4 მარტს, ადამიანის უფლებათა საბჭოში, გაეროს სპეციალურ მომხსენებელთან, გაიმართა ინტერაქტიული დიალოგი უფლებადამცველების მდგომარეობის შესახებ. სხდომაზე ადამიანის უფლებათა სახლის ფონდის წარმომადგენელმა განცხადება გააკეთეს.  „ჩეჩნეთის რესპუბლიკაში არსებული მტრული გარემო ძალიან ართულებს უფლებადამცველების მუშაობას. ჩვენ ხაზს ვუსვამთ გროზნოში განხორციელებული ძალადობრივი თავდასხმებისა და შევიწროების ბოლოდროინდელ შემთხვევებს ჟურნალისტ ელენა მილაშინას, ადვოკატ მარინა დუბროვინასა და მათი ოჯახების წინააღმდეგ. ჩვენ მოვუწოდებთ რუსეთს, უზრუნველყოს უფლებადამცველების უსაფრთხოება ჩეჩნეთის რესპუბლიკაში. ამასთან, გამოიძიოს აღნიშნული თავდასხმები, რათა დამნაშავეები შესაბამისად გასამართლდნენ“, - აღნიშნულია განცხადებაში, - „უფლებადამცველების საქმიანობის მიმართ გამოხატული გამძაფრებული მგრძნობელობა ასევე ზრდის მათ დაუცველობას: სამხრეთ ოსეთში, დე ფაქტო ხელისუფლების კორუფციის გამოვლენის მცდელობების შემდეგ, თამარა მეარაყიშვილის წინააღმდეგ სასამართლო დავა დაიწყო. ჩვენ მოვუწოდებთ რუსეთს, საკუთარი გავლენა გამოიყენოს და მეარაყიშვილის წინააღმდეგ წარდგენილი ბრალდება შეაჩეროს, ასევე, უხრუნველყოს მისი “დაცვა დეპორტაციისგან”, როგორც მომხსენებლის ანგარიშშია აღნიშნული“.  სრულად...  წყარო: https://hrht.ge

საია პერიოდულად მიმოიხილავს ადამიანის უფლებათა ევროპული სასამართლოს გადაწყვეტილებებს, რომელიც საქართველოს უკავშირდება.  2020 წლის 27 თებერვალს ადამიანის უფლებათა ევროპულმა სასამართლომ საქართველოს წინააღმდეგ კიდევ ერთი გადაწყვეტილება გამოიტანა. სასამართლომ დაადგინა, რომ საქმეზე ლობჟანიძე და ფერაძე საქართველოს წინააღმდეგ. ევროპულმა სასამართლომ 27 თებერვლის გადაწყვეტილებით დაადგინა, რომ კონვენციის მე-6 (1) და (3) (გ) მუხლის მოთხოვნების საწინააღმდეგოდ, ლობჟანიძეს არ მიეცა საშუალება, დაეცვა ინტერესები მის მიერ არჩეული დამცველის მეშვეობით და ამასთან, ეროვნულმა სასამართლოებმა საკმარისად არ დაასაბუთეს, რატომ არ მოხდა მისი სააპელაციო საჩივრის განხილვა. სასამართლომ საქართველოს 3’600 ევროს გადახდა დააკისრა ლობჟანიძის მიერ განცდილი მორალური ზიანის ასანაზღაურებლად.  სრულად...  წყარო: https://gyla.ge

თბილისი. საია-მ საქართველოს პარლამენტს წარუდგინა შენიშვნები და მოსაზრებები „შეზღუდული შესაძლებლობის მქონე პირთა შესახებ“ კანონის პროექტთან დაკავშირებით.  „იუსტიციის სამინისტროს მიერ მომზადებული და საქართველოს მთავრობის მიერ ინიცირებული კანონპროექტი, მართალია, შეიცავს რამდენიმე პოზიტიურ ცვლილებას, მაგრამ არსებითად არ ცვლის შშმ პირთა უფლებრივ მდგომარებას, ხოლო ცალკეულ შემთხვევებში, ეწინააღმდეგება შეზღუდული შესაძლებლობის მქონე პირთა შესახებ კონვენციას და აუარესებს შშმ პირთა უფლებრივი მდგომარეობის დაცვის სტანდარტებს“, - მიიჩნევენ საია-ში.  სრულად...  წყარო: https://gyla.ge

