თბილისი. ქალთა ინიციატივების მხარდამჭერი ჯგუფი (WISG) სახელმწიფო უწყებებს მიმართავს კორონავირუსის გავრცელებასთან დაკავშირებული მდგომარეობის შესახებ.  „ვირუსით გამოწვეული კრიზისული მდგომარეობა ყველაზე მწვავედ აისახება მათზე, ვისაც არ აქვს თვითიზოლაციაში ან დისტანციურად მუშაობის “ფუფუნება”, მარტოხელა და მიუსაფარი მოხუცები, უსახლკარო ადამიანები, დევნილები, მარტოხელა დედები, შშმ პირები და სხვა. მათ შორის არიან ტრანსგენდერი ადამიანები, რომელთაც სახელმწიფო დღემდე უარს ეუბნება გენდერის სამართლებრივი აღიარების რეგულირებაზე, რაც უბრალო იურიდიული ფორმალობა კი არა, სასიცოცხლოდ მნიშვნელოვანი სამართლებრივი ინსტრუმენტია ტრანსგენდერი ადამიანების ჯანდაცვის, დასაქმების და სოციალური დაცვის სხვა მექანიზმებზე ხელმისაწვდომობისთვის“. სრულად... წყარო: women.ge

თბილისი. „ადამიანის უფლებების სწავლებისა და მონიტორინგის ცენტრი“ (EMC) ეხმიანება 2020 წლის 20 მარტს სინოდის მიერ მიღებულ დადგენილებას, რომელიც Covid 19 ვირუსის ეპიდემიასთან დაკავშირებით ეკლესიაში ღვთისმსახურების წესის უცვლელად დატოვების საკითხს უკავშირდება. ორგანიზაცია მიიჩნევს, რომ სინოდის ეს გადაწყვეტილება ეწინააღმდეგება მწვავე სოციალურ ინტერესებს და საჯარო წესრიგს. „საგანგებო მდგომარეობის შემოღების შესახებ მთავრობის დღევანდელი გადაწყვეტილება სავარაუდოდ საპატრიარქოს გუშინდელ გადაწყვეტილებაზე პოლიტიკური რეაქცია იყო. EMC მიიჩნევს, რომ სინოდის გადაწყვეტილება ვირუსის გავრცელების მასშტაბს და რისკებს სათანადოდ არ იაზრებს და უგულბელეყოფს ადამიანის სიცოცხლის, ჯანმრთელობის და უსართხოების დაცვის მაღალ საჯარო ინტერესებს, რაც ორგანიზაციის მხრიდან სოციალური პასუხისმგებლობის პრობლემას აჩვენებს და საჯარო წესრიგის დაცვის იდეასთან მოდის ღია წინააღმდეგობაში“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება კორონავირუსის გავრცელების ფონზე დასაქმებულების შრომითი უფლებების მასიურ დარღვევას. ორგანიზაცია მოუწოდებს სახელმწიფოს, განახორციელოს აუცილებელი ინტერვენციები მშრომელების უფლებების დაცვის, გაძლიერების და მათი უსაფრთხოების უზრუნველსაყოფად. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) მოუწოდებს საქართველოს მთავრობას და ადგილობრივ თვითმმართველობებს განსაკუთრებული ყურადღება მიაქციონ სოფელებში წყლის უფლების დაცვას, რომელიც კრიტიკულად მნიშვნელოვანია COVID-19 ვირუსის პრევენციის მიზნით. „EMC სისტემურად ახორციელებს ქვემო ქართლის რეგიონსა და ახმეტის მუნიციპალიტეტში ეთნიკური უმცირესობებით დასახლებული სოფლების საჭიროებების კვლევას. სოფლების უმეტესობაში მთავარ გამოწვევად სწორედ სუფთა სასმელ და სამომხმარებლო წყალზე ხელმისაწვდომობა რჩება“, ნათქვამია