თბილისი. 17 მარტს, EMC-ის წარმომადგენლებმა და ტყიბულში არსებული ძიძიგურის სახელობის შახტის მეშახტეებმა ერთობლივი პრესკონფერენცია გამართეს. „მეშახტეები რამდენიმე დღეა უარს აცხადებენ შახტში მუშაობაზე, იქ არსებული საფრთხისშემცველი სამუშაო გარემოს გამო. EMC მხარდაჭერას უწევს ძიძიგურის შახტის მეშახტეებს და მოუწოდებს სახელმწიფოს, გაითვალისწინოს მისივე დაკვეთით შესრულებული აუდიტის დასკვნის რეკომენდაციები და უსაფრთხო სამუშაოს გარემოს უზრუნველყოფამდე შეაჩეროს ნახშირმოპოვებითი სამუშაობი შახტებში და დაიცვას მეშახტეების შრომითი უფლებები“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. შშმ პირთა უფლებებზე მომუშავე ორგანიზაციები და აქტივისტები “შშმ პირთა უფლებების შესახებ” კანონპროექტის განხილვისას ეფექტიან ჩართულობას ითხოვენ.  „მოგეხსნებათ, საკითხის მნიშვნელობიდან და აქტუალობიდან გამომდინარე, სასიცოცხლოდ მნიშვნელოვანია აღნიშნული კანონის პროექტის განხილვაში შშმ პირთა თემის წარმომადგენლების, მშობლების და შშმ პირთა უფლებებზე მომუშავე ორგანიზაციების ჩართულობა, ვინაიდან არ მოხდეს რაიმე არასწორი გადაწყვეტილების მიღება. ამავდროულად აღვნიშნავთ, რომ ჯანდაცვის მსოფლიო ორგანიზაციის და საქართველოს დაავადებათა კონტროლის ეროვნული ცენტრის პირდაპირი რეკომენდაციაა, რომ კორონავირუსული ინფექციის საფრთხის გამო, მაქსიმალური დაცვა სჭირდება შშმ თემს, ვინაიდან სწორედ ისინი წარმოადგენენ ერთ-ერთ რისკ-ჯგუფს. შესაბამისად, ერთი მხრივ კანონის პროექტის განხილვაში მათი მონაწილეობა დიდ საფრთხეს წარმოადგენს მათი ჯანმრთელობისთვის, მეორე მხრივ კი, შშმ თემის ჩართულობის გარეშე მათთან დაკავშირებულ კანონპროექტზე მუშაობა აბსოლუტურად აზრს მოკლებულია, რაც ეწინააღმდეგება გაეროს შშმ პირთა უფლებების კონვენციას“, ნათქვამია ერთობლივ განცხადებაში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) თეონა ბაკურიძის სამსახურიდან გათავისუფლების გადაწყვეტილებას ეხმიანება. ორგანიზაცია მიიჩნევს, რომ მაუწყებლის დირექტორის, გიორგი კოხრეიძის მიერ მიღებული ბრძანება უკანონო და დაუსაბუთებელია და ის ახალი მენეჯმენტის მიერ მაუწყებლის დამოუკიდებლობის ხელყოფის წინასწარ ორგანიზებული და ორკესტრირებული პროცესის კიდევ ერთი მძიმე გამოვლინებაა. სრულად... წყარო: emc.org.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის უზენაესი სასამართლოს თავმჯდომარის თანამდებობაზე ასარჩევად ნინო ქადაგიძის წარდგენას ეხმიანება. „მნიშვნელოვანია, რომ საბჭომ ნინო ქადაგიძის წარდგენის შესახებ გადაწყვეტილება მხოლოდ უზენაესი სასამართლოს მოსამართლეებთან დახურულ კარს მიღმა გამართული კონსულტაციების საფუძველზე მიიღო. საკითხის განხილვაში ჩართული არ ყოფილან პირველი და მეორე ინსტანციის მოსამართლეები, სამოქალაქო