრცელება ამ მშრომელებზე, ისე რომ, ამავდროულად, გათვალისწინებული იყოს სექტორისთვის დამახასიათებელი თავისებურებები, მაგალითად, მოქნილი გრაფიკისა და საგადასახადო რეგულირების კუთხით; და რა უნდა გააკეთოს სახელმწიფომ  საიმისოდ, რათა საკითხის გადაწყვეტა მაქსიმალურად იყოს მორგებული დასაქმებულების ლეგიტიმურ ინტერესებს. სრულად... წყარო: ორგანიზაციის გვერდი სოციალურ ქსელში

თბილისი. „რუსული კანონის” წინააღმდეგ გამართულ აქციაზე დაშავებული ზაზა ბიღიაშვილის უფლებებს „სამართლიანი არჩევნებთან” ერთად „წამების მსხვერპლთა ფსიქოსოციალური და სამედიცინო რეაბილიტაციის ცენტრიც” (GCRT) იცავს. „დამოუკიდებელი ექსპერტიზის პირველადი შეფასებით, ზაზა ბიღიაშვილის მიერ მიღებული დაზიანების ხარისხი არის მძიმე, მარჯვენა თვალში მხედველობა დაკარგული აქვს სრულად, ჩაშლილია თვალის ბადურა, მხედველობის აღდგენა ნებისმიერი სახის ჩარევისა და ოპერაციის მიუხედავად შეუძლებელია. სპეციალურმა საგამოძიებო სამსახურმა ზაზა ბიღიაშვილი ორჯერ, 9 და 15 მარტს დაკითხა. მას ამ დრომდე არ აქვს მინიჭებული დაზარალებულის სტატუსი“, ნათქვამია განცხადებაში. სრულად... წყარო: isfed.ge

თბილისი. ტოლერანტობისა და მრავალფეროვნების ინსტიტუტის (TDI) ინფორმაციით, 4 აპრილს პარლამენტმა, პირველი მოსმენით მიიღო თავდაცვის კოდექსი. ორგანიზაციის შეფასებით, „საკანონმდებლო ცვლილებები რელიგიის ნიშნით მორიგ დისკრიმინაციას გამოიწვევს, რადგან სამხედრო ვალდებულებისგან სრულად მხოლოდ მართლმადიდებელი ეკლესიის სასულიერო პირები გათავისუფლდებიან“. TDI მოუწოდებს ხელისუფლებას, არ დაუშვას კანონპროექტის დღეს არსებული ფორმით მიღება, ვინაიდან ეს ავტომატურად გამოიწვევს არადომინანტური რელიგიური გაერთიანებების სასულიერო პირების დისკრიმინაციულ მდგომარეობაში ჩაყენებას. სრულად... წყარო: tdi.ge

სამეგრელო. ათინათის ახალგაზრდული ცენტრის წევრებმა დებატებში მიიღეს მონაწილეობა. პირველ დღეს ახალგაზრდები გაეცნენ დებატების ტექნიკებს, მეორე დღეს კი ჩატარდა დებატები, რომელსაც მოწვეული ჟიურის წევრები შესაბამისი შეფასების კრიტერიუმებით აფასებდნენ. შეხვედრა ჩატარდა USAID პროგრამა „ერთიანობა მრავალფეროვნებაშია“ ფარგლებში, რომელსაც საქართველოს გაეროს ასოციაცია, აშშ-ის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით ახორციელებს. სამეგრელოში პროგრამის პარტნიორია ათინათი. სრულად... წყარო: ორგანიზაციის გვერდი სოციალურ ქსელში

თბილისი. 5 აპრილს საქართველოს სახალხო დამცველი ლევან იოსელიანი „ვოლტის“ გაფიცულ კურიერებს შეხვდა და მათ შრომით უფლებებთან შრომით უფლებებთან და დისკრიმინაციასთან დაკავშირებული პრობლემები განიხილა. ომბუდსმენის აპარატში წარმოდგენილი განცხადებების თანახმად, კურიერების ნაწილს კომპანია „ვოლტმა“ აპლიკაცია დაუბლოკა, რის გამოც ისინი ვეღარ აგრძელებენ მუშაობას, ნაწილმა კი კომპანიიდან გათავისუფლების შესახებ გამაფრთხილებელი მესიჯი მიიღო. უფლებების დარღვევის მიზეზად კურიერები მათ მიერ კომპანიის მიმართ გამოხატულ პროტესტს ასახელებენ. სახალხო დამცველი აგრძელებს აღნიშნული განცხადებების შესწავლას და გადაწყვეტილებას უახლოეს მომავალში მიიღებს. სრულად... წყარო: ombudsman.ge

