თბილისი. საქართველოს ახალგაზრდა იურისტთა ასოციაციამ საიხან მუზაევის საქმესთან დაკავშირებით განცხადება გაავრცელა. „საია იცავს საიხან მუზაევის ინტერესებს, რომელსაც შინაგან საქმეთა სამინისტრო ყოველგვარი დასაბუთების გარეშე არ აძლევს ქვეყნის დატოვების შესაძლებლობას და საქართველოს კონსტიტუციით გარანტირებულ გადაადგილების თავისუფლებას უზღუდავს. ...მოვუწოდებთ შინაგან საქმეთა სამინისტროს შეწყვიტოს საიხან მუზაევის მიმართ გადაადგილების თავისუფლების თვითნებური შეზღუდვა. აქვე იმედს ვიტოვებთ, რომ სასამართლო უზრუნველყოფს საქმის დროულად განხილვას და გადაწყვეტილების მიღებას", ნათქვამია განცხადებაში. სრულად... წყარო: gyla.ge

თბილისი. 15 ივლისს ადამიანის უფლებათა სახლის საკონფერენციო დარბაზში გაიმართა მრგვალი მაგიდა - „პირადი ცხოვრების უფლება საქართველოში". მრგვალი მაგიდა პროექტის - „სტრატეგიული სამართალწარმოება და კამპანიები ადამიანის უფლებათა ევროპული კონვენციის იმპლემენტაციის ხელშესაწყობად" - ფარგლებში გაიმართა. პროექტს ორგანიზაცია „კონსტიტუციის 42-ე მუხლი" ფონდ „ღია საზოგადოების" ფინანსური მხარდაჭერით ახორციელებს. პროექტის ფარგლებში კონსტიტუციის-42 მუხლი აწარმოებს რამოდენიმე საქმეს, სადაც ადგილი აქვს პირადი ცხოვრების უფლების დარღვევას.  პროექტის ფარგლებში განხილული საქმეების მიხედვით ბენეფიციართა პირადი ცხოვრების უფლების დარღვევა განხორციელდა ჟურნალისთა მიერ. კერძოდ, ბენეფიციართა პირადი ცხოვრების უფლების დარღვევა გამოწვეულია ჟურნალისტთა მიერ პირადი საიდუმლოების შემცველი ინფორმაციის ბენეფიციართა ნებართვის გარეშე გავრცელებით. აღნიშნული პროექტის განხორციელება 2013 წლის 1 სექტემბრიდან დაიწყო და 2014 წლის 31 აგვისტოს დასრულდება. წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა ეკონომისტთა ასოციაციამ, საკონსტიტუციო სასამართლოს მიერ სასოფლო სამეურნეო მიწის უცხოელებზე მიყიდვის ამკრძალავი მორატორიუმის გაუქმების შესახებ,  განცხადება გაავრცელეს. „მიგვაჩნია რომ მორატორიუმის გაუქმება სამართლიანია და დადებითად აისახება ქვეყანაში არსებული ბიზნეს გარემოს გაუმჯობესებაზე...", ნათქვამია განცხადებაში. სრულად... წყარო: საქართველოს ახალგაზრდა ეკონომისტთა ასოციაცია

თბილისი. საქართველოს ჟურნალისტური ეთიკის ქარტიამ ტელეკომპანია GDS-ის გადაცემაზე განცხადება გაავრცელა. „საქართველოს ჟურნალისტური ეთიკის ქარტიის საბჭო ადასტურებს თავის უარყოფით დამოკიდებულებას გადაცემის კონკრეტული ფრაგმენტისადმი, ეთანხმება უკვე გამოთქმულ პროტესტს და თავის მხრივ მიიჩნევს, რომ ტელეკომპანიამ კონკრეტული გადაცემის ფრაგმენტით დაარღია კანონი მაუწყებლობის შესახებ და მაუწყებელთა ქცევის კოდექსი, რომელიც უხამსობის შემცველი, დისკრიმინაციის წამახალისებელი და მოქალაქის ღირსებისა და ძირითად უფლებათა შემლახავი პროგრამების გადაცემას კრძალავს", ნათქვამია განცხადებაში. სრულად...  წყარო: qartia.org.ge

