თბილისი. სახალხო დამცველმა საზოგადოებას 2016 წლის საქმიანობის შემაჯამებელი ანგარიში გააცნო 6 თებერვალს.  დოკუმენტში ასახულია სახალხო დამცველის აპარატის მიერ გაწეული საქმიანობა. კვლავ მაღალია სახალხო დამცველისადმი მიმართვიანობა, საანგარიშო პერიოდში აპარატში 8827 განცხადება–საჩივარი შევიდა, ხოლო 7196 განცხადება–საჩივარზე დასრულდა მუშაობა, ნათქვამია ომბუდსმენის ვებგვერდზე. სახალხო დამცველის ანგარიში, 2016... წყარო: ombudsman.ge

თბილისი. 4 თებერვალს, საქართველოს განათლების ხარისხის განვითარების ეროვნული ცენტრის საზოგადოებასთან ურთიერთობის სამსახურის უფროსსმა განაცხადა, რომ რ. შაჰინის სახელობის მეგობრობის სკოლა-ლიცეუმს ბათუმში ავტორიზაცია უნდა გაუუქმდეს. მიზეზად კი სკოლაში გეგმიური მონიტორინგის შედეგად აღმოჩენილი დარღვევები დასახელდა. „4 თებერვალს, ტოლერანტობისა და მრავალფეროვნების ინსტიტუტი (TDI) სკოლა-ლიცეუმის დირექტორს, ელგუჯა დავითაძეს შეხვდა და მისგან ახსნა-განმარტებები მოისმინა. დირექტორის თქმით, ავტორიზაციის საბჭო მთავარ დარღვევად, სკოლაში არაქართულენოვან სექტორზე თურქეთის ათი მოქალაქის ჩარიცხვას უთითებს. სკოლისთვის ავტორიზაციის მოულოდნელად გაუქმების გადაწყვეტილებასთან მიმართებით ბევრი კითხვის ნიშანი ჩნდება. TDI საქმესთან დაკავშირებულ დოკუმენტებს სწავლობს და მოგვიანებით, დეტალურ სამართლებრივ ანალიზსა და შეფასებას გამოაქვეყნებს”, ნათქვამია ორგანიზაციის ვებ-გვერდზე. სრულად... წყარო: tdi.ge

თბილისი. „ახალგაზრდა ადვოკატები" რუსთავში აზოტის ქარხნიდან გათავისუფლებული დასაქმებულების საქმეზე მონიტორინგს განახორციელებს და შრომის უფლებებთან დაკავშირებულ საკითხებზე შეფასებას წარმოადგენს. „„ახალგაზრდა ადვოკატების" ინტერესია, შესწავლილ იქნეს საკითხი, თუ რა გარემო პირობების გამო გახდა აუცილებელი დასაქმებული პირების გათავისუფლება, რატომ აღმოჩნდა ფინანსური პრობლემების წინაშე კომპანია, როგორ ნაწილდება გათავისუფლებულთა მიმართ სახელმწიფოსა და კომპანიის სოციალური პასუხისმგებლობის ტვირთი. ორგანიზაცია მონიტორინგის შედეგებს საზოგადოებას წარუდგენს", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. საქართველოს ახალგაზრდა იურისტთა ასოციაცია ოფიციალური წერილით შინაგან საქმეთა სამინისტროდან საჯარო სახის ინფორმაციას ითხოვდა. სამინისტრომ განცხადებას ასე უპასუხა: „შინაგან საქმეთა სამინისტროს ადამიანური რესურსების მართვის დეპარტამენტის ერთიან საინფორმაციო ბაზაში ინფორმაცია მოთხოვნის შესაბამისი სახით დაცული არ არის, ხოლო არსებულის დამუშავება მოითხოვს დიდ რესურსს და დროს, რაც შინაგან საქმეთა სამინისტროში მიმდინარე ცვლილებების ფონზე ადამიანური რესურსების მართვის დეპარტამენტს არ გააჩნია." საია თვლის რომ „საქართველოს შინაგან საქმეთა სამინისტრომ მნიშვნელოვნად გააუარესა საჯარო ინფორმაციის გაცემის ხარისხი". სრულად... წყარო: www.gyla.ge

