თბილისი. არასამთავრობო ორგანიზაციების ეხმაურებიან მოსაზრებებს ქორწინების საკონსტიტუციო ცვლილებებთან დაკავშირებით. „ხელმომწერი არასამთავრობო ორგანიზაციები უარყოფითად ვაფასებთ კონსტიტუციაში ქორწინების განსაზღვრის შესახებ საკონსტიტუციო კომისიაში წარმოდგენილ ინიციატივას. შემოთავაზებული ფორმულირებით საკონსტიტუციო ჩანაწერი ჰომოფობიურ კონოტაციას ატარებს და ხელს შეუწყობს ლგბტ პირების მიმართ ნეგატიური განწყობების გაძლიერებას. კონსტიტუციაში ამ ცვლილების შეტანას ექნება მსუსხავი ეფექტი ადამიანის უფლებების მდგომარეობაზე ქვეყანაში. აღნიშნული ცვლილების მიღების შემთხვევაში კი, მისი ნეგატიური ეფექტის დაბალანსების მიზნით, აუცილებელია პარალელურად დაიწყოს საკანონმდებლო ცვლილებების პროცესი სამოქალაქო პარტნიორობის, როგორც ერთი და იმავე სქესის წყვილების სამართლებრივი აღიარების ფორმის, დასაკანონებლად", ნათქვამია ერთობლივ განცხადებაში. სრულად... წყარო: www.isfed.ge

ქვემო ქართლი. 5-6 აპრილს ქალთა საინფორმაციო ცენტრის ორგანიზებით წალკის საზოგადოებრივ ცენტრში ჩატარდა ტრენინგი. „ტრენინგის მონაწილეებმა მიიღეს ინფორმაციას გენდერული როლებისა და სტერეოტიპების, შრომის ბაზრის გენდერული სეგრეგაციის და გენდერული თანასწორობის, როგორც დემოკრატიის, სოციალური სამართლიანობისა და კეთილდღეობის საკითხების შესახებ. ასევე ოჯახში ძალადობის გამომწვევი მიზეზებისა და ოჯახში ძალადობის მსხვერპლებისთვის დახმარების სერვისების შესახებ”, ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. „საქართველოს დაუნის სინდრომის ასოციაცია" ეხმაურება სახალხო დამცველის მიერ გაკეთებულ განცხადებას, სადაც ის საუბრობს მინდობით აღზრდის მომსახურებაში მყოფი ბავშვების მიმართ რიგი დარღვევების შესახებ. „არსებული ინფორმაციით, 2016 წლის ნოემბერში თბილისის ჩვილ ბავშვთა სახლში ჩაირიცხა მინდობით აღზრდის სერვისიდან გამოსული 5 წლის გოგონა. ბავშვი არის დაუნის სინდრომის მქონე. მას აღენიშნება ფიზიკური და გონებრივი განვითარების მკვეთრი ჩამორჩენა. ვერ დადის, ვერ ჯდება. მისი წონა შეადგენს 6 კგ–ს", ნათქვამია ორგანიზაციის განცხადებაში. ორგანიზაცია მოუწოდებს საქართველოს მთავრობას, დეტალურად შეისწავლოს და გამოიძიოს ეს საქმე. სრულად... წყარო: liberali.ge