შიდა ქართლი. 1 მარტს „კეთილდღეობის და განვითარების ცენტრთან“ არსებულმა გორის სამოქალაქო ცენტრმა ნულოვანი დისკრიმინაციის დღე აღნიშნა. „გაერთიანებული ერების ორგანიზაციის გადაწყვეტილებით, 1 მარტს ნულოვანი დისკრიმინაციის საერთაშორისო დღე აღინიშნება. ნულოვანი დისკრიმინაციის საერთაშორისო დღის სიმბოლო პეპელაა. ამ დღეს ხაზი ესმევა დისკრიმინაციის უარყოფით შედეგებს და მიზნად ისახავს, აღმოფხვრას, ჩაგვრა, ხელი შეუწყოს ტოლერანტული და მშვიდობიანი საზოგადოებების ჩამოყალიბებას“, ნათქვამია ორგანიზაციის გვერდზე. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველმა დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობის შესახებ სპეციალური ანგარიში წარმოადგინა.  ანგარიშში განხილულია 2019 წლის განმავლობაში ცალკეული დაუცველი ჯგუფების, მათ შორის, ქალების, შეზღუდული შესაძლებლობის მქონე პირების, ლგბტ+ თემის წევრების, რელიგიური უმცირესობებისა და ხანდაზმული პირების თანასწორუფლებიანობის დაცვის მხრივ არსებული პრობლემები; მიმოხილულია სავარაუდო სიძულვილით მოტივირებული დანაშაულების გამოძიების ხარვეზები, დისკრიმინაციის წახალისების შემთხვევები და სახალხო დამცველის წარმოებაში არსებული საქმეების სტატისტიკური მონაცემები; გაანალიზებულია 2019 წელს თბილისი პრაიდის შესახებ დისკუსიის ფონზე ლგბტ+ თემის წევრების უფლებების სისტემური დარღვევის და სახელმწიფოს არასათანადო რეაგირების საკითხი.  სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვლოგს, სადაც იურისტი, მარიამ ჯანიაშვილი საუბრობს „შშმ პირთა უფლებების შესახებ“ საქართველოს კანონპროექტის ხარვეზებზე. „პარლამენტში მიმდინარეობს „შშმ პირთა უფლებების შესახებ“ საქართველოს კანონპროექტის განხილვა. ჩვენ და შშმ პირებზე მომუშავე სხვა ორგანიზაციები მივუთითებთ, რომ ცალკეული პოზიტიური ცვლილებების გარდა, ეს კანონპროექტი ძირითადად ვერ აუმჯობესებს შშმ პირების უფლებრივ მდგომარეობას“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. თბილისში გაერო-ს გენდერის თემატური ჯგუფის ორგანიზებით, პოლიტიკასა და არჩევნებში ქალთა მიმართ ძალადობის პრევენციის შესახებ მაღალი დონის შეხვედრა გაიმართა. „ქალთა მიმართ ძალადობა ასევე დაკავშირებულია მათ მცირე წარმომადგენლობაში. ერთ-ერთი მიზეზი, რატომაც ქალები ძალადობას განიცდიან, არის ის, რომ არ ხდება მათი სრულყოფილი გაძლიერება და არ არიან გადაწყვეტილების მიმღები პირები. ეს არის საკითხი, რომელზეც ვისურვებდით დადებითი პრაქტიკა შევამჩნიოთ და გავიგოთ საერთაშორისო პარტნიორებისგან რა ხდება ამ მიმართულებით. ეს საკითხი ბოლო დრომდე ყურადღების ცენტრში არ იყო, ამიტომ ჩვენი კონფერენცია ყურადღებას გაამახვილებს ქალთა მიმართ ძალადობის აღმოფხვრაზე პოლიტიკაში და არჩევნებში. ჩვენი რეკომენდაციაა, რომ ყველა პოლიტიკოსმა და პოლიტიკურმა პარტიამ ამ საკითხზე იმუშაოს“, - განაცხადა გაერო-ს მუდმივმა კოორდინატორმა საქართველოში, საბინე მახლომ. სრულად... წყარო: www.ginsc.net

