თბილისი. კოალიცია მოუწოდებს პრეზიდენტსა და მმართველ პარტიას ხელოვნურად არ შეაფერხონ უზენაესი სასამართლოს თავმჯდომარის არჩევის პროცესი. „კოალიციას მიაჩნია, რომ ერთი მხრივ, პრეზიდენტი, რომლის გადაწყვეტილებითაც შეწყდა კონსულტაციების პროცესი, ხოლო მეორე მხრივ, საპარლამენტო უმრავლესობა, რომელმაც წინასწარ განაცხადა უარი პრეზიდენტთან კონსულტაციებში ჩართვაზე, შექმნილ სიტუაციას არასათანადო პასუხისმგებლობით ეკიდებიან. ამ დრომდე უზენაესი სასამართლოს თავმჯდომარის შერჩევის პროცესი იმაზე მიუთითებს, რომ არც პრეზიდენტს და არც მმართველ ძალას ან სათანადოდ გააზრებული არ აქვთ სასამართლო სისტემაში შექმნილი მდგომარეობის სიმძიმე ან არ აქვთ განზრახვა ამ ვითარების შესაცვლელად ქმედითი ნაბიჯები გადადგან", ნათქვამია განცხადებაში. სრულად... წყარო: www.transparency.ge

თბილისი. ქალთა მოძრაობა საპრეზიდენტო კანდიდატებს მიმართავს და 4 ო1ტომბერს, 11:00 საათზე, გენდერულ უთანასწორობაზე სასაუბროდ იწვევს. „ბოლო წლებში გადადგმული ნაბიჯების მიუხედავად, ქალთა მიმართ არსებული დისკრიმინაცია და გენდერული უთანასწორობა მწვავე პრობლემად რჩება საქართველოს დემოკრატიული განვითარების და ევროინტეგრაციის გზაზე. ქალთა მოძრაობა და ქალთა პოლიტიკური მონაწილეობის სამუშაო ჯგუფი ამა წლის 4 ოქტომბერს, 11 საათზე, ეროვნული ბიბლიოთეკაში ვიწვევთ საპრეზიდენტო კანდიდატებს, რომლებსაც ვთხოვთ, გაგვიზიარონ საკუთარი ხედვა ქალთა პრობლემების მოგვარებასა და გენდერული თანასწორობის დამკვიდრებასთან დაკავშირებით", ნათქვამია განცხადებაში. სრულად... წყარო: მოძრაობის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) ქუთაისსა და თიანეთში ძალადობრივ ინციდენტებს ეხმაურება. „მიგვაჩნია, რომ ძალადობრივი ქმედებები საფრთხეს უქმნის საარჩევნო პროცესების მშვიდ და სტაბილურ ვითარებაში წარმართვას და ზიანს აყენებს საარჩევნო გარემოს", ნათქვამია ორგანიზაციის განცხადებაში. საია მოუწოდებს სამართალდამცავ ორგანოებს დროულად გამოიძიონ ძალადობრივი ფაქტები, საარჩევნო პროცესებში ჩართულმა მხარეებმა კი მეტი პასუხისმგებლობა გამოიჩინონ და თავი შეიკავონ დაპირისპირებისგან. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია მოუწოდებს ცენტრალურ საარჩევნო კომისიას სასულიერო პირების ქადაგებებზე სამართლებრივი რეაგირებისკენ. „მიუხედავად იმისა, რომ ცალკეულ სასულიერო პირთა მხრიდან აგიტაციის შემცველი განცხადებების გაკეთება არ წარმოადგენს კანონის დარღვევას, მიგვაჩნია, რომ სასულიერო პირებს, მითუფრო − წმინდა სინოდის წევრებს, განსაკუთრებული სიფრთხილე მართებთ პოლიტიკური გამოხატვის თავისუფლების განხორციელებისას, საკუთარი სტატუსიდან და საზოგადოების გარკვეული ნაწილის ცხოვრებაში მათი როლიდან გამომდინარე. „საქართველოს სახელმწიფოსა და საქართველოს სამოციქულო ავტოკეფალურ მართლმადიდებელ ეკლესიას შორის" კონსტიტუციური შეთანხმების თანახმად, სახელმწიფომ და ეკლესიამ დაადასტურეს მზადყოფნა, ითანამშრომლონ ურთიერთდამოუკიდებლობის პრინციპის დაცვით.[2] მიგვაჩნია, რომ მაღალი იერარქიის სასულიერო პირების მხრიდან სახელმწიფო ხელისუფლებისა თუ კონკრეტული საარჩევნო სუბიექტის წინააღმდეგ აგიტაციის განხორციელება არ არის მიზანშეწონილი, რაოდენ მიუღებელიც არ უნდა იყოს კანდიდატის მოსაზრებები მათთვის", ნათქვამია ორგანიზაციის ვებგვერდზე. სრულად... წყარო: www.gyla.ge

