თბილისი. ინფორმაციის თავისუფლების განვითარების ინსტიტუტი (IDFI) გთხოვთ, გაუგზავნოთ ორგანიზაციას ინფორმაცია თქვენი რეპრესირებული წინაპრის შესახებ: ფოტო, ისტორია ან სხვა სახის ცნობა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) გიზიარებთ გვანცა კილასონიას ბლოგპოსტს: „როგორ განმარტავს შრომის ინსპექციის სამსახური სამსახურებრივ შევიწროებას საჯარო სამსახურში?“ „მნიშვნელოვანია, გავითვალისწინოთ, რომ საჯარო მოხელის პოლიტიკურ პარტიასთან ასოცირება ისეთ რისკებს აჩენს, რომელთა შორისაა: საჯარო მოხელეთა შევიწროება პოლიტიკური ნიშნით, პოლიტიკურ ძალთა ცვლილებისას მათი სამართლებრივი გარანტიების გაუქმება/შესუსტება და საჯარო მოხელის დასაქმების სტაბილურობის არარსებობა და სხვა. ადამიანის უფლებათა ევროპული სასამართლოს განმარტებით, სახელმწიფო მოსამსახურეების მიერ ჩადენილი ძალადობრივი ქმედებები, რომლებიც მიზნად ისახავს ჩაახშოს, აღმოფხვრას ან დათრგუნოს განსხვავებული პოლიტიკური აზრის გამოხატვა ან დასაჯოს, განსხვავებული პოლიტიკური შეხედულების მქონე პირები, განსაკუთრებულ საფრთხეს უქმნის დემოკრატიული საზოგადოების იდეალებსა და ღირებულებებს“. სრულად... წყარო: gyla.ge

იმერეთი. ორგანიზაცია „როდემდეს?!“ პროექტმა „მიუსაფარი ძაღლების მართვის სტრატეგია უსაფრთხო გარემოსათვის“ სათემო იდეების საგრანტო კონკურსში გაიმარჯვა. პროექტის ფარგლებში, „როდემდეს?!“ მიზანია შეიმუშაოს მიუსაფარი ცხოველების მართვის ჰუმანური პოლიტიკა და ამგვარად, უზრუნველყოს საცხოვრებელი გარემოს უსაფრთხოება ქუთაისის მუნიციპალიტეტის მოსახლეობისათვის.  რა იგეგმება? მოსახლეობისთვის ინფორმაციის მიწოდება ძაღლების მოვლა-პატრონობის რეგულაციებისა და სერვისების შესახებ; შემუშავდეს და ხელი შეეწყოს მიუსაფარი ძაღლების ჰუმანური მართვის სტრატეგიის დანერგვასა და განხორციელებას. პროექტის განხორციელების 10 თვის მანძილზე გექნებათ შესაძლებლობა მიიღოთ მონაწილეობა: საჯარო ღონისძიებებში; საზოგადოებრივ დისკუსიებში; მოქალაქეთა გამოკითხვაში; პეტიციის შემუშავებაში; და სხვა. პროექტი ხორციელდება საქართველოს სტრატეგიული კვლევებისა და განვითარების ცენტრის მხარდაჭერით, ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. სოციალური სამართლიანობის ცენტრი სოფელ ტურცხის მაცხოვრებლების პრობლემების შესახებ წერს. ტურცხი ახალქალაქის მუნიციპალიტეტში მდებარე სოფელია, რომელიც ეთნიკური სომხებით არის დასახლებული. ორგანიზაციის ცნობით, ამ სოფელში ჯავახეთის სხვა სოფლების მსგავსად მწვავედ დგას საქართველოს მოქალაქეობის მიღების საკითხი. „სიღარიბის და უმუშევრობის გამო ქვეყნიდან შრომით მიგრაციაში წასულ ტურცხელებს, რომლებმაც სომხეთის ან რუსეთის მოქალაქეობის მიღების გამო, საქართველოს მოქალაქეობა რამდენიმე წლის წინ დაკარგეს, დღეს სახელმწიფო მოქალაქეობის აღდგენაზე/მიცემაზე უარს ეუბნება. უარის ძირითადი მიზეზი სახელმწიფო ენის არცოდნაა. ეს მაშინ, როდესაც ამ ადამიანების დიდ ნაწილს განათლება საბჭოთა პერიოდში აქვს მიღებული და ცხადია, რომ მათთვის ქართული ენის ცოდნა რთულია. მოქალაქეობის არარსებობა ამ ადამიანებს საბაზისო სამოქალაქო, პოლიტიკურ და სოციალურ უფლებებს ართმევს...