საზოგადოების წარმომადგენლები და სხვა დაინტერესებული პირები. პროცესის მიმართ ზემოაღნიშნული კითხვებისა და თავად კანდიდატის უზენაეს სასამართლოში მოსამართლედ განწესების ისტორიის გათვალისწინებით, კოალიცია გაუმართლებლად მიიჩნევს, უზენაესი სასამართლოს თავმჯდომარის პოზიციაზე ნინო ქადაგიძის წარდგენას და მოუწოდებს დეპუტატებს უარი თქვან წარდგენილი კანდიდატის მხარდაჭერაზე“, ნათქვამია კოალიციის განცხადებაში. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაცია (საია) მოწვეული ექსპერტის, ფატი ჩაფიჩაძის ბლოგპოსტს: დროში დაკარგული მართლმსაჯულება. "დაზარალებული პატიმრების უმრავლესობამ მოიხადა სასჯელი და სამართლის მოლოდინში მყოფნი, შესაძლოა ქუჩაშიც არაერთხელ შეხვედრილან იმ ადამიანებს, რომლებსაც, მათ მიმართ სავარაუდო უმძიმესი დანაშაულის ჩადენაში ედებათ ბრალი. სასამართლო არ ფიქრობს, რომ კანონიერი გზით სავარაუდო დამნაშავეების დასჯის მიუღწევლობამ, რა შედეგებამდე შეიძლება მიიყვანოს ამგვარი შეხვედრით ხელახლა ვიქტიმიზებული ადამიანი. იყო არბიტრი, არ ნიშნავს განყენებულად წარმართავდე პროცესს, მოსამართლეს 6 წლის განმავლობაში წუთით მაინც რომ წარმოედგინა, რას ნიშნავს განიცადო წამება/არაადამიანური მოპყრობა ან რას ნიშნავს ბრალს გდებდნენ ამგვარი დანაშაულის ჩადენაში, შეძლებდა კანონმდებლობით დადგენილ გონივრულ ვადაში, საქმეზე შემაჯამებელი გადაწყვეტილების მიღებას და მისი უპირველესი ამოცანის შესრულებას - ჭეშმარიტების დადგენას", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი სახელმწიფო დეპარტამენტის მიერ მშრომელთა უფლებრივი მდგომარეობის შესახებ გამოქვეყნებულ ანგარიშს მიმოიხილავს. "ანგარიშის თანახმად, საქართველოში შრომის არასათანადო პირობები სხვადასხვა კომპონენტში გამოიხატება. მათ შორის არის მინიმალური ხელფასის საკითხი, რომელიც კერძო თუ საჯარო სექტორში დასაქმებულებისთვის ოფიციალურ საარსებო შემოსავლის დონეზე დაბალი იყო", ნათქვამია ორგანიზაციის ვებგვერდზე. სრულად...  წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: ქართულ კანონმდებლობაში უსახლკარო პირის დეფინიცია საერთაშორისო სტანდარტებს არ შეესაბამება. „ეროვნულ კანონმდებლობაში უსახლკარობის დეფინიცია ხარვეზიანი და ბუნდოვანია და არ შეესაბამება საერთაშორისო სტანდარტებს. ცნების ბუნდოვანება იწვევს სხვადასხვა სოციალურად მოწყვლადი ჯგუფის გარიყვას საცხოვრისის პოლიტიკის ხედვის არეალიდან“, ნათქვამია ორგანიზაციის ვებგვერდზე. სრულად... წყარო: emc.org.ge