თბილისი. გენდერული საინფორმაციო პორტალი აქვეყნებს ბლოგპოსტს: „125 წელი ქალების მიერ ხმის უფლების მოპოვებიდან". „როგორც ვიცით, ქალებს ისეთ დემოკრატიულ სახელმწიფოებშიც კი როგორიც ბრიტანეთი და აშშ-ა მხოლოდ პირველი მსოფლიო ომის დასრულების შემდეგ მიენიჭათ ხმის მიცემის უფლება, როცა ახალ ზელანდიაში ჯერ კიდევ 1893 წლის 19 სექტემბერს , ანუ ზუსტად 125 წლის წინ. შეგვიძლია წარმოვიდგინოთ, რომ ქალებისთვის ხმის მიცემის უფლების მინიჭება საკმაოდ გრძელვადიანი და რთული პროცესი იქნებოდა", ნათქვამია ორგანიზაციის ვებგვერდზე. სრულად... წყარო: ginsc.net

თბილისი. საქართველოს ახალგაზრდა იურისტთა ასოციაცია არჩევნებში ჩართული მხარეებისთვის ღია მიმართვას ავრცელებს. „წინასაარჩევნო პერიოდში მომხდარი კანონდარღვევების დროული გამოვლენისა და მათზე სამართლებრივი რეაგირების მიზნით, გვსურს შემოგთავაზოთ ურთიერთთანამშრომლობა, რათა შესაბამისი რეაგირების გარეშე არ დარჩეს შესაძლო კანონდარღვევის ფაქტები. სწორედ ამიტომ, მნიშვნელოვნად მიგვაჩნია ინფორმაციის ურთიერთგაცვლა. დროული და დადასტურებული ინფორმაციის არსებობის შემთხვევაში, საია-ს ექნება შესაძლებლობა, შესაბამისი სამართლებრივი შეფასება მისცეს საკითხს და კვალიფიციური კონსულტაცია გაუწიოს ნებისმიერ მსურველს. მიგვაჩნია, რომ ამგვარი თანამშრომლობა ხელს შეუწყობს საარჩევნო გარემოს დემოკრატიულობისა და სამართლიანობის ხარისხის გაუმჯობესებას, რაც ყველა იმ სუბიექტის ინტერესში შედის, ვისაც საქართველოში თავისუფალი და სამართლიანი არჩევნების ჩატარება სურს", - ვკითხულობთ მიმართვაში. სრულად  წყარო: ორგანიზაციის ვებგვერდი

თბილისი. ცესკო-ს, საპრეზიდენტო არჩევნებისათვის შექმნილ უწყებათაშორის კომისიასა და ადგილობრივ არასამთავრობო ორგანიზაციებს შორის ტრადიციული მემორანდუმი გაფორმდა. დოკუმენტს, ცესკო-ს თავმჯდომარესა და უწყებათაშორისი კომისიის მდივანთან ერთად, ხელი მოაწერეს არასამთავრობო ორგანიზაციებმა, რომლებიც თანხმდებიან, იხელმძღვანელონ მემორანდუმში გაწერილი განმარტებებით. მემორანდუმის მიზანი ადმინისტრაციული რესურსების შესახებ „საქართველოს საარჩევნო კოდექსში" არსებული მუხლების ერთგვაროვანი განმარტებაა, რათა 2018 წლის საპრეზიდენტო არჩევნებისთვის ადმინისტრაციული რესურსის გამოყენების რისკები სრულად იქნეს აღმოფხვრილი და არჩევნები სამართლიან და კონკურენტულ გარემოში ჩატარდეს. ურთიერთგაგების მემორანდუმი ცესკო-ს, უწყებათაშორის კომისიასა და არასამთავრობო ორგანიზაციებს შორის 2013 წლიდან ტრადიციულად ყოველი არჩევნების წინასაარჩევნო პერიოდში ფორმდება. სრულად... წყარო: იუსტიციის სამინისტრო

