თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს იეჰოვას მოწმეებისადმი 2016 წელს ჩადენილი დანაშაულების ანალიზს. „ბოლო წლის მონაცემების მიხედვით, აგრესია როგორც წესი საჯარო სივრცეში ვლინდება და იეჰოვას მოწმეებს უმეტესად ქუჩაში მსახურების დროს უსწორდებიან. რაოდენობრივად იკლო თემის წევრების საცხოვრებელ სახლებში შეჭრისა და პირადი ქონების დაზიანების შემთხვევებმა (2 შემთხვევა), თუმცა მსგავსი პრობლემა მაინც არსებობს და ფიქსირდება საცხოვრებელ სახლებში შეჭრის, ქვების სროლის, ფანჯრების ჩამსხვრევის, პირადი ნივთების, მათ შორის ავტომობილის დაზიანებისა და ფიზიკური ანგარიშსწორების შემთხვევები", ნათქვამია ორგანიზაციის ვებ-გვერდზე. სრულად... წყარო: emc.org.ge

სამცხე-ჯავახეთი. სოფელ მოხეს საჯარო სკოლაში ჩატარებული ინსპექტირების დასკვნის მიხედვით, სკოლაში მუსლიმი მოსწავლის მიმართ დისკრიმინაციის ფაქტი არ დასტურდება, დასკვნა ასევე ამართლებს მოსწავლისთვის დირექტორის მიერ თავსაბურავის ტარების აკრძალვას. „2 მარტს TDI-ის დამუშავებული სახით (პერსონალური მონაცემების დაცვის უზრუნველყოფით) ჩაბარდა განათლებისა და მეცნიერების სამინისტროს შიდა აუდიტის დეპარტამენტის მიერ მოხეს საჯარო სკოლაში ჩატარებული ინსპექტირების დასკვნა, რომლის მიხედვითაც „ჩატარებული წარმოების შედეგად დადგენილი გარემოებისა და საქმესთან დაკავშირებული პირების წერილობითი ახსნა-განმარტებების ურთიერთშეჯერებით არ დასტურდება დისკრიმინაციული მოპყრობის ფაქტი". მოწოდებულ დოკუმენტში დაფარულია თითქმის ყველა ფაქტობრივი გარემოება, რომელზე დაყრდნობითაც სამინისტრომ მიიღო კონკრეტული გადაწყვეტილება, ასევე, ცალსახად არ წერია, აუკრძალა თუ არა დირექტორის მოვალეობის შემსრულებელმა მოსწავლეს თავსაფრის ტარება. ამის მიუხედავად, დასკვნაში წარმოდგენილია მსჯელობა, თუ რატომ არის გამართლებული მოსწავლისთვის თავსაფრის ტარების შეზღუდვა", ნათქვამია ორგანიზაციის ვებ-გვერდზე. სრულად... წყარო: tdi.ge

სამეგრელო. საერთაშორისო გამჭვირვალობა - საქართველოს ზუგდიდის ოფისის ძალისხმევით ნელი წურწუმიამ საკუთრების უფლება აღიდგინა. „ნელი წურწუმიას 1998 წელს ანაკლიაში მიწის ნაკვეთი გადაეცა, 2001 წელს კი საჯარო რეესტრში კანონის სრული დაცვით დაირეგისტრირა. 2015 წელს, როდესაც ქალბატონმა ნელიმ მიწის ნაკვეთის საზღვრების და ფართობის დაზუსტება გადაწყვიტა და ამისთვის საჯარო რეესტრს მიმართა, აღმოჩნდა, რომ აღნიშნული ნაკვეთი საჯარო რეესტრს სახელმწიფოს საკუთრებად დაერეგისტრირებინა. ქალბატონმა ნელიმ დახმარებისთვის ჩვენს ზუგდიდის ოფისს მიმართა. ჩვენი იურისტის, ლელა მოწონელიძის წარმომადგენლობით ზუგდიდის რაიონულმა სასამართლომ 2017 წლის 6 მარტს ნელი წურწუმიას ადმინისტრაციული სარჩელი დააკმაყოფილა, მიწის ნაკვეთის სახელმწიფოს სახელზე რეგისტრაცია გააუქმა და საჯარო რეესტრის ეროვნული სააგენტოს სამეგრელოს რეგიონულ ოფისს ნაკვეთის საზღვრებისა და ფართობის დაზუსტებული სახით რეგისტრაცია დაავალა”, ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