თბილისი. საქართველოს ახალგაზრდა იურისტთა ასოციაციის (საია) ინფორმაციით, პარლამენტმა შვებულების მიცემაზე თანამშრომელს უარი დაუსაბუთებლად უთხრა და სამსახურიდან გაათავისუფლა. "26 თებერვალს ქუთაისის სააპელაციო სასამართლომ დაადგინა, რომ საქართველოს პარლამენტმა 2018 წლის მაისში თანამშრომელს დაუსაბუთებლად უთხრა უარი შვებულების გამოყენებაზე და სამსახურიდან გაათავისუფლა. შვებულებით უფლებით სარგებლობაზე უარის თქმის და სამსახურიდან გათავისუფლების შესახებ მიღებული გადაწყვეტილება მოსარჩელემ საიას დახმარებით ქუთაისის საქალაქო სასამართლოში გაასაჩივრა, რომელმაც სარჩელი არ დააკმაყოფილა. პირველი ინსტანციის სასამართლოს გადაწყვეტილება ქუთაისის სააპელაციო სასამართლომ შეცვალა და მიიჩნია, რომ პარლამენტის არგუმენტები არ იყო დამაჯერებელი. აღნიშნული გადაწყვეტილება ამ დროისათვის კანონიერ ძალაში არ არის შესული და საქართველოს პარლამენტს რჩება უზენაეს სასამართლოში დავის გაგრძელების შესაძლებლობა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ოზურგეთის მუნიციპალიტეტის სოფელ ბოხვაურის მოსახლეობა მიწის ნაკვეთების საკუთრებაში მიღებას შეძლებს. „საიას რამდენიმეწლიანი ადვოკატირების კამპანიის შემდგომ ოზურგეთის მუნიციპალიტეტის სოფელ ბოხვაურის მოსახლეობას მიწის ნაკვეთებზე საკუთრების უფლების რეგისტრაციის პრობლემა მოგვარდა. წლების განმავლობაში საკუთრების უფლება ეზღუდებოდა ბოხვაურში მცხოვრებ 200-მდე ოჯახს, რადგან მიწის რეფორმის ფარგლებში მიღება-ჩაბარების აქტებით მათთვის გადაცემულ მიწის ნაკვეთებზე სახელმწიფომ დაირეგისტრირა საკუთრების უფლება და 25 წლიანი იჯარით გადასცა კერძო კომპანიას“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქრთველოს სახალხო დამცველი ჭიათურის მუნიციპალიტეტის სოფელ შუქრუთის მოსახლეობის პროტესტს ეხმიანება.  შუქრუთის მოსახლეობას, რომელიც ამბობს, რომ შპს „ჯორჯიან მანგანეზი“, მადნის მოპოვებისა და გადაზიდვის პროცესში, აზიანებს გარემოს, გზასა და მათ საცხოვრებელ სახლებს, 2020 წლის 17 თებერვლიდან ბლოკირებული აქვს მაღარო, თუმცა ამ პროტესტს შედეგი არ გამოუღია.  „საქართველოს სახალხო დამცველი მოუწოდებს შესაბამის უწყებებს გამოიყენონ მათ ხელთ არსებული ყველა რესურსი, ზიანის გამომწვევი მიზეზების დადგენისა და კომპანიასთან შედეგზე ორიენტირებული მოლაპარაკებების წარმართვის მიზნით. ასევე, მოუწოდებს ეკონომიკისა და მდგრადი განვითრების მინისტრს უშუამდგომლოს შუქრუთის მოსახლეობას და პირადად ჩაერთოს კომპანიასთან მოლაპარაკებებში, რათა დაცული იყო მათი როგორც საკუთრების ასევე, ჯანსაღ გარემოში ცხოვრების უფლება“, - ნათქვამია სახალხო დამცველის აპარატის მიერ გავრცელებულ განცხადებაში.  სრულად...  წყარო: http://ombudsman.ge