თბილისი. სამართლიანი არჩევნებისა და დემოკრატიის საერთაშორისო საზოგადოებამ (ISFED), საქართველოს ახალგაზრდა იურისტთა ასოციაციამ და საერთაშორისო გამჭვირვალობა საქართველომ გამართეს კონფერენცია 2018 წლის საპრეზიდენტო არჩევნების წინასაარჩევნო გარემოს გამოწვევების შესახებ. კონფერენციაზე მოწვეულნი იყვნენ პოლიტიკური პარტიების, არასამთავრობო ორგანიზაციებისა და დიპლომატიური კორპუსის წარმომადგენლები. კონფერენციის მიზანია, სადამკვირვებლო ორგანიზაციებმა პოლიტიკური პარტიებისა და კანდიდატებისგან შეიტყონ, თუ რა ტიპის გამოწვევებს ხედავენ ისინი წინასაარჩევნო პროცესის მიმდინარეობისას. სრულად... წყარო: ახალგაზრდა იურისტთა ასოციაციის გვერდი სოციალურ ქსელში

თბილისი. 13 სექტემბერს, სამართლიანი არჩევნებისა და დემოკრატიის საერთაშორისო საზოგადოებამ (ISFED) საქართველოს პრეზიდენტის 2018 წლის არჩევნების წინასაარჩევნო პერიოდის მონიტორინგის პირველი შუალედური ანგარიში წარმოადგინა. დოკუმენტში მიმოხილულია, ძირითადად, 1 აგვისტოდან 8 სექტემბრის ჩათვლით პერიოდი, თუმცა ანგარიში ასევე მოიცავს გარკვეულ მოვლენებს რაც ამ პერიოდის მიღმა ახდენდა გავლენას საარჩევნო პროცესზე. სრულად... წყარო: isfed.ge

თბილისი. საერთაშორისო გამჭვირვალობა საქართველო აქვეყნებს ინფოგრაფიკს თუ რა სახის მხარდაჭერა შეუძლია აღმოუჩინოს ქართულმა ოცნებამ ზურაბიშვილს. „28 ოქტომბრის საპრეზიდენტო არჩევნებზე სახელისუფლებო პარტიამ „ქართულმა ოცნებამ" საკუთარი კანდიდატი არ წარადგინა, თუმცა საჯაროდ მხარს დამოუკიდებელ კანდიდატს სალომე ზურაბიშვილს უჭერს. საყურადღებოა თუ რა სახეს მიიღებს ეს მხარდაჭერა, რადგან საქართველოს კანონმდებლობა ამ კუთხით გარკვეულ შეზღუდვებს აწესებს", ნათქვამია ორგანიზაციის გვერდზე სოციალურ ქსელში. სრულად... წყარო: საერთაშორისო გამჭვირვალობა – საქართველოს გვერდი სოციალურ ქსელში

თბილისი. „საზოგადოებრივი დამცველი" აგრძელებს პროექტს - „ინფორმირებული ამომრჩევლები დემოკრატიული არჩევნებისთვის”. პროექტი მიზნად ისახავს, 2018 წლის საქართველოს პრეზიდენტის არჩევნებისთვის, თბილისის დიდუბე-ჩუღურეთის, გლდანი-ნაძალადევისა, ისანი-სამგორის რაიონების ამომრჩევლები იღებენ ინფორმაციას არჩევნების გზით ქვეყნის მართვის პროცესში მოქალაქეთა მონაწილეობის მნიშვნელობისა და საარჩევნო უფლებების რეალიზების საკანონმდებლო მექანიზმების შესახებ. სრულად  წყარო: ორგანიზაციის გვერდი სოციალურ ქსელში

