თბილისი. „ადამიანის უფლებების სწავლების და მონიტორინგის ცენტრი“ (EMC) საკონსტიტუციო სასამართლოში ასაჩივრებს საქართველოს ადმინისტრაციულ სამართალდარღვევათა კოდექსისა და სისხლის სამართლის კოდექსის იმ ნორმებს, რომლებიც ითვალისწინებს მკაცრ სანქციებს იზოლაციისა და კარანტინის წესის ან/და საგანგებო მდგომარეობის რეჟიმის დარღვევისათვის.  „გასაჩივრებულია ასევე მითითებული სამართალდარღვევების განხილვის წესი და მათი დარღვევისათვის პირის შესაბამის სივრცეში მოთავსების უფლებამოსილება სასამართლო კონტროლის გარეშე. მოსარჩელე საქართველოს მოქალაქე რუსუდან გოცირიძეა, რომელიც სადაო ნორმის საფუძველზე 2000 ლარით დაჯარიმდა ღამის საათებში გადაადგილების გამო, მხოლოდ იმ მიზეზით, რომ მის სახელზე გაცემულ საშვში მითითებული არ იყო გადაადგილების ტერიტორია“. სრულად... წყარო: emc.org.ge

თბილისი. ადამიანის უფლებათა ევროპულმა სასამართლომ საქმეზე, ტლაშაძე და კაკაშვილი საქართველოს წინააღმდეგ, საია-ს საჩივარი დააკმაყოფილა და ევროპული კონვენციის მე-6 (1) მუხლის (საქმის სამართლიანი განხილვის უფლება) დარღვევა დაადგინა. „მომჩივნები სხვადასხვა ოპოზიციური პარტიის/მოძრაობის წარმომადგენლები იყვნენ და 2009 წელს ოპოზიციური პარტიების მიერ ხელისუფლების წინააღმდეგ გამართულ მასობრივ საპროტესტო აქციებში აქტიურად მონაწილეობდნენ. ევროპულ სასამართლოში წარდგენილ საჩივარში საია ასაბუთებდა, რომ 2009-10 წლებში სამართალდამცავი ორგანოს წარმომადგენლებმა მომჩივნებს, მათი პირადი ჩხრეკის დროს, ცეცხლსასროლი იარაღი და/ან ნარკოტიკული საშუალებები ჩაუდეს. ტლაშაძისა და კაკაშვილის საქმეში ევროპული სასამართლო უმეტესწილად საიას ერთ-ერთ წარმატებულ საქმეს, მეგრელიშვილი საქართველოს წინააღმდეგ, დაეყრდნო, რომელზეც გადაწყვეტილება 2020 წლის ივნისში გამოცხადდა“. სრულად... წყარო: gyla.ge

თბილისი. 23 მარტს ომბუდსმენი საქართველოში ავსტრიის რესპუბლიკის საგანგებო და სრულუფლებიან ელჩს თომას მიულმანს შეხვდა. „შეხვედრაზე ისაუბრეს ქვეყანაში ადამიანის უფლებების მდგომარეობაზე, სახალხო დამცველის აპარატის საქმიანობაზე, მის მანდატსა და პრიორიტეტებზე. ასევე, ის გამოწვევები განიხილეს, რაც დღეს საქართველოში მოქმედი დემოკრატიული ინსტიტუტების წინაშე დგას“. სრულად... წყარო: www.ombudsman.ge

თბილისი. საქართველოს ახალგაზრდა იურისტთა ასოციაციის ინფორმაციით, სასამართლოს გადაწყვეტილებით დადგინდა, რომ საქართველოს პარლამენტმა 2018 წლის მაისში თანამშრომელს დაუსაბუთებლად უთხრა უარი შვებულების გამოყენებაზე და სამსახურიდან გაათავისუფლა. „სასამართლომ ბათილად ცნო ადამიანის უფლებათა დაცვისა და სამოქალაქო ინტეგრაციის კომიტეტის აპარატის წამყვანი სპეციალისტის თანამდებობიდან მოსარჩელის გათავისუფლების შესახებ ბრძანება და საქართველოს პარლამენტს დაავალა საქმისათვის არსებითი მნიშვნელობის მქონე გარემოებების შესწავლის, გამოკვლევისა და ურთიერთშეჯერების საფუძველზე ახალი გადაწყვეტილების მიღება“. გათავისუფლებული თანამშრომლის უფლებებს სასამართლოში საია იცავდა. სრულად... წყარო: gyla.ge