ქვემო ქართლი. 4 აპრილს, ორგანიზაციამ „კოალიცია დამოუკიდებელი ცხოვრებისათვის“, მარნეულში ორი შეხვედრა ჩაატარა.  ორგანიზაციის წევრები მარნეულში შეზღუდული შესაძლებლობის მქონე პირებსა და მარნეულის მუნიციპალიტეტის ჯანდაცვის, სოციალური უზრუნველყოფის, კულტურის, სპორტის, ბავშვის უფლებების დაცვისა და მხარდაჭერის სამსახურის ხელმძღვანელს, ნინო დეკანოიძეს შეხვდნენ. სრულად... წყარო: ორგანიზაციის გვერდი სოციალურ ქსელში

თბილისი. არასამთავრობო ორგანიზაციები 2023 წლის 2-3 და 7-9 მარტს გამართულ მშვიდობიან აქციაზე დაკავებულების უფლებების დაცვას განაგრძობენ. წარმოდგენილი ორგანიზაციები სასამართლოში 96 პირის ინტერესს იცავენ. გაეცანით დეტალურ სტატისტიკას... ორგანიზაციები საქმეებს USAID-ის სამართლის უზენაესობის პროგრამის მხარდაჭერით აწარმოებენ. წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია, საჯაროდ გავრცელებულ წყაროებზე დაყრდნობით, ეხმიანება ლაზარე გრიგორიადისის საქმეს და მიიჩნევს, რომ შესაძლოა იკვეთებოდეს ბრალდებულის უფლებების დარღვევის შემთხვევები, რის გამოც მოუწოდებს სპეციალურ საგამოძიებო სამსახურს და სახალხო დამცველს, იმოქმედონ თავიანთი მანდატის შესაბამისად. კერძოდ, სასამართლომ საჯაროდ არ დაასაბუთა აღკვეთი ღონისძიების სახით გამოყენებული პატიმრობა; მაღალი თანამდებობის პირების მიერ გავრცელებულმა განცხადებებმა შესაძლოა ლაზარე გრიგორიადისის სამართლიანი სასამართლოს უფლებაზე უარყოფითად იმოქმედოს. ეს, რიგ შემთხვევაში, ამავდროულად, არღვევს ლაზარე გრიგორიადისის უდანაშაულობის პრეზუმპციას; თვითინკრიმინაციის პრივილეგიის შესაძლო დარღვევა; არასათანადო მოპყრობის აკრძალვის შესაძლო დარღვევა. მიგვაჩნია, რომ ლაზარე გრიგორიადისის მიმართ განვითარებული მოვლენები, მის მიერ სამართლიანი სასამართლოს უფლებით სარგებლობას მნიშვნელოვნად შეზღუდავს, ამასთან დაკავშირებით, საია მოუწოდებს: - ხელისუფლების წარმომადგენლებს - თავი შეიკავონ დისკრიმინაციული განცხადებებისგან და ლაზარე გრიგორიადისის ბრალდების საქმეზე არ გასცდნენ უდანაშაულობის პრეზუმციის ფარგლებს. - სპეციალურ პენიტენციურ სამსახურს - ეროვნული კანონმდებლობისა და სახელმწიფოს საერთაშორისო ვალდებულებებთან სრული შესაბამისობით დაიცვას პატიმრის უფლებები. - სპეციალურ საგამოძიებო სამსახურს - ლაზარე გრიგორიადისის ადვოკატის მიერ გაჟღერებული ინფორმაციის საფუძველზე დაიწყოს გამოძიება. - საქართველოს სახალხო დამცველს - როგორც საქართველოს ტერიტორიაზე ადამიანის უფლებების დაცვაზე ზედამხედველობის განმახორციელებელს, იმოქმედოს მისი მანდატით გათვალისწინებული მექანიზმებით და, მათ შორის, განახორციელოს ხშირი მონიტორინგი პატიმარ ლაზარე გრიგორიადისის უფლებრივ მდგომარეობაზე. სრულად... წყარო: www.gyla.ge

თბილისი. სოციალური სამართლიანობის ცენტრის ინფორმაციით, გაეროს შშმ პირთა უფლებების კომიტეტმა საქართველოში შშმ პირთა უფლებრივი მდგომარეობა და გაეროს შშმ პირთა უფლებების კონვენციის შესრულების პროგრესი პირველად შეაფასა, ამ ჯგუფის წინაშე არსებული გამოწვევები შეაჯამა და მთავრობის მიმართ დასკვნითი მოსაზრებები გამოსცა. „თავისი 19-გვერდიანი შეფასებისა და რეკომენდაციების შემუშავებისას, მთავრობის მიერ წარდგენილ ანგარიშთან ერთად, კომიტეტი საქართველოს სახალხო დამცველისა და სამოქალაქო საზოგადოების, მათ შორის, შშმ პირთა ორგანიზაციების მიერ მომზადებულ ანგარიშებს დაეყრდნო. აღსანიშნავია, რომ სოციალური სამართლიანობის ცენტრმა, თავის პარტნიორ ორგანიზაციებთან ერთად, კომიტეტს შშმ პირთა უფლებრივი მდგომარეობის შესახებ 2017, 2018, 2020 და 2023 წლებში, 5 ანგარიში წარუდგინა“. სრულად... წყარო: socialjustice.org.ge

