თბილისი. 21 თებერვალს, „ახალგაზრდა ადვოკატები", საქართველოს საკონსტიტუციო სასამართლოს თავმჯდომარე გიორგი პაპუაშვილთან სადაო ქონებაზე მედია-ფორუმს გამართავს. „ყველა ტელევიზიის, გაზეთის, რადიოს, ახალი ამბების სააგენტოს თუ სოციალური მედიის წარმომადგენელს, საშუალება ექნება მონაწილეობა მიიღოს შეხვედრაში და რეზონანსული საქმის ირგვლივ, მიიღოს ახალი და ამომწურავი ინფორმაცია", ნათქვამია ორგანიზაციის განცხადებაში. სრულად... წყარო: barristers.ge

  თბილისი. 16 თებერვალს, საქართველოს პარლამენტის იურიდიულ საკითხთა კომიტეტმა „ახალგაზრდა ადვოკატების" საკანონმდებლო წინადადება განიხილა. „ახალგაზრდა ადვოკატების" შეფასებით, კანონპროექტის მიღების შედეგად, დადგენილი 5 წლიანი ხანდაზმულობის ვადა გაიზრდება 15 წლის ვადით. შესაბამისად, ადამიანებს, რომლებსაც უკანონდ ჩამოართვეს ქონებები, საშუალება ექნებათ მიმართონ სასამართლოს და იბრძოლოდ საკუთარი დარღვეული უფლებების აღდგენის მიზნით. ვადის გაზრდა წინგადადგმული ნაბიჯი იქნება კანონიერების და სამართლიანობის დადგენის მხრივ...", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. საერთაშორისო გამჭვირვალობა საქართველო აქვეყნებს ბლოგპოსტს: „სასამართლომ გაზონების ბიზნესზე 2013 წლიდან დადგენილი აკრძალვა კანონშეუსაბამოდ ცნო". „სასამართლომ გაიზიარა წარდგენილი ექსპერტიზის დასკვნა, რომლის მიხედვით დადგინდა, რომ გაზონის წარმოების შედეგად ნიადაგის ნაყოფიერება არ დაზიანებულა და ის აღდგენას არ საჭიროებს. შედეგად, სასამართლომ დაასკვნა, რომ საქმიანობა, რომლის განხორციელებითაც არ დგება ზიანი, არ უნდა ითვლებოდეს კანონმდებლობით აკრძალულ ქმედებად, ხოლო ამ საქმიანობის განმახორციელებელი პირი სამართალდამრღვევად", ნათქვამი ორგანიზაციის ვებ-გვერდზე. სრულად... წყარო: www.transparency.ge

 თბილისი. არასამთავრობო ორგანიზაციები მოსამართლეთა საკვალიფიკაციო გამოცდის ტესტების შესაძლო გამჟღავნებასთან დაკავშირებით გამოძიების დაწყებას ითხოვს. „გამოვხატავთ შეშფოთებას მოსამართლეთა საკვალიფიკაციო გამოცდებზე თბილისის საქალაქო სასამართლოს თავმჯდომარის მიერ საჯაროდ გავრცელებულ ინფორმაციასთან დაკავშირებით. საკითხი ეხებოდა მოსამართლეთა საკვალიფიკაციო გამოცდის ტესტურ ნაწილში ერთ-ერთი კანდიდატის მიერ მიღებულ უმაღლეს შეფასებას და იმავე გამოცდაში მონაწილე, სხვა პირის მიერ წერილობით გამოცდაში გაცემული პასუხის პრაქტიკულად სიტყვა-სიტყვით იდენტურობას კაზუსის ავტორის მიერ წინასწარ მომზადებულ პასუხის ფრაზებსა და აზრის მიმდევრობასთან. მოვუწოდებთ საქართველოს მთავარ პროკურორს, რომ დაუყოვნებლივ დაიწყოს გამოძიება მოსამართლეთა საკვალიფიკაციო გამოცდის ტესტების შესაძლო გამჟღავნების ფაქტთან და იუსტიციის უმაღლესი საბჭოს წევრების სავარაუდო დანაშაულის ჩადენის ფაქტთან დაკავშირებით", ნათქვამია ერთობლივ განცხადებაში. სრულად... წყარო: gyla.ge