საქართველო. „საერთაშორიშოსო გამჭვირვალობა - საქართველოს" ორგანიზებით, ქუთაისში, ზუგდიდსა და ბათუმში საზოგადოებრივი და მედიაორგანიზაციებისთვის ტრენინგი გაიმართა. ტრენინგი ეხებოდა წინასაარჩენო პერიოდში ადმინისტრაციული რესურსის გამოყენების საფრთხეებსა და ამ მიმართულებით არსებული კანონმდებლობისა და პრაქტიკის მიმოხილვას. ტრენინგში მონაწილეობა მიიღო სამ რეგიონში მოქმედი 25 არასამთავრობო და მედია ორგანიზაციის 35-მა წარმომადგენელმა. შეხვედრები შვედეთის საერთაშორისო განვითარების სააგენტოს მხარდაჭერით გაიმართა. სრულად  წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ მომზადა საინფორმაციო ბიულეტენი - 2018 წლის საპრეზიდენტო არჩევნების მონიტორინგი. 2018 წლის საპრეზიდენტო წინასაარჩევნო მონიტორინგი საია-მ, ცენტრალური და რეგიონული ოფისების მეშვეობით, 1 აგვისტოს დაიწყო. დაკვირვება მიმდინარეობდა, როგორც თბილისში, ისე აჭარაში, გურიაში, სამეგრელოში, ზემო სვანეთში, იმერეთში, რაჭაში, ლეჩხუმში, შიდა და ქვემო ქართლში, სამცხე-ჯავახეთში, მცხეთა-მთიანეთსა და კახეთში.  „მონიტორინგის მიზანს წარმოადგენს სამართლიანი და გამჭვირვალე საარჩევნო პროცესების ხელშეწყობა, საარჩევნო კანონმდებლობისა და საერთაშორისოდ დადგენილი დემოკრატიული სტანდარტების დაცვა საარჩევნო ადმინისტრაციის წარმომადგენლების, საარჩევნო სუბიექტებისა და საჯარო მოხელეების მხრიდან. ასევე, საქართველოს მოქალაქეებისა და საერთაშორისო საზოგადოების ინფორმირება 2018 წლის საპრეზიდენტო არჩევნების წინასაარჩევნო პროცესებთან დაკავშირებულ დარღვევებსა და ტენდენციებზე, ყურადღების გამახვილება საკანონმდებლო და პრაქტიკულ ხარვეზებზე. აგრეთვე, საარჩევნო კანონმდებლობაში პრობლემების იდენტიფიცირება და არჩევნების დასრულების შემდეგ შესაბამისი საკანონმდებლო ცვლილებების ადვოკატირება", - აღნიშნულია დოკუმენტის შესავალ ნაწილში.  სრულად  წყარო: ორგანიზაციის გვერდი სოციალურ ქსელში

1 აგვისტოს „კონსტიტუციის 42-ე მუხლმა" წნორში ჩაატარა ტრენინგები თემაზე: არჩევნები - თანაბარი უფლებები ყველა ამომრჩეველს. „ტრენინგს ესწრებოდნენ წნორსა და მის მიმდებერე სოფლებში მცხოვრები შშმ პირები და მათი მხარდამჭერები. შშმ პირებისთვის (ინტელექტუალური შეზღუდვის, ფსიქიკური პრობლემებისა თუ ფსიქო-სოციალური საჭიროების მქონე) არჩევნებში მონაწილეობის უფლების მიღება მნიშვნელოვანი ნაბიჯია მათი ინტეგრაციისთვის, თუმცა მათმა დიდმა ნაწილმა ამ სიახლის შესახებ არაფერი იცის. ჩვენი ტრენინგის შედეგად მათ მიიღეს ინფორმაცია, როგორც 2014 წლის საკონსტიტუციო სასამართლოს გადაწყვეტილების შედეგად მინიჭებული უფლებების შესახებ, ასევე მხარდამჭერის როლსა და მოვალეობებზე. „კონსტიტუციის 42-ე მუხლი" პროექტს „არჩევნები - თანაბარი უფლებები ყველა ამომრჩეველს" სამოქალაქო საზოგადოების ინსტიტუტის ფინასური მხარდაჭერით ახორციელებს", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

21 ივნისს, „სამართლიანმა არჩევნებმა" და საქართველოს ახალგაზრდა იურისტთა ასოციაციამ, შეხვედრები გამართეს ქუთაისში და გურჯაანში. შეხვედრებზე ადგილობრივი ხელისუფლების, პოლიტიკური პარტიების, საარჩევნო ადმინისტრაციის, არასამთავრობო ორგანიზაციებისა და მედიის წარმომადგენლებს სამი არასამთავრობო ორგანიზაციის - „სამართლიანი არჩევნების", საიას და საერთაშორისო გამჭვირვალობა-საქართველოს მიერ საარჩევნო გარემოს გაუმჯობესებისათვის შემუშავებული საკანონმდებლო რეკომენდაციები წარუდგინეს. სრულად... წყარო: ორგანიზაციის ვებგვერდი სოციალურ ქსელში