თბილისი. ომბუდსმენი მიიჩნევს, რომ მიღებული საკანონმდებლო ცვლილებების თანახმად, ე.წ. ფარული მიყურადების ტექნიკური შესაძლებლობა კვლავ რჩება სახელმწიფო უსაფრთხოების სამსახურის ხელში. აღნიშნული კი ეწინააღმდეგება საქართველოს საკონსტიტუციო სასამართლოს მიერ 2016 წლის 14 აპრილს მიღებულ გადაწყვეტილებას. „სახალხო დამცველი უახლოეს დღეებში შესაბამისი კონსტიტუციური სარჩელით მიმართავს საქართველოს საკონსტიტუციო სასამართლოს და მოითხოვს ე.წ. მოსმენების მომწესრიგებელი ახალი კანონმდებლობის გამარტივებული წესით არაკონსტიტუციურად ცნობას", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ლელა რეხვიაშვილის ბლოგპოსტს: „გარემოვაჭრეები და კაპიტალისტური წესრიგი". „სახელმწიფო ვერ განდევნის მოვაჭრეებს და თუ მოწესრიგება სურს, მაშინ: უნდა აღიაროს მოვაჭრეების სოციალური მოწყვლადობა, ზოგად სახელმწიფო დონეზე უნდა გაზარდოს სოციალური დახმარების პროგრამების მოცულობა. მიკრო დონეზე უნდა ჩაერიოს კომერციული ფართის ფასების დარეგულირებაში, ბაზრებისა და სავაჭრო ცენტრების მფლობელებსა და მოვაჭრეებს შორის მოლაპარაკებებში, უნდა გამოყოს საჯარო სივრცეები, სადაც მოვაჭრეებს უფასოდ ან დაბალი და სტაბილური გადასახადის ნაცვლად შეეძლებათ ვაჭრობა. უნდა გახსნას სახელმწიფო მფლობელობაში არსებული ბაზრები და სხვა სახის სავაჭრო სივრცეები”, ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თარგმანების კრებულს. „გვსურს, ჩვენი მცირე წვლილი შევიტანოთ კრიტიკული ფემინისტური დებატებისა და ინფორმირების გაძლიერებაში და შემოგთავაზოთ საინტერესო ფემინისტური თარგმანები, სადაც ავტორები განიხილავენ იმ ძალაუფლებრივ სტრუქტურებს, რომლებიც განსაზღვრავენ და მართავენ ქალთა ცხოვრებასა და მდგომარეობას”, ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. რადიო „თავისუფლება" აქვეყნებს ფრიდომ ჰაუსის ანგარიშის: „სახელმწიფოები გარდამავალ პერიოდში 2017" მიმოხილვას. „ანგარიში ასახავს ვითარებას 29 ქვეყანაში, მათ შორის, საქართველოში და გვთავაზობს დასკვნას, რომ განვლილ წელს 29 ქვეყნიდან 18-ში გაუარესდა მდგომარეობა ადამიანის უფლებების დაცვის მხრივ. საბედნიეროდ, ეს ტენდენცია არ შეხებია საქართველოს, თუმცა „ფრიდომ ჰაუსი" საქართველოში ვერც წინსვლას ხედავს", ნათქვამია რადიო „თავისუფლების" ვებ-გვერდზე. სრულად... წყარო: www.radiotavisupleba.ge

თბილისი. 27 ნოემბერს, თბილისის მუნიციპალიტეტში უსახლკაროდ რეგისტრაციისა და თავშესაფრით უზრუნველყოფის კომისია შეიქმნა, რომელიც პერიოდულად იკრიბება და სწავლობს განაცხადებს. „კომისიის მუშაობის შესახებ მოყვანილი სტატისტიკა ცხადად აჩვენებს ქ. თბილისის მუნიციპალიტეტის არასაკმარის და არაეფექტიან პოლიტიკას უსახლკარო ჯგუფებთან მიმართებით. ხოლო მერიისათვის მოქალაქეთა მიმართვიანობის მაღალი მაჩვენებელი და ის ფაქტი, რომ განხილული განცხადებების თითქმის ნახევარი უსახლკარო პირის სტატუსისათვის დადგენილ კრიტერიუმებს აკმაყოფილებს, უსახლკარობის პრობლემის სისტემურობას უსვამს ხაზს. სტატისტიკური მონაცემები აჩვენებს, რომ კომისია ვერ ახერხებს განცხადებების დროულად შესწავლას და ადეკვატურად რეაგირებას", ნათქვამია ორგანიზაციის ვებ-გევრდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს დეკლარაციას. „ჰომო/ბი/ტრანსფობიასთან ბრძოლის გრძელვადიანი ადვოკატირების სტრატეგია/დეკლარაცია მიზნად ისახავს საქართველოში ჰომო/ბი/ტრანსფობიისა და ლგბტი ადამიანთა მიმართ დისკრიმინაციის აღმოფხვრის მხარდაჭერას კომპლექსური მიდგომის გზით. ჰომო/ბი/ტრანსფობიის პრობლემატიზაცია პირველ რიგში გულისხმობს იმის აღიარებას, რომ მას კომპლექსური ბუნება აქვს და მისი დაძლევისათვის მნიშვნელოვანია საკითხის ერთიან კონტექსტში გააზრება. ცალკეულ სფეროებში საჭირო ინტერვენციები მუდმივად იკვეთება ერთმანეთთან და, შესაბამისად, პრობლემის დასაძლევად მნიშვნელოვანია სხვადასხვა სახელმწიფო და სხვა აქტორების კოორდინირებული თანამშრომლობა და ერთიან ხედვაზე შეთანხმება", ნათქვამია ორგანიზაციის ვებ-გვერდზე. სრულად... წყარო: emc.org.ge

