თბილისი. შეზღუდული შესაძლებლობის მქონე ბავშვების მშობლებისთვის მშობელთა რიგით მე-6 ეროვნული კონფერენციის თემაა - მშობლობა მარათონია და არა მოკლე გარბენი! 2022 წლის მშობელთა ეროვნული კონფერენციის ორგანიზატორები არიან „მაკ ჯორჯია“ (MAC Georgia), Caritas Georgia, კოალიცია მოძრაობა ცვლილებებისთვის, International Woman Association (IWA) & რეგიონალურ დონეზე დამოუკიდებელი ცხოვრების ცენტრები. მშობელთა ეროვნული კონფერენციის მიზანია მშობლებს შესთავაზოს ის რესურსები და გამოცდილება, რაც მშობლობას, როგორც მარათონს, უფრო საინტერესოს და სახალისოს გახდის, როგორც მშობლისთვის, ასევე ბავშვისთვის. კონფერენციაში მონაწილეობა უფასოა. იხილეთ კონფერენციის გზამკვლევი… კონფერენციაზე დასწრების სურვილის შემთხვევაში გთხოვთ ყურადღებით შეავსოთ ონლაინ სააპლიკაციო ფორმა… აპლიკაციების შევსების ბოლო ვადაა: 24 ნოემბერი. სრულად... წყარო: ორგანიზაციის გვერდი სოციალურ ქსელში

გურია. ახალგაზრდა პედაგოგთა კავშირის მიერ, პროექტის „გაუმჯობესებული ბავშვთა დაცვის სისტემა გურიასა და კახეთის“ ფარგლებში, ჩატარდა ტრენინგი თემაზე „ბავშვთა დაცვის საკითხებისა და მათზე რეაგირების გზების სწავლება ბავშვებისა  და მოზარდებისთვის“. აღნიშნული სესიები ემსახურებოდა ბავშვთა მიმართ ძალადობის პრევენციას - ცნობიერების ამაღლებას ბავშვთა მიმართ ძალადობის ამოცნობასა და მასზე  რეაგირების ფორმების სწავლებას. პროექტი ხორციელდება გერმანიის ეკონომიკური თანამშრომლობისა და განვითარების, ფედერალური სამინისტროსა და ჰერმან გმაინერის გერმანიის ფონდის ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

კახეთი. საერთაშორისო გამჭვირვალობა - საქართველო თელაველ ახალგაზრდებს ქვეყნის მომავალზე, ევროკავშირში გაერთიანების სურვილსა და ამ მიმართულებით გადასადგმელ ნაბიჯებზე ესაუბრა. შეხვედრამ დისკუსიის ფორმატში ჩაიარა. მომღერალი გიორგი უშიკიშვილი ახალგაზრდებს ესაუბრა, თუ რა მნიშვნელოვან საქმეს აკეთებს ჩვენი ფოლკლორის და ზოგადად კულტურული მემკვიდრეობის დასაცავად ევროკავშირი. ორგანიზაციის აღმასრულებელმა დირექტორმა, ეკა გიგაურმა კი საკუთარ მაგალითზე განიხილა მოსწავლეებთან, თუ რა ნაბიჯებს გადის  სტუდენტი ევროპაში სწავლის გასაგრძელებლად დაფინანსების მოპოვებისთვის. ორგანიზაცია მადლობას უხდის PH International-ს შეხვედრის ორგანიზებაში შეტანილი წვლილისთვის. რეგიონული შეხვედრები სამხრეთ კავკასიაში კონრად ადენაუერის ფონდის მხარდაჭერით ხორციელდება. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. დემოკრატიული ჩართულობის მხარდაჭერის პროგრამის მონაწილეები ახალციხის მუნიციპალიტეტის საკრებულოს თავმჯდომარეს დავით ლომიძეს და მის მოადგილეებს შეხვდნენ. შეხვედრის თემები იყო: ადგილობრივი თვითმმართველობის საქმიანობაში მოქალაქეთა ჩართულობის ფორმები, წარმომადგენლობითი ორგანოს სტრუქტურა და უფლება- მოვალეობები, 2023 წლის ბიუჯეტის პროექტი და ახალგაზრდების ინიციატივები. სრულად... წყარო: ორგანიზაციის გვერდი სოციალურ ქსელში ფოტოები: ახალციხის მუნიციპალიტეტის საკრებულო

თბილისი. ამერიკის მთავრობის მხარდაჭერით, შეზღუდული შესაძლებლობის მქონე დაობლებული ბავშვები ამიერიდან სახლის ტიპის გარემოში იცხოვრებენ და უკეთეს სამედიცინო მზრუნველობას მიიღებენ. ბავშვთა სახლის მშენებლობა-მოწყობისთვის აშშ-ის არმიის ევროპულმა სარდლობამ 2.2 მილიონამდე ლარი დახარჯა. სრულად... წყარო: საელჩოს გვერდი სოციალურ ქსელში

შიდა ქართლი. შიდა ქართლის ჰაბმა ახალგაზრდებისთვის ტრენინგი „სამოქალაქო აქტივიზმი, აქტიური მოქალაქეობა“ ჩაატარა. ტრენინგის მიზანი იყო მონაწილეებს მიეღოთ ინფორმაცია სამოქალაქო აქტივიზმის შესახებ და შეეძინათ აქტიური მოქალაქისთვის აუცილებელი უნარ-ჩვევები. ტრენინგი განხორციელდა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ (2021-2025) ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. 1 ნოემბერს, სამოქალაქო საზოგადოების ინსტიტუტის (CSI) საზოგადოებასთან ურთიერთობის და კომუნიკაციების მენეჯერი თემურ ჯალიაშვილი ილიას სახელმწიფო უნივერსიტეტის სტუდენტებს შეხვდა. შეხვედრა გაიმართა საუნივერსიტეტო კურსის „სამოქალაქო საზოგადოების როლის“ ხელმძღვანელის დავით აფრასიძის მიწვევით. საუნივერსიტეტო კურსის მიზანია ახალმა თაობამ სწავლების საბაკალავრო საფეხურზე მიიღოს სანდო, აკადემიური ცოდნა სამოქალაქო საზოგადოებისა და ორგანიზაციების შესახებ. შეხვედრაზე პრეზენტატორმა განსაკუთრებული ყურადღება გაამახვილა სამოქალაქო საზოგადოების როლის, სამოქალაქო პასუხისმგებლობის და სამოქალაქო საზოგადოების ორგანიზაციების საქმიანობის შესახებ. ამასთან, მსმენელებთან გაზიარდა ინფორმაცია CSI- მუშაობის მიმართულებების და კამპანიის „ეს ქვეყანა შენია“ მიმდინარეობის შესახებ. შეხვედრა ინტერაქციულ რეჟიმში წარიმართა. სტუდენტებმა დასვეს მათთვის საინტერესო შეკითხვები და გამოთქვეს მოსაზრებები. აღნიშნული საუნივერსიტეტო კურსი „სამოქალაქო საზოგადოების როლი“ შემუშავდა პროექტის „სამოქალაქო საზოგადოების განვითარების ინიციატივა“ ფარგლებში ადგილობრივი უმაღლესი სასწავლებლების და ექსპერტების აქტიური თანამშრომლობით და დაინერგა საქართველოს 6 უნივერსიტეტში. წყარო: CSI-ს გვერდი სოციალურ ქსელში

შიდა ქართლი. გორის რაიონულმა სასამართლომ (მოსამართლე დავით მაკარაძე) ბავშვის ფიზიკური დასჯის საქმეზე გამამტყუნებელი განაჩენი გამოიტანა და ბავშვზე მოძალადეს 5 წლით თავისუფლების აღკვეთა და 2000 ლარის ოდენობით ჯარიმა შეუფარდა. ორგანიზაციის ცნობით, ბავშვმა ხილი უნებართვოდ მოკრიფა. ამის გამო კი, ხილის ერთერთმა მეპატრონემ ბავშვს პლასტმასის მილით ფეხზე ფიზიკური დაზიანება მიაყენა, ხოლო მეორემ, ბავშვი ხიდან ძალით ჩამოათრია, რამდენჯერმე გაარტყა სახეში ხელი, ამოარტყა პანღური, მიაყენა სიტყვიერი შეურაცხყოფა, ძალის გამოყენებით წელსზემოთ გააშიშვლა, აიძულა შარვლის გახდა და ამ მდგომარეობაში - ბავშვი ქუჩაში გაუშვა. მოზარდს სხეულზე ფიზიკური დაზიანების კვალი აღენიშნებოდა. ძალადობის ფაქტიდან წელიწადნახევრის შემდეგ, გორის რაიონულმა სასამართლომ დამნაშავედ ცნო პირი, რომელმაც გიორგი დასაჯა და ღირსება შეულახა. პარტნიორობა ადამიანის უფლებებისთვის (PHR), აღნიშნულ საქმეს USAID სამართლის უზენაესობის პროგრამის მხარდაჭერით აწარმოებს. სრულად... წყარო: phr.ge

გურია. ახალგაზრდა პედაგოგთა კავშირის სკოლის მხარდამჭერთა პროგრამის ფარგლებში, შემოქმედის საჯარო სკოლაში იდეებისა და მეწარმეობის ლაბორატორიის წევრები მწერალ არჩილ ქიქოძეს შეხვდნენ. შეხვედრაზე განიხილეს ლიტერატურული პრემია „ლიტერაზე“ ნომინირებული წლის საუკეთესო რომანი „სამხრეთული სპილო“, რომელიც სასკოლო პროგრამაშია შესული. შეხვედრაზე მოზარდებს შესაძლებლობა ჰქონდათ დაესვათ წიგნთან დაკავშირებული მათთვის საინტერესო შეკითხვები. ავტორთან შეხვედრა განხორციელდა სკოლის მენტორის - ვახუშტი მენაბდის აქტიური მხარდაჭრითა და ჩართულობით. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი წუხილს გამოხატავს საქართველოს საჯარო სივრცეებში არსებულ ბავშვების უსაფრთხოების ზომებთან დაკავშირებით. ორგანიზაციის შეშფოთება გამოიწვია 13 ოქტომბერს თბილისში, ვაკის პარკში მომხდარმა ტრაგიკულმა შემთხვევამ, რომლიც შედეგად სერიოზულად დაშავდა სამი ბავშვი, ერთი კი გარდაიცვალა. „ქალაქის დაგეგმარებაში ყველა ქალაქმა უნდა უზრუნველყოს ბავშვებისთვის და ადგილობრივი მაცხოვრებლებისთვის უსაფრთხო და ინკლუზიური საჯარო და მწვანე სივრცეები, სადაც ისინი შეძლებენ შეკრებას და გარე აქტივობებში ჩართვას. ნორმები და სტანდარტები, განსაკუთრებით საჯარო ინფრასტრუქტურის ტექნიკური უსაფრთხოების კუთხით, უნდა უზრუნველყოფდეს მომხმარებლების დაცვას, ხელმისაწვდომი იყოს ბავშვებისთვის, მათ შორის, ყველაზე დაუცველი მოქალაქეებისთვის, ასევე უზრუნველყოფდეს მათ უსაფრთხოებასა და ჯანმრთელობის დაცვას. ბავშვზე მორგებული ქალაქდაგეგმარება იწყება იმის გაგებით, თუ როგორ შეუძლია ქალაქს ხელი შეუწყოს და გააძლიეროს ბავშვების განვითარება. ვინაიდან თამაშის უფლება ფუნდამენტურია ბავშვის განვითარებისთვის, საჯარო სივრცეები უნდა უზრუნველყოფდეს უსაფრთხო გარემოს ბავშვებისთვის თამაშის ან გარე აქტივობების დროს“, ნათქვამია განცხადებაში. სრულად... წყარო: www.unicef.org

სამცხე-ჯავახეთი. 25 ოქტომბერს, სამცხე-ჯავახეთის სახელმწიფო უნივერსიტეტში გაიმართა საქართველოში აშშ-ს ელჩის - კელი დეგნანის შეხვედრა ახალგაზრდებთან. სტუდენტებთან ერთად ღონისძიებას ესწრებოდნენ რონდელის ფონდის პროექტის მონაწილე სკოლის მოსწავლეები სოფელ მოხედან, ზარზმიდან და დაბა ადიგენიდან. ორგანიზაციის პროექტი „თემის ახალგაზრდების ჩართულობა საქართველოს რეგიონებში“ 2021 წლის  ოქტომბრიდან საქართველოში აშშ-ს საელჩოს მხარდაჭერით ხორციელდება, რომელიც მიზნად ისახავს მაღალმთიანი აჭარის, წეროვანის, პანკისის ხეობისა და ადიგენის მუნიციპალიტეტისა საჯარო სკოლების მოსწავლეების სამოქალაქო ცნობიერების გაძლიერებას და არაფორმალური განათლებისა და აქტივობის გზით მათი შესაძლებლობების გაზრდას. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. სოციალური სამართლიანობის ცენტრი აქვეყნებს ტიგრან თარზიანის ბლოგპოსტს: „ხოპანი“ - ჯავახეთის ახალგაზრდების ერთადერთი დასაქმების ადგილი. „უთანასწორო შესაძლებლობები რეგიონში უფრო მკაფიოდ ჩანს ქალაქთან შედარებით, თუნდაც განათლების საკითხში. ყველაფერს რომ თავი დავანებოთ, არ არსებობს არაფორმალური განათლების მიღების ცენტრები, პროფესიული სასწავლებლები, უცხო ენების შესწავლის შესაძლებლობა და სხვა. ამიტომაცაა რომ, რეგიონიდან გარბის ხალხი, დღეს ფილოლოგიც, ხელოვანიც და მექანიკოსიც მუშაობს თბილისის რომელიმე უბნის მაღაზიაში, რადგან დაბრუნება რეგიონში უდრის უმუშევრობას, მიგრაციას, ან მძიმე ფიზიკურ უშედეგო შრომას. ასეთ პირობებში განვითარება შეუძლებელია. უმუშევრების რიგებში ახალგაზრდებს დიდი წილი უკავიათ, რის გამოც იზრდება სოციალური რისკები, საფრთხე ექმნება ქვეყნის მომავალს“, ნათქვამია ბლოგპოსტში. სრულად... წყარო: socialjustice.org.ge

თბილისი. მაკლეინის ასოციაცია ბავშვებისთვის აქვეყნებს სტატიას: ნატიფი მოტორული უნარების განვითარებაზე მიმართული აქტივობები. „ნატიფი მოტორული უნარების განვითარებაზე მიმართული აქტივობები ბავშვს ხელის კუნთების განვითარებასა და გაძლიერებაში ეხმარება, რაც თავის მხრივ აუცილებელია ისეთი ყოველდღიური აქტივობების შესასრულებლად, როგორებიცაა: კალმის ან ფანქრის ხელით ჭერა, მაკრატლის გამოყენება, კბილების გახეხვა, თასმების შეკვრა-გახსნა და სხვა. დღევანდელ სტატიაში გთავაზობთ რამდენიმე სავარჯიშოს, რომელთა გამოყენებაც სახლის პირობებშიც შეგიძლიათ“, ნათქვამია სტატიაში. სრულად... წყარო: macgeorgia.org

თბილისი. ახალგაზრდა პედაგოგთა კავშირის ორგანიზებით, 4-16 ოქტომბერს ახალგაზრდული ტრენინგი „გენდერული როლები და სტერეოტიპები“ ჩატარდა. განხილულ საკითხებს შორის იყო: ქალთა უფლებების ისტორია, ფემინიზმი; გენდერული თანასწორობა, არაანაზღაურებადი შრომა; ძალადობა, ნაადრევი ქორწინება, გენდერი და შეზღუდული შესაძლებლობა;  როგორ დავწეროთ პროექტი. სრულად... წყარო: ორგანიზაციის გვერდი სოციალურ ქსელში

თბილისი. თუ გაქვთ კითხვები ბავშვის განვითარების შესახებ მაკ ჯორჯია გაძლევთ საშუალებას გაიაროთ უფასო, დისტანციური კონსულტაცია ოკუპაციურ თერაპევტთან. შეარჩიეთ თქვენთვის სასურველი დრო, კონსულტაცია გაიმართება ხუთშაბათს, 20 ოქტომბერს, 12:00, 13:00, 14:00 საათებზე. სპეციალისტთან კონსულტაციის გავლა შეგიძლიათ თქვენთვის მოსახერხებელი ფორმით - მობილურის, ვაიბერის ან ზუმის საშუალებით. ოკუპაციურ თერაპევტთან კონსულტაციის დასაჯავშნად მიყევით ბმულს... რეგისტრაციისას სირთულეების შექმნის დარეკეთ ნომერზე - 591 97 99 42. სრულად... წყარო: ორგანიზაციის გვერდი სოციალურ ქსელში

სამეგრელო. გაეროს ბავშვთა ფონდის „ბავშვზე მორგებული ქალაქების ინიციატივას“ ქალაქი ფოთიც შეუერთდა. გაეროს ბავშვთა ფონდსა და ფოთის მერიას შორის ურთიერთთანამშრომლობის მემორანდუმს მოეწერა ხელი. Მომდევნო ეტაპზე სამოქმედო გეგმა შემუშავდება, რომლის შესრულების შემდეგაც ფოთი „ბავშვზე მორგებული ქალაქის“ სტატუსს მოიპოვებს. ორგანიზაციის ცნობით, ბავშვზე მორგებული ქალაქი ადგილობრივი თვითმმართველობის ისეთი სისტემაა, სადაც ბავშვის საჭიროებები და უფლებები ადგილობრივი პოლიტიკის და პროგრამების მნიშვნელოვანი ნაწილია. გაიგეთ მეტი... წყარო: ორგანიზაციის გვერდი სოციალურ ქსელში

თბილისი. ინფორმაციის საყოველთაო ხელმისაწვდომობის საერთაშორისო დღის აღსანიშნავად, მსოფლიო მასშტაბით მთელი კვირის მანძილზე ინფორმაციის ხელმისაწვდომობაზე მომუშავე ორგანიზაციები სხვადასხვა ქვეყანაში ცალკეულ ღონისძიებებს მართავენ.  IDFI-მ სხვა ღონისძიებებთან ერთად, 30 სექტემბერს საქართველოს უნივერსიტეტში სტუდენტებისთვის საჯარო მონაცემების ღიაობის მნიშვნელობაზე საჯარო ლექცია ჩაატარა. ლექციის დასაწყისში მათ მონაწილეებს გააცნეს ინსტიტუტის საქმიანობა და მთავარი თემატური მიმართულებები, რის შემდეგაც სტუდენტებს ესაუბრებიან შემდეგ საკითხებზე: რა მნიშვნელობა აქვს საჯარო ინფორმაციის ხელმისაწვდომობას ხელისუფლების საქმიანობის ეფექტური კონტროლისთვის? როგორ შეუძლიათ მოქალაქეებს საქართველოში საჯარო ინფორმაციის მოპოვება? როგორ იყენებს IDFI საჯარო მონაცემებს ხელისუფლების საქმიანობის კონტროლისთვის?  როგორ შეუძლიათ სტუდენტებს მიიღონ მონაწილეობა ხელისუფლების საქმიანობის კონტროლში? სრულად...  წყარო: idfi.ge

თბილისი. გაეცანით პლატფორმას „იმშობლე“ და მიიღეთ სასარგებლო რჩევები ბავშვებთან არსებული გამოწვევების დასაძლევად და მათთან პოზიტიური კომუნიკაციის ჩამოსაყალიბებლად. დღეს პორტალი პოზიტიური მშობლობისთვის ორ მნიშვნელოვან რჩევას გაგიზიარებთ, რომლებიც 1 წლამდე ბავშვების მშობლებისთვის იქნება საინტერესო: ყოველთვის ეცადეთ, ბავშვთან ურთიერთობის დროს, გაახმოვანოთ ნივთები და მოქმედებები: „ეს კოვზია, ახლა ჩვენ საჭმელს შევჭამთ“, „ეს დათუნიაა“. ეს ქმედება ბავშვს დაეხმარება ერთი მხრივ, ისწავლოს ნივთების დასახელებები და მეორე მხრივ, გაიაზროს მათი დანიშნულება. ამ ტიპის დიალოგები დაგეხმარებათ, მარტივად შეხვიდეთ ბავშვთან კომუნიკაციაში. შექმენით რიტუალები: ძილის წინ, ჭამის დროს, დაბანის დროს, თამაშის რიტუალი და ეცადეთ მათ დაცვას. კამპანიას ახორციელებს გაეროს ბავშვთა ფონდი ევროკავშირის მხარდაჭერით. სრულად... წყარო: ორგანიზაციის გვერდი სოციალურ ქსელში

იმერეთი. „ადგილობრივი დემოკრატიის სააგენტო საქართველომ” შეხვედრა გამართა ბაღდათის ახალგაზრდული საბჭოს წევრებთან. შეხვედრის მიზანია ბაღდათის მუნიციპალიტეტისთვის შემუშავებული ახალგაზრდული ინიციატივების მხარდაჭერი პროგრამის განხილვა და მომდევნო წლის ბიუჯეტის პროექტში ასახვა. საბჭოს წევრებთან ერთად შეხვედრას ესწრებოდნენ მერიის განათლების, კულტურისა და სპორტის სამსახურის წარმომადგენლები. ბაღდათის ახალგაზრდული საბჭოს გაძლიერება ხდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. ახალციხეში ბავშვის უფლებათა კვირეული გაეროს ბავშვთა ფონდის წარმომადგენლის, ღასან ხალილის საჯარო ლექციით გაიხსნა. გაეროს ბავშვთა ფონდის ინფორმაციით, კვირეულის ფარგლებში ორგანიზაცია რამდენიმე ღონისძიებას გამართავს სამცხე-ჯავახეთის რეგიონში ბავშვის უფლებების პოპულარიზების მიზნით. მოწვეული ელჩები, 16 ქვეყნისა და საერთაშორისო ორგანიზაციის წარმომადგენლები  დისკუსიაში ჩაერთვებიან ადგილობრივ ახალგაზრდებთან, პედაგოგებთან, სამედიცინო პროფესიონალებთან და რელიგიურ ლიდერებთან. სრულად... წყარო: ორგანიზაციის გვერდი სოციალურ ქსელში

თბილისი. 2022 წლის ივლისში, ორგანიზაციის „პარტნიორობა ადამიანის უფლებებისთვის“ (PHR) ბავშვთა ადვოკატებს 11 წლის ბიჭმა მომართა. ბავშვს კერძო სკოლიდან საჯარო სკოლაში უნდოდა გადასვლა, რადგან  დედის გარდაცვალების შემდეგ, ბებოსთან დარჩენილს ძალიან უჭირდა კერძო სკოლის საფასურის გადახდა და დიდი მანძილის გამო სკოლამდე ფიზიკურად სიარული. 2022 წლის 7 სექტემბერს,  PHR-მა და არასრულწლოვანმა მიმართეს სასამართლოს შუამდგომლობით და მოითხოვეს მოსამართლის განჩინებით ბავშვი ყველაზე ახლომდებარე საჯარო სკოლაში სასწრაფოდ ჩარიცხულიყო. ორგანიზაციის ცნობით, თბილისის საქალაქო სასამართლოს მოსამართლემ, ციცინო როხვაძემ, 2022 წლის 9 სექტემბერს, ბავშვის მოთხოვნა სრულად დააკმაყოფილა. სრულად...  წყარო: phr.ge

თბილისი. გაეროს ბავშვთა ფონდი წიგნიერების საერთაშორისო დღესთან დაკავშირებით, გიზიარებთ სასარგებლო რჩევებს თუ როგორ შევაყვაროთ პატარებს კითხვა. „დღეში სულ რაღაც 10-15 წუთი, რომელსაც თქვენი ცნობისმოყვარე პატარა წიგნთან გაატარებს, საკმარისია იმისთვის, რომ მასში ინტერესის ნაპერწკალი გააღვივოს. დაბადებისთანავე ჩართეთ ბავშვი კითხვის პროცესში; მიეცით მაგალითი, თუ როგორი უნდა იყოს კარგი მკითხველი; იკითხეთ რიგრიგობით; მოუსმინეთ ბავშვს; აქციეთ კითხვა რუტინად; სრულად... წყარო: www.unicef.org ავტორი: მენდი რიჩი, ციფრული კონტენტის მწერალი, გაეროს ბავშვთა ფონდი