თბილისი. საკონსტიტუციო სასამართლოს გადაწყვეტილებით, პლაკატების, ლოზუნგების, ბანერების განთავსების აკრძალვის არსებული წესი კონსტიტუციურ უფლებებს არღვევს. ინფორმაციას ამის თაობაზე საქართველოს ახალგაზრდა იურისტთა ასოციაცია აქვეყნებს. საქმე, რომელთან დაკავშირებითაც საკონსტიტუციო სასამართლომ ასეთი გადაწყვეტილება მიიღო, ერთ-ერთია იმ 5 საქმიდან, რომელიც საია-მ ადმინისტრაციულ სამართალდარღვევათა კოდექსის არაკონსტიტუციური გამოყენების დასრულების მიზნით საკონსტიტუციო სასამართლოში წარადგინა. სრულად  წყარო: gyla.ge

თბილისი. 2 ივნისს, სამართლიანი არჩევნებისა და დემოკრატიის საერთაშორისო საზოგადოებამ, საქართველოს ახალგაზრდა იურისტთა ასოციაციასთან და „საერთაშორისო გამჭვირვალობა - საქართველოსთან" ერთად, საარჩევნო გარემოს გაუმჯობესებისათვის საკანონმდებლო რეკომენდაციები წარმოადგინა. რეკომენდაციების ორი პაკეტი მოიცავს საარჩევნო კოდექსსა და მოქალაქეთა პოლიტიკური გაერთიანებების შესახებ კანონში შესატან ცვლილებებს და მიზნად ისახავს ორგანიზაციების მიერ საარჩევნო პროცესზე დაკვირვების შედეგად და პრაქტიკაში გამოვლენილი ხარვეზების აღმოფხვრას. საარჩევნო პროცესებზე დამკვირვებელი სამი ორგანიზაციის რეკომენდაციები ეხება საარჩევნო ადმინისტრაციის დაკომპლექტების წესსა და კრიტერიუმებს, აგიტაციისა და ადმინისტრაციული რესურსის გამოყენების რეგულაციებს, საარჩევნო დავებს, ასევე, გადასატანი ყუთის სიას. სრულად  წყარო: www.isfed.ge

თბილისი. საქართველოს ახალგაზრდა იურისტთა ასოციაცია, „საერთაშორისო გამჭვირვალობა - საქართველო" და „სამართლიანი არჩევნებისა და დემოკრატიის საერთაშორისო საზოგადოება" ავრცელებენ ერთობლივ განცხადებას „საქართველოს საარჩევნო კოდექსში" შესატან ცვლილებებთან დაკავშირებით. „მიგვაჩნია, რომ პროექტით გათვალისწინებული გარკვეული ცვლილებები გააუმჯობესებს საარჩევნო ნორმებს”, - მიიჩნევ ეს ორგანიზაციები, - „ამასთან პროექტში წარმოდგენილი რიგი ცვლილებებისა არ შეესაბამება პროექტის განმარტებით ბარათში გაცხადებულ მიზანს და შესაძლოა უარყოფითად აისახოს საარჩევნო გარემოზე. მაგალითად ცვლილებები, რომლის თანახმად, პოლიტიკური პარტიების წარმომადგენლობებში ყოფნა წინასაარჩევნო აგიტაციად აღარ მიიჩნევა; ცვლილებები, რომლის მიღების შემთხვევაში იზრდება კანონდამრღვევ კომისიის წევრთა საარჩევნო ადმინისტრაციის სისტემაში დასაქმების პერსპექტივა და სხვა”. სრულად  წყარო: gyla.ge

თბილისი. საქართველოს ახალგაზრდა იურისტთა ასოციაციამ გამართა დისკუსია თემაზე - "2017 წლის საარჩევნო დავები − მიგნებები და გამოწვევები." დისკუსიაზე წარმოდგენილი იყო კვლევა − „საია-ს სტრატეგიული სამართალწარმოება და სხვა სუბიექტების (ადგილობრივი სადამკვირვებლო ორგანიზაციებისა და საარჩევნო სუბიექტების) მიერ წარმოებული საარჩევნო დავების დაკვირვება − 2017 წლის საარჩევნო დავების ანალიზი". კვლევა პროექტის − „საქართველოში კონკურენტული, სამართლიანი და ინკლუზიური საარჩევნო გარემოს ხელშეწყობა 2016-2018 საარჩევნო ციკლისთვის" ფარგლებში განხორციელდა და ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით მიმდინარეობს. სრულად  წყარო: ორგანიზაციის ვებგვერდი