იმერეთი. 5-6 აპრილს, „ქალთა ფონდი საქართველოში"-ს ორგანიზებით, საქართველოში პირველად ჩატარდება ფემინისტური ფესტივალი. „ფესტივალის საშუალებით გვინდა აღვნიშნოთ და ვიზეიმოთ ის უმნიშვნელოვანესი თარიღი, რომელიც საქართველოში პირველი ფემინისტური გაზეთის „ხმა ქართველი ქალისა” 100 წლისთავს უკავშირდება. გაზეთი ქუთაისში 1917-1918 წლებში, ფემინისტის, პუბლიცისტისა და აქტივისტის კატო მიქელაძის (1878-1942) თაოსნობით გამოიცემოდა. ჩვენთვის ფესტივალი საშუალებაა ხაზი გავუსვათ თანასწორობისა და სამართლიანობისთვის ბრძოლის იმ მნიშვნელოვან ისტორიულ მემკვიდრეობას, რომელიც საქართველოში ფემინიზმს გააჩნია. გვინდა, კიდევ ერთხელ, წინ წამოვწიოთ თემები, რაც ქალებისთვის ერთი საუკუნის წინაც და ახლაც აქტუალურია - იქნება ეს პოლიტიკური მონაწილეობა, ეკონომიკური გაძლიერება, განათლება, ოჯახი და ქორწინება, გენდერული ჩაგვრა და უსამართლობა, თუ სხვა მნიშვნელოვანი საკითხები", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს სახალხო დამცველი აქვეყნებს ანგარიშს 2016 წელს ქვეყანაში ადამიანის უფლებათა და თავისუფლებათა დაცვის მდგომარეობის შესახებ. „ანგარიში მიმოიხილავს ადამიანის უფლებათა ფართო სპექტრს, განსაკუთრებულ ყურადღებას ამახვილებს საანგარიშო პერიოდში გამოვლენილ დადებით და უარყოფით ტენდენციებზე. ამასთან, თავს უყრის სახალხო დამცველის მიერ ხელისუფლების სხვადასხვა შტოს მისამართით შემუშავებულ ძირითად, უმნიშვნელოვანეს რეკომენდაციებს", ნათქვამია ომბუდსმენის ვებ-გვერდზე. სრულად... წყარო: ombudsman.ge