აშშ-ის საელჩოებს მთელი მსოფლიოდან წვლილი შეაქვთ ადამიანის უფლებების ყოველწლიურ ანგარიშში. "ჩვენი დიპლომატები აგროვებენ, აანალიზებენ და თავს უყრიან სხვადასხვა წყაროდან, მათ შორის სამთავრობო სააგენტოებიდან, არასამთავრობო ორგანიზაციებიდან, მედია და სხვა წყაროებიდან მიღებულ ინფორმაციას. 2019 წლის ანგარიში ხელმისაწვდომია ბმულზე..." წყარო: ამერიკის საელჩოს გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვლოგპოსტს: დომინანტური მზერა აზერბაიჯანელი თემის მიმართ. „ვიდეოში მკვლევარები, ადგილობრივი აქტივისტები საუბრობენ ქვემო ქართლის რეგიონში კულტურული დომინაციისა და ადგილობრივი ეთნიკური უმცირესობების კულტურის წაშლის ნიშნებზე. მოქალაქეობის შესახებ გაბატონებული არაინკლუზიური გაგება, რომელიც მოქალაქეობას დომინანტური რელიგიური და ეთნიკური მარკერებით განსაზღვრავს და ეთნიკურ და რელიგიურ უმცირესობებს სტუმრის, ან უცხოს სტატუსით მონიშნავს, ცხადია გამრიყავ გარემოს ქმნის“, ნათქვამია ორგანიზაციის ვებგვერდზე. სრულად... წყარო: emc.org.ge

კორონავირუსული ინფექციის გავრცელების პრევენციისთვის „საერთაშორისო გამჭვირვალობა-საქართველოს" იურიდიული დახმარების ცენტრი მარტის ბოლომდე დისტანციურ რეჟიმში იმუშავებს - მოქალაქეთა მიღება ოფისებში დროებით შეჩერდება.  „თუ დაგჭირდებათ სამართლებრივი დახმარება, სამუშაო საათებში (ორშაბათი-პარასკევი, 10:00-18:00) მოგვწერეთ ონლაინ ან ტელეფონის/ელექტრონული ფოსტის მეშვეობით მიმართეთ ჩვენს იურისტებს...“ ელ-ფოსტა: alac@transparency.ge სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, 10 მარტს, ქალაქ ტყიბულში, ძიძიგურისა და მინდელის შახტების დამაკავშირებელ სავენტილაციო გვირაბში, იქ დაგროვილი მხუთავი აირებისგან მოწამვლის გამო სამი მეშახტე ქალაქ ქუთაისის საავადმყოფოში გადაიყვანეს. „ორგანიზაციები მთავრობისგან მოითხოვენ უსაფრთხო სამუშაო გარემოს უზრუნველყოფამდე ტყიბულის შახტების დახურვას და სამუშაოების განახლებამდე მეშახტეებისთვის ხელფასების სრულად ანაზღაურებას“. სრულად... წყარო: emc.org.ge

თბილისი. 10 მარტს საქართველოს ახალგაზრდა იურისტთა ასოციაციამ პარტნიორ ორგანიზაციასთან, „ადამიანის უფლებათა დაცვის ევროპულ ცენტრთან (EHRAC),“ თანამშრომლობით ირაკლი ხოფერიას წამების საქმეზე ევროპულ სასამართლოში წერილობითი არგუმენტაცია წარადგინა. „2017 წლის 16 თებერვალს ირაკლი ხოფერია პოლიციელებმა ყოველგვარი ახსნა-განმარტების გარეშე ვაკე-საბურთალოს პოლიციის მე-5 განყოფილებაში გადაიყვანეს, სადაც იგი სამართალდამცავთა მხრიდან სიტყვიერ და ფიზიკურ შეურაცხყოფას დაექვემდებარა. არასათანადო მოპყრობის მიზანი ხოფერიასგან აღიარებითი ჩვენების მოპოვება იყო იმ დანაშაულის შესახებ, რომელიც მას არ ჩაუდენია, წინააღმდეგ შემთხვევაში კი მას ნარკოტიკული ნივთიერების ჩადებითა და მრავალწლიანი საპატიმრო სასჯელით ემუქრებოდნენ. ხოფერია განყოფილებაში მიყვანიდან 4 საათის შემდეგ გაათავისუფლეს, რაც გაარკვიეს, რომ ირაკლი, შეცდომით, სხვა პირის ნაცვლად