1-3 მარტს, ბუდაპეშტში ომბუდსმენმა და მისი აპარატის წარმომადგენლებმა მონაწილეობა მიიღეს ევროპის საბჭოს მიერ ორგანიზებულ ქარულ-აფხაზურ შეხვედრაში. შეხვედრის მიზანი იყო ინფორმაციის გაცვლა და კონფლიქტით დაზარალებული მოსახლეობის უფლებრივი მდგომარეობის განხილვა. „შეხვედრას პენიტენციურ სისტემაში ადამიანის უფლებებზე მომუშავე ქართველი და აფხაზი სპეციალისტები ესწრებოდნენ. განსახილველი თემები მოიცავდა პატიმრობისა და თავისუფლების აღკვეთის დაწესებულებებში მოწყვლადი ჯგუფების, კერძოდ, არასრულწლოვნების, უმცირესობების, შეზღუდული შესაძლებლობების მქონე პირთა უფლებებსა და რეაბილიტაცია-რესოციალიზაციის პროგრამების მნიშვნელობას", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

  თბილისი. 1 მარტს პარლამენტმა მიიღო საკანონმდებლო ცვლილებათა პაკეტი, რომელიც ფარული საგამოძიებო ღონისძიებების განსახორციელებლად, სახელმწიფო უსაფრთხოების სამსახურს დაქვემდებარებული ახალი სააგენტოს შექმნას ითვალისწინებს. „კამპანიის „ეს შენ გეხება" წევრებს მიაჩნიათ, რომ პარლამენტის მიერ აღნიშნული საკანონმდებლო პაკეტის მიღება არის საკონსტიტუციო სასამართლოს გადაწყვეტილების უგულვებელყოფის სამწუხარო პრეცედენტი. ცხადია, რომ აღნიშნული რეფორმით არათუ ვერ გვარდება პირადი ცხოვრების ხელშეუხებლობის კუთხით ქვეყანაში არსებული პრობლემები, არამედ კიდევ უფრო მატულობს პერსონალურ მონაცემთა ხელშეუხებლობის დარღვევის რისკები”, ნათქვამია განცხადებაში. სრულად... წყარო: www.transparency.ge  

თბილისი. 25-26 თებერვალს ჩატარდა ტრენინგი თემაზე „საპროცესო შეთანხმების მნიშვნელოვანი ასპექტები საერთაშორისო და ეროვნული სამართლისა და პრაქტიკის საფუძველზე". „ომბუდსმენის ოფისის წარმომადგენელმა ლევან მესხორაძემ და ადვოკატმა გირშელ ძებნიაურმა ტრენინგის მსვლელობისას საპროცესო შეთანხმებასთან დაკავშირებული საერთაშორისო და ეროვნული რეგულაციები განიხილეს, რომელთა გამოყენება ხელს შეუწყობს ბრალდებულთა უფლებებისა და თავისუფლებების დაცვას სისხლის სამართალწარმოების პროცესში", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. „საქართველოში ადამიანის უფლებათა და თავისუფლებათა დაცვის მდგომარეობის შესახებ სახალხო დამცველის 2015 წლის ანგარიშის თაობაზე" პარლამენტის მიერ გაცემული რეკომენდაციების შესრულების მდგომარეობის განხილვა დაიწყო. სრულად... წყარო: www.ombudsman.ge

