თბილისი. 29 მაისს, უსინათლო და მცირემხედველ ბავშვთა სკოლაში ახალი პროექტის პრეზენტაცია გაიმართა. ბავშვთა და ახალგაზრდობის განვითარების ფონდის მხარდაჭერით საქართველოს უსინათლო ქალთა და ბავშვთა ასოციაციამ ბრაილის შრიფტით გამოსცა სასულიერო ლიტერატურა და სკოლის აღსაზრდელებს უსასყიდლოდ გადასცა. გამოცემული ლიტერატურით ამ ეტაპზე ისარგებლებს 100-ზე მეტი უსინათლო ახალგაზრდა. სულ დაიბეჭდა 63 000 ბრაილის გვერდი. წყარო: ორგანიზაციის გვერდი სოციალურ ქსელში

აჭარა. 30 მაისს, ამერიკული უნივერსიტეტების ყოველწლიური რეგიონალური ფესტივალი გაიმართება ბათუმში. ღონისძიებაზე აშშ-ის მთავრობის გაცვლითი პროგრამების პრეზენტაციები გაიმართება, ასევე გასაუბრება პროგრამების კურსდამთავრებულებთან და ა.შ. სრულად ღონისძიების შესახებ წყარო: Education USA Georgia

იმერეთი. ქუთაისში დემოკრატიის სკოლის პრეზენტაცია გაიმართა. დემოკრატიის სკოლა არის ნიმდის (ნიდერლანდების ინსტიტუტი მრავალპარტიული დემოკრატიისათვის) სამხრეთ კავკასიის წარმომადგენლობის საგანმანათლებლო პროგრამა. იგი საქართველოს 4 ქალაქში ხორციელდება (თელავი, ქუთაისი, გორი, ბათუმი) და ითვალისწინებს 5 თვიან სასწავლო კურსს და განკუთვნილია მედიის, პოლიტიკური პარტიების, ადგილობრივი თვითმმართველობის, არასამთავრობო სექტორის, აკადემიური წრეების წარმომადგენლების, წარმატებული სტუდენტების და თანამედროვე დემოკრატიის საკითხებით დაინტერესებული აქტიური მოქალაქეებისათვის. დემოკრატიის სკოლა 4 საგანმანათლებლო მოდულს მოიცავს, რომელიც დემოკრატიული პოლიტიკის საკვანძო საკითხებს უკავშირდება. სკოლაში სწავლა 5 თვის განმავლობაში გრძელდება.  ქუთაისში დემოკრატიის სკოლაში მიღება წელსაც გრძელდება.

თბილისი. ლიბერალიზმის სასწავლო ცენტრში ლევან ბერძენიშვილმა ლექცია - „რას ამბობს ახალს სოფოკლე?" - წაიკითხა. მათთვის, ვინც ვერ შეძლო ლექციაზე დასწრება, ცენტრი ვიდეო ჩანაწერს აქვეყნებს. ლექცია წყარო: ორგანიზაციის გვერდი სოციალურ ქსელში

კახეთი. 24 მაისს სიღნაღის მუნიციპალიტეტის სოფლებში მცხოვრებ ახალგაზრდებთან შეხვედრა შედგა თემაზე - საქართველოს და ევროკავშირის ურთიერთობები და პერსეპექტივები. შეხვედრის მონაწილე ახალგაზრდებს გააცნეს ინფორმაცია ევროკავშირის ისტორიისა და ინსტიტუების, საქართველო და ევროკავშირი ურთიერთობების და პერსპექტივების შესახებ. რის შემდეგაც შეხვედრა კითხვა–პასუხის რეჟიმში გაგრძელდა. დღის მეორე ნახევარში მონაწილე ახალგაზრდებმა იმუშავეს ჯგუფებში და ფონდი „ღია საზოგადოება საქართველოს" პუბლიკაციის „10 მითი საქართველო-ევროკავშირის ასოცირების შეთანხმების შესახებ" დახმარებით მოამზადეს პრეზენტაციები პულიკაციაში გამოყენებული ინფორმაციის შესახებ. შეხვედრის დასასრულს გადაწყდა რომ მსგავსი ფომატის შეხვედრები სიღნაღის მუნციპალიტეტის სხვა სოფლის ახალგაზრდებითვისაც მომზადდება და გაიმართება. წყარო: ორგანიზაცია „სამოქალაქო ინიციატივის" ვებგვერდი სოციალურ ქსელში

