თბილისი. საქართველოს პარლამენტმა დეპუტატების, თამარ კორძაიასა და თამარ ხიდაშელის მიერ ფემიციდის შესახებ წარმოდგენილი საკანონმდებლო ინიციატივა განიხილა. „კანონპროექტის მიხედვით, ქალის გენდერული ნიშნით მოტივირებული, დამამძიმებელ გარემოებებში მკვლელობა ისჯება 11-დან 14 წლამდე თავისუფლების აღკვეთით. იგივე ქმედება ჩადენილი განსაკუთრებული სისასტიკით, ისჯება თავისუფლების აღკვეთით ვადით თექვსმეტიდან ოც წლამდე ან უვადო თავისუფლების აღკვეთით. კანონპროექტით გათვალისწინებული ცვლილებები გულისხმობენ ფემიციდის ადამიანის წინააღმდეგ მიმართულ დანაშაულად აღიარებას და მის განსაკუთრებით მძიმე დანაშაულთა კატეგორიაში მოქცევას. ცვლილებები, ასევე მოიცავენ გენდერული ნიშნით ჩადენილი დანაშაულების დამამძიმებელ გარემოებად აღიარებას, მათ შორის, ისეთ დანაშაულებთან მიმართებაში, როგორებიცაა ჯანმრთელობის განზრახ მძიმე დაზიანება, ჯანმრთელობის განზრახ მსუბუქი დაზიანება, ცემა, ძალადობა, იძულება, მუქარა," ნათქვამია ორგანიზაციის ვებ-გვერდზე. სრულად... წყარო: www.ginsc.net

აჭარა. 6 ივნისს, ხელვაჩაურის ახალგაზრდობის ცენტრში ჩატარდა ტრენინგ-დისკუსია ადამიანის უფლებების შესახებ, ანიმაციის გამოყენებით. ტრენინგ-დისკუსიაზე განხილული იქნა საყოველთაოდ აღიარებული უფლებები. დისკუსიის დროს ნაჩვენები იყო HUMRA - Human Rights Animation ანიმაცია სახელწოდებით „ვინ არის ყველაზე მთავარი”. ანიმაციის ჩვენების შემდეგ მოეწყო დისკუსია. უნდა აღინიშნოს, რომ დისკუსიის დროს გამოიკვეთა მრავალი პრობლემატური საკითხი, რომელიც დღესდღეობით ადამიანის უფლებების დაცვის კუთხით არსებობს. ტრენინგ-დისკუსია ჩატარდა HUMRA-ს (Human right animation), პროგრამის ფარგლებში.

თბილისი. ტოლერანტობისა და მრავალფეროვნების ინსტიტუტი (TDI) ეხმაურება მართლმადიდებელი ეკლესიის სასულიერო პირების მიერ თბილისში, 4 ივნისს, როკ-ფესტივალის Tbilisi JAM! Fest 2016 კონცერტის ჩაშლის ფაქტს. „ამ ტიპის დანაშაულების გამოუძიებლობით სახელმწიფო არათუ ვერ ასრულებს მასზე დაკისრებულ პოზიტიურ ვალდებულებას, დაიცვას საკუთარი მოქალაქეების უფლებები და თავისუფლებები, არამედ ძალადობის წამახალისებლის როლს თამაშობს. ყოველივე ზემოთქმულის გათვალისწინებით, სახელმწიფოს მოვუწოდებთ, მიიღოს ეფექტური ზომები სიძულვილით მოტივირებული დანაშაულების პრევენციისა და გამოძიებისთვის, დაიცვას სეკულარობის პრინციპები, გაატაროს თანასწორობაზე დაფუძნებული პოლიტიკა და უარი თქვას დისკრიმინაციულ პრაქტიკაზე," ნათქვამია ორგანიზაციის ვებ-გვერდზე. სრულად... წყარო: ორგანიზიციის ვებ-გვერდი სოციალურ ქსელში

თბილისი. კოალიცია სწავლობს ტელეკომპანია „მაესტროს" 32 თანამშრომლისათვის შრომითი ხელშეკრულების შეჩერების საკითხს. „ამ დროისათვის შესწავლილი ფაქტები ბადებს ეჭვს, რომ ტელეკომპანიის მხრიდან შრომითი ურთიერთობების შეჩერება განხორციელდა კანონმდებლობის დარღვევით. ამასთან, განვითარებული მოვლენებიდან იკვეთება არამხოლოდ შრომითი უფლებებისა დარღვევისა და გამოხატვის თავისუფლების ხელყოფის მაღალი ალბათობა, არამედ ასევე, საფუძვლიანი ეჭვი, რომ აღნიშნული ქმედებები წარმოადგენს მცდელობას, რომ წინასაარჩევნოდ, მედია სივრცეში ერთ-ერთი ყველაზე რეიტინგული ინფორმაციულ-ანალიტიკური გადაცემების სარედაქციო პოლიტიკაში მოხდეს უხეში ჩარევა", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. 4 მაისს, სასჯელაღსრულებისა და პრობაციის სამინისტროსგან ომბუდსმენს ეცნობა, რომ მის რეკომენდაციაში მითითებული უფლების დარღვევა აღმოფხვრილია. „პენიტენციურ სისტემაში განთავსებულ უცხო ქვეყნის მოქალაქეებს/მოქალაქეობის არმქონე პირებს, მათ შორის, კ.ყ.-ს, საშუალება აქვთ ჩაერთონ „C ჰეპატიტის მართვის პირველი ეტაპის ღონისძიებების უზრუნველყოფის თაობაზე" სახელმწიფო პროგრამაში. სამინისტროს წერილის თანახმად, აღნიშნული საკითხი დარეგულირებულია „C ჰეპატიტის მართვის პირველი ეტაპის ღონისძიებების უზრუნველყოფის თაობაზე სახელმწიფო პროგრამის დამტკიცების შესახებ" საქართველოს მთავრობის 2015 წლის 20 აპრილის N169 დადგენილების მე-2 მუხლით,” ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. ქალთა საინფორმაციო ცენტრი აქვეყნებს თამარ კურატაშვილის ბლოგპოსტს: „ეგრე არ არისო". „რა ბედნიერებაა, რომ ჭუჭრუტანიდან არ გიდევნებია თვალი და გითმენია, როგორი გამეტებით ურტყამს მამა დედას, რადგან ყველას ასე არ გაუმართლა. არც იმ ქალებს გაუმართლათ, თავს რომ აიძულებენ, დალურჯებული ადგილები დამალონ და მომხდარი დაივიწყონ, რადგან სხვა გამოსავალს ვერ ხედავენ, დედ-მამა სახლში არ იბრუნებთ, ბავშვებით ქუჩაში უპატრონოდ დარჩენის ეშინიათ, სახელმწიფო ჯერ ისედაც რას სთავაზობთ და, რასაც სთავაზობთ, იმის შესახებაც არაფერი სმენიათ," ნათქვამია ორგანიზაციის ვებ-გვერდზე. სრულად... წყარო: www.ginsc.net

თბილისი. 1 ივნისს, ომბუდსმენმა 2015 წლის საპარლამენტო ანგარიშის ბავშვის უფლებათა თავი წარმოადგინა. „ღონისძიებაზე სახალხო დამცველმა და ბავშვის უფლებათა ცენტრის წარმომადგენლებმა ისაუბრეს ბავშვთა უფლებრივ მდგომარეობაზე საქართველოში, მიმოიხილეს 2015 წელს ბავშვთა ინსტიტუციებში განხორციელებული მონიტორინგის შედეგები და ბავშვის უფლებათა დარღვევების ცალკეული შემთხვევების სტატისტიკა, დამსწრე საზოგადოებას გააცნეს რეკომენდაციები, რომლითაც სახალხო დამცველმა შესაბამის უწყებებს მიმართა. ისაუბრეს ბავშვის მიმართ ძალადობის, ბავშვთა სიღარიბის, სოციალური სამსახურის, ბავშვზე სახელმწიფო ზრუნვის, ბავშვის განათლების უფლებისა და სხვა მნიშვნელოვან საკითხებზე, ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. არასამთავრობო ორგანიზაციები ერთობლივ განცხადებას ავრცელებენ კორცხელის ინციდენტის გამოძიების შესახებ. „განცხადებაზე ხელმომწერი ორგანიზაციები არაეფექტურად ვაფასებთ კორცხელის ინცინდენტის გამოძიებას და მოვუწოდებთ საქართველოს შინაგან საქმეთა სამინისტროს და საქართველოს მთავარ პროკურატურას, მიიღონ ადეკვატური და დროული ზომები იმისთვის, რომ დადგეს ინცინდენტში მონაწილე ყველა პირის, ძალადობრივი აქტის ორგანიზატორებისა და განმახორციელებლების პასუხისმგებლობის საკითხი...", ნათქვამია განცხადებაში. სრულად... წყარო: osgf.ge