ქვემო ქართლი. 10 თებერვალს, საქართველოს ახალგაზრდა იურისტთა ასოციაციის იურიდიული განათლების ხელშეწყობის ფონდის წარმომადგენელი ქ.რუსთავის ივ.ჯავახიშვილის სახელობის #24-ე ქართული გიმნაზიის მე-9 მე-10 კლასის მოსწავლეებს შეხვდა. „ლექციის თემა იყო „სამართალი სახელმწიფო და ადამიანის ძირითადი უფლებები". სკოლის მოსწავლეებმა განიხილეს ადამიანის უფლებათა ევროპული სასამართლოს რამდენიმე გადაწყვეტილება. შეხვედრა ინტერაქტიული ხასიათის იყო და ფონდის წარმომადგენელმა მოსწავლეების კითხვებს უპასუხა", ნათქვამია ორგანიზაციის ვებ-გვერდზე. სრულად... წყარო: www.legaleducation.ge

თბილისი. კოალიციამ „დამოუკიდებელი და გამჭვირვალე მართლმსაჯულებისათვის" დისციპლინური საჩივრით მიმართა საქართველოს იუსტიციის უმაღლეს საბჭოს ქუთაისის საქალაქო სასამართლოს მოსამართლეებისა, ასევე სხვა სასამართლოების ცალკეული მოსამართლეების წინააღმდეგ. „კოალიცია მიიჩნევს, რომ ქუთაისის საქალაქო სასამართლოს საჯარო განცხადება მამუკა ახვლედიანთან დაკავშირებით, ასევე ცალკეული მოსამართლეების მიერ შიდა ქსელში გამოხატული არაეთიკური და შეურაცხმყოფელი კომენტარები არღვევს სამოსამართლო ეთიკის წესებს, ასევე წარმოადგენს მოსამართლისათვის შეუფერებელ ქმედებას, რომელიც ბღალავს სასამართლოს ავტორიტეტს ან ზიანს აყენებს სასამართლოსადმი ნდობას, რასაც მოქმედი კანონმდებლობა დისციპლინურ გადაცდომად მიიჩნევს", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაციამ და ადგილობრივი დემოკრატიის სააგენტო საზოგადოებას წარუდგინა კვლევა - „იმუნიტეტი, როგორც ხელშეუხებლობის გარანტი". „საქართველოს კანონმდებლობაში გასატარებელია შესაბამისი საკანონმდებლო ცვლილებები ადგილობრივი თვითმმართველობის საყოველთაო, თანასწორი და პირდაპირი საარჩევნო უფლების საფუძველზე, ფარული კენჭისყრით არჩეული პირებისათვის დაცვის შესაბამისი გარანტიების შესაქმნელად, რამაც იმავდროულად, ხელი არ უნდა შეუშალოს ეფექტური სისხლისსამართლებრივი დევნისა და მართლმსაჯულების ინტერესებს", ნათქვამია ორგანიზაციის კვლევაში. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია აქვეყნებს ბლოგპოსტს დეკემბერ-იანვრის წარმატებული საქმეების შესახებ. „საია-ს ქუთაისის ფილიალი სასამართლოში იცავდა ხონის მუნიციპალიტეტის საკრებულოს ყოფილი თავმჯომარის ინტერესებს, რომელსაც ბრალი ედებოდა სამსახურებრივი უფლებამოსილების ბოროტად გამოყენებაში. საქართველოს უზენაესი სასამართლოს განაჩენით ის ცნობილი იქნა უდანაშაულოდ. საიას დახმარებით გ.გ.-მ მიმართა თბილისის საქალაქო სასამართლოს და მოითხოვა სისხლის სამართლის პასუხისგებაში უკანონოდ მიცემის გამო მიყენებული ზიანის ანაზღაურება. სასამართლოს გადაწყვეტილებით, გ.გ. ზიანის ანაზღაურების სახით მიიღებს 6 324 ლარს," ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ომბუდსმენი ეხმიანება საინფორმაციო საშუალებებით გავრცელებულ ინფორმაციას, სავარაუდოდ ეთნიკური ნიშნით, სამართალდამცავი ორგანოების მხრიდან გ.გ–სა და ა.წ–ს მიმართ შესაძლო ძალადობის ფაქტთან დაკავშირებით. „საქართველოს სახალხო დამცველი შეახსენებს სამართალდამცავი ორგანოების წარმომადგენლებს, რომ სახელმწიფომ ცალსახად გამოხატა პოლიტიკა სიძულვილით მოტივირებული დანაშაულის მიმართ, როდესაც გაამკაცრა პასუხისმგებლობა და შემოიღო სპეციალური დეფინიცია. შესაბამისად, თუკი ამ დანაშაულის ჩამდენი სამართალდამცავი სისტემის წარმომადგენელია, სახელმწიფოს ეკისრება პასუხისმგებლობა დაუმტკიცოს საზოგადოებას, რომ მისი ეს პოლიტიკა მხოლოდ ფურცელზე დეკლარირებული არ არის. გამოიყენოს კანონი მთელი სიმკაცრით და არ დატოვოს შერჩევითი მართლმსაჯულების თუნდაც მცირედი ეჭვი", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. ადამიანის უფლებათა ევროპული სასამართლოს გადაწყვეტილებით დაკმაყოფილდა საქართველოს ახალგაზრდა იურისტთა ასოციაციის საჩივარი "ნ.