აჭარა. გაეროს ბავშვთა ფონდის ხელშეწყობით და ევროკავშირის დაფინანსებით აჭარაში დაიწყება ბავშვთა დაცვის მიმართვიანობის პროცედურების დანერგვა. საქართველოს მთავრობის 2016 წლის 12 სექტემბრის დადგენილებით დამტკიცდა ბავშვთა დაცვის მიმართვიანობის (რეფერირების) პროცედურები. აღნიშნული დადგენილების ფარგლებში ბავშვთა მიმართ ძალადობის რეფერირების პასუხისმგებლობა სამინისტროებთან და სხვა სახელმწიფო უწყებებთან ერთად ადგილობრივ თვითმმართველობებსაც ეკისრებათ.  გაეროს ბავშვთა ფონდი მხარს უჭერს საქართველოს მთავრობას აღნიშნული მექანიზმის გაძლიერებასა და გაფართოებაში. აჭარის მთავრობასთან თანამშრომლობით და საქართველოს სოციალურ მუშაკთა ასოციაციასა და ძალადობისაგან დაცვის ეროვნული ქსელის დახმარებით დაგეგმილია აჭარის რეგიონში ბავშვთა დაცვის მიმართვიანობის პროცედურების ამოქმედება", ნათქვამია ორგანიზაციის ვებ-გვერდზე. სრულად... წყარო: unicef.ge

თბილისი. ოჯახში ძალადობის შემსწრე ბავშვს, შესაძლოა, მხვერპლის სტატუსი მიენიჭოს. ეს ინიციატივა „პარტნიორობა ადამიანის უფლებებისთვის" ხელმძღვანელმა ანა აბაშიძემ დააყენა. კიდევ ერთი ინიციატივა ბავშვისთვის მოსარჩელის უფლების მინიჭებას შეეხო. „ანა აბაშიძის წინადადებები ასევე მოიცავდა ისეთ ინიციატივებს, როგორიცაა დამცავი და შემაკავებელი ორდერების უმცირესობათა ენაზეც გამოცემა და საჭიროებისამებრ ბრაილის შრიფტითაც, რასაც იუსტიციის მინისტრის მოადგილის თქმით, ასევე, გაითვალისწინებენ", ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

 თბილისი. მწვანე ალტერნატივამ საქართველოს პარლამენტს მორიგი საკანონმდებლო ინიციატივით მიმართა. „2017 წლის 22 თებერვლის განცხადებით, მწვანე ალტერნატივამ თხოვა საქართველოს პარლამენტის თავმჯდომარეს, განხორციელდეს კანონმდებლობაში შესაბამისი ცვლილებების ინიცირება. რომელთა შედეგად დაწესდება სოციალური შეღავათები/კომპენსაციები სამსახურებრივი მოვალეობის დროს დაღუპული გარემოს დაცვის სფეროს მუშაკების (გარემოსა და ბუნებრივი რესურსების დაცვის სამინისტროს სისტემაში შემავალი უწყებები – დაცულის ტერიტორიების სააგენტოს, ეროვნული სატყეო სააგენტოს, გარემოსდაცვითი ზედამხედველობის დეპარტამენტის/გარემოს დაცვის ინსპექციის თანამშრომლები) ოჯახებისათვის", ნათქვამია ორგანიზაციის ვებ-გვერდზე. სრულად... წყარო: greenalt.org

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს აია ბერაიას თარგმანს: „Governmentality და ქალთა ტრანსნაციონალური მოძრაობების ძალაუფლება". „ეს სტატია სოციალური მოძრაობის პერსპექტივებს მიმოიხილავს, შემდეგ კი ეცდება, დაამტკიცოს, რომ governmentality-ის თეორია ქალთა ორგანიზაციების ძალაუფლებას უფრო სრულყოფილად ხსნის. governmentality-ის თეორია ცოდნის სოციალურ შედეგებზეა ფოკუსირებული და ძალაუფლების უფრო ნაკლებად დიქოტომიურ გაგებას გვთავაზობს, ვიდრე სოციალური მოძრაობის თეორია.  მე წარმოვაჩენ, თუ როგორ მოხდა,  რომ საერთაშორისო ქალთა მოძრაობის ორგანიზაციები, რომლებსაც დასაბამი მეცხრამეტე საუკუნეში ევროპასა და აშშ-ში დაედო, ჩამოყალიბდნენ ქალთა, როგორც უთანასწორობის  მსხვერპლი გლობალური კატეგორიის სპეციალისტებად", ნათქვამია თარგმანში. სრულად... წყარო: emc.org.ge

