თბილისი. ღია საზოგადოების ფონდების დამფუძნებელი ჯორჯ სოროსი თბილისს კერძო ვიზიტით ეწვევა. საზოგადოებაში გამოწვეული ინტერესის საპასუხოდ, ფონდი „ღია საზოგადოება – საქართველო" განცხადებას ავრცელებს.  „გვინდა განვაცხადოთ, რომ აღნიშნული ვიზიტი არის არაოფიციალური, მისი მიზანია ფონდის ხელმძღვანელობასთან შეხვედრა, ორგანიზაციის ბოლო წლების მუშაობის შეჯამება და სამომავლო სტრატეგიის განხილვა. არ არის გამორიცხული, რომ ახალი პოლიტიკური რეალობის გაცნობის მიზნით, ჯორჯ სოროსი შეხვდეს პოლიტიკურ ლიდერებსაც" – ნათქვამია ფონდი „ღია საზოგადოება–საქართველოს" მიერ გავრცელებულ განცხადებაში . სრულად  წყარო: osgf.ge  

შიდა ქართლი. 27 ნოემბერს საადვოკატო ბიურო "OK & CG”-სა და ა(ა)იპ გორის მუნიციპალიტეტის მოსწავლე–ახალგაზრდობის კულტურულ–საგანმანათლებლო ცენტრს შორის ურთიერთთანამშრომლობის მემორანდუმი გაფორმდა.  საადვოკატო ბიურო და გორის მოსწავლე-ახალგაზრდობის კულტურულ-საგანმანათლებლო ცენტრი აღნიშნული მემორანდუმის გაფორმებით გეგმავს ურთიერთთანამშრომლობის საფუძველზე ხელი შეუწყოს სამოქალაქო საზოგადოების განვითარებას გორის მუნიციპალიტეტის ფარგლებში საჯარო ლექციების, დისკუსიებისა თუ სხვადასხვა აქტივობების ხარჯზე. ადვოკატებმა მემორანდუმის გაფორმებასთან ერთად წაიკითხეს საჯარო ლექცია ადამიანის უფლებებსა და ვალდებულებებზე. საჯარო ლექცია გორის მოსწავლე-ახალგაზრდობის ცენტრში გაიმართა და მას ესწრებოდა ადამიანის უფლებებისა და ვალდებულებების საკითხით დაინტერესებული საკმაოდ ვრცელი აუდიტორია: გორის მე-5, მე-7, კარალეთის სამოქალაქო კლუბის წევრები. საჯარო ლექციის ფარგლებში მოხსენება გაკეთდა ადამიანის უფლებებისა და ვალდებულებების არსის განხილვითა და ურთიერთმიმართების საფუძველზე, ასევე ამ უფლებების დაცვის მექანიზმებზე როგორც საქართველოს მასშტაბით, ისე საერთაშორისო დონეზე. ლექციის მომდინარეობისას გამოჩენილი აქტივობების საფუძველზე ასევე შეირჩა რამოდენიმე მოსწავლე, რომელთაც მიენიჭათ საადვოკატო ბიუროს მეგობრის სტატუსი.

თბილისი. „სამართლიანი არჩევნები" მარტვილის გამგეობაში განვითარებულ მოვლენებზე განცხადებას ავრცელებს, სადაც გამოხატავს შეშფოთებას მარტვილის მუნიციპალიტეტის გამგეობის შენობაში განხორციელებული ქმედებების თაობაზე. „სამართლიანი არჩევნების" ინფორმაციით, მარტვილის მუნიციპალიტეტში 26 ნოემბერს გაიმართა ფართომასშტაბიანი აქცია მუნიციპალიტეტის გამგებლისა და საკრებულოს თავმჯდომარის გადადგომის მოთხოვნით. აქციაზე კოალიცია „ქართული ოცნების" მხარდამჭერები და აღნიშნული პოლიტიკური გაერთიანების ადგილობრივი ოფისის ხელმძღვანელებიც იმყოფებოდნენ. „აქციამ კანონსაწინააღმდეგო  ფორმა მიიღო მაშინ, როდესაც მოქალაქეები გამგეობის შენობაში შეიჭრნენ, რამაც გამგეობის მუშაობის პარალიზება, ხოლო ინვენტარის ნაწილის დაზიანება გამოიწვია. აქციის მონაწილეებმა შენობა პოლიციის ჩარევის შემდეგ დატოვეს. ამჟამად კოალიცია „ქართული ოცნების" მხარდამჭერები ახდენენ გამგეობის შენობის  შესასვლელის ბლოკირებას", – ნათქვამია განცხადებაში. განცხადებაში აღნიშნულია, რომ დაუყოვნებლივ უნდა მოხდეს ადგილობრივი თვითმმართველობის ორგანოების მიმართ განხორციელებული უკანონო ქმედებების  გამოძიება და მასში მონაწილე პირების დასჯა  საქართველოს კანონმდებლობის მოთხოვნის შესაბამისად. სრულად წყარო: ორგანიზაციის ოფიციალური გვერდი სოციალურ ქსელში

იმერეთი. 22 ნოემბერს ქუთაისის ახალგაზრდული ცენტრის წევრებისათვის ჩატარდა ტრენინგი „პროფესიული ორიენტაციის და კარიერული წინსვლის" საკითხებზე. ტრენინგს მიზანს წარმოადგენდა მონაწილეებისთვის კომუნიკაციის ტექნიკების გაცნობა და ეფექტური კომუნიკაციის უნარების გამომუშავება. ასევე საკუთარი შესაძლებლობების და უნარების შეფასება კარიერული ზრდის დაგეგმვის მიზნით; CV-ის ფორმების, სამსახურეობრივი ინტერვიუს ტექნიკების გაცნობა.  ტრენინგ-კურსი ორგანიზებული იქნა „საქართველოში ეროვნული ინტეგრაციის გაძლიერების" პროექტის (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. სრულად წყარო: ,,ქუთაისის ახალგაზრდული ცენტრის" გვერდი სოციალურ ქსელში

თბილისი. ევროკავშირის წარმომადგენლობამ საქართველოში, სამწუთიანი ფილმების ფესტივალისთვის ნამუშევრების წარდგენის ვადას ახანგრძლივებს. კონკურსში მონაწილეობის მსურველებს ნამუშევრების წარდგენა შეუძლიათ 30 ნოემბრის 17:00 საათამდე. სამწუთიანი ფილმების ფესტივალი ევროკავშირის საქართველოს წარმომადგენლობის ახალი ინიციატივა, რომლის საშუალებითაც ევროკავშირი სთავაზობს 14–25 წლამდე ქართველ ახალგაზრდებს მობილური ტელეფონის საშუალებით გადაიღონ სამწუთიანი ფილმები და თავად ასახონ საქართველო–ევროკავშირის თანამშრომლობის შედეგები. მონაწილეობის მსურველებს კონკურსის წესების გაცნობა შეუძლიათ ვებგვერდზე www.eu3min.ge. სრულად წყარო: eeas.europa.eu/delegations/georgia

თბილისი. ინფორმაციის თავისუფლების განვითარების ინსტიტუტის (IDFI)  ინიციატივით ჩატარდა კვლევა, რომელიც ეფუძნება არასამთავრობო ორგანიზაციების Access Info Europe (ესპანეთი) და The Centre for Law and Democracy (კანადა) მიერ შემუშავებულ ინფორმაციის თავისუფლების გლობალურ რეიტინგს. რეიტინგის მიზანია ამა თუ იმ სახელმწიფოს ინფორმაციის თავისუფლების მარეგულირებელი შიდა კანონმდებლობის ანალიზი და შეფასება. რეიტინგის თანახმად, სერბეთის ინფორმაციის თავისუფლების კანონმდებლობა პირველ ადგილს, ხოლო საქართველოს კანონმდებლობა 94 ქულით 30-ე ადგილს იკავებს სწორად ამ გლობალური რეიტინგის ბაზაზე ინფორმაციის თავისუფლების განვითარების ინსტიტუტმა განახორციელა სერბეთისა და საქართველოს შესაბამის კანონმდებლობათა ურთიერთშედარება, რომლის მიზანიცაა იმ ზოგადი, ინსტიტუციონალური და პროცედურული კომპონენტების გამოვლენა, რომლებიც უზრუნველყოფენ სერბეთის კანონმდებლობის მოწინავე პოზიციას ინფორმაციის თავისუფლების დარგში. ხოლო საქართველოს კანონმდებლობას, ხსენებული კომპონენტების გათვალისწინების შემთხევაში საშუალება მიეცემა მოწინავე გახადოს საჯარო ინფორმაციის ღიაობა და ხელმისაწვდომობა.  კვლევა წყარო: idfi.ge