თბილისი. 24 იანვარს, ომბუდსმენმა რეკომენდაციით მიმართა „ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდს". სახალხო დამცველი მოუწოდებს ფონდს უზრუნველყოს მარტყოფის შშმ პირთა პანსიონატში არსებული პრობლემების მოსაგვარებლად საჭირო ღონისძიებების გატარება. „სახალხო დამცველის აპარატმა ცხელ ხაზზე შემოსული შეტყობინების საფუძველზე შეისწავლა საქმე სსიპ „ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდის" ფილიალის, მარტყოფის შეზღუდული შესაძლებლობის მქონე პირთა პანსიონატის ერთ–ერთი ბენეფიციარის სავარაუდო უფლებადარღვევის ფაქტზე. ასევე ინფორმაცია დასახელებული დაწესებულების ბენეფიციარებს შორის არსებული დაპირისპირებისა და კონფლიქტური სიტუაციის შესახებ", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. 2017 წელს, მწვანე ალტერნატივა გეგმავს შეხვედრებისა და ტრენინგების სერიის მოწყობას თემაზე „ენერგეტიკის სექტორში არსებული გამოწვევები ადამიანის უფლებათა დაცვის ჭრილში". „დაგეგმილი შეხვედრების მიზანია, ენერგეტიკულ პროექტებთან მიმართებაში ადამიანის უფლებების დაცვის კუთხით (მათ შორის, გარემოსდაცვითი, სოციალურ-ეკონომიკური, შრომითი და გენდერული უფლებები) არსებულ გამოწვევებსა და მათი გადაჭრის გზებზე სამოქალაქო ორგანიზაციების ხედვისა და პერსპექტივის ჩამოყალიბება, ინფორმაციის გაცვლა და თანამშრომლობის გაღრმავება სხვადასხვა ჯგუფებს შორის, ასევე ერთობლივი მუშაობის შესაძლებლობის შესწავლა. შეხვედრათა ციკლში მონაწილეობის სურვილის შემთხვევაში, აუცილებელია თანდართული განაცხადის ფორმის შევსება და მისი მოწოდება არაუგვიანეს 2017 წლის 10 თებერვლისა (18:00 სთ). სხვადასხვა შეხვედრაში მონაწილეების შერჩევა მოხდება მხოლოდ შევსებული განაცხადის ფორმების საფუძველზე", ნათქვამია ორგანიზაციის ვებ-გვერდზე. სრულად... წყარო: greenalt.org

25 იანვარს, ომბუდსმენის მოადგილე ჟენევაში, სექსუალური ორიენტაციისა და გენდერული იდენტობის ნიშნით დისკრიმინაციისა და ძალადობისგან დაცვის საკითხებში დამოუკიდებელ ექსპერტთან ვიტიტ მუნტარბორნთან გამართულ საკონსულტაციო შეხვედრას დაესწრო. „შეხვედრისას განიხილეს დამოუკიდებელი ექსპერტის მანდატი, საქმიანობის ძირითადი მიმართულებები. დამსწრეებს საშუალება ჰქონდათ მიეწოდებინათ რეკომენდაციები დამოუკიდებელი ექსპერტის სამომავლო საქმიანობის მიმართულებებსა და თანამშრომლობის შესაძლებლობებზე. შეხვედრამდე სახალხო დამცველმა დამოუკიდებელ ექსპერტს წერილობითი მოსაზრება წარუდგინა, სადაც მიმოხილულია დისკრიმინაციის საკითხებზე სახალხო დამცველის საქმიანობის ძირითადი შედეგები, სექსუალური ორიენტაციის და გენდერული იდენტობის ნიშნით ძალადობისა და დისკრიმინაციის მიმართულებით არსებული ძირითადი ტენდენციები და სამომავლოდ განსახორციელებელი აქტივობები", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. ეს შენ გეხება მმართველი პარტიის მიერ წარმოდგენილ კანონპროექტს ეხმაურება. „სატელეფონო და ინტერნეტ კომუნიკაციაზე ფარულ მიყურადებას, ასევე ფარულ ვიდეო და აუდიო გადაღებას განახორციელებს სუს-ის შემადგენლობაში არსებული უწყება - საჯარო სამართლის იურიდიული პირი (სააგენტო). წარმოდგენილი კანონპროექტი ცალსახად შეუსაბამობაში მოდის საკონსტიტუციო სასამართლოს ზემოთნახსენები გადაწყვეტილების სულისკვეთებასთან და ქმნის რისკებს ადამიანის უფლებებში უსაფუძვლო ჩარევისთვის. „კამპანია მოუწოდებს საკანონდებლო ორგანოს, პატივი სცეს საკონსტიტუციო სასამართლოს გადაწყვეტილებას, საქართველოს კონსტიტუციას და საკონსტიტუციო წესრიგს, რომელიც ქვეყნის უსაფრთხოებისა და ადამიანის უფლებების დაცვის გარანტს წარმოადგენს", ნათქვამია სამართლიანი არჩევნების და დემოკრატიის საეთაშორისო ცენტრის ვებ-გვერდზე. სრულად... წყარო: www.isfed.ge