თბილისი. კამპანია „ეს შენ გეხება" განცხადებას ავრცელებს. „ფარულ მოსმენა-მიყურადებასთან დაკავშირებული საკანონმდებლო პაკეტი საკონსტიტუციო სასამართლომ ერთხელ უკვე სცნო არაკონსტიტუციურად. თუმცა, საქართველოს პარლამენტმა არ გაითვალისწინა სასამართლოს შენიშვნები. შედეგად, ფარული მიყურადების ახალი კანონმდებლობა კვლავ ვერ უზრუნველყოფს პირადი ცხოვრების ხელშეუხებლობას და საქართველოს კონსტიტუცია ისევ ირღვევა. ახალი კანონმდებლობით კიდევ უფრო მატულობს პერსონალურ მონაცემთა ხელშეუხებლობის დარღვევის რისკები. ელექტრონული სარჩელის ეს ფორმა საქართველოს ყველა მოქალაქეს აძლევს შანსს - გამოიყენოს მის ხელთ არსებული სამართლებრივი მექანიზმი და გაასაჩივროს აღნიშნული კანონმდებლობა. გთხოვთ, შევსებული სარჩელი ამობეჭდოთ, ხელი მოაწეროთ და მოგვაწოდოთ 6 აპრილს, 12:00 სთ-დან 17:00 სთ-მდე, შემდეგ მისამართზე: ქ. თბილისი, ჭოველიძის 10, ფონდი „ღია საზოგადოება საქართველოს" ოფისი. ასევე, შეგიძლიათ უშუალოდ მობრძანდეთ დასახელებულ მისამართზე და ჩვენი წარმომადგენელი დაგეხმარებათ ადგილზე შეავსოთ სარჩელი. გთხოვთ, თან იქონიოთ პირადობის დამადასტურებელი მოწმობა ან პასპორტი", ნათქვამია ორგანიზაციის ვებ-გვერდზე. სრულად... წყარო: www.esshengexeba.ge

თბილისი. 2 აპრილი აუტიზმის შესახებ ცნობიერების ამაღლების საერთაშორისო დღეა. „საქართველოში, ბოლო ერთი წლის მანძილზე აუტისტური სპექტრის მქონე პირთა უფლებების დაცვის კუთხით ხელშესახები ცვლილებები არ განხორციელებულა. განსაკუთრებით მწვავეა ბავშვთა პრობლემები. გამოწვევაა მათზე მორგებული ჯანმრთელობის დაცვისა და აბილიტაცია/რეაბილიტაციის სერვისების, ინკლუზიური განათლების მიღების შესაძლებლობა. სახელმწიფო ვერ უზრუნველყოფს მათთვის საჭირო პროგრამებისა და მომსახურების შექმნას, ინკლუზიურ საგანმანათლებლო პროცესში ჯეროვან ჩართვას. მძიმეა რეგიონებში მცხოვრები ბავშვების და მათი ოჯახების მდგომარეობა. ადგილობრივი თვითმმართველობის ორგანოებს, მცირე გამონაკლისის გარდა, არა აქვთ გაზიარებული ამ პირთა მიმართ პასუხისმგებლობა და საკუთარი ვალდებულებები", ნათქვამია ომბუდსმენის განცხადებაში. სახალხო დამცველი მოუწოდებს ხელისუფლებას გადადგას ქმედითი ნაბიჯები პრობლემების მოსაგვარებლად. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: „როგორ ჩავაყენოთ ეკონომიკა სოციალური უფლებების სამსახურში?". „მაგრამ ამ თეორიებს რომ თავი დავანებოთ, ცოტა რამ პირადი გამოცდილებითაც შეგვიძლია ვისწავლოთ. „ნაცმოძრაობის" მიერ გატარებული რადიკალური მარკეტიზაციის პოლიტიკა უპრეცედენტოა ჩვენს რეგიონში – პოსტსაბჭოთა და ზოგადად პოსტსოციალისტურ სივრცეში. შესაბამისად, საკმაოდ მკაფიო გაკვეთილებსაც გვაძლევს. ამ გაკვეთილებიდან, რომელიც, სამწუხაროდ, ვერც თავად „ნაცმოძრაობამ" და ვერც ოცნებამ ვერ გაიაზრა, ორი საკითხი იკვეთება განსაკუთრებული სიცხადით და სიმწვავით: ერთი – ეკონომიკურ ზრდას სიღარიბის შემცირება არ მოჰყვება და მეორეც – სახელმწიფო ჩარევის გარეშე ეკონომიკა არ მოძრაობს", ნათქვამია ლელა რეხვიაშვილის ბლოგპოსტში. სრულად... წყარო: emc.org.ge

