თბილისი. საქართველოს ახალგაზრდა იურისტთა ასოციაცია (საია) მართლმსაჯულების საერთაშორისო დღესთან დაკავშირებით გაცხადებას ავრცელებს. მიგვაჩნია, რომ სისხლის სამართლის საერთაშორისო სასამართლოს სახით მართლმსაჯულების საერთაშორისო სისტემის შექმნა, რომელსაც საფუძველი 1998 წლის 17 ივლისს, რომის სტატუტის მიღებით ჩაეყარა, საერთაშორისო თანამეგობრობის უმნიშვნელოვანესი მონაპოვარია. საერთაშორისო დანაშაულების - გენოციდის, ომის დანაშაულების და კაცობრიობის წინააღმდეგ მიმართული დანაშაულების - ჩამდენი პირები, მიუხედავად მათი თანამდებობრივი სტატუსისა, არ უნდა დარჩნენ დაუსჯელები და ამ მიზნის მიღწევა სისხლის სამართლის საერთაშორისო სასამართლოს მეშვეობით არის შესაძლებელი. საქართველოს ახალგაზრდა იურისტთა ასოციაცია გამოხატავს სოლიდარობას ამ უმძიმესი დანაშაულების მსხვერპლთა მიმართ. მათ შორის არიან 2008 წლის რუსეთ-საქართველოს აგვისტოს ომის დროს დაზარალებული ასობით პირი. ჩვენ მივესალმებით იმ ფაქტს, რომ ჰააგის სასამართლომ მიმდინარე წელს აგვისტოს ომის დროს ჩადენილი დანაშაულების გამოძიების ნებართვა მისცა პროკურორს; იმედს გამოვთქვამთ, რომ ამ გამოძიების მეშვეობით, შესაძლებელი გახდება სიმართლის დადგენა, დამნაშავეთა იდენტიფიცირება და გასამართლება, და მსხვერპლთა უფლებების აღდგენა," ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. 12 ივლისს, საქართველოს სახალხო დამცველმა სპეციალური პრევენციული ჯგუფის მიერ N6 პენიტენციურ დაწესებულებაში განხორციელებული ვიზიტის შესახებ ანგარიში გამოაქვეყნა. „აღსანიშნავია, რომ N6 დაწესებულებაში სპეციალური პრევენციული ჯგუფის ვიზიტის დროს აშკარა იყო ადმინისტრაციასა და პატიმრებს შორის დაძაბული, კონფლიქტური ურთიერთობა. ჯგუფის წევრებთან საუბრისას ადმინისტრაციის წარმომადგენლები პატიმრების მიმართ დამამცირებელ და აგრესიულ დამოკიდებულებას ავლენდნენ. ვიზიტის დროს, დაწესებულების ადმინისტრაციის თანამშრომლების მხრიდან პატიმრის მიმართ სავარაუდო არასათანადო მოპყრობის ერთი ფაქტი გახდა ცნობილი," ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. 17 ივლისს მართლმსაჯულების საერთაშორისო დღეა. 17 ივლისის ჩათვით, საია გეგმავს ორგანიზაციის წარმოებაში არსებული იმ საქმეების საზოგადოებისთვის გაცნობას და გამოქვეყნებას, რომლებიც 2008 წლის აგვისტოს ომის დროს ჩადენილ დანაშაულობებს ეხება. საიას წარმოებაში არსებული საქმეები... წყარო: ორგანიზაციის ვებგვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის რეგიონული ბიურო საქართველოში აქვეყნებს ნანა დიხამინჯიას სტატიას: „წვდომა ქალის სხეულზე - პროსტიტუციის კანონიერი და უკანონო ჩარჩოები". „პასუხი იმაზე, შეიძლება თუ არა და საჭიროა თუ არა, სრულიად აღიკვეთოს პროსტიტუცია, ჯერ არ არსებობს. მაგრამ მოთხოვნა, რომ მაქსიმალურად შემცირდეს ინდუსტრიის მოცულობა, ცალსახაა, ვინაიდან ბოლო 15 წლის გამოცდილებით, სექსინდუსტრიის ლეგალიზაციასთან ერთად რამდენიმეჯერ იზრდება ტრეფიკინგისა და პროსტიტუციაში იძულებით ჩაბმულ მსხვერპლთა რაოდენობა, ისევე როგორც არასრულწლოვანთა პროსტიტუცია. ჯერჯერობით მხოლოდ სკანდინავიური მოდელია ყველაზე ქმედითი ინდუსტრიის მოცულობის შემცირების თვალსაზრისით. კვლევებიც და განხილვებიც გრძელდება და განვითარებულ ქვეყნებში ახლო მომავალში ალბათ უკეთეს მოდელებსაც ვიხილავთ, რომელიც სექსმუშაკის უფლებებს მაქსიმალურად დაიცავს, კრიმინალურ დაჯგუფებებს ხელიდან გამოაცლის სექსინდუსტრიას და პროსტიტუციაში ჩაბმას მხოლოდ პირად არჩევანზე დაიყვანს. კაცობრიობის განვითარებასთან ერთად იქნებ სრულიად სხვაგვარადაც მოხდეს პროსტიტუციის გადააზრება, ცვლილება ან სრული უარყოფა. მანამდე იმედი ვიქონიოთ, რომ ამ მიმართულებით მუშაობა საქართველოშიც დაიწყება და დაახლოებით 15000 სექსმუშაკი არ დარჩება მშრალი, უმოქმედო კანონის ანაბარა, რამდენიმე არასამთავრობო ორგანიზაციის იმედად, ქუჩის ძალადობრივ სისტემაში," ნათქვამია სტატიაში. სრულად... წყარო: www.feminism-boell.org