ქართლი. ადამიანის უფლებების სწავლებისა და მონიტორინგის ცენტრმა (EMC) კიდევ ერთი სოციალური მუშაკის შრომითი დავა მოიგო. „ხაშურის რაიონული სასამართლოს 19 მარტის გადაწყვეტილებით, „სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტომ“ 2019 წელს გათავისუფლებული სოცმუშაკი სამსახურში უნდა აღადგინოს და ასევე, განაცდური უნდა აუნაზღაუროს. გარდა ამისა, სასამართლოს გადაწყვეტილებით, აღდგენისა და ანაზღაურების პროცესი დაუყოვნებლივ უნდა დაიწყოს, რაც განსაკუთრებით მნიშვნელოვანი და იშვიათია შრომით სამართლებრივ დავაში. ეს წარმატებით დასრულებული უკვე მეექვსე სასამართლო დავაა იმ რვა საქმიდან, რომელზეც EMC მუშაობას. რაც შეეხება დარჩენილ ორ დავას, სასამართლო პროცესები კვლავაც მიმდინარეობს და ამ საქმეებთან დაკავშირებული სიახლეების შესახებ საზოგადოებას პროცესების მსვლელობისას შევატყობინებთ“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ტელეკომპანია „მთავარის“ ეთერში გასულ ინტერვიუს და აღნიშნავს, რომ უკანონო მოსმენების/მიყურადების განგრძობადი პრაქტიკა გამოუსწორებელ ზიანს აყენებს ადამიანის უფლებებსა და დემოკრატიულ წესრიგს. „ამ გზით მოპოვებული ინფორმაციის პოლიტიკური მიზნებით გამოყენება წახალისებულია ხელისუფლების არაეფექტურობითა და პოლიტიკური ნების არქონით, გამოიძიოს პირადი ცხოვრების შელახვის ფაქტები. უკანონო მოსმენების და პირადი ცხოვრების უხეში დარღვევის პრაქტიკა პირდაპირ უკავშირდება ამ მიმართულებით საკანონმდებლო და ინსტიტუციური რეფორმების ჩავარდნას და კონკრეტულ შემთხვევებზე სამართალდამცავი ორგანოების დაგვიანებულ და არაეფექტურ რეაგირებას“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. დღეს სრულიად საქართველოს მუსლიმთა სამმართველოს ყოფილი შეიხი ვაგიფ აქპეროვი და ტოლერანტობისა და მრავალფეროვნების ინსტიტუტი (TDI) კიდევ ერთხელ მიმართავენ პროკურატურას და მოითხოვენ ვაგიფ აქპეროვის დაზარალებულად ცნობასა და მისი თანამდებობიდან იძულებით გადაყენების ფაქტის დაუყოვნებლივ, ყოველმხრივ და ობიექტურ გამოძიებას. „2013 წელს ვაგიფ აქპეროვი დაიბარეს სახელმწიფო უსაფრთხოების სამსახურში და პირადი ცხოვრების შესახებ ინფორმაციის გავრცელების შანტაჟითა და მუქარით აიძულეს შეიხის თანამდებობის დატოვება. 21 მარტს, ტელეკომპანია მთავარში გასულ ინტერვიუში, სუს-ის ყოფილმა თანამშრომელმა განაცხადა, რომ უსაფრთხოების სამსახურმა შეიხის პირად კომპიუტერში ჩაწერა ვირუსი მისი პირადი ცხოვრების უკანონო თვალთვალის მიზნით. ვაგიფ აქპეროვი ამ დრომდე არ არის ცნობილი დაზარალებულად ხოლო გამოძიება 5 წელია უშედეგოდ გრძელდება. ვაგიფ აქპეროვის ინტერესებს TDI იცავს“. სრულად... წყარო: tdi.ge