დააკავეს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: კორონა ვირუსი, ეკონომიკური კრიზისი და ადამიანის უფლებები. „ის რომ კორონა ვირუსი მსოფლიო ეკონომიკაზე ნეგატიურად ზემოქმედებს და მისი ფართოდ გავრცელების შემთხვევაში შესაძლოა ქვეყნების უმრავლესობა ეკონომიკურ კრიზისამდე მიიყვანოს აზრს მოკლებული მსჯელობა ნამდვილად არ არის. ამ პროცესში კი განსაკუთრებით საინტერესოა იმის გაანალიზება თუ რა შედეგები შეიძლება იქონიოს ეკონომიკურმა კრიზისმა ადამიანის უფლებებზე და როგორი შეიძლება იყოს სახელმწიფოს გონივრული ქცევა აღნიშნულ პროცესში. 2008-2009 წლებში ევროკავშირის წევრმა სახელმწიფოებმა გამოცადეს ყველაზე მძაფრი ეკონომიკური კრიზისი 1930-იანი წლების დიდი დეპრესიის შემდეგ. წარსულ გამოცდილებებზე დაკვირვებით, ეკონომიკური კრიზისი წარმოშობს მწვავე პრობლემებს ადამიანის უფლებათა დაცვისა და აღსრულების ნაწილში. თავს იჩენს ისეთი მწვავე საკითხები, როგორიცაა: გაზრდილი უმუშევრობის დონე, შემცირებული სახელმწიფო ხარჯები და ასევე ქსენოფობია და რასიზმი. ეკონომიკური კრიზისის დროს მოწყვლად ჯგუფებად მიიჩნევიან ბავშვები, მოზარდები, მოხუცები, მიგრანტები და ეთნიკური უმცირესობები“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს სახალხო დამცველმა დღეს გამოაქვეყნა სპეციალური ანგარიში - „სისხლის სამართლის მართლმსაჯულების სფეროში არასრულწლოვან ბრალდებულთა, მოწმეთა და დაზარალებულთა საპროცესო უფლებების დაცვა“. პროექტი განხორციელდა საქართველოს სახალხო დამცველის აპარატსა და ა(ა)იპ „ინიციატივა მოწყვლადი ჯგუფების რეაბილიტაციისთვის“ ურთიერთთანამშრომლობის მემორანდუმის საფუძველზე, ნიდერლანდების სამეფოს საელჩოს ფინანსური მხარდაჭერით. კვლევის მიზანი იყო სასამართლო სხდომებზე დაკვირვების გზით, შეფასებულიყო სასამართლო განხილვის პროცესში კანონთან კონფლიქტში მყოფ და მოწმე/დაზარალებულ ბავშვთა უფლებების დაცვის ხარისხი.  სასამართლო განხილვების მონიტორინგი, 2019 წლის ივლისიდან დეკემბრის ჩათვლით, ჩატარდა სამ დიდ ქალაქში, კერძოდ, თბილისის, ქუთაისისა და რუსთავის საქალაქო სასამართლოებში. სრულად...  წყარო: http://ombudsman.ge

თბილისი. 10 მარტს, ინფორმაციის თავისუფლების განვითარების ინსტიტუტმა (IDFI) გაეროს განვითარების პროგრამის (UNDP) მხარდაჭერით, გამართა პირველი სისტემური კვლევის ანგარიშის პრეზენტაცია, რომელიც საჯარო სექტორში გენდერული თანასწორობის კუთხით სამუშაო გარემოს, კარიერულ სვლას და პროფესიულ განვითარებას ასახავს. „რაოდენობრივი და თვისებრივი კვლევის მონაცემები ადასტურებს, რომ საჯარო სამსახურში ქალი და კაცი მენეჯერების მიერ განვლილი გზა განსხვავებულია და ეს განსხვავებები გამოხატულია სხვადასხვა კულტურული პრაქტიკით, რომელთა მიხედვით, საჯარო სამსახურში ვლინდება გენდერული