თბილისი. საქართველოს ჟურნალისტური ეთიკის ქარტია მწუხარებას გამოთქვამს ტელეკომპანია „რუსთავი 2-ის" ჟურნალისტის, მაია ასათიანის შვილის გარდაცვალების გამო. „კატეგორიულად მიუღებელია ტრაგედიით სპეკულირება და ამით გამოცემის რეიტინგის ზრდა. ქარტია მიმართავს მედიასაშუალებებს პატივი სცენ გარდაცვლილის ახლობლებს და თავი შეიკავონ ადამიანის პირადი ცხოვრებით მანიპულირებისგან", ნათქვამია ორგანიზაციის განცხადებაში. სრულად... წყარო: qartia.org.ge

თბილისი. ომბუდსმენი გმობს სამართალდამცავი ორგანოების მიერ მოქალაქის უკანონო დაკავების ფაქტს. „არცერთი საფუძველი არ არსებობდა ა.ბ.–ს დაკავებისას, რამდენადაც თავად ჩხრეკის ოქმების თანახმად, 1. როდესაც აკავებდნენ, არ ჩადიოდა დანაშაულს; 2. სახეზე არ იყო დანაშაულის აშკარა კვალი. აღმოჩენილი ბოთლები და შპრიცები არ  წარმოადგენს დანაშაულის ჩადენის აშკარა კვალს. განსაკუთრებით იმ ფონზე, როდესაც, ა) შპრიცები და ბოთლები იყო ცარიელი, ბ) არანაირი სხვა წინარე ინფორმაცია არ ამყარებდა ვარაუდს, რომ მას შესაძლოა, ჰქონოდა ნარკოტიკი. გ) მისი ჩხრეკა მიმდინარეობდა ცეცხლსასროლი იარაღის აღმოჩენის მიზნით, რაც ასევე არ იყო დასაბუთებული ვარაუდით გამყარებული – ოპერატიული ინფორმაციის საფუძველზე მხოლოდ პოლიციელის გამოკითხვის ოქმი გახდა ჩხრეკის საფუძველი; 3. არ არსებობდა მიმალვის საფუძველი, რამდენადაც თავად დაკავებისა და ჩხრეკის ოქმების თანახმად, ჩხრეკა მიმდინარეობდა მშვიდ ვითარებაში, იგი წინააღმდეგობას არ უწევდა პოლიციას, რასაც ასევე თავად შეესწრო სახალხო დამცველის წარმომადგენელი", ნათქვამია სახალხო დამცველის განცხადებაში. სრულად...  წყარო: www.ombudsman.ge

თბილისი. 21 თებერვალს, ჰაინრიჰ ბიოლის ფონდმა უმასპინძლა წიგნების „ბრძოლა საჯარო სივრცისთვის: როცა პირადი პოლიტიკურია" და „ანტიგენდერული მოზრაობის აღმასვლა" პრეზენტაციასა და დისკუსიას. დღეს, რადიკალურ მემარცხენე მოძრაობებში პოპულარულია ლიბერალური ღირებულებების იმგვარი კრიტიკა, რომელიც ლიბერალიზმს ნეოლიბერალიზმის გაძლიერებასა და სოციალური უთანასწორობის პრობლემის მარგინალიზირებაში ადანაშაულებს. ასეთი კრიტიკა, რომელიც უაღრესად მნიშვნელოვანია ფემინისტური დღის წესრიგის განვითარებისთვის, მეორეს მხრივ შეიძლება წყალს ასხამდეს კონსერვატიული, ანტიგენდერული მოძრაობების წისქვილზე", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ge.boell.org