“ სოციალური სამართლიანობის ცენტრი ითხოვს ამ დამიანებისთვის მოქალაქეობის მიღების გამარტივებულ პროცედურას და მათ უფლებებზე და სპეციალურ საჭიროებებზე დაფუძნებული მიდგომების გატარებას. სრულად... წყარო: ორგანიზაციის გვერდი სოციალურ ქსელში

შიდა ქართლი. სოციალური სამართლიანობის ცენტრმა, გორის სოციალური საცხოვრისის ბენეფიციარების სახელით, ოფიციალურად მიმართა გორის მუნიციპალიტეტის მერიას და საცხოვრისიდან უსახლკარო პირების დაუყოვნებლივი გაყვანა და მათთვის ღირსეული და უსაფრთხო ალტერნატიული საცხოვრებლის უზრუნველყოფა მოითხოვა. „გორის სოციალურ საცხოვრისში, რომელიც ნარკოლოგიური კლინიკის ყოფილ შენობაში მდებარეობს, ამჟამად 103 უსახლკარო ადამიანი ცხოვრობს; მათ შორის არიან არასრულწლოვნები, ხანდაზმულები, ვეტერანები, შშმ პირები. წლების განმავლობაში ეს ადამიანები უკიდურესად მძიმე, ღირსებაშემლახველ გარემოში ცხოვრობენ, თუმცა, გორის მუნიციპალიტეტის მთავრობა კვლავ არ რეაგირებს საცხოვრისში არსებულ პრობლემებზე“. სრულად... წყარო: socialjustice.org.ge

თბილისი. „აი, ფაქტი“ აქვეყნებს ანალიტიკურ მასალას „როგორ (არ) იძიებს პოლიცია ქურდობის დანაშაულებს“. ბლოგპოსტში რამდენიმე რესპონდენტის ისტორიაა განხილული. ყველა მათგანი ამბობს, რომ პოლიციის განყოფილებაში მოპარული ნივთის დაკარგულად გაფორმებას სთხოვდნენ. „აი, ფაქტი“ დაინტერესდა, რატომ არ იძიებენ ქურდობის შემთხვევებს პოლიციელები. სამართლის დარგის ექსპერტების აზრით, პოლიციელები გაუხსნელი საქმეების სტატისტიკის „შერბილებას“ და რეალურად დამძიმებული კრიმინოგენური სიტუაციის დაფარვას ცდილობენ. „ქურდობა გავრცელებული ეკონომიკური დანაშაულია. შინაგან საქმეთა სამინისტრომ გასულ წელს ქურდობის 16,000-მდე შემთხვევა დააფიქსირა. ხუთი წლის წინ კი ეს რიცხვი გაცილებით ნაკლები, 11,000-მდე იყო. მიმდინარე წლის პირველ კვარტალში პოლიციამ დაარეგისტრირა ქურდობის 3,502 შემთხვევა, მათი 41 პროცენტი, 1,451 შემთხვევა გაუხსნელია. ...შესაძლოა პოლიციელებს არ სურთ გაზარდონ გაუხსნელი საქმეების სია, ან უბრალოდ საქმეს იმარტივებენ. ეს ყველაფერი კი აწყობს მათ ხელმძღვანელობასაც, რათა ოპოზიციის და სამოქალაქო საზოგადოებისგან არ ისმინონ კრიტიკა, გამოუძიებელი დანაშაულების მაღალ რიცხვზე და მძიმე კრიმინოგენურ სიტუაციაზე“. სრულად... წყარო: ifact.ge

