თბილისი. მედიის ადვოკატირების კოალიციის წევრი ორგანიზაციები საქართველოს პრეზიდენტს თხოვნით მიმართავენ, განიხილოს და დადებითად გადაწყვიტოს „მთავარი არხის“ გენერალური დირექტორის ნიკა გვარამიას შეწყალების საკითხი. „მთავარი არხის” დამფუძნებლის და გენერალური დირექტორის დაპატიმრებით რეალური საფრთხე შეექმნა ჩვენი ქვეყნის ევროპულ მომავალს. სამართლიანი კრიტიკა ნიკა გვარამიას დაკავებასთან დაკავშირებით ევროპარლამენტის 2022 წლის 8 ივნისის რეზოლუციაშიც „მედიის თავისუფლებისა და ჟურნალისტთა უსაფრთხოების დარღვევების შესახებ“ აისახა, რომლითაც ევროპარლამენტმა მოუწოდებს საქართველოს ხელისუფლებას, მტკიცედ დაიცვას დემოკრატიის უმაღლესი სტანდარტები, ისეთი მიმართულებებით, როგორიცაა კანონის უზენაესობა, სასამართლო სისტემის დამოუკიდებლობა, სამართლიანი სასამართლო პროცესები და ფუნდამენტური თავისუფლებები, მათ შორის, მედიის თავისუფლების სფეროში. მოგმართავთ, როგორც საქართველოს სახელმწიფოს მეთაურს, შეიწყალოთ ნიკა გვარამია და ამ გზით შეასრულოთ საკუთარი როლი ქვეყანაში მიმდინარე პოლიტიკური კრიზისის განმუხტვასა და საქართველოს ევროპის კავშირში ინტეგრაციის პროცესში. თქვენი უფლებამოსილების გამოყენებით დაამტკიცოთ ევროკავშირის წევრობის რეალური სურვილი და მზაობა ქვეყანამ გადალახოს არსებული დაბრკოლებები“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გიზიარებთ ეკატერინე წურწუმიას ბლოგპოსტს: ქალთა მიმართ ოჯახში ძალადობის პრევენციისათვის ეკონომიკური გაძლიერების მნიშვნელობაზე. „ძალადობისგან ქალების თავის დაღწევის გზებზე მსჯელობისას მაიამის უნივერსიტეტის სამართლის სკოლის პროფესორი დონა ქოკერი მის სტატიაში - “მსხვერპლი ქალებისთვის ძალაუფლების მინიჭება: კანონი, მატერიალური რესურსები და შავკანიანი ღარიბი ქალები” ავითარებს მოსაზრებას, რომ ოჯახში ძალადობის ნებისმიერი ინტერვენცია უნდა დაექვემდებაროს ე.წ. მატერიალური რესურსების ტესტს, რაც არ უნდა გავიგოთ პირდაპირი მნიშვნელობით როგორც ტესტი, არამედ შესაბამისი კანონებისა და პოლიტიკების ანალიზის მეთოდი, სადაც ოჯახში ძალადობის წინააღმდეგ მიმართულ კანონებსა თუ პოლიტიკებში ეკონომიკური ასპექტების ჩაშენება მოხდება, როგორიცაა, მაგალითად მიზნობრივი ბიუჯეტირება. ავტორი აღნიშნავს, რომ პრიორიტეტი უნდა მიენიჭოს ისეთ კანონებსა და პოლიტიკებს, რომლებიც გაზრდიან ქალებისთვის წვდომას მატერიალურ რესურსებზე. უფრო მეტიც, იმის გამო, რომ ქალების გარემოებები და მათი სოციო-ეკონომიკური მდგომარეობა განსხვავდება ერთმანეთისგან, სტანდარტის დადგენისას საზომი უნდა იყვნენ ყველაზე ღარიბი ქალები. სწორედ ქალთა ეკონომიკური უთანასწორობა ზღუდავს ქალებს იპოვონ გამოსავალი ოჯახური ძალადობიდან. ზოგადად ძალადობის მსხვერპლ ქალებს, როგორც ღარიბ ადამიანებს, როგორც წესი შეზღუდული აქვთ წვდომა სხვა დანარჩენ სიკეთეებზეც“. სრულად... წყარო: socialjustice.org.ge

