რაჭა-ლეჩხუმი. გაეროს განვითარების პროგრამის ცნობით, ამბროლაურის სოციალური ინკლუზიური ცენტრი ერთ-ერთი უნიკალური სივრცეა საქართველოში, სადაც შშმ პირები როგორც სარეაბილიტაციო სერვისს, ისე დასაქმების, გადამზადებისა და სოციალური ინკლუზიის შესაძლებლობას იღებენ. „ცენტრის ინიციატორები და სულისჩამდგმელები არიან გაეროს განვითარების პროგრამა (UNDP) და არასამთავრობო ორგანიზაცია „ერთად რეალური ცვლილებებისთვის“. ჩვენი ხელშეწყობა განხორციელდა გაეროს ერთობლივი პროგრამის ფარგლებში, გაეროს მდგრადი განვითარების მიზნების ფონდის მხარდაჭერით. ცენტრის მოწყობაში ჩართული იყო ადგილობრივი თვითმმართველობა და ბულგარეთისა და პოლონეთის საელჩოები“. სრულად... წყარო: www.undp.org

თბილისი. საქართველოს დემოკრატიული ინიციატივა (GDI) მიმართავს პროკურატურას და იმ ავტოავარიის გამოძიების საქმის მასალების გადაცემას ითხოვს, რომელშიც საჯაროდ გავრცელებული ინფორმაციის თანახმად მოსამართლე ლაშა ჩხიკვაძეც მონაწილეობდა. „პროკურატურის ინფორმაციით საქმეზე გამოძიება შეწყვეტილია, შესაბამისად არ არსებობს მასალების, როგორც საჯარო ინფორმაციის გაცემაზე უარის თქმის საფუძველი“, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. „უფლებები საქართველოს“ ინფორმაციით, ორგანიზაცია გუშინ, დიდუბეში, ავტობუსის გაჩერებაზე დაჭრილი ქალის უფლებებს დაიცავს. „39 წლის ქალი მისმა ყოფილმა მეუღლემ დაჭრა. გავრცელებული ინფორმაციით, მამაკაცს უკვე ჰქონდა გამოწერილი შემაკავებელი ორდერი. დაჭრილი ქალი კლინიკაშია მოთავსებული“. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „საფარი“ აქვეყნებს ნინო ყვირილიანის ბლოგპოსტს ფემიციდზე: კულტურის საზღვრებში მოქცეული გაწირული ქალები. „ვხედავთ სოციალურ ქსელში როგორ თელავენ ისევ მსხვერპლს და ამ რიცხვში უმრავლესობა, სამწუხაროდ, ქალია. როგორ იტანჯებიან თვითონაც სინამდვილეში, მაგრამ ამას არასოდეს აღიარებენ განპირობებული გონების ტყვეობაში, რადგან კომფორტის ზონადაც კი ექცათ უკვე. რადგან თვითონ ვერ გაარღვიეს ჩაკეტილი ცნობიერება, გაუცნობიერებლად ცდილობენ იგივე გალიაში შეიპატიჟონ სხვებიც, რომ მარტო არ იხუთებოდნენ. შვილებს ზრდიან ამბიციებით, მახინჯი ტრადიციებით, სტერეოტიპებით და ტენიან იდეოლოგიებით, სწორედ ეს აყალიბებს მათ მომავალში უკანასკნელ ბოროტებად! ამ ჭაობიდან ამოსასვლელად, უმთავრესია იმ კულტურის საზღვრების გარღვევა, რომელმაც ბავშვობიდან დღემდე გადაავსო ადამიანის გონება. ამ ყველაფრისგან უნდა დაიცალო, რომ შენში სიყვარულისთვის ადგილი გამოთავისუფლდეს“. სრულად... წყარო: sapari.ge

სამეგრელო. სოციალური სამართლიანობის ცენტრი ეხმაურება ფოთის, ჯავახიშვილის ქუჩის მაცხოვრებლების პროტესტს, ქალაქში ჰაერის დაბინძურებასთან დაკავშირებით და ცენტრალურ და ადგილობრივ ხელისუფლებას მოუწოდებს მათ სამართლიან მოთხოვნებზე დაუყოვნებელი რეაგირებისაკენ. ორგანიზაციის ცნობით, ადგილობრივი მოსახლეობა წლების განმავლობაში აპროტესტებს ქალაქში არსებულ მძიმე ეკოლოგიურ ვითარებას - ჰაერის დაბინძურებას, არასასიამოვნო სუნსა და ხმაურს, რომლის წყაროებიც ნავსადგური, საწარმოები და ნაყარი ტვირთების ღია წესით გადამუშავება, ასევე საავტომობილო გამონაბოლქვია. სრულად... წყარო: socialjustice.org.ge

თბილისი. ორგანიზაციამ „პარტნიორობა ადამიანის უფლებებისთვის“ (PHR) თბილისის სააპელაციო სასამართლოში მორიგი საქმე მოიგო, რომელიც ფსიქიატრიულ დაწესებულებაში, არანებაყოფლობითი მკურნალობის მიზნით, ქალის უკანონო მოთავსების გამო მორალური ზიანის ანაზღაურებას ეხება. ორგანიზაცია აგრძელებს ქალთა უფლებების დაცვას განსაკუთრებით იქ სადაც დიდია სტიგმა და ადამიანებს ნაკლებად მიუწვდებათ ხელი იურიდიულ მომსახურებაზე.  თუ თქვენი უფლება ირღვევა, დარეკეთ: 0322331356 სრულად... წყარო: phr.ge

თბილისი. სამართლიანი არჩევნებისა და დემოკრატიის საერთაშორისო ორგანიზაციის (ISFED) ინფორმაციით, ნიკა გვარამიას განაჩენის გამოცხადების შემდგომ, სააგენტომ „Ongo.ge“ „ექსკლუზიური“ ინფორმაცია გაავრცელა, თითქოს სალომე ზურაბიშვილი ნიკა გვარამიას შეიწყალებს, რაც ნაციონალური მოძრაობის ლიდერებთან წინასწარაა შეთანხმებული. აღნიშნული ინფორმაცია რამდენიმეწუთიანი შუალედით გავრცელდა პროსახელისუფლებო მედიასაშუალებების გვერდებსა და ანონიმურ ფეისბუქგვერდებზე, რაც აქამდეც არაერთხელ მომხდარა. სრულად... წყარო: isfed.ge

თბილისი. საქართველოს ახალგაზრდა იურისტთა ასოციაციის ინფორმაციით, ქართული ოცნების დეპუტატების მიერ ინიცირებული კანონპროექტების მიხედვით, შუალედურ არჩევნებში გამარჯვებული საკრებულოს მაჟორიტარი წევრი სადეპუტატო უფლებამოსილების განხორციელებას შეუდგება შესაბამისი არჩევნების საბოლოო შედეგების შემაჯამებელი ოქმის ცესკოს ოფიციალურ ვებგვერდზე გამოქვეყნებიდან მე-11 დღეს. შესაბამისად, საკრებულოს მიერ მისი უფლებამოსილების ცნობა აღარ იქნება საჭირო.  ორგანიზაციის მოსაზრებით, წარმოდგენილი ინიციატივა შეიცავს არაერთ სამართლებრივ ხარვეზს; ის აუარესებს ადგილობრივი დემოკრატიის ხარისხს, დისკრიმინაციული მიდგომების გამოყენებით ხელს უშლის მუნიციპალურ დონეზე პოლიტიკურ კონსენსუსზე დამყარებული წარმომადგენლობითი დემოკრატიის განხორციელებას, ასუსტებს პოლიტიკური დეცენტრალიზაციის სტანდარტს, ამასთან, ემსახურება ცალმხრივი პარტიული მიზნების მიღწევას და კოლეგიური წარმომადგენლობითი ორგანოების წევრთა საქმიანობის დაწყების მხრივ კანონმდებლობაში ამკვიდრებს არაერთგვაროვან მიდგომას. საია მოუწოდებს პარლამენტს, კანონმდებლობის ცვლილებების ინსტრუმენტი არ გამოიყენოს თვითნებურად, მხოლოდ ცალმხრივი პარტიული ინტერესების გათვალისწინებით და არსებული კრიზისი გადაჭრას არა დისკრიმინაციული და დაუსაბუთებელი ინიციატივებით, არამედ ამომრჩეველთა ნების რეალიზაციაზე ორიენტირებული, დროებითი ანტიკრიზისული ნორმებით. სრულად... წყარო: gyla.ge