განცხადებაში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება აზერბაიჯანელი ჟურნალისტის, აფგან მუხთარლის მიერ, 19 მარტს ტელეკომპანია ,,ფორმულას“ ეთერში საქართველოდან მისი გატაცების საქმეში ქართველის სამართალდამცავების მონაწილეობისა და სავარაუდო კორუფციული გარიგების შესახებ გაჟღერებულ ინფორმაციას. ორგანიზაცია მოუწოდებს საქართველოს გენერალურ პროკურატურას და პარლამენტს მათი მანდატის ფარგლებში მიიღონ დაუყოვნებელი ზომები საქმის ჯეროვანი გამოძიებისა და რეაგირებისთვის. სრულად... წყარო: emc.org.ge

თბილისი. გაეროს ქალთა ფონდის ინფორმაციიტთ, COVID-19 -ის გამო, ქალებს, რომლებიც დისტანციურად მუშაობენ, გაზრდილი საოჯახო საქმეების შესრულებაც უწევთ. მნიშვნელოვანია, კაცებმა ეს ტვირთი თანაბრად გადაინაწილონ. „მთელ მსოფლიოში ქალები არაანაზღაურებად საოჯახო საქმიანობას 3-ჯერ მეტ დროს უთმობენ, ვიდრე — კაცები. იგივე მაჩვენებელი გვაქვს საქართველოშიც: ქალები საოჯახო საქმეებზე ყოველკვირეულად 45 საათს ხარჯავენ, კაცები კი — 15 საათს (გაეროს ქალთა ორგანიზაცია, 2018)“. სრულად… წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ქვეყანაში ახალი კორონავირუსის (COVID – 19) გავრცელებასთან დაკავშირებულ მდგომარეობას და საქართველოს მთავრობას უსახლკარო და სოციალურად მოწყვლადი სხვა ჯგუფების უსაფრთხოების დაცვისა და მათი საჭიროებების გათვალისწინებისკენ მოუწოდებს. „ქვეყნის წინაშე არსებული გამოწვევების ფონზე, აუცილებელია, მთავრობამ მხედველობაში მიიღოს არა მხოლოდ საზოგადოებრივი ჯანდაცვის, არამედ სოციალური დაცვის ასპექტებიც. ერთ-ერთი ყველაზე მნიშვნელოვანი საკითხი შექმნილ მდგომარეობაში უსახლკარო პირთა საჭიროებების გათვალისწინება და სათანადო საცხოვრებლით უზრუნველყოფაა, რაც შექმნილ ვითარებაში, უსახლკარო პირთათვის სასიცოცხლო მნიშვნელობას იძენს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: არის თუ არა დამსაქმებელი ვალდებული, დასაქმებული პირბადეებით და სხვა ინდივიდუალური დაცვის საშუალებებით უზრუნველყოს. „სახელმწიფოს რეკომენდაციების გათვალისწინებით და კორონავირუსის გავრცელების მაღალი საფრთხიდან გამომდინარე, განსაკუთრებით ისეთ სამუშაო ადგილებში, სადაც დასაქმებულებს ხშირი შეხება აქვთ მესამე პირებთან, დამსაქმებელი ვალდებულია უზრუნველყოს დასაქმებულთა უსაფრთხოება ყველა სათანადო ინდივიდუალური დაცვის საშუალებებით, მათ შორის, პირბადეებით, სადეზინფექციო საშუალებებითა და სხვა სახის ინვენტარით“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: აქვს თუ არა დამსაქმებელს უფლება, თვითიზოლაციაში მყოფი დასაქმებული სამსახურში დაიბაროს. „საქართველოს შრომის კოდექსის თანახმად, დამსაქმებელი ვალდებულია დაიცვას საქართველოს კანონმდებლობით განსაზღვრული ადამიანის ძირითადი უფლებები და თავისუფლებები. დამსაქმებლის მითითება არ უნდა გულისხმობდეს კანონით აკრძალულ ქმედებას. დასაქმებულს უფლება აქვს უარი განაცხადოს იმ სამუშაოს, დავალების ან მითითების შესრულებაზე, რომელიც ეწინააღმდეგება კანონს. დამსაქმებლის მხრიდან დასაქმებულისთვის თვითიზოლაციის წესის დარღვევის მოთხოვნა კანონსაწინააღმდეგო ქმედებად უნდა მივიჩნიოთ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, განათლების საერთაშორისო ცენტრი სასამართლოს გადაწყვეტილებას არ ასრულებს. „2015 წლის წელს ქამრან მამედოვი საზღვარგარეთ სამაგისტრო პროგრამის დაფინანსების მოსაპოვებლად მონაწილეობდა განათლების საერთაშორისო ცენტრის მიერ გამოცხადებულ კონკურსში. საკონკურსო კომისიის გადაწყვეტილებით მას დაფინანსებაზე დაუსაბუთებლად ეთქვა უარი. ქამრან მამედოვმა კომისიის გადაწყვეტილება საიას დახმარებით სასამართლოში გაასაჩივრა. მისი სარჩელი თბილისის სააპელაციო სასამართლოს 2017 წლის 12 ივლისის გადაწყვეტილებით დაკმაყოფილდა და ბათილად იქნა ცნობილი კონკურსის შედეგები, რის საფუძველზეც განათლების საერთაშორისო ცენტრს დაევალა საქმის გარემოებების დამატებითი გამოკვლევის გზით ახალი აქტის მიღება. გადაწყვეტილება კანონიერ ძალაში შევიდა საქართველოს უზენაესი სასამართლოს 2018 წლის 11 იანვრის განჩინების საფუძველზე, თუმცა ადმინისტრაციულ ორგანოს კანონიერ ძალაში შესული გადაწყვეტილების აღსრულების პროცედურები ამ დრომდე არ დაუწყია“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ღია საზოგადოების ფონდი (OSGF) შრომის უფლებადარღვეული მოქალაქეებისთვის უფასო სამართლებრივ კონსულტაციაზე განცხადებას ავრცელებს. „ჩვენთვის ცნობილია, რომ არაერთმა დასაქმებულმა დაკარგა სამსახური ან სხვაგვარად დაერღვა შრომის უფლება. ზოგიერთ შემთხვევაში, დამსაქმებელმა თანამშრომლები იძულებით და არაანაზღაურებად შვებულებაში გაუშვა. არსებობს ისეთი შემთხვევებიც, როდესაც დასაქმებულების შესაბამისი სამართლებრივი საფუძვლისა და დასაბუთების გარეშე დაუკავეს ხელფასი ან მისი ნაწილი ან თვითიზოლაციის წესის დარღვევას და სამსახურში გამოცხადებას აიძულებდნენ. ეს მხოლოდ მცირე ჩამონათვალია შრომის უფლების შესაძლო დარღვევებისა. უფასო სამართლებრივი კონსულტაციის მისაღებად შეგიძლიათ მიმართოთ ჩვენს პარტნიორ ორგანიზაციებს – საქართველოს ახალგაზრდა იურისტთა ასოციაცია, Emc • ადამიანის უფლებების სწავლებისა და მონიტორინგის ცენტრი და სოლიდარობის ქსელი/Solidarity Network. შესაძლებლობის ფარგლებში, იურისტები მოგაწვდიან ინფორმაციას თქვენი უფლებებისა და სამართლებრივ გამოსავალს შემოგთავაზებენ. საჭიროების შემთხვევაში, დაგეხმარებიან, მოამზადოთ სარჩელი ან სხვა იურიდიული დოკუმენტაცია“, ნათქვამია განცხადებაში. სრულად... წყარო: osgf.ge