ქვემო ქართლი. სამოქალაქო საზოგადოების ორგანიზაციები ეხმიანებიან მარნეულში, 21 მარტს განვითარებულ მოვლენებს, სადაც „მოძრაობა საქართველოსთვის“ აქტივისტებმა ადგილობრივ მოსახლეობასთან ერთად 21:00 საათზე დემონსტრაციულად დაარღვიეს გადაადგილების შეზღუდვა. „არაერთხელ აღგვინიშნავს, რომ საზოგადოებრივი ჯანმრთელობის დაცვის საბაბით ხელისუფლება არაკონსტიტუციურად ცდილობს გამოხატვის თავისუფლების შეზღუდვას, ამჯერად კი განსაკუთრებით საგანგაშოა, რომ საქმე გვაქვს მოქალაქეთა ფიზიკური თავისუფლების შეზღუდვის და სისხლისსამართლებრივი პასუხისმგებლობის საფრთხესთან. აღსანიშნავია, რომ აქტივისტებმა აქციის გამართვა მას შემდეგ გადაწყვიტეს, რაც ხელისუფლებამ ეთნიკურად აზერბაიჯანელი მოქალაქეების თხოვნა არ გაითვლისწინა და ნოვრუზ ბაირამისთვის ერთი ღამით გადაადგილების შეზღუდვა არ მოხსნა. მიგვაჩნია, რომ აღნიშნული გადაწყვეტილება არათანმიმდევრული და მეტიც, დისკრიმინაციულია ეთინკური უმცირესობების მიმართ. მთავრობას შეეძლო ამ შემთხვევაში დაეწესებინა გამონაკლისი, მითუმეტეს იმ ფონზე, როდესაც დაგეგმილია რეგულაციათა შემსუბუქება 2021 წლის 28 მარტს საფეხბურთო მატჩთან დაკავშირებით და შეზღუდვები მოხსნილი იყო მაგალითად, 1 იანვრის ღამითაც“, ნათქვამია ერთობლივ განცხადებაში. სრულად... წყარო: www.gdi.ge

თბილისი. ომბუდსმენი ეხმაურება 2021 წლის 21 მარტს ტელეკომპანია „მთავარის“ ეთერით გავრცელებულ სიუჟეტს, სადაც საუბარი იყო პირადი ცხოვრების ამსახველი სავარაუდო ფარული ჩანაწერების არსებობაზე, მათ შორის, პოლიტიკოს ანა დოლიძის მიმართ. „საქართველოში პირადი ცხოვრების ამსახველი უკანონო ფარული ჩანაწერების გამოქვეყნების, თუ გამოქვეყნების მუქარის შემთხვევებს ძირითადად, ქალი პოლიტიკოსების მიმართ აქვს ადგილი და საზოგადოებრივ და პოლიტიკურ პროცესებში ჩართული ქალების წინააღმდეგ პოლიტიკური ბრძოლის, მათი გაჩუმების, ჩაგვრის და ძალადობის სისტემურ იარაღად გამოიყენება. სახალხო დამცველი გმობს სახელმწიფოს მხრიდან პირადი ცხოვრების უკანონო ხელყოფის პრაქტიკას, სოლიდარობას უცხადებს ყველა მსხვერპლს და სახელმწიფოს დამაჯერებელი ნაბიჯების გადადგმისკენ მოუწოდებს“, ნათქვამია განცხადებაში. სრულად... წყარო: ombudsman.ge