თბილისი. საქართველოს ახალგაზრდა იურისტთა ასოციაცია (საია) გიზიარებთ ვერიკო ჯგერენაიას ბლოგპოსტს: უკანონოდ გათავისუფლებული საჯარო მოხელეების უფლებების დაცვის პრაქტიკული ასპექტები. „მნიშვნელოვანია, უზრუნველყოფილი იყოს საჯარო მოხელეების შრომის უფლებების დაცვა, მათი დასაქმების უვადობისა და სტაბილურობის გარემოს შექმნა, რათა საჯარო მოხელეებმა, მიიღონ დამსახურებული კარიერული წინსვლა და სამსახურის დაკარგვის შიშის გარეშე განახორციელონ საკუთარი უფლებამოსილებები“, ნათქვამია ბლოგპოსტში. სრულად... წყარო: gyla.ge

თბილისი. „უფლებები საქართველო“ იწვევს საქართველოში მცხოვრებ უკრაინის მოქალაქეებს ონლაინ საინფორმაციო შეხვედრაზე, რომელიც ბინადრობის ნებართვის მიღების საკითხებს ეხება. შეხვედრა გაიმართება 2023 წლის 8 ივნისს, 18:30 საათზე, პლატფორმა ზუმის მეშვეობით. სამუშაო ენა: ინგლისური. იხ. დეტალური ინფორმაცია... შეხვედრა იმართება „უფლებები საქართველოს“ პროექტის „საქართველოში მცხოვრები ომით დაზარალებული უკრაინის მოქალაქეების უფლებების დაცვა“ ფარგლებში. აღნიშნული აქტივობა ხორციელდება ევროკავშირის მიერ დაფინანსებული პროექტის „სტაბილური სამოქალაქო საზოგადოება და მედია პასუხობს უკრაინის ომს“ ფარგლებში, რომელსაც ჩეხური არასამთავრობო ორგანიზაცია „ფიფლ ინ ნიდ“, პრაღის სამოქალაქო საზოგადოების ცენტრსა და ნიდერლანდების ჰელსინკის კომიტეტთან თანამშრომლობით ახორციელებს. სრულად... წყარო: ორგანიზაციის გვერდი სოციალურ ქსელში Інформаційна зустріч для громадян України, які проживають в Грузії Неурядова організація Rights Georgia запрошує громадян України, які проживають у Грузії, на інформаційну онлайн-зустріч, присвячену темі отримання посвідки на тимчасове проживання в Грузії. Зустріч відбудеться 8 червня 2023 року о 18:30 за допомогою платформи Zoom.  Юристи Rights Georgia розкажуть про особливості отримання посвідки на проживання та дадуть відповіді на запитання учасників щодо будь-яких юридичних питань, актуальних для громадян України. Мова зустрічі: англійська Зустріч організована в рамках активності Rights Georgia "Захист прав постраждалих від війни громадян України, які проживають в Грузії". Ця діяльність здійснюється в рамках проекту "Стійке громадянське суспільство та ЗМІ реагують на війну в Україні", що фінансується ЄС та реалізується чеською неурядовою організацією "Людина в біді" (PIN) у співпраці з Празьким центром громадянського суспільства та Нідерландським Гельсінським комітетом. Якщо ви бажаєте взяти участь у зустрічі, будь ласка, заповніть реєстраційну форму... Доступ до Zoom-зустрічі буде надано лише зареєстрованим учасникам. Для отримання додаткової інформації, будь ласка, зв'яжіться з нами по електронній пошті office@rights.ge або зателефонуйте за номером +995 (577) 107 300