თბილისი. ახალგაზრდა იურისტთა ასოციაციას თვლის, რომ მაია რჩეულიშვილის მიმართ პატიმრობის ძალაში დატოვების საკითხზე სასამართლომ ზედაპირულად იმსჯელა. „მოსამართლეს გადაწყვეტილების დასასაბუთებლად კონკრეტული ფაქტები ან გარემოებები არ განუხილავს და არსებული საფრთხეების რელევანტურობაზე პოზიცია არ დაუფიქსირებია. მოსამართლემ მხოლოდ აღნიშნა, რომ ის მიზნები და  დასაბუთება, რაც თავის დროზე გახდა პატიმრობის შეფარდების საფუძველი, ახლაც ძალაში იყო და არ არსებობდა ახალი არსებითი გარემოება, რომელიც აღკვეთის ღონისძიების შეცვლას გამოიწვევდა", ნათქვამია ორგანიზაციის ვებ-გვერდზე.   ორგანიზაციას მიაჩნია, რომ, მოცემულ შემთხვევაში, აღკვეთის ღონისძიების სახით პატიმრობის ვადის გაგრძელების დასაბუთება ვერ აკმაყოფილებს საქართველოს კანონმდებლობით დადგენილ რეგულაციებსა და საერთაშორისო სტანდარტებს. სრულად... წყარო: gyla.ge

თბილისი. 23 თებერვალს, მთელი ქვეყნის მასშტაბით იწყება სოციალურ ცვლილებებზე მიმართული საკომუნიკაციო კამპანია. „კამპანიის მიზანია შეზღუდული შესაძლებლობის მქონე ბავშვების მიმართ არსებული სტიგმის დაძლევას ინფორმაციის მიწოდების, გამოცდილების გაზიარების და ურთიერთგაგების საშუალებით. კამპანიას ახორციელებს გაეროს ბავშვთა ფონდი (იუნისეფი) ევროკავშირის, აშშ-ს საერთაშორისო განვითარების სააგენტოს მხარდაჭერით და შეზღუდული შესაძლებლობის მქონე ბავშვებისა და მათი მშობლების აქტიური მონაწილეობით", ნათქვამია გაეროს ბავშვთა ფონდის ვებ-გვერდზე. სრულად... წყარო: unicef.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თამუნა ქებურიას ბლოგპოსტს: „რა შეიძლება მოხდეს იმ დემონსტრაციაზე, სადაც ყველა მოვა?". „კაპიტალისტურ რეალიზმში კატასტროფა ყოველთვის ახლოსაა, თუმცა ის არასდროს არ დგება. ამგვარ სისტემაში ცხოვრების დონე დღითი დღე უარესდება, ფასები იზრდება და ხელფასები იგივე რჩება, მდიდრდები უფრო მდიდრდებიან და ღარიბები უფრო ღარიბდებიან; თუმცა, ამის მიუხედავად, სისტემას დასასრული მაინც არ უწერია. კაპიტალისტური რეალიზმი უზრუნველყოფს იმას, რომ ხვალ ისევ ისე ვაგრძელებთ ცხოვრებას, როგორც გუშინ", ნათქვამია ბლოგპოსტში. სრულად... წყარო: emc.org.ge

თბილისი. „საქართველოში ადამიანის უფლებათა და თავისუფლებათა დაცვის მდგომარეობის შესახებ სახალხო დამცველის 2015 წლის ანგარიშის თაობაზე" პარლამენტის მიერ 2016 წლის 24 ივნისს დადგენილებით გაცემული რეკომენდაციების შესრულების მდგომარეობის განხილვა დაიწყო. „წარმოდგენილი სამი რეკომენდაციიდან, სახალხო დამცველი მიიჩნევს, რომ მხოლოდ ერთი: გამოიყენოს თავის ხელთ არსებული ყველა საშუალება, რათა ადამიანის უფლებების დამცველი საერთაშორისო ორგანიზაციები და გაერთიანებული ერების ორგანიზაციის სახელშეკრულებო ორგანოები მეტად ჩაერთონ ოკუპირებულ ტერიტორიებზე ადამიანის უფლებათა მდგომარეობის შესწავლაში, შეიძლება ჩაითვალოს შესრულებულად, მიუხედავად იმისა, რომ საგარეო საქმეთა სამინისტროს მიერ გადადგმულ ნაბიჯებს კონკრეტული შედეგი არ მოჰყოლია", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. კავშირმა საფარმა სექსუალური შევიწროების პრობლემასთან დაკავშირებული საკანონმდებლო წინადადებისა და კვლევის პრეზენტაცია გამართა. ბაია პატარაიამ საქართველოში სექსუალური შევიწროების საკანონმდებლო რეგულაციების შემოღების აუცილებლობაზე ისაუბრა. სრულად... წყარო: sapari.ge