თბილისი. საქართველოს სახალხო დამცველი, ბოლო დროს ქალთა მიმართ გახშირებული გენდერული ძალადობის შემთხვევებს ეხმაურება. „საქართველოს სახალხო დამცველი მოუწოდებს საქართველოს მთავრობას შექმნილი ვითარების ფონზე, დაუყოვნებლივ მოხდეს შესაბამისი უწყებების მხრიდან დროული, ეფექტური და ანგარიშვალდებული ღონისძიებების განხორციელება. საგანგებო ყურადღება დაეთმოს ოჯახში ძალადობისა და ოჯახური კონფლიქტის თითოეულ შეტყობინებას და გატარდეს ყველა შესაბამისი ღონისძიება ქალთა მიმართ ძალადობის აღმოფხვრისა და პრევენციისათვის," ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. სახალხო დამცველმა ივნისის თვის საინფორმაციო ბიულეტენი წარმოადგინა, სადაც მოკლედ არის მიმოხილული სახალხო დამცველის აპარატის საქმიანობა, შეხვედრები სახელმწიფო ორგანოების ხელმძღვანელებთან. ასევე, სპეციალური ანგარიშების პრეზენტაციები, სასამართლოს მეგობრის მიმართვები, სახალხო დამცველის სპეციალური განცხადებები ქვეყანაში მიმდინარე მოვლენების შესახებ, რეგიონული სამმართველოების მიერ ჩატარებული ღონისძიებები და აპარატის მიერ გაწეული საგანმანათლებლო საქმიანობა. სრულად... წყარო: ombudsman.ge

თბილისი. სახალხო დამცველი რეკომენდაციით მიმართავს გამყოფი ხაზის მიმდებარე სოფლებში დაზარალებული მოსახლეობის საჭიროებებზე რეაგირების დროებითი სამთავრობო კომისიის თანათავმჯდომარეებს. „საჭიროა უმოკლეს ვადაში გამოიყოს თანხები სახლის გამაგრებისა და აღდგენითი სამუშაოების ჩასატარებლად, რათა განმცხადებელი და მისი ოჯახი არ დარჩეს სათანადო საცხოვრებლის გარეშე, რაც დაარღვევს როგორც ამ პირთა უფლებას, ასევე, მძიმე ტვირთად დააწვება სახელმწიფოს," ნათქვამია ორგანიზაციის ვებ-გვერდზე. სრულად... წყარო: www.ombudsman.ge