თბილისი. ადამიანის უფლებათა ცენტრმა ეროვნული ბიბლიოთეკის საკონფერენციო დარბაზში წლიური ანგარიშის პრეზენტაცია გამართა. „ანგარიში მოიცავს ძირითად ტენდენციებს ადამიანის უფლებათა ისეთ სფეროებში, როგორიც არის: მსჯავრდებულთა მდგომარეობა, მაღალი საზოგადოებრივი ინტერესის მქონე საქმეები, პოლიციელთა მხრიდან უფლებამოსილების გადამეტება და გადაცდომები, მედიის თავისუფლების საკითხები, შშმ პირთა მდგომარეობა, უმცირესობების მდგომარეობა და ა.შ ანგარიშის მომზადება შესაძლებელი გახდა პროექტის - „იურიდიული დახმარება და ადამიანის უფლებათა მონიტორინგი" ფარგლებში", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

იმერეთი. ქალთა ფონდის ფინანსური მხარდაჭერით ჩატარდა კვლევა სოფლად მცჯოვრები მაღაროელი ქალების საჭიროებების შესახებ (ჭიათურა). კვლევაში განხილულია ჭიათურის მაღაროებსა და ქარხნებში დასაქმებული ქალების საჭირობები. იგი მოიცავს რაოდენობრივ და თვისებრივ კომპონენტებს. ამონარიდი კვლევის მიგნებებიდან „... რესპოდენტების ნახევარზე მეტი ოჯახში ერთადერთი შემომტანია. საშუალო შემოსავალი კი – 300 ლარამდეა...". კვლევა... წყარო: ქალთა ფონდი საქართველოში

თბილისი. 27 იანვარს „ლიბცენტრში" გაიმართა არასამთავრობო ორგანიზაციის „თანასწორობა მოძრაობის" წარმომადგენლით დავით კახაბერიძის საჯარო ლექცია: „ქვიარ აქტივიზმის გამოცდილება საქართველოსა და დასავლეთში". წყარო: ცენტრის ვებგვერდი სოციალურ ქსელში

თბილისი. ქალთა საინფორმაციო ცენტრი განცხადებას ავრცელებს აფხაზეთის საოკუპაციო რეჟიმის მიერ გზის ჩაკეტვასთან დაკავშირებით. „ქალთა საინფორმაციო ცენტრს სურს გამოეხმაუროს აფხაზეთის საოკუპაციო რეჟიმის მიერ გალიდან ზუგდიდის მიმართულებით გზის გადაკეტვის გადაწყვეტილებას. უკიდურესად ვგმობთ ამ ნაბიჯს, რაც ადგილობრივ მოსახლეობას სერიოზულ ჰუმანიტარულ პრობლემას შეუქმნის. საკონტროლო-გამშვები პუნქტები კიდევ უფრო გაურთულებს სასწავლო პროცესს მოსწავლეებს, რომლებიც ვეღარ მოახერხებენ სკოლებამდე მისვლას და მათ მხოლოდ შემოვლითი გზა დარჩებათ. ასევე ენგურის ხიდზე ე.წ საბაჟო გამშვები პუნქტის ამოქმედება მძიმე ეკონომიკურ ტვირთად დააწვება მოსახლეობას. გართულდება ჯანდაცვის სერვისებზე წვდომაც. მოვითხოვთ, ხელისუფლებამ გააკეთოს ყველაფერი რათა შეწყდეს საოკუპაციო რეჟიმის ამგვარი ქმედება. მნიშვნელოვანია რომ, ეს საკითხი წამოიჭრას ჟენევის მოლაპარაკებების დღის წესრიგში, რომელიც 28-29 მარტს არის დაგეგმილი", ნათქვამია ქალთა საინფორმაციო ცენტრის ვებ-გვერდზე. სრულად... წყარო: ქალთა საინფორმაციო ცენტრის ვებ-გვერდი

თბილისი. ორგანიზაციამ „პარტნიორობა ადამიანის უფლებებისთვის" (PHR) იურიდიული კონსულტაცია გაუწია დუშეთის პანსიონატში მცხოვრებ პირებს. „ბენეფიციართა ინტერესი, ძირითადად, მათთვის სახელმწიფოს მხრიდან საცხოვრისის გადაცემასთან დაკავშირებულ საკითხებს შეეხებოდა", ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

