თბილისი. ქალთა საინფორმაციო ცენტრის ინფორმაციით, პანდემიის პერიოდში ოჯახში ძალადობის შემთხვევების გაზრდის რისკები ამავე საკითხებზე მომუშავე უწყებათაშორისი კომისიის სხდომაზე განიხილეს. მთავრობის გავრცელებულ განცხადებაში წერია, რომ ეკონომიკურ და სოციალურ რისკებთან ერთად, სახელმწიფო აკონტროლებს ქალთა მიმართ და ოჯახში ძალადობის რისკებს. სრულად... წყარო: ginsc.net

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ქვეყანაში საგანგებო მდგომარეობის პერიოდში აღსრულების ეროვნული ბიუროს საქმიანობის მოწესრიგების საკითხს. ორგანიზაცია მოუწოდებს საქართველოს მთავრობასა და იუსტიციის სამინისტროს, გაითვალისწინონ ცალკეულ სააღსრულებო წარმოებას დაქვემდებარებული პირების შესაძლო მძიმე სოციალურ-ეკონომიკური მდგომარეობა და შეაჩეროს დაყადაღებისა და საბანკო ანგარიშიდან თანხის ჩამოჭრის პროცედურები.  სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ახალი კორონავირუსის გავრცელების აღკვეთის მიზნით დეზერტირებისა და ლილოს ბაზრობების და საცალო გაყიდვების სხვა ადგილების დახურვას და საქართველოს მთავრობისგან მოითხოვს, იქ მომუშავე მოვაჭრეებსა და თვითდასაქმებულებს ზოგადად, სასესხო დავალიანებების რესტრუქტურიზაციაში დაეხმაროს. “თვითდასაქმებულთა შრომის არასტაბილურობა, მათ კიდევ უფრო მოწყვლადს ხდის მტაცებლური დაკრედიტების პრაქტიკის წინაშე. თვითდასაქმებულ მოვაჭრეთა მნიშვნელოვანი ნაწილი სწორედ მიკროსაფინანსო ორგანიზაციებიდან აღებული მაღალპროცენტიანი სესხით სარგებლობს. აღსანიშნავია, რომ პანდემიის პირობებში ბანკებისგან განსხვავებით, მიკროსაფინანსო ორგანიზაციებს საშეღავათო პერიოდები არ დაუწესებიათ”. სრულად… წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ვახუშტი მენაბდეს ბლოგპოსტს: სად მიდიან უსახლკაროები კომენდანტის საათის დროს. „კომენდანტის საათი გულისხმობს საჯარო სივრცეში ყოფნის აკრძალვას და ის ყველაზე ვრცელდება - ერთმანეთისგან არ განასხვავებს მათ, ვისაც ჭერი აქვს, მათგან, ვისაც ის არ აქვს. ასეთი წესის დადგენის შემდეგ, ჩამოჰკრავს რა 21:00 საათი, ჩვენ სახლებში შევდივართ, მაგრამ ადამიანთა ნაწილი, ისინი, ვისაც საცხოვრებელი არ გააჩნიათ და ქუჩის კუთხეებში, სკვერებში, მიწისქვეშა გასასვლელებში სძინავთ, ავტომატურად შედიან კანონთან კონფლიქტში. ამგვარად, მათი ეგზისტენცია კითხვის ნიშნის ქვეშ დგება - თუ ამ ადამიანებს არ აქვთ უფლება, ღამე საჯარო სივრცეში გაათიონ, მაგრამ, იმავდროულად, სხვაგან წასასვლელი არ აქვთ, გამოდის, რომ მათ საერთოდაც არსებობის უფლება არ აქვთ“. სრულად... წყარო: gyla.ge

თბილისი. გაეცანით, რას გულისხმობს ღია საზოგადოების ფონდის მიერ მთავრობისთვის შეთავაზებული რეკომენდაციები უმუშევრად დარჩენილი მოქალაქეების დასახმარებლად.  „საქართველოს ღია საზოგადოების ფონდის ინიციატივით მომზადდა პოლიტიკის დოკუმენტი, რომელიც საერთაშორისო პრაქტიკისა და საქართველოს შრომის ბაზრის თავისებურებების გათვალისწინების საფუძველზე, საქართველოს მთავრობას სთავაზობს რეკომენდაციებს მშრომელთა სოციალური უსაფრთხოების დროებით უზრუნველყოფისთვის. წარმოდგენილი რეკომენდაციები ეხება მხოლოდ კრიზისული პერიოდის მართვას და მათში არ არის საუბარი ქვეყნის სოციალური უსაფრთხოების სისტემის ძირეულ ცვლილებაზე, რაც გაცილებით მეტ დროს და ძალისხმევას მოითხოვს. პანდემიის პირობებში მთავარი პრინციპი ისეთი ზომების მიღებაა, რომელთა განხორციელება სწრაფად და რაც შეიძლება ნაკლები ადმინისტრაციული ხარჯით შეიძლება მოხდეს“. სრულად... წყარო: osgf.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ქარიმ ისმაილის სტატიის ნინო კარანაძისეულ თარგმანს: ნულოვანი ტოლერანტობის კულტურული და სიმბოლური რეზონანსი თანამედროვე სისხლის სამართლის სისტემაში. „ეს ნაშრომი ამტკიცებს, რომ სადამსჯელო სისხლისსამართლებრივი ზომების ზრდა, როგორიცაა ნულოვანი ტოლერანტობა, არის მთელი რიგი სოციალური, პოლიტიკური, ეკონომიკური და კულტურული მოვლენების შედეგი, რომლებმაც გარდაქმნეს დანაშაულის ბუნება და სოციალური კონტროლი აშშ-სა და დასავლეთის ინდუსტრიულ სხვა ქვეყნებში. ნულოვანი ტოლერანტობა ჩვენი დროის მეტაფორაა“. სრულად... წყარო: emc.org.ge

თბილისი. ღია საზოგადოების ფონდი აქვეყნებს გენდერის მკვლევარის, ნუკრი ტაბიძის ბლოგპოსტს: კედელი უნდა მოვანგრიო. მასალა ღია საზოგადოების ფონდის ბლოგპოსტების სერიიდანაა, რომელშიც სხვადასხვა პროფესიის, ცხოვრებისეული გამოცდილებისა და შემოსავლის მქონე ადამიანები საცხოვრებლის პრობლემის შესახებ მოგითხრობენ. „დაბრუნების სადღეგრძელოები ჩემს ოჯახში როდის გაქრა, ზუსტად ვერ გეტყვით. ჩემმა მშობლებმა ნათესავების და მეგობრების დახმარებით პატარა სახლი იყიდეს და ალბათ ეს იყო პირველი ნიშანი. ახლა ეს ალიზით აშენებული ნესტის და შავი სოკოს ბუდე უნდა ექციათ სახლად. მე მაინც ძალიან მიხაროდა. „თქვენ რა იცითო”, – იმეორებდნენ დედაჩემი და მამაჩემი, – „არასდროს გიცხოვრიათ სახლში და არ იცით რას ნიშნავსო საკუთარ სახლში ცხოვრება“. მაშინ უკვე ვხვდებოდით მე და ჩემი ძმა, რომ სახლში მარტო შენობა არ იგულისხმებოდა, მაგრამ ჩვენთვის სახლი მაინც 4 კედელი და ჭერი იყო, რომელიც, წინა საცხოვრებლისგან განსხვავებით, არ წვეთავდა, არც მორიელები გვემუქრებოდა, არც მეზობლის მონაგავებული ტუალეტის წმენდა მოუწევდა დედას“. სრულად... წყარო: osgf.ge

თბილისი. ადამიანის უფლებები სწავლებისა და მონიტორინგის ცენტრი (EMC) მიიჩნევს, რომ „სპარის“ გადაწყვეტილება, მთელი ღამის განმავლობაში სამუშაო ადგილზე დატოვოს დასაქმებულები, ღირსეული შრომის უფლებას მნიშვნელოვან საფრთხეს უქმნის. „ჩვენი ინფორმაციით, სპარის მაღაზიებში არ არსებობს ღამის გათევის სათანადო პირობები და დასაქმებულებს ხშირ შემთხვევაში უწევთ საწყობებისათვის გამოყოფილ ადგილებში გათენება. სწორედ ამიტომ, EMC „სპარის“ დაუყოვნებლივ ინსპექტირებას მოითხოვს“. სრულად... წყარო: emc.org.ge

თბილისი. სამოქალაქო პლატფორმა „არა ფობიას!” ეხმაურება ტელეკომპანია „მთავარი არხის” ჟურნალისტ გიორგი გაბუნიას მიერ 5 აპრილს, საავტორო გადაცემა „პოსტ ფაქტუმში” გაკეთებულ ქსენოფობიურ განცხადებას. კერძოდ, კორონავირუსის გავრცელებაში გენეტიკური ფაქტორის კვლევის შესახებ მომზადებულ სიუჟეტზე კომენტირებისას გადაცემის წამყვანმა არმენოფობიური შინაარსის შეფასება გააკეთა. „არა ფობიას! წევრ ორგანიზაციებს მიგვაჩნია, რომ კორონავირუსის პანდემიის პროცესში, ქსენოფობიური განწობების გაღვივების ფონზე, მედიამ მაღალი პასუხისმგებლობა უნდა გამოიჩინის, არ გახდეს ქსენოფობიური განცხადებების წყარო და ნებით თუ უნებლიეთ ხელი შეუწყოს ქსენოფობიური განწყობების გაღვივებას“. სრულად... წყარო: isfed.ge