თბილისი. სოციალური სამართლიანობის ცენტრის ინფორმაციით, მიმდინარე წელს უძრავი ქონებიდან და საცხოვრისებიდან გამოსახლების სტატისტიკური მონაცემები წინა წლებთან შედარებით უპრეცედენტოდაა გაზრდილი. გაზრდილია აღსრულების შედეგად გამოთავისუფლებული ქონების საერთო ღირებულების მონაცემიც. ორგანიზაციის შეფასებით, ეს დიდი ალბათობით, იძულებით გამოსახლებებზე მორატორიუმის რეჟიმის გაუქმებას უკავშირდება, რომელიც ძალაში 2020 წლის მარტიდან 2022 წლის 1 მარტამდე იყო. გამოსახლებაზე მორატორიუმის შეწყვეტის გადაწყვეტილებამ ასობით შინამეურნეობა ქუჩაში, უსახლკაროდ დარჩენის რისკის ქვეშ დააყენა. სრულად... წყარო: socialjustice.org.ge

თბილისი. სოციალური სამართლიანობის ცენტრი აქვეყნებს ახალი კვლევას „ნარკოპოლიტიკა საქართველოში - 2021 წლის ტენდენციები“. ორგანიზაციის შეფასებით, ხელისუფლებამ ამ დრომდე ვერ უზრუნველყო ნარკოპოლიტიკის ჰუმანური გარდაქმნა. მეტიც, 2021 წელს საქართველოს შსს-ს მიერ ინიცირებული კანონპროექტის მხარდაჭერით, საქართველოს პარლამენტმა გაამკაცრა სასჯელები ნარკოტიკული საშუალებების გასაღებისთვის, რაც კიდევ უფრო გვაშორებს სასჯელის ერთ-ერთ მნიშვნელოვან - დამნაშავის რესოციალიზაციის მიზანს. „ზოგადად, ქართული ნარკოპოლიტიკა წლებია ექცევა ადგილობრივი თუ საერთაშორისო ორგანიზაციების ყურადღების ფოკუსში, ვინაიდან ის განსაკუთრებული რეპრესიულობით ხასიათდება. ბოლო 10 წლის განმავლობაში პატიმრების 20-40% ნარკოტიკულ დანაშაულებზე არიან მსჯავრდებულები“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) პარტნიორ ორგანიზაციასთან, ადამიანის უფლებათა დაცვის ევროპულ ცენტრთან ერთად, საოკუპაციო ხაზთან მდებარე სოფელ დვანში მცხოვრები 19 მოქალაქის სახელით ადამიანის უფლებათა ევროპულ სასამართლოში რუსეთის ფედერაციის წინააღმდეგ დავას აგრძელებს. „საქმე შეეხება 2013 წლის სექტემბერ-ოქტომბერში სოფელ დვანში რუსეთის ფედერაციის კონტროლირებადი „მესაზღვრეების“ მიერ, ე.წ საზღვრის მონიშვნის მიზნით, მავთულხლართების გავლებას, რამაც საოკუპაციო ხაზი რამდენიმე ასეული მეტრით გადმოწია. აღნიშნულის შედეგად დვანში მცხოვრები 50-მდე ოჯახის სასოფლო-სამეურნეო მიწები ოკუპანტი ძალის კონტროლირებად ტერიტორიაზე მოექცა. ამ საქმესთან კავშირში, უკიდურესად შემაშფოთებელია, რომ დღეის მდგომარეობით, რუსეთის ფედერაცია კვლავაც აგრძელებს მავთულხლართების გავლებას საქართველოს ტერიტორიაზე, რაც ზრდის დაზარალებულ მოქალაქეთა რიცხვს, არღვევს საერთაშორისო სამართლის ფუნდამენტურ ნორმებს და იწვევს ადამიანის  უფლებათა განგრძობად დარღვევებს“. სრულად...  წყარო: gyla.ge