თბილისი. „უფლებები საქართველო“ უნიკალურ შესაძლებლობას გთავაზობთ. თუ მუშაობთ თავშესაფრის მაძიებლების, ლტოლვილებისა და ჰუმანიტარული სტატუსის მქონე პირების უფლებების დაცვაზე შეგიძლიათ დარეგისტრირდეთ წარმოშობის ქვეყნის შესახებ ინფორმაციის პორტალზე და მიიღოთ წვდომა მსოფლიოს მასშტაბით განხორციელებულ კვლევებზე ადამიანის უფლებების მდგომარეობის შესახებ. სრულად... წყარო: ორგანიზაციის გვერდი სოციალურ ქსელში

თბილისი. 18 ივნისს, თბილისში, პოლიციის თანამშრომლებმა შეაჩერეს ბავშვი და მოსთხოვეს პირადობის დამადასტურებელი დოკუმენტის წარდგენა, რომელიც არასრულწლოვანს არ ჰქონდა. პოლიციის თანამშრომლებმა გადაწყვიტეს მისთვის ფოტოსურათის გადაღება, რასაც არასრულწლოვანის მხრიდან უარი მოყვა, უარის შემდეგ კი პოლიციელებმა არასრულწლოვნის დაკავების გადაწყვეტილება მიიღეს, თუმცა ხალხმა მათ ამის უფლება არ მისცა. დაკავების მცდელობისას ბავშვმა სხეულზე დაზიანებები მიიღო. 2020 წლის 29 ოქტომბერს PHR-მა განცხადებით მიმართა შინაგან საქმეთა სამინისტროს და მოითხოვა არასრულწლოვანთან დაკავშირებული ადმინისტრაციული საქმისწარმოების მასალების ასლების გადმოცემა, თუმცა სამინისტრომ ეს პროცესი დროში გააჭიანურა. ბავშვის ინტერესების დაცვის მიზნით #PHR-მა სახელმწიფო ინსპექტორის სამსახურს მიმართა. სახელმწიფო ინსპექტორმა იმსჯელა და დაადგინა, რომ მასალების გადაცემა არაგონივრულ ვადაში მოხდა. გადაწყვეტილების თანახმად, შინაგან საქმეთა სამინისტრომ მისი საქმიანობა შეასრულა არაჯეროვნად. კერძოდ, არაგონივრულ ვადაში, არასათანადო ფორმით და არასრულად მოახდინა განმცხადებლისათვის დოკუმენტაციის მიწოდება. საქართველოს შინაგან საქმეთა სამინისტრო გამოცხადდა სამართალდამრღვევად და ადმინისტრაციული სახდელის სახით შეეფარდა ჯარიმა 100 ლარის ოდენობით. პარტნიორობა ადამიანის უფლებებისთვის აგრძელებს ბავშვის ინტერესების დაცვას. სრულად... წყარო: phr.ge

თბილისი. საქართველოს ეხმიანება ტელეკომპანია „მთავარზე“ გადაცემა „პოსტ ფაქტუმში“ გასულ სიუჟეტს. „რესპონდენტი ივანე გულაშვილი აღნიშნავს, რომ იგი იყო სახელმწიფო უსაფრთოხების თანამშრომელი და მაღალი თანამდებობის პირების დავალებით ფარული მიყურადებისთვის ამონტაჟებდა სათვალთვალო მოწყობილობებს საჯარო პირების საცხოვრებელ სახლებსა თუ სხვადასხვა ტექნიკურ მოწყობილობებზე. საია გმობს პირადი ცხოვრების უკანონო ხელყოფას. მხარდამჭერას უცხადებს ანა დოლიძეს და უკანონოდ ფარული მიყურადების ყველა მსხვერპლს. ამსათანავე აღვნიშნავთ, რომ საქართველოში, უახლოეს წარსულში არსებობს ფარული მიყურადების შედეგად მოპოვებული პირადი ცხოვრების ამსახველი კადრების გამოქვეყნების მძიმე გამოცდილება და შედეგები, აღნიშნული კი მოითხოვს შესაბამისი სახელმწიფო უწყებების მხრიდან დროულ, მიუკერძოებელ და ეფექტიან გამოძიებას“. სრულად... წყარო: gyla.ge