უთანასწორობა“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: ნაადრევი ქორწინება - გაბატონებული დისკურსები და საქართველოს აზერბაიჯანელი ქალების რეალური საჭიროებები. „ქართველ აზერბაიჯანელ ქალებსა და გოგონებს, განსაკუთრებით კი მათ, რომლებიც ცენტრიდან მოშორებით ცხოვრობენ, მრავალი პრობლემა აწუხებთ: განათლებაზე ხელმიუწვდომლობა, კულტურული და საგანმანათლებლო სივრცეების არარსებობა, ბაღების და ინფრასტრუქტურის არარსებობის გამო დამძიმებული აუნაზღაურებელი შრომა, პოლიტიკური და სოციალური ცხოვრებიდან მათი გამორიცხვა, ძალადობის შემთხვევაში სახელმწიფოს მიერ საკმარისი მხარდაჭერის არქონა. ეს პრობლემები ნაკლებად შუქდება მედიაში და დომინანტურმა ჯგუფებმაც ნაკლებად იციან ამ პრობლემების შესახებ“, ნათქვამია ორგანიზაციის ვებგვერდზე. სრულად... წყარო: emc.org.ge

შიდა ქართლი. 6 მარტს „კეთილდღეობის და განვითარების ცენტრთან“ არსებულ გორის სამოქალაქო აქტივიზმის ცენტრის მოხალისეებისათვის მოწვეულმა ექსპერტმა ქეთევან ბიძინაშვილმა ჩაატარა სემინარი „რეპროდუქციული ჯანმრთელობა ახალგაზრდებში“. „სემინარზე ისაუბრეს ასევე ადრეული ქორწინების მავნებლობაზე, რისკებზე და თავდაცვაზე. სემინარი საკმაოდ საინტერესო და ინტერაქტიური აღმოჩნდა. ასევე სემინარის ბოლოს გოგონებმა ანონიმურად დაუსვეს მათთვის საინტერესო კითხვები მოწვეულ სტუმარს და მიიღეს პასუხები“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

გაეროს სპეციალურმა მომხსენებელმა რელიგიისა და რწმენის თავისუფლების საკითხებში გამოაქვეყნა ანგარიში, რომელშიც ყურადღება გამახვილებულია რელიგიის სახელით ჩადენილი გენდერული ნიშნით ძალადობისა და დისკრიმინაციის პრობლემაზე. მომხსენებელმა ანგარიში გაეროს ადამიანის უფლებათა საბჭოს 43-ე სესიაზე წარადგინა.  სპეციალურმა მომხსენებელმა აჰმედ შაჰიდმა აღნიშნა: “კატეგორიულად ვეწინააღმდეგები ნებისმიერ მტკიცებას, რომ რელიგიური რწმენა შესაძლებელია გამოყენებული იყოს ქალების, გოგონების და ლგბტ+ ადამიანების მიმართ ძალადობისა და დისკრიმინაციის ლეგიტიმურ გამართლებად. რელიგიის თავისუფლების უფლება იცავს ადამიანებს და არა რელიგიებს”.  სრულად…  წყარო: http://tdi.ge

თბილისი. ადამიანის უფლებების სწავლებისა და მონიტორინგის ცენტრი (EMC) სამკერვალოებში დასაქმებული ქალების შრომით ექსპლუატაციას ეხმიანება. „ის ფაქტი, რომ დასაქმებულებს არ აქვთ ზუსტი და ამომწურავი ინფორმაცია საკუთარი შრომითი ანაზღაურების შესახებ, წინასახელშეკრულებო ურთიერთობის მარეგულირებელი კანონმდებლობის დარღვევაა. გაწეული შრომის ანაზღაურების საკითხის პრობლემურობას ასევე ამწვავებს ფაბრიკაში დასაქმებულთათვის პასუხისმგებლობის დაკისრების არსებული სისტემა - ბონუსებისა და ჯარიმების ბუნდოვანი სქემები. მატერიალური ზიანის