იმერეთი. საქართველოს ახალგაზრდა იურისტთა ასოციაციის ქუთაისის ფილიალი იცავდა სპეციალური პენიტენციური სამსახურიდან უკანონოდ გათავისუფლებული პირის უფლებებს. იგი 2007 წლიდან მუშაობდა დაკავებულ პოზიციაზე, თუმცა, 2019 წლის მაისში მონიტორინგის დეპარტამენტის დასკვნის საფუძველზე დისციპლინური სახდელი - „სამსახურიდან გათავისუფლება“ დაეკისრა. „დასკვნაში მითითებული იყო, რომ დასაქმებულის მხრიდან ადგილი ჰქონდა სამსახურებრივი მოვალეობის განზრახ შეუსრულებლობას, რაც საქმეზე ჩატარებული ადმინისტრაციული წარმოების მასალებით არ დგინდებოდა. სასამართლოს განხილვისას, მთავარი სხდომის მიმდინარეობის ეტაპზე, საქმე მხარეთა მორიგებით დასრულდა და მოსარჩელე აღადგინეს საქართველოს იუსტიციის სამინისტროს მმართველობის სფეროში მოქმედი სახელმწიფო საქვეუწყებო დაწესებულების სპეციალურ პენიტენციურ სამსახურში, გათავისუფლებამდე დაკავებულ პოზიციაზე“. სრულად... წყარო: gyla.ge

თბილისი. სახალხო დამცველმა შპს CD Company-ში დასაქმებული ქალის მიმართ სექსუალური შევიწროების ფაქტი დაადგინა და 2022 წლის 5 ივლისს რეკომენდაციით მიმართა კომპანიის დირექტორს, სადაც მოუწოდა მას მომავალში არ განახორციელოს დასაქმებულთა სექსუალური შევიწროება და არ შეუქმნას თანამშრომლებს შეურაცხმყოფელი, დამამცირებელი ან/და მათი ღირსებისთვის შეუსაბამო გარემო. სახალხო დამცველის აპარატში განმცხადებლის ინტერესებს ააიპ „საფარი“ წარმოადგენდა. სრულად... წყარო: ombudsman.ge

თბილისი. საწარმოო ტრამვაის შედეგად დაზარალებულმა პირმა საქართველოს ახალგაზრდა იურისტთა ასოციაციის დახმარებით დავა მოიგო. ორგანიზაცია იცავდა 1990 წლის იანვარში საწარმოო ტრავმის შედეგად დაზარალებულ პირს, რომელიც სამუშაო ადგილას მიღებული დაზიანების შედეგად მკვეთრად გამოხატული შეზღუდული შესაძლებლობის მქონე პირი გახდა. უზენაესი სასამართლოს 2022 წლის 21 ივნისის გადაწყვეტილებით, მოპასუხეს დაზარალებული პირის სასარგებლოდ დაეკისრა სარჩელის აღძვრამდე უკანასკნელი სამი წლის განმავლობაში მიუღებელი სარჩოს სხვაობის - 16387 ლარის გადახდა. ასევე, სარჩოს სახით ყოველთვიურად 500 ლარის გადახდა. სრულად... წყარო: gyla.ge