თბილისი. ომბუდსმენი ეხმიანება „ახალი პოლიტიკური ცენტრი - გირჩის" წინასაარჩევნო რეკლამას. „როგორც რეკლამის შინაარსიდან იკვეთება, მნიშვნელოვანია არჩევნებში მონაწილეობა ახალგაზრდა ამომრჩევლებმა მიიღონ, ვინაიდან აქამდე სხვა პოლიტიკური პარტიების საარჩევნო პროგრამები ასაკოვანი ადამიანების ინტერესებზე იყო მორგებული, რაც ქვეყნისთვის არაპოპულარული არჩევანია. საქართველოს სახალხო დამცველი მიიჩნევს, რომ მსგავსი დამოკიდებულება ხელს უწყობს სტერეოტიპული განწყობის გამყარებას ასაკოვანი ადამიანების მიმართ, რომლებიც, ხშირ შემთხვევებში, ისედაც განიცდიან უთანასწორო მოპყრობას. ასეთი მიდგომა ახალისებს უარყოფით სტერეოტიპებს ქვეყნის საზოგადოებრივ ცხოვრებაში ასაკოვანი ადამიანების მონაწილეობასთან დაკავშირებით და ქმნის საფრთხეს, რომ ისინი მომავალში სხვადასხვა სფეროში დაექვემდებარებიან დისკრიმინაციას ასაკის გამო," ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. ადამიანის უფლებათა ცენტრი აპროტესტებს სასჯელაღსრულების სამინისტროს მიერ 6 ივლისს ტელეკომპანია „იმედის" საინფორმაციო გადაცემაში გავრცელებულ ინფორმაციას. „ადამიანის უფლებათა ცენტრი და საქართველოს ადვოკატთა ასოციაცია გმობენ სასჯელაღსრულების დაწესებულებებში დამკვიდრებულ მანკიერ პრაქტიკას, როდესაც სად-ის თანამშრომლები ადვოკატებისგან კანონდარღვევით მოითხოვენ, გააცნონ მისი დაცვის ქვეშ მყოფთან ვიზიტისას მომზადებული ჩანაწერები. პრესკონფერენციაზე ორგანიზაციების ხელმძღვანელებმა სასჯელაღსრულებისა და პრობაციის მინისტრს მოუწოდეს, დაინტერესდეს არსებული ვითარებით და გაატაროს ქმედითი ზომები, რათა სასჯელაღსრულების დაწესებულებებში შეწყდეს ადვოკატთა საქმიანობის ხელშეშლის პრაქტიკა," ნათქვამია ორგანიზაციის ვებ-გვერდზე. სრულად... წყარო: humanrights.ge

თბილისი. საქართველოს ახალგაზრდა იურისტთა ასოციაცია აქვეყნებს იურისტ ნინო ბაღაშვილის ბლოგპოსტს: „მაგდა პაპიძე რომ უდანაშაულო ყოფილიყო..." „პაპიძის საქმე არის ამბავი საზოგადოებაზე, რომელსაც შეუძლია ძალიან მარტივად, დაუფიქრებლად, ყოველგვარი მტკიცებულებების გარეშე ბოლომდე გაწიროს ადამიანი, ისე რომ გადარჩენის გზაც არ დაუტოვოს. ეს არის ამბავი არაპროფესიონალ და არაჰუმანურ მედიაზე, რომელსაც შეუძლია უდიდესი ტრაგედია ჩვეულებრივ, ტაბლოიდურ, ყვითელ თემად აქციოს. და რაც მთავარია, ეს არის ამბავი მორალისტურ საზოგადოებაზე, რომელიც თავადვე ხდება ტყვე მორალური თუ სტერეოტიპული წარმოდგენების და ქმნის შერჩევითი სამართლიანობის პრეცენდენტებს," ნათქვამია ბლოგპოსტში. სრულად... წყარო: gyla.ge