ქვემო ქართლი. 22 და 23 მაისს, სოციალური სამართლიანობის ცენტრის თანამშრომლებმა მარნეულის მუნიციპალიტეტის სოფელების მარადისისა და ხულდარას მოსახლეობას იურიდიული კონსულტაციები გაუწიეს. შეხვედრა ჩატარდა USAID-ის სამართლის უზენაესობის პროგრამის მხარდაჭერით. სოფელ მარადისში ცხოვრობენ აჭარელი ეკომიგრანტები, ხოლო ხულდარას მოსახლეობის უმრავლესობას საქართველოს აზერბაიჯანელები წარმოადგენენ. ორივე სოფლის მოსახლეობამ მთავარ გამოწვევად ინფრასტრუქტურული პრობლემები დაასახელა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) შეშფოთებულია, რომ თბილისის შემდგომ, ბათუმშიც გრძელდება გამოხატვისა და შეკრების თავისუფლების რეპრესიული საპოლიციო მექანიზმებით უკანონო შეზღუდვა.  გავრცელებულ კადრებში ჩანს პოლიციის მიერ ფიზიკური ძალის გამოყენება რამდენიმე პირის მიმართ (შეხლა-შემოხლა, ხელის კვრა, ასევე, ჩანს, ძალადობრივი მეთოდით დაკავების ფაქტები და მუქარა („სამარცხვინო ვინ არის, განახებთ”). Როგორც კადრებიდან ჩანს, აქციის მონაწილე პოლიციელისადმი „სამარცხვინოს” წოდების გამო დააკავეს. როდესაც მშვიდობიან დემონსტრაციაზე ადამიანის ქმედება არც ძალადობრივია, არც მიზნად ისახავს ძალადობას, არც აქვს რესურსი, გადაიზარდოს მოვლენათა ესკალაციაში, მისი ადმინისტრაციული წესით დაკავება ეწინააღმდეგება შეკრებისა და გამოხატვის თავისუფლებებით დაცულ გარანტიებს“, ნათქვამია საია-ს განცხადებაში. სრულად... წყარო: gyla.ge

თბილისი. სამოქალაქო საზოგადოების ორგანიზაციები საგანგებო განცხადებას ავრცელებენ უფლებადამცველების დაკავების ფაქტებზე. „ჩვენ, სამოქალაქო საზოგადოების ორგანიზაციები, მტკიცე მხარდაჭერას ვუცხადებთ საქართველოს პარლამენტთან დაკავებულ უფლებადამცველებს, რომლებიც გაბედულად იბრძვიან გამოხატვის თავისუფლების შინაარსობრივი შეზღუდვების წინააღმდეგ. პოლიციამ პარლამენტის მიმდებარე ტერიტორიაზე სრულიად თვითნებურად, უკანონოდ და მკვეთრად აგრესიული მანერით დააკავა მშვიდობიანი შეკრების 7 მონაწილე. დაკავებულთა შორის არიან ტოლერანტობისა და მრავალფეროვნების ინსტიტუტის იურისტი - შოთა თუთბერიძე (ამჟამად გათავისუფლებულია ხელწერილის საფუძველზე), საქართველოს დემოკრატიული ინიციატივის თავმჯდომარე - ედუარდ მარიკაშვილი, ღია საზოგადოების ფონდის თანამშრომელი - საბა ბრაჭველი, აქტივისტი - ნიკა რომანაძე და სხვები. შემაშფოთებელია, რომ ქართული საზოგადოება ხდება ამგვარი ნეგატიური ტენდენციის მოწმე, რომელიც ძირს უთხრის დემოკრატიის ფუნდამენტურ პრინციპებს და, ფაქტობრივად, არარად აცხადებს გამოხატვის თავისუფლების ძირითად უფლებას. ადმინისტრაციული დაკავებების თვითნებური პრაქტიკით კი სისტემა ცდილობს საპოლიციო კონტროლს დაუქვემდებაროს მშვიდობიანი შეკრების მონაწილეები და ორგანიზატორები, რაც მოქალაქეების თვითორგანიზების დასუსტებას, საზოგადოების დაშინებასა და აქტივისტების შევიწროებას ისახავს მიზნად“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) თვლის, რომ კვლავ გამოწვევად რჩება ბავშვების ძალადობისგან დაცვა. გუშინ PHR-მა განცხადებით მიმართა პროკურატურას ბავშვის მიმართ საჯარო ბაღში განხორციელებული არასათანადო მოპყრობის ფაქტზე და მოითხოვა ეფექტური რეაგირება. „საქმე შეეხება 2 წლისა და 10 თვის ბავშვის მიმართ საჯარო ბაღში აღმზრდელის მხრიდან 2021 წლის აპრილში განხორციელებულ სისტემატიურ ფიზიკურ და ფსიქოლოგიურ ძალადობას.  