თბილისი. ქალთა საინფორმაციო ცენტრმა, საგანგებო მდგომარეობის პერიოდში, ქალთა მიმართ და ოჯახში ძალადობის პრევენციისა და სწრაფი რეაგირების მიზნით, მარნეულისა და ბოლნისის მუნიციპალიტეტებში დაიწყო საინფორმაციო კამპანია. „კამპანიის მიზანია ქალთა უფლებებისა და სახელმწიფოში არსებული სერვისების შესახებ ინფორმაციის მიწოდება ქალებისთვის მისაღები ფორმით“. სრულად... წყარო: ორგანიზაციის გვერდი სოციალურ ქსელში

თბილისი. თუ თქვენ ხართ ძალადობის მსხვერპლი ან პანდემიის შედეგად გამოწვეული პირობების გამო ცხოვრობთ მოძალადესთან და განიცდით ფიზიკურ, ფსიქიკურ, ეკონომიკურ ძალადობას დაუკავშირდით ადამიანის უფლებათა ცენტრს. ორგანიზაციის იურისტები უფასო სამართლებრივ კონსულტაციას გაგიწევენ. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს მოსაზრებებს მართლმსაჯულებისა და ადამიანის უფლებათა დაცვის საკითხებზე. „საქართველო-ევროკავშირის მართლმსაჯულების, თავისუფლებისა და უსაფრთხოების საკითხთა ქვეკომიტეტის (JLS) შეხვედრა და ადამიანის უფლებათა საკითხზე ყოველწლიური დიალოგი (HRD) ბრიუსელში 2020 წლის 27 და 28 მაისს იგეგმება. კონსულტაციების ფარგლებში, „ინფორმაციის თავისუფლების განვითარების ინსტიტუტმა“ საქართველოში ევროკავშირის წარმომადგენლობას მოსაზრებები და რეკომენდაციები წარუდგინა“. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, 2 აპრილს საზოგადოებისათვის ცნობილი გახდა ქ. ბათუმში, კომენდანტის საათის დროს დაკავებული პირის ისტორია, რომელშიც იგი პოლიციელთა მხრიდან ფიზიკური და სიტყვიერი შეურაცხყოფის ფაქტზე საუბრობს. აღნიშნულზე გამოძიება სახელმწიფო ინსპექტორის სამსახურმა 4 აპრილს დაიწყო. „საია, რომელიც დაზარალებულის ინტერესებს იცავს, მოუწოდებს საგამოძიებო ორგანოს, დროულად ჩაატაროს ეფექტიანი, ობიექტური და მიუკერძოებელი გამოძიება სამართალდამცავი პირების ქმედებებში სავარაუდო დანაშაულის ნიშნების გამოკვეთისა და მათთვის პასუხისმგებლობის სათანადო ზომების დაკისრების მიზნით“. სრულად... წყარო: gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოების ინფორმაციით, 30 მარტს გამოცემა ZDnet-ის მიერ გავრცელებული ინფორმაცია საქართველოს ამომრჩეველთა სიის გამოქვეყნების შესახებ არაერთ კითხვის ნიშანს აჩენს. „2020 საპარლამენტო არჩევნებამდე 7 თვით ადრე ამომრჩეველთა პერსონალური მონაცემების მასობრივი გამჟღავნების შესახებ ინფორმაცია, შესაძლოა, მიმართული იყოს ამომრჩეველთა სიისა და საარჩევნო პროცესისადმი სანდოობის შერყევისაკენ.  