ქვემო ქართლი. 19 ოქტომბერს სიქას თანასწორგანმანათლებლებმა ქვემო ქართლის სასკოლო სამოქალაქო კლუბების წევრებს ტრენინგი ჯანსაღი ცხოვრების შესახებ - „ჯანმრთელი კვების კავშირი" – ჩაუტარეს. ტრენინგი ჩატარდა ორგანიზაცია RTI International -თან პარტნიორობით, რომელთა მიერ მოხდა თანასწორგანმანათლებელთა გადამზადება კონკრეტული სატრენინგო მოდულის მიხედვით. ტრენინგს დაესწრნენ წალკის, გარდაბნის, მარნეულის, თეთრიწყაროსა და რუსთავის მუნიციპალიტეტების „სამოქალაქო განათლებისა და პედაგოგთა გადამზადების პროგრამის" სამიზნე სკოლების უფროსკლასელები. წყარო:ორგანიზაციის გვერდი სოციალურ ქსელში

იმერეთი. 18 ოქტომბერს, სამოქალაქო განათლებისა და პედაგოგთა გადამზადების პროგრამის ფარგლებში, სახალხო დამცველის ოფისში ფილმის ჩვენება მოეწყო. ღონისძიებაზე წყალტუბოს საჯარო სკოლის სამოქალაქო კლუბის „ერთობის" მიერ მომზადებული ფილმის „ტყუპების" და პროგრამის სამიზნე სკოლების, სამოქალაქო კლუბების წევრების სცენარების მიხედვით ბავშვთა უფლებათა კონვენციაზე გადაღებული მინი კლიპების ჩვენება, განხილვა გაიმართა. ჩვენებას ქუთაისის სამიზნე სკოლების 20 მოსწავლე ესწრებოდა.  წყარო: ქუთაისის განათლების განვითარების და დასაქმების ცენტრის გვერდი სოციალურ ქსელში

ქვემო ქართლი. 18 ნოემბერს სიქას ფრანგმა და რუმინელმა მოხალისეებმა მარტყოფის საჯარო სკოლების სამოქალაქო კლუბების წევრებისათვის ჩაატარეს სემინარი „ევროკავშირი და საქართველო". მოსწავლეებმა სემინარის განმავლობაში მიიღეს ინფორმაცია ევროკავშირის დაფუძნების, განვითარებისა და სამომავლო პერსპექტივების შესახებ. წყარო:ორგანიზაციის გვერდი სოციალურ ქსელში

კახეთი. თელავის იაკობ გოგებაშვილის სახელმწიფო უნივერსიტეტში, კოალიციამ „დამოუკიდებელი ცხოვრებისათვის" და ცენტრალურმა საარჩევნო კომისიამ სტუდენტებისათვის ჩაატარეს საინფორმაციო შეხვედრა. არასამთავრობო ორგანიზაცია „დამოუკიდებელი ცხოვრებისათვის" წარმომადგენლის, რატი იონათამიშვილის თქმით, სტუდენტების ჩართვა საარჩევნო პროცესებში ძალიან მნიშვნელოვანია: ,,შეხვედრისას ჩატარდა არჩევნების მოდელირება, რომლის მიზანია მაქსიმალური ინფორმაციის მიწოდება სტუდენტებისთვის ხმის მიცემის პროცედურების შესახებ".

გაეროს ბავშვთა ფონდმა ახალი ვიდეო რგოლი გაავრცელა. რგოლი მომზადებულია კამპანიის – „შეაჩერე ბავშვებზე ძალადობა!" (END violence Against Children). რგოლი  წყარო: ginsc.net