თბილისი. საქართველოს სახალხო დამცველმა, ახმეტის მუნიციპალიტეტის სოფელ ძიბახევში დაწყებითი სკოლის ფუნქციონირებისათვის საჭირო სამართლებრივი და ფინანსური რესურსებით დახმარების მოთხოვნის რეკომენდაციით მიმართა საქართველოს განათლებისა და მეცნიერების მინისტრს.  „ახმეტის მუნიციპალიტეტის სოფელ ძიბახევში ადგილობრივი მოსახლეობის ინიციატივით მოქმედი დაწყებითი კლასები ავარიულ, ფიცრულ შენობაში მდებარეობს. ნაგებობას აქვს ნაპრალები, ოთახებს ვერც ღუმელი ათბობს და ზამთარში დაწყებითი კლასების 9 მოსწავლე არც დადის სკოლაში. უახლოესი საჯარო სკოლა 2 კილომეტრით დაშორებულ სოფელ ბირკიანში მდებარეობს, მაგრამ  მოუგვარებელი სატრანსპორტო პრობლემების გამო, მშობლებს იქ შვილების გაშვება არ სურთ", ნათვამია სახალხო დამცველის ვებ-გვერდზე. სახალხო დამცველი აუცილებლად მიიჩნევს, სოფლად და უმცირესობებით დასახლებულ ტერიტორიებზე განათლების ხელმისაწვდომობისა და ხარისხის გაუმჯობესების მიზნით საგანმანათლებლო სექტორის ბიუჯეტის გაზრდას. შესაბამისად, უნდა მოხდეს სამართლებრივი და ფინანსური რესურსების გამონახვა, რათა, მოცემულ შემთხვევაში სოფელ ძიბახევში დაწყებითი კლასების სასწავლო პროცესის ფუნქციონირებისათვის გამოიყოს უსაფრთხო და  ადეკვატური შენობა. წყარო: ombudsman.ge

კახეთი. არასამთავრობო ორგანიზაციაის „სამოქალაქო განვითარების, განათლებისა და დასაქმების ცენტრის" ინიციატივითა თესაუში შეხვედრა გაიმართა. შეხვედრას ესწრებოდნენ საჯარო სკოლების სამოქალაქო კლუბისა და საინიციატივო ჯგუფების წარმომადგენლები. რომლის მიზანიც იყო თელავის სახელმწიფო უნივერსიტეტის საქმიანობის გაცნობა. თელავის სახელმწიფო უნივერსიტეტის საზოგადოებასთან ურთიერთობის სამსახურის ხელმძღველი ნელი ცქიტიშვილი: „მომავალ სტუდენტებს გავაცანით თესაუს ფაკულტეტები, ინფრასტრუქტურა, კომპიუტერული და სასწავლო ცენტრები, ლაბორატორიები; ვესაუბრეთ საერთაშორისო გაცვლითი პროგრამების, სამეცნიერო კონფერენციების და სტუდენტური სტიპენდიის შესახებ. მინდა აღვნიშნო, რომ სახელმწიფო დაფინანსებაში წელს თესაუს ოთხი სპეციალობა მოხვდა: ისტორია, ქართული ენა და ლიტერატურა, ბიოლოგია და დაწყებითი განათლება."

კახეთი. კახეთის სამოქლაქო ლიგამ თელავში გამართა შეხვედრა-დისკუსია თემაზე - „კონკრეტული შეთავაზებები ახალი თვითმმართველი ერთეულებისთვის საბავშვო ბაღებთან დაკავშირებით". შეხვერდას ესწრებოდნენ საბავშვო ბაღების აღსაზრდელთა მშობლები, ბაღების ხელმძღვანელები, არასამთავრობო ორგანიზაციების და ადგილობრივი თვითმმართველობის წარმომადგენლები. პროექტი დაფინანსებულია აღმოსავლეთ-დასავლეთის მართვის ინსტიტუტის (EWMI) პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

აჭარა. 17 მაისს, არასამთავრობო ორგანიზაცია „ბორჯღალის" პროექტის - „დემოკრატიის მთხრობელთა სკოლა" - პირველი ეტაპი ოფიციალურად დასრულდა. პროექტის 30-მა ბენეფიციარმა აღნიშნულ სკოლაში სწავლის დამადასტურებელი სერთიფიკატები მიიღეს. დემოკრატიის მთხრობელთა სკოლის პირველი ეტაპის მოსწავლეები სხვადასხვა ასაკისა და პროფესიის ახალგაზრდები იყვნენ, თუმცა პროექტის ორგანიზატორების ცნობით, მომდევნო ეტაპისთვის შერჩეული აპლიკანტების უმრავლესობა სკოლის დამამთავრებელი კლასის მოსწავლეები და სტუდენტები იქნებიან. პროექტის მეორე ეტაპი 22 მაისიდან დაიწყება და 30 მონაწილე ერთი თვის განმავლობაში დემოკრატიის შესახებ მოწვეული ექსეპერტებისა და საზოგადო მოღვაწეებისგან დემოკრატიულ ღირებულებებზე სემინარებს მოისმენენ.