თბილისი. ორგანიზაციამ „პარტნიორობა ადამიანის უფლებებისთვის" გაეროს ქალთა ორგანიზაციის მიწვევით ტრენინგი ჩაატარა საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს და საქართველოს სახალხო დამცველის აპარატის თანამშრომლებისათვის. ტრენინგის თემები იყო ბავშვთა უფლებები, შეზღუდული შესაძლებლობის მქონე პირთა უფლებები, ეთნიკურ უმცირესობათა საკითხები, დისკრიმინაციისგან დაცვის ადამიანის უფლებების ევროპული სასამართლოს მიდგომები და პრეცედენტები. წყარო: ორგანიზაციის გვერდი სოციალურ ქსელში

თბილისი. სახალხო დამცველი შეშფოთებას გამოთქვამს სოციალურ სივრცეში გავრცელებული ვიდეო ჩანაწერის გამო, რომელიც ტელეკომპანია GDS-ის მიერ მომზადებული გადაცემა „ბინა 18"-ის ფარგლებში გავიდა. „ქალის სხეულის მუსიკალურ ინსტრუმენტთან გაიგივება შეურაცხმყოფელი და ღირსების შემლახველია არა მხოლოდ მონაწილე ქალების, არამედ მთლიანად საზოგადოებისათვის. ქალის შეფასება მისი გარეგნული, ბიოლოგიური მახასიათებლებით, მისი ობიექტივიზაცია და „ნივთად წარმოჩენა" წარმოადგენს სექსიზმს, რომელსაც დამანგრეველი შედეგების მოტანა შეუძლია ქალთა უფლებრივი მდგომარეობისათვის საქართველოში", ნათქვამია სახალხო დამცველის განცხადებაში. სრულად... წყარო: ombudsman.ge

თბილისი. ქალთა საინფორმაციო ცენტრმა სოციალურ ქსელში განცხადება გაავრცელა, რომლითაც ტელეკომპანია GDS-ს მიმართავს. „მივმართავთ ტელეკომპანიის ხელმძღვანელობას, საჯაროდ მოიხადოს ბოდიში 9 ივლის, ეთერში გასული გადაცემის გამო და მიიღოს შესაბამისი ზომები „ბინა 18"-ის შემოქმედებითი ჯგუფის მიმართ. მედია, რომლის როლიც საზოგადოებრივი აზროვნების ფორმირებაში საკმაოდ მაღალია და მისი პირდაპირი მოვალეობაა, ხელი შეუწყოს სხვადასხვა საკითხებისადმი სწორი მიდგომების ჩამოყალიბებას, ეთერს უთმობს მსგავსი ტიპის თემების გაშუქებას, რაც ხელს უწყობს არსებული გენდერული სტერეოტიპების გამყარებას და უხეში ფორმით გამოხატავს დისკრიმინაციას ქალთა მიმართ", ნათქვამია განცხადებაში. წყარო: ორგანიზაციის გვერდი სოციალურ ქსელში

თბილისი. ადამიანის უფლებათა ცენტრის ყოფილი პოლიტპატიმრების სამართლებრივი რეაბილიტაციისა და რეპუტაციის აღდგენის შესახებ განცხადებას ავრცელებს. „ყოფილი პოლიტპატიმრის ზვიად ხარებავას საბანკო ანგარიშებს ისევ ყადაღა ადევს. მიუხედავად იმისა, რომ ხარებავა პატიმრობიდან პოლიტპატიმრის სტატუსით განთავისუფლდა, შეღავათი არ შეხებია ჯარიმის სახით დაკისრებულ 50 000 ლარს. არადა, პოლიტპატიმრის სტატუსი ზვიად ხარებავას მიენიჭა სწორედ იმ უკანონო განაჩენიდან გამომდინარე, რის საფუძველზეც აქვს დაკისრებული აღნიშნული ჯარიმა. ადამიანის უფლებათა ცენტრი შეშფოთებას გამოხატავს ამ ფაქტთან დაკავშირებით”. სრულად...  წყარო: humanrights.ge