თბილისი. ქალთა მოძრაობა ეხმიანება 21 მარტს ტელეკომპანია მთავარის ეთერში სახელმწიფო უსაფრთხოების სამსახურის ყოფილი თანამშრომლის, ამჟამად პატიმრობაში მყოფი, ივანე გულაშვილის მიერ გავრცელებულ ინფორმაციას. „ივანე გულაშვილმა ჟურნალისტისთვის მიცემულ ინტერვიუში მოგვითხრო ქალი პოლიტიკოსის, ანა დოლიძის, შესაძლო ფარული თვალთვალის შესახებ. სამწუხაროდ, გვახსოვს არაერთი პოლიტიკურად აქტიური ქალის წინააღმდეგ განხორციელებული მორალური ტერორი და საჯარო ცხოვრებიდან განდევნის მცდელობა. აღვნიშნავთ, რომ მსგავსი უკანონო პრაქტიკები ქვეყანაში სისტემურ ძალადობად ჩამოყალიბდა. ქალის პირადი, მათ შორის, სექსუალური ცხოვრებით მანიპულირება, ან მისი გასაჯაროება ქალების პოლიტიკიდან განდევნის, დისკრედიტაციისა და მარგინზალიზაციის ყველაზე სასტიკი მეთოდია. ჩვენ მოვუწოდებთ საგამოძიებო ორგანოს დაიწყოს გამოძიება, გამოკითხოს ყველა პირი, რომელიც შესაძლოა შემხებლობაში იყოს ანა დოლიძის მიმართ უკანონო თვალთვალში და გამოიყენოს მის ხელთ არსებული ყველა რესურსი, რათა აღკვეთოს პირადი ცხოვრების კადრების გავრცელება. ჩვენ სრულ სოლიდარობას ვუცხადებთ ანა დოლიძეს და მოვუწოდებთ საერთაშორისო თანამეგობრობას შესაბამისი რეაგირებისაკენ“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) საქართველოს აზერბაიჯანელებს ნოვრუზის დღესასწაულს ულოცავს და მათ უფრო სამართლიან და სოლიდარულ გარემოში ცხოვრებას უსურვებს. „ნოვრუზი ტრადიციული დღესასწაულია და სხვადასხვა ხალხების რწმენით ძველი წლის დასრულებასა და ახლის დადგომას აღნიშვნას. ნოვრუზი განახლების დღესასწაულია და მის აღნიშვნამდე ტრადიციულად ბუნების გამოღვიძების აღსანიშნად ზამთრის ოთხი სტიქიის (ჩერშენბე) დღესასწაულს აღნიშნავენ. საქართველოს აზერბაიჯანელი თემი მიმდინარე წელს, წინა წლების მსგავსად ნოვრუზის დღესასწაულად ცნობას და მის უქმედ გამოცხადებას მოითხოვდა, თუმცა ამ მოთხოვნას სახელმწიფოს მხრიდან რაიმე მსვლელობა არ მისცემია. პანდემიის პირობებში საქართველოს აზერბაიჯანელებმა ნოვრუზის დღეს კომენდანტის საათის გახანგრძლივებაც მოითხოვეს, თუმცა თემის კოლექტიური თხოვნა საქართველოს მთავრობამ არ გაითვალისწინა. ეს გადაწყვეტილება კიდევ უფრო პრობლემური და დისკრიმინაციული ჩანს იმ ფონზე, როდესაც მთავრობამ არა ერთი შეღავათი დაუშვა სხვა დღესასწაულებისა, თუ სხვა სახის საჯარო თავყრილობის დროს (მაგალითად ფეხბურთის მატჩი)“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ქალთა ფონდი თავისი პროგრამებით მხარს უჭერს ქალი უფლებადამცველების გაძლიერებას, აღიარებას და უსაფრთხოებას. ორგანიზაცია სოლიდარობას უცხადებს „პარტნიორობა ადამიანის უფლებებისთვის“ თანამშრომლებს და მიმართავს საქართველოს პარლამენტსა და ადამიანის უფლებათა საკითხებში პრემიერ მინისტრის მრჩეველს, რათა შეახსენოს - ქალი უფლებადამცველების უსაფრთხოებაზე ზრუნვა, მათი შრომის დაფასება, იმ სახელმწიფო ინსტიტუტების გაძლიერება, რომლებიც ადამიანის უფლებათა დაცვაზეა პასუხიმგებელი, სახელმწიფოს მოვალეობაა. სრულად... წყარო: womenfundgeorgia.org