იმერეთი. „ქუთაისის განათლების განვითარების და დასაქმების ცენტრის" კოორდინაციით ქუთაისში გამოფენა –  „მე ჩემი ქალაქის არქიტექტორი ვარ" – მოეწყო. ღონისძიებაში ჩართული იყვნენ ქუთაისის საჯარო სკოლების მოსწავლეები, რომლებმაც ქალაქის კონტურულ რუკაზე შეარჩიეს მათთვის სასურველი ადგილი და დახატეს ის, რაც მათი აზრით ყველაზე მეტად აკლია ქალაქს. დასასრულს მოეწყო ნამუშევრების გამოფენა, მონაწილეებს გადაეცათ სიგელები. ღონისძიება ჩატარდა ევროპის ადგილობრივი კვირეულის ფარგლებში, რომელიც ყოველწლიურად საქართველოს ადგილობრივი თვითმმართველობის ეროვნული ასოციაციისა და ევროსაბჭოს კონგრესის სამდივნოს ორგანიზებით ტარდება. წყარო:ორგანიზაციის გვერდი სოციალურ ქსელში

თბილისი. გაეროს ბავშვთა ფონდისა და საქართველოს ეთიკის ქარტიის წარმომადგენლებმა თსუ–ს ჟურნალისტიკის მიმართულების სტუდენტებთან შეხვედრა– დისკუსია გამართეს. შეხვედრების მიზანი – ბავშვთა საკითხების გაშუქება იყო. წყარო: გაეროს ბავშვთა ფონდის გვერდი სოციალურ ქსელში

თბილისი. 17 ოქტომბერს თბილისის სახელმწიფო სამედიცინო უნივერსიტეტში, კოალიციამ დამოუკიდებელი ცხოვრებისთვის, ცესკოს ხელშეწყობით, სტუდენტებთან საინფორმაციო-საგანმანათლებლო სემინარი გამართა. შეხვედრის თემა იყო: „სტუდენტების როლი და ინიციატივები თანაბარი არჩევნების უზრუნველყოფისთვის". შეხვედრაზე მოეწყო საარჩევნო პროცესის სიმულაციები. წყარო: კოალიციის გვერდი სოციალურ ქსელში

აჭარა. 16 ოქტომბერს ბათუმის პრეს-კაფეში თავისუფალ ჟურნალისტთა სახლის ორგანიზებით გაიმართა დისკუსია სახელწოდებით: „საპრეზიდენტო კანდიდატების ახალგაზრდული ფრთის ხედვა საქართველოს განათლების სისტემაში მოსალოდნელი ცვლილებებზე". მომხსენებლები საპრეზიდენტო არჩევნებში მონაწილე კანდიდატების წარმომადგენელი ახალგაზრდები იყვნენ, რომლებმაც წარმოადგინეს საპრეზიდენტო კანდიდატების წინასაარჩევნო პროგრამა განათლების სისტემასთან მიმართებაში. შეხვედრას ახალგაზრდები, საზოგადოებრივი ორგანიზაციებისა და მედიის წარმოამდგენლები ესწრებოდნენ. აღნიშნული დისკუსიათა ციკლი ხორციელდება პროექტის - „ახალგაზრდებში დემოკრატიული იდეების პოპულარიზაცია" ფარგლებში. პროექტი ხორციელდება „დემოკრატიის მხარდამჭერი ნაციონალური ფონდის" (NED) მხარდაჭერით.