იმერეთი. ქუთაისის ახალგაზრდული ცენტრის წევრებისთვის ჩატარდა ტრენინგი თემაზე „ბულინგი და სტრესის მართვა“, რომლის მიზანიც იყო ახალგაზრდების ცნობიერების ამაღლება ბულინგის პრევენციის და ტოლერანტული კულტურის განვითარების, სტრესის მართვის ფორმების შესახებ თემაზე. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მარიამ შალვაშვილის თარგმანს 1965 წელს, კემბრიჯის უნივერსიტეტში, ჯეიმს ბოლდუინის გამოსვლაზე. „დიდი ელდაა იმის აღმოჩენა, რომ იმ ქვეყანას, რომელიც შენი დაბადების ადგილია და რომელსაც მთელს შენს სიცოცხლეს და იდენტობას უმადლი, რეალურად, შენთვის ადგილი არ გამოუყვია. სწორედ მაგ მომენტში მხოლოდ და მხოლოდ კანის ფერის გამო იწყება უკმაყოფილება, მორალი ირყევა და ადამიანებს შორის უფსკრული ჩნდება. ეს გრძნობები უფრო და უფრო ძლიერდება, ძლიერდება მთელი ცხოვრების მანძილზე. 30 წლის ასაკში კი გააცნობიერებ, რომ შენივე თანამემამულეების ნდობა გიჭირს“.  სრულად... წყარო: emc.org.ge

თბილისი. 24-25 თებერვალს, წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრის (GCRT) ორგანიზებით, თბილისში სტამბოლის პროტოკოლის იმპლემენტაციის თემაზე ტრენინგი ჩატარდა. „ორდღიანი ტრენინგი თბილისის ადამიანის უფლებათა სახლში გაიმართა და მას GCRT-ის გორის ოფისის და ახალგაზრდა იურისტთა ასოციაციის თანამშრომლები ესწრებოდნენ. ექსპერტებმა მონაწილეებთან ერთად განიხილეს წამებისა და არასათანადო მოპყრობის შემთხვევების გამოძიება/დოკუმენტირების საკითხები, ასევე სამედიცინო ეთიკა და გაიდლაინები მტკიცებულებებისა და დაკუმენტაციების მოპოვების შესახებ”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) თემირლან მაჩალიაშვილის სიცოცხლის ხელყოფის საქმეზე ფინალურ შეფასებას აქვეყნებს და საქმის მასალების სრულად გაცნობის შემდეგ, კიდევ ერთხელ მიუთითებს გამოძიების არაეფექტიანობის, ასევე გამოძიების შეწყვეტის შესახებ მიღებული გადაწყვეტილების დაუსაბუთებლობლისა და პოლიტიზების პრობლემაზე. სრულად... წყარო: emc.org.ge

თბილისი. დასრულდა ტრენინგი თემაზე: ძალადობის ფსიქოლოგიური ასპექტები, რომელიც ძდექისა და სტეფან ბატორის ფონდის ერთობლივი პროექტის ფარგლებში ჩატარდა. „ტრენინგს, რომელსაც პოლონელი ექსპერტები ევა ოსიატინსკა და იადვიგა კუბიაკი უძღვდებოდნენ, მონაწილეობდნენ ქალთა მიმართ და ოჯახში ძალადობის მსხვერპლთა თავშესაფრებისა და კრიზისული ცენტრების თანამშრომლები“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველმა, ნინო ლომჯარიამ, დღეს, საზოგადოებას თანასწორობის მდგომარეობის შესახებ მე-5 სპეციალური ანგარიში წარუდგინა. „სამწუხაროდ, საკანონმდებლო გარანტიების შექმნის მიუხედავად, თანასწორობის უფლების რეალიზაციის მხრივ საქართველოში მდგომარეობა კვლავ კრიტიკულია, რასაც ხელს სახელმწიფოს ერთიანი ხედვის არარსებობაც უწყობს. კონკრეტულ სახელმწიფო უწყებებს არ აქვთ პოლიტიკა თანასწორობის პრინციპთან დაკავშირებით მათ კომპეტენციაში შემავალ საკითხებთან მიმართებით, რის გამოც, დისკრიმინაციული პრაქტიკების წინააღმდეგ სისტემური ბრძოლის ნაცვლად, უმეტესწილად, ინდივიდუალური უფლება დარღვევების