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) აქვეყნებს ზუგდიდის თვითმმართველობის მაჟორიტარული შუალედური არჩევნების შეფასებას. „არჩევნების დღეს, „სამართლიანი არჩევნების" დამკვირვებლების მიერ მოწოდებული ინფორმაციით, უბნის გახსნის, ხმის მიცემისა და ხმების დათვლის პროცესი ძირითადად მშვიდ ვითარებაში, მნიშვნელოვანი დარღვევების გარეშე მიმდინარეობდა. საუბნო საარჩევნო კომისიის წევრები ახალი ტექნოლოგიების კუთხით შესაბამისად იყვნენ მომზადებულები. მიუხედავად ამისა, ამომრჩეველთა ნაწილს უჭირდა ახალი ტექნოლოგიის პროცედურებთან შეგუება და ადგილი ჰქონდა ცალკეულ ხარვეზებს", ნათქვამია ორგანიზაციის ვებგვერდზე. სრულად... წყარო: www.isfed.ge

სამეგრელო. 13 მაისს, საქართველოს ახალგაზრდა იურისტთა ასოციაცია ზუგდიდის საკრებულოს შუალედურ არჩევნებს დააკვირდა.  „არჩევნები სულ სამ საარჩევნო უბანზე, ცაიშის თემის ადგილობრივ მაჟორიტარულ საარჩევნო ოლქში გაიმართა. უნდა აღინიშნოს, რომ არჩევნები მშვიდ ვითარებაში წარიმართა და  ამომრჩეველს არჩევანის თავისუფლად გაკეთების შესაძლებლობა ჰქონდა. კენჭისყრის დღეს საიას დამკვირვებლებმა სულ 6 საჩივარი წარადგინეს საარჩევნო ადმინისტრაციაში, რაც „ერთიანი ნაციონალური მოძრაობის" კომისიის წევრების მიერ კომისიის წევრის მოვალეობის შესრულებაზე უარის თქმას უკავშირდებოდა", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია 2018 წლის 28 აპრილს ვანსა და ხონში მაჟორიტარული სისტემით გასამართ საქართველოს პარლამენტის შუალედური არჩევნების დაკვირვების შედეგებს აქვეყნებს. „კენჭისყრის პროცესი ძირითადად მშვიდ ვითარებაში წარიმართა, ადგილი არ ჰქონია ძალადობის შემთხვევებს. ინციდენტს ჰქონდა ადგილი ხონის #5 საარჩევნო უბანთან, როდესაც ერთმანეთს „ევროპული საქართველოსა" და „ქართული ოცნების" მხარდამჭერები დაუპირისპირდნენ. მნიშვნელოვანი დარღვევებით წარიმართა გადასატანი ყუთის სიაში ამომრჩევლების შეყვანის პროცესი. ვანის #53 საოლქო საარჩევნო კომისიის მიერ 2018 წლის 26 აპრილს მიღებული გადაწყვეტილებით, ვანის #53 საარჩევნო ოლქში შემავალ 31 საარჩევნო უბნიდან 25 საარჩევნო უბანზე გადასატანი ყუთის სიებში დამატებით შეიყვანეს დაახლოებით 300 ამომრჩეველი, რამაც საარჩევნო კანონმდებლობით 3%-იანი ზღვარის გადამეტება განაპირობა. 31 საარჩევნო უბნიდან 25 საარჩევნო უბანზე გადასატანი ყუთის სიებში ამომრჩევლების დამატებით შეყვანა გამონაკლისს აღარ წარმოადგენდა, რაც ბადებს ეჭვს გადასატანი ყუთის მეშვეობით ამომრჩეველთა ხმების მობილიზების შესახებ. აღნიშნულმა შემთხვევებმა დღის წესრიგში დააყენა საკანონმდებლო ცვლილებების აუცილებლობა", - ვკითხულობთ დოკუმენტში. სრულად  წყარო: ორგანიზაციის ვებგვერდი