საქმის მასალებში ბავშვის მიმართ ძალადობის ერთ-ერთი ეპიზოდი აღწერილია შემდეგნაირად: „აღმზრდელი ბავშვის საწოლისკენ იხრება, ამ დროს ბავშვი ტირის და თვალებს იფშვნეტს, მარცხენა ხელით ბავშვს ხელსახოცით წმენდს ცხვირს ძლიერად. აღმზრდელის მოქმედებაში ჩანს რომ ცხვირზე ძლიერად უჭერს ხელს, აწვება ცხვირზე და გადამეტებული ფიზიკური ძალის ზემოქმედებით წმენდს ცხვირს. კადრში ჩანს თუ როგორ ჩააჭერს ცხვირზე მოჭერილ ხელსახოციან ხელს  ბავშვს. შემდეგ იღებს ხელსახოციან ხელს, ხელსახოცს იმავე ხელში მოკეცავს და ისევ ბავშვის სახეს უბრუნდება, სადაც ისევ წმენდს ცხვირს და ცხვირის მოხოცვის შემდეგ ბავშვს მარჯვენა თვალბუდის არეში უხეშად აჭერს ხელსახოციან ხელს, რა დროსაც ბავშვი იწყებს ისტერიულ ტირილს და მის სახეზე შეინიშნება ტკივილის განცდა. ამის შემდეგ ბავშვი გაუნძრევლად წევს საწოლში გვერდულად მარცხენა გვერდზე და მარჯვენა ხელი უკანკალებს““, ნათქვამია ორგანიზაციის ბლოგპოსტში. სრულად... წყარო: phr.ge

მცხეთა-მთიანეთი. საერთაშორისო გამჭვირვალობა - საქართველოს იურისტები ხადის ხეობასა და მლეთაში დაზარალებულ მაცხოვრებლებს შეხვდნენ, რომელთა საცხოვრებელი სახლები და მიწის ნაკვეთები, ასევე დამხმარე შენობა-ნაგებობები, ქვეშეთი - კობის მშენებარე საავტომობილო გზაზე გვირაბის გაყვანისას დაზიანდა.  ორგანიზაცია დეტალურად შეისწავლის ამ საქმეებს და სამართლებრივ დახმარებას გაუწევს დაზარალებულებს. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) იცავს „ბათუმის ბულვარის“ ყოფილი დირექტორის, ირაკლი ჯინჭარაძის ინტერესებს აჭარის ავტონომიური რესპუბლიკის მთავრობის წინააღმდეგ სასამართლოში მიმდინარე საქმეში. ორგანიზაციის განმარტებით, ქუთაისის სააპელაციო სასამართლოს განჩინება უკვე გასაჩივრდა საკასაციო წესით უზენაეს სასამართლოში. „როგორც საზოგადოებისთვის ცნობილია, ირაკლი ჯინჭარაძე დაკავებული თანამდებობიდან აჭარის ავტონომიური რესპუბლიკის მთავრობის თავმჯდომარის 2021 წლის 12 აპრილის განკარგულების საფუძველზე გათავისუფლდა. აღნიშნულ ფაქტს წინ უძღოდა, 2021 წლის 30 მარტს ბათუმის მუნიციპალიტეტის საკრებულოს სხდომაზე ირაკლი ჯინჭარაძის მიერ დაფიქსირებული მკვეთრად ნეგატიური დამოკიდებულება პლაჟის 4500 კვ/მ ფართობის  ბრენდირებული სასტუმროებისთვის მრავალწლიანი იჯარით გადაცემის მიმართ. ეს საქმე კიდევ ერთი მაგალითია იმისა, როგორ ხდება ქვეყანაში ადამიანთა უფლებების შეზღუდვა განსხვავებული მოსაზრებების გამო. იმედს ვიტოვებთ, უზენაესი სასამართლო გაითვალისწინებს საქმეში არსებულ მტკიცებულებებს და მიიღებს კანონიერ და