აღმოფხვრის მიმართულებით მუშაობა ხდება საჭირო“, - განაცხადა ნინო ლომჯარიამ. სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ანას ბაღის საქმის სამართლებრივ შეფასებას აქვეყნებს. „ანას ბაღი, რომელიც განთავსებულია ქ. თბილისში, ვარკეთილის II მ/რ, კორპ. 22 მიმდებარედ და სახელი 9 წლის ტრაგიკულად დაღუპული ბავშვის საპატივცემულოდ დაერქვა, ადგილობრივი მცხოვრებლებისთვის უმნიშვნელოვანეს სარეკრეაციო და სოციალიზაციის სივრცეს წარმოადგენს. რამდენიმე წელია, ადგილობრივი მოსახლეობა ბაღის შესანარჩუნებლად სამშენებლო კომპანიას უპირისპირდება, რომელიც სკვერის მომიჯნავედ 10-სართულიანი კორპუსის აშენებას გეგმავს და ბაღს ფუნქციის დაკარგვით ემუქრება. EMC მიიჩნევს, რომ აღნიშნულ კომპანიაზე გაცემული სამშენებლო ნებართვა ვერ აკმაყოფილებს ეროვნული და საერთაშორისო კანონმდებლობის მოთხოვნებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ორგანიზაციის ინფორმაციის თანახმად, დ კ „საფარის“ ბენეფიციარია 2018 წლიდან. „ყოფილი მეუღლე დ.კ.-ს მიმართ თვეების მანძილზე ახორციელებდა ფსიქოლოგიურ ძალადობას, არ აღიარებდა ცოლთან განქორწინების ფაქტს და დ.კ.-ს აიძულებდა, მასთან ერთად, მისივე თქმით, „ოჯახურ გარემოში“, ეცხოვრა. 2020 წლის 24 თებერვალს, თბილისის საქალაქო სასამართლოს ადმინისტრაციულ საქმეთა კოლეგიამ დააკმაყოფილა დ.კ.-ს განცხადება და მოძალადის წინააღმდეგ გამოსცა შემაკავებელი ორდერი 6 თვის ვადით; ორდერის თანახმად, ყოფილ მეუღლეს აეკრძალა დ.კ.-სთან მიახლოება, კომუნიკაცია ტელეფონის და სხვა ტექნიკური საშუალებების გამოყენებით“, ნათქვამია ორგანიზაციის ვებგვერდზე. სრულად... წყარო: sapari.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ერთობლივ განცხადებას, რომლითაც ორგანიზაციები შუქრუთსა და ითხვისში არსებულ კრიზისს ეხმიანებიან. „ჭიათურის მუნიციპალიტეტის სოფელ შუქრუთში შპს „ჯორჯიან მანგანეზთან” ადგილობრივების დაპირისპირება კვლავ განახლდა. 23 თებერვალს მაღაროს ბლოკირება დაიწყო სოფელ ითხვისშიც, სადაც ადგილობრივები, შუქრუთელების მსგავსად, თავისი საცხოვრებელი სახლების, დამხმარე ნაგებობებისა და სასოფლო-სამეურენო მიწების დაზიანებას მაღაროს ფუნქციონირებას უკავშირებენ და ჯორჯიან მანგანეზისგან მიყენებული ზიანის ანაზღაურებას ითხოვენ. შექმნილ ვითარებაში, მნიშვნელოვანია, სახელმწიფომ გაიაზროს შუქრუთსა და ითხვისში არსებული კრიზისული ვითარება, იტვირთოს აქტიური როლი და აღმოფხვრას ის სოციალური და ეკოლოგიური კატასტროფა, რომლის წინაშეც ადგილობრივი მოსახლეობა დაუცველი რჩება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: არასათანადო მოპყრობის მსხვერპლის საქმე კვლავ გამოუძიებელია. „ნიკოლოზ გოგუაძე 2011 წლის 26 მაისს, ე. წ. ყინწვისის სპეცოპერაციის დროს დააკავეს. დაკავების დროს და შემდეგ გოგუაძე სამართალდამცავების მხრიდან არასათანადო მოპყრობის მსხვერპლი გახდა მისი დასჯისა და მისგან აღიარებითი ჩვენების