ვარშავა. პარტნიორობა ადამიანის უფლებებისთვის (PHR) ინფორმაციით, თავისუფალი უნივერსიტეტის სტუდენტებმა ODIHR-ის მიერ ორგანიზებული, პირველი იმიტირებული სასამართლო პროცესი მოიგეს შეზღუდული შესაძლებლობის მქონე პირთა უფლებებზე. ფინალში ქართველებმა კალიფორნიის ბერკლის უნივერსიტეტის სტუდენტები დაამარცხეს. ქართულ გუნდს მენტორობა გაუწია PHR-ის აღმასრულებელმა დირექტორმა, ანა არგანაშვილმა გაუწია. სრულად... წყარო: www.osce.org

თბილისი. საქართველოს სახალხო დამცველი ეხმიანება 28 ივნისიდან მიმდინარე პრაიდის კვირეულს და ხაზს უსვამს მის ფარგლებში დაგეგმილი ღონისძიებების მშვიდობიანად, ძალადობისგან თავისუფალ გარემოში ჩატარების მნიშვნელობას, როგორც ლგბტ+ თემის და მათი მხარდამჭერების მიერ უფლებების სათანადო რეალიზების, ასევე, ქვეყანაში დემოკრატიული პროცესების წარმართვის მხრივ. სახალხო დამცველი მოუწოდებს საქართველოს შინაგან საქმეთა მინისტრს: •    შესაძლო ძალადობრივი ქმედებების პრევენციის მიზნით, გაატაროს დროული და ეფექტიანი ღონისძიებები, რათა თბილისი პრაიდის ორგანიზატორებსა და მონაწილეებს არ შეექმნათ არანაირი საფრთხე ძალადობრივი ჯგუფებისგან; •    უზრუნველყოს „პრაიდის კვირეულში“ დაგეგმილი ყველა ღონისძიების უსაფრთხოდ და შეუფერხებლად ჩატარება. გაწიოს შესაბამისი მუშაობა, „თბილისი პრაიდის“ ოფისის მიმდებარე ტერიტორიის დაცვის მიზნით; •    თბილისი პრაიდის კვირეულის ჩატარებასთან დაკავშირებით განხორციელებული სავარაუდო მუქარისა და ძალადობრივი ქმედებისკენ მოწოდების ფაქტზე 2022 წლის 6 ივნისს დაწყებული გამოძიება ჩაატაროს ეფექტიანად; •    ყველა შესაძლო კანონდარღვევაზე დაუყოვნებლივ მოახდინოს ეფექტიანი რეაგირება. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაციამ და საერთაშორისო გამჭვირვალობა-საქართველო-მ 2021 წელს იურისტებისა და სამოქალაქო აქტივისტების შესაძლო უკანონო  ფარული მოსმენა-მიყურადების საქმეზე ევროპულ სასამართლოში საჩივარი წარადგინეს. ორგანიზაციები მიიჩნევენ, რომ ამ საქმის წარმატებული წარმოება მნიშვნელოვან ცვლილებებს გამოიწვევს ქართულ კანონმდებლობაში და შექმნის ძლიერ გარანტიებს ფარული მოსმენა-მიყურადებისგან დაცვის კუთხით, რაც, ხელს შეუწყობს ქვეყანაში სამართლებრივი სახელმწიფოს პრინციპის განმტკიცებას და შეასუსტებს პოლიციურ რეჟიმს, რომელიც უკვე წლებია სწორედ ფარული მოსმენების საშუალებით ყოველდღიურად არღვევს მრავალი ადამიანის უფლებას. სრულად... წყარო: gyla.ge

თბილისი. კოალიცია თანასწორობისთვის ეხმიანება „თბილისი პრაიდის” განცხადებას, სადაც ორგანიზაცია ფესტივალის ღონისძიებების უსაფრთხოების გარანტიას ითხოვს. „დახურულ სივრცეებში დაგეგმილი პრაიდის კვირეულის ღონისძიებების დარბევით ულტრამემარჯვენე ექსტრემისტული ჯგუფები კვირეულის დაანონსებიდან მოყოლებული იმუქრებიან. ამ პირობებში მნიშვნელოვანია, პოლიციამ ზედმიწევნით უზრუნველყოს „თბილისი პრაიდის” მიერ დაგეგმილი ღონისძიებებისა და მათი მონაწილეების უსაფრთხოება და ამ მიზნით ეფექტიანი და რეალური პრევენციული ზომების მიღება“. სრულად... წყარო: gyla.ge

თბილისი. 27 ივნისს, სოციალური სამართლიანობის ცენტრმა გამართა დისკუსია - „სათანადო საცხოვრებლის უფლება და მასთან დაკავშირებული გამოწვევები საქართველოში“. ღონისძიების მიზანი იყო საქართველოში საცხოვრისის პოლიტიკის მიმართულებით არსებული გამოწვევების შეფასება და ამ მიმართულებით შესაძლო სამომავლო პერსპექტივების დანახვა. სრულად... წყარო: socialjustice.org.ge

რეგიონები. 24 მაისიდან 13 ივნისის ჩათვლით, სახალხო დამცველის აპარატმა საქართველოს სხვადასხვა რეგიონებში მცხოვრებ მოსწავლეებთან შეხვედრები გამართა. პროექტის მიზანი იყო ბავშვებისთვის საკუთარი უფლებებისა და სახალხო დამცველის მანდატის შესახებ ცნობიერების ამაღლება, ასევე პოლიციელებთან ურთიერთობის დროს საკუთარი უფლებების შესახებ ინფორმაციის მიწოდება. სრულად... წყარო: ombudsman.ge

იმერეთი. საერთაშორისო გამჭვირვალობა - საქართველო ზესტაფონის მუნიციპალიტეტის მერიის ა(ა)იპ „ზესტაფონის დასუფთავების და კეთილმოწყობის სერვის ცენტრი“, მაია კახნიაშვილის თანამდებობაზე აღდგენის და იძულებითი განაცდურის ანაზღაურების შესახებ, სასამართლო გადაწყვეტილებას არ ასრულებს, რაც წარმოადგენს სისხლის სამართლით დასჯად ქმედებას და საფრთხეს უქმნის საქართველოს კონსტიტუციით გარანტირებულ სამართლიანი სასამართლოს უფლებას. „საერთაშორისო გამჭვირვალობა - საქართველო” მოუწოდებს: ა(ა)იპ „ზესტაფონის დასუფთავების და კეთილმოწყობის სერვის ცენტრს" - აღასრულოს სასამართლო გადაწყვეტილება, დაუყოვნებლივ აღადგინოს განთავისუფლებული პირი სამსახურში და აუნაზღაუროს იძულებითი განაცდური. საქართველოს პროკურატურას - აწარმოოს დროული და ეფექტური გამოძიება და შეისწავლოს საქმეში სავარაუდო დანაშაულის ნიშნების არსებობა. აღსრულების ეროვნულ ბიუროს - შეასრულოს მასზე კანონით დაკისრებული ვალდებულება და უზრუნველყოს სასამართლო გადაწყვეტილების შეუფერხებელი აღსრულება. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი მიესალმება „სოციალური პაკეტის განსაზღვრის შესახებ“ საქართველოს მთავრობის დადგენილებაში ცვლილების შეტანას, რომლის შედეგად შეზღუდული შესაძლებლობის მქონე პირებს საჯარო საქმიანობის განხორციელების პერიოდში სოციალური პაკეტის მიღება აღარ შეეზღუდებათ. სრულად... წყარო: www.ombudsman.ge

თბილისი. თბილისის ადამიანის უფლებათა სახლი ეხმაურება „თბილისი პრაიდის“ გუშინდელ განცხადებას და სრულად იზიარებს ორგანიზაციის მოთხოვნებს ხელისუფლებისადმი. „წელს, „თბილისი პრაიდი“ საზოგადოების პოლარიზაციისა და ევროინტეგრაციის პროცესში დაძაბულობის კერების თავიდან არიდების მიზნით უარს ამბობს პრაიდ კვირეულის ფარგლებში „ღირსების მარშის“ ჩატარებაზე. საქართველოს ქვიარ თემი და მათი მხარდამჭერები უარს ამბობენ შეკრების კონსტიტუციური უფლებით სარგებლობაზე, რადგან აგრესიული, ჰომოფობიური ჯგუფების მობილიზაცია მათთვის კვლავ, ისევე როგორც შარშან, პოტენციურ საფრთხეს წარმოადგენს. წლევანდელი პრაიდ კვირეული დახურული ღონისძიებებისგან შედგება. მიუხედავად ამისა, მოძალადე, პრო-რუსული ჯგუფები კვლავ ღიად აცხადებენ, რომ ხელს შეუშლიან ფესტივალის ორგანიზატორებს და ჩაშლიან მათ ღონისძიებებს.  კრიტიკულად მნიშვნელოვანია, რომ სახელმწიფომ გამოავლინოს პოლიტიკური ნება, დააკავოს როგორც შარშანდელი, ისევე წლევანდელი ძალადობის ორგანიზატორები და დაიცვას ფესტივალი. შემაშფოთებელია, რომ დაპირისპირების თავიდან ასარიდებლად მშვიდობიან ჯგუფებს უწევთ თავიანთი უფლებით სარგებლობაზე უარის თქმა, ხოლო მოძალადეები კვლავ ღია, აგრესიული ტექსტებით იმუქრებიან“. სრულად... წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიციის ინფორმაციით, 2022 წლის 28 ივნისიდან 2 ივლისამდე „თბილისი პრაიდის“ ორგანიზებით, „პრაიდის კვირეული“ იგეგმება, 2021 წლის მძიმე გამოცდილების ფონზე, უმცირესობებმა უარი თქვეს „ღირსების მარშის“ გამართვაზე. კოალიციის გადმოცემით, ღონისძიებების გამართვას კვლავაც საფრთხეს უქმნიან ძალადობრივი, ჰომოფობიური ჯგუფები - ისევ  საჯაროდ მოუწოდებენ საზოგადოებას ძალადობისკენ. მედიის ადვოკატირების კოალიცია მიმართავს შინაგან საქმეთა სამინისტროს თავიდან აირიდოს  2021 წელს დაშვებული შეცდომები, მიიღოს ეფექტიანი  ზომები, რათა: უზრუნველყოს თბილისი პრაიდის აქტივისტთა უსაფრთხოება; დაიცვას მედიის წარმომადგენლები ჟურნალისტურ საქმიანობაში უკანონო ხელის შეშლისგან; ჰქონდეს დროული და შესაბამისი სამართლებრივი რეაგირება ძალადობრივ მოწოდებებსა და შუღლის გაღვივების ყველა მცდელობაზე. სრულად... წყარო: ორგანიზაციის გვერდი სოციალურ ქსელში

თბილისი. ტოლერანტობისა და მრავალფეროვნების ინსტიტუტი (TDI) განცხადებას ავრცელებს. „საქართველო უმნიშვნელოვანეს გზაგასაყარზეა, სადაც არჩევანი მხოლოდ თავისუფლებასა და ავტორიტარიზმს შორის არის. ქვეყნის ევროინტეგრაციის ისტორიულ მომენტში, საქართველოს ხელისუფლებამ უღალატა ქართველი ხალხის ურყევ ნებას, კონსტიტუციას და თავისუფლების იდეას. ოლიგარქიული მმართველობითა და ავტორიტარული მისწრაფებებით, დემოკრატიული ინსტიტუტებისა და ფასეულობების მოშლით, ადამიანის უფლებების უგულვებელყოფით, ოპოზიციის, მედიისა და სამოქალაქო საზოგადოების დევნით, უმცირესობებზე ძალადობით, გაუქმებული მართლმსაჯულებით, სიძულვილის მუდმივი პროპაგანდითა და დასავლელი მეგობრების გამუდმებული ობსტრუქციით, ხელისუფლებამ საქართველო თავის ევროპულ იდენტობას დააშორა და დაუახლოვა რუსეთს. TDI-ს მიზანი ყოველთვის იყო ადამიანისა და ქვეყნის ღირსების, თავისუფლებისა და თანასწორობის დაცვა, ამ ღირებულებებზე დაფუძნებული სახელმწიფოს მშენებლობაში წვლილის შეტანა. მიგვაჩნია, რომ ახლა თითოეული მოქალაქის, პოლიტიკოსის, მედიის, საჯარო მოხელისა და თავისუფლებისმოყვარე ადამიანის, მთელი სამოქალაქო საზოგადოების უპირველესი ვალია, აქტიურად დაიცვას ქართველი ხალხის კონსტიტუციით გამოხატული ნება, დაიცვას ევროპული დემოკრატიული საქართველო და არ დაუშვას რუსულ ორბიტაზე ჩვენი დაბრუნება“, ნათქვამია ორგანიზაციის განცხადებაში. სრულად... წყარო: tdi.ge ფოტო: ნეტგაზეთი

თბილისი. მედიის ადვოკატირების კოალიცია ეხმიანება გავრცელებულ ინფორმაციას “TV პირველის” წარმომადგენლებისთვის ხელის შეშლის შესახებ. 2022 წლის 24 ივნისს თბილისში, დოლიძის ქუჩაზე ჟურნალისტ ნანუკა ქაჯაიას და ოპერატორ პაპუნა ხაჩიძეს თავს დაესხნენ. გავრცელებული კადრებიდან ჩანს, რომ გადამღებ ჯგუფს აგრესიული პირები ხელს უშლიან ჟურნალისტურ საქმიანობაში.  გუშინ, 2022 წლის 23 ივნისს “TV პირველის“ კიდევ ერთმა წარმომადგენელმა, ჟურნალისტმა ნატა ქაჯაიამ გაავრცელა ინფორმაცია, რომ საქართველოს პარლამენტის წევრის მამუკა მდინარაძის მხრიდან დისკრიმინაციის და აგრესიული დამოკიდებულების მსხვერპლი გახდა. ჟურნალისტის ინფორმაციით, პარლამენტის წევრმა საჯარო შეხვედრისას მის მიმართ არაერთხელ გამოიყენა არაკორექტული ლექსიკა, ისევე როგორც შეურაცხმყოფელი, პატივისა და ღირსების შემლახველი, ასევე დისკრიმინაციული ფრაზები. კოალიცია მოუწოდებს სპეციალურ საგამოძიებო სამსახურს, დაუყოვნებლივ დაიწყოს გამოძიება დოლიძის ქუჩაზე  “TV პირველის”  გადამღებ ჯგუფზე თავდასხმის ფაქტზე. კოალიცია მოუწოდებს საქართველოს პარლამენტს ეთიკის საბჭოს ფარგლებში შეისწავლოს პარლამენტის წევრის მამუკა მდინარაძის მიერ საქართველოს პარლამენტის წევრის ეთიკის კოდექსის შესაძლო დარღვევის შესახებ. სრულად... გადამღებ ჯგუფზე თავდასხმა  წყარო: კოალიცია მედიის დამოუკიდებლობისთვის

იმერეთი. 22 ივნისს, „საფარის“ იურისტს იმერეთის რეგიონში, თეონა გოგლიჩაძეს,  დაუკავშირდა ქალი და არასრულწლოვან შვილთან კომუნიკაციისთვის შესაძლებლობისთვის სამართლებრივი დახმარება სთხოვა. როგორც ქალი ყვება, თითქმის 4 წელია, რაც განქორწინებულია, თუმცა ყოფილი ქმარი შვილთან ურთიერთობის უფლებას არ აძლევს. მისივე თქმით, განქორწინებისას არ ჰქონდა ფინანსური შესაძლებლობა და არც ინფორმაცია იმაზე, შეეძლო თუ არა შვილი მასთან წაეყვანა, თუმცა ახლა მზადაა იბრძოლოს მეურვეობის მისაღებად. „საფარის“ დახმარებითა და პოლიციისა და სოციალური სამსახურის ჩართულობით დღეს ქალმა შვილის ნახვა მოახერხა. სრულად... წყარო: sapari.ge

თბილისი. „სოციალური სამართლიანობის ცენტრი“ ეხმაურება საქართველოს პრემიერ-მინისტრის ირაკლი ღარიბაშვილის განცხადებას, რომელმაც ბათუმის საკრებულოს გარდაცვლილი დეპუტატის, ნუგზარ ფუტკარაძის სიცოცხლის გაუფრთხილებლობით მოსპობის საქმის გამოძიება დასრულებულად გამოაცხადა. „მთავრობის მეთაურის განცხადება მკაფიო დადასტურებაა იმის, რომ  შსს ბათუმის  სამმართველოში მიმდინარე გამოძიება ფორმალურია და პოლიტიკურ გავლენებსაა დაქვემდებარებული. მიგვაჩნია, რომ ასეთი შინაარსის განცხადებები კიდევ უფრო აღრმავებს უნდობლობას და იწვევს საგამოძიებო ორგანოებისა თუ აღმასრულებელი ხელისუფლების დისკრედიტაციას“, ნათქვამია ორგანიზაციის განცხადებაში. სრულად... წყარო: socialjustice.org.ge

თბილისი. გაეცანით საქართველოს ახალგაზრდა იურისტთა ასოციაციის საქმიანობის მოკლე აღწერას. „ყოველწლიურად 30 000-მდე ფიზიკურ პირს უწევს უფასო იურიდიულ კონსულტაციას საქართველოს ახალგაზრდა იურისტთა ასოციაცია. ორგანიზაცია ასობით პირს იცავს სასამართლოსა და სხვა ადმინისტრაციულ ორგანოებში. ადამიანის უფლებების დაცვის მნიშვნელოვან საქმეებზე, საჭიროების მიხედვით მიმართავს საქართველოს საკონსტიტუციო სასამართლოს და ადამიანის უფლებათა ევროპულ სასამართლოს“... მასალა მომზადებულია კამპანია „ეს ქვეყანა შენია“-ს მიერ, პროექტის „სამოქალაქო საზოგადოების ინიციატივის“ ფარგლებში. პროექტი ხორციელდება კონრად ადენაუერის ფონდის (KAS) მიერ, საქართველოს სტრატეგიული კვლევებისა და განვითარების ცენტრთან (CSRDG), სამოქალაქო საზოგადოების ინსტიტუტთან (CSI), კონსულტაციისა და ტრენინგის ცენტრთან (CTC), განათლების განვითარების და დასაქმების ცენტრთან (EDEC) და ევროპული პოლიტიკის ინსტიტუტთან (IEP) თანამშრომლობით. პროექტს აფინანსებს ევროკავშირი და კონრად ადენაუერის ფონდი. სრულად... წყარო: ორგანიზაციის გვერდი სოციალურ ქსელში

თბილისი. სოლიდარობის პლატფორმის გარშემო გაერთიანებული აქტივისტები სხვადასხვა რეგიონიდან და მრავალფეროვანი ეთნიკური და რელიგიური თემებიდან, განცხადებას ავრცელებენ, რომ ევროპულმა უწყებებმა, საქართველოს ხელისუფლებამ და დაინტერესებულმა მხარეებმა მოისმინონ და გაითვალისწინონ ჩვენი ხედვები და მოსაზრებები საქართველოს ევროპულ მომავალთან დაკავშირებით. „გვინდა პირდაპირ და ხაზგასმით განვაცხადოთ, რომ ევროპული ვექტორი და მომავალი საქართველოში სამოქალაქო თანასწორობის, ინტერ-ეთნიკური სოლიდარობის და ინკლუზიური საზოგადოების მშენებლობის უმთავრესი გარანტორია. დღეს, როგორც არასდროს, საქართველოში უმცირესობების უფლებების დაცვა და ჩვენი ევროპული არჩევანი ერთმანეთზეა დამოკიდებული. გვჯერა, რომ ჩვენთვის ევროპული ინტეგრაცია დაკავშირებულია სისტემური უსამართლობების დასრულებასთან, სტრუქტურული დისკრიმინაციის აღმოფხვრასთან და გარიყულობის გადალახვასთან“. სრულად...  წყარო: socialjustice.org.ge

კახეთი. 17 ივნისს საქართველოს სახალხო დამცველის მონიტორინგის ჯგუფმა კახეთში, სიღნაღის რაიონში მდებარე წნორის ხანდაზმულთა სახლის ა(ა)იპ „ხანდაზმულთა სავანე ბეთელის“ მონიტორინგი განახორციელა. მონიტორინგმა აჩვენა, რომ დაწესებულებაში არსებული მდგომარეობა შემაშფოთებელია და  ხანდაზმულები ღირსების შემლახველ პირობებში იმყოფებიან. ბენეფიციარები მძიმე ანტისანიტარულ პირობებში არიან. მთელ შენობაში გაუსაძლისი, მძაფრი სუნი დგას. ყურადღება არ ექცევა ბენეფიციარების ჰიგიენას. უმეტესობას ძველი, დახეული და ჭუჭყიანი ტანსაცმელი აცვია. ბენეფიციარებთან გასაუბრებისას გაირკვა, რომ მათ არ აქვთ ბანაობის შესაძლებლობა. ერთ-ერთი ხანდაზმულის განცხადებით, მიმდინარე წელს მას საერთოდ არ უბანავია. ხანდაზმულთა სახლს არ აქვს ადეკვატური ინფრასტრუქტურა. დაწესებულება უგულებელყოფს ხანდაზმულთა ჯანმრთელობის დაცვას. დაწესებულებას არ აქვს წინასწარ, სპეციალისტის მიერ შედგენილი, ხანდაზმულთა საჭიროებებზე მორგებული კვების მენიუ. ხანდაზმულთა სახლის პერსონალს არ აქვს შესაბამისი კვალიფიკაცია. უნდა აღინიშნოს, რომ დაწესებულებაში მომუშავე პერსონალის ანაზღაურება ყველაზე დაბალია,  სახალხო დამცველის აპარატის მიერ შემოწმებულ და შესწავლილ სხვა ხანდაზმულთა სახლებთან შედარებით.  შემაშფოთებელია, დაწესებულების ადმინისტრაციის სტიგმით განპირობებული სტერეოტიპული დამოკიდებულება ზოგიერთი ხანდაზმულის მიმართ. სახალხო დამცველის აპარატის თანამშრომელთა მიერ, ზემოთაღნიშნულ დარღვევებთან დაკავშირებით გამოთქმულ შენიშვნაზე ადმინისტრაციის წარმომადგენელმა განაცხადა - ხანდაზმულს იმისათვის, რომ ღირსება შეელახოს, უნდა ჰქონდესო. იკვეთება ხანდაზმულთა დიფერენცირება, მათი როგორც ფიზიკური, ასევე მენტალური ჯანმრთელობის მიხედვით. აღნიშნული აღვივებს ბენეფიციართა შორის დაპირისპირებასაც. შესამჩნევია, ადმინისტრაციის მიმართ შიში და უნდობლობა. საქართველოს სახალხო დამცველმა მიმართა  საქართველოს შრომის, ჯანმრთელობისა და სოციალური დაცვის მინისტრს და სახელმწიფო ზრუნვისა და ტრეფიკინგის მსხვერპლთა, დაზარალებულთა სააგენტოს, მყისიერად მოახდინოს რეაგირება ზემოაღნიშნულ დარღვევებზე და დაუყოვნებლივ უზრუნველყოს დაწესებულებაში მყოფი ხანდაზმულების გადაყვანა სხვა დაწესებულებებში, სადაც მათ ღირსეული პირობები ექნებათ. სრულად... წყარო: ombudsman.ge ფოტო: პროგრესნიუსი

ქვემო ქართლი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, რუსთავის საქალაქო სასამართლოში მორიგებით დასრულდა სამსახურიდან უკანონოდ გათავისუფლებული, ხ.ჯ.-ს დავა და ა(ა)იპ ,,ქალაქ რუსთავის სახელოვნებო, სპორტისა და ახალგაზრდობის განვითარების ცენტრს“ ხ.ჯ.-ს გათავისუფლების გამო კომპენსაციის გადახდა დაეკისრა, 5 თვის ხელფასის ოდენობით. სრულად... წყარო: isfed.ge

თბილისი. თუ ხართ შეზღუდული შესაძლებლობის მქონე პირი და თვლით, რომ თქვენი უფლებები შეზღუდული შესაძლებლობის, გენდერული ან ეთნიკური ნიშნით ირღვევა, დაუკავშირდით კოალიციას დამოუკიდებელი ცხოვრებისთვის.: თბილისი: 591 06 02 02 აჭარა: 591 08 02 02 კახეთი: 591 02 06 06 სრულად... წყარო: ორგანიზაციის გვერდი სოციალურ ქსელში

სამეგრელო. საქართველოს ახალგაზრდა იურისტთა ასოციაცია (საია) ზუგდიდის ოფისი იცავდა  აფხაზეთიდან იძულებით გადაადგილებული  პირის ინტერესებს, რომელიც დევნილთა, ეკომიგრანტთა და საარსებო წყაროებით უზრუნველყოფის სააგენტოს ედავებოდა საცხოვრებლით დაკმაყოფილების საკითხზე. კერძოდ, მოსარჩელე ასაჩივრებდა იმ გადაწყვეტილებას, რომლითაც უარი უთხრეს საცხოვრებლის გადაცემაზე. სამივე ინსტანციის სასამართლოში დავა დევნილის სასარგებლოდ გადაწყდა. მოპასუხე მხარეს დაევალა ახალი აქტის გამოცემა, რომლითაც აფხაზეთიდან იძულებით გადაადგილებული  ოჯახი საცხოვრებელს მიიღებს. სრულად... წყარო: gyla.ge

თბილისი. სოციალური სამართლიანობის ცენტრი აქვეყნებს ნინო ხარატიშვილის სტატიას: ვინაა მშრომელი? - ვან დერ ლინდენი შრომის განსაზღვრების შესახებ. „მარსელ ვან დერ ლინდენი არის სოციალური მოძრაობების ისტორიის პროფესორი ამსტერდამის უნივერსიტეტში. იგი იყო საერთაშორისო სოციალური ისტორიის ასოციაციის პრეზიდენტი 2005 წლიდან 2020 წლამდე. დღეს ის იკავებს უფროსი მკვლევრის პოზიციას სოციალური ისტორიის საერთაშორისო ინსტიტუტში. თავის წიგნში „მსოფლიოს მშრომელები - ესეები გლობალური შრომის ისტორიისთვის“ ვან დერ ლინდენი გვთავაზობს შრომის ისტორიის ახლებურ, მოდერნიზაციის მიდგომისგან დაშორებულ გაგებას, რომელიც უნდა იყოს ინკლუზიური, დაცლილი ევროცენტრიზმისგან და მეთოდოლოგიური ნაციონალიზმისგან. იგი არ ცდილობს ამომწურავ პასუხებამდე მისვლას, არამედ გვიჩვენებს შრომის ისტორიის ახლებურ, ამბიციურ ინტერპრეტაციას გლობალურ პერსპექტივაში და სახავს ახალ ორიენტირებს დარგის მკვლევრებისთვის კაპიტალიზმში შრომის და შრომითი ურთიერთობების გადააზრებისთვის“. სრულად... წყარო: socialjustice.org.ge

იმერეთი. სოციალური სამართლიანობის ცენტრი გთავაზობთ ვიდეოს, სადაც საუბარი კიდევ ერთხელ შეეხება ჭიათურას და ამ რეგიონში მადნის მოპოვების შესახებ დისკუსიის განახლებას. რა მოხდა ითხვისში? როგორია ჭიათურაში მანგანუმის მოპოვების ისტორია, ბუნება და გეოგრაფია? როგორ ჩამოყალიბდა რეგიონში სოციალურად და ეკოლოგიურად უპასუხისმგებლო რეჟიმი? რა შეცვალა სპეციალური მმართველის დანიშვნამ და რა გამოსავალი არსებობს ამ მდგომარეობიდან? ორგანიზაცია მკვლევართან, გიორგი ცინცაძესთან ერთად პასუხებს გასცემს ამ კითხვებს. სრულად... წყარო: socialjustice.org.ge