თბილისი. ჟურნალისტური ეთიკის ქარტიის საბჭოს გადაწყვეტილებით, გადაცემა „პირადი ექიმი – მარი მალაზონიას” წამყვანმა მარი მალაზონიამ დაარღვია ქარტიის მერვე პრიციპი. „განმცხადებელი, „პარტნიორობა ადამიანის უფლებებისთვის (PHR)” სადავოდ ხდიდა 2017 წლის 27 იანვარს გასულ გადაცემას, როდესაც წამყვანმა მარი მალაზონიამ პირდაპირ ეთერში გააშიშვლა ბავშვი და სტუდიაში მოწვეული პედიატრების დახმარებით მაყურებელს აჩვენა თუ როგორ გამოიყურებოდა ბავშვის დეფორმირებული გულ-მკერდი. საქმის განხილვას როგორც განმცხადებელი, ისე მოპასუხე ჟურნალისტი ესწრებოდა. გადაწყვეტილების სამოტივაციო ნაწილი მოგვიანებით გამოქვეყნდება”, ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

თბილისი. „საერთაშორისო გამჭვირვალობა - საქართველო" აქვეყნებს ვიდეო რგოლს, სადაც ორგანიზაცია მწერალ ლაშა ბუღაძესთან ერთად ცდილობს ახსნას თუ რა დაბრკოლებებს აწყდებიან თბილისელები ყოველდღიურად ქვეითთა გადასასვლელებზე გადასვლისას. სრულად... წყარო: ორგანიზაციის ვებ-გვერდი სოციალურ ქსელში

თბილისი. გოგონათა, ქალთა, ბავშვთა, შეზღუდული შესაძლებლობის მქონე პირთა და უმცირესობათა საკითხებზე მომუშავე საზოგადოებრივი ორგანიზაციები მიმართვას ავრცელებენ. „მიგვაჩნია, რომ სათანადოდ არ ხდება ქალებისა და სხვა მოწყვლადი ჯგუფების უფლებების რეალიზება, რისი მიზეზიც უმეტესად არსებითი თანასწორობის კონსტიტუციური გარანტიების არარსებობაა. ... საქართველოს კონსტიტუცია უნდა იყოს გენდერულად სამართლიანი...", ნათქვამია განცხადებაში. სრულად... წყარო: აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი აქვეყნებს დიდ ბრიტანეთში დარეგისტრირებული ორგანიზაციის „მე–19 მუხლის" მიერ გამოქვეყნებულ დოკუმენტს: „გამოხატვის თავისუფლებისა და პირადი ცხოვრების ხელშეუხებლობის დაცვის გლობალური პრინციპები". დოკუმენტის შესავალში აღნიშნულია, რომ გამოხატვის თავისუფლება და პირადი ცხოვრების ხელშეუხებლობა დემოკრატიული საზოგადოების, მისი პროგრესისა და ყოველი ინდივიდის განვითარების მნიშვნელოვანი საფუძველია. დემოკრატიის, ანგარიშვალდებულებისა და კარგი მმართველობის განვითარებისთვის მნიშვნელოვანია გამოხატვისა და აზრის თავისუფლების დაცვა და პატივისცემა. იგივე შეიძლება ითქვას პირადი ცხოვრების ხელშეუხებლობის შესახებ, რომელიც თანამედროვე ეპოქაში სახელმწიფო და კორპორაციული ძალაუფლების წინააღმდეგ მნიშვნელოვანი ბერკეტია. სრულად... წყარო: idfi.ge