სამცხე–ჯავახეთი. 16 ოქტომბერს, ახალციხეში, სამცხე–ჯავახეთის სახელმწიფო–სასწავლო უნივერსიტეტის საკონფერენციო დარბაზში, ორგანიზაციის „გადავარჩინოთ ბავშვების" (Save the Children) წარმომადგენლებმა შეხვედრა გამართეს. შეხვედრაზე პროექტის - ,,კატასტროფების რისკის შემცირება ინკლუზიური მიდგომით საბავშვო ბაღების აღსაზრდელებისა და სპეციალური სკოლების მოსწავლეებისათვის" – შედეგები შეაჯამეს. პროექტი წელიწადნახევრის განმავლობაში ხორციელდებოდა და მისი მიზანი რეგიონის სკოლამდელი აღზრდის დაწესებულებების პერსონალისა და აღსაზრდელების საგანგებო სიტუაციებისთვის მომზადება იყო. შეხვედრაზე ადგილობრივ სამთავრობო უწყებებთან ხელი მოეწერა ურთიერთგაგების მემორანდუმს, რომელიც განსაზღვრავს პარტნიორობის პირობებსა და თანამშრომლობის ფარგლებს. ასევე ითქვა, რომ პროექტი გაგრძელდება და მასში სამომავლოდაც უფრო მეტი სპეცსკოლა ჩაერთვება. ბუნებრივი კატასტროფების რისკის შემცირების პროგრამა საქართველოს საბავშვო ბაღებსა და ინსტიტუციებში ევროკომისიის ჰუმანიტარული მისიის დაფინანსებით „დიპეკოს" პროგრამის ფარგლებში ხორციელდება. მას ორგანიზაცია „გადავარჩინოთ ბავშვები ASB-სთან ერთად ორ რეგიონში, სამცხე-ჯავახეთსა და აჭარაში, ახორციელებს.

აჭარა. 16 ოქტომბერს, თვითმმართველი ქალაქი ბათუმის საკრებულოში, საზოგადოებრივმა ორგანიზაციამ „ახალგაზრდულმა კოლეგიამ" მორიგი შეხვედრა გამართა. საკრებულოს თავმჯდომარემ ახალგაზრდებს საკრებულოს მუშაობის სპეციფიკა გააცნო. შეხვედრაზე ასევე ისაუბრეს საკრებულოს მიერ მიმდინარე წლის განხორციელებული და დაგეგმილი ცვლილებების შესახებ. აღნიშნული შეხვედრის ფარგლებში ახალგაზრდებს საშუალება მიეცათ, მიეღოთ პასუხები მათთვის მნიშვნელოვან და საიტერესო კითხვებზე, გამოეხატა პოზიცია მიმდინარე პროცესებზე და მიეწოდებინათ მათი ხედვა არსებული პრობლემების მოგვარებასთან დაკავშირებით. აღნიშნული შეხვედრა გაიმართა პროექტის - „დისკუსიის კვირეულის" ფარგლებში. პროექტის ფინანსური მხარდამჭერია აჭარის სპორტისა და ახალგაზრდობის საქმეთა დეპარტამენტი.

სამცხე–ჯავახეთი. ეროვნული ინტეგრაციის გაძლიერების პროექტის ფარგლებში, დემოკრატ მესხთა კავშირის საკონფერენციო დარბაზში გაიმართა ფილმის „სახლის" ჩვენება. იგი ეხება სამყაროს წარმოშობას, მის განვითარების სხვადასხვა ეტაპებს და მსოფლიოში მიმდინარე გლობალიზაციის პროცესს. პროექტი „ეროვნული ინტეგრაციის გაძლიერება საქართველოში" ხორციელდება საქართველოს გაეროს ასოციაციის (UNAG) მიერ, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო:cso.ge

კახეთი. საქართველოს მტაცებლების კონსერვაციის პროექტის ინიციატივით საზოგადოება „ბილიკის" სამოქალაქო კლუბებისა და დედოფლისწყაროს რაიონის სკოლების მოსწავლეებისათვის გასვლითი ღონისძიება მოეწყო კახეთში. აღნიშნული პროექტის ძირითადი ამოცანა თუშეთისა და ვაშლოვანის დაცულ ტერიტორიებსა და მტაცებლებს შორის კონფლიქტის შემცირებაა. მოსწავლეებმა მოინახულეს ვაშლოვანის ნაკრძალი, სადაც მდებარეობს ხორნაბუჯის ციხე. ციხესთან ერთად მოინახულეს არწივის ხეობაც, რომელიც ასევე შედის ვაშლოვანის დაცული ტერიტორიის შემადგენლობაში. წყარო:ორგანიზაციის გვერდი სოციალურ ქსელში