თბილისი. 17 მარტს, „უფლებები საქართველომ“ დისციპლინური სამართალწარმოების პროცესში დამოუკიდებელი ინსპექტორისა და იუსტიციის უმაღლესი საბჭოს საქმიანობის მონიტორინგის შედეგები წარადგინა. „კვლევის ანგარიში, რომელიც მონიტორინგის შედეგად მომზადდა, მიმოიხილავს მოსამართლეთა დისციპლინური პასუხისმგებლობის სფეროში მოქმედ კანონმდებლობასა და პრაქტიკას, აანალიზებს საერთაშორისო სტანდარტებთან კანონისა და პრაქტიკის შესაბამისობას, აგრეთვე შეიცავს რეკომენდაციებს დისციპლინური სისტემის ხარვეზების აღმოსაფხვრელად“. სრულად... წყარო: rights.ge

თბილისი. 15 მარტს მედია საშუალებებით საზოგადოებისთვის ცნობილი გახდა, რომ საქართველოს პარლამენტის დიასპორისა და კავკასიის საკითხთა კომიტეტის ბაზაზე ეროვნული უმცირესობების სამეცნიერო-საკონსულტაციო საბჭო შეიქმნა. „ხელმომწერი ორგანიზაციები ზოგადად მივესალმებით პარლამენტში ეროვნულ უმცირესობებისთვის საკონსულტაციო მექანიზმის შექმნის იდეას, თუმცა ჩვენთვის კატეგორიულად მიუღებელია უმცირესობათა საკონსულტაციო საბჭოს შექმნა დიასპორის და კავკასიის საკითხთა კომიტეტის ბაზაზე, რაც აძლიერებს ეთნიკური უმცირესობების სხვა სახელმწიფოებთან დაკავშირების წარმოდგენას და ინკლუზიური, თანასწორი და დემოკრატიული საზოგადოების მშენებლობის პროცესს არსებითად აზიანებს და უკან ხევს. სსო-ები მოუწოდებენ საქართველოს პარლამენტს: დროულად გააუქმოს მისი გადაწყვეტილება დიასპორისა და კავკასიის საკითხთა კომიტეტის ბაზაზე უმცირესობათა საკითხებზე საკონსულტაციო საბჭოს შექმნის შესახებ; საკონსულტაციო საბჭოს მანდატის, კომპეტენციების, შემადგენლობის საკითხი დემოკრატიული კონსულტაციების პროცესის ფარგლებში დაგეგმოს, სადაც ჩართული იქნებიან ეთნიკური უმცირესობების თემების წარმომადგენლები, ორგანიზაციები, ასევე სხვა ექსპერტები და ადამიანის უფლებათა აქტორები; საკონსულტაციო საბჭოს შექმნისას გაითვალისწინოს ევროპის საბჭოს მრჩეველთა კომიტეტის მიერ დადგენილი საერთაშორისო სტანდარტები და მოთხოვნები, ასევე სხვა ქვეყნების საუკეთესო პრაქტიკა“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) იცავს მოსარჩელის ინტერესებს, რომელიც პენიტენციურ დაწესებულებაში ყოფნის განმავლობაში, ადმინისტრაციის მხრიდან მსოფლმხედველობის, კერძოდ, ვეგანობის ნიშნით დისკრიმინაციის მსხვეპლი იყო. პირი ითხოვს დისკრიმინაციის ფაქტის დადგენასა და მორალური ზიანის ანაზღაურებას. „სარჩელის დაკმაყოფილების შემთხვევაში შესაძლებელი იქნება არამხოლოდ უშუალოდ მოსარჩელის დარღვეული უფლებების აღდგენა, არამედ მიღებული გადაწყვეტილება შესაძლოა გახდეს პენიტენციურ დაწესებულებებში კვების საკითხებთან დაკავშირებული რეგულაციების გადახედვის საფუძველი“, ნათქვამია ორგანიზაციის ვებგვერდი. სრულად... წყარო: gyla.ge