თბილისი. 2022 წლის 13 ივლისს ტელეკომპანიების „მაესტროს” და „იმედის” ეთერით წამყვანმა გია გაჩეჩილაძემ (უცნობი) გაავრცელა ფარული ჩანაწერი, რომელიც მისივე განმარტებით, ტელეკომპანია „მთავარი არხის” გუნდის სამუშაო პროცესს ასახავს, „მთავარი არხის” ჟურნალისტები კი ჩანაწერების ავთენტურობას ადასტურებენ. მედიის ადვოკატირების კოალიცია მიიჩნევს, რომ სპეციალურმა საგამოძიებო სამსახურმა დაუყოვნებლივ უნდა დაიწყოს გამოძიება სისხლის სამართლის კოდექსის 158-ე მუხლით, რაც კერძო კომუნიკაციის საიდუმლოების დარღვევას გულისხმობს. „მოვუწოდებთ, სპეციალურ საგამოძიებო სამსახურს სწრაფი და ეფექტიანი გამოძიებით გაფანტოს ჟურნალისტებზე სახელმწიფოს მიერ უკანონო მიყურადების შესახებ არსებული ეჭვები“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. 7 ივლისს საქართველოს დემოკრატიულმა ინიციატივამ (GDI) ჟურნალისტებისა და აქტივისტების უკანონო ფარულ მოსმენა-მიყურადებასთან დაკავშირებით ადამიანის უფლებათა ევროპულ სასამართლოს საჩივრით მიმართა. „2021 წლის 13 სექტემბერს გავრცელდა ინფორმაცია სახელმწიფო უსაფრთხოების სამსახურის მიერ ფარული მიყურადებისა და თვალთვალის შესახებ. მასალები ათასობით დოკუმენტს აერთიანებდა, რომლებიც ძირითადად სასულიერო პირებს, მათ კავშირებს, სატელეფონო მიმოწერებს, საუბრებს, წარსულ საქმიანობებს და პირადი ცხოვრების სხვა დეტალებს ეხებოდა. ვთვლით, რომ საქმემ შესაძლოა მნიშვნელოვანი გავლენა იქონიოს კანონმდებლობის გაუმჯობესებასა და საქართველოში უკანონო მოსმენა მიყურადების პრაქტიკაზე“. სარჩელი მომზადდა საქართველოში ღია საზოგადოების ფონდის ფინანსური მხარდაჭერით. სრულად... წყარო: gdi.ge

თბილისი. „უფლებები საქართველოს“ და იურიდიული დახმარების სამსახურის იურისტებმა, რომლებიც თავშესაფრის მაძიებლებს და საერთაშორისო დაცვის ქვეშ მყოფ პირებს უფასო სამართლებრივ დახმარებას უწევენ, 12 ივლისს, სამუშაო შეხვედრა გამართეს. სამუშაო შეხვედრა ჩატარდა პროექტის „ლტოლვილების, თავშესაფრის მაძიებლების, ჰუმანიტარული სტატუსის მქონე და მოქალაქეობის არმქონე პირების დაცვა და გაძლიერება საქართველოში“ ფარგლებში, რომელსაც „უფლებები საქართველო“ 2019 წლიდან, გაეროს ლტოლვილთა უმაღლესი კომისარიატის (UNHCR) დაფინანსებით ახორციელებს. სრულად... წყარო: www.rights.ge

რეგიონები. 2022 წლის ივნისის თვეში, საქართველოს სახალხო დამცველის აპარატის გენდერის დეპარტამენტისა და შეზღუდული შესაძლებლობის მქონე პირთა უფლებების დეპარტამენტის თანამშრომლებმა საინფორმაციო შეხვედრები გამართეს ქვემო ქართლის, აჭარისა და იმერეთის მუნიციპალიტეტებში მცხოვრებ ქალებთან, მათ შორის შეზღუდული შესაძლებლობის მქონე ქალებთან და საქართველოს შინაგან საქმეთა სამინისტროში დასაქმებულ პირებთან. შეხვედრის მიზანი იყო რეგიონში მცხოვრები ქალების ცნობიერების ამაღლება ქალთა მიმართ და ოჯახში ძალადობისა და სექსუალური და რეპროდუქციული ჯანმრთელობისა და უფლებების შესახებ. სრულად... წყარო: ombudsman.ge

თბილისი. 7 და 8 ივლისს, USAID სამართლის უზენაესობის პროგრამის მხარდაჭერით, სახალხო დამცველის აპარატის 2022-2023 წლის სტრატეგიული სამართალწარმოების გეგმის შემუშავების მიზნით სამუშაო შეხვედრა გაიმართა. შეხვედრაზე განიხილეს და გამოავლინეს ყველა ის ნორმატიული აქტი, რომელიც ადამიანის უფლებებთან წინააღმდეგობის გამო საკონსტიტუციო სასამართლოში შეიძლება გასაჩივრდეს. სრულად... წყარო: ომბუდსმენის გვერდი სოციალურ ქსელში