თბილისი. არასამთავრობო ორგანიზაციების ნაწილი ეხმაურება სამართალდამცავების მხრიდან მოძრაობა „სირცხვილიას“ აღმასრულებელი დირექტორის, აქტივისტ გიორგი მჟავანაძის, უკანონო დაკავების, მის წინააღმდეგ განხორციელებული არასათანადო მოპყრობისა და ძალადობის  ფაქტის შესახებ გავრცელებულ ინფორმაციას. „გიორგი მჟავანაძის განცხადებით, 2022 წლის 15 მაისს პოლიციის თანამშრომელი დაუკავშირდა და პოლიციის განყოფილებაში დოკუმენტის გადასაცემად დაიბარა. 17 მაისს გიორგი მჟავანაძე თბილისის პოლიციის გლდანი-ნაძალადევის მე-9 განყოფილებაში გამოცხადდა, რა დროსაც, მისი თქმით, იგი დააკავეს და მიაყენეს როგორც სიტყვიერი, ასევე ფიზიკური შეურაცხყოფა. გიორგი მჟავანაძე საუბრობს პოლიციელების მხრიდან მის მიმართ განხორციელებულ არაერთგზის ფიზიკურ და სიტყვიერ ძალადობასა დ მუქარაზე. ხელმომწერი ორგანიზაციები მოვუწოდებთ სპეციალურ საგამოძიებო სამსახურს დროული და ეფექტიანი გამოძიებისკენ. პოლიციაში არასათანადო მოპყრობის ფაქტის გამოვლენა, დამნაშავეთა იდენტიფიცირება და მის ჩამდენთა ადეკვატური დასჯა სახელმწიფოს ერთ-ერთ პრიორიტეტს უნდა წარმოადგენდეს.  სხვა შემთხვევაში ყოველთვის იარსებებს ეჭვი, რომ სამართალდამცავ სისტემაში არასათანადო მოპყრობა არის ხელისუფლების სისტემური პოლიტიკის  ნაწილი“, ნათქვამია განცხადებაში. სრულად... წყარო: gyla.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის“ ეხმიანება ტელეკომპანია „მთავარის“ დირექტორის, ნიკა გვარამიას მიმართ გამოტანილ გამამტყუნებელ განაჩენს. „აღნიშნული გადაწყვეტილება კრიტიკულ მედიაზე ზეწოლის კიდევ ერთი სახიფათო პრეცედენტია, რომელიც კითხვებს აჩენს გადაწყვეტილების კანონიერებასთან დაკავშირებით და შერჩევითი და პოლიტიზირებული მართლმსაჯულების ნიშნებს შეიცავს“, ნათქვამია განცხადებაში. სრულად... წყარო: socialjustice.org.ge

თიანეთი. „საფარის“ ინფორმაციით, 19 მაისს, ორგანიზაციის იურისტი, თამარ ლუკავა თიანეთში მცხოვრებ ქალებს ოჯახში, ქალთა და ბავშვთა მიმართ ძალადობაზე და მისგან თავდაცვის მექანიზმებზე ესაუბრა. შეხვედრა საქართველოს წითელი ჯვრის ინიციატივით გაიმართა. აუდიტორია, რომელიც საკითხით დაინტერესდა საკმაოდ მრავალფეროვანი აღმოჩნდა. შეხვედრას 40-ზე მეტი ქალი ესწრებოდა. თამარ ლუკავა მათ ესაუბრა ძალადობის ფორმებზე, დამცავი და შემაკავებელი ორდერების მუშაობის მექანიზმებზე, ბავშვთა მიმართ ძალადობაზე. „საფარის“ იურისტმა ქალებს ორგანიზაციის მობილური აპლიკაცია Sაfe You წარუდგინა. ბევრმა მათგანმა აპლიკაცია ადგილზევე გადმოწერა და მისი გამოყენების ინსტრუქციას დეტალურად გაეცნო. სრულად... წყარო: sapari.ge

კახეთი. სოციალური სამართლიანობის ცენტრის ინფორმაციით, პანკისში დროშების გადახატვაზე რუსთავი 2-ის მანიპულაციური სიუჟეტი გასაჩივრდა. ორგანიზაციამ 17 მაისს პანკისის ხეობის ადგილობრივი აქტივისტისა და ჟურნალისტის სულხან ბორძიკაშვილის სახელით, ჟურნალისტური ეთიკის ქარტიასა და „რუსთავი 2“-ის თვითრეგულირების ორგანოს საჩივრით მიმართა და არაზუსტი, მანიპულაციური და ეთნიკური/რელიგიური უმცირესობების მიმართ სტერეოტიპული შინაარსის მასალის შესწორებას ითხოვს. სრულად... წყარო: socialjustice.org.ge

იმერეთი. „უფლებები საქართველოს“ ჭიათურის სამართელბრივი დახმარების ცენტრის იურისტებს გაცნობთ.  „თაკო ჯოხაძე და ეკა ცუცქირიძე, რომლებიც ახლად ამოქმედებულ ჭიათურის სამართლებრივი დახმარების ცენტრში საქმიანობენ და უკვე შეუდგნენ გენდერული და ოჯახში ძალადობის მსხვერპლთა უფლებების დაცვას. „უფლებები საქართველოს“ ჭიათურის სამართლებრივი დახმარების ცენტრი ამოქმედდა 2022 წლის მაისიდან, პროექტის „გენდერული და ოჯახში ძალადობის მსხვერპლთა მხარდაჭერა“ ფარგლებში, ევროკავშირისა და ASB საქართველოს მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ეხმიანება მოძრაობა „სირცხვილიას“ ერთ-ერთი ლიდერის, გიორგი მჟავანაძის დაკავებასა და მის მიმართ განხორციელებულ შესაძლო არასათანადო მოპყრობის ფაქტს. ორგანიზაცია მოუწოდებს შესაბამის უწყებებს, საქმეზე აწარმოონ დროული და ეფექტიანი გამოძიება და უზრუნველყონ ქვეყანაში სამოქალაქო და პოლიტიკური უფლებების დაცვა. სამოქალაქო აქტივისტის ფიზიკური ხელშეუხებლობის შესაძლო დარღვევა, მით უმეტეს, პოლიციის თანამშრომელთა მიერ, წარმოადგენს სახიფათო და მეტად საყურადღებო პრეცედენტს, ამიტომ, მნიშვნელოვანია, რომ გამოძიება ჩატარდეს გონივრულ ვადებში და უზრუნველყოფილ იქნეს მისი გამჭვირვალობა. განცხადება სრულად... წყარო: socialjustice.org.ge