თბილისი. EWMI-PROLoG შეშფოთებულია ქალთა უფლებადამცველების მიმართ გაჟღერებული მუქარით, სიძულვილის ენით და მხარდაჭერას უცხადებს PHR-ის, საფარის და სხვა ორგანიზაციების იურისტ ქალებს. „ქალი აქტივისტები განსაკუთრებით დაჟინებულები და თავდადებულები არიან. მათ ხშირად კაც კოლეგებზე უფრო რთულ პირობებში უწევთ მუშაობა. ჩვენ წლებია მხარს ვუჭერთ ადამიანის უფლებების, მათ შორის, ქალებისა და ბავშვების უფლებების დამცველებს და ვამაყობთ ჩვენი პარტნიორების მუშაობითა და მიღწევებით ამ წლების განმავლობაში. ჩვენ გვწამს, რომ ამ მძიმე, დაუღალავ და ხშირად - დაუფასებელ შრომასა და ერთგულებას მოაქვს პროგრესი, მსხვერპლთა უფლებებისა და ღირსების აღდგენის გზით“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, 21 იანვარს ადამიანის უფლებათა ევროპულმა სასამართლომ გამოაცხადა გადაწყვეტილება საქმეზე საქართველო რუსეთის წინააღმდეგ (II). აღნიშნული გადაწყვეტილება 2008 წლის აგვისტოში რუსეთსა და საქართველოს შორის მიმდინარე შეიარაღებული კონფლიქტის დროს მომხდარ ადამიანის უფლებათა დარღვევებს შეეხება. „წინამდებარე დოკუმენტის მიზანია, მოკლედ მიმოიხილოს გადაწყვეტილების მნიშვნელოვანი სამართლებრივი ასპექტები და საზოგადოებას, ასევე, სხვა დაინტერესებულ პირებს მიაწოდოს ინფორმაცია გადაწყვეტილების შინაარსთან დაკავშირებით დასმულ კითხვებზე“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. პარტნიორობა ადამიანის უფლებებისთვის ინფორმაციით, ორგანიზაციამ საბოლოოდ მოიგო საქმე, რომლითაც ფსიქიატრიულ დაწესებულებაში ქალის უკანონო განთავსების გამო საავადმყოფოს მორალური ზიანის ანაზღაურება დაეკისრა. სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) სოლიდარობას უცხადებს ქალ უფლებადამცველებს. „გვსურს, სოლიდარობა გამოვხატოთ ქალი უფლებადამცველების მიმართ, რომლებიც განსაკუთრებული აგრესიისა და თავდასხმის სამიზნე გახდნენ ქართველი ჩოგბურთელის, ნიკოლოზ ბასილაშვილის მიერ ერთ-ერთ ტურნირში მოპოვებული გამარჯვების შემდეგ. ფაქტს სოციალურ მედიაში ორგანიზებული აგრესიის კამპანიის მოჰყვა, როგორც არასამათავრობო ორგანიზაციების, ასევე უფლებადამცველების მიმართ. აღნიშნული განაპირობა მათმა საჯარო პოზიციონირებამ ჩოგბურთელის წინააღმდეგ მიმდინარე ოჯახში ძალადობის საქმესთან დაკავშირებით. ქალი უფლებამდაცველების მიზანმიმართული, გენდერული ნიშნით განხორციელებული თავდასხმა მიანიშნებს საზოგადოებაში მყარად ფესვგადგმულ მიზოგენიურ განწყობებზე და აფერხებს ძალადობის ფაქტების საჯარო მხილების პროცესს“, ნათქვამია განცხადებაში.  სრულად... წყარო: isfed.ge