1 ივლისს, გაეროს ადამიანის უფლებათა საბჭომ მიიღო რეზოლუცია, რითიც ინტერნეტის ხელმისაწვდომობა ადამიანის ფუნდამენტურ და ძირითად უფლებად აღიარა. „რეზოლუციის პირველი პუნქტის თანახმად, ადამიანები ინტერნეტის გამოყენების დროს (Online) იმავე უფლებებით უნდა სარგებლობდნენ (მაგალითად, გამოხატვის თავისუფლება), რომლებითაც სარგებლობენ კავშირგარეშე (Offline). რეზოლუცია ასევე მოუწოდებს სახელმწიფოებს ხელი შეუწყონ ციფრულ წიგნიერებას (digital literacy) და უზრუნველყონ ინფორმაციაზე ხელმისაწვდომობა ინტერნეტში, რაც განათლების უფლების ხელშეწყობის ეფექტიანი ინსტრუმენტია," ნათქვამია ინფორმაციის თავისუფლების განვითარების ინსტიტუტის ვებ-გვერდზე. სრულად... წყარო: idfi.ge

თბილისი. „საერთაშორისო გამჭვირვალობა - საქართველო" ჩართულია გონიოს მიწებთან დაკავშირებულ პროცესში და მუდმივ რეჟიმში აკვირდება მოცემული თემის ირგვლივ განვითარებულ მოვლენებს. „მოვუწოდებთ ქ. ბათუმის მუნიციპალიტეტის ტერიტორიაზე თვითნებურად დაკავებულ მიწის ნაკვეთებზე საკუთრების უფლების აღიარების კომისიას ადმინისტრაციულ წარმოებაში ჩართულ 271 მოქალაქის საკითხი შეისწავლოს ინდივიდუალურად და წერილობით განუმარტოს თითოეულ მათგანს მიღებული გადაწყვეტილების საფუძვლები. გადაწყვეტილება მიიღოს სადაო ურთიერთობის სრულად და ყოველმხრივ გამოკვლევის შემდგომ, კანონის სრული დაცვით," ნათქვამია ორგანიზაციის ვებ-გვერდზე. სრულად... წყარო: www.transparency.ge

აჭარა. „ახალგაზრდა ადვოკატები" ბათუმში, საქართველოს საკონსტიტუციო სასამართლოსთან საპროტესტო აქციას მართავს. „ორგანიზაცია სასამართლოს სპეციალურ მიმართვას უგზავნის, სადაც საუბარია გიორგი პაპუაშვილის მხრიდან კანონის დარღვევის ფაქტებზე. „ახალგაზრდა ადვოკატების" წარმომადგენლობით, გიორგი პაპუაშვილთან მოქალაქე როლანდ ბლადაძის სადავო ქონებაზე დავა გრძელდება თბილისის საქალაქო სასამართლოში," ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. მედიის განვითარების ფონდი აქვეყნებს თამარ კინწურაშვილის ბლოგპოსტს: „პროკურატურისა და მედიის „რომაული არდადეგები". სტატია მაგდა პაპიძის საქმეს ეხმაურება. „ერთი მხრივ, მედიამ ვერ შეძლო ბალანსის დაცვა საზოგადოების ინფორმირებასა და ბრალდებულის პირადი ცხოვრების ხელშეუხებლობას შორის, მეორე მხრივ, ეს უფლება თავად ბრალდების მხარემ უგულებელყო, როცა დახურული სხდომის დეტალები ხელისუფლების მიმართ ლოიალურ მედია საშუალებების მეშვეობით გაასაჯაროვა. პროკურატურის მიერ დახურული სხდომის დეტალების ცალკეული მედიუმების მეშვეობით გასაჯაროვებამ აზრი დაუკარგა თავად პროცესის დახურვას, რაც განსასჯელის მიმართ წაყენებული ბრალდებისთვის მეტი დამაჯერებლობის მიცემას და ნაფიც მსაჯულებზე ზემოქმედებას ისახავდა მიზნად," ნათქვამია ორგანიზაციის ვებ-გვერდზე. სრულად... წყარო: mediameter.ge

თბილისი. ადამიანის უფლებათა ცენტრი და საქართველოს ადვოკატთა ასოციაცია ადვოკატთა ხელშეშლის ფაქტებთან დაკავშირებით ერთობლივ განცხადებას ავრცელებს. „ადამიანის უფლებათა ცენტრი და საქართველოს ადვოკატთა ასოციაცია გამოხატავენ შეშფოთებას სასჯელაღსრულების დაწესებულებებში არსებული მანკიერი პრაქტიკის გამო, როდესაც სად-ის თანამშრომლები ადვოკატებისგან კანონდარღვევით მოითხოვენ, გააცნონ მისი დაცვის ქვეშ მყოფთან ვიზიტისას მომზადებული ჩანაწერები,” ნათქვამია ერთობლივ განცხადებაში. სრულად... წყარო: humanrights.ge