თბილისი. 14-16 მაისს, პროექტის ახალგაზრდული ცენტრის 16 წევრისათვის „ეფექტური ფასილიტაციის" 3-დღიანი ტრენინგი ჩატარდა. შეხვედრას უძღვებოდნენ ორგანიზაცია „პარტნიორები საქართველოს" ტრენერები. ტრენინგს წინ უძღოდა ფასილიტატორების მიერ ჩატარებული შეხვედრები თანატოლებთან, მშობლებთან და ადგილობრივ თვითმმართველობების წარმომადგენლებთან. ტრენინგის ფარგლებში, მონაწილეებმა ჩატარებული შეხვედრების შესახებ პრეზენტაციები წარმოადგინეს - თუ რა ტიპის ფასილიტაცია გამართეს თავინთ ქალაქებში, რა სირთულეებს მოიცავდა შეხვედრების დაგეგმვისა და ფასილიტაციის პროცესი, რა იდეები და შემოთავაზებები მიიღეს, რა შეიძლება გაკეთდეს შემდგომში ფასილიტაციის პროცესის ეფექტურად წარმართვისათვის. წყარო: ორგანიზაციის გვერდი სოციალურ ქსელში

კახეთი. თელავის დემოკრატიის სკოლაში განაცხადების მიღება დაიწყო. სკოლის სატრენინგო პროგრამა 4 ძირითად მოდულს ფარავს: დემოკრატიის ძირითადი პრინციპები, კომუნიკაცია, პროფესიული წერა, საჯარო დებატები, ინტერნეტი. ნიკა შარვაშიძე, ნიმდის წარმოამდგენელი: ,,ნიმდის დემოკრატიის სკოლები წარმოადგენს ინტენსიურ საგანანათლებლო პროგრამას, რომელიც განკუთვნილია ადგილობრივი თვიმმართველობის, არასამთავრობო სექტორის, მედიის, პოლიტიკური პარტიების, აკადემიური წრეების წარმომადგენლების, წარმატებული სტუდენტების და თანამედროვე დემოკრატიის საკითხებით დაინტერესებული აქტიური მოქალაქეებისთვის. პროგრამის კურსდამთავრებულები ასევე მონაწილეობას მიიღებენ ნიმდის მცირე გრანტების კონკურსში, ერთობლივ კონფერენციებში და სხვა ღონისძიებებში".

თბილისი. ამერიკულმა არასამთავრობო ორგანიზაციამ FAF (Friendship Ambassadors Foundation) ქართულ არასამთავრობო ორგანიზაციებთან „მრავალეროვანი საქართველო დემოკრატიული ღირებულებების განმტკიცებისათვის", „საქართველოს დიპლომატიისა და პოლიტიკის აკადემია" და „საქართველოს ახალგაზრდულ პარლამენთთან" ურთიერთთანამშრომლობის მემორანდუმი გააფორმა. მემორანდუმის ფარგლებში ამერიკული ორგანიზაცია FAF ქართულ ორგანიზაციებს ანიჭებს ექსკლუზიურ წარმომადგენლობით უფლებას პროექტის „ახალგაზრდული ასამბლეა გაეროში, ნიუ-იორკი" ფარგლებში. პროექტი მოიცავს სესიებზე დასწრებას, მრგვალი მაგიდის დისკუსიებს, ვორკშოფებს გაეროს შტაბბინაში ნიუ-იორკში, ასევე სარეზოლუციო საგრანტო პროექტზე მუშაობას. სრულად წყარო: ახალგაზრდული პარლამენტის ვებგვერდი სოციალურ ქსელში

თბილისი. კოალიციამ „დამოუკიდებელი ცხოვრებისათვის" გამართა საინფორმაციო-საგანმანათლებლო სემინარი თავისუფალი უნივერსიტეტის სტუდენტებთან. შეხვედრის თემა იყო „სტუდენტების როლი და ინიციატივები შშმ პირთა უფლებების დაცვისთვის თანაბარი არჩევნების უზრუნველყოფისთვის". სემინარზე მოეწყო საარჩევნო სიმულაციები. შეხვედრა შედგა IFES-ის მიერ დაფინანსებული პროექტის ფარგლებში და ცესკოს ხელშეწყობით, წყარო:ორგანიზაციის გვერდი სოციალურ ქსელში