თბილისი. 14 ივნისს, საქართველოში შეზღუდული შესაძლებლობის მქონე პირთა უფლებების დაცვის დღე აღნიშნება. ამ დღის მიზანია შშმ პირთა შესახებ საზოგადოების ცნობიერების ამაღლება და ამ პირთა უფლებრივ მდგომარეობაზე კიდევ ერთხელ ყურადღების გამახვილება. საქართველოს სახალხო დამცველის თანახმად, მიუხედავად იმისა, რომ გასულ პერიოდში სახელმწიფოს მიერ გარკვეული პოზიტიური ნაბიჯები გადაიდგა, ქვეყანაში ჯერ კიდევ პრობლემურია შშმ პირთა უფლებების სრული და ეფექტიანი დაცვა. ომბუდსმენი მოუწოდებს სახელმწიფოს, გადადგას ქმედითი ნაბიჯები ქვეყანაში შეზღუდული შესაძლებლობის მქონე პირთა უფლებების სათანადოდ რეალიზების, საზოგადოებრივი ცნობიერების ამაღლებისა და ინკლუზიური საზოგადოების ჩამოყალიბების უზრუნველსაყოფად. სრულად... წყარო: ombudsman.ge

თბილისი. 14 ივნისი საქართველოში შეზღუდული შესაძლებლობების მქონე პირთა უფლებების დაცვის დღეა. სოციალური სამართლიანობის ცენტრი წარმოგიდგენთ ანალიტიკურ დოკუმენტს - საქართველოს ფსიქიკური ჯანმრთელობის ახალი სტრატეგია - მნიშვნელოვანი რეფორმების წინაპირობა? დოკუმენტის მიზანია, შეაფასოს ფსიქიკური ჯანმრთელობის ახალი სტრატეგიის  შინაარსი, ასევე, აღნიშნული ინსტრუმენტით სახელმწიფოს მიერ აღებული ვალდებულებების არსი და გასცეს პასუხი კითხვას, თუ რამდენად შეიძლება იყოს სტრატეგიის დოკუმენტი ფსიქიკური ჯანმრთელობის სფეროში მნიშვნელოვანი გარდაქმნების განხორციელების წინაპირობა. სრულად... წყარო: socialjustice.org.ge

თბილისი. ორგანიზაცია „ კივიტას გეორგიკა“ გიზიარებთ ბავშვზე ფიზიკური და ემოციური ძალადობის ნიშნების შესახებ ინფორმაციას. ინფოგრაფიკა მომზადებულია პროექტის „საქართველოსა და სომხეთში მშობლების მიგრაციით გამოწვეული გავლენის შემცირების“ ფარგლებში; პროექტი ხორციელდება შვეიცარიის განვითარებისა და თანამშრომლობის სააგენტოს (SDC) ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრის (CSRDG) ინფორმაციით, საქართველოს პრო ბონოქსელის დახმარებით ბიზნეს კომპანიებმა მოახერხეს CSR პროგრამებში ჩაერთოთ პრო ბონო სერვისები და სამოქალაქო სექტორთან თანამშრომლობით მნიშვნელოვანი სოციალური ცვლილებებისათვის მიეღწიათ. ორგანიზაციის ცნობით, ქსელის მუშაობის წლებში საზოგადოებრივი ორგანიზაციებისათვის 188 პრობლემა გადაიჭრა. პრო ბონო ქსელი დაფუძნდა CSRDG-ის მიერ და მის საქმიანობას მხარს უჭერს ევროკავშირი და კონრად ადენაუერის ფონდი (KAS). სრულად... წყარო: ორგანიზაციის გვერდი სოციალურ ქსელში

იმერეთი. ქუთაისის კულტურულ-ახალგაზრდულ ცენტრში საინფორმაციო შეხვედრა გაიმართა ქალთა ქონებრივი უფლებების შესახებ. „შეხვედრას ესწრებოდნენ ცენტრის 60+ ასაკის ქალთა კლუბის წევრები. „საფარის“ იურისტი იმერეთის რეგიონში, თეონა გოგლიჩაძე მათ ესაუბრა მემკვიდრეობის უფლებისა და მისი განხორციელების შესაძლებლობებზე. გარდა კანონმდებლობისა, შეხვედრაზე განიხილეს მემკვიდრეობის მიღების პრაქტიკა ჩვენს საზოგადოებაში - როცა, ჩვეულებრივ, ოჯახის ქონების მემკვიდრედ ბიჭი შვილები ითვლებიან. ასევე, ტრადიციები და ის კულტურული გამოწვევები, რის გამოც ქალებს ქონების ფლობისა და მემკვიდრეობის მიღების უფლება ეზღუდებათ“. სრულად... წყარო: sapari.ge

თბილისი. „უფლებები საქართველოს“ დახმარებით, ირანის მოქალაქემ თბილისის საქალაქო სასამართლოში დავა მოიგო. სასამართლოში ბენეფიციარის ინტერესებს იცავდა „უფლებები საქართველოს“ იურისტი მარიამ მაღრაძე IOM-ის პროექტის - „COVID-19“ და მიგრანტების საჭიროებები სამხრეთ კავკასიაში“ ფარგლებში, რომელიც ხორციელდება მოსახლეობის, ლტოლვილთა და მიგრაციის ბიუროს მხარდაჭერით. თუ ხართ მიგრანტი და მიგაჩნიათ, რომ საჭიროებთ იურიდიულ დახმარებას, დაუკავშირდით ორგანიზაციას: +995 577 28 22 77 სრულად... წყარო: ორგანიზაციის გვერდი სოციალურ ქსელში

სამეგრელო. საქართველოს ახალგაზრდა იურისტთა ასოციაციის (საია) ზუგდიდის ოფისი იცავდა არასრულწლოვანის ინტერესებს სისხლის სამართლის საქმეში, რომელიც ეხებოდა 16 წლის ასაკს მიუღწეველი პირის სხეულში სექსუალური ხასიათის შეღწევის ფაქტს (ორ ეპიზოდს). ორგანიზაციის ცნობით, ქუთაისის სააპელაციო სასამართლოს სისხლის სამართლის საქმეთა პალატამ, განიხილა მხარეთა საჩივრები და ცვლილება შეიტანა ზუგდიდის რაიონული სასამართლოს განაჩენში. საბოლოოდ, სააპელაციო სასამართლომ ბრალდებული დამნაშავედ ცნო საქართველოს სსკ-ის 140-ე მუხლის პირველი ნაწილით გათვალისწინებული დანაშაულის ჩადენაში და სასჯელის სახედ და ზომად განუსაზღვრა 07 წლის ვადით თავისუფლების აღკვეთა. სააპელაციო სასამართლოს გადაწყვეტილება მსჯავრდებულმა გაასაჩივრა უზენაეს სასამართლოშიც, თუმცა, საჩივარი დაუშვებლად იქნა ცნობილი და სააპელაციო სასამართლოს მიერ გამოტანილი განაჩენი დარჩა უცვლელი. სრულად... წყარო: gyla.ge

თბილისი. პარტნიორობა ადამიანის უფლებებისთვის ინფორმაციით, ორგანიზაციამ გაეროს ბავშვის უფლებათა კომიტეტში პირველი დავა მოიგო. „აღსანიშნავია, რომ ეს არის გაეროს ბავშვის უფლებათა კომიტეტის პირველი გადაწყვეტილება ბავშვის სხეულებრივ დასჯასთან დაკავშირებით, სადაც კომიტეტმა სახელმწიფოს დარღვევა დაუდგინა. კომიტეტმა დაადგინა, რომ სახელმწიფომ არ აიღო პასუხისმგებლობა იმის შესახებ, რომ ბავშვმა დაზიანებები საჯარო ბაღში ყოფნის პერიოდში მიიღო, ამიტომ სახელმწიფოს პასუხისმგებლობა მოექცა გაეროს ბავშვის უფლებათა კონვენციის მე-19 მუხლის ფარგლებში“. სრულად... წყარო: phr.ge

თბილისი. ღირსეული შრომის პლატფორმა სოლიდარობას უცხადებს ღირსეული ანაზღაურებისთვის და შრომითი პირობებისთვის ექთნებისა და სანიტრების მიერ დაწყებულ პროფკავშირულ ბრძოლას, რომლის დაშლასაც კლინიკის ადმინისტრაციები ცდილობენ. „არსებული უმძიმესი შრომითი პირობებისა და დაბალი ანაზღაურების ფონზე, სამედიცინო დაწესებულებები ხელს უშლიან სამუშაო ადგილზე პროფესიული კავშირების საქმიანობას, დევნიან და აშინებენ იმ თანამშრომლებს, რომლებიც ახორციელებენ პროფკავშირულ საქმიანობას ან/და სურთ პროფკავშირში გაწევრიანება“. სრულად...  წყარო: socialjustice.org.ge

თბილისი. საქართველოს სამოქალაქო საზოგადოების ორგანიზაციების ნაწილი მოუწოდებს პრეზიდენტს ვეტო დაადოს ფარული მიყურადების გაუარესებულ კანონმდებლობას. „7 ივნისს საქართველოს პარლამენტმა მხარი დაუჭირა საკანონმდებლო ცვლილებებს, რომლის თანახმად მნიშვნელოვნად უარესდება ფარული საგამოძიებო მოქმედებების დროს ადამიანის უფლებათა დაცვის უზრუნველყოფის სტანდარტი. მიღებული კანონი არ შეესაბამება ადამიანის უფლებათა დაცვის საერთაშორისო ნორმებს და ადამიანის უფლებათა დაცვის ევროპული სასამართლოს პრაქტიკას. მიღებული კანონი აზრს უკარგავს იმ დადებით ცვლილებებს, რომელიც კანონმდებლობაში 2014 წელს განხორციელდა სამოქალაქო საზოგადოებისა და ევროპის საბჭოს ექსპერტების აქტიური ჩართულობით. ყოველივე ზემოაღნიშნულიდან გამომდინარე, მოვუწოდებთ საქართველოს პრეზიდენტს გამოიყენოს კონსტიტუციით მინიჭებული უფლებამოსილება და ვეტო დაადოს შესაბამის საკანონმდებლო ცვლილებებს და მოტივირებული შენიშვნებით დაუბრუნოს ის პარლამენტს“. სრულად... წყარო: idfi.ge

თბილისი. „საერთაშორისო გამჭვირვალობა - საქართველომ“ შეისწავლა ტელეკომპანია „რუსთავი 2-ის“ ყოფილი დირექტორისა და  „მთავარი არხის“ დამფუძნებლის ნიკა გვარამიას მიმართ გამოტანილი გამამტყუნებელი განაჩენი, რომელიც ორგანიზაციის შეფასებით, ვერ პასუხობს კანონიერების, დასაბუთებულობისა და სამართლიანობის კრიტერიუმებს. „გაეცანით 5 მიზეზს, თუ რატომ არის პატიმრობაში მყოფი ნიკა გვარამიას განაჩენი დაუსაბუთებელი“. სრულად... წყარო: ორგანიზაციის გვერდი სოციალურ ქსელში

ამერიკა. საქართველოს სახალხო დამცველმა ნინო ლომჯარიამ აშშ-ს ქალაქ ნიუ-იორკში ომბუდსმენთა საერთაშორისო ინსტიტუტის (IOI) საერთაშორისო მმართველი საბჭოს ყოველწლიურ შეხვედრაში და ასევე, IOI-ის რეგიონულ დირექტორთა შეხვედრაში მიიღო მონაწილეობა. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია გაეცნო ე.წ რუსთავი 2-ის საქმეზე ნიკა გვარამიას, კახაბერ დამენიას და ზურა იაშვილის მიმართ გამოტანილ განაჩენს. მოცემულ საქმეზე საია ახორციელებდა სასამართლო სხდომების მონიტორინგს.  საიას შეფასებით, სასამართლოში საქმის განხილვის სხვადასხვა ეტაპზე არსებულ კითხვებს, რაც ბრალდებულთა მიმართ ბრალის წარდგენის, სასამართლო განხილვის, გამამტყუნებელი განაჩენის გამოტანის სტანდარტებთან და მოსამართლის დამოუკიდებლობასა და მიუკერძოებლობასთან მიმართებით არსებობდა, სასამართლო არც განაჩენში პასუხობს, რის გამოც ორგანიზაციას მიაჩნია, რომ განაჩენი დაუსაბუთებელია - „ამასთანავე, სასამართლო სხდომის დარბაზში გამოკვლეული არაერთი მტკიცებულება გვაძლევს იმის თქმის საფუძველს, რომ ქმედებაში არ იყო დანაშაულის ნიშნები“. სრულად...  წყარო: www.gyla.ge