დღეს, 16:30 საათზე, გაიმართება ონლაინ სემინარი: „ქალები გარემოსდაცვითი და სოციალური სამართლიანობისთვის". ხანგრძლივობა: 1 საათი ბმული... ID (სმარტფონებისთვის) - 413-320-264 ინიციატივა ხორციელდება პროექტის - „ტყის მდგრადი მართვა საქართველოში ფარგლებში“, „ავსტრიის თანამშრომლობა განვითარებისათვის“ ფინანსური მხარადჭერით. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია აქვეყნებს ბლოგპოსტს: COVID-19-თან დაკავშირებული გამოწვევები შრომით ურთიერთობებში (დროებითი შრომისუუნარობისა და შვებულების გამო შრომითი ურთიერთობის შეჩერება). „საქართველოში კორონავირუსის გავრცელება მნიშვნელოვანი გამოწვევაა, როგორც ჯანმრთელობის, ისე - ეკონომიკური და სამართლებრივი თვალსაზრისით. პანდემიის გავრცელებამ გავლენა მოახდინა შრომით ურთიერთობებზეც. დღეის მდგომარეობით, მთავრობის მიერ გაცემული რეკომენდაციებისა და უსაფრთხოების ზომებიდან გამომდინარე, დამსაქმებლები ეფექტიანი ღონისძიებების განსაზღვრის აუცილებლობის წინაშე აღმოჩნდნენ. არსებული მდგომარებობის პირობებში, აქტუალურია შემდეგი საკითხები:  - შრომის კანონმდებლობით განსაზღვრული რა უფლებები და ვალდებულებები გააჩნიათ თვითიზოლაციასა და კარანტინში მყოფ პირებს;  - შეუძლია თუ არა დამსაქმებელს დასაქმებულის შვებულებაში მისი ნების საწინააღმდეგოდ გაშვება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „სამოქალაქო საზოგადოების განვითარების ინიციატივის“ განმახორციელებელი ორგანიზაციები ყურადღებით ადევნებენ თვალს ბოლო დროს საქართველოსა და მსოფლიოში ახალი პანდემიის, #COVID-19-ის, ირგვლივ განვითარებულ მოვლენებს. „ვირუსის გავრცელების დღიდან ზედმიწევნით ვიცავთ ჯანდაცვის მსოფლიო ორგანიზაციის, საქართველოს მთავრობისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გაცემულ რეკომენდაციებს. ჩვენი კონსორციუმის წევრებისთვის თანამშრომელთა, ბენეფიციართა და პარტნიორთა ჯანმრთელობა და კეთილდღეობა უპირველესი ღირებულებაა. ვირუსის გავრცელების რისკის მომატების დღიდან კონსორციუმის წევრმა ყველა ორგანიზაციამ მიიღო შესაბამისი ზომები, რათა შეემცირებინა ვირუსის გავრცელების შესაძლებლობა, კერძოდ: გადადო თანამშრომელთა და ექსპერტთა საერთაშორისო და ქვეყნის შიდა მივლინებები; შეხვედრები და ღონისძიებები გადაიტანა ონლაინ რეჟიმში; შემოიღო ჰიგიენის წესების დაცვის განსაკუთრებული ზომები საკუთარ ოფისებში“, ნათქვამია განცხადებაში. სრულად... წყარო: პროექტის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: რა უნდა ვიცოდეთ სამსახურიდან გათავისუფლების შემთხვევაში. „იმ შემთხვევაში თუ დაცულია ყველა ზემოთ ჩამოთვლილი წინაპირობა და მაინც არსებობს საქართველოს შრომის კოდექსის 37-ე მუხლის პირველი პუნქტის „ა“ ქვეპუნქტით თქვენი გათავისუფლების საფუძველი, დამსაქმებელი ვალდებულია:  1. 