თბილისი. „ადამიანის უფლებების სწავლებისა და მონიტორინგის ცენტრი" (EMC), სათაურით - „ნარკოტიკული დანაშაულის გამოძიებისა და სასამართლო განხილვის სტანდარტები" - გიორგი შარაბიძის სისხლის სამართლის საქმის შეფასებას აქვეყნებს. წარმოდგენილი დოკუმენტით, EMC აფასებს კიდევ ერთ სისხლის სამართლის საქმეს, რომელშიც მსჯავრდებული გიორგი შარაბიძე არ აღიარებს დანაშაულს და მისი დაკავების ფარულ მოტივებზე მიუთითებს. სრულად  წყარო: ორგანიზაციის ვებგვერდი

თბილისი. 326 მოქალაქის სარჩელს ფარული მიყურადების კანონის არაკონსტიტუციურად ცნობასთან დაკავშირებით, საკონსტიტუციო სასამართლო 6-7 ივნისს განიხილავს. საკონსტიტუციო სასამართლო გააგრძელებს საქმის არსებით განხილვას საქართველოს 326 მოქალაქისა და სახალხო დამცველის სარჩელის საფუძველზე, რომელიც ფარული მიყურადებისა და მოსმენის არაკონსტიტუციურად ცნობის საკითხს ეხება. საქართველოს 326-მა მოქალაქემ საკონსტიტუციო სასამართლოს სარჩელით გასული წლის ივნისში მიმართა. სრულად  წყარო: www.osgf.ge

თბილისი. ადამიანის უფლებების სწავლებისა და მონიტორინგის ცენტრი (EMC) გიორგი შარაბიძის სისხლის სამართლის საქმეს აფასებს, რომელიც დანაშაულს არ აღიარებს და მისი დაკავების ფარულ მოტივებზე მიუთითებს.  „27 თებერვლის განაჩენით გიორგი შარაბიძე ცნობილ იქნა დამნაშავედ ბრალად წარდგენილი დანაშაულებრივი ქმედების ჩადენისათვის და შეეფარდა 6 წლით თავისუფლების აღკვეთა. დაცვის მხარის მიერ განაჩენი გასაჩივრდა თბილისის სააპელაციო სასამართლოში. სასამართლო საჩივარი დასაშვებად ცნო და ამჟამად, თბილისის სააპელაციო სასამართლოში მიმდინარეობს საქმის განხილვა", ნათქვამია ორგანიზაციის ვებგვერდზე. სრულად...  წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) პროკურატურას თემირლან მაჩალიკაშვილის სიცოცხლის ხელყოფის საქმეზე ეფექტიანი, დროული და სამართლიანი გამოძიების უზრუნველყოფისთვის სასწრაფო ზომების მიღებას სთხოვს. „თემირლან მაჩალიკაშვილის სიცოცხლის ხელყოფის საქმე პანკისის ხეობაში სახელმწიფოს რეპრესიული პოლიტიკის ნიშანია, რომელიც წლების განმავლობაში დასჯისა და სოციალური კონტროლის მიდგომებს ეფუძნება. სწორედ ამიტომ მაჩალიკაშვილის საქმეზე სამართლიანობის დადგენას და იმ პირების დასჯას, რომლებმაც არასათანადოდ დაგეგმეს, განახორციელეს სპეცოპერაცია და კანონის დაცვით არ მოახდინეს მტკიცებულებების ამოღება და დაცვა, არსებითია არა მხოლოდ დაზარალებული პირების ინდივიდუალური უფლებების აღდგენისთვის, არამედ სახელმწიფო ინსტიტუტების მიმართ ადგილობრივი საზოგადოების ნდობის აღდგენისთვისაც", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საზოგადოებრივი ორგანიზაციების ნაწილი, მართლმსაჯულების რეალური რეფორმისთვის, იუსტიციის მინისტრის გადადგომას ითხოვს. ამის შესახებ მათ დღეს, ფონდ „ღია საზოგადოება - საქართველოს" ოფისში გამართულ ბრიფინგზე განაცხადეს. საზოგადოებრივმა ორგანიზაციებმა ქვეყანაში მიმდინარე მოვლენები შეაფასეს და პროკურორის არჩევასთან დაკავშირებით ისაუბრეს. გაკეთდა განცხადება პროკურატურისა და, ზოგადად, მართლმსაჯულების რეფორმასთან დაკავშირებით. განცხადების მიხედვით, მოქმედი თანამდებობის პირების პირობებში, მართმსაჯულების სფეროში რეალური რეფორმა არ გატარდება. ორგანიზაციების წარმომადგენლებმა უნდობლობა გამოუცხადეს იუსტიციის მინისტრს თეა წულუკიანს და აღნიშნეს, რომ მნიშვნელოვანია ახალი პროკურორის დანიშვნა ახალი, მიუკერძოებელი და რეფორმის ნების მქონე მინისტრის ხელმძღვანელობით მოხდეს. სრულად  წყარო: http://www.osgf.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის" ანა სუბელიანისა და თამაზ ახობაძის სამსახურში აღდგენის შესახებ სასამართლო გადაწყვეტილების აღუსრულებლობას ეხმაურება და საქმით პროკურატურის დაინტერესებას მოითხოვს. „აღნიშნული საქმე წარმოაჩენს იუსტიციის სამინისტროსადმი სსიპ აღსრულების ეროვნული ბიუროს ინსტიტუციური დაქვემდებარების პრობლემას. როგორც აღსრულების ეროვნული ბიურო, ასევე დანაშაულის პრევენციის ცენტრი, ინსტიტუციურად დაკავშირებულია იუსტიციის სამინისტროსთან. ორივე უწყების ხელმძღვანელი თანამდებობაზე ინიშნება და თავისუფლდება იუსტიციის მინისტრის მიერ. აღსრულების ეროვნული ბიუროს ინსტიტუციური კავშირი იუსტიციის სამინისტროსთან, ქმნის საფრთხეს, რომ იუსტიციის მინისტრისათვის მიუღებელი გადაწყვეტილების აღსრულების პროცესი ხელოვნურად გაჭიანურდეს ან აღუსრულებელი დარჩეს", - ნათქვამია განცხადებაში. სრულად  წყარო: emc.org.ge