თბილისი. საქართველოს ახალგაზრდა იურისტთა ასოციაცია იცავს ტელეკომპანია ,,ტაბულას" თანამშრომლის და მასთან ერთად ადმინისტრაციულ პასუხისგებაში მიცემული კიდევ 2 პირის ინტერესებს, რომლებიც პოლიციის თანამშრომლებმა 2014 წლის 28 ივნისს დააკავეს. „დაკავების კანონიერების და პოლიციის თანამშრომელთა მხრიდან ძალის გადამეტების შესახებ არსებულმა ეჭვებმა, ასევე ადმინისტრაციულ სამართალდარღვევათა კოდექსში დაცვის უფლების ეფექტური საპროცესო საშუალებების არ არსებობამ და ამ ტიპის საქმეებზე სამართლიანი სასამართლოს უფლების სტანდარტების დარღვევის პრაქტიკამ განაპირობა ამ საქმით საიას დაინტერესება და საადვოკატო დახმარების განხორციელება. ... გამომდინარე იქედან, რომ საქალაქო სასამართლოს მიერ მიღებული დადგენილება არის დაუსაბუთებელი და ეწინააღმდეგება კანონს, საია ადმინისტრაციულ სამართალდამრღვევად მიჩნეული პირების სახელით სააპელაციო სასამართლოში საჩივარს წარადგენს, რომლითაც მოთხოვნილი იქნება საქალაქო სასამართლოს მიერ მიღებული დადგენილების გაუქმება და ,,ტაბულას" თანამშრომლისა და მისი 2 მეგობრის მიმართ ადმინისტრაციული საქმის წარმოების შეწყვეტა ადმინისტრაციული სამართალდარღვევის შემთხვევის არ არსებობის გამო”. სრულად...  წყარო: gyla.ge

აჭარა. 9 ივლისს, საზოგადოებრივი ორგანიზაციის „შშმ პირების უფლებებისათვის" თავმჯდომარემ, თამაზ მჟავანაძემ ბრიფინგი გამართა, სადაც აჭარაში უმაღლესი სასწავლებლების შშმ პირებისათვის არადაპტირებულ გარემოზე ისაუბრა. მისი თქმით, უნივერსიტეტებში აუდიტორიები, მატერიალურ-ტექნიკური ბაზა არ იძლევა საშუალებას შშმ პირები თავისუფლად გადაადგილდნენ. თამაზ მჟავანაძე საქართველოს განათლების სამინისტროს აღნიშნული პრობლემების დროული მოგვარებისკენ მოუწოდებს, რადგან, მისი ინფორმაციით, წინა წლებთან შედარებით, უმაღლესი განათლების მიღების მსურველი შშმ პირების რაოდენობა გაზრდილია. აჭარაში დღეის მდგომარეობით 341 შშმ მოსწავლეა, რომელთა უმრავლესობაც უმაღლესი განათლების მისაღებად სწავლის გაგრძელებას გეგმავს.

თბილისი. საქართველოს სახალხო დამცველმა წინადადებით მიმართა მთავარ პროკურორს დაიწყოს გამოძიება, აჭარის ავტონომიური რესპუბლიკის უმაღლესი საბჭოს დეპუტატის მედეა ვასაძის მხრიდან ჟურნალისტ ჯაბა ანანიძის მიმართ განხორციელებული სავარაუდო კანონსაწინააღმდეგო ქმედებების თაობაზე. „მოქმედი სისხლის სამართლის საპროცესო კანონმდებლობა არ ცნობს საგამონაკლისო ნორმებს რომელიც საშუალებას მისცემს საგამოძიებო ორგანოებს უარი თქვან გამოძიების დაწყებაზე, უფრო მეტიც, ისინი ვალდებული არიან გამოიყენონ მათ ხელთ არსებული ყველა სამართლებრივი შესაძლებლობა, რათა ეფექტურად გამოავლინონ დანაშაულებრივი ქმედებები და სათანადო რეაგირება მოახდინონ კანონდარღვევებზე", ნათქვამია სახალხო დამცველის ვებ-გვერდზე. სრულად... წყარო: ombudsman.ge

თბილისი. სახალხო დამცველი გაეროს „იძულებით გაუჩინარებისაგან ყველა პირთა დაცვის შესახებ" კონვენციის რატიფიცირების რეკომენდაციით გამოდის. ომბუდსმენი მიმართავს საქართველოს პარლამენტს დაიწყოს გაეროს 2006 წლის 20 დეკემბრის „იძულებით გაუჩინარებისაგან ყველა პირთა დაცვის შესახებ" კონვენციის რატიფიცირების პროცესი. „მნიშვნელოვანია, საქართველოს კანონმდებლობის, კერძოდ კი საქართველოს სისხლის სამართლის კოდექსის საერთაშორისო სტანდარტებთან შესაბამისობაში მოყვანა", ნათქვამია სახალხო დამცველის ვებ-გვერდზე. სრულად... წყარო: ombudsman.ge 

თბილისი. ადამიანის უფლებების სწავლებისა და მონიტორინგის ცენტრმა გაეროს შეზღუდული შესაძლებლობის მქონე პირთა უფლებების კონვენციის (UNCRPD) იმპლემენტაციის გზამკვლევი წარადგინა. დოკუმენტის მიზანია, შეაფასოს შეზღუდული შესაძლებლობის მქონე პირთა უფლებრივი მდგომარეობა კონვენციასთან შესაბამისობის თვალსაზრისით და საკანონმდებლო და აღმასრულებელი ხელისუფლებისათვის შეიმუშავოს კონვენციის იმპლემენტაციის სარეკომენდაციო კონცეფცია. გზამკვლევი ავლენს მოქმედი საკანონმდებლო ჩარჩოსა და სახელმწიფოს პოლიტიკის მთავარ ხარვეზებს და განსაზღვრავს კონვენციის მოთხოვნებთან თანმხვედრი ცვლილების შესაძლო მიმართულებებს სრულად... წყარო: emc.org.ge

თბილისი. 8 ივლისს საქართველოს სახალხო დამცველმა და დევნილთა  არასამთავრობო ორგანიზაციათა ქსელმა „სინერგიამ" ურთიერთთანამშრომლობის მემორანდუმი გააფორმეს. თანამშრომლობის მიზანია იძულებით გადაადგილებულ პირთა უფლებებისა და თავისუფლების დაცვისათვის, საერთაშორისო ხელშეკრულებებით ნაკისრი ვალდებულებების გათვალისწინებით, მდგრადი სამართლებრივი და სოციალური პოლიტიკის შემუშავება და განხორციელება. მემორანდუმის ფარგლებში მხარეები გეგმავენ ერთობლივი სამუშაო ჯგუფის შექმნას, სადაც კონსულტაციებისა და დისკუსიების გზით მოახდენენ იძულებით გადაადგილებულ პირთა უფლებების დარღვევის ფაქტების გამოვლენას და პრობლემების გადაჭრის გზების ძიებას; ასევე, დევნილთა განსახლებასთან დაკავშირებით საინფორმაციო უზრუნველყოფას. წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრმა მუსლიმი მოქალაქეებისათვის გადაადგილების თავისუფლების შეზღუდვის შესახებ განცხადება გაავრცელა. „უკანასკნელ ხანებში, საქართველოს მუსლიმი მოსახლეობის მხრიდან ხშირად გაისმის უკმაყოფილება ხელისუფლების მიერ მათი გადაადგილების თავისუფლების თვითნებურად შეზღუდვის ფაქტებთან დაკავშირებით. ...EMC მოუწოდებს სახელმწიფოს, ოფიციალური განმარტება გააკეთოს, საზღვრის გადაკვეთის დროს, საქართველოს მოქალაქე მუსლიმი/ქისტი პირებისთვის გადაადგილების თავისუფლების შეზღუდვის ფაქტების შესახებ; მიუთითოს ის ნორმატიული საფუძველი და დასაბუთება, რითაც უფლებაში ჩარევა შეიძლება იყოს გამართლებული. ამასთან, EMC მოუწოდებს შსს-ს, შეწყვიტოს და გადახედოს არსებულ პრაქტიკას, ხოლო მისი პოლიტიკა ადამიანის უფლებების დაცვის კონსტიტუციურ და საერთაშორისო სტანდარტებთან მოვიდეს შესაბამისობაში". სრულად...  წყარო: emc.org.ge

თბილისი. არასამთავრობო ორგანიზაცია „იარე ფეხით" მიმართავს თბილისის მერობის კანდიდატებს და მოითხოვს მათი მხრიდან მკაფიო პოზიციის გამოხატვას ქალაქში ქვეითთა უფლებების დასაცავად. „იარე ფეხით" და ამ ორგანიზაციის მხარდამჭერი მოქალაქეები მოითხოვენ ფეხით მოსიარულეთათვის უკეთესი პოლიტიკის გატარებას. „სამწუხაროდ, ქალაქ თბილისის მერიას ამ ეტაპზე არ გააჩნია ქალაქის განვითარების კომპლექსური სტრატეგია, რომელიც გაითვალისწინებდა ქვეითთა საკითხების სისტემურ და გამჭვირვალე მართვას და მათი უფლებების ეფექტურ დაცვას....", ნათქვამია ორგანიზაციის განცხადებაში. სრულად... წყარო: ორგანიზაციის ვებგვერდი სოციალურ ქსელში