30 კალენდარული დღით ადრე წინასწარი წერილობითი შეტყობინების გამოგზავნით გაცნობოთ მოსალოდნელი გათავისუფლების თაობაზე და გადაგიხადოთ 1 თვის კომპენსაცია.  2. გაგაფრთხილოთ გათავისუფლების თაობაზე არანაკლებ 3 კალენდარული დღით ადრე წინასწარი წერილობითი შეტყობინების გამოგზავნით და გადაგიხადოთ კომპენსაცია  არანაკლებ 2 თვის შრომის ანაზღაურების ოდენობით. აღნიშნულის გათვალისწინებით თუ მიიჩნევთ რომ თქვენი უფლებები შეილახა, გაგათავისუფლეს სამსახურიდან უკანონოდ ან არ მოგეცათ შესაბამისი კომპენსაცია, უფლებამოსილი ხართ მიმართოთ სასამართლოს კანონით განსაზღვრული წესით“. სრულად... წყარო: gyla.ge

თბილისი. საქართველოს სახალხო დამცველი, ნინო ლომჯარია აქვეყნებს ინფორმაციას ადამიანის უფლებების სტანდარტების შესახებ პანდემია/ეპიდემიის დროს. ომბუდსმენი შექმნილ ვითარებაში ადამიანის უფლებების დაცვის სტანდარტების შესახებ ხშირად დასულ შეკითხვებს პასუხიბს. სრულად... წყარო: ombudsman.ge

თბილისი. „კონსტიტუციის 42-ე მუხლის“ ინფორმაციით: აზერბაიჯანელი ჯურნალისტი და უფლებადამცველი აფგან მუხთარლი თავისუფალი. „არჩილ ჩოფიკაშვილს აფგან მუხთარლის მეუღლემ ლეილა მუსტაფაევამ ბერლინიდან შეატყობინა, რომ აფგან მუხთარლი პატიმრობიდან გაათავისუფლეს და რამდენიმე საათში იგი ბერლინში ჩადის. აზერბაჯანელი ჟურნალისტი და უფლებადამცველი აფგან მუხთარლი თბილისიდან 2017 წლის 29 მაისს გაიტაცეს, აზერბაიჯანში გადაიყვანეს და გამოგონებული ბრალდების საფუძველზე 6 წელი მიუსაჯეს. გატაცებული ჟურნალისტის ინტერესებს საქართველოში და ევროპის ადამიანის უფლებათა დაცვის საერთაშორისო სასამართლოში „თბილისის ადამიანის უფლებათა სახლის“ წევრი ორგანიზაციის „კონსტიტუციის 42-ე მუხლის“ იურისტი არჩილ ჩოფიკაშვილი და ნიკოლოზ ლეგაშვილი იცავენ, საქმეს მინიჭებული აქვს პრიორიტეტი და უახლოეს პერიოდში სასამართლო გადაწყვეტილებას მიიღებს მოპასუხე სახელმწიფოების - საქართველოსა და აზერბაიჯანის მიმართ“, ნათქვამია ორგანიზაციი ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი (UNICEF) აქვეყნებს ბლოგპოსტს პანდემიის პერიოდში ამოყალიბებულ სტიგმებზე. „პანდემიის პერიოდში ერთ-ერთ საშიშროებას წარმოადგენს სოციალური სტიგმა, რაც ხშირად დაავადებულებისადმი სტერეოტიპებისა და იარლიყების მიწებებაში, მათ დისკრიმინაციაში გამოიხატება. სტიგმასთან ბრძოლა მნიშვნელოვანია, რადგან მან შეიძლება: უბიძგოს ადამიანებს, დისკრიმინაციის თავიდან აცილების მიზნით დამალონ დაავადება; ხელი შეუშალოს ადამიანებს, რომ მყისიერად მიმართონ სამედიცინო დაწესებულებას; თავი შეაკავებინოს მათ ჯანსაღი ქცევისგან; მოერიდეთ გადამოუწმებელი ინფორმაციის გავრცელებას. - არასწორი