ქვემო ქართლი. სოციალური სამართლიანობის ცენტრის ინფორმაციით, მარნეულში კომპანია აკელიქსის დასაქმებულებმა, რომლის ინტერესებსაც ორგანიზაცია იცავდა, თვეების განმავლობაში დაგვიანებული კუთვნილი ანაზღაურება მიიღეს. „ადამიანის შრომითი უფლებების დაცვა მნიშვნელოვანია ქვეყანაში სოციალური კეთილდღეობის და ადამიანების და ოჯახების ღირსეული ცხოვრებისთვის“. სრულად... წყარო: socialjustice.org.ge

თბილისი. სოციალური სამართლიანობის ცენტრი ადიგენში მუსლიმი თემის საკუთრების უფლების შეზღუდვის ტენდენციაზე მიუთითებს. „2018 წელს, მთავრობის განკარგულებით საქართველოს საპატრიარქოს გადაეცა ადიგენის მუნიციპალიტეტის სოფელ კიკიბოსა და დერცელში არსებული არასასოფლო-სამეურნეო და სასოფლო-სამეურნეო დანიშნულების მიწის ნაკვეთები, რომლებიც მუსლიმი თემის მართლზომიერ მფლობელობაში იყო და თემის წევრები სათიბ-საძოვრებად იყენებდნენ. მიუხედავად იმისა, რომ ადგილობრივ მოსახლეობას მიწის ნაკვეთების მართლზომიერ მფლობელობის დამადასტურებელი სამართლებრივი დოკუმენტები გააჩნდა, სახელმწიფო უწყებებმა ყოველგვარი მოკვლევისა და შეფასების გარეშე უგულებელყვეს მოსახლეობის სამართლებრივი ინტერესები და ნაკვეთები საპატრიარქოს საკუთრებაში გადასცეს. მოსახლეობამ სახელმწიფო უწყებების ქმედებები სასამართლოში გაასაჩივრა, სასამართლო მხოლოდ ერთი მოსარჩელის შემთხვევაში აღმოჩნდა შედეგიანი, სხვა პირები კი საარსებო რესურსის (მიწა) გარეშე დატოვა“, ნათქვამია ორგანიზაციის ვებგვერდზე. სრულად... წყარო: socialjustice.org.ge

შიდა ქართლი. ქარელში გაიმართა დისკუსია თემაზე „უფლებადამცველთა როლი დემოკრატიული ინსტიტუტების მშენებლობაში“. შეხვედრას უძღვებოდა ადამიანის უფლებათა ცენტრის გორის ოფისის კოორდინატორი, იურისტი ლექსო მერებაშვილი. ადამიანის უფლებათა ცენტრი (HRC), ევროკავშირისა და ადამიანის უფლებათა სახლების ფონდის (HRHF) ფინანსური მხარდაჭერით, რადიო „მოზაიკასთან“ პარტნიორობით ახორციელებს პროექტს საქართველოში ძირითადი თავისუფლებებისა და ადამიანის უფლებების შესახებ. სრულად... წყარო: ორგანიზაციის გვერდი სოციალურ ქსელში

თბილისი. 11 ივლისს, 18:00 საათზე ღია საზოგადოების ფონდი გამართავს დისკუსიას იპოდრომის კორტების შესახებ. „დისკუსია შეეხება იპოდრომის პარკის რეაბილიტაციის გეგმას, რომელიც მოქალაქეთა ჩართულობის გარეშე, უნებართვო მშენებლობის ფორმით მიმდინარეობს, ასევე, იპოდრომის მიმდებარედ არსებული საჩოგბურთო კორტების პრობლემური გასხვისების პროცესს, რომელიც ღია საზოგადოების ფონდის კვლევასა და სტატიაშია ასახული... სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიციის ინფორმაციით, დღეს, 11 ივლისს, ტელეკომპანია პირველის ოპერატორის, ლექსო ლაშქარავას გარდაცვალებიდან 1 წელი გავიდა. 2021 წლის 11 ივლისს, ლექსო, რომელიც პარლამენტის მიმდებარე ტერიტორიაზე სირცხვილია-ს ოფისში ათობით თავდამსხმელის ძალადობის მსხვერპლი გახდა, საკუთარ სახლში გარდაცვლილი იპოვეს. თავდასხმის შემდეგ ლექსო ლაშქარავას დაზიანებული ჰქონდა სახის ძვლები და ჩაუტარდა ქირურგიული ოპერაცია. საქართველოს პროკურატურას, შინაგან საქმეთა სამინისტროს ამ დრომდე არ გამოუვლენია დამნაშავეები. გაეცანით: კოალიციის წევრი ორგანიზაციის „მედიის განვითარების ფონდის“ (MDF) ახალ კვლევას „ძალადობრივი ჯგუფების ანატომია - 1 წელი 5 ივლისის მოვლენებიდან“... ასევე, მედიის ადვოკატირების კოალიციის შეფასებას - მედიის პოგრომი: თბილისი 5 - 6 ივლისი, 2021 წელი... „2021 წლის 5 და 6 ივლისის მასშტაბური ძალადობის ორგანიზატორთა გამოვლენა და დასჯა ხელისუფლების საქართველოს მთავრობა პასუხისმგებლობაა“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. 2 ივლისს სამოქალაქო აქტივისტები ქალაქ მარნეულში „შინ ევროპისკენ“ საინფორმაციო კამპანიას ეწეოდნენ, რა დროსაც აქტივისტებს თავს დაესხნენ მერიის და საკრებულოს თანამშრომლები. ისინი სამირა ბაირამოვას აყენებდნენ სიტყვიერ შეურაცხყოფას და ასევე, ჰქონდათ ფიზიკური ანგარიშსწორების მცდელობაც. სამოქალაქო აქტივისტები, მედიის წარმომადგენლები, სამოქალაქო საზოგადოება შეშფოთებას გამოთქვამენ შექმნილი სიტუაციის გამო და მოუწოდებენ მარნეულის მუნიციპალიტეტის მერიას, დაუყოვნებლივ დაიწყოს დისციპლინური წარმოება საჯაროდ ჩადენილი და დღემდე მიმდინარე გადაცდომებისთვის: თანამდებობიდან გაათავისუფლოს რიმა ოთარაშვილი და ირმა ზარქუა; თანამდებობიდან გაათავისუფლოს ააიპ „მარნეულის მუნიციპალიტეტის ტერიტორიაზე არსებული ბაგა - ბაღების გაერთიანება (სკოლამდელი აღზრდის ცენტრის) დირექტორის მოადგილე, სოსო ინაძე, რომელიც არღვევდა კანონს,  სიტყვიერ შეურაცხყოფას აყენებდა სამირა ბაირამოვას. თვითმმართველობის ცალკეულმა პირებმა შეწყვიტონ შეურაცხყოფაზე დაფუძნებული გამოხატვა და დაიწყონ კონსტრუქციული თანამშრომლობა მედიასა და სამოქალაქო სექტორთან. პეტიცია სრულად იხ. ბმულზე... წყარო: socialjustice.org.ge

თბილისი. ადამიანის უფლებათა ცენტრი აქვეყნებს ბლოგპოსტს 2022 წლის მარტი-ივნისის წარმატებული საქმეების შესახებ. სრულად... წყარო: www.hrc.ge

იმერეთი. სოციალური სამართლიანობის ცენტრის მიიჩნევს, რომ ითხვისში განვითარებული მოვლენების შემსწავლელი კომისიის საქმიანობა კითხვებს და ეჭვებს აჩენს. „ადგილობრივთა მოთხოვნით და მომხდარიდან სამი თვის შემდეგ, ითხვისში 2022 წლის მარტში განვითარებულ მოვლენებს უწყებათაშორისი კომისია სწავლობს. კომისიის შემადგენლობაში დამოუკიდებელი ექსპერტის და ადგილობრივი წარმომადგენლის არარსებობა დაზარალებულებს შორის უნდობლობას იწვევს. ეჭვებს ამძაფრებს ის ფაქტიც, რომ კომისიის მეთოდოლოგიის შესახებ ადგილობრივთათვის არაფერია ცნობილი და ისიც, რომ კომისიის მუშაობის დასრულებამდე დაზარალებულ ოჯახებს ადგილობრივი ხელისუფლების წარმომადგენლებმა ზიანის შეუსაბამო და სამართლებრივად ბუნდოვანი კომპენსაცია შესთავაზეს. ადგილობრივი მოსახლეობა კომისიის საქმიანობის შესახებ მეტ ინფორმაციას ითხოვს და ჩართულ სახელმწიფო უწყებებს მოუწოდებს ოქმების, გეგმების და ვადების გასაჯაროების გზით უზრუნველყოს კომისიის საქმიანობის გამჭვირვალეობა“. იხილეთ განცხადება ვრცლად... წყარო: socialjustice.org.ge

თბილისი. „უფლებები საქართველომ“ სახელმწიფო უსაფრთხოების სამსახურს დავა სააპელაციო სასამართლოშიც მოუგო. თბილისის სააპელაციო სასამართლომ ძალაში დატოვა პირველი ინსტანციის გადაწყვეტილება, რომლითაც სასამართლომ სუს-ის მიერ პოლკოვნიკ გიორგი მურთაზაშვილის სამსახურიდან განთავისუფლება უკანონოდ ცნო. მურთაზაშვილის ინტერესებს სასამართლოში „უფლებები საქართველოს“ იურისტი, რუსუდან მჭედლიშვილი იცავდა. სრულად... წყარო: rights.ge

თბილისი. შრომითი უფლებები საჯარო სამსახურში - საქართველოს ახალგაზრდა იურისტთა ასოციაციამ ახალი კვლევა გამოაქვეყნა. კვლევის თანახმად, საჯარო მოსამსახურეთა შრომითი უფლებების განხორციელებისას გამოიკვეთა შემდეგი პრობლემური საკითხები: ზეგანაკვეთური სამუშაოს შესრულების მაღალი მაჩვენებელი; საჯარო მოსამსახურეებისათვის სხვა ან/და დამატებითი ფუნქციების დაკისრების დიდი რაოდენობა; საჯარო დაწესებულებებში საჯარო მოსამსახურეთა პროფესიული გაერთიანებების ან/და კავშირების არარსებობა. ყოველწლიური ანაზღაურებადი შვებულებით სრულად სარგებლობის დაბალი მაჩვენებელი; კვლევა წარმოადგენს რეკომენდაციებსა და გასატარებელი ღონისძიებების ჩამონათვალს საჯარო სამსახურებში შრომითი უფლებების რეალიზაციის უზრუნველსაყოფად, რომელთა გათვალისწინებაც მნიშვნელოვნად შეუწყობს ხელს საჯარო მოსამსახურეთა შრომითი უფლებების დაცვას საქართველოში. კვლევის სრული ვერსია... წყარო: www.gyla.ge

თბილისი. მედიის ადვოკატირების კოალიცია/Media Advocacy Coalition „TV მონიტორინგის“ გადამღებ ჯგუფზე თავდასხმას ეხმიანება. გავრცელებული ინფორმაციის თანახმად, 2022 წლის 05 ივლისს „TV მონიტორინგის“ გადამღებ ჯგუფს შოთა სადაღაშვილს და თორნიკე გელიტაშვილს ჟურნალისტური საქმიანობის შესრულების დროს თავს დაესხნენ. შემთხვევა ქარელის მუნიციპალიტეტში მოხდა. ჟურნალისტის ინფორმაციით, მოძალადეები ძალადობრივი და პრორუსული ჯგუფის „ალტ-ინფოს“ პარტიის მხარდამჭერებად გაეცნენ,  არხის სარედაქციო, პროევროპული პოლიტიკის გამო აკრიტიკებდნენ და ხელს უშლიდნენ პროფესიულ საქმიანობაში. მედიის ადვოკატირების კოალიცია მოუწოდებს სპეციალურ საგამოძიებო სამსახურს სწრაფი და ეფექტიანი გამოძიების პირობებში გამოიკვლიოს „TV მონიტორინგისთვის“ ჟურნალისტურ საქმიანობაში ხელშეშლის შემთხვევა. კოალიცია მიმართავს შინაგან საქმეთა სამინისტროს გაატაროს პრევენციული ზომები მედიის წარმომადგენლებზე გახშირებული თავდასხმების შესაჩერებლად. სრულად... წყარო: კოალიციის გვერდი სოციალურ ქსელში

თბილისი. დღეს, 2022 წლის 5 ივლისს, მედიისა და არასამთავრობო სექტორის წარმომადგენლებმა პროკურატურის წინ აქცია გამართეს. აქციის მონაწილეებმა 1 წლის თავზე, 2021 წლის 5-6 ივლისს პროფესიული მოვალეობის შესრულების დროს ჰომოფობიური და მოძალადე ჯგუფების მიერ ჟურნალისტებზე თავდასხმის ყველა მონაწილისა და ორგანიზატორის გამოვლენა და დასჯა მოითხოვეს. 5-6 ივლისს სიძულვილის ჯგუფების მასობრივი თავდასხმის შედეგად მედიის 53 წარმომადგენელი დაშავდა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს დემოკრატიული ინიციატივას (GDI) ინფორმაციით, 2022 წლის 5 ივლისს, ერთი წლის თავზე, თბილისის საქალაქო სასამართლოში 5 ივლისთან დაკავშირებული საქმეების განხილვა დასრულებულია. თუმცა პასუხისგებაში არაა მიცემული ძალადობის არც ერთი ორგანიზატორი, ხოლო იმ პირებს, რომლებსაც ბრალი ჰქონდათ წაყენებული - მინიმალური სანქციები შეეფარდათ. Tbilisi Pride-ისა და ლგბტქი+ აქტივისტების უფლებებს ევროსასამართლოს წინაშე GDI იცავს... სრულად... წყარო: gdi.ge

თბილისი. კოალიცია მედიის ადვოკატირებისთვის განცხადებას ავრცელებს და მიიჩნევს, რომ 2021 წლის 5 და 6 ივლისის მასშტაბური ძალადობის ორგანიზატორთა გამოვლენა და დასჯა ხელისუფლების პასუხისმგებლობაა. „ერთი წლის წინ, 2021 წლის 5 და 6 ივლისს, ქართულ ჟურნალისტიკაში ყველაზე მძიმე დღეები იყო, რა დროსაც პროფესიული მოვალეობის შესრულებისას ჰომოფობიური და მოძალადე ჯგუფების მასობრივი თავდასხმის შედეგად მედიის 53 წარმომადგენელი დაშავდა. 11 ივლისს საკუთარ სახლში გარდაცვლილი იპოვეს „TV პირველის“ ოპერატორი ლექსო ლაშქარავა. ოპერატორი 5 ივლისის თავდასხმების დროს სიძულვილის ჯგუფებმა სასტიკად სცემეს -  მიიღო ტვინის შერყევა, ჩამტვრეული ჰქონდა სახის ძვლები და ჩაუტარდა ქირურგიული ოპერაცია. გამოძიებას 5 და 6 ივლისის თავდასხმის ორგანიზატორები ერთი წლის თავზე კვლავ არ გამოუვლენია და შესაბამისად, არ დაუსჯია. მედია გარემო კი დღითი დღე უარესდება“. კოალიცია მოუწოდებს ხელისუფლებას: გამოავლინოს და სათანადოდ დასაჯოს 5-6 ივლისის მოვლენების დროს დანაშაულებრივი ქმედებების უშუალო ჩამდენები და ორგანიზატორები. სწრაფად და ეფექტიანად გამოიძიოს ჟურნალისტების წინააღმდეგ მომრავლებული თავდასხმები, მათ პროფესიულ საქმიანობაში უკანონო ხელშეშლის ფაქტები და სისხლის სამართლებრივ პასუხისგებაში მისცეს შესაბამისი პირები; შეწყდეს კრიტიკული მედიასაშუალებების მიმართ მიმდინარე პოლიტიკურად მოტივირებული გამოძიებები და სასამართლო პროცესები. ციხიდან გათავისუფლდეს ტელეკომპანია „მთავარი არხის“ დირექტორი და დამფუძნებელი ნიკა გვარამია; გამოიძიოს მედიის წარმომადგენლების მასობრივი უკანონო ფარული მოსმენა-მიყურადების და თვალთვალის საქმეები. სრულად...  წყარო: mediacoalition.ge