მოპოვების მიზნით. ევროპულმა სასამართლომ დაადგინა, რომ მომჩივანმა ხელისუფლების კონტროლის ქვეშ ყოფნისას მიიღო მრავალი სახის დაზიანება, რომელიც მას დაკავებამდე არ ჰქონდა. გოგუაძის არასათანადო მოპყრობის ფაქტზე დაწყებული გამოძიება იყო არაეფექტიანი და გამოძიების პროცესში დაშვებული იყო მნიშვნელოვანი ხარვეზები. გოგუაძის საქმე „ცინცაბაძის ჯგუფის საქმეებში“ შედის და მინისტრთა კომიტეტის მიერ გაძლიერებულ ზედამხედველობას ექვემდებარება. კვლავ პრობლემას წარმოადგენს სამართალდამცავი ორგანოს წარმომადგენლების მხრიდან ჩადენილი დანაშაულების ეფექტიანი, დროული და სრულყოფილი გამოძიების ჩატარება, ჩადენილი ქმედებისთვის სწორი კვალიფიკაციის მინიჭება და მსხვერპლის სათანადო ჩართულობა გამოძიების მიმდინარეობისას“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: მოქალაქეობა და მეორეხარისხოვანი მოქალაქეობა: უფლებების შეზღუდვა, ინფრასტრუქტურა, ინსტიტუციური და არაფორმალური პრაქტიკები.  „რესურსების შეზღუდულობის პირობებში ელემენტარული სერვისები და ინფრასტრუქტურაც კი რეგიონში მაცხოვრებლებისთვის დიდი პრობლემაა და ეს პრობლემა რეგიონების თითქმის ყველა მცხოვრებს ეხება. თუმცა ზოგადი ფონის სიმძიმის პარალელურად, აშკარაა რომ მუნიციპალიტეტები და საჯარო ინსტიტუტები მიმართავენ პრაქტიკას, რომლის მიხედვითაც ისინი გარკვეულ ჯგუფებს კიდევ უფრო გარიყავენ და აქცევენ შინაურ „უცხოდ“ - არასათანადო ან არამნიშვნელოვან მოქალაქედ, რომელიც მოქალაქეობის უფრო დაბალ საფეხურზე დგას. ეს პრაქტიკები მხოლოდ მხოლოდ ენაში არაა გამოხატული, ანუ მხოლოდ დისკურსული კი არ არის, უფლებებზე წვდომის შეზღუდვის, ინფრასტრუქტურის, სხვადასხვა სერვისის მიწოდებით ან არ მიწოდებით ქმნის მეორეხარისხოვან მოქალაქეებს“, ნათქვამია ორგანიზაციის გვერდზე სოციალურ ქსელში. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: აქციის მონაწილეთა და ჟურნალისტთა დარღვეული უფლებები კვლავ არ აღდგენილა. „პოლიციელებმა აქციის რამდენიმე მონაწილე დააკავეს ადმინისტრაციული სამართალდარღვევის კოდექსის 166-ე და 173-ე მუხლების საფუძველზე საზოგადოებრივი წესრიგის დარღვევის და პოლიციელების მოთხოვნისადმი დაუმორჩილებლობის გამო. დაკავებულებს არ მიეცათ საკმარისი დრო და საშუალება, სათანადოდ დაეცვათ საკუთარი თავი სასამართლოზე. სასამართლომ მათ 30 დღიანი პატიმრობა შეუფარდა. დღემდე აქციის მონაწილეების და ჟურნალისტების მიმართ პოლიციელთა მხრიდან ჩადენილი ქმედებები გამოუძიებელია და არ მომხდარა დამნაშავე პირთა გამოვლენა და დასჯა. საბჭოთა კავშირის დროს მიღებული ადმინისტრაციულ სამართალდარღვევათა კოდექსი, რომლითაც აქციის მონაწილეებს პატიმრობა შეეფარდა, ვერ აკმაყოფილებს სამართლიანი პროცესის მოთხოვნებს, არ შეიცავს საკმარის პროცედურულ გარანტიებს და ვერ უზრუნველყოფს საქმის მიუკერძოებლად და სამართლიანად განხილვის შესაძლებლობას“, ნათქვამია საიას ვებგვერდზე. სრულად... წყარო: gyla.ge