23 მარტს, ხელვაჩაურის რაიონულმა სასამართლომ ზურაბ შარაბიძის სარჩელი სრულად დააკმაყოფილა. „ჩვენი ბათუმის ოფისის იურისტების ანა ბერძენიშვილის და ნინო სიორიძის დახმარებით, ზურაბ შარაბიძე ხელვაჩაურის მუნიციპალიტეტის გამგეობაში ინფრასტრუქტურის, არქიტექტურისა და ზედამხედველობის სამსახურის, მშენებლობისა და ინფრასტრუქტურის განვითარების განყოფილების მთავარი სპეციალისტის თანამდებობაზე აღდგება. ასევე, იძულებით განაცდურის სახით სამუშაო თვეების შრომით ანაზღაურებასაც 4480 ლარს (მათ შორის პრემიას) მიიღებს", ნათქვამია ორგანიზაციის ვებ-გვერდზე. თუ თვლით, რომ საჯარო სამსახურში კონკურსებისას დაირღვა თქვენი უფლებები ან უკანონოდ გაგათავისუფლეს, მოგვმართეთ ორგანიზაციას უფასო იურიდიული დახმარებისთვის. სრულად... წყარო: ორგანიზაციის ვებ-გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეოს: „ორიენტალიზმი და მუსლიმ ქალთა რეპრეზენტაცია". „რა არის ორიენტალიზმი და როგორ ხდება ორიენტის წარმოება? როგორია მუსლიმ ქალთა რეპრეზენტაცია და რა კონტექსტი ქმნის მუსლიმი ქალების სახე ხატებს? რა შედეგები მოაქვს მუსლიმი ქალების უფლებების დაცვის სახელით წარმოებულ პოლიტიკებს? სჭირდებათ თუ არა მუსლიმ ქალებს ხსნა?. ვიდეო არის მცდელობა პასუხი გასცეს კითხვას თუ როგორ შეიძლება ვიფიქროთ იმ გზებზე, რომლებიც სამართლიანი და თანასწორი სამყაროს შექმნას შეუწყობს ხელს და როგორია ჩვენი როლი ამ პროცესში", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. Media Checker - მედია მედიისთვის აქვეყნებს თამარ კურატაშვილის ბლოგპოსტს: „სინდისის ტერმინატორი”. „ამ ამბავში ცუდი ისაა, რომ ვერასდროს გაიგებ, ვის მოუვიდა თავში შენი „მოკვლა", რადგან ავტორები თავიანთ სახელ-გვარს არასოდეს აწერენ. მსგავს ნიუსებზე პასუხისმგებლობას არასდროს არავინ იღებს, რადგან თავადაც ხვდებიან, რომ ამ საქმიანობაში საამაყო არც არაფერია. პირიქით, ახარებთ კიდეც ის ამბავი, რომ ავტორის ვინაობა არასდროს არავისთვის გახდება ცნობილი, რაც მათში კიდევ უფრო მეტ გამბედაობას ბადებს. კვირაში ერთი ასეთი სენსაცია ყველა ამ ონლაინ ქსელში გაბმული ადამიანის მკვებავი ხდება”, ნათქვამია სტატიაში. სრულად... წყარო: mediachecker.ge

თბილისი. 21 მარტს, სახალხო დამცველმა რეკომენდაციით მიმართა ჯანდაცვის სამინისტროს, გაატაროს საჭირო ღონისძიებები „ბროწლიანის სათნოების სახლში" არსებული პრობლემების მოსაგვარებლად . „შესწავლის შედეგად გამოვლინდა, რომ მომსახურების მიწოდება არ ხორციელდება ბენეფიციარებზე ორიენტირებულ გარემოში. სერვისი არ არის მორგებული ინდივიდუალურ საჭიროებებზე, არ არის დაცული უსაფრთხოება და სანიტარულ-ჰიგიენური მდგომარეობა. სათანადო ყურადღება არ ექცევა ბენეფიციართა ჯანმრთელობის მდგომარეობას, ამასთან არ ხდება მათი სოციალური აქტიურობის ხელშეწყობა. დაუყოვნებელ ცვლილებას საჭიროებს რთული ქცევის მართვის კუთხით დაწესებულებაში დამკვიდრებული ნეგატიური პრაქტიკა", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge