თბილისი. ადამიანის უფლებათა ცენტრმა გამოაქვეყნა ანალიტიკური დოკუმენტი: პარტია „კონსერვატიული მოძრაობისა“ და ტელეკომპანია „ალტ-ინფოს“ საქმიანობის აკრძალვის საფუძვლები. „დოკუმენტში შეფასებულია პრორუსული პარტია „კონსერვატიული მოძრაობისა“ და ტელეკომპანია „ალტ-ინფოს“ პოლიტიკური მიზნები და მათი საქმიანობის არაკონსტიტუციურობის საკითხები. დოკუმენტი ეფუძნება საქართველოს და საერთაშორისო კანონმდებლობას, ასევე - ევროპული ქვეყნების ეროვნული სასამართლოებისა და ადამიანის უფლებათა ევროპული სასამართლოს გადაწყვეტილებებსა და საუკეთესო პრაქტიკას“. ანალიტიკური დოკუმენტი... წყარო: hrc.ge

თბილისი. საქართველოს დემოკრატიული ინიციატივა (GDI) ეხმაურება ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეს, რომელიც ყოველწლიურად 17 მაისს აღინიშნება. „ერთი მხრივ სასიხარულოა, რომ უკანასკნელი რამდენიმე წლის განმავლობაში საქართველოში ლგბტ+ თემის მიმართ დამოკიდებულება შეიცვლა და მხარდაჭერა გაიზარდა. ამ დადებით ცვლილებას ადასტურებს საზოგადოებრივი დამოკიდებულების შესახებ კვლევა, რომლის თანახმად, საქართველოში შესუსტებულია ჰომოფობიური განწყობის ინდიკატორები. ამის მიუხედავად, ლგბტ+ თემისა და მისი მხარდამჭერების უფლებრივ მდგომარეობაზე კვლავ უარყოფითად აისახება არაერთი გამოწვევა, მათ შორის, დისკრიმინაციის, ფიზიკური უსაფრთხოების, გამოხატვისა და შეკრების თავისუფლების რეალიზების კუთხით.  GDI მოუწოდებს ხელისუფლებას, რომ გადადგას ქმედითი ნაბიჯები ქვეყანაში ლგბტ+ თემის უფლებრივი მდგომარეობის გასაუმჯობესებლად, რათა ლგბტ+ თემის წევრებმა შეძლონ ფუნდამენტური უფლებებით თანასწორად სარგებლობა“. სრულად... წყარო: gdi.ge

თბილისი. 17 მაისი ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეა, რომლის მიზანს ძალადობის დაგმობა და ლგბტ+ ადამიანების მიმართ სოლიდარობის გამოხატვა წარმოადგენს. „მიუხედავად იმისა, რომ წლების განმავლობაში გაიზარდა ლგბტ+ თემის ხილვადობა და შემცირდა საზოგადოებაში არსებული დისკრიმინაციული განწყობები, ამ პროცესს თან არ ახლავს სახელმწიფოს თანმიმდევრული და გააზრებული პოლიტიკა. უფრო მეტიც, სახელმწიფოს სამართლებრივი უმოქმედობა ახალისებს ლგბტ+ ადამიანების მიმართ უთანასწორობას საზოგადოებრივი ცხოვრების თითქმის ყველა სფეროში, ვერ აუმჯობესებს მათი ცხოვრების ხარისხს და დაუცველს ტოვებს მათ ძალადობისა და დისკრიმინაციის პირისპირ“, ნათქვამია ომბუდსმენის განცხადებაში. სრულად... წყარო: ombudsman.ge

თბილისი. სოციალური სამართლიანობის ცენტრის განცხადებით, ლგბტ(ქ)ი ადამიანების უსაფრთხოება და უფლებები კვლავ დაუცველია. „უკანასკნელი 10 წლის განმავლობაში პოლიტიკური უფლებების აღიარებასთან და რეალიზებასთან ადაკავშირებული დრამატული მოვლენები სახელმწიფოს დემონსტრაციულ გულგრილობას, პოლიტიკურ ჰომოფობიას და ძალადობის შეწყნარების უმძიმეს გამოცდილებას აჩვენებს. ცხადია, რომ ეს პოლიტიკა მკვეთრად აზიანებდა და აზიანებს დემოკრატიული, მშვიდობიანი და პლურალისტური საზოგადოების განვითარების შესაძლებლობებს და არაერთ სოციალურ კრიზისს ქმნიდა. უკვე წლებია ხელისუფლება, პოლიტიკური პარტიები, ეკლესია და სხვა აქტორები ქვიარ ადამიანების და ქვიარ საკითხების პოლიტიკურ ინსტრუმენტალიზებას ცდილობენ და ხშირად ეს დომინანტური პოლიტიკა ლგბტ(ქ)ი ადამიანების სიცოცხლის, ღირსების და მომავლის ჩამორთმევის მიზეზიც გამხდარა“, ნათქვამია განცხადებაში. სრულად... წყარო: socialjustice.org.ge

თბილისი. ღია საზოგადოების ფონდის აღამსრულებელი დირექტორის ქეთი ხუციშვილის შეფასებით, „დღეს ჩვენ გავხდით მომსწრე, კიდევ ერთი პოლიტიკურად მოტივირებული პროცესისა და გადაწყვეტილებისა. ის საქმე, რომელიც ნიკა გვარამიას წინააღმდეგ არის აღძრული, იურისტების შეფასებით, საერთოდ არ შეიცავს სისხლის სამართლის დანაშაულის ნიშნებს. შესაბამისად, უნდა განხილულიყო როგორც სამეწარმეო საქმე. ჩვენ ვნახეთ, რომ მთელი ამ წლების მანძილზე, ხელისუფლება ვერ ფარავდა სურვილს, რომ დაეპატიმრებინა ნიკა გვარამია, რაც შეიძლება მეტად შეეზღუდა საქართველოში დამოუკიდებელი და კრიტიკული მედია. დღეს კიდევ ერთი, აშკარად რეპრესიული ნაბიჯი გადადგა არა მხოლოდ სასამართლომ, არამედ ხელისუფლებამ, რომლის დავალებითაც მოქმედებს სასამართლო“, ამბობს ქეთი ხუციშვილი. სრულად...  წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის განცხადებით, სასამართლო სისტემის დამოუკიდებლობასთან დაკავშირებული სისტემური გამოწვევებისა და მართლმსაჯულების პოლიტიკური ინსტრუმენტალიზების ტენდენციის ფონზე, ნიკა გვარამიას დაპატიმრება ხელისუფლების მიმართ კრიტიკულად განწყობილ მედიაზე ზეწოლის, პოლიტიკური პოლარიზებისა და კრიზისის გაღრმავებისკენ მიმართული კიდევ ერთი სახიფათო პრეცედენტია. მით უფრო მაშინ, როდესაც მოსამართლის მიერ სასჯელის ყველაზე მკაცრი ფორმის გამოყენება, განსახილველი დანაშაულის შინაარსის და ბუნების გათვალისწინებით, აშკარად არაპროპორციული ჩანს სადავო ქმედებით დამდგარ ზიანთან. სრულად... წყარო: socialjustice.org.ge

თბილისი. თბილისის საქალაქო სასამართლომ ე.წ „რუსთავის 2-ის“ საქმეზე განაჩენი გამოაცხადა. სასამართლომ ნიკა გვარამიას სასჯელის სახედ და ზომად 3 წლისა და 6 თვის ვადით თავისუფლების აღკვეთა განუსაზღვრა. საქართველოს ახალგაზრდა იურისტთა ასოციაცია (საია) მონიტორინგს უწევდა სისხლის სამართლის პროცესებს და მიიჩნევს, რომ გამოტანილი განაჩენი პრობლემურია როგორც სამართლებრივი თვალსაზრისით, ასევე, არსებობს საეჭვო გარემოებები მართლმსაჯულების განხორციელებასთან მიმართებით. „საგულისხმოა ისიც, რომ ტელეკომპანია „მთავარი არხის“ დირექტორის და წილის მფლობელის მიმართ დაუსაბუთებელი გადაწყვეტილება, სერიოზულ ზიანს მიაყენებს კრიტიკული სარედაქციო პოლიტიკის მქონე მაუწყებელს, რაც დამატებით შეუწყობს ხელს ქვეყანაში არსებული პოლარიზებული გარემოს გამძაფრებას“, ნათქვამია ორგანიზაციის განცხადებაში. სრულად... წყარო: gyla.ge

თბილისი. ადამიანის უფლებათა ცენტრის განცხადებით, ქალის მკვლელობის საქმეზე პროკურატურამ გენდერული მოტივი არ გამოკვეთა. ორგანიზაციის კახეთის ოფისი იცავს დაზარალებულის უფლებამონაცვლის სამართლებრივ ინტერესებს გენდერული ნიშნით ქალის მკვლელობის სისხლის სამართლის საქმეზე.  ადამიანის უფლებათა ცენტრმა გამოძიების დაწყების ეტაპზევე გამოხატა პოზიცია ბრალის ფორმულირებასთან და ქმედების კვალიფიკაციასთან დაკავშირებით, რის თაობაზეც  მიმართა საქმეზე როგორც გამომძიებელს, ასევე კახეთის საოლქო პროკურატურას. ორგანიზაცია შეშფოთებულია, რომ კახეთის საოლქო პროკურატურამ არ დააკმაყოფილა მოთხოვნა ქალის განზრახ მკვლელობის საქმეზე გენდერული ნიშნის გამოკვეთის თაობაზე. ცენტრი მოუწოდებს პროკურატურას და საგამოძიებო ორგანოებს, განსაკუთრებული ყურადღება მიაქციონ კონკრეტულად ამ საქმეში და ასევე ზოგადად, ამგვარი კატეგორიის საქმეების გამოძიებისას გენდერულ ნიშანს, რაც ხელს შეუწყობს შემდგომში ასეთი ტიპის დანაშაულთა პრევენციას და საქმეების სრულყოფილ/ობიექტურ გამოძიებას. სრულად... წყარო: www.hrc.ge

თბილისი. სოციალური სამართლიანობის ცენტრის ინფორმაციით,  სასამართლომ მორიგება დაამტკიცა სამშენებლო კომპანია - „შპს ჯევიკე ჰოსფითალითსა“ და მშენებლობაზე გარდაცვლილი არასრულწლოვანი მუშის დედას - იამზე ბეშკენაძეს შორის. მის ინტერესებს დავაში სოც. სამართლიოანობის ცენტრი წარმოადგენდა. „Სამშენებლო სამუშაოები შრომის უსაფრთხოების ნორმების დარღვევით მიმდინარეობდა. Მორიგების შედეგად. კომპანიამ დედისთვის მორალური ზიანის ანაზღაურების ვალდებულება იკისრა“. სრულად... წყარო: ორგანიზაციის გვერდი სოციალურ ქსელში

აჭარა. სოციალური სამართლიანობის ცენტრი ეხმიანება ეკოლოგიური კატასტროფის უმძიმესი გამოცდილების მქონე სოფელ წაბლანაში განვითარებულ ახალ მეწყერულ პროცესებს და სახელმწიფოს საფრთხეების დროული შეფასებისა და ეფექტიანი პრევენციული ღონისძიებების მიღებისკენ მოუწოდებს. „როგორც საზოგადოებისთვის ცნობილია, 1989 წლის 19 აპრილს წაბლანაში ჩამოწოლილმა მეწყერმა სოფელი მოიყოლა, რის შედეგადაც 23 ადამიანი დაიღუპა, მათ შორის, სამი ბავშვი. წაბლანას მოსახლეობა ჩვენთან აცხადებს, რომ ნაპრალების სიდიდე ყოველდღიურად იზრდება. სოფლის მოსახლეობა შესაძლო ეკოლოგიური კატასტროფის პრევენციის მიზნით ითხოვს მეწყერული პროცესების მასშტაბისა და მოსალოდნელი რისკების შეფასებას ინტერდისციპლინური კვლევების ჩატარების გზით“. სრულად... წყარო: socialjustice.org.ge

თბილისი. 11 მაისს, საქართველოს სახალხო დამცველმა და არასამთავრობო ორგანიზაციამ „პრევენცია პროგრესისთვის“ საერთო კვლევის ანგარიში წარადგინეს - „პენიტენციურ სისტემაში კოვიდ 19 პანდემიის გავლენა პატიმრების და პერსონალის ჯანმრთელობის და სხვა სახის უფლებრივ მდგომარეობაზე“. „კვლევაში შეფასებულია სპეციალური პენიტენციური სამსახურის მიერ 2020 წლის მარტიდან 2021 წლის ჩათვლით პანდემიის პირობებში მიღებული განსაკუთრებული ზომების ზეგავლენა პატიმართა უფლებრივ მდგომარეობაზე. კვლევის შედეგებმა ცხადყო, რომ პანდემიის პერიოდში გადაჭარბებულად იქნა გამოყენებული შეზღუდვების პოლიტიკა და შესაბამისი ძალისხმევა არ იქნა გაწეული გადაწყვეტის ალტერნატიული შესაძლო გზების მოძიების მიმართულებით“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. კინოცენტრის საექსპერტო კომისიის გათავისუფლებული წევრების უფლებებს სასამართლოში სამართლიანი არჩევნებისა და დემოკრატიის საერთაშორისო საზოგადოება (ISFED) დაიცავს. კომისიის წევრებს კინემატოგრაფიის ეროვნული ცენტრის მიერ გამოცხადებული კონკურსის - პირველი სრულმეტრაჟიანი მხატვრული ფილმის 2022-2023 წლის წარმოების - გამარჯვებულები უნდა გამოევლინა. „2022 წლის 15 აპრილს საექსპერტო კომისიის წევრებმა მიიღეს შეტყობინება, რომ მათი დანიშვნის ბრძანებაში შევიდა ცვლილება და სრულად განახლდა კომისიის შემადგენლობა. დღემდე კომისიის წევრებს არ მიუღიათ დასაბუთება, ან რაიმე ტიპის განმარტება, მათი დათხოვნის მიზეზებისა და საფუძვლის შესახებ“. განცხადება სრულად... წყარო: isfed.ge

თბილისი. ორგანიზაცია „საფარის” საჩივრის საფუძველზე, თბილისის საქალაქო სასამართლომ ძალადობის მსხვერპლი ქალის მიმართ უსაფუძვლოდ გამოცემული შემაკავებელი ორდერი გააუქმა. „ქალი ორგანიზაციას მას შემდეგ დაუკავშირდა, რაც პარტნიორის მხრიდან ფიზიკური ძალადობის მსხვერპლი გახდა. შემთხვევა მიმდინარე წლის 8 აპრილს მოხდა. პოლიციის გამოძახების შემდეგ, კაცი ადგილზე დააკავეს და მის მიმართ შემაკავებელი ორდერიც გამოიცა. მეორე დღეს, კაცს ოჯახში ძალადობის მუხლით წარუდგინეს ბრალი, დაკითხვის დროს კი მან განაცხადა, რომ თავად არის მსხვერპლი. ეს ვერსია ეყრდნობოდა იმ ფაქტს, რომ ფიზიკური თავდასხმის დროს, თავის დაცვის მიზნით, ქალმა მას მხარზე უკბინა, რა დროსაც კაცმა დაზიანებები მიიღო. სწორედ ეს გახდა იმის საფუძველი, რომ შემთხვევიდან მეორე დღეს, 9 აპრილს, მეორე შემაკავებელი ორდერი გამოიცა, ამჯერად უკვე დაზარალებული ქალის მიმართ. ფაქტობრივად, არსებობდა ორი, ერთმანეთის პარალელური შემაკავებელი ორდერი, თუმცა “საფარის” იურისტმა, ნელი ქარელმა ქალის მიმართ გამოცემული შემაკავებელი ორდერი გაასაჩივრა. როგორც ქარელი განმარტავს, მნიშვნელოვანია განისაზღვროს, ვინ იყო კონფლიქტისა ინიციატორი კონკრეტულ სიტუაციაში. იურისტი ხაზს უსვამს იმასაც, რომ თავის დაცვა, არ შეიძლება ჩაითვალოს ძალადობად“, ნათქვამია ორგანიზაციის ვებგვერდზე. სრულად... წყარო: sapari.ge

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს: ბავშვების დაცვა ასაკის ნიშნით დისკრიმინაციისგან - საუკეთესო საკანონმდებლო ინიციატივების მიმოხილვა. „ბავშვების მიმართ სხვადასხვა ნიშნით დისკრიმინაცია ერთ-ერთი მნიშვნელოვანი პრობლემაა ბავშვის უფლებების დაცვის მიმართულებით. დისკრიმინაციული დამოკიდებულება მყარად არის ფესვგადგმული ცხოვრების თითქმის ყველა სფეროში - სკოლა, დასაქმების ადგილი, ოჯახი - ამიტომ, მნიშვნელოვანია, სახელმწიფოს პროაქტიული მოქმედებები ასაკის ნიშნით დისკრიმინაციის აღმოსაფხვრელად. დღემდე ეროვნულ კანონმდებლობაში შეტანილი ცვლილებებით თუ კონსტიტუციური შესწორებებით, არაერთმა ქვეყანამ განახორციელა კონკრეტული ღონისძიებები იმისათვის, რომ ბავშვებმა ისარგებლონ საკუთარი უფლებებით უფროსების თანასწორად“, ნათქვამია ბლოგპოსტში. სრულად... წყარო: phr.ge

თბილისი. გავრცელებული ინფორმაციით, 2022 წლის 26 აპრილს, აიდა ბალაფკანი, რომელიც დიდი ბრიტანეთის მოქალაქეა და საქართველოში აკადემიური მიზნებით გეგმავდა ჩამოსვლას, საქართველოს შინაგან საქმეთა სამინისტრომ ქვეყანაში არ შემოუშვა. „სამინისტროს ეს გადაწყვეტილება საზღვრის კვეთის სფეროში თვითნებური და სავარაუდოდ დისკრიმინაციული პრაქტიკის კიდევ ერთი მაგალითია. მიღებული გადაწყვეტილება სხვა უფლებებთან ერთად, აკადემიური საქმიანობისთვის და ამ კუთხით გლობალური თანამშრომლობის პროცესს უშლის ხელს“, ნათქვამია ორგანიზაციის განცხადებაში. სოციალური სამართლიანობის ცენტრი მოუწოდებს შსს-ს: •    ბათილად ცნოს 26 აპრილის გადაწყვეტილება და მკვლევარ ქალს საქართველოში შემოსვლის უფლება მისცეს; •    შეწყვიტოს „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონის მე-11 მუხლის 1-ლი პუნქტის „ი“ ქვეპუნქტის არაკონსტიტუციური გამოყენება და მისგან მომდინარე უფლების შეზღუდვის თვითნებური პრაქტიკა. სრულად... წყარო: socialjustice.org.ge