გურია. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, ოზურგეთის მერად ავთანდილ თალაკვაძის არჩევის შემდეგ რეორგანიზაციად შეფუთული თანამშრომელთა სამსახურიდან გათავისუფლების პროცესი დაიწყო, რამაც, საბოლოოდ, საკადრო წმენდის სახე მიიღო. ამ ეტაპზე, მერიის სამსახურებიდან 31 თანამშრომელი გათავისუფლდა, ხოლო ათეულობით ადამიანი გათავისუფლების შიშით აგრძელებს მუშაობას. გათავისუფლებულთა ნაწილის ინტერესებს სასამართლოში „სამართლიანი არჩევნები” დაიცავს. ვრცლად ოზურგეთის მერიაში მიმდინარე პროცესებზე... წყარო: isfed.ge

აჭარა. ბათუმის შოთა რუსთაველის სახელმწიფო უნივერსიტეტში, საერთაშორისო კონფერენციის „ადრეული განათლება და ზრუნვა“ ფარგლებში, გაეროს ბავშვთა ფონდის წარმომადგენელმა საქართველოში, ღასან ხალილმა გამართა საჯარო ლექცია „ბავშვის უფლებები - იმპერატივი საერთაშორისო დღის წესრიგში“. სრულად... წყარო: ორგანიზაციის გვერდი სოციალურ ქსელში

აჭარა. სოციალური სამართლიანობის ცენტრი ეხმიანება აჭარის ა/რ მთავრობის გადაწყვეტილებას საქართველოს ტერიტორიაზე ყველაზე დიდი არაფორმალური დასახლების - „ოცნების ქალაქის“ - მაცხოვრებლებისთვის ბინების გადაცემის კრიტერიუმების განსაზღვრის საკითხს. ორგანიზაცია მოუწოდებს ხელისუფლებას, უზრუნველყოს პროცესის გამჭვირვალობა, მოსახლეობის ინფორმირება განსახლების პროცესის შესახებ და ამ პროცესის იმგვარად წარმართვა, რომ გათვალისწინებული იყოს ყველა მოსახლის მოწყვლადობა და საჭიროებები. „მოსახლეობა მიიჩნევს, რომ კრიტერიუმები, რომლის შესახებაც მედიასაშუალებებიდან შეიტყვეს, არ არის ცხადი, განმარტებას მოითხოვს და არ საუბრობს მათ საჭიროებებზე, ვინც საცხოვრისით დაუკმაყოფილებელი შეიძლება დარჩეს“. სრულად... წყარო: socialjustice.org.ge

იმერეთი. სოციალური სამართლიანობის ცენტრის ინფორმაციით, ჭიათურის სოფელ ითხვისში, სადაც მარტის ბოლოს მოსახლეობის სახლები დაინგრა, დაზარალებული ოჯახების კითხვებს სახელმწიფო კვლავ უპასუხოდ ტოვებს. „11 აპრილს და 4 მაისს სოფლის მოსახლეობამ, მხარდამჭერ ორგანიზაციებთან ერთად, სახელმწიფო უწყებებს ორჯერ მიმართა ოფიციალური განცხადებით, თუმცა 27 მაისს მიღებული წერილი განცხადებებში დასმული შეკითხვების უმრავლესობას პასუხის გარეშე ტოვებს. სოფლის მოსახლეობა მდგომარეობის შესასწავლად ჩამოყალიბებული სპეციალური კომისიის მეთოდოლოგიის, შემადგენლობის და, ასეთის არსებობის შემთხვევაში, მათი დასკვნების გასაჯაროებას ითხოვდა. ამასთან, მოსახლეობა ითხოვდა ინფორმაციას კომპენსაციის დაანგარიშების და გაცემის წესის შესახებ და სახელმწიფო უწყებებს სთხოვდა განემარტათ რამდენად უსაფრთხოა სოფელი იქ დარჩენილი ოჯახებისთვის. სამწუხაროდ ამ საკითხების შესახებ სოფლის მოსახლეობას ხელშესახები ახალი ინფორმაცია მომხდარიდან ორი თვის მანძილზე არ მიუღია“. სრულად... წყარო: socialjustice.org.ge