თბილისი. სასჯელაღსრულებისა და პრობაციის სამინისტრო, ევროკავშირის წარმომადგენლობა საქართველოში და პარტნიორი ორგანიზაციები კანონთან კონფლიქტში მყოფი პირების რესოციალიზაციის ახალი პროექტების განხორციელებას იწყებენ. „პროექტების მიზანია პატიმრების, ყოფილი პატიმრების, პირობით მსჯავრდებულებისა და კანონთან კონფლიქტში მყოფი ბავშვებისა და მოზარდების რესოციალიზაცია-რეაბილიტაციის ხელშეწყობა. პროექტში მონაწილე ორგანიზაციები სასჯელაღსრულებისა და პრობაციის სამინისტროსთან ერთად, სამიზნე ჯგუფებისთვის პროფესიული განათლებისა და დასაქმების შესაძლებლობების გაზრდის, მათი ფსიქო-სოციალური და სამედიცინო დახმარების, ასევე, დანაშაულის პრევენციის მიმართულებით იმუშავებენ", ნათქვამია სასჯელაღსრულებისა და პრობაციის სამინისტროს ვებ-გვერდზე სოციალურ ქსელში. სრულად... წყარო: სამინისტროს ვებ-გვერდი სოციალურ ქსელში

თბილისი. სამოქალაქო პლატფორმა „არა ფობიას!” მიმართვა საზოგადოებრივი მაუწყებლის სამეურვეო საბჭოს და გენერალურ დირექტორს. „მართალია, გადაცემის „ბრიფინგის დრო" ფორმატი, საზოგადოებრივი მაუწყებლის მეორე არხის ეთერში, პოლიტიკური პარტიების ბრიფინგების ჩაწერასა და მონტაჟის გარეშე ეთერში განთავსებას ითვალისწინებს, თუმცა ვთვლით, რომ დაუშვებელია საზოგადოებრივი არხის ეთერი ნაცისტური იდეოლოგიის ორგანიზაციებს დაეთმოთ. მოგმართავთ, რათა შეიმუშაოთ შიდა რეგულაციები, რომელიც უზრუნველყოფს აღნიშნულ ფორმატში მაუწყებელთა და საზოგადოებრივი მაუწყებლის ქცევის კოდექსების ანტიდისკრიმინაციული დებულებების დაცვას და მომავალში მსგავსი შემთხვევების პრევენციას. მნიშვნელოვანია, საზოგადოებრივმა მაუწყებელმა ქმედითი ღონისძიებები გადადგას, რათა მისი ეთერი საზოგადოებაში სიძულვილის გაღვივების და რასისტული ჯგუფების პლატფორმად არ იქცეს", ნათქვამია ერთობლივ განცხადებაში. სრულად... წყარო: mdfgeorgia.ge

თბილისი. ინფორმაციის თავისუფლების განვითარების ინსტიტუტი (IDFI) აჯამებს ანგარიშს, რომელიც 2013 წლიდან საქართველოში ფარული მიყურადების რეგულირებას ეხება. „მიუხედავად იმისა, რომ ბოლო პერიოდში გარკვეული პროგრესი იქნა მიღწეული უკანონო მიყურადების საქმეების გამოძიებაში, 2012 წელს ხელისუფლების შეცვლის შემდეგ უკანონო ფარული ჩანაწერების გამოქვეყნების გაგრძელებამ გააძლიერა ეჭვი, რომ გრძელდება უკანონო თვალთვალის სისტემური პრაქტიკა, რომ ხელისუფლებას არ სურს საკუთარი ძალაუფლების შეზღუდვა და რომ ამ მიმართულებით არ მიმდინარეობს ეფექტური რეფორმა", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია მოუწოდებს პარლამენტს განახორციელოს საპარლამენტო კონტროლი საჯარო დაწესებულებებში საბიუჯეტო სახსრების შემცირებისა და მიმდინარე რეორგანიზაციის პროცესზე. „არსებული მდგომარეობით, რეორგანიზაციის საფუძველზე საჯარო დაწესებულებების გარკვეულმა ნაწილმა უკვე დაიწყო შტატების შემცირება. საიასთვის, საჯარო მოხელეთა მიერ მოწოდებული ინფორმაციის თანახმად, იკვეთება რისკები, რომ მოხდეს თვითნებურად და შერჩევითი მიდგომით თანამშრომელთა განსხვავება და დისკრიმინაციული საფუძვლით სამსახურიდან გათავისუფლება, ხოლო რიგ შემთხვევებში, ასევე - მოხელეთა იძულება პირადი განცხადების საფუძველზე დატოვონ სამსახური, რაც წარმოადგენს სისხლის სამართლის დანაშაულს", ნათქვამია ორგანიზაციის განცხადებაში. სრულად... წყარო: gyla.ge