თბილისი. ორგანიზაცია „ახალგაზრდა ადვოკატები" ტელეკომპანია „რუსთავი 2"-ის მხარდასაჭერ აქციასთან დაკავშირებით, განცხადებას ავრცელებს და სახელმწიფოს პოზიტიური ვალდებულების შესრულების აუცილებლობაზე საუბრობს. „ხელისუფლება ვალდებულია სრულად უზრუნველყოს შეკრებისა და მანიფესტაციის პროცესში მონაწილე ყველა მოქალაქის გამოხატვის თავისუფლება, გაატაროს ყველა ღონისძიება კონსტიტუციური პრინციპების დაცვისა და გამოხატვის თავისუფლების უზრუნველსაყოფად", ნათქვამია ორგანიზაციის განცხადებაში. სრულად... წყარო: barristers.ge

თბილისი. ტოლერანტობის და მრავალფეროვნების ინსტიტუტი (TDI) განცხადებას ავრცელებს დეკანოზ გიორგი მამალაძის საქმეზე. „მიგვაჩნია, რომ დიდი საზოგადოებრივი ინტერესისა და საკითხის მნიშვნელობიდან გამომდინარე, აუცილებელია, სამართლდამცავმა ორგანოებმა საზოგადოებას მიაწოდონ ამომწურავი ინფორმაცია გამოძიების მიმდინარეობისა და ჩატარებული საპროცესო ღონისძიებების შესახებ, ხოლო დაცვის მხარეს მოეხსნას ბრალდების მხარის მიერ დაწესებული შეზღუდვები ინფორმაციის გამჟღავნებასთან დაკავშირებით", ნათქვამია ორგანიზაციის ვებ-გვერდზე. ორგანიზაცია მზადყოფნას გამოთქვამს, სურვილის შემთხვევაში, სამართლებრივი დახმარება გავუწიოთ დაკავებულ გიორგი მამალაძეს. სრულად... წყარო: tdi.ge

თბილისი. ადამიანის უფლებებს სწავლებისა და მონიტორინგის ცენტრი (EMC) აქვეყნებს მაია ბარქაიას ბლოგპოსტს: „შრომა, თავისუფლება და პროტესტის დრო". „ჩვენ დიდი ხანია დაგვაჯერეს, რომ თითოეული ადამიანი წარმოადგენს  არა თავისთავად მიზანს, არამედ სხვათა ანუ ფინანსური ელიტების მიზნების განსახორციელებლად გამოსაყენებელ საშუალებას. გვიჩიჩინებენ, რომ თანასწორობის სურვილი მხოლოდ შურიანთა გონებაში შეიძლება გაჩნდეს, რომ მდიდრის სიმდიდრე მისი განსკუთრებული შესაძლებლობებისა და უნარების დამსახურებაა, რომ გასაქანი უნდა მივცეთ სახელმწიფოს, რათა მან ხელი შეუწყოს მდიდართა უფრო გამდიდრებას, რადგან თავისუფალი ბაზრის აპოლოგეტებს სჯერათ რომ  მდიდარი აუცილებლად დაასაქმებს ხალხს (პირობებს არ აქვს მნიშვნელობა)  და ამგვარად, ბევრს შემოსავლის წყარო გაუჩნდება", ნათქვამია ორგანიზაციის ვებ-გვერდზე. სრულად... წყარო: emc.org.ge