თბილისი. გენდერული საინფორმაციო პორტალი აქვეყნებს სალომე მოდებაძის ბლოგპოსტს: „წარმოიდგინეთ, დგახართ x კომპანიის შესასვლელთან..." „თანასწორობისთვის ბრძოლა დაბადებამდე იწყება. მომავალი დედის სხეული ფიზიოლოგიურად მზად უნდა იყოს ნაყოფის მოსამწიფებლად, ხშირად, ორსულობა არასრულწლოვანი დედებისთვის სასიკვდილოდ საშიშია, ყველას არ აქვს შესაძლებლობა ამ პერიოდში ყველა საჭირო მედიკამენტი მიიღოს, ეს ახალშობილის ჯანმრთელობაზეც აისახება. საბავშვო ბაღიდან უნივერსიტეტის კარამდე ცნობიერების კუთხითაც ბევრია სამუშაო. კაცებით დომინირებულ სამყაროში ბევრი ისეთი ადათ-წესი გვაქვს, რომელიც, პირდაპირ გოგონებისა და ქალების წინააღმდეგ მოქმედებს და მათ ჯანმრთელობას ფიზიკურ საფრთხეს უქმნის," ნათქვამია ორგანიზაციის ვებ-გვერდზე. სრულად... წყარო: www.ginsc.net

თბილისი. გენდერული საინფორმაციო პორტალი აქვეყნებს ანა ფანცულაიას ბლოგპოსტს: „აჩრდილად ქცეული ქალები". „ჩემ გვერდით იყო ქალი, რომლიც იმაზე ფიქრით იძინებდა, თუ რა სადილი მოემზადებინა მეორე დღეს. დილას კი მთვლემარე მეუღლისთვის პერანგის გაუთოვებით იწყებდა. მთელ დღეს სახლის დალაგებაში, სადილის მომზადებასა და სარეცხის რეცხვაში ატარებდა. ხანდახან იმის უფლებასაც აძლევდა თავს, შვილიშვილებზე ეოცნება. შემდეგ სკოლიდან ადრე მოსული შვილების ტალახიანი ფეხსაცმელის რეცხვაში გართულს, მეუღლის ზარი გამოაფხიზლებდა და თმააწეწილი გავარდებოდა კარის გასაღებად. ის ვერ ამჩნევდა, რომ აჩრდილად იქცა, რომ გულისსწორი მისი გაუხეშებული ხელებისგან მხოლოდ სადილსა და სუფთა თეთრეულს ისურვებდა, რომ ტახტზე წამომჯდარ ოჯახის წევრებს, მის გამომცხვარ ნამცხვარს რომ მიირთმევდნენ, აზრადაც არ მოუვიდოდათ მადლობის გადახდა, რომ ვერცერთი მათგანი ვერ მიხვდებოდა თუკი თმას სხვა ფრად შეიღებავდა, რომ მის არსებობას მხოლოდ მაშინ შეამჩნევდნენ, თუკი სადილის მომზადება დააგვიანდებოდა, ან მაგიდის გადაწმენდა დაავიწყდებოდა," ნათქვამია ბლოგპოსტში. სრულად... წყარო: www.ginsc.net