სამეგრელო. კონსტიტუციის 42-ე მუხლმა, ზუგდიდში, პროექტ „ქალი მსჯავრდებულებისთვის, რომელთაც განუცდიათ ძალადობა და დისკრიმინაცია, და მათი დაუცველი შვილებისთვის სერვისების მიწოდების გაუმჯობესება” ფარგლებში ტრენინგები და იურიდიული კონსულტაცები ჩაატარა. ტრენიგებს ესწრებოდნენ ყოფილი პატიმრები, პრობაციოპნერები და მათი არასრულწლოვანი შვილები. სრულად...  წყარო: ორგანიზაციის ვებგვერდი სოციალურ ქსელში

თბილისი. მწერლები, მთარგმნელები, გამომცემლები და სამოქალაქო საზოგადოების სხვა წევრები ხორავას ქუჩაზე მოკლული დავით სარალიძის მამას, ზაზა სარალიძეს მხარდაჭერას უცხადებენ და მიმდინარე მოვლენებს საგანგებო განცხადებით ეხმაურებიან. მათი განცხადებით, მოვლენებს ბოლომდე მიადევნებენ თვალს და არ მისცემენ ხელისუფლებას ამ საქმის ჩაფარცხვის უფლებას. მწერლები მოითხოვენ, დაინიშნოს ისეთი პროკურორი, რომელსაც საზოგადოების სრული ნდობა ექნება და ამ საქმეში არსებულ ყველა შეკითხვას უპასუხებს. სრულად  წყარო: https://www.radiotavisupleba.ge

თბილისი. მართლმსაჯულების სისტემის ძირეული რეფორმის მოთხოვნით, საზოგადოებრივი ორგანიზაციები განცხადებას ავრცელებენ. „ადამიანის უფლებებზე მომუშავე ორგანიზაციები ყურადღებით ვადევნებთ თვალს ბოლო დღეებში თბილისსა და სხვა ქალაქებში მიმდინარე მასობრივ პროტესტს და სოლიდარობას ვუცხადებთ სარალიძის და დადუნაშვილის ოჯახებს. მიმდინარე მოვლენებზე ხელისუფლების არასათანადო რეაგირება და პროტესტის ნიშნად ქუჩაში გამოსული ათასობით ადამიანი აშკარად მიუთითებს ქვეყანაში შექმნილ კრიზისულ ვითარებაზე. საზოგადოების მიერ გამოხატული საზოგადოებრივი პროტესტის ტალღა მხოლოდ ხორავას ქუჩაზე მომხდარი შემთხვევის არასათანადო გამოძიების პრობლემას არ უკავშირდება და ის უფრო ფართედ უსამართლო მართლმსაჯულების სისტემისა და სოციალური პოლიტიკის მიმართ საზოგადოებაში დაგროვილი უკმაყოფილების გამოხატულებაა", - ვკითხულობთ განცხადებაში, - „ამ ეტაპზე შექმნილი კრისიზული ვითარება მოითხოვს ხელისუფლების მხრიდან მკაფიო პოლიტიკური ნების გამოვლენას დაგროვილი სისტემური პრობლემების რეალური, დროული და ძირეული აღმოფხვრისათვის". სრულად  წყარო: gyla.ge

თბილისი. „საერთაშორისო გამჭვირვალობა - საქართველო" ხორავას ქუჩაზე მომხდარი მკვლელობის ფაქტს ეხმაურება და მთავრი პროკურორის გადადგომას მოითხოვს.  „საზოგადოებაში წლებია არაერთი კითხვა არსებობს გახმაურებული საქმეების მიკერძოებულად და არასრულყოფილად გამოძიების თაობაზე, რაც პროკურატურის მიმართ ნდობის შემცირების მიზეზიც გახდა. პროკურატურას ამჟამად დაკარგული აქვს საზოგადოების ნდობა, ხოლო უწყების დღევანდელ ხელმძღვანელობას არ აქვს ამ ნდობის დაბრუნების უნარი. ამ ვითარებაში, მთავარმა პროკურორმა, ირაკლი შოთაძემ, უნდა აიღოს პოლიტიკური პასუხისმგებლობა და გადადგეს თანამდებობიდან", ნათქვამია ორგანიზაციის ვებგვერდზე. სრულად...  წყარო: www.transparency.ge

თბილისი. კოალიცია ,,დამოუკიდებელი და გამჭვირვალე მართლმსაჯულებისთვის" ეხმაურება ანა სუბელიანისა და თამაზ ახობაძის სამსახურში აღდგენის შესახებ სასამართლო გადაწყვეტილების აღუსრულებლობას, რამაც ადმინისტრაციული ორგანოების მიერ სამართლიანი სასამართლოს უფლების პატივისცემა კითხვის ნიშნის ქვეშ დააყენა. სუბელიანი და ახობაძე სსიპ - დანაშაულის პრევენციის ცენტრიდან 2014 წლის იანვარში გათავისუფლდნენ. ისინი თავიდანვე მიუთითებდნენ, რომ გათავისუფლება იუსტიციის მინისტრის, თეა წულუკიანის ჩარევით, უკანონოდ და დაუსაბუთებლად განხორციელდა, ხოლო გათავისუფლების ოფიციალურ მიზეზად რეორგანიზაცია დასახელდა. თითქმის ოთხი წლის განმავლობაში სამივე ინსტანციის სასამართლოში მიმდინარე დავა, საბოლოო 2017 წლის 15 სექტემბერს ანა სუბელიანისა და თამაზ ახობაძის სასარგებლოდ დასრულდა და ცენტრს დაევალა მათი კონკრეტულ პოზიციებზე აღდგენა და გათავისუფლებიდან აღდგენამდე პერიოდისთვის იძულებითი განაცდურის სრულად ანაზღაურება. სრულად წყარო: coalition.ge

თბილისი. 21 მაისს, PHR-ის მიმართვის საფუძველზე, პერსონალურ მონაცემთა დაცვის ინსპექტორმა საქართველოს მთავარი პროკურატურის მიმართ რეკომენდაცია გამოსცა. რეკომენდაციაში, პერსონალურ მონაცემთა დაცვის ინსპექტორი მოუწოდებს საქართველოს მთავარ პროკურატურას, საქმის ინდივიდუალური გარემოებებისა და არასრუწლოვნის საუკეთესო ინტერესების გათვალისწინებით შეაფასოს სუბიექტისათვის დასკვნის ნაწილობრივ გადაცემის ან სხვა ფორმით განმცხადებლის ინფორმირების შესაძლებლობა და, კანონით განსაზღვრული შეზღუდვის საფუძვლის არარსებობის შემთხვევაში, უზრუნველყოს მონაცემთა სუბიექტის მოთხოვნის დაკმაყოფილება. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტოტინგის ცენტრი" (EMC) ავრცელებს ვიდეორგოლს, რომელიც საგამოძიებო სისტემაში აუცილებელ რეფორმას მიმოიხილავს. „როგორაა გადანაწილებული გამომძიებლის და პროკურორის უფლებები გამოძიების პროცესში? რა რეფორმებია საჭირო ობიექტური და ყოველმხრივი გამოძიების უზრუნველსაყოფად? რატომაა მნიშვნელოვანი, რომ გამომძიებელი აღიჭურვოს იმ საპროცესო ბერკეტებით, რაც საჭიროა გამოძიების დამოუკიდებლად, სრულყოფილად და ობიექტურად ჩატარებისთვის?" - ეს ის შეკითხვებია, რომელსაც ვიდეორგოლი პასუხებს სცემს. სრულად წყარო: ორგანიზაციის ვებგვერდი

თბილისი. საია მთავარ პროკურატურას მიმართავს და „თბილისის სახელმწიფო საკონცერტო დარბაზის” სახელმწიფო საკუთრებაში არსებული 100%-იანი წილი მართვის უფლებით გადაცემის თაობაზე გამოძიების დაწყებას მოითხოვს. საქმე ეხება 2007 წელს სსიპ სახელმწიფო ქონების ეროვნულ სააგენტოსა და შ.პ.ს. „ინტერნეიშენალ ივენთსს" შორის, შ.პ.ს. "თბილისის სახელმწიფო საკონცერტო დარბაზის” სახელმწიფო საკუთრებაში არსებული 100%-იანი წილი მართვის უფლებით გადაცემის თაობაზე ხელშეკრულების შეუსრულებლობას. „სახელმწიფო ქონების ეროვნული სააგენტოს 2018 წლის 16 მაისის კორესპონდენციის მიხედვით, შ.პ.ს. „ინტერნეიშენალ ივენთსს" არ წარმოუდგენია განსახორციელებელი ვალდებულებების შესრულების დამადასტურებელი დოკუმენტაცია. გარდა ამისა, გადაუხდელი მართვის საზღაური 2018 წლის 14 მაისის მდგომარეობით შეადგენს 950,140 ლარს. ხოლო, დაკისრებული პირგასამტეხლო ამავე პერიოდზე 1,606,394 ლარს და 10,102 აშშ დოლარს. დარიცხული დავალიანება მიუთითებს, რომ მმართველი პირი წლების განმავლობაში, 2010 წლიდან დღემდე, არ ახორციელებს ვალდებულების ჯეროვნად და კეთილსინდისიერად შესრულებას. არ იხდის მართვის საზღაურს და დაკისრებულ პირგასამტეხლოს მიუხედავად არაერთი გაფრთხილებისა. ამასთან არ ასრულებს ხელშეკრულებით ნაკისრ სხვა ვალდებულებებს", - ნათქვამია საია-ს მიერ გავრცელებულ ინფორმაციაში. სრულად  წყარო: ორგანიზაციის ვებგვერდი

მცხეთა-მთიანეთი. 28 მაისს, „საერთაშორისო გამჭვირვალობა-საქართველოს" აღმასრულებელი დირექტორი და ორგანიზაციის იურისტები ბარისახოს მაცხოვრებლებს შეხვდნენ და იურიდიული კონსულტაცია გაუწიეს. „მობილური იურიდიული კლინიკის ფარგლებში, ჩვენმა იურისტებმა ადგილობრივებს უძრავი ქონების საკუთრებაში დარეგისტრირების წესები განუმარტეს, ასევე ინდივიდუალურად განიხილეს მათი პრობლემები და მოგვარების კონკრეტული სამართლებრივი გზები", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. 2018 წლის 23 მაისს საქართველოს სახალხო დამცველმა სასამართლოს მეგობრის მოსაზრებით მიმართა თბილისის სააპელაციო სასამართლოს შ.პ.ს. „აიისას" საქმესთან დაკავშირებით. დოკუმენტში საუბარია გამოხატვის თავისუფლებით დაცულ სფეროსა და მისი მართლზომიერი შეზღუდვის სტანდარტებზე, რაც სასამართლოს განსახილველი საკითხის სათანადოდ შეფასებაში დაეხმარება. სრულად  წყარო: სახალხო დამცველის ვებგვერდი

თბილისი. 28-29 მაისს, გერმანიის საერთაშორისო თანამშრომლობის საზოგადოების (GIZ) სამართლის პროგრამის კომპონენტის „დღის წესრიგი 2030" მხარდაჭერით იმართება საერთაშორისო კონფერენცია დღის წესრიგი 2030-ის იმპლემენტაციის თემაზე. „აღნიშნული ღონისძიება წარმოადგენს პლატფორმას, სადაც დიპლომატიური მისიების, სამეცნიერო წრეების, სახელმწიფო, კერძო და სამოქალაქო სექტორის მაღალი რანგის წარმომადგენლებს, ისევე როგორც სხვა დაინტერესებულ მხარეებს, შესაძლებლობა აქვთ, იმსჯელონ იმპლემენტაციის პროცესის მიღწევებზე, ასევე არსებულ გამოწვევებსა და მიღებულ გამოცდილებებზე. 29 მაისს კონფერენცია გაიხსნება სამართლის პროგრამის მიერ ორგანიზებული სესიით, რომელზეც წარსდგებიან შპაიერის რეგულირების გავლენის ანალიზის (RIA) ინსტიტუტის ხელმძღვანელი პროფესორი დოქტ. იან ციკოვი და ეუთოს ექსპერტი რებეკა შულცი. სესია გაიხსნება GIZ-ის მიერ მომზადებული ფილმის ჩვენებით მდგრადი განვითარების შესახებ", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. გარდაცვლილი ამირან კვირიკაშვილის ოჯახს სოციალური დახმარების დანიშვნაზე სახელმწიფომ კვლავ უარი განუცხადა, - ინფორმაციას ამის თაობაზე „ადამიანის უფლებების სწავლებისა და მონიტორინგის ცენტრი" (EMC) ავრცელებს. „2017 წლის 4 ნოემბერს, ხარაგაულში მცხოვრებმა ამირან კვირიკაშვილმა სიცოცხლე თვითმკვლელობით დაასრულა. თვითმკვლელობამდე რამდენიმე დღით ადრე, გარდაცვლილი ხარაგაულის პოლიციის განყოფილებაში რამდენიმესაათიან "გამოკითხვაზე” იმყოფებოდა. ოჯახის წევრების, ახლობლებისა და მეზობლების განცხადებით, თვითმკვლელობის ფაქტი სწორედ პოლიციის მხრიდან ზეწოლას და დაშინებას უკავშირდება”, - ვკითხულობთ EMC-ის განცხადებაში, - „ამირან კვირიკაშვილის თვითმკვლელობა კვირიკაშვილების ოჯახისათვის საარსებო შემწეობის გადახედვის და საბოლოო ჯამში, შეწყვეტის საფუძველი გახდა. ოჯახის წევრის გარდაცვალებამდე კვირიკაშვილების ოჯახი რეგისტრირებული იყო სოციალურად დაუცველთა ერთიან ბაზაში და მათი სარეიტინგო ქულა 44 950-ს შეადგენდა. ამის საფუძველზე ოჯახი იღებდა სოციალურ დახმარებას 310 ლარის ოდენობით. დემოგრაფიული ცვლილების გამო (ოჯახის წევრის გარდაცვალება), ოჯახის შემოწმების შემდგომ, ყოველგვარი მნიშვნელოვანი და არსებითი ეკონომიკური გაუმჯობესების გარეშე, მათი სარეიტინგო ქულა 70 360 ქულით განისაზღვრა, რაც გახდა ოჯახის საარსებო შემწეობის შეწყვეტის საფუძველი. ოჯახს შეუნარჩუნდა მხოლოდ 10 ლარიანი ყოველთვიური შემწეობა, არასრულწლოვანი წევრის სოციალური დაცვის მიზნით". სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC), მაჩალიკაშვილის საქმის საიდუმლო მასალებზე წვდომის პრობლემაზე მიუთითებს. „თ. მაჩალიკაშვილის სიცოცხლის ხელყოფის საქმეზე პროკურატურაში მიმდინარე გამოძიების ფარგლებში თემირლან მაჩალიკაშვილის ოჯახის ადვოკატებსა და დამოუკიდებელ ექსპერტებს ამ დრომდე არ აქვთ დაშვება საქმისთვის არსებითი მნიშვნელოვანის მქონე მტკიცებულებებზე, რომელიც საიდუმლო ინფორმაციად არის მიჩნეული... სისხლის სამართლის საქმეში სახელმწიფო საიდუმლოების მასალებზე წვდომის შეზღუდვის გამო პრობლემურია თბილისის პროკურატურის საგამოძიებო ნაწილის მიერ საქმეზე კომპლექსური ექსპერტიზის დანიშვნის საკითხიც", ნათქვამია ორგანიზაციის ვებგვერდზე. ორგანიზაცია მოუწოდებს სუს-ს, უზრუნველყოს საიდუმლო მასალებზე წვდომის შესაძლებლობა. სრულად...  წყარო: emc.org.ge

თბილისი. 2018 წლის 25 მაისს საქართველოს სახალხო დამცველმა ადამიანის უფლებათა ევროპულ სასამართლოს საქმეზე - „შ.პ.ს. სამაუწყებლო კომპანია რუსთავი 2 და სხვები საქართველოს წინააღმდეგ" - სასამართლო მეგობრის მოსაზრებით მიმართა. „სასამართლო სექციის პრეზიდენტის მითითების შესაბამისად, სახალხო დამცველის მიერ წარდგენილი მოსაზრებები არ ეხება საქმის ფაქტობრივ გარემოებებს და დავის არსებით მხარეს. მოსაზრებებში სახალხო დამცველი შემოიფარგლა საკუთარი მანდატით და ყურადღება გაამახვილა საქმის მნიშვნელობის, ასევე ქვეყანაში გამოხატვის თავისუფლებისა და სამართლიანი სასამართლოს კუთხით არსებულ მდგომარეობასა და გამოწვევებზე", - ვკითხულობთ სახალხო დამცველის მიერ გავრცელებულ ინფორმაციაში. სრულად  წყარო: სახალხო დამცველის ვებგვერდი

თბილისი. საქართველოს სახალხო დამცველი საქართველოს პარლამენტის წევრების ავტორობით მომზადებულ კანონპროექტს „შეკრებებისა და მანიფესტაციების შესახებ" საქართველოს კანონში ცვლილებების შეტანის თაობაზე და თანმდევ ცვლილებებს ეხმიანება. „კანონის პროექტის განმარტებითი ბარათის მიხედვით, ცვლილებები კონსტიტუციის ახალ რედაქციასთან კანონმდებლობის ჰარმონიზებას ისახავს მიზნად. საქართველოს სახალხო დამცველი მიესალმება ამ პროცესს, თუმცა მიიჩნევს, რომ წარმოდგენილი ცვლილებებით ადგილი აქვს პირთა ფართო წრის მიმართ მშვიდობიანი შეკრების უფლების აბსოლუტურ აკრძალვას, რაც აუარესებს უფლების დაცვის კონსტიტუციურ სტანდარტს და ეწინააღმდეგება ადამიანის უფლებათა დაცვის საყოველთაოდ აღიარებულ საერთაშორისო პრინციპებს", - მიიჩნევს სახალხო დამცველი. სრულად  წყარო: სახალხო დამცველის ვებგვერდი

თბილისი. საქართველოს ახალგაზრდა იურისტთა ასოციაცია, „საერთაშორისო გამჭვირვალობა - საქართველო" და „სამართლიანი არჩევნებისა და დემოკრატიის საერთაშორისო საზოგადოება" ავრცელებენ ერთობლივ განცხადებას „საქართველოს საარჩევნო კოდექსში" შესატან ცვლილებებთან დაკავშირებით. „მიგვაჩნია, რომ პროექტით გათვალისწინებული გარკვეული ცვლილებები გააუმჯობესებს საარჩევნო ნორმებს”, - მიიჩნევ ეს ორგანიზაციები, - „ამასთან პროექტში წარმოდგენილი რიგი ცვლილებებისა არ შეესაბამება პროექტის განმარტებით ბარათში გაცხადებულ მიზანს და შესაძლოა უარყოფითად აისახოს საარჩევნო გარემოზე. მაგალითად ცვლილებები, რომლის თანახმად, პოლიტიკური პარტიების წარმომადგენლობებში ყოფნა წინასაარჩევნო აგიტაციად აღარ მიიჩნევა; ცვლილებები, რომლის მიღების შემთხვევაში იზრდება კანონდამრღვევ კომისიის წევრთა საარჩევნო ადმინისტრაციის სისტემაში დასაქმების პერსპექტივა და სხვა”. სრულად  წყარო: gyla.ge