თბილისი. საქართველოს ახალგაზრდა იურისტთა ასოციაცია ეხმიანება ვეგანურ კაფე „კივიში" 29 მაისს მომხდარ ინციდენტს. „...მიგვაჩნია, რომ მზარდი ექსტრემიზმისა და დისკრიმინაციის ფაქტების ფონზე, სიძულვილით მოტივირებულ დანაშაულებზე სახელმწიფოს მხრიდან ეფექტური რეაგირება და სისხლისსამართლებრივი სანქციების გამოყენება ფუნდამენტური მნიშვნელობისაა. ...დისკრიმინაციულ და სიძულვილით მოტივირებულ დანაშაულებზე არასათანადო რეაგირება და დაუსჯელობა სტიმულს აძლევს ექსტრემისტული ჯგუფების გაძლიერებას და ადამიანის, განსაკუთრებით უმცირესობათა ჯგუფების, ფუნდამენტური უფლებების შელახვას", ნათქვამია საიას მიერ გავრცელებულ განცხადებაში. სრულად... წყარო: gyla.ge

თბილისი. 31 მაისს, ომბუდსმენმა საქართველოში მოქმედ ფსიქიატრიულ დაწესებულებებში ადამიანის უფლებათა დაცვის კუთხით არსებული მდგომარეობის შესახებ სპეციალური ანგარიში წარადგინა. „ანგარიშში ხაზგასმულია, რომ არასაკმარისი დაფინანსება საბოლოო ჯამში იწვევს ფსიქიატრიულ დაწესებულებებში კვალიფიციური პერსონალის სიმცირეს, სათანადო, თერაპიული გარემოს არარსებობას, მკურნალობის, მოვლის, ფსიქო-სოციალური რეაბილიტაციის დაბალ ხარისხს, ხანგრძლივ ჰოსპიტალიზაციას და თემზე დაფუძნებული სერვისების ხელმიუწვდომლობას," ნათქვამია ორგანიზაციის ვებ-გვერდზე. სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ლგბტ აქტივსტების დაკავების საქმეში პოლიციელების მხრიდან არასათანადო მოქცევის ფაქტებზე გენინსპექციას მიმართავს. „კერძოდ, განცხადებაში, დაკავებული პირებისგან აღებული ახსნა-განმარტებების საფუძველზე, EMC უთითებს დაკავების არამართლზომიერი გამოყენებისა და პოლიციის თანამშრომლების მხრიდან ჰომოფობიური ენისა და რელიგიური ნეიტრალიტეტის დარღვევის ფაქტებზე და შსს-ს გენერალურ ინსპექციას საქმის შესწავლასა და კონკრეტული პოლიციელების მიმართ დისციპლინური პასუხისმგებლობის დაკისრებას სთხოვს," ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. „აუდიტორია 115-მა" უნივერსიტეტის პირველი კორპუსის ეზოში აქცია გამართა. „აქციის მონაწილეები აცხადებენ, რომ თვითმმართველობის 20 პირმა „აუდიტორია115-ის" წევრს ფიზიკური და სიტყვიერი შეურაცხყოფა მიაყენა. აუდიტორიის წევრები უფლებამოსილი პირებისგან, ამ ფაქტთან დაკავშირებით, სათანადო რეაგირებას ითხოვენ. მათი კიდევ ერთი მოთხოვნა - თვითმმართველობის გაუქმებაა," ნათქვამია ლიბცენტრის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. არასამთავრობო ორგანიზაციები 2016 წლის 17 მაისამდე და მის შემდეგ პერიოდში, ლგბტ თემის წევრებისა და აქტივისტების მიმართ ჰომოფობიური ძალადობის შემთხვევებს ეხმიანებიან. „მიუხედავად იმისა, რომ წინა წლების მსგავსად, მიმდინარე წელსაც ლგბტ თემსა და აქტივისტებს არ მიეცათ შეკრების თავისუფლებით სარგებლობის შესაძლებლობა, 2016 წლის 17 მაისამდე და მის შემდგომ პერიოდში, ლგბტ თემის წევრებისა და აქტივისტების მიმართ სპორადული ძალადობის ათეული შემთხვევა გამოვლინდა. ძალადობის ფაქტები სავარაუდო მსხვერპლების სექსუალური ორიენტაციისა და გენდერული იდენტობის (სოგი) გამო სიძულვილის მოტივით განხორციელდა და ძირითადად ღამით, საჯარო სივრცეში, უცნობმა პირებმა ჩაიდინეს", ნათქვამია ერთობლივ განცხადებაში. არასამთავრობო ორგანიზაციები მოუწოდებენ სახელმწოფოს დანაშაულის პრევენციისა და უსაფრთხო გარემოს უზრუნველსაყოფად დაუყოვნებლივ მიიღოს ეფექტური ზომები. სრულად... წყარო: www.isfed.ge