თბილისი. მედიის ადვოკატირების კოალიცია ეხმაურება 2021 წელს არასამთავრობო ორგანიზაციების წარმომადგენლების, ჟურნალისტების, სამოქალაქო აქტივისტების, რელიგიური ორგანიზაციების, პოლიტიკოსების და სხვა პირთა შესაძლო უკანონო ფარული მოსმენა-მიყურადების შესახებ გავრცელებულ ინფორმაციაზე მიმდინარე გამოძიების პროცესს.  „მიგვაჩნია, რომ თბილისის პროკურატურის რეაგირება არსებითად არაეფექტიანია და სამართლებრივი შედეგის დადგომას მიზნად არ ისახავს. გამოძიების მიმდინარეობის მიუხედავად, ამ დრომდე არ არის გამოკითხული შესაძლო უკანონო ფარული მოსმენა-მიყურადების მსხვერპლთა ნაწილი, ხოლო უკვე გამოკითხული პირებიდან დაზარალებულის სტატუსის მინიჭებაზე პროკურატურამ და სასამართლომ ყველას დაუსაბუთებელი უარი განუცხადა. დანაშაულის მსხვერპლებისთვის, დაზარალებულის სტატუსის არარსებობის პირობებში, გამოძიების მიმდინარეობის, ჩატარებული საგამოძიებო მოქმედებების და მათი შედეგების თაობაზე ინფორმაცია ხელმიუწვდომელი რჩება“, ნათქვამია განცხადებაში. სრულად... წყარო: mediacoalition.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: ვინ არის ნიკა გვარამიას საქმის განმხილველი მოსამართლე? „ის 2019 წელს თანამდებობაზე გამწესდა უვადოდ. მოსამართლე ჩხიკვაძე ფიგურირებდა 2015 წლის 22 იანვარს მომხდარ ავტოსაგზაო შემთხვევაში, რომელსაც ერთი ადამიანი ემსხვერპლა. პროკურატურამ მაშინ უარყო ჩხიკვაძის რაიმე ბრალეულობა ნიკა გვარამიას საქმეში მოწმე, ზაზა გველესიანი მოსამართლე ლაშა ჩხიკვაძის ახლო მეგობარი და „რუსთავი 2”-ის მმართველი ჰოლდინგის დირექტორი იყო, მაგრამ მოსამართლემ საქმიდან თავი არ აიცილა. მოსამართლე ჩხიკვაძის სახელს უკავშირდება ნაციონალური მოძრაობის ხელისუფლების მაღალჩინოსნების გიგი უგულავას, ბაჩო ახალაიასა და ირაკლი ოქრუაშვილის სისხლის სამართლის გახმაურებული საქმეები“, ნათქვამია ბლოგპოსტში. სრულად... წყარო: transparency.ge

თბილისი. სოციალური სამართლიანობის ცენტრი აქვეყნებს გიულგიუნ მემედლის ბლოგპოსტს: კულტურა და ხელოვნება სოციალური გარდაქმნებისთვის. „უკვე წლებია ერთი და იმავე პრობლემის წინაშე ვდგავართ. ქართულ და აზერბაიჯანულ საზოგადოებებს შორის არსებობს ინტეგრაციის პრობლემა და საქართველოში მცხოვრები ხალხები არ ცნობენ ერთმანეთის კულტურას.  მიუხედავად გარკვეული პოზიტიური ნაბიჯებისა, სიძულვილის ენა და ქსენოფობია გარკვეული ფორმებით მაინც იჩენს თავს ჩვენს საზოგადოებაში და ერთმანეთს კიდევ უფრო ღრმად გვაშორებს. ჩნდება კითხვა: რატომ არის ინტეგრაციის  პროცესი ასეთი ნელი და ხარვეზიანი, მიუხედავად იმისა, რომ სამოქალაქო საზოგადოება ჩვენს ქვეყანაში  გაძლიერდა და ბოლო წლებში არაერთი მასშტაბური პროექტი განხორციელდა ამ მიმართულებით? შევეცდები ამ კითხვას კულტურისა და ხელოვნების მნიშვნელობის წარმოჩინებით ვუპასუხო და გაგიზიაროთ ჩემი რწმენა, რომ მათ  სოციალური გარდაქმნების ხელშეწყობისთვის გადამწყვეტი მნიშვნელობა აქვს“. სრულად... წყარო: socialjustice.org.ge ფოტო: On.ge

თბილისი. გაეროს ქალთა ფონდის ინფორმაციით, სსიპ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ფარგლებში ფუნქციონირებს თავშესაფრები და კრიზისული ცენტრები, რომლებიც მხარდაჭერის მომსახურებებს აწვდიან ძალადობის მსხვერპლ ადამიანებს (ბავშვებთან ერთად). ცხელი ხაზი 116 006 ფუნქციონირებს 9 ენაზე, მათ შორის უკრაინულ ენაზე. სრულად... წყარო: ორგანიზაციის გვერდი სოციალურ ქსელში

თბილისი. უფლებები საქართველოს იურისტის, ელისო რუხაძის დახმარებით, გენდერული ნიშნით ძალადობის მსხვერპლი ქალის დასაცავად შემაკავებელი ორდერი გამოიცა. „საყურადღებოა, რომ თავად მსხვერპლის პოზიციის გათვალისწინებით, მასთან კომუნიკაციაზე შეზღუდვა დაწესდა იმგვარად, რომ არ დაზიანებულიყო მცირეწლოვანი შვილის საუკეთესო ინტერესი და მამას ბავშვის შეუფერხებლად მონახულების შესაძლებლობა ჰქონოდა“. სრულად... წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციები მხარდაჭერას უცხადებენ ნიკა გვარამიას და „მთავარი არხის” გუნდს. „თბილისის საქალაქო სასამართლოს მიერ 2022 წლის 16 მაისს მიღებული გადაწყვეტილება და ნიკა გვარამიასთვის თავისუფლების აღკვეთის მისჯა აღიქმება როგორც გაფრთხილება და მუქარა სხვა დამოუკიდებელი მედიასაშუალებების მიმართ, რათა შეწყვიტონ ხელისუფლების საქმიანობის კრიტიკულად გაშუქება, არ შეასრულონ ხელისუფლების მაკონტროლებელი ფუნქცია და უარი თქვან ხელისუფლებისთვის არასასურველი ფაქტების საზოგადოებამდე მიტანაზე. ვფიქრობთ, მსგავსმა პროცესებმა შესაძლოა უარყოფითი გავლენა მოახდინოს  საქართველოს ევროპული ინტეგრაციის პროცესზე“, ნათქვამია განცხადებაში. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციის ინფორმაციით, ამ წუთებში საქართველოს საკონსტიტუციო სასამართლოში არსებითი განხილვის სხდომა მიმდინარეობს საქმეზე „ლონდა თოლორაია და საქართველოს სახალხო დამცველი საქართველოს პარლამენტის წინააღმდეგ“ (კონსტიტუციური სარჩელები N1673 და N1681).  სრულად... წყარო: ორგანიზაციის გვერდი სოციალურ ქსელში ფოტოს წყარო: police.ge

თბილისი. საქართველოს ახალგაზრდა იურისტთა ასოციაცია ჰომოფობიის, ტრანსფობიის და ბიფობიის დღესთან დაკავშირებით განცხადებას ავრცელებს. „ლგბტქ+ თემი ერთ-ერთი ყველაზე გარიყული და მოწყვლადი ჯგუფია საქართველოში. წინა წლებში შედარებით გაუმჯობესებული საკანონმდებლო ჩარჩოს მიუხედავად, არ ხდება პრაქტიკაში არსებული ხარვეზების აღმოფხვრა. მათი უფლებრივი მდგომარეობის გაუმჯობესების მიმართულებით მნიშვნელოვანი ნაბიჯები კვლავ არ გადადგმულა. ლგბტქ+ პირების მდგომარეობა ცხოვრების სხვადასხვა სფეროში ისევ კრიტიკულია“, ნათქვამია განცხადებაში. სრულად... წყარო: gyla.ge