თბილისი. სოციალური სამართლიანობის ცენტრმა საქართველოს შინაგან საქმეთა სამინისტროს მიმართა და მოითხოვა გამოძიების დაწყება, თათია სამხარაძის მიმართ ტელეკომპანია „პოსტვ“-ის დამფუძნებლის შალვა რამიშვილისა და მისი თანამშრომლის მხრიდან ჩადენილ სავარაუდო ადევნების დანაშაულთან დაკავშირებით. სრულად... წყარო: socialjustice.org.ge

თბილისი. სოციალური სამართლიანობის ცენტრის ინფორმაციით, Wolt-ის კურიერებმა გადაწყვიტეს, პროტესტი უწყვეტად გააგრძელონ და სანამ მათი მოთხოვნები არ დაკმაყოფილდება, აპლიკაცია გათიშონ. ისინი ღირსეული შრომითი პირობების მოთხოვნით, უკვე ორ თვეზე მეტია საპროტესტო აქციებს მართავენ. „ბოლო პერიოდში ე.წ „გიგ“/პლატფორმულ  სექტორში დასაქმებულების შრომითი პირობები ახალ გამოწვევად იქცია. მოქნილი გრაფიკისა და შრომის ბაზარზე შედარებით კონკურენტული ანაზღაურების გამო, პლატფორმულ ეკონომიკაში დასაქმება ბევრისთვის მისაღები აღმოჩნდა, თუმცა, როგორც ბოლო მოვლენები აჩვენებს, კურიერების უმძიმესი შრომა სათანადოდ არ კომპენსირდება. მათ რუტინულად უწევთ აუნაზღაურებელი დავალებების შესრულება - მაგალითად, ლოდინის დრო, შეკვეთის გაუქმებისას გაწეული სამუშაო. ეს ამ სექტორში ნორმალიზებულ პრაქტიკად იქცა“. სოციალური სამართლიანობის ცენტრი მხარს უჭერს კურიერების სამართლიან მოთხოვნებს. ამ ბმულზე შეგიძლიათ გაეცნოთ ორგანიზაციის მიერ თებერვალში გავრცელებულ განცხადებას, რომელშიც დეტალურადაა აღწერილი ის პრობლემები, რასაც კურიერები აწყდებიან... კვლევა - რა ტიპის ხელშეკრულებები იდება კურიერებთან და რა სამართლებრივ პრობლემებს შეიცავს ამგვარი კონტრაქტები... წყარო: socialjustice.org.ge

თბილისი. სამოქალაქო საზოგადოება და საერთაშორისო ორგანიზაციები ლგბტქი+ უფლებების შესახებ იმსჯელეს.  საკოორდინაციო შეხვედრაზე სათემო ორგანიზაციების წარმომადგენლებმა 2022 წელს მიღწეული შედეგები შეაჯამეს, არსებულ გამოწვევებზე იმსჯელეს და სამომავლო გეგმები დასახეს.   შეხვედრა გაიმართა ნორვეგიისა შვედეთის და დიდი ბრიტანეთის მხარდაჭერით, UNDP-ის და ეროვნული დემოკრატიული ინსტიტუტის (NDI) ორგანიზებით. სრულად... წყარო: ორგანიზაციის გვერდი სოციალურ ქსელში

აჭარა. საერთაშორისო გამჭვირვალობა - საქართველოს ინფორმაციით, ვახტანგ ბერიძის - ა(ა)იპ „შუახევის კულტურის ცენტრის“ დირექტორის უკანონოდ გათავისუფლების საქმეზე ორგანიზაციის იურისტებმა სამივე ინსტანციის სასამართლოში წარმატებით იდავეს. ვახტანგ ბერიძეს შუახევის მუნიციპალიტეტი 5 506 ლარის ოდენობით ანაზღაურებას გადაუხდის. სრულად... წყარო: ორგანიზაციის გვერდი სოციალურ ქსელში