წ და სხვები საქართველოს წინააღმდეგ”. „ევროპული სასამართლო გადაწყვეტილებაში ცალსახად მიუთითებს, რომ საქართველოში მოქმედი კანონმდებლობა ბავშვის უფლებასთან მიმართებით- ჰყავდეს კანონიერი წარმომადგენელი, რომელიც არსებითად დაიცავს მის ინტერესებს- ხარვეზიანია და არ შეესაბამება არსებულ საერთაშორისო სტანდარტებს", ნათქვამია ორგანიზაციის განცხადებაში. სრულად... წყარო: gyla.ge

თბილისი. ოჯახში ძალადობისგან დაცვის ქსელი აქვეყნებს პუბლიკაციას: „არა ძალადობას". „ოჯახში ძალადობის წინააღმდეგ არსებულ კანონებში ცვლილებები „ძალადობისგან დაცვის ეროვნულმა ქსელმა" მოამზადა და პარლამენტმა ის მეორე მოსმენით უკვე მიიღო. ინიციატივის მიხედვით ცვლილებები ეხება „ადგილობრივი თვითმმართველობის კოდექსსა" და საქართველოს კანონს „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ", ნათქვამია ორგანიზაციის ვებ-გვერდზე. სრულად... წყარო: avng.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის ეხმიანება საქართველოს მოსამართლეთა რიგგარეშე კონფერენციის დანიშვნას. „მოვუწოდებთ საქართველოს მოსამართლეთა XVI რიგგარეშე კონფერენციას, რომელიც ა.წ. 1 თებერვალს იმართება, წინა კონფერენციისაგან განსხვავებით, ეფექტურად გამოიყენოს ეს შესაძლებლობა და კონფერენციის დღის წესრიგის მეორე საკითხზე გამართოს მხოლოდ საქმიანი, შედეგებზე ორიენტირებული დისკუსია სასამართლო სისტემაში რეალური რეფორმის გატარების აუცილებლობაზე, კონკრეტულად: დისციპლინური სამართალწარმოების სისტემის ცვლილებაზე, საქმეთა ელექტონული განაწილების წესის დროულად ამოქმედებაზე და მოსამართლეთა შერჩევა-დანიშვნის წესის ცვლილების საკითხზე", ნათქვამია კოალიციის განცხადებაში. სრულად... წყარო: gyla.ge

თბილისი. 1 თებერვალს საქართველოს საკონსტიტუციო სასამართლოში მეორე განმწესრიგებელი სხდომა იმართება საქმეზე სახარების რწმენის ეკლესია საქართველოს მთავრობის წინააღმდეგ. სასამართლოს წინაშე ეკლესიის ინტერესებს ადამიანის უფლებების სწავლებისა და მონიტორინგის ცენტრი (EMC) წარმოადგენს. „განსახილველ საქმეზე საკონსტიტუციო სასამართლო დეტალურად სწავლობს საბჭოთა პერიოდში სახარების რწმენის ეკლესიის, იგივე ორმოცდაათიანელთა ეკლესიის, რეპრესირებისა და მისთვის მიყენებული მატერიალური და მორალური ზიანის ისტორიას. ასევე, მოქმედი ეკლესიის ისტორიულ და დოქტრინალურ კავშირს საბჭოთა პერიოდში მოღვაწე ორმოცდაათიანელთა ეკლესიასთან. დევნის ისტორიისა და მემკვიდრეობის საკითხების დადასტურების მიზნით მოსარჩელე მხარე განმწესრიგებელ სხდომაზე დამატებით მტკიცებულებებს წარადგენს", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრმა (EMC) 21 თბილისის სააპელაციო სასამართლოში 17 მაისის საქმესთან დაკავშირებით სასამართლო მეგობრის მოსაზრება (Amicus Curiae) წარადგინა. „სასამართლო მეგობრის მოსაზრება ხაზს უსვამს სახელმწიფოს ვალდებულებას სამართლიანი, ობიექტური და დასაბუთებული შეფასება მისცეს ბრალდებულთა მიერ განხორციელებულ ქმედებას, გამოკვეთოს შესაძლო დისკრიმინაციული მოტივი და საქმეზე ობიექტური გადაწყვეტილება მიიღოს. მნიშვნელოვანია, რომ სასამართლომ გაიაზროს აღნიშნული საქმის მნიშვნელობა საზოგადოების, ლგბტ თემისა და დემოკრატიული ღირებულებების დაცვისთვის. სახელმწიფო ვალდებულია, აღმოფხვრას დაუსჯელობის ატმოსფერო, რაც საბოლოო ჯამში ხელს შეუწყობს ლგბტ პირთა მიმართ დისკრიმინაციული პრაქტიკისა და ძალადობის შემცირებას ქვეყანაში”, ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. სახალხო დამცველმა საკონსტიტუციო სასამართლოს უფლებამოსილების გაფართოების ინიციატივით საქართველოს პარლამენტსა და სახელმწიფო საკონსტიტუციო კომისიას მიმართა. „დღემდე საკონსტიტუციო სასამართლო განიხილავს მხოლოდ ნორმატიული აქტების კონსტიტუციურობას საქართველოს კონსტიტუციის მეორე თავით აღიარებულ უფლებებთან და თავისუფლებებთან მიმართებით. კანონპროექტი გვთავაზობს, რომ ამ თვალსაზრისით შემოწმდეს ასევე ინდივიდუალური სამართლებრივი აქტებისა და საერთო სასამართლოების კანონიერ ძალაში შესული გადაწყვეტილებების კონსტიტუციურობა", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საქართველოს სახალხო დამცველმა ყოფილი პატრულ-ინსპექტორის მიმართ განხორციელებული ქმედებების კანონიერების საკითხის შესწავლის რეკომენდაციით მიმართა საქართველოს შინაგან საქმეთა მინისტრს. „ზემოაღნიშნულიდან გამომდინარე, საქართველოს სახალხო დამცველმა საქართველოს შინაგან საქმეთა მინისტრს რეკომენდაციით მიმართა შეისწავლოს ვ. წ.-ს დაკავებული თანამდებობიდან გათავისუფლების, შრომის სათანადო ანაზღაურების და უკანონო დაკავებით გამოწვეული ზიანის ანაზღაურების საკითხები. ამასთან, საქართველოს სახალხო დამცველი მიიჩნევს, რომ შესწავლილ უნდა იქნეს ვ.წ.-ს ხელმძღვანელი პირის მხრიდან დისციპლინური გადაცდომის ჩადენის საკითხიც. ომბუდსმენის რეკომენდაციით, მინისტრის მხრიდან უშუალოდ შესწავლას საჭიროებს შსს გენერალური ინსპექციის მუშაობაში არსებული ხარვეზები", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საერთაშორისო გამჭვირვალობა - საქართველო აცხადებს, რომ „შინაგან საქმეთა მინისტრის მოადგილე ვალდებულია დაიცვას უდანაშაულობის პრეზუმფცია". „ევროპული სასამართლოს პრაქტიკის შეჯამების სახით შეიძლება ითქვას, რომ უდანაშაულობის პრეზუმფციის დაცვა ბრალდების მხარესაც ევალება იმ შემთხვევაში, როდესაც განცხადების გაკეთება ხდება არა სასამართლოში სისხლისამართლებრივი საქმის განხილვის ფორმატში, არამედ პრესკონფერენციის ან სატელევიზიო ინტერვიუს დროს. ასეთ შემთხვევებში მნიშვნელოვანია, რომ საზოგადოებისთვის ინფორმაციის მიწოდება მოხდეს მხოლოდ ფაქტების აღწერის სახით, შეფასებითი, დეკლარაციული მსჯელობის გარეშე", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საერთაშორისო გამჭვირვალობა საქართველო აქვეყნებს ბლოგპოსტს: „ცვლილებები „ტელეარხ 25-ში" საპარლამენტო არჩევნების წინ". „კონფლიქტი, რომელმაც ტელევიზიაში დაძაბულობა გამოიწვია, „ტელეარხ 25-ის" ეთერში 14 დეკემბერს, აჭარის სავაჭრო-სამრეწველო პალატის თანამშრომლის დაკავების შესახებ გასულ სიუჟეტს მოჰყვა. დაკავებული არხის მთავარი რეჟისორის ოჯახის წევრია. სიუჟეტის გასვლიდან მეორე დღეს არხის რეჟისორმა ნიაზ კონცელიძემ მაია მერკვილაძეს სიუჟეტის გასვლის გამო სიტყვიერი შეურაცხყოფა მიაყენა და დაემუქრა", ნათქვამია ორგანიზაციის ვებ-გვერდზე. „საერთაშორისო გამჭვირვალობა საქართველო" აფიქსირებს საკუთარ პოზიციას და თვლის, რომ „არხის მენეჯმენტმა ნათლად უნდა განუმარტოს საზოგადოებას საინფორმაციო სამსახურის უფროსის, ასევე პოლიტიკური ტოკ-შოუს წამყვანის და სხვა ჟურნალისტების სამსახურიდან დათხოვნის მიზეზები", „პროკურატურამ დროულად უნდა გამოიძიოს "ტელეარხ 25-ის” ნათესავებზე ქონების ერთ ლარად გადაცემის ფაქტი" და „ტელეარხ 25-ის” დამფუძნებლებზე განხორციელებული სავარაუდო ფსიქოლოგიური ზეწოლის ფაქტები". სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაციამ „არა პანორამას" აქციის 10 მონაწილის სახელით ადამიანის უფლებათა ევროპულ სასამართლოს მიმართა. „საია-მ ადამიანის უფლებათა ევროპულ სასამართლოს ევროპული კონვენციის მე-5 (თავისუფლების და უსაფრთხოების უფლება), მე-10 (გამოხატვის თავისუფლება), მე-11 (შეკრების უფლება) და მე-18 (უფლების შეზღუდვათა გამოყენების ფარგლები) მუხლების საფუძველზე მიმართა", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. იუნისეფი მიესალმება ქუჩაში მცხოვრები და მომუშავე ბავშვების მხარდამჭერი საკანონმდებლო პაკეტის დამტკიცებას. „იუნისეფი მიესალმება საქართველოს მთავრობის, კერძოდ კი იუსტიციის სამინისტროს ძალისხმევას იმ მნიშვნელოვანი საკანონმდებლო ცვლილებების შემუშავებაში, რომლებიც სრულად შეესაბამება საერთაშორისო სტანდარტებს და ემსახურება ბავშვის საუკეთესო ინტერესებს", ნათქვამია ორგანიზაციის ვებ-გვერდზე. სრულად... წყარო: unicef.ge

თბილისი. თბილისის საქალაქო სასამართლომ გიორგი პაპუაშვილთან სადაო ქონებასთან დაკავშირებით, მოსარჩელე როლანდ ბლადაძის სარჩელი წარმოებაში მიიღო. ორგანიზაცია „ახალგაზრდა ადვოკატების" ხელმძღვანელმა, ადვოკატმა არჩილ კაიკაციშვილმა სასამართლოს გადაწყვეტილებას, მაღალი საჯარო ინტერესის საქმეზე, „კიდევ ერთი გაბედული და დამოუკიდებელი ნაბიჯი უწოდა". „90-გვერდიან სარჩელში ყველაფერი ცალსახად მიუთითებს, რომ სახელმწიფომ, როგორც საქართველოს ეკონომიკის სამინისტროს, ასევე იუსტიციის სამინისტროს სახით, ბოროტად გამოიყენა უფლების მართლზომიერების პრინციპი და 2004-2007 წლებში უკანონოდ დაეუფლა კერძო საკუთრებას", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. იუსტიციის სამინისტრომ მოამზადა კანონპროექტი, რომელიც ქუჩაში მომუშავე და მყოფი ბავშვების უფლებებს დაიცავს. კანონპროექტი მთავრობის დღევანდელ სხდომაზე დამტკიცდა. „ჩვენი ყველას - სახელმწიფოს და საზოგადოების ტკივილია ქუჩაში მცხოვრები და მომუშავე ბავშვები. ყველა ბავშვს აქვს განვითარების უფლება, ამიტომაც პარტნიორ ორგანიზაციებსა და კოლეგა სამინისტროებთან ერთად შევიმუშავეთ ცვლილებების პაკეტი, რომელიც მთავრობამ დღეს ერთხმად დაამტკიცა და რომელიც ემსახურება ქუჩაში მყოფი და მომუშავე ბავშვების უკეთესად დაცვას", განაცხადა იუსტიციის მინისტრმა თეა წულუკიანმა. სრულად... წყარო: www.ginsc.net