სამცხე–ჯავახეთი. გასულ კვირას საქართველოს ახალგაზრდა ეკონომისტთა ასოციაციის წარმომადგენლებმა ახალციხეში, სამცხე–ჯავახეთის სახელმწიფო–სასწავლო უნივერსიტეტის სტუდენტებთან შეხვედრა გამართეს. შეხვედრის მიზანი ახალციხის მუნიციპალიტეტის ბიუჯეტის დაგეგმვის პროცესში სტუდენტების ჩართვა იყო. ახალგაზრდა ეკონომისტებმა სტუდენტებთან იმ პროექტზე ისაუბრეს, რომელსაც ახალგაზრდა ასოციაცია, გერმანიის თანამშრომლობის ფონდთან ერთად ახორციელებს. აღნიშნული პროექტი ადგილობრივი ბიუჯეტის დაგეგმვაში, სხვა მიზნობრივ ჯგუფებთან ერთად, ახალგაზრდების ჩართვასაც ითვალისწინებს. შეხვედრას ესწრებოდა ადგილობრივი თვითმმართველობის კულტურის სამსახურის სპეციალისტი სპორტისა და ახალგაზრდულ საქმეთა საკითხებში. დაიგეგმა ადგილობრივი თვითმმართველობის წარმომადგენლებთან სტუდენტების შეხვედრაც,

ქვემო ქართლი. 10 ოქტომბერს სიქას ორგანიზებით, სასკოლო სამოქალაქო კლუბების წევრებისათვის სიქას რუმინელმა და ფრანგმა მოხალისეებმა ჩაატარეს სემინარი – „ევროკავშირი და საქართველო". სემინარზე ისაუბრეს ევროკავშირის ისტორიის, საქართველოს ევროკავშირში გაწევრიანების პერსპექტივის, ევროკავშირის უპირატესობების  შესახებ.  წყარო:ორგანიზაციის გვერდი სოციალურ ქსელში

სამცხე–ჯავახეთი. ახალქალაქის ახალგაზრდული ცენტრის წევრებმა სკოლების თვითმმართველობის შესახებ მოსახლეობის ინფორმირებულობის მიზნით მოსახლეობას საინფორმაციო ბუკლეტები დაურიგეს. ღონისძიება ჩატარდა პროექტ „ეროვნული ინტეგრაციის გაძლიერება საქართველოში" ფარგლებში, რომელსაც ახორციელებს საქართველოს გაეროს ასოციაცია (UNAG),საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

იმერეთი. 9 ოქტომბერს, ქუთაისში, კოალიციამ დამოუკიდებელი ცხოვრებისთვის გამართა საინფორმაციო-საგანმანათლებლო სემინარი სტუდენტებთან თემაზე - „სტუდენტების როლი და ინიციატივები თანაბარი არჩევნების უზრუნველყოფისთვის". შეხვედრაზე ნაჩვენები იყო სსიპ საარჩევნო სისტემების რეფორმებისა და სწავლების ცენტრის მიერ გადაღებული ფილმი „კენჭისყრის დღის პროცედურები", ასევე მოეწყო საარჩევნო სიმულაციები. წყარო:ორგანიზაციის გვერდი სოციალურ ქსელში

ქვემო ქართლი. 12 ოქტომბერს, სიქას ოფისში ჩატარდა კლუბის – „უნარები პროფესიული წარმატებისთვის" –  შეხვედრა ეფექტური კომუნიკაციის თემაზე. კლუბის წევრები გაეცნენ კომუნიკაციის ტიპებს, სხვადასხვა აქტივობების საშუალებით მონაწილეებმა იმსჯელეს ეფექტური კომუნიკაციის ხელშემწყობ და ხელშემშლელ ფაქტორებზე. შეხვედრაზე ასევე ნაჩვენები იქნა რამდენიმე მოკლე ვიდეო კომუნიკაციის თემაზე. წყარო:ორგანიზაციის გვერდი სოციალურ ქსელში

იმერეთი. 11 ოქტომბერს ქუთაისის ახალგაზრდული ცენტრის წევრებმა გოგონათა საერთაშორისო დღისადმი მიძღვნილი რამდენიმე ღონისძიება გამართეს. ღონისძიების მიზანს წარმოადგენდა გენდერული თანასწორობაზე, გოგონათა უფლებებზე საუბარი.  ღონისძიებებში 120 ახალგაზრდამ მიიღო მონაწილეობა. გაიმართა მსვლელობა, წარმატებულ ქალთა ისტორიების პრეზენტაცია, ფილმ „უთქმელი ისტორიების" ჩვენება–განხილვა, თეატრალური წარმოდგენა, ტრენინგი გენდერულის თანასწორობის საკითხებზე ქუთაისის საჯარო სკოლაში.  ღონისძიებები ორგანიზებული იქნა „საქართველოში ეროვნული ინტეგრაციის გაძლიერების პროექტის"(ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

შიდა ქართლი. საზოგადოება „ბილიკის" შემოდგომის კვირეულის ფარგლებში ინტელექტუალური ვიქტორინა ჩატარდა. ვიქტორინაში გორის, შავშვების, წითელუბნისა და ხურვალეთის სკოლის სამოქალაქო კლუბების წევრებმა მიიღეს მონაწილეობა. გამარჯვებულებს ენციკლოპედიები და სერტიფიკატები გადაეცათ. სერტიფიკატებით დაჯილდოვდნენ სხვა მონაწიეებიც. პროექტი „ქართველი, ოსი და დევნილი ახალგაზრდების ინტეგრაცია და მხარდაჭერა სამოქალაქო გააქტიურებისთვის", რომელიც ხორციელდება პროექტის ,,ეროვნული ინტეგრაციის გაძლიერება საქართველოში” მცირე გრანტების მექანიზმის ფარგლებში საქართველოს გაეროს ასოციაციისა და ფონდი „ღია საზოგადოება საქართველოს", აშშ-ის საერთაშორისო განვითარების სააგენტოს (USAID)ფინანსური მხარდაჭერით. წყარო:ორგანიზაციის გვერდი სოციალურ ქსელში

სამეგრელო. ასოციაცია „ათინათის" სააქტო დარბაზში ჩატარდა „ბრეინ-რინგი" ზუგდიდის სასწავლო უნივერსიტეტისა და შოთა მესხიას ზუგდიდის სახელმწიფო, სასწავლო უნივერსიტეტის სტუდენტებს შორის ადგილობრივი თვითმმართველობის თემატიკაზე. „ბრეინ-რინგი" კოალიციური პროექტის „საზოგადოების ჩართულობა დემოკრატიული თვითმმართველობისათვის" ფარგლებში გაიმართა. პროექტი მხარდაჭერილია „ევრაზიის თანამშრომლობის ფონდის" მიერ. წყარო: სამოქალაქო მონიტორინგისა და კვლევების ცენტრის გვერდი სოციალურ ქსელში

აჭარა. 9 ოქტომბერს, პრეს-კაფეში სტუდენტური დისკუსია გაიმართა, თემაზე: „ახალგაზრდები პოლიტიკაში". რატომ მოდიან ახალგაზრდები პოლიტიკაში? რა მოტივი ამოძრავებთ მათ? სურთ რეალური გამოცდილების შეძენა თუ უბრალოდ ეს არის ადვილი და მოკლე გზა კარიერული წინსვლისა. ამ საკითხების ირგვლივ დისკუსიაში ახალგაზრდები და ახალგაზრდობის თემატიკაზე მომუშავე საზოგადოებრივი ორგანიზაციების წარმომადგენლები იღებდნენ მონაწილეობას. დისკუსიათა ციკლი ხორციელდება პროექტის - „ახალგაზრდებში დემოკრატიული იდეების პოპულარიზაცია" – ფარგლებში. პროექტი ხორციელდება „დემოკრატიის მხარდამჭერი ნაციონალური ფონდის" (NED) მხარდაჭერით.