თბილისი. 18 მაისს, სახალხო დამცველმა რეკომენდაციით მიმართა მიკროსაფინანსო ორგანიზაცია „კრედოს" შრომით ურთიერთობებში ორსულობის ნიშნით დისკრიმინაციის აღმოფხვრის შესახებ. „საქართველოს სახალხო დამცველი, „დისკრიმინაციის ყველა ფორმის აღმოფხვრის შესახებ" საქართველოს კანონის მე-9 მუხლის მე-3 პუნქტის შესაბამისად, მიმართავს შპს მიკროსაფინანსო ორგანიზაცია „კრედოს", აღმოფხვრას ა.ა.-ს მიმართ დისკრიმინაციული მოპყრობის შედეგი, მომავალში თავი შეიკავოს შრომით ურთიერთობებში ორსულობის ნიშნით დისკრიმინაციული მოპყრობისგან და საქმიანობა წარმართოს თანასწორობის პრინციპის დაცვით," ნათქვამია სახალხო დამცველის განცხადებაში. სრულად... წყარო: www.ombudsman.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება" 2016 წლის 22 მაისის საკრებულოს შუალედური არჩევნების კენჭისყრის მონიტორინგს ახორციელებდა. „სამართლიანი არჩევნების" დამკვირვებლების მიერ მოწოდებული ინფორმაციით, საარჩევნო უბნებზე ხმის მიცემის პროცესი, ძირითადად, მნიშვნელოვანი დარღვევების გარეშე მიმდინარეობდა, თუმცა საარჩევნო უბნების გარეთ ადგილი ჰქონდა სიტყვიერი დაპირისპირებისა და ფიზიკური ძალადობის შემთხვევებს უბნების მიმდებარედ მობილიზებული აქტივისტებისა და აგრესიული ჯგუფების მხრიდან. არჩევნების დღემ ცხადყო, რომ საარჩევნო უბნების მიმდებარედ პოლიტიკური პარტიების მიერ ჯგუფების მობილიზება იწვევს ფიზიკურ და სიტყვიერ დაპირისპირებას. ხოლო, მსგავს ფაქტებზე სამართალდამცავი ორგანოების არაეფექტური რეაგირება შეიცავს ძალადობის წახალისების რისკებს და ამასთანავე, საფრთხეს უქმნის სტაბილურ საარჩევნო გარემოს," ნათქვამია ორგანიზაციის ვებ-გვერდზე. სრულად... წყარო: www.isfed.ge

თბილისი. 22 მაისს, საქართველოს ახალგაზრდა იურისტთა ასოციაცია აკვირდებოდა გარდაბნის, კასპის, წყალტუბოს, ოზურგეთის, ხობის, ზუგდიდისა და გლდანის ოლქებში საკრებულოს შუალედურ არჩევნებს. „განსაკუთრებით შემაშფოთებელია სამეგრელოში 53-ე საარჩევნო უბნის მიმდებარე ტერიტორიაზე დაახლოებით 13:30 საათისთვის მომხდარი ფიზიკური ძალადობის ფაქტები, რასაც წინ უძღოდა სიტყვიერი შელაპარაკება ნაციონალური მოძრაობის წარმომადგენლებსა და უცნობ პირებს შორის. აღნიშნული პირები, სავარაუდოდ სპორტსმენები, დილიდან იყვნენ მობილიზებული საარჩევნო უბნის მიმდებარე ტერიტორიაზე. მომხდარ დაპირისპირებას უშუალოდ შეესწრო საიას დამკვირვებელი, რომელმაც აღნიშნული ინციდენტის ვიდეო გადაღებაც განახორციელა. საქართველოს პროკურატურა ვალდებულია, უზრუნველყოს ცალკე გამოძიება ორივე პარტიის მხრიდან გაკეთებულ განცხადებებში მოყვანილ საკითხებთან დაკავშირებით. ამასთან, აუცილებელია, გამოძიება წარიმართოს მაქსიმალურად გამჭვირვალედ, სწრაფად და სრულყოფილად და საზოგადოებას დროულად მიეწოდოს ინფორმაცია მის შედეგებთან დაკავშირებით," ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საქართველოს ჟურნალისტური ეთიკის ქარტია კორცხელში ჟურნალისტების მიმართ ძალადობის ფაქტებზე სამართალდამცავთა მხრიდან რეაგირებას ითხოვს. „ჟურნალისტური ეთიკის ქარტია შეშფოთებას გამოთქვამს ჟურნალისტების პროფესიული საქმიანობის ხელშეშლის გამო და მოუწოდებს სამართალდამცავ ორგანოებს დაუყოვნებლივ გამოიძიონ ჟურნალისტების შეურაცხყოფისა და მათ მიმართ ძალადობის ყველა ფაქტი და ადეკვატურად დასაჯონ სამართალდამრღვევები, რომ სამომავლოდ არ წახალისდეს მსგავსი შემთხვევები. ჟურნალისტებისთვის უსაფრთხო სამუშაო გარემოს შექმნა ხელისუფლების მოვალეობაა," ნათქვამია ორგანიზაციის ვებ-გვერდზე. სრულად... წყარო: qartia.org.ge