თბილისი. 4 ივლისს, საქართველოს ჟურნალისტური ეთიკის ქარტიამ 15 იანვრიდან 1 ივნისამდე განხორციელებული მედიამონიტორინგის – „ბავშვთა საკითხების ეთიკური გაშუქება მედიაში" – პრეზენტაცია გამართა. ანგარიში მოიცავს ტელევიზიებით, ინტერნეტგამოცემებსა და პრესის საშუალებებით გავრცელებულ 5 ათასამდე მასალის ანალიზს. სრულად... წყარო: media.ge

თბილისი. შინაგან საქმეთა სამინისტროს წარმომადგენლები ქალთა უფლებებზე მომუშავე არასამთავრობო ორგანიზაციების წარმომადგენლებს შეხვდნენ. სამინისტროს წარმომადგენლებმა არასამთავრობო სექტორის წევრებს მიაწოდეს ინფორმაცია ქალთა წინააღმდეგ ჩადენილი დანაშაულების კვლევის და საზოგადოების ცნობიერების ამაღლების მიზნით სამინისტროს მიერ განხორციელებულ და დაგეგმილ ღონისძიებებზე. სრულად... წყარო: ginsc.net

თბილისი. სახალხო დამცველმა მიმოსვლის თავისუფლების დარღვევის ფაქტებთან დაკავშირებით რეკომენდაცია გამოაქვეყნა. „2013 წლის საანგარიშო პერიოდში საქართველოს სახალხო დამცველის აპარატმა შეისწავლა არაერთი შემთხვევა, როცა ადგილი ჰქონდა გადაადგილების თავისუფლების, ან მის საფუძველზე, პირადი და ოჯახური ცხოვრების პატივისცემის უფლების სავარაუდო დარღვევას, როგორც საქართველოს მოქალაქეების, ასევე, უცხო ქვეყნის მოქალაქეების მიმართ. ... საქართველოს სახალხო დამცველმა აღნიშნული საკითხების მოწესრიგების მიზნით, რეკომენდაციით მიმართა საქართველოს შინაგან საქმეთა მინისტრს – უზრუნველყოს მისი უწყებების მიერ „უცხოელთა და მოქალაქეობის არმქონე პირთა სამართლებრივი მდგომარეობის შესახებ" საქართველოს კანონის თანახმად, ოჯახის ერთიანობის პრინციპის დაცვა, უცხო ქვეყნის მოქალაქეების ან/და მოქალაქეობის არმქონე პირების საქართველოში შემოსვლის საკითხის განხილვისა და გადაწყვეტილების მიღების დროს”. სრულად...  წყარო: www.ombudsman.ge

დღეს, თბილისის დროით 13:00 საათზე ადამიანის უფლებათა ევროპულ სასამართლოში, სტრასბურგში, საჯარო სხდომა გაიმართა, სადაც სახელმწიფოთაშორის საჩივარზე (საქართველო რუსეთის წინააღმდეგ) ევროპული სასამართლოს მიერ მიღებული გადაწყვეტილება გამოცხადდა.  ამ საკითხზე ახალგაზრდა იურისტთა ასოციაცია განცხადებას ავრცელებს. „2007 წლის 26 მარტს საქართველოს მთავრობამ საჩივრით მიმართა ევროპულ სასამართლოს 2006 წელს რუსეთის ფედერაციის მიერ საქართველოს მოქალაქეების მასობრივ გამოძევებასთან დაკავშირებით... 2007 წლის აპრილში ამავე საკითხზე საქართველოს ახალგაზრდა იურისტთა ასოციაციამ (საია) პარტნიორ ორგანიზაციასთან, ადამიანის უფლებათა დაცვის ევროპულ ცენტრთან (EHRAC) ერთად ევროპულ სასამართლოს ინდივიდუალური საჩივრებით მიმართა. საია ევროპული სასამართლოს წინაშე 13 საქართველოს მოქალაქის ინტერესებს წარმოადგენს. ... დღევანდელი გადაწყვეტილებით ევროპულმა სასამართლომ რუსეთის ფედერაცია პასუხისმგებელ სახელმწიფოდ ცნო საქართველოს მოქალაქეების კოლექტიური გამოძევების, მათ მიმართ არასათანადო მოპყრობის, უკანონო დაკავებისა და დაპატიმრების, სამართლებრივი დაცვის საშუალებების არ ქონის ნაწილში. ევროპული სასამართლო ასკვნის, რომ აღნიშნული დარღვევები წარმოადგენდა ადმინისტრაციულ პრაქტიკას და რუსეთის ხელისუფლების სხვადასხვა შტოს კოორდინირებული და მიზანმიმართული ქმედებების შედეგია. ... საიას მიერ ევროპულ სასამართლოში რუსეთის ფედერაციიდან საქართველოს მოქალაქეების მასიურ გამოძევებათან დაკავშირებით გაგზავნილი საჩივრების განხილვა უახლოეს მომავალში მოხდება. სახელმწიფოთაშორისი სარჩელის წარმატებიდან გამომდინარე, მაღალი ალბათობით უნდა ვივარაუდოთ, რომ ასევე წარმატებით დასრულდება საიას მიერ 13 საქართველოს მოქალაქის ინტერესების დასაცავად შეტანალ საქმეების განხილვაც", ნათქვამია საიას ვებგვერდზე. სრულად... წყარო: gyla.ge