აჭარა. საქართველოს სახალხო დამცველმა ლევან იოსელიანმა ბათუმში თვითნებურად გაშენებული ე.წ. ოცნების ქალაქი მოინახულა და მისი მაცხოვრებლების მდგომარეობას გაეცნო.  „მაღალმთიანი აჭარიდან ჩამოსახლებული, უსახლკარო საქართველოს მოქალაქეები 10 წელზე მეტია გაუმართავი წყალმომარაგების, საკანალიზაციო და ელექტროენერგიის სისტემების პირობებში ცხოვრობენ. საგზაო ინფრასტრუქტურის არარსებობის გამო გართულებულია სკოლამდელი და სასკოლო განათლების მიღებაც“. სრულად... წყარო: ombudsman.ge

კახეთი. 2023 წლის 4-5 აპრილს სოციალური სამართლიანობის USAID სამართლის უზენაესობის პროგრამა მხარდაჭერით, პანკისის ხეობაში, დმანისისა და ქორეთის მოსახლეობისთვის სამართლებრივი დახმარების შეხვედრას გამართავს.  ორგანიზაციის იურისტები ადგილობრივ მოსახლეობას სთავაზობენ უფასო სამართლებრივ კონსულტაციას მათთვის პრობლემატურ სამართლებრივ საკითხებზე. სოციალური სამართლიანობის ცენტრის წარმომადგენლები  უზრუნველყოფენ მოსახლეობის სოციალური პრობლემების იდენტიფიცირებას და გაზიარებული პრობლემების შესახებ ინფორმაციის მიწოდებას შესაბამისი სახელმწიფო უწყებებისთვის. სრულად... წყარო: ორგანიზაციის გვერდი სოციალურ ქსელში

თბილისი. თბილისის ადამიანის უფლებათა სახლს პროფესიული პრაქტიკის გასავლელად 176-მა ადამიანმა გაუგზავნა განცხადება. HRHT მოხარულია, რომ უფლებადაცვით ორგანიზაციაში საქმიანობის გაგრძელების მაღალი ინტერესია. სრულად... წყარო: ორგანიზაციის გვერდი სოციალურ ქსელში

თბილისი. Grlz Wave საინფორმაციო ხასიათის ბლოგპოსტში გვიხსნის თუ რა არის სექსუალური შევიწროება. სექსუალური შევიწროვება ძირითად შემთხვევებში, სამი გზით ვლინდება: ფიზიკური, ვერბალური ანუ სიტყვიერი და არავერბალური. ფიზიკური ქცევის შემთხვევაში: ფიზიკური ძალადობა, მათ შორის იგულისხმება სექსუალური ძალადობა; თქვენთვის არასასურველი ფიზიკური შეხება, რომელიც შეიძლება გამოიხატოს მოფერებაში ან სხვა ფიზიკურ კონტაქტში, რომელიც გიქმნით დისკომფორტს; ნებისმიერი ტიპის წახალისება სექსუალური ქცევის სანაცვლოდ. არავერბალური ქცევის დროს: სექსუალური მასალის ჩვენება თქვენი თანხმობის გარეშე; სექსუალური ხასიათის შემცველი ჟესტიკულაციის ჩვენება თქვენი თანდასწრებით, რაც ასევე გიქმნით უხერხულობასა და დისკომფორტს. სიტყვიერი ქცევის შემთხვევაში: სექსუალური შინაარსის ამბები, ხუმრობები და კომენტარები; კომენტარები თქვენს ასაკზე, გარეგნობაზე ან პირად ცხოვრებაზე; პაემანზე დაპატიჟების არასასურველი, განმეორებითი მცდელობები. სრულად... წყარო: ორგანიზაციის გვერდი სოციალურ ქსელში

თბილისი. Grlz Wave ეხმაურება თათია სამხარაძის წინააღმდეგ წამოწყებულ კამპანიას, რომელიც ორგანიზაციის შეფასებით, მიზნად ისახავს შალვა რამიშვილის დაცვას და მსხვერპლის დისკრედიტაციას.  „სამწუხაროდ, ხელისუფლება მხარდაჭერას უცხადებს შემვიწროვებელს. გასული დღეების განმავლობაში ხელისუფლებამ მოძალადის რეპუტაციის დასაცავად და მსხვერპლის დასასჯელად, სახელმწიფო ინსტიტუციები გამოიყენა, შეიჭრა ადამიანის საცხოვრებელ სივრცეში დაშინების მიზნით. ვგმობთ ყველანაირ ძალადობას და სოლიდარობას ვუცხადებთ თათიას, ქალს, რომელმაც შალვა რამიშვილი სექსუალურ შევიწროვებაში საჯაროდ პირველმა ამხილა. მან სექსუალური შევიწროვების ფაქტის დადგენის და მასზე სამართლებრივი რეაგირების პირველი პრეცედენტი შექმნა საქართველოში“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში