თბილისი. საქართველოს ახალგაზრდა იურისტთა ასოციაციამ 2021 წლის 8 აპრილს, მ-მ-ს სახელით, საქართველოს საკონსტიტუციო სასამართლოს მიმართა.  საიას მიაჩნია, რომ მეხანძრისათვის დადგენილი საპენსიო ასაკი, 55 წელი, არ არის კონსტიტუციური და ეწინააღმდეგება თანასწორობის უფლებას. მეხანძრე ავტომატურად თავისუფლდება სამსახურიდან, როგორც კი მიაღწევს 55 წელს.  სრულად...   წყარო: ორგანიზაციის ვებგვერდი

თბილისი. 2021 წლის 7 აპრილს მდინარე ენგურიდან მაშველებმა 4 გარდაცვლილი ადამიანის ცხედარი ამოიტანეს. არსებული ინფორმაციით, ისინი ოკუპირებული გალიდან საქართველოს ხელისუფლების კონტროლირებად ტერიტორიაზე გადმოსვლას ცდილობდნენ.  სახალხო დამცველი ღრმა მწუხარებას გამოთქვამს მომხდარი ფაქტის გამო, უსამძიმრებს გარდაცვლილთა ოჯახებს და მოუწოდებს საქართველოს ხელისუფლებას, საერთაშორისო თანამეგობრობის დახმარებით გააძლიეროს ზეწოლა საოკუპაციო ძალებზე ე.წ. გამშვები პუნქტის მთლიანი მოსახლეობისათვის გასახსნელად; ასევე - კიდევ ერთხელ იმსჯელოს 5 დღიანი სავალდებულო კარანტინის ღონისძიებებზე, რაც ოკუპირებული გალის მოსახლეობას გადაადგილებაზე დამატებით ბარიერს შეუმსუბუქებს.  სრულად...   წყარო: ორგანიზაციის ვებგვერდი

თბილისი. ნამახვაჰესის საკითხზე მომუშავე ორგანიზაციები კომპანიისა და სახელმწიფოს მხრიდან ცილისმწამებლურ კამპანიას ეხმიანებიან და სპეციალურ განცხადებას ავრცელებენ. „სოციალური სამართლიანობის ცენტრი (ყოფილი EMC), მწვანე ალტერნატივა და საია, შეშფოთებას გამოვთქვამთ, რომ ნამახვანი ჰესის პროექტის განხორციელებისას ჩადენილი ფუნდამენტური კანონდარღვევების, ადამიანის უფლებების უხეში შელახვის, სახელმწიფო ინტერესების დათმობით დადებული ხელშეკრულების, გაუმჭვირვალობისა და ინსტიტუციური ჩავარდნების შესახებ ჩვენ მიერ გაჟღერებული კრიტიკის საპასუხოდ ხელისუფლება უარს ამბობს დიალოგის პროცესზე და აგრძელებს ადგილობრივების შეკრების, გარემოს დაცვის, საჯარო სივრცით სარგებლობის, გამოხატვის თავისუფლებისა და გადაადგილების უფლებების შეზღუდვას რიონის ხეობაში. ამ უფლებაშემლახავ პრაქტიკას ბოლო პერიოდში თან ახლავს დეზინფორმაციული და მადისკრედიტირებელი შეტევები აქტივისტების, საზოგადოებრივი ორგანიზაციებისა და მეცნიერების წინააღმდეგ, რომლებიც ეწინააღმდეგებიან ნამახვანჰესის პროექტის ამ ფორმით განხორციელებას“, - ვკითხულობთ განცხადებაში. სრულად...  წყარო: socialjustice.org

თბილისი. სახელმწიფო ინსპექტორის სამსახურის ანგარიშთან დაკავშირებით, IDFI და სოციალური სამართლიანობის ცენტრი განცხადებას ავრცელებენ. IDFI და სოციალური სამართლიანობის ცენტრი (ყოფილი EMC) მიიჩნევენ, რომ სახელმწიფო ინსპექტორის სამსახურის გაძლიერების მიზნით, არსებითად მნიშვნელოვანია: სწრაფი და ქმედითი საკანონმდებლო ნაბიჯების გადადგმა საგამოძიებო და საპროკურორო ფუნქციების გამიჯვნის მიმართულებით;  სახელმწიფო ინსპექტორის სამსახურის მანდატის გაზრდა, რათა მის კომპეტენციაში მოექცეს სამართალდამცავთა მიერ ჩადენილი ყველა დანაშაული;  საგამოძიებო უწყების მანდატის გავრცელება შინაგან საქმეთა მინისტრის, სახელმწიფო უსაფრთხოების სამსახურის ხელმძღვანელთა შესაძლო დანაშაულებზე;  სახელმწიფო ინსპექტორის სამსახურისთვის დაცვის სპეციალური ღონისძიების გამოყენების უფლებამოსილების მინიჭება, რაც მსხვერპლის, მისი ახლო ნათესავის ან ოჯახის წევრის უსაფრთხოების დაცვის მყარ გარანტიებს უზრუნველყოფს;  ინსპექტორის სამსახურის სათანადო მატერიალური და ადამიანური რესურსით უზრუნველყოფა. სრულად...  წყარო: socialjustice.org.ge

თბილისი. 3 აპრილს, თბილისის საქალაქო სასამართლოს ადმინისტრაციულ საქმეთა კოლეგიის მოსამართლემ არ დააკმაყოფილა შინაგან საქმეთა სამინისტროს მოთხოვნა, გაიზიარა ადამიანის უფლებათა ცენტრის პოზიცია, საპროტესტო აქციაზე დაკავებული აქტივისტი ა-მ არ ცნო სამართალდამრღვევად და შეწყვიტა მის მიმართ საქმის წარმობა.  შეგახსენებთ, რომ 2021 წლის 19 თებერვალს, პარლამენტის წინ მიმდინარე საპროტესტო აქციის მონაწილეებმა, პერმანენტული აქციების გამართვის მიზნით, კარვების გაშლა გადაწყვიტეს, რისი საშუალებაც არ მიეცათ პოლიციელთა წინააღმდეგობის გამო. შემთხვევის დროს დააკავეს რამდენიმე აქტივისტი, მათ შორის ა.მ. იგი იმავე დღეს გათავისუფლდა ხელწერილის საფუძველზე, თუმცა, მის მიმართ შედგა ადმინისტრაციული სამართალდარღვევის ოქმი ასკ 173-ე მუხლით გათვალისწინებული გადაცდომის ფაქტზე, რაც პოლიციელთა კანონიერი მოთხოვნის დაუმორჩილებლობას გულისხმობს.  სრულად...  წყარო: ორგანიზაციის ვებგვერდი

თბილისი. ხელმომწერი ორგანიზაციები ეხმაურებიან რიონის ხეობაში გუშინ განვითარებულ მოვლენებს და დაუშვებლად მიიჩნევენ საპოლიციო ძალების მობილიზების ფონზე, ადამიანის უფლებების უხეში დარღვევით და მოსახლეობის მოთხოვნების უგულვებელყოფით, ნამახვანი ჰესის სამშენებლო სამუშაოების განახლებას. „ნაცვლად იმისა, რომ სახელმწიფომ საჯარო მდგრადი ინტერესების და სიკეთეების დაცვაზე ორიენტირებული მოდერატორის როლი იკისროს, რაც სოციალური და სამართლებრივი სახელმწიფოს კონსტიტუციური პრინციპებიდან გამომდინარეობს, სახელისუფლებო აპარატი დღეს სრულად კერძო ინტერესის მხარეს დგება. ბოლო თვეების განმავლობაში ჩვენ ვხედავდით ხელისუფლების მხრიდან საპოლიციო, საინფორმაციო და ადმინისტრაციული რესურსების მაქსიმალურ მობილიზებას ნამახვანი ჰესის მშენებლობის მოწინააღმდეგეების არაღიარების და დისკრედიტაციის მიზნით. თუმცა, დღეს ხელისუფლება უკვე ფუნდამენტური უფლებების ხელყოფით, რეპრესიული აპარატის აგრესიული გამოყენებით საზოგადოებრივ ჯგუფებთან დემოკრატიული დიალოგისა და სამართლებრივი გზებით შექმნილი კრიზისის გადაჭრაზე უარს აცხადებს“, ნათქვამია ერთობლივ განცხადებაში. სრულად... წყარო: gyla.ge

თბილისი. „მედიის ადვოკატირებისათვის“ წევრი ორგანიზაციები დაუშვებლად მიიჩნევენ ინტერნეტის ხელმისაწვდომობის შეზღუდვას ნამოხვანში. „ხელისუფლებას შევახსენებთ, რომ ინტერნეტზე წვდომა და ინტერნეტით თავისუფლად სარგებლობის უფლება დაცულია საქართველოს კონსტიტუციით. ნამოხვანში მიმდინარე საპროტესტო აქციის მიმართ, მაღალი საჯარო ინტერესის ფონზე კი მიუღებელია კონსტიტუციით გარანტირებული უფლების დაუსაბუთებელი შეზღუდვა. გავრცელებული ინფორმაციის თანახმად, „შინაგან საქმეთა სამინისტრომ ნამოხვანში დღეს ინტერნეტკავშირიც ჩაახშო, რის გამოც პირდაპირი ჩართვის განხორციელება არ ხერხდება.“ ადგილობრივების ინფორმაციით, ინტერნეტის გავრცელების ამგვარი ხარვეზი ნამოხვანში სხვა პერიოდებში არ დაფიქსირებულა. მოვუწოდებთ, საქართველოს შინაგან საქმეთა მინისტრს: გაკეთოს განმარტება გამოხატვის თავისუფლების უკანონო შეზღუდვის ფაქტის შესახებ; დაუყოვნებლივ მიიღოს ზომები ინტერნეტის ხელმისაწვდომობის უზრუნველსაყოფად, რათა ნამოხვანში მყოფმა პირებმა ისარგებლონ ინფორმაციის მიღებისა და გავრცელების უფლებით, ჟურნალისტებს კი ჰქონდეთ სათანადო სამუშაო პირობები პროფესიული საქმიანობის შესასრულებლად.  Მოვუწოდებთ კომუნიკაციების კომისიას შეისწავლოს ნამოხვანში ინტერნეტის შეფერხების საკითხი და მოგვაწოდოს ინფორმაცია ამ დროისათვის არსებულ მაჩვენებელზე“, - ნათქვამია კოალიციის განცხადებაში.  სრულად... წყარო: კოალიციის გვერდი სოციალურ ქსელში

თბილისი. სოციალური სამართლიანობის ცენტრი (ყოფილი EMC) ეხმიანება მიტროპოლიტი სტეფანეს მიერ მონაზონი სოსანას მიმართ გაკეთებულ განცხადებებს და გადაწყვეტილებებს. ორგანიზაცია მიიჩნევს, რომ „მიტროპოლიტი სტეფანეს მიერ მიღებული მკაცრი გადაწყვეტილებები გარდა იმისა, რომ საპატრიარქოს გადაწყვეტილების მიმართ კრიტიკულად განწყობილი ეპარქიის წევრების დევნის და დასჯის ნიშნებს ატარებს, ის მონაზვნების მიმართ ეკლესიაში უსამართლო, დამამცირებელ და ქალთმოძულე დამოკიდებულებას ავლენს. ის სხვა მონაზვნებშიც დაუცველობის განცდას ქმნის და ხელს უწყობს ქალების უხეში დაქვემდებარების და იერარქიზების ნორმალიზებას. უფრო მეტიც, მაღალი სასულიერო იერარქის მხრიდან გამოვლენილი ქალთმოძულეობა საზოგადოებაში ამგვარი განწყობების წახალისებას მოახდენს“. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) აქვეყნებს ახალ კვლევას „უმცირესობების მონაწილეობის უფლება და ევროპის საბჭოს ჩარჩო კონვენციის სტანდარტები“. „კვლევაში გაანალიზებულია ევროპის საბჭოს ჩარჩო კონვენციის მე-15 მუხლით დადგენილი სტანდარტები და მრჩეველთა კომიტეტის მეირ ევროპის 20-მდე სახელმწიფოსთვის გაცემული რეკომენდაციები. კვლევა საშუალებას გვაძლევს დავინახოთ თუ რა სტანდარტებს ადგენს ევროპის საბჭო უმცირესობას მიკუთვნებული ჯგუფებისთვის კულტურულ, სოციალურ, ეკონომიკურ ცხოვრებასა და საჯარო საქმიანობაში ეფექტიანი მონაწილეობის უფლების განხორციელებისთვის“. სრულად... წყარო: socialjustice.org.ge