თბილისი. არასამთავრობო ორგანიზაცია „საზოგადოება და ბანკებმა" ეკონომიკური მედია სკოლა გახსნა. პროექტი საერთაშორისო ორგანიზაცია „ჯუნიორ ეჩივმენთთან" ერთად ხორციელდება. მედია სკოლის მიზანია ჟურნალისტებისთვის ფინანსური განათლების ამაღლება. სკოლის პირველი ნაკადი 20 ჟურნალისტისგან შედგება, რომლებიც საქართველოში მოქმედ 18 მედია საშუალებას წარმოადგენენ. ჟურნალისტები ეკონომიკის საფუძვლებს სპეციალური კურსისა და სახელმძღვანელოების მიხედვით შეისწავლიან. ტრენინგებს „ჯუნიორ ეჩივმენთის" ტრენერები და მოწვეული ლექტორები ჩაატარებენ. სასწავლო კურსი, რომელიც 3 თვის განმავლობაში გაგრძელდება, უფასოა და მისი დასრულების შემდეგ, წარმატებულ კურსდამთავრებულებს სერტიფიკატები გადაეცემათ. წყარო:ორგანიზაციის გვერდი სოციალურ ქსელში

შიდა ქართლი. 11 მაისს „წიგნის მეგობრების" საორგანიზაციო ჯგუფის მონაწილეებმა პროექტი „მოსიარულე წიგნების" ფარგლებში გასვლითი ღონისძიება მოაწყვეს. რუსთავისა და თბილისის საჯარო სკოლების მოსწავლეების მიერ შეგროვებული 200-მდე წიგნი ქარელის რაიონის სოფელ საციხურის საჯარო სკოლის ბიბლიოთეკას გადაეცა. ღონისძიების დასრულების შემდეგ, „წიგნის მეგობრების" მონაწილეობით მდინარე ფრონეს პირას მოეწყო პოეზიის საღამო და პიკნიკი. „წიგნის მეგობრების" გუნდი განაგრძობს საქართველოს სხვადასხვა კუთხის სტუმრობას წიგნებითა და ღონისძიებებით. წყარო:ორგანიზაციის გვერდი სოციალურ ქსელში

აჭარა. 7 მაისს, ბათუმის 25-ე საჯარო სკოლაში, ახალგაზრდულმა ორგანიზაციამ „ცვლილებები თანაბარი უფლებებისათვის" საინფორმაციო შეხვედრა გამართა. 4-10 მაისს მსოფლიოს 100-მდე ქვეყანაში ტარდება საერთაშორისო კვირეული, რომლის მიზანია ინკლუზიური განათლების შესახებ ინფორმაციის გავრცელება, ცნობიერების ამაღლება და ყურადღების გამახვილება იმ გამოწვევებზე, რომელთა წინაშეც შეზღუდული შესაძლებლობის მქონე ბავშვები დგანან განათლების უფლების რეალიზებისას. საქართველოში კვირეულის ორგანიზატორია საზოგადოებრივი ორგანიზაციების კოალიცია „განათლება ყველასათვის - საქართველო".

თბილისი. განათლების საერთაშორისო ცენტრმა 7 მაისიდან დაიწყო საზღვარგარეთ სამაგისტრო და სადოქტორო პროგრამებზე დაფინანსების მსურველთათვის რეგისტრაცია. სრულად წყარო: ცენტრის ვებგვერდი სოციალურ ქსელში

კახეთი. ქალთა საინფორმაციო ცენტრი პროექტის „თემთა მობილიზება საგანმანათლებლო, კულტურული და სპორტული ღონისძიებების გზით ქალთა წინააღმდეგ მიმართული ძალადობის პრევენციისა და აღმოფხვრისათვის” ფარგლებში ტრენინგებს ატარებს. ტრენინგების სამიზნე ჯგუფს ამჯერად პოლიციელები, მასწავლებლები, ამბულატორიისა და სოციალური მომსახურების სააგენტოს თანამშრომლები, უხუცეს ქალთა და კაცთა საბჭოს წევრები წარმოადგენენ. ტრენინგის თემაა ოჯახში ძალადობა, მასთან დაკავშირებული კანონმდებლობა და ინსტიტუციური მექანიზმი, გენდერული თანასწორობა, სტერეოტიპები, გენდერული ძალადობა. ტრენინგი მიზნად ისახავს, აამაღლოს იმ ადამიანთა ცნობიერება, რომლებიც საზოგადოებრივი აზრის ფორმირებაში აქტიურ მონაწილეობას იღებენ. პროექტი ხორციელდება ქალთა საინფორმაციო ცენტრის მიერ ევროკავშირის დაფინანსებით, კახეთის რეგიონული განვითარების ფონდთან პარტნიორობით. პროექტის მიზანია პანკისის ხეობის მოსახლეობის, ეთნიკური და რელიგიური უმცირესობების და ლტოლვილების ცნობიერების ამაღლება ქალთა წინააღმდეგ მიმართულ ძალადობასთან დაკავშირებული პრობლემატიკის შესახებ.

სამცხე–ჯავახეთი. ადგილობრივი ხელისუფლების ანგარიშვალდებულებისა და გამჭვირვალობის გაზრდა, ადვოკატირება და მონიტორინგი - ამ საკითხებზე საქართველოს შეფასების ასოციაციამ, ახალციხეში, ეთნიკური უმცირესობებისთვის ტრენინგი გამართა. ტრენინგები პროექტის - „ეთნიკური უმცირესობების წარმომადგენლების უფლებებისა და შესაძლებლობების გაფართოება ადგილობრივი თვითმმართველობების მიერ გადაწყვეტილებების მიღებისა და მონიტორინგის პროცესში ჩართვის მიზნით" - ფარგლებში საქართველოს ოთხ ქალაქში ახალციხეში, ახალქალაქში, გარდაბანსა და ბოლნისში იმართება. ტრენინგების თემატიკა კვლევის შედეგების შესაბამისად შეირჩა და მისი მიზანი მოსახლეობის ცნობიერების ამაღლება, მის მიერ არჩევნებში გადამწყვეტი როლის გაცნობიერება და თვითმმართველობის საქმიანობაში ჩართვაა.

სამცხე–ჯავახეთი. ასოციაცია ტოლერანტთან არსებულმა სასწავლო–პროფესიულმა ცენტრმა ,,პროფესიონალმა" საკურორტო და ტურისტული პოტენციალის განვითარების მიზნით გიდები გადაამზადა. გიდების გადამზადება გაეროს განვითარების პროგრამის - „მდგრადი განვითარება და გარემოს მიმართ პასუხისმგებლობა" - ფარგლებში მოხდა. აღნიშნული პროექტის ფარგლებში წაღვერში ტურისტული ცენტრიც გაიხსნა. გიდებმა ხუთკვირიანი სასწავლო კურსი შემდეგ საკითხებზე გაიარეს:. ტურიზმის ტერმინების დეფინიცია, მომხმარებელთა უფლებების დაცვა, მოგზაურობა და კულტურული შოკი, მარშრუტის დამუშავება, სამგზავრო ინფორმაციის ტექსტი და მისი მომზადება, სამახსოვრო ტექსტების მომზადება, სტუმართმოყვარეობის მენეჯმენტის შემადგენელი ელემენტები, მოქცევის ეტიკეტი, დიალოგი ტურისტთან და სხვ. პროექტის ფინანსური მხარდამჭერი ფინეთის მთავრობაა.

თბილისი. სოციალურ ქსელში საქართველოში აშშ–ს საელჩოს ვებგვერდის ინფორმაციით აშშ–ში სწავლის მსურველებს საშუალება ეძლევათ მიიღონ ინფორმაცია 100–ზე მეტი უნივერსიტეტის შესახებ. დარეგისტრირდით, ვებინარები გაიმართება 7 მაისს. სრულად წყარო: აშშ–ს საელჩოს ვებგვერდი სოციალურ ქსელში

თბილისი. არასამთავრობო ორგანიზაცია „ახალგაზრდა ადვოკატები" საქართველოს მთავრობას რეკომენდაციით მიმართავს. ისინი ინიციატივით გამოდიან, ხელისუფლება დაიწყოს მუშაობა რეგიონში მცხოვრები წარჩინებული ახალგაზრდების სწავლის დაფინანსებისა და შემდგომი დასაქმების ახლებური რეგულაციების დანერგვისათვის. ორგანიზაცია „ახალგაზრდა ადვოკატები" საკითხით დაინტერესების შემთხვევაში, შესაბამისი ცვლილებებისა და დეტალური რეგულაციების პროცესებში ჩართულობისა და მონაწილეობის მზადყოფნას გამოთქვას მთავრობისა და ადგილობრივი ხელისუფლების შესაბამის სტრუქტურებთან ერთად. სრულად წყარო: barristers.ge