თბილისი. 13 მაისს, ომბუდსმენმა რეკომენდაციით მიმართა „ხულოს მუნიციპალიტეტის საბავშვო ბაღების გაერთიანებას" წინასახელშეკრულებო შრომით ურთიერთობებში ქონებრივი მდგომარეობის ნიშნით დისკრიმინაციის აღმოფხვრასთან დაკავშირებით. „საქმის ფაქტობრივი გარემოებების თანახმად, სოფელ ღურტას ახალგახსნილ საბავშვო ბაღში პედაგოგის პოზიციაზე დასაქმების ერთ-ერთ კრიტერიუმს კანდიდატის ოჯახის სოციალური მდგომარეობა წარმოადგენდა, რომლის შეფასება მუნიციპალიტეტის გამგეობის სოფელ ღურტას წარმომადგენლობის და მოსახლეობისგან მიღებულ ზეპირ ინფორმაციას ემყარებოდა," ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. 20 მაისს, საქართველოს სახალხო დამცველმა ოსური ფორუმის მონაწილეებს კონფლიქტებით დაზარალებული მოსახლეობის უფლებების დაცვის შესახებ რიგით მეორე საინფორმაციო ბიულეტენი წარუდგინა. „დოკუმენტში შესულია ინფორმაცია სახალხო დამცველის მიერ 2015 წლის განმავლობაში გამართული შეხვედრების, გამოცემული ანგარიშების, რეკომენდაციებისა და წინადადებების, წარმატებული საქმეების შესახებ; ასევე ასახულია ოსური ფორუმის საქმიანობა და სახალხო დამცველის საგანმანათლებლო და ნდობის აღდგენის მიმართულებით განხორციელებული აქტივობები," ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. ომბუდსმენმა მოწვევის წერილი გაუგზავნა გაეროს სპეციალურ მომხსენებელს შშმ პირთა უფლებების დაცვის საკითხებზე ქალბატონ კატალინა დევანდას აგილარს. „მოწვევის მიზანია შშმ პირთა მიმართ უფლებადარღვევების ინდივიდუალური შემთხვევებისა და უფრო ფართო, სისტემური ხასიათის დარღვევების გარემოებათა შესწავლა, სამართლებრივი შეფასება და რეაგირების ქმედითი მექანიზმების იდენტიფიცირება, რაც ხელს შეუწყობს ქვეყანაში შშმ პირთა უფლებების დაცვის მდგომარეობის გაუმჯობესებას", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს საინფორმაციო ბროშურას: შრომის პირობებისა და უსაფრთხოების დაცვაზე ზედამხედველობის განმახორციელებელი უწყებები. სრულად... წყარო: emc.org.ge

თბილისი. 19 მაისს, ომბუდსმენმა საქართველოს შინაგან საქმეთა სამინისტროს დაქვემდებარებულ ორგანოებში ადამიანის უფლებათა დაცვის კუთხით არსებული მდგომარეობის შესახებ ანგარიში წარუდგინა. „...მიუხედავად ამისა, მონიტორინგის შედეგად გამოვლენილი წამებისა და სხვა არასათანადო მოპყრობის სავარაუდო შემთხვევების გათვალისწინებით, სახალხო დამცველი და სპეციალური პრევენციული ჯგუფი მიიჩნევს, რომ საქართველოს შინაგან საქმეთა სამინისტროს სისტემაში ადამიანის უფლებათა დაცვის მდგომარეობა გაუარესებულია," ნათქვამია სახალხო დამცველის ვებ-გვერდზე. სრულად... წყარო: ombudsman.ge