ამდენად, მნიშვნელოვანია საქართველოს მოქალაქეთა პერსონალური მონაცემების მასშტაბურად გავრცელების შესაძლო ფაქტზე დროული და სრულყოფილი გამოძიება, რათა დადგინდეს ნამდვილად ჰქონდა თუ არა მსგავს ფაქტს ადგილი, შეიცავს თუ არა გასაჯაროვებული ინფორმაცია საქართველოს მოქალაქეთა რეალურ მონაცემებს, რომელი მონაცემთა ბაზები გასაჯაროვდა, რა გზით მოხდა მათზე წვდომის მოპოვება და ვის მიერ“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. ადამიანის უფლებების სწავლებისა და მონიტორინგის ცენტრი (EMC) კიდევ ერთხელ მოუწოდებს საქართველოს საზოგადოებრივ მაუწყებელს, უზრუნველყოს ტელეეთრით საქართველოს არაქართულენოვანი მოსახლეობის რეგულარული ინფორმირება COVID-19 პანდემიასთან და მის პრევენციასთან დაკავშირებით. „პირველი არხის გუნდი მნიშვნელოვან შრომას უკვე წევს იმისთვის, რომ ინფორმაცია სხვადასხვა ენაზე იყოს ხელმისაწვდომი, თუმცა ის ვებ პლატფორმის ფორმატს თითქმის ვერ სცდება. დამაფიქრებელია, რომ იმ პირობებში, როდესაც ტელევიზია მარნეულისა და ბოლნისის სოფლებში ხშირად ინფორმაციის ძირითადი წყაროა, მთავარი ყურადღება მიპყრობილი უნდა იყოს სწორედ იმ მედიუმებზე, რომლებიც არადომინანტური ჯგუფების ყველაზე სწრაფ და მასშტაბურ ინფორმირებულობას უზრუნველყოფს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ორგანიზაციის მონიტორის მთვარისა შველიძის ბლოგპოსტს: ვირტუალურ სივრცეში გადასული სამართალწარმოება. „ახალი კორონავირუსის გავრცელების პრევენციის მიზნით ქვეყანაში შექმნილი ვითარების გათვალისწინებით იმ მიზნით, რომ არ მოხდეს პროცესების გაჭიანურება და ამავდროულად დაცული იყოს მოქალაქეების ჯანმრთელობა და უსაფრთხოება, დისტანციური სამართალწარმოება ერთის მხრივ წინგადადგმული ნაბიჯია, მაგრამ მეორეს მხრივ არ უნდა დაგვავიწყეს ის ძირითადი პრინციპები, რომლებიც მართლმსაჯულების განხორციელების ქვაკუთხედს წარმოადგენენ. ესენია, მათ შორის, საპროცესო კოდექსით გათვალისწინებული სასამართლო სხდომის საჯაროობისა და ზეპირობის (სსსკ-ის მე-10 მუხლი) ასევე, მტკიცებულებათა უშუალოდ და ზეპირად გამოკვლევის (სსსკ-ის მე-14 მუხლი) პრინციპები“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ორგანიზაციის იურიდიული განათლების ხელშეწყობის ფონდის ხელმძღვანელის, ნინო ბაღაშვილის ბლოგპოსტს: კორონავირუსით დაინფიცირებული დემოკრატია. „პანდემიასთან ბრძოლის პირველ ტალღაში გამოიკვეთა ცენზურა და ადამიანების უკანონო დაკავება. მაგალითად, ჩინეთში, საიდანაც დაიწყო ვირუსის გავრცელება, ყველაზე მწვავე პრობლემა შეექმნათ იმ ექიმებს, ჟურნალისტებსა და აქტივისტებს, რომლებიც ცდილობდნენ კორონავირუსის შესახებ ინფორმაცია გაევრცელებინათ. ჩინეთის მთავრობამ ყველაფერი გააკეთა ექიმების განგაშის ხმის ჩასახშობად, რამაც შეამცირა იმის შანსი რომ მსოფლიოს და მათ შორის ჩინეთის მოსახლეობასაც, დროულად გაეგო მოსალოდნელი საფრთხის შესახებ. ადამიანის უფლებებზე მწვავე გავლენის მეორე ტალღა კორონავირუსის მასობრივ გავრცელებას მოჰყვა, რის შედეგადაც დისკრიმინაციისა და უთანასწორო მოპყრობის მსხვერპლნი გახდნენ ჩინელი ადამიანები, ხოლო ცოტა მოგვიანებით კი სრულიად აზიური საზოგადოება, რომელთაც სოციალური კამპანიაც კი წამოიწყეს სახელწოდებით #जेनेसुइसपासूनविरुस (მე ვირუსი არ ვარ)“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება საქართველოს მთავრობის 2020 წლის 30 მარტის N204 დადგენილებით, საქართველოში ახალი