კომპენსირების მიზნით, დასაქმებულთა უშუალო ბრალეულობის გარეშე შემოსავლის დაქვითვის პრაქტიკა ეწინააღმდეგება მოქმედ კანონმდებლობას, რადგანაც ნაცვლად ინდივიდუალური ბრალეულობის გამორკვევისა (ასეთის შემთხვევაში) კომპანია დაუსაბუთებლად და გაუმჭვირვალედ უქვითავს დასაქმებულებს შრომის ანაზღაურების ნაწილს, რაც უხეშად არღვევს კანონმდებლობით გათვალისწინებულ მოთხოვნებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 2020 წლის 27 თებერვალს საქართველოს სახალხო დამცველმა ივანე ჯავახიშვილის სახელობის თბილისის სახელმწიფო უნივერსიტეტს განსხვავებული მოსაზრების ნიშნით დისკრიმინაციის დადგენის შესახებ ორი რეკომენდაციით მიმართა.  საქმის ფაქტობრივი გარემოებების თანახმად, განმცხადებლები, მოწვეული ლექტორის სტატუსით, წლების განმავლობაში კითხულობდნენ ლექციებს უნივერსიტეტის ეკონომიკისა და ბიზნესის ფაკულტეტზე. ისინი ფაკულტეტზე არსებული მდგომარეობის შესახებ საჯაროდ გამოხატავენ კრიტიკულ მოსაზრებებს, რის გამოც ეკონომიკისა და ბიზნესის ფაკულტეტის დეკანმა მათ პროფესორად მოწვევაზე უარი განაცხადა.  სრულად...  წყარო: http://ombudsman.ge

თბილისი. საქართველოს ახალგაზრდა იურისტთა ასოციაცია აქვეყნებს გიორგი ალავერდაშვილის ბლოგს, რომელიც თანამდებობის პირების კომიტეტის სხდომაზე დაბარების წესებს განმარტავს.  „კონსტიტუციის თანახმად, საკანონმდებლო ორგანოსადმი ანგარიშვალდებული თანამდებობის პირი მოვალეა, დაესწროს კომიტეტის სხდომებს. ამისთვის საჭიროა დამსწრეთა (1) უმრავლესობის ან (2) ფრაქციის მოთხოვნა, თუ ამ ფრაქციას კომიტეტში თავისი წევრი ჰყავს. მოწვევის შესახებ ადრესატს აცნობებს კომიტეტის თავმჯდომარე სხდომამდე არაუგვიანეს ერთი კვირისა. თუმცა, რეგლამენტი არ აზუსტებს, რომ მოსმენა მოთხოვნიდან უახლოეს სხდომაზე უნდა გაიმართოს, რაც მანიპულაციის შესაძლებლობას ტოვებს“, - აღნიშნავს ავტორი.  სრულად...  წყარო: https://gyla.ge

თბილისი. ორგანიზაციამ „პარტნიორობა ადამიანის უფლებებისთვის“, სასამართლოში საქმე, რომელის მიხედვითაც, მაღალი თანამდებობის პირებზე ქალთა მიმართ ან ოჯახური ძალადობის გამო გაცემული ორდერების შესახებ ინფორმაცია საჯარო გახდება.  ეს არის უპრეცენდენტო გადაწყვეტილება, რაც ქალთა მიმართ ძალადობის და ოჯახში ძალადობის შემთხვევაში, ინფორმაციის საჯაროობის გზით, ამკვიდრებს პოლიტიკური თანამდებობის პირების მიმართ უმაღლესი საზოგადოებრივი კონტროლის სტანდარტს. აღნიშნული სტრატეგიული საქმის საფუძველზე, საქართველოს ნებისმიერ მოქალაქეს აქვს უფლება გაიგოს პოლიტიკური თანამდებობის პირები არიან თუ არა ოჯახში მოძალადეები ან როდესმე გამოცემულა თუ არა მათ მიმართ ქალზე ძალადობის გამო შემაკავებელი ან/და დამცავი ორდერი.  სრულად...  წყარო: https://phrgeorgia.wordpress.com