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „საკონკურსო-საატესტაციო კომისიის საბოლოო შეფასების ფორმაზე თბილისის მერის ყოფილი მოადგილის ხელმოწერა გაყალბებულია". „დოკუმენტი, რომელზეც ექსპერტიზის შედეგად ალუდა გოგლიჩიძის ხელმოწერის გაყალბება დადგინდა, წარმოადგენს ჩვენი ორგანიზაციის ერთ-ერთი ბენეფიციარის, შორენა კუხიანიძის, საბოლოო შეფასების ფორმას. შორენა კუხიანიძემ მონაწილეობა მიიღო ქ. თბილისის მუნიციპალიტეტის მერიაში 2014 წლის 1 დეკემბერს გამოცხადებულ კონკურსში. მან ტესტირების ეტაპზე 58 ქულა (მაქსიმალური ქულა-60) დააგროვა, თუმცა გასაუბრების ეტაპის შემდგომ მისი წარდგენა არც ერთ ვაკანტურ თანამდებობაზე არ მოხდა," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. გენდერული საინფორმაციო პორტალი აქვეყნებს იუსტიციის მინისტრის თეა წულუკიანის განცხადებას: „სულ რამდენიმე წუთის წინ გამოქვეყნდა ადამიანით ვაჭრობასთან ბრძოლის სფეროში საქართველოს რეიტინგი. ამ რეიტინგის თანახმად, საქართველოს მიენიჭა პირველი დონის რეიტინგი, ჩვენ მეორე ე.წ. კალათიდან გადავინაცვლეთ პირველ კალათაში. ეს არის ჩენი ძალოვანი სტრუქტურების, ჩვენი სოციალური მუშაკების და ტრეფიკინგის მსხვერპლთა დაცვის ფონდის, ჯანდაცვის და სოციალურ საკითხთა სამინისტროს და სხვა არაერთი უწყების კოორდინირებული სამუშაოს შედეგი და წარმატება. მე მინდა ყველა მოგილოცოთ ეს და მოგილოცოთ ის, რომ ამ ანგარიშში ნათქვამია, ერთი ძალიან მნიშვნელოვანი რამ, ამ დანაშაულთან ბრძოლაში ბოლო სამი წლის მანძილზე, რაც ჩვენ ამ შემადგენლობით უწყებათშორის საბჭოში შევეჭიდეთ ამ დანაშაულს, მთავრობამ განახორციელა თანმიმდევრული და სწორი პოლიტიკა," ნათქვამია ორგანიზაციის ვებ-გვერდზე. სრულად... წყარო: www.ginsc.net

სამცხე-ჯავახეთი. ადამიანის უფლებების სწავლებისა და მონიტორინგის ცენტრის (EMC) წარმომადგენლები ახალციხეში რელიგიური ორგანიზაციების, ეთნიკური უმცირესობების საკითხზე მომუშავე ორგანიზაციებს შეხვდნენ. შეხვედრის ფარგლებში საუბარი შეეხო: ეთნიკურ და ეროვნულ უმცირესობებთან დაკავშირებით არსებულ სახელმწიფო პოლიტიკას, სეკულარიზმის კონცეფციასა და საჯარო სკოლებში რელიგიური ნეიტრალიტეტისა და თანასწორობის დაცვის საკითხებს," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ლიბერალიზმის სასწავლო ცენტრის მოწვევით ნათია ფანჯიკიძემ წაიკითხა ლექცია: „მსხვერპლის დილემა". წყარო: ლიბ-ცენტრის ვებ-გვერდი სოციალურ ქსელში

თბილისი. ომბუდსმენმა საკუთარი ინიციატივით შეისწავლა მამუკა ახვლედიანის თანამდებობიდან გათავისუფლების კანონიერების საკითხი და შესაბამისი დასკვნა წარუდგინა იუსტიციის უმაღლეს საბჭოს. „საქმის შესწავლის ეტაპზე ომბუდსმენის აპარატი დეტალურად გაეცნო შესაბამის მასალებს; შედეგად გაირკვა, რომ საქართველოს იუსტიციის უმაღლესმა საბჭომ ზემოთაღნიშნული გადაწყვეტილება „საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ" საქართველოს კანონის გვერდის ავლით მიიღო, შესაბამისად, არ იქნა გამოყენებული აღნიშნული კანონით განსაზღვრული დისციპლინური წარმოების პროცედურა, დისციპლინური საქმე არ განუხილავთ და მასზე გადაწყვეტილება არ მიუღიათ სპეციალურად ამ მიზნით შექმნილ ორგანოებს, არ იქნა დაცული მხარეთა თანასწორობისა და შეჯიბრობითობის პრინციპები, ვერ მოხდა აცილების უფლების რეალიზება და სხვა," ნათქვამია სახალხო დამცველის განცხადებაში. სრულად... წყარო: www.ombudsman.ge