თბილისი. 6 მაისს, ფაბრიკაში ლგბტქი თემის მიმართ არსებული საზოგადოებრივი დამოკიდებულებისა და მათი უფლებრივი მდგომარეობის შესახებ ახალი კვლევების წარდგენა გაიმართა. „ლგბტქი ადამიანები საქართველოს საზოგადოების ერთ-ერთ ყველაზე დაუცველ და მარგინალურ ნაწილს წარმოადგენენ. ისინი ცხოვრების სხვადასხვა სფეროში დისკრიმინაციასა და ძალადობას განიცდიან, ხოლო მათი უფლებების დაცვისა და პრაქტიკაში რეალიზების მხრივ, კვლავაც მნიშვნელოვანი გამოწვევები არსებობს. შექმნილი ვითარების მიუხედავად, საზოგადოების ნეგატიური დამოკიდებულება ლგბტქი თემის მიმართ თანდათან მცირდება, რაც გაეროსა და შვედეთის მთავრობის ხელშეწყობით ჩატარებულმა ორმა ახალმა კვლევამაც დაადასტურა. ღონისძიება შვედეთის მთავრობისა და გაეროს სამი სააგენტოს - გაეროს ქალთა ორგანიზაციის (UN Women), გაეროს განვითარების პროგრამისა (UNDP) და გაეროს მოსახლეობის ფონდის (UNFPA) ხელშეწყობით ჩატარდა. სრულად... წყარო: ორგანიზაციის გვერდი სოციალურ ქსელში

აჭარა. არასამთავრობო ორგანიზაციებმა „ცვლილებები თანაბარი უფლებებისათვის“ და „კოალიცია დამოუკიდებელი ცხოვრებისათვის“ ევროკავშირის პროექტის, „სამოქალაქო საზოგადოება შეზღუდული შესაძლებლობის მქონე პირთა უფლებებისთვის საქართველოში“ ფარგლებში, ბათუმში ევროპის დამოუკიდებელი ცხოვრების დღისადმი მიძღვნილ პანელურ დისკუსიას უმასპინძლეს. „ღონისძიების მთავარი თემა „შეზღუდული შესაძლებლობის მქონე პირთა დამოუკიდებელი ცხოვრება, გამოწვევები და მხარდამჭერი სერვისები“ იყო. შეხვედრაზე შეზღუდული შესაძლებლობის მქონე აქტივისტებმა და დამოუკიდებელი ცხოვრების ცენტრების ლიდერებმა განიხილეს ის გამოწვევები, რომელსაც შშმ პირები ხვდებიან და სერვისები, რომლებსაც აღნიშნული ცენტრები უზრუნველყოფენ“. სრულად... წყარო: eu4georgia.eu

თბილისი. საქართველოს სახალხო დამცველმა პარლამენტს წარუდგინა ალტერნატიული ანგარიში ადამიანის უფლებათა ევროპული სასამართლოსა და გაეროს ქალთა მიმართ დისკრიმინაციის აღმოფხვრის კომიტეტის მიერ საქართველოს მიმართ გამოტანილი გადაწყვეტილებების აღსრულების მდგომარეობის შესახებ. „ალტერნატიული ანგარიში მიმოიხილავს საქართველოს წინააღმდეგ ევროპული სასამართლოს მიერ გამოტანილი გადაწყვეტილებების აღსრულებისათვის სახელმწიფოს მიერ მიღებულ ზოგად ღონისძიებებს შემდეგ საქმეებში: „ცინცაბაძის ჯგუფი“, „იდენტობის ჯგუფი“, „ნ.წ. და სხვები საქართველოს წინააღმდეგ“”, „,,ამირიძე საქართველოს წინააღმდეგ“’’ და „,,მერაბიშვილი საქართველოს წინააღმდეგ’’“. გარდა ამისა, ანგარიშში შეფასებულია ხანუმ ჯეირიანოვას საქმეზე საქართველოს წინააღმდეგ გაეროს ქალთა მიმართ დისკრიმინაციის აღმოფხვრის კომიტეტის მიერ გამოტანილი გადაწყვეტილების აღსასრულებლად განხორციელებული ზოგადი ღონისძიებები. დოკუმენტში გაანალიზებულია, თუ რამდენად საკმარისია ზემოაღნიშნული საქმეების აღსასრულებლად სახელმწიფოს მიერ გადადგმული ნაბიჯები“, ნათქვამია ანგარიშში. ანგარიშის ელექტრონული ვერსია... წყარო: ombudsman.ge

თბილისი. სოციალური სამართლიანობის ცენტრი გთავაზობთ ანგარიშს, რომელშიც შეფასებულია 2021 წლიდან 2022 წლის მარტის ჩათვლით გამართული საპროტესტო დემონსტრაციების დროს პოლიციის მხრიდან გამოყენებული ძალის პროპორციულობა და უფლებრივ დარღვევებზე სახელმწიფოს რეაგირების ეფექტიანობა. დოკუმენტი იხ. ბმულზე... „საპოლიციო ძალა სულ უფრო ხშირად გვევლინება პროცესების მართვის წამყვან მექანიზმად, როგორც პოლიტიკური კრიზისების დროს, ისე სხვადასხვა სოციალურ საკითხთან დაკავშირებულ კონფლიქტებში. განსაკუთრებით მწვავე იყო 5 ივლისს განვითარებული მოვლენები, როდესაც ერთი მხრივ ჩვენ ვნახეთ, პოლიციის უმოქმედობა, როდესაც ხელისუფლებამ დაუშვა და ირიბად წაახალისა ძალადობრივი მოქმედებები. მეორე მხრივ, ნამოხვანის პროტესტის მიმდინარეობისას, ჩვენ ვიხილეთ ჭარბი/ინტენსიური საპოლიციო ძალების მობილიზება, როდესაც ხისტი და რეპრესიული მეთოდებით, ხელისუფლება ცდილობდა ჭარბი საპოლიციო ძალით ფიზიკური ბარიერები შეექმნა და ხელი შეეშალა რიონის ხეობის მცველების ლეგიტიმური, მშვიდობიანი და სამართლიანი პროტესტისთვის“, ნათქვამია ანგარიშში. წყარო: socialjustice.org.ge

თბილისი. გაეცანით „საერთაშორისო გამჭვირვალობა - საქართველოს“ ბლოგპოსტს მთავრობის მიერ პარლამენტში ინიცირებულ ცვლილებების ახალ პროექტზე. „მთავრობის მიერ შემოთავაზებული ახალი ცვლილებების ასახვა კანონმდებლობაში გაუმართლებლად ზრდის საგამოძიებო უწყებების უფლებამოსილებას სასამართლო კონტროლის გვერდის ავლით მოიპოვონ პირთა კონფიდენციალური ინფორმაცია“, ნათქვამია ორგანიზაციის ბლოგპოსტში. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციის დახმარებით პენსიონერმა კუთვნილი პენსიის სრულად მიღება შეძლო. ორგანიზაციის ცნობით, ამ ტიპის პრობლემასთან დაკავშირებით ბოლო პერიოდში სხვა მოქალაქეებმაც მომართეს. ამდენად, ამ საქმეზე დადგენილი პრაქტიკა შესაძლოა სხვა ბენეფიციარებისთვისაც იყოს სასარგებლო. „პრობლემის გადაჭრის მიზნით, პირველ რიგში, პენსიონერმა საბანკო დაწესებულებას უნდა მიმართოს საჩივრით (საპრეტენზიო განაცხადით) და მოითხოვოს პენსიის გაცემა, აგრეთვე, ინფორმაცია პენსიის დაკავების მიზეზთან დაკავშირებით“. სრულად... წყარო: gyla.ge

თბილისი. აქტივისტები სხვადასხვა თემიდან საუბრობენ სოლიდარობის პლატფორმაზე, რომელიც 2019 წელს შეიქმნა და აერთიანებს საქართველოს სხვადასხვა ეთნიკურ და რელიგიურ ჯგუფს. „სოლიდარობის პლატფორმა არის სივრცე, სადაც ჩვენ ვცდილობთ, დავინახოთ ამ ჯგუფების შეხების წერტილები, ვსაუბრობთ ჩვენს ყოფაზე და იმ ექსკლუზიურ გამოცდილებებზე, რომელიც შეიძლება განსაკუთრებით მწვავედ იდგეს საქართველოს სხვადასხვა ეთნიკური და რელიგიური ჯგუფებისთვის“. სრულად... წყარო: socialjustice.org.ge