თბილისი. 1 აპრილს ომბუდსმენმა საზოგადოებას ადამიანის უფლებებისა და თავისუფლებების შესახებ წლიური ანგარიში წარუდგინა. 486 გვერდიან ანგარიშში მიმოხილულია 2020 წელს კონსტიტუციით გარანტირებული ადამიანის უფლებებათა მდგომარეობის გამოწვევები და პროგრესი, ასევე, გაცემული რეკომენდაციებისა და წინადადებების შესრულების მდგომარეობა. „საპარლამენტო ანგარიშის პირველი თავი სიცოცხლის უფლების დაცვის კუთხით სახელმწიფოს წინაშე არსებულ გამოწვევებს განიხილავს. 2020 წელს სახალხო დამცველის აპარატმა 2015-2017 წლებში პატიმართა გარდაცვალების 17 შემთხვევა შეისწავლა. საქმის მასალები გაცნობის შედეგად დგინდება, რომ გარდაცვალების შემდეგ ჩატარებული ექსპერტიზების თანახმად, პატიმრებს სიცოცხლეში ჯანმრთელობის მნიშვნელოვანი პრობლემები ქონდათ, რომელთაც პენიტენციურ დაწესებულებებში არ მკურნალობდნენ. სამწუხაროდ, გამოძიება მხოლოდ გარდაცვალების საბოლოო მიზეზებით ინტერესდებოდა და არ იკვლევდა უტარდებოდათ თუ არა, ან რატომ არ უტარდებოდათ პატიმრებს სიცოცხლეში შესაბამისი სამედიცინო მომსახურება. იმის გამო, რომ ჯანმრთელობის დაცვის სახელმწიფო პროგრამა არ ითვალისწინებს ფსიქიატრიულ სტაციონარში მოთავსებული პირებისთვის ფიზიკური ჯანმრთელობის პრობლემების კვლევებსა და მკურნალობას. შედეგად, არასათანადო მკურნალობა და შესაბამისი რისკფაქტორების გაუთვალისწინებლობა პაციენტთა გარდაცვალებებს იწვევს“. სრულად... წყარო: ombudsman.ge

თბილისი. სახელმწიფო სერვისების განვითარების სააგენტოს 2021 წლის 1 აპრილის გადაწყვეტილებით, „უფლებები საქართველოს“ განცხადება დაკმაყოფილდა და ლ.ო.-ს მიენიჭა საქართველოში მოქალაქეობის არმქონე პირის სტატუსი. ამ გადაწყვეტილების საფუძველზე, „უფლებები საქართველო“ განაგრძობს ლ.ო.-სათვის სამართლებრივი დახმარების გაწევას, რათა მან შესაბამისი კატეგორიის ბინადრობის ნებართვა მოიპოვოს, მიიღოს უფლებებზე წვდომა და შეძლოს სახელმწიფო სერვისებით სარგებლობა. სრულად... წყარო: rights.ge

თბილისი. საქართველოს ახალგაზრდა იურისტთა ასოციაცია, პირადი ცხოვრების ამსახველი კადრების გავრცელების შესახებ საქმეში, ეკა ბესელიას ინტერესებს დაიცავს. „პირადი ცხოვრების ამსახველი კადრებით შანტაჟი, განსაკუთრებით ბოლო წლების განმავლობაში, მნიშვნელოვან იარაღად იქცა, რომელსაც ხელისუფლება თუ არაფორმალურად დაინტერესებული სუბიექტები კონკრეტულ პირების საჯარო თუ პოლიტიკური ცხოვრებიდან განდევნის მიზნით აქტიურად იყენებენ. შემაშფოთებელია ის ფაქტი, რომ საქართველოს ხელისუფლება მიზანმიმართულად არიდებს თავს ამგვარი დანაშაულების დროულ და ეფექტიან გამოძიებას, რითიც ადასტურებს იმას, რომ არ აქვს პოლიტიკურ ნება, აღიკვეთოს ფარული ჩანაწერებით შანტაჟის პრაქტიკა. ეკა ბესელიას საქმე ერთ-ერთი ის შემთხვევაა, რომელიც ნათლად წარმოაჩენს პირადი ცხოვრების ამსახველი კადრებით შანტაჟისა და აღნიშნულ ფაქტებზე სახელმწიფო ორგანოების არაქმედითი რეაგირების სისტემურ პრობლემას“, - ვკითხულობთ ორგანიზაციის მიერ გავრცელებულ ინფორმაციაში. სრულად...  წყარო: ორგანიზაციის ვებგვერდი

თბილისი. „უფლებები საქართველომ“ გამართა ონლაინ შეხვედრა პრაქტიკოს ადვოკატებთან, რომლებიც თავშესაფრის მაძიებლების, საერთაშორისო დაცვის სტატუსის მქონე პირებისა და საქართველოში მცხოვრები მიგრანტების უფლებების დაცვაზე მუშაობენ. შეხვედრას იურიდიული დახმარების სამსახურის და კერძო საადვოკატო ბიუროების წარმომადგენლები დაესწრნენ.  მონაწილეებმა განიხილეს სახელმწიფო უსაფრთხოების საკითხების გავლენა უცხო ქვეყნის მოქალაქეებისა და მოქალაქეობის არმქონე პირებისათვის საერთაშორისო დაცვისა და ბინადრობის ნებართვების მინიჭებაზე, ასევე იმსჯელეს საქართველოს საერთო სასამართლოებში საერთაშორისო დაცვის და ბინადრობის ნებართვების საქმეების განხილვის სპეციფიკაზე.  სრულად...   წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის (საია) ინფორმაციით, ბათუმის საკრებულოსთან მიმდინარე პროტესტის დროს ადმინისტრაციული წესით დაკავებული აქტივისტი სასამართლომ გაათავისუფლა. სამოქალაქო აქტივისტი, ალბერტ არაქელოვი, დრამის ჯოხების ხის დაფაზე დარტყმით გამოხატავდა პროტესტს საკრებულოში დაგეგმილი საკითხის განხილვაზე დასწრების უფლების შეზღუდვის და თავად განსახილველი საკითხის მიუღებლობის გამო. საკრებულო ბათუმის ზღვისპირა პლაჟის მონაკვეთების პირდაპირი განკარგვის წესით იჯარით სარგებლობაში გადაცემის საკითხს განიხილავდა.  პროტესტის გამოხატვის დროს, პოლიციამ აქტივისტი წვრილმანი ხულიგნობის მუხლით დააკავა. „ბათუმის საქალაქო სასამართლომ ალბერტ არაქელოვის საქმე დღესვე განიხილა და დაადგინა, რომ სამართალდარღვევას ადგილი არ ჰქონია. შესაბამისად, სასამართლომ შეწყვიტა საქმის წარმოება და დაკავებული აქტივისტი გაათავისუფლა. მის ინტერესებს სასამართლოში საია იცავდა“. სრულად... წყარო: gyla.ge

თბილისი. მედიაში გავრცელებული ინფორმაციის თანახმად, ოკუპირებული აფხაზეთის სამართალდამცავმა ორგანოებმა მოკვლევა დაიწყეს ალიონა თანიას მიმართ, რომელიც სოციალურ ქსელში გავრცელებულ ვიდეოში ამბობს, რომ „აფხაზეთი საქართველოა“. ოკუპირებული რეჟიმის სამართალდამცველებმა ალიონას აღნიშნული ქმედებისთვის საზოგადოების წინაშე ბოდიში მოახდევინეს. „უფლებები საქართველო“ მიიჩნევს, რომ ოკუპირებული რეჟიმის მიერ ალიონა თანიას მიმართ მოკვლევის დაწყება ეწინააღმდეგება ადამიანის უფლებათა ევროპული სასამართლოს განმარტებებსა და სტანდარტებს. სრულად... წყარო: rights.ge

