თბილისი. სახალხო დამცველი მთავარ პროკურატურას ხორავას ქუჩაზე არასრულწლოვანთა მკვლელობის გამოძიებაზე პასუხისმგებელი პირების მიერ სავარაუდოდ ჩადენილი სამოხელეო დანაშაულის ფაქტებზე გამოძიების დაწყების წინადადებით მიმართავს. „სახალხო დამცველმა შეისწავლა ხორავას ქუჩაზე არასრულწლოვანთა მკვლელობის საქმე და გამოძიებაში არაერთი ხარვეზი გამოავლინა, რომელთა შედეგადაც საგამოძიებო ორგანოებმა ვერ უზრუნველყვეს გარდაცვლილი დავით სარალიძის მკვლელობაში მონაწილე ყველა პირის დამნაშავედ ცნობისთვის საკმარისი მტკიცებულებების მოპოვება და სასამართლოსთვის წარდგენა”, - ვკითხულობთ სახალხო დამცველის აპარატის მიერ გავრცელებულ ინფორმაციაში, - „საქმის მასალების საფუძვლიანად შესწავლასთან ერთად, სახალხო დამცველმა მოისმინა საპარლამენტო საგამოძიებო კომისიის მიერ პროკურორთა და გამომძიებელთა დაკითხვები. ჩაუტარებელი ან დაგვიანებით ჩატარებული საგამოძიებო მოქმედებების და კომისიის სხდომაზე დაკითხვისას გამოძიებაზე პასუხისმგებელი პირების მიერ საგამოძიებო ტაქტიკაზე გაცემული პასუხების ერთობლივი ანალიზით სახალხო დამცველი მივიდა დასკვნამდე, რომ გამოძიების ტაქტიკა შესაძლოა არ ემსახურებოდა დამნაშავეთა სრულად გამოვლენის საჯარო ინტერესს". სრულად  წყარო: სახალხო დამცველის ვებგვერდი

თბილისი. კავშირმა „საფარი" ძალადობის მსხვერპლ ქალზე, ელენე ბლაგოდარნაიას საქმეზე პრესკონფერენცია გამართა. მედიასთან შეხვედრისას მსხვერპლმა შემთხვევის დეტალებზე ისაუბრა.  „31 მაისს, ჯინჭველაშვილი დაჟინებით შეეცადა ბლაგოდარნაიას სახლში შეღწევას. მსხვერპლი შინ არ უშვებდა მოძალადე პოლიციელს, მაგრამ მას საპატრულო პოლიციამ  გაუღო კარები და მოძალადეს საშუალება მიეცა, შესულიყო მსხვერპლის სახლში. პატრულ-ინსპექტორებმა ლევან ვარდოსანიძემ და კახაბერ ხვედელიძემ  სამსახურებრივი  გულგრილობა გამოიჩინეს და არ  მოარიდეს  მსხვერპლს  მოძალადე. მათ არ  მიიღეს  არანაირი ზომები  მსხვერპლის დაცვის მიზნით. შედეგად, მოძალადე პოლიციელმა დაჭრა ელენე ბლაგოდარნაია, ხოლო 5-6  წამის შემდეგ, ელენეს ყოფილ მეუღლეს მამუკა გაგნიძეს  მიაყენა სასიკვდილო ჭრილობები", ნათქვამია ორგანიზაციის ვებგვერდზე. სრულად... წყარო: sapari.ge

თბილისი. საქართველოს სახალხო დამცველმა რეკომენდაციით მიმართა საქართველოს მთავრობას, შემუშავდეს შესაბამისი სამოქმედო გეგმა და რეაბილიტაციის კონცეფცია, ქვეყანაში არასრულწლოვანთა მიმართ სექსუალური ძალადობის შემთხვევათა პრევენციის, ბავშვთა დაცვისა და დროული დახმარებისთვის. „საქართველოს სახალხო დამცველის აპარატი აქტიურად იკვლევს ბავშვთა ძალადობისგან დაცვის კუთხით ქვეყანაში არსებულ პრობლემებსა და „სექსუალური ექსპლუატაციისა და სექსუალური ძალადობისგან ბავშვთა დაცვის შესახებ" ევროპის საბჭოს კონვენციის ეროვნულ დონეზე განხორციელების საკითხებს", - ვკითხულობთ სახალხო დამცველის აპარატის მიერ გავრცელებულ ინფორმაციაში, - „შესწავლის შედეგად იკვეთება, რომ განსაკუთრებულ პრობლემად რჩება სექსუალური ძალადობის ფაქტებზე უწყებების მხრიდან დროული და ეფექტიანი რეაგირების გატარება; დროულად ვერ ხდება დაზარალებულ ბავშვთა გამოვლენა, ვერ ხორციელდება მსხვერპლთა ფსიქო–სოციალური რეაბილიტაცია და მათი საგანმანათლებლო და სოციალურ სივრცეში ჯეროვანი ინტეგრაცია". სრულად  წყარო: სახალხო დამცველის ვებგვერდი

თბილისი. „საქართველოს დემოკრატიულმა ინიციატივამ" (GDI) საკონსტიტუციო სასამართლოს საქართველოს მთავარი პროკურორის უფლებამოსილების შეზღუდვის მოთხოვნით მიმართა. GDI მოითხოვს, მთავარ პროკურორს შეეზღუდოს უფლება, სისხლის სამართლის საქმე გამოსაძიებლად დაუქვემდებაროს იმ საგამოძიებო ორგანოს, რომლის თანამშრომლსაც, სავარაუდოდ, დანაშაული აქვს ჩადენილი. სრულად  წყარო: ორგანიზაციის ვებგვერდი

თბილისი. 9 ივლისს, თბილისის საქალაქო სასამართლომ კომპანია „ჯორჯიან უოთერ ენდ ფაუერისა" და საქართველოს ენერგეტიკისა და წყალმომარაგების ეროვნული კომისიის მიმართ, „ახალგაზრდა ადვოკატების" საჩივარი ნაწილობრივ დაკმაყოფილდა.  „მთლიანობაში, უცნობია, გადაწყვეტილება, რა საფუძვლებით და რომელი ნაწილის დაკმაყოფილებით მიიღო სასამართლომ. შესაბამისად, „ახალგაზრდა ადვოკატები" სასამართლოს 2018 წლის 9 ივლისის დადგენილებასთან დაკავშირებით საზოგადოებისთვის ვრცელ განცხადებას, გადაწყვეტილების სარეზოლუციო ნაწილის გაცნობის (გადმოცემის) შემდეგ გააკეთებს”, ნათქვამია ორგანიზაციის ვებგვერდზე. სრულად...  წყარო: www.barristers.ge

თბილისი. ივლისში ამოქმედდა ფონდ „ღია საზოგადოება - საქართველოსა" და საქართველოს ადვოკატთა ასოციაციის ერთობლივი პროექტი, რომელიც შეზღუდული შესაძლებლობების მქონე და პალიატიური მზრუნველობის პაციენტებისთვის უფასო იურიდიულ დახმარების გაწევას გულისხმობს. პროექტისთვის თბილისში, აჭარაში, კახეთში, შიდა ქართლსა და სამეგრელო-ზემო სვანეთში შეირჩა ცხრა კვალიფიციური ადვოკატი, რომელმაც, პროექტის ამოქმედებამდე, სამდღიანი ტრენინგი გაიარა. ადვოკატები უფასო იურიდიულ დახმარებას გაუწევენ და დაიცავენ დაზარალებულების ინტერესებს როგორც სასამართლოში, ისე სხვა ინსტაციებში, ყველა იმ საქმეზე, რომელიც ეხება ჯანმრთელობის უფლების დარღვევითა და ბენეფიციარის ჯანმრთელობის მდგომარეობით გამოწვეულ ქონებრივ თუ არაქონებრივ უფლებებს. სრულად  წყარო: ორგანიზაციის ვებგვერდი

თბილისი. მუსიკალური პროექტის, „ბირჟა მაფიას" წევრის, გიორგი ქებურიას საქმეში საქართველოს პროკურატურის წინააღმდეგ, თბილისის საქალაქო სასამართლომ, მესამე პირად საქართველოს ფინანსთა სამინისტრო ჩართო. ნარკოდანაშაულის ჩადენის ბრალდებით გიორგი ქებურია 2017 წლის 7 ივნისს დააკავეს. ამ დაკავებას წინ უძღოდა „ბირჟა მაფიის" მუსიკალური კლიპი, რომელშიც მუსიკოსებმა პოლიციელი გააშარჟეს. გიორგი ქებურიას ინტერესებს საერთო სასამართლოებში „საქართველოს დემოკრატიული ინიციატივა" (GDI) წარმოადგენს. სრულად  წყარო: www.gdi.ge

თბილისი. „საერთაშორისო გამჭვირვალობა - საქართველომ” წარადგინა კვლევა, რომელშიც საქართველოს საერთო სასამართლოების სისტემაში კორუფციის რისკებია შეფასებული. „სასამართლო სისტემაში არსებული მდგომარეობის კვლევამ აჩვენა, რომ სასამართლო სისტემაში კორუფციის სავარაუდო შემთხვევების ხელშემწყობი ძირითადი ფაქტორებია: (ა) მართლმსაჯულების ადმინისტრირებაზე არასათანადო გავლენა მოსამართლეთა გავლენიანი ჯგუფის მიერ და (ბ) სასამართლო ხელისუფლების სისტემური პრობლემები, რომლებიც გამოწვეულია ხარვეზიანი კანონმდებლობით და  რომელთა გამოსწორებაც არ მოხერხდა სასამართლო სისტემაში და მის გარეთ არსებული წინააღმდეგობის გამო", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) პანკისის ხეობაში ჰესის მშენებლობის საკითხზე ადგილობრივი თემის სახელით სასამართლოში დავას იწყებს. „პანკისის ხეობის მაცხოვრებლების მდინარე ალაზანთან და მიმდებარე ბუნებასთან ღრმა ეკონომიკური და სოციალური ბმის პირობებში, კანონდარღვევით, სადავო აქტებით შეთანხმებული ჰიდროელექტროსადგურის „ხადორი 3"-ს აშენება მოსარჩელეებს და მთლიანად პანკისის ხეობის მოსახლეობას მიაყენებს გამოუსწორებელ ზიანს. მოსარჩელეებისთვის და პანკისის ხეობის სხვა მაცხოვრებლებისთვის განსაკუთრებით მტკივნეულად დგას, ჰიდროელექტროსადგურის მშენებლობის შემთხვევაში მათი სასმელი/სარწყავი წყლის საკითხი, რომელსაც მდინარე ალაზნიდან იღებენ და მდინარე ალაზნის დიდი ნაწილის მილებში მოქცევის პირობებში არსებითი საფრთხის ქვეშ დადგება", ნათქვამია ორგანიზაციის ვებგვერდზე. სრულად...  წყარო: emc.org.ge

თბილისი. 3 ივლისს, საქართველოს საკონსტიტუციო სასამართლომ რელიგიური გაერთიანებების ორი სარჩელი დააკმაყოფილა.  „მოსარჩელეების პოზიციით, საქართველოს საგადასახადო კოდექსისა და სახელმწიფო ქონების შესახებ კანონის ნორმები არღვევდა კონსტიტუციის მე-14 მუხლს (თანასწორობის უფლება) და რელიგიური გაერთიანებებისთვის დისკრიმინაციულ გარემოს ქმნიდა. ორივე შემთხვევაში, მოსარჩელეთა ინტერესებს ტოლერანტობისა და მრავალფეროვნების ინსტიტუტი (TDI) და თბილისის თავისუფალი უნივერსიტეტის საკონსტიტუციო სამართლის კლინიკა წარმოადგენდნენ", ნათქვამია ორგანიზაციის ვებგვერდზე. სრულად... წყარო: tdi.ge

თბილისი. პარტნიორობა ადამიანის უფლებებისთვის (PHR) აქვეყნებს ანა არგანაშვილის ბლოგპოსტს: როგორ ვერ აჩუმებენ ბავშვებით ქალებს. „კვლევის თანახმად, წყვილების 40%-ს სადაც ოჯახში ძალადობა ხდება, ჰყავთ შვილები. ოჯახში ძალადობის ზეგავლენა ბავშვებზე როგორც უშუალო, ისე ხანგრძლივი ეფექტის მქონეა. ბავშვები, შესაძლოა, უშუალოდ შეესწრონ მშობელზე განხორციელებულ ძალადობას ან, ნახონ მისი შემდგომი მოვლენები. შეიძლება ისინი გამოიყენონ როგორც – იარაღი. ქალები, ყველა სამართლებრივი ქმედების განხორციელების დროს ფიქრობენ ბავშვებზე და სვამენ კითხვას, როგორ იმოქმედებს ეს მათ შვილებზე. როგორც აღმოჩნდა, ბავშვის არსებობა და კონფლიქტში ჩართულობა, პირველ რიგში, უბიძგებს ქალს ნებისმიერი ფორმით თავიდან აირიდოს ძალადობის განმეორება, თუნდაც ამის გამო დათმობაზე წასვლა მოუხდეს", ნათქვამია ორგანიზაციის ვებგევრდზე. სრულად... წყარო: ორგანიზაციის ვებგვერდი სოციალურ ქსელში

თბილისი. კავშირი „საფარის" ინფორმაციის თანახმად, ზვიად დევდარიანის სარჩელზე პასუხს სტუდენტები მოამზადებენ. „მას შემდეგ, რაც ამ სარჩელს გავეცანი, გადავწყვიტე, რომ თავისუფალი უნივერსიტეტის სამართლის კლინიკას მივმართო, ანუ მინდა სტუდენტებს მივცე საშუალება, შეისწავლონ ეს საქმე და გაიღრმაონ პრაქტიკა. რამე ხეირი ხომ ამ საქმიდანაც უნდა იყოს?! დაე, სტუდენტებმა ისწავლონ სიტყვის და გამოხატვის თავისუფლების საერთაშორისო და ქართული სტანდარტები და მიიღონ სასამართლო პრაქტიკა. გუშინ უკვე დავუკავშირდი კლინიკას და თანამშრომლობაზე შევთანხმდით", ნათქვამია ორგანიზაციის ვებგვერდზე. სრულად... წყარო: sapari.ge

თბილისი. პარტნიორობა ადამიანის უფლებებისთვის აქვეყნებს ქეთი კოპალიანის დისტოპიურ ჩანახატებს „ბავშვის კოდექსის" კანონპროექტის შესახებ. „ბავშვთა უფლებების დაცვის შესახებ ევროპული კონვენციის სტანდარტის გამოყენების ნაცვლად, საბჭოთა კავშირთან სწორების ტენდენცია ბადებს საშიშროებას, რომ ყველაზე მნიშვნელოვანი და აქტუალური პრობლემები, დაწყებული ბავშვთა მიმართ ძალადობით, დასრულებული მართლმსაჯულებაზე ხელმისაწვდომის უფლების შეზღუდვით, ყურადღების მიღმა დარჩეს; „ბრძოლის ველმა" კი, რეალურად არსებული პრობლემებიდან ქაღალდის წისქვილებთან, –  ყალბი მორალიზმისა და უსარგებლო პათეტიკის შემცველ საკანონმდებლო ნორმებთან გადაინაცვლოს", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. 29 ივნისს, საქართველოს ახალგაზრდა იურისტთა ასოციაციამ საკონსტიტუციო სასამართლოს გაუგზავნა ბათუმის საქალაქო სასამართლოს მოსამართლის, ირაკლი შავაძის კონსტიტუციური სარჩელი. „ირაკლი შავაძე 2016 წლის 4 იანვრიდან სამწლიანი გამოსაცდელი ვადით შეუდგა მოსამართლის მოვალეობის შესრულებას ბათუმის საქალაქო სასამართლოში. მან 2017 წელს უვადოდ გამწესების მოთხოვნით მიმართა იუსტიციის უმაღლეს საბჭოს. 2018 წლის 14 და 15 თებერვალს, იუსტიციის უმაღლესი საბჭოს წევრებმა შეავსეს შეფასების ფურცლები. საბჭოს ხუთი წევრის შეფასებით, ირაკლი შავაძე სრულად აკმაყოფილებდა კეთილსინდისიერების კრიტერიუმს, ხოლო კომპეტენტურობის კრიტერიუმთან დაკავშირებით ირაკლი შავაძემ 70%-ზე მეტი შეფასება მიიღო. მიუხედავად ამისა, ფარული კენჭისყრით იუსტიციის უმაღლესმა საბჭომ შავაძე არ აირჩიო მოსამართლედ უვადოდ. საია-ს მიაჩნია, რომ საბჭოს უფლებამოსილება, დაუსაბუთებლად უარი უთხრას უვადოდ მოსამართლედ დანიშვნაზე იმ მოსამართლეს, რომელიც აკმაყოფილებს როგორც კეთილსინდისიერების, ისე კომპეტენტურობის კრიტერიუმებს, ეწინააღმდეგება საქართველოს კონსტიტუციის 29-ე მუხლს. ამ კონსტიტუციური დებულებით გარანტირებულია ადამიანის უფლება, უსაფუძვლოდ და თვითნებურად არ ეთქვას უარი სახელმწიფო სამსახურში საქმიანობაზე", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. დღეს, "ადამიანის უფლებათა სახლში", არასამთავრობო ორგანიზაცია „ადამიანის უფლებათა ცენტრმა" საქართველოში ქალი და არასრულწლოვანი პატიმრების მდგომარეობის შესახებ სპეციალური ანგარიში წარმოადგინა. ანგარიში მომზადდა ბულგარეთის განვითარების ფონდის ფინანსური მხარდაჭერით, „ადამიანის უფლებათა ცენტრის" პროექტის - „ქალი და არასრულწლოვანი პატიმრების მდგომარეობის მონიტორინგი" ფარგლებში. სრულად  წყარო: სახალხო დამცველის ვებგვერდი

თბილისი. საქართველოს ახალგაზრდა იურისტთა ასოციაციამ და „საერთაშორისო გამჭვირვალობა - საქართველომ" დღეს წარადგინეს საქართველოს იუსტიციის უმაღლესი საბჭოს მონიტორინგის მეექვსე, 2017 წლის საქმიანობის ანგარიში. ანგარიშში შეფასებულია საბჭოს საქმიანობის მარეგულირებელი კანონმდებლობა და საბჭოს საქმიანობა მოსამართლეთა შერჩევა/დანიშვნის, საბჭოს საქმიანობის გამჭვირვალობის, სასამართლოს თავმჯდომარის დანიშვნის წესისა და პრაქტიკის, მოსამართლეთა დისციპლინური პასუხისმგებლობის და სხვა მიმართულებებით. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის მიერ გავრცელებული ინფორმაციის მიხედვით, პროკურატურამ ბრალი წაუყენა ოჯახში ძალადობის მსხვერპლ ქალს, რომელმაც პოლიციას ყოფილი ქმრის მიერ განხორციელებულ ძალადობისაგან დაცვის მიზნით მიმართა. „სამართლებრივი დევნა დაიწყო. 2018 წლის ივნისში, პროკურატურამ მოულოდნელად ძალადობაში მხილებული პირი დაზარალებულად ცნო და მსხვერპლს წაუყენა ბრალი ყოფილ ქმარზე ძალადობის და მისი ცრუ დასმენის საფუძვლით. აღსანიშნავია, რომ პროკურატურა მსხვერპლი ქალისთვის ბრალის წარდგენისას დაეყრდნო მიკერძოებულ მოწმეებს და არ გაითვალისწინა სხვა მტკიცებულებები, რომლითაც დგინდებოდა, რომ თამარ ბეკარაშვილი არის ძალადობის მსხვერპლი, მათ შორის, არ გაითვალისწინა თბილისის საქალაქო და სააპელაციო სასამართლოების გადაწყვეტილებები, რომლებითაც ამავე ფაქტზე თამარ ბეკარაშვილი ცნობილია ოჯახში ძალადობის მსხვერპლად", - აცხადებს საია, რომელიც, სისხლის სამართლის საქმეზე, ბეკარაშვილის ინტერესებს იცავს. სრულად  წყარო: ორგანიზაციის ვებგვერდი

თბილისი. "ადამიანის უფლებების სწავლებისა და მონიტორინგის ცენტრი" (EMC), თემირლან მაჩალიკაშვილის საქმესთან დაკავშირებით, სახელმწიფო უსაფრთხოების სამსახურსა და მთავარ პროკურატურას მიმართავს. „ადამიანის უფლებების სწავლებისა და მონიტორინგის ცენტრი" (EMC) ეხმიანება 2018 წლის 25 ივნისს სხვადასხვა მედიასაშუალებით გავრცელებულ ინფორმაციას, თემირლან მაჩლიკაშვილის კუთვნილი მობილური ტელეფონის მონაცემების შესაძლო შესწავლის შესახებ და კიდევ ერთხელ მოუწოდებს პროკურატურასა და სახელმწიფო უსაფრთხოების სამსახურს, განუხრელად დაიცვან კანონის უზენაესობისა და უდანაშაულობის პრეზუმფციის პრინციპები და შეწყვიტონ, სამართლებრივი დაცვისა და პროცესის მიღმა, თემირლან მაჩალიკაშვილის ბრალეულობის შესახებ ინფორმაციის გავრცელება და მისი დისკრედიტაციის მცდელობა", - ნათქვამია განცხადებაში. სრულად  წყარო: ორგანიზაციის ვებგვერდი

თბილისი. წამების მსხვერპლთა მხარდაჭერის საერთაშორისო დღესთან დაკავშირებით, დღეს, თბილისში გაიმართა რეგიონული კონფერენცია, რომელზეც საქართველოს, აზერბაიჯანისა და სომხეთის პრევენციის ეროვნულმა მექანიზმებმა წლიური ანგარიშები წარადგინეს. ანგარიშებში ასახულია თავისუფლების აღკვეთისა და შეზღუდვის ადგილებში წამებისა და არასათანადო მოპყრობასთან დაკავშირებით არსებული მდგომარეობა კავკასიის რეგიონის ამ ქვეყნებში. კონფერენცია საქართველოს სახალხო დამცველისა და საერთაშორისო არასამთავრობო ორგანიზაცია „ციხის საერთაშორისო რეფორმის" ორგანიზებითა და ნიდერლანდების საგარეო საქმეთა სამინისტროს ფინანსური მხარდაჭერით გაიმართა. სრულად  წყარო: სახალხო დამცველის ვებგვერდი

თბილისი. საქართველოს სახალხო დამცველი ხორავას ქუჩის საქმესთან დაკავშირებით გამოტანილ სასამართლო განაჩენს ეხმაურება. „განაჩენი კიდევ ერთხელ უსვამს ხაზს იმ ფაქტს, რომ მნიშვნელოვანია არასრულწლოვან დავით სარალიძის მკვლელობის ყველა დეტალის ეფექტური გამოძიება. სახალხო დამცველი მიმართავს შინაგან საქმეთა სამინისტროს, ჩაატაროს სწრაფი და ყოველმხრივი გამოძიება, რათა გამოავლინოს დანაშაულთან დაკავშირებული ყველა პასუხისმგებელი პირი. ასევე, გამოავლინოს ის პირები, რომელთაც ხელი შეუშალეს გამოძიების სათანადოდ წარმართვას. ამ კონკრეტული საქმის განხილვის ფონზე, განაჩენმა ნათლად დაგვანახა სკოლაში ბავშვთა ბულინგისა და ძალადობის დაცვის ეფექტიანი მექანიზმის არარსებობაც. დასტურდება, რომ სკოლაში ბავშვთა უსაფრთხოებაზე პასუხისმგებელი პირების მიერ დაკისრებული მოვალეობების ეფექტიანი შესრულება სისტემური რეფორმის გატარებას მოითხოვს, რათა სამომავლოდ არასრულწლოვნებს შორის ძალადობა მინიმუმამდე შემცირდეს და თავიდან ავიცილოთ მსგავსი ფატალური შემთხვევები. სრულად  წყარო: სახალხო დამცველის ვებგვერდი

თბილისი. საქართველოს ახალგაზრდა იურისტთა ასოციაცია (საია) ოზურგეთის საკრებულოში მომხდარ ინცინდენტს აფასებს. „საია მიიჩნევს, რომ ოზურგეთის მუნიციპალიტეტის საკრებულოს წევრის − ბესო ქათამაძის ფიზიკური შეურაცხყოფა, შესაძლოა, წარმოადგენდეს ადამიანის დევნას სიტყვის, აზრის გამოხატვის გამო, ანდა მის პოლიტიკურ, საზოგადოებრივ, პროფესიულ საქმიანობასთან დაკავშირებით. მივმართავთ საგამოძიებო ორგანოს, მსგავსი ფაქტების პრევენციის მიზნით, გამოძიება აწარმოოს მაქსიმალურად შემჭიდროვებულ ვადაში, ყოველმხრივ, სრულად და ობიექტურად, სისხლის სამართლის საქმის შესაბამისი კვალიფიკაციით", ნათქვამია ორგანიზაციის ვებგვერდზე. სრულად...  წყარო: gyla.ge

თბილისი. არბაითერ-სამარიტერ ბუნდი (ASB) აქვეყნებს კვლევას ყოფილ პატიმართა და პრობაციონერთა რეაბილიტაციის საერთაშორისო გამოცდილებაზე. „ესტონეთში პატიმრებისთვის სწავლა და მუშაობა ანაზღაურებადია. გათავისუფლების შემდეგ პირი იღებს პატიმრობისას გამომუშავებულ გარკვეულ თანხას", ნათქავამი კვლევაში. სრულად... წყარო: ორგანიზაციის ვებგვერდი სოციალურ ქსელში