დასაბუთებულ გადაწყვეტილებას“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. წამების მსხვერპლთა ფსიქო-სოციალური რეაბილიტაციის ცენტრი (GCRT) აქვეყნებს ვიდეოს: რა არის პირადი საზღვრები და რატომ გვჭირდება ის. „საკუთარ თავთან და გარე სამყაროსთან ჰარმონიული ურთიერთობის ჩამოყალიბებისთვის პირადი სივრცის განცდა აუცილებელი წინაპირობაა. არსებობს: ფიზიკური, ემოციური, სექსუალური, ვირტუალური და დროის საზღვრები. საზღვრების გავლება იმის გამოსარკვევად გვჭირდება, თუ რისი მიღება გვსურს გარე სამყაროსგან, რა გვიქმნის დისკომფორტს და რა არის ჩვენთვის საფრთხის შემცველი.  საზღვრების დასადგენად საკუთარ თავს შემდეგი კითხვები უნდა დავუსვათ: ვისთან და რამდენად ახლო ემოციური კავშირი მინდა მქონდეს? ვინ და როდის მინდა შემოვუშვა ვინმე ჩემს ფიზიკურ სივრცეში? რისი გაზიარება მინდა ან არ მინდა ვირტუალურად? როგორი მინდა იყოს ჩემი სექსუალური ცხოვრება, რას ველი სექსუალური პარტნიორისგან და რა არის ჩემთვის არასასურველი? რაში მინდა ან არ მინდა დროის ინვესტირება?  თუკი ვგრძნობთ და ვხედავთ რომ: დაუკითხავად იჭრებიან ჩვენს პირად სივრცეში, არ ცდილობენ ჩვენს სურვილებში გამორკვევას, არ გვთხოვენ ნებართვას და არ ელოდებიან ჩვენგან თანხმობას, ახდენენ ზეწოლას ან მიმართავენ მანიპულაციას თანხმობის მოსაპოვებლად ან სხვა მსგავსი მეთოდებით ცდილობენ შემოიჭრან ჩვენს ემოციურ, ვირტუალურ, ფიზიკურ თუ სექსუალურ საზღვრებში.  გახსოვდეთ, რომ პირადი სივრცის განცდა ყველა სჭირდება“... ვიდეო მომზადდა პროექტის „ოჯახში და გენდერული ნიშნით ძალადობის წინააღმდეგ ბრძოლის ხელშეწყობა“ ფარგლებში, რომელსაც ახორციელებს GCRT ევროკავშირის ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ბავშვთა დაცვის საერთაშორისო დღესთან დაკავშირებით განცხადებას ავრცელებს და მიიჩნევს, რომ „მიუხედავად უკანასკნელ წლებში ბავშვთა უფლებების მარეგულირებელი კანონმდებლობის დახვეწისა, ქვეყანაში არა ერთი მიმართულება რჩება პრობლემურად. მნიშვნელოვანი გამოწვევები გვხვდება არასრულწლოვანთა მიმართ ძალადობის, ბავშვების სოციალური დაცვის, განათლების, შშმ ბავშვების უფლებების რეალიზაციის მიმართულებით.   ბავშვთა სიღარიბე ქვეყანაში უმძიმეს პრობლემად რჩება. 2023 წლის აპრილის მონაცემებით, საქართველოში მცხოვრები ბავშვების დაახლოებით 21% პროცენტი, 187 444 ბავშვი აბსოლუტური სიღარიბის ზღვარს ქვემოთაა და სახელმწიფოსგან სოციალურ შემწეობას იღებს. გაეროს ბავშვთა ფონდის კვლევის მიხედვით კი, საქართველოში ბავშვების 38 პროცენტი განიცდის მატერიალურ და სოციალურ დანაკლისს. ... სიღარიბეში გაზრდილ ბავშვების შემთხვევაში, ზრდასრულობაში მენტალური ჯანმრთელობის პრობლემების გამოვლენის ალბათობა თანატოლებთან შედარებით, სამჯერ მეტია. სრულად... წყარო: ორგანიზაციის გვერდი სოციალურ ქსელში ფოტო: ნეტგაზეთი