თბილისი. სოციალური სამართლიანობის ცენტრმა (ყოფილი EMC) გამოსცა კვლევის დოკუმენტი: ეთნიკური უმცირესობების დასაქმების პოლიტიკა. დოკუმენტი გამოიცა პროექტის - „ეთნიკური უმცირესობების ინტეგრაციის და უფლებების დაცვის გაძლიერება კვლევის, განათლების, ადვოკატირებისა და ნდობის მშენებლობის გზით“ - ფარგლებში,  „არსებული რეალობა ორმაგად აზიანებს ეთნიკური უმცირესობების დასაქმების პროცესს, რადგან განათლებაზე, სახელმწიფო სერვისებზე, მათ შორის, მხარდამჭერ ეკონომიკურ პროგრამებზე მწირი ხელმისაწვდომობის, სუსტი ენის კომპეტენციებისა და ენის პოლიტიკაში უმცირესობების ენის რადიკალური გამოტოვების, დისკრიმინაციული გარემოს გამო, მათთვის რთული ხდება სოციალურ და ეკონომიკურ ცხოვრებაში ჩართვა და მონაწილეობა.  წინამდებარე დოკუმენტის მიზანია ეთნიკური უმცირესობების დასაქმების პოლიტიკის რელევანტური გამოცდილებების მიმოხილვა, რომელიც შეიძლება გახდეს საინტერესო რესურსი სახელმწიფოსთვის დასაქმების პოლიტიკაში ეთნიკური უმცირესობების სპეციალური საჭიროებების გააზრებისა და დამატებითი მხარდამჭერი პოლიტიკების გატარების პროცესში“. სრულად... წყარო: socialjustice.org.ge

თბილისი. 17, 19 და 26 მარტს საქართველოს სახალხო დამცველის აპარატმა, ევროპის საბჭოს საქართველოს ოფისთან თანამშრომლობით, საქართველოს შინაგან საქმეთა სამინისტროს, საქართველოს პროკურატურისა და ადვოკატთა ასოციაციის წარმომადგენლებთან, ქალთა მიმართ სექსუალური ძალადობის დანაშაულებზე მართლმსაჯულების განხორციელების საკითხებზე სამუშაო შეხვედრები გამართა. „შეხვედრებზე პროკურორებს, გამომძიებლებსა და ადვოკატებს ომბუდსმენის მიერ (ევროსაბჭოს მხარდაჭერით) მომზადებული კვლევის „ქალთა მიმართ სექსუალური ძალადობის მართლმსაჯულება საქართველოში“ ძირითადი მიგნებები და რეკომენდაციები გააცნეს. მონაწილეებმა სექსუალური ძალადობის გამოძიების, სისხლისსამართლებრივი დევნისა და საქმის სასამართლო განხილვისას არსებულ გამოწვევებსა და აღნიშნულ საქმეებზე მუშაობის თავიანთ გამოცდილებაზე ისაუბრეს“. სრულად... წყარო: www.ombudsman.ge

თბილისი. „უფლებები საქართველომ“, პლატფორმა Zoom-ის მეშვეობით, ონლაინ შეხვედრა გამართა პრაქტიკოს ადვოკატებთან, რომლებიც თავშესაფრის მაძიებლების, საერთაშორისო დაცვის სტატუსის მქონე პირებისა და საქართველოში მცხოვრები მიგრანტების უფლებების დაცვაზე მუშაობენ. სრულად... წყარო: rights.ge

აჭარა. 26 მარტს აჭარის ავტონომიური რესპუბლიკის განათლების, კულტურისა და სპორტის სამინისტრომ არ დააკმაყოფილა „სოციალური სამართლიანობის ცენტრისა“ (ყოფილი EMC) და „ბათომის“ საჩივარი, რომელიც ბათუმის ბულვარში 19 სართულიანი სასტუმროს მშენებლობის უკანონობასა და კულტურული მემკვიდრეობისა და არქიტექტურულ-სამშენებლო კანონმდებლობის მძიმე დარღვევაზე მიუთითებდა. შესაბამისად, ორგანიზაციები უმოკლეს ვადებში მიმართავენ სასამართლოს სააგენტოს მიერ გაცემული აღნიშნული ნებართვის და აჭარის ავტონომიური რესპუბლიკის განათლების, კულტურისა და სპორტის მინისტრის უკანონო და დაუსაბუთებელი გადაწყვეტილების გასასაჩივრებლად. ასევე, სარჩელით მოითხოვენ ბულვარის ტერიტორიაზე მიმდინარე სამშენებლო სამუშაოების დაუყოვნებლივ შეჩერებას, რომ საქმის განხილვის პარალელურად ბულვარის მიმართ არსებული საზოგადოებრივი ინტერესი დაცული იყოს. სრულად... წყარო: socialjustice.org.ge

თბილისი. „სოციალური სამართლიანობის ცენტრი“ „ადამიანის უფლებების სწავლებისა და მონიტორინგის ცენტრის (EMC)“ ახალი სახელია. „ორგანიზაციის სახელის ცვლილება გამოხატავს ჩვენი, ჩვენი თანამებრძოლების, მხარდამჭერებისა და გულშემატკივრების საერთო სურვილს, ორგანიზაციის სახელი იმთავითვე ცხადს ხდიდეს იმ პრინციპებს, იდეალებსა და წარმოდგენებს, რაც დაფუძნების დღიდან გვაერთიანებს. ჩვენთვის სამართლიანობის, უპირატესად კი სოციალური სამართლიანობის იდეა ყოველთვის წარმოადგენდა ჩვენი ბრძოლისა და ყოველდღიური შრომის მიზანს. სახელის ცვლილება არ უკავშირდება ორგანიზაციის მისიის და ხედვის ცვლილებას, ის ჩვენი იდეოლოგიური ჩარჩოს, პრინციპებისა და და მიზნების გამოკვეთას ისახავს მიზნად“, ნათქვამია ორგანიზაციის განცხადებაში. სრულად... წყარო: socialjustice.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს რაოდენობრივი კვლევის „ლგბტქ ადამიანთა სოციალური დაცვა და უსახლკარობის გამოწვევები“ შედეგებს.  „ადეკვატურ საცხოვრისზე წვდომის უფლება ცხოვრების ადეკვატური სტანდარტის უფლების ნაწილია და ცენტრალური მნიშვნელობისაა ყველა სხვა ეკონომიკური, სოციალური და კულტურული უფლებებით სარგებლობისთვის. სოციალური პრედიქტორიების გარდა, ადეკვატური საცხოვრისის საკითხთან მჭიდრო კავშირშია ძალადობა და სოციალური მოწყვლადობა, რომელიც ყველაზე ხელსაყრელ გარემოს ქმნის უსახლკარობისთვის.  ძალადობა და დისკრიმინაცია, ხშირად, უსახლკარობის მიზეზიც არის და შედეგიც. შესაბამისად, მათ, ვინც ექვემდებარებიან დისკრიმინაციას რასის, საცხოვრებელი ადგილის, სოციალურ-ეკონომიკური სტატუსის, გენდერის, შეზღუდული შესაძლებლობის, სექსუალური ორიენტაციისა თუ გენდერული იდენტობის, ასაკის და სხვა ნიშნების გამო, უფრო მეტად ემუქრებათ უსახლკარობა“. სრულად... წყარო: emc.org.ge

თბილისი. ღირსეული შრომის პლატფორმა კრიტიკულად აფასებს კომპანია „ბოლტის” მიერ გაფიცულ კურიერთა სამუშაო პლატფორმიდან დაბლოკვის ფაქტებს, მხარდაჭერას უცხადებს კურიერების მოთხოვნებს ღირსეული შრომითი პირობებისთვის და მზადაა სამართლებრივი დახმარება გაუწიოს მათ. „მოვუწოდებთ შრომის ინსპექციას, პრიორიტეტად დაისახოს და სისტემური მუშაობა დაიწყოს საქართველოში, პლატფორმის ეკონომიკაში დასაქმებულ პირთა შრომის უსაფრთხოებისა და პირობების მუდმივი მონიტორინგისადა შრომითი უფლებების გაუმჯობესების მიმართულებით“, ნათქვამია ერთობლივ განცხადებაში. სრულად... წყარო: gyla.ge