კორონავირუსის გავრცელების შემცირების მიზნით საჯარო ტრანსპორტის შეზღუდვას. ორგანიზაცია მოუწოდებს საქართველოს მთავრობას, გადადგას სათანადო ქმედითი ნაბიჯები დასაქმებულთა სამუშაო ადგილებზე გადაადგილების უზრუნველსაყოფად. „ერთი მხრივ, დასაქმებულთა საჭიროებების გათვალისწინებით, ხოლო მეორე მხრივ, ეკონომიკური საქმიანობის შეუფერხებლად გაგრძელების მიზნით, საქართველოს მთავრობას მოვუწოდებთ, გამოიყენოს საგანგებო უფლებამოსილება და: საგანგებო მდგომარეობის ვადით, დამსაქმებლებს დაავალოს დასაქმებულთა ავტოსატრანსპორტო საშუალებებით უზრუნველყოფა, მათი სამუშაო ადგილზე მიყვანისა და წამოყვანის გათვალისწინებით, და საჭიროების შემთხვევაში, აღმოუჩინოს დამსაქმებლებს შესაბამისი მხარდაჭერა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს COVID-19 და უსახლკარობა - რა ვალდებულებები აქვს სახელმწიფოს. „სახელმწიფოებმა უნდა გადადგან ყველა შესაძლო ნაბიჯი იმ საფრთხის მინიმუმამდე შემცირებისათვის, რომლის წინაშეც ეს ადამიანები დგანან. მთავრობის მიერ მიღებული ზომები უნდა იყოს მრავალფეროვანი და მათ შორის, უნდა გულისხმობდეს, საცხოვრისად გამოუსადეგარ ნაგებობებში, განსაკუთრებით, კომპაქტურ ჩასახლებებში მცხოვრები პირების შემოწმებასა და მათთვის უსაფრთხო გარემოს უზრუნველყოფას“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) „ევოლუშენ გეიმინგიდან“ თანამშრომლების გათავისუფლებას უკანონოდ მიიჩნევს. „უდავოა, რომ კომპანიის მხრიდან ადგილი აქვს უფლების ბოროტად გამოყენებას და იგი ბოროტად იყენებს გამოსაცდელ ვადაში ნებისმიერ დროს კონტრაქტის შეწყვეტის უფლებას და დაუსაბუთებლად წყევტს შრომით ურთიერთობას, მაშინ როცა დასაქმებულებთან შრომითი ურთიერთობის შეწყვეტას არა მათი დაკავებულ თანამდებობებთან შეუსაბამობის, არამედ ქვეყანაში საგანგებო მდგომარეობის გამოცხადება დაედო ოფიციალურ საფუძვლად“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ტოლერანტობისა და მრავალფეროვნების ინსტიტუტი (TDI) აქვეყნებს გზამკვლევს სკოლის მასწავლებლებისთვის: ტოლერანტობის გაკვეთილები. „გზამკვლევის მიზანია საქართველოს საჯარო სკოლებში რელიგიის თავისუფლებასა და ეთნიკურ მრავალფეროვნებასთან დაკავშირებული პრობლემატიკის წარმოჩენა და გადაჭრის გზების შეთავაზება“, ნათქვამია ორგანიზაციის ვებგვერდზე. სრულად... წყარო: tdi.ge

თბილისი. ადამიანის უფლებების სწავლებისა და მონიტორინგის ცენტრი (EMC) მოუწოდებს საქართველოს მთავრობას, დაუყოვნებლივ დანერგოს მოქნილი, დროებითი სოციალური დაცვის მექანიზმები, რომელიც დაფარავს ყველას ვინც ახალი კორონავირუსის გავრცელებით შექმნილ კრიზისულ ვითარებაში დაკარგა ან დაკარგავს შემოსავალს. „ამგვარი სოციალური პროგრამის შემუშავების დროს კი, იხელმძღვანელოს საერთაშორისო სტანდარტებითა და გამოცდილებით. კრიზისის დასაძლევად აქამდე შემუშავებული ზომების დიდი ნაწილი დამსაქმებლებისთვის გათვალისწინებულ შეღავათებს მოიცავს. მნიშვნელოვანია შემუშავდეს ისეთი სოციალური პროგრამებიც, რომლებიც პირდაპირ შემოსავლის გარეშე დარჩენილ მოსახლეობას მიემართება“, ნათქვამია ორგანიზაციის ვებგვერდზე. სრულად... წყარო: emc.org.ge