თბილისი. გაეცანით ანა ბერიძის ბლოგპოსტს: კლიმატის ცვლილება და ბავშვები.  „1 ივნისს საქართველოში ბავშვთა დაცვის საერთაშორისო დღე აღინიშნება. მისი ერთ-ერთი მიზანი ბავშვთა უფლებების შესახებ ცნობიერების ამაღლება და მათ კეთილდღეობასთან დაკავშირებული პრობლემური საკითხების წამოწევაა. UNICEF-ის 2021 წლის მონაცემების მიხედვით, დღესდღეობით დედამიწაზე თითქმის ყველა ბავშვი არის კლიმატის ცვლილებითა და გარემოს დაზიანებით გამოწვეული მინიმუმ ერთი ისეთი საფრთხის წინაშე მაინც, როგორიც, შესაძლოა, იყოს გაძლიერებული და გახშირებული სითბური ტალღები, ციკლონები, ჰაერის დაბინძურება, წყალდიდობა და სუფთა წყლის დეფიციტი.[1] მსოფლიოს მასშტაბით თანდათან იზრდება ბავშვების როლი გარემოს დაცვის საკითხებთან დაკავშირებულ პროცესებში, რაც ბუნებრივია, ვინაიდან სწორედ ისინი არიან ის თაობა, რომელსაც ყველაზე ნაკლები წვლილი მიუძღვის თანამედროვე კლიმატის ცვლილების გამოწვევაში და მიუხედავად ამისა, სწორედ მათზე აისახება ყველაზე მეტად მისი უარყოფითი შედეგები. ამიტომ, მნიშნელოვანია ბავშვებთან დაკავშირებული საკითხების მეტად პოპულარიზაცია საქართველოში და სახელმწიფოს მხრიდან სხვადასხვა მექანიზმის შექმნა და გამოყენება, რათა უზრუნველყოფილი იყოს მათი სათანადო ჩართულობა კლიმატის ცვლილებასთან დაკავშირებულ პროცესებში“. სრულად... წყარო: gyla.ge

თბილისი. საზოგადოებრივი ორგანიზაციები ეხმიანებიან საქართველოს კონსტიტუციით გარანტირებული შეკრების და გამოხატვის თავისუფლების უკანონო შეზღუდვის ტენდენციას, რომლის კიდევ ერთი მაგალითი ლაზარე გრიგორიადისის მამის ბექა გრიგორიადისის უფლებების დარღვევაა.  „პოლიცია კვლავ უკანონოდ უკრძალავს მოქალაქეებს, საპროტესტო აქციის დროს გაშალონ კარავი, თავს ესხმის მოქალაქეებს და ართმევს მათ საკუთრებას. საზოგადოებრივი ორგანიზაციების შეფასებით, ლაზარე გრიგორიადის მამისთვის კარვის ჩამორთმევით და ამ დროს არაპროპორციული ძალის გამოყენებით უკანონოდ შეიზღუდა საქართველოს კონსტიტუციით გარანტირებული შეკრების და გამოხატვის თავისუფლება. ამასთან, ეს არ იყო დემოკრატიული საზოგადოებისათვის აუცილებლობით გამოწვეული და უფლების შეზღუდვისას არ ყოფილა გამოყენებული პროპორციულად შემზღუდველი ღონისძიება, როგორც ამას ითვალისწინებს საქართველოს კონსტიტუცია და „შეკრებებისა და მანიფესტაციების შესახებ“ საქართველოს კანონი. მოვუწოდებთ შინაგან საქმეთა სამინისტროს, შეწყვიტოს საქართველოს კონსტიტუციით გარანტირებული შეკრების და გამოხატვის თავისუფლების უკანონო შეზღუდვის პრაქტიკა“, ნათქვამია ერთობლივ განცხადებაში. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაცია მიიჩნევს, რომ ბავშვთა დაცვის საერთაშორისო დღე დამატებითი შეხსენებაა სახელმწიფოსთვის, გაატაროს მნიშვნელოვანი ღონისძიებები ბავშვთა უფლებების დაცვისა და ხელშეწყობისთვის, უზრუნველყოს ყველა ბავშვის უფლება, მათ შორის, განათლებაზე, ჯანმრთელობაზე, უსაფრთხო და მზრუნველ გარემოზე. „საია შეახსენებს სახელმწიფოს, მნიშვნელოვან საკითხებს ბავშვთა უფლებების დაცვისა და ხელშეწყობისთვის. აუცილებელია სახელმწიფომ: მყისიერად გადადგას ქმედითი ნაბიჯები სკოლაში უფასო კვების პროგრამის დანერგვასა და განხორციელებისთვის. შეაფასოს და გააძლიეროს ბავშვების სოციალური მხარდაჭერის პროგრამები, რათა ისინი ადეკვატურად პასუხობდნენ სოციალურად დაუცველი ბავშვებისა და ოჯახების საჭიროებებს. ბავშვებისთვის არაძალადობრივი და ღირსეული გარემოს ხელშეწყობისთვის,  იზრუნოს პოზიტიური აღზრდის პროგრამების განვითარებაზე, ქცევის კორექციისა და მშობელთა უნარების სერვისებზე. გაატაროს ღონისძიებები იმისათვის, რომ ყველა ბავშვს, განურჩევლად მდებარეობისა, ჰქონდეს თანაბარი წვდომა ხარისხიან სკოლამდელ განათლებაზე. ბავშვების უსაფრთხოების უზრუნველყოფისა და მათზე ორიენტირებული და სისტემური მიდგომის დანერგვისთვის, გააძლიეროს სახელმწიფო უწყებებს შორის კოორდინაცია და იზრუნოს შესაძლო დამატებითი მომსახურებების დანერგვის საჭიროებაზე“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) შეგახსენებთ საფუძვლებს, რომლითაც მოხელე ქალები არ უნდა გათავისუფლდნენ თანამდებობიდან ორსულობის დროს ან 3 წლამდე ბავშვის აღზრდის პერიოდში. ეს საფუძვლებია: საჯარო დაწესებულების რეორგანიზაცია საჯარო დაწესებულების შერწყმა მოხელის შეფასების შედეგები. სრულად... წყარო: ორგანიზაციის გვერდი სოციალურ ქსელში

თბილისი. თბილისის საქალაქო სასამართლოს 2023 წლის 29 მაისის გადაწყვეტილებით, ნაწილობრივ დაკმაყოფილდა „საქართველოს ეროვნული მუზეუმის“ ყოფილი თანამშრომლის, ეკატერინე კიკნაძის, სარჩელი. გაბათილდა მუზეუმის ბრძანება მოსარჩელის ლაბორანტად დანიშვნის შესახებ და მოპასუხეს მოსარჩელის სასარგებლოდ კომპენსაციის სახით 5000 ლარისა და იძულებითი განაცდურის ანაზღაურება დაეკისრა. „მოსარჩელე სააპელაციო სასამართლოში გააგრძელებს დავას იმ ნაწილში, რა ნაწილშიც სარჩელი არ დაკმაყოფილდა. მოსარჩელის ინტერესებს სასამართლოში საია იცავს“. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ცნობით, ორგანიზაციაში იურიდიული კონსულტაციის მიღების მიზნით, საქართველოს მოქალაქეების მიმართვიანობის მაგალითზე შეიძლება ითქვას, რომ შვილებისთვის ჯანმრთელობის სერვისების მისაღებად მიგრაცია ევროპის სხვადასხვა ქვეყნებში ქალების მძიმე არჩევანია. „ბოლო 3 წლის განმავლობაში, არაერთი სატელეფონო ზარი და შეტყობინება ყოფილა ლტოლვილის სტატუსის მინიჭებასთან დაკავშირებით. ისტორიები განსხვავებულია, თუმცა ინტერესი ერთი - ყველა შესაძლებლობის გამოყენება, რათა შვილებმა მიიღონ ის საჭირო ჯანმრთელობის სერვისები, რომელსაც საკუთარ ქვეყანაში ვერ იღებენ. ვრცლად იმის შესახებ, თუ კიდევ რატომ მიდიან ქალები შრომით მიგრაციაში, წაიკითხავთ  PHR-ის ადვოკატის, სოფიკო მენაბდიშვილის ბლოგპოსტში. სრულად... წყარო: phr.ge