თბილისი. ომბუდსმენის შეფასებით ბორჯომის მუნიციპალიტეტის „ახალდაქორწინებულთა პროგრამა" დისკრიმინაციულია. ამ პროგრამის მიხედვით, ახალდაქორწინებულ წყვილს 150 ლარის ოდენობის ფინანსური დახმარება მხოლოდ იმ შემთხვევაში გაეწევა, თუ მამაკაცი ბორჯომის მუნიციპალიტეტშია რეგისტრირებული. „სახალხო დამცველი აღნიშნავს, რომ მუნიციპალიტეტის მსგავსი მოთხოვნა, ხაზს უსვამს მამაკაცის დომინანტურობას ოჯახში და კიდევ უფრო ამყარებს საზოგადოებაში არსებულ სტერეოტიპებს ქალისა და მამაკაცის განსაზღვრული როლების შესახებ", ნათქვამია განცხადებაში. ომბუდსმენი მოუწოდებს ბორჯომის მუნიციპალიტეტს გააუქმოს მოთხოვნა მამაკაცის რეგისტრაციის ადგილის შესახებ და ხელი შეუწყოს გენდერულ თანასწორობას რეგიონში. სრულად... წყარო: www.ombudsman.ge

თბილისი. ორგანიზაცია „ახალგაზრდა ადვოკატები" სასამართლო ხელისუფლებას წერილით მიმართავს. „გაატაროთ ყველა საჭირო მოქმედება, რათა თბილისის სააპელაციო სასამართლოს ადმინისტრაციულ საქმეთა პალატამ (რომელმაც, ასევე უნდა დაადგინოს, სამოქალაქო თუ ადმინისტრაციული წესით უნდა განიხილებოდეს სასარჩელო მოთხოვნები) სწორედ როლანდ ბლადაძის საქმეზე შეძლოს ადამიანის უფლებებზე ორიენტირებული მართლმსაჯულების უზრუნველყოფა", ნათქვამია ოფიციალურ მიმართვაში. სრულად... წყარო: barristers.ge

შიდა ქართლი. „ახალგაზრდა ადვოკატებმა" გორში მიგრანტთა რეინტეგრაციის პროექტის პრეზენტაცია გამართეს. „„ახალგაზრდა ადვოკატები" სამშობლოში დაბრუნებული მიგრანტების იურიდიული მომსახურებით უზრუნველყოფას საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების სამინისტროს საგრანტო პროექტის ფარგლებში უზრუნველყოფს. პროექტი ხორცილდება საქართველოს მთელ ტერიტორიაზე. გათვალისწინებულია არანაკლებ 20 ბენეფიციარის იურიდიული მომსახურება", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. პრევენციის ეროვნული მექანიზმის საკონსულტაციო საბჭოს წევრის, ანა არგანაშვილი ომბუდსმენის სპეციალური ანგარიშის „სახელმწიფო ზრუნვის დაწესებულებებში შშმ პირთა უფლებრივი მდგომარეობის შესახებ" მოსაზრებას აქვეყნებს. „სამწუხაროა ის ფაქტი, რომ სახალხო დამცველის მიერ წარმოდგენილი ანგარიში და მასში გამოვლენილი დარღვევები ჯერ კიდევ არ ხდება სათანადო რეაგირების საგანი სამართალდამცავების და სხვა სახელმწიფო ორგანოების მხრიდან. გადაუჭრელია მასში აღწერილი არასათანადო მოპყრობისა და ძალადობის ფაქტები", ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

თბილისი. 20 იანვარს, ომბუდსმენმა პარლამენტის თავმჯდომარესთან ირაკლი კობახიძესთან პირველი ოფიციალური შეხვედრა გამართა. „სახალხო დამცველმა შეხვედრაზე განიხილა ქვეყანაში ადამიანის უფლებათა კუთხით არსებული მდგომარეობა; გააცნო სახალხო დამცველის აპარატის მიმდინარე საქმიანობა, ადამიანის უფლებათა მდგომარეობა ქვეყანაში და ამ მიმართულებით შემუშავებული მთავარი რეკომენდაციები", ნათქვამია ომბუდსმენის ვებ-გვერდზე. სრულად... წყარო: www.ombudsman.ge