წარმოდგენები, ჭორები და მცდარი ინფორმაცია ხელს უწყობს სტიგმას და დისკრიმინაციას, რაც აფერხებს დაავადებაზე რეაგირების ეფექტიანობას“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, რუსეთის ფედერაციამ კომპენსაცია გადაუხადა 2006 წელს რუსეთიდან კოლექტიური გამოძევების შედეგად დაზარალებულ იმ მოქალაქეებს, რომლებსაც ადამიანის უფლებათა ევროპულ სასამართლოში ინდივიდუალური საჩივრები ჰქონდათ წარდგენილი. „ამ ეტაპზე რუსეთის ფედერაციამ საიას დაცვის ქვეშ მყოფ 7 პირს ჩაურიცხა ევროპული სასამართლოს 2019 წლის 26 მარტის გადაწყვეტილებით მიკუთვნებული კომპენსაცია, ხოლო ერთ მომჩივანთან მიმართებით საია აგრძელებს კომუნიკაციას რუსეთის ფედერაციასთან“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ადამიანის უფლებათა ევროპულ სასამართლოში მომჩივანსა და სახელმწიფოს შორის მორიგება არ შედგა გენდერის სამართლებრივი აღიარების საქმეზე. „აღნიშნული საქმე ტრანსგენდერი მამაკაცის, ნიკოლო ღვინიაშვილისთვის საიდენტიფიკაციო დოკუმენტებში სასურველი გენდერის ასახვაზე ეროვნული ორგანოების უარს შეეხება“.  სრულად... წყარო: gyla.ge

თბილისი. გენდერული საინფორმაციო ქსელის ინფორმაციით, საქსტატის მონაცემებით, 2019 წლის IV კვარტალში საქართველოში კაცების საშუალო თვიური ნომინალური ხელფასი ქალების ხელფასზე 575 ლარით მეტი „სტატისტიკის ეროვნული სამსახურის” ანგარიშის თანახმად, 2019 წლის IV კვარტალში ქალების საშუალო ხელფასი 1 018.5 ლარით, ხოლო კაცების - 1 593.2 ლარით განისაზღვრა და ხელფასების წლიურმა ზრდამ, შესაბამისად, 112.5 და 124.7 ლარი შეადგინა. საქმიანობის სახეების მიხედვით კაცების ხელფასი თითქმის ყველა სექტორში აღემატებოდა ქალების ხელფასს“, ნათქვამია პლატფორმის ვებგვერდზ სრულად... წყარო: ginsc.net

თბილისი. საქართველოს ახალგაზრდა იურისტთა ასოციაციის ინფორმაციით, 27 იანვარს, საქართველოს სახალხო დამცველმა დაადგინა, რომ „იდენტობას“ მიმართ ბათუმის შოთა რუსთაველის სახელმწიფო უნივერსიტეტმა და აკაკი წერეთლის სახელობის ქალაქ ბათუმის საჯარო ბიბლიოთეკამ განახორციელეს სექსუალური ორიენტაციისა და საქმიანობის სფეროს ნიშნით პირდაპირი დისკრიმინაცია. „იდენტობას“ ინტერესებს საია იცავდა. „ომბუდსმენმა რეკომენდაციით მიმართა ბათუმის შოთა რუსთაველის სახელმწიფო უნივერსიტეტს და აკაკი წერეთლის სახელობის ქალაქ ბათუმის საჯარო ბიბლიოთეკას, რათა შეემუშავებინათ დისკრიმინაციის აკრძალვის და პრევენციის პოლიტიკის შიდა დოკუმენტი და მომავალი საქმიანობა წარემართათ თანასწორობის პრინციპის დაცვით“. ბათუმის უნივერსიტეტმა რეკომენდაციების შესასრულებლად აქტივობები დაგეგმა, ხოლო ბიბლიოთეკამ ომბუდსმენის რეკომენდაცია ცნობად მიიღო და სამომავლოდ გაითვალისწინებენ.  სრულად... წყარო: gyla.ge