თბილისი. ქალთა საინფორმაციო ცენტრმა არასამთავრობო ორგანიზაციების ფორუმი გამართა. ფორუმის თემა იყო „ქალები, მშვიდობასა და უსაფრთხოებაზე" - გაეროს უშიშროების საბჭოს რეზოლუციების სამოქმედო გეგმის განხორციელება. ფორუმში მონაწილე არასამთავრობო ორგანიზაციების წარმომადგენლებმა შეიმუშავეს რეკომენდაციები „ქალებზე, მშვიდობასა და უსაფრთხოებაზე" გაეროს უშიშროების საბჭოს რეზოლუციების განსახორციებელი 2012–2015 წლების ეროვნული სამოქმედო გეგმის შესრულების ეროვნული საკოორდინაციო ჯგუფისათვის. შეხვედრაზე ქალთა საინფორმაციო ცენტრმა ასევე გააცნო მონაწილეებს ქალთა მიმართ დისკრიმინაციის აღმოფხვრის კომიტეტის სესიაზე წარსადგენი ანგარიში. ფორუმის მეორე ნაწილი დაეთმო ქალთა საინფორმაციო ცენტრის მიერ გლობალური ფონდის მხარდაჭერით გამხორციელებული პროექტის - „ეროვნული და საერთაშორისო ვალდებულებების შესრულების მონიტორინგი ქალთა უფლებების დაცვის სფეროში” - შედეგების წარდგენასა და შრომის კოდექსთან დაკავშირებული რეკომენდაციების შემუშავებას. წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველმა სარჩელით მიმართა საქართველოს საკონსტიტუციო სასამართლოს. სახალხო დამცველმა „სოციალური დახმარების შესახებ" საქართველოს მთავრობის დადგენილების იმ დებულებების არაკონსტიტუციურად ცნობა მოითხოვა, რომელიც ბავშვთა რეინტეგრაციის და მინდობით აღზრდის ფინანსურ სუბსიდიებს განსაზღვრავს. „სადავო აქტის მიხედვით, ბავშვის ბიოლოგიურ ოჯახში დაბრუნებისას, რეინტეგრაციის შემწეობის ოდენობა წარმოადგენს თვეში 90 ლარს ჯანმრთელი ბავშვისთვის, ხოლო 130 ლარს – შეზღუდული შესაძლებლობის მქონე ბავშვისთვის. თუ ბიოლოგიურ ოჯახში დაბრუნების ნაცვლად ბავშვი გადაყვანილი იქნება მინდობით აღსაზრდელად, ანაზღაურება წარმოადგენს 15 ლარს ერთ კალენდარულ დღეზე (თვეში 450–465 ლარი) ჯანმრთელი ბავშვისთვის და 20 ლარს ერთ კალენდარულ დღეზე (თვეში 600–620 ლარი) – შეზღუდული შესაძლებლობის მქონე ბავშვისთვის. ... საქართველოს სახალხო დამცველი მიიჩნევს, რომ თუ სახელმწიფოს დეკლარირებული მიზანი ბავშვის კეთილდღეობის რეფორმის ფარგლებში მათი დეინსტიტუციონალიზაცია და მიტოვების პრევენციაა, აშკარაა, რომ ამ მიზნის მისაღწევად მშობლისთვის უფრო ცუდი პირობების შეთავაზება, ვიდრე უცხო ოჯახისთვის, მიზნის მიღწევის გონივრულ საშუალებას არ წარმოადგენს”. სრულად...  წყარო: ombudsman.ge