თბილისი. 22 ნოემბერს  საქართველოს ეწვევა დელეგაცია აღმოსავლეთ პარტნიორობის, დასავლეთ ბალკანეთის ქვეყნებიდან და პოლონეთიდან, რომლებიც ქართველ კოლეგებთან ერთად ევროკავშირთან ვიზის ლიბერალიზაციის საკითხებზე იმსჯელებენ. შეხვედრა სასტუმრო „ქორთიარდ მარიტოში" დილის 10 საათზე დაიწყება. შეხვედრაზე განიხილება ევროკავშირთან უვიზო მიმოსვლის შესაძლებლობა და ის გამოცდილება, რომელიც,  ამ მიმართულებით დააგროვეს დასავლეთ ბალკანეთის ქვეყნებმა.  კოალიცია, რომელიც აერთიანებს ორგანიზაციებს პოლონეთიდან, უკრაინიდან, მოლდოვადან, აზერბაიჯანიდან, სომხეთიდან და საქართველოდან  განიხილავს ვიზის ლიბერალიზაციის სამოქმედო გეგმის მონიტორინგის საკითხს და იმსჯელებს კოალიციის სტრატეგიაზე. ვიზის ლიბერალიზაციის სამოქმედო გეგმას საქართველოს მთავრობას 2012 წლის დეკემბრის დასაწყისში გადასცემს ევროკომისარი შინაგან საქმეთა საკითხებში სესილია მალსტრომი. სამოქმედო გეგმა უკვე გადაცემული აქვს მოლდოვას და უკრაინას.  ამ ორი ქვეყნის არასამთავრობო ორგანიზაციები უკვე ახორციელებენ აღნიშნული დოკუმენტის მონიტორინგს. შეხვედრაზე საუბარი იქნება  ამ სამოქმედო გეგმის მონიტორინგის ეფექტურ მეთოდებზე.   შეხვედრის შედეგად შემუშავდება მოკლე ანალიტიკური დოკუმენტი, ეგრეთ წოდებული Policy Brief.   ვიზის ლიბერალიზაციის სამოქმედო გეგმის  შესრულების მონიტორინგს კოალიცია საქართველოსთვის გადაცემისთანავე გეგმავს. სამოქმედო გეგმის საქართველოსთვის გადაცემა ევროკავშირთან უვიზო მიმოსვლის გზაზე მნიშვნელოვან ნაბიჯად მიიჩნევა. სრულად წყარო: osgf.ge

შიდა ქართლი. 16 ნოემბერს ტოლერანტობის საერთაშორისო დღე აღნიშნეს გორის ახალგაზრდულ ცენტრის წარმომადგენლებმა. მათ ამ დღისადმი მიძღვნილი სამი ღონისძიება გამართეს სხვადასხვა ადგილას. კერძოდ, ვერხვების დევნილთა ჩასახლებაში ტოლერანტობის თემაზე მათ ჩაატარეს სემინარი და გამართეს ვიდეორგოლების ჩვენება, რასაც აღნიშნული თემატიკის განხილვა და დისკუსია მოჰყვა. ცენტრის ახალგაზრდებმა და #7 საჯარო სკოლის მოსწავლეებმა, შეზღუდული შესაძლებლობების მქონე ბავშვებისთვის მოაწყვეს შემოქმედებითი საღამო, ღონისძიებას ლაიტმოტივად გასდევდა ტოლერანტულობის, თანასწორობის იდეა. მესამე ღონისძიება, რომელსაც ორგანიზება გაუკეთეს ცენტრის წარმომადგენლებმა დავით ჩუბინიშვილის სახელობის კულტურის ცენტრში სპექტაკლის ჩვენება იყო. ცენტრში ნაჩვენები იყო ნოდარ დუმბაძის მოთხრობა „ჰელადოსი". აღნიშნული ღონისძიებები განხორციელდა საქართველოს გაეროს ასოციაციის პროექტის ფარგლებში, რომლის მხარდაჭერას უზრუნველყოფს აშშ–ს საერთაშორისო განვითარების სააგენტო.

იმერეთი. 16 ნოემბერს, ტოლერანტობის საერთაშორისო დღე  ქუთაისის განვითარებისა და განათლების ცენტრმა აღნიშნა. ქალაქში მოეწყო აქცია, სახელწოდებით „მე ტოლერანტი ვარ, შენ? ". აქციაში მონაწილე სკოლის მოსწავლეებმა ტრანსფარანტებით მსვლელობა მოაწყვეს. ასევე გააკეთეს ცოცხალი ჯაჭვი.  ღონისძიება ორგანიზებულია „საქართველოში ეროვნული ინტეგრაციის გაძლიერების" პროგრამის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს მხარდაჭერით. ტოლერანტობის საერთაშორისო დღე მსოფლიოში 1995 წლიდან აღინიშნება.

აჭარა. 13 ნოემბერს, ბათუმის დემოკრატიული ჩართულობის ცენტრში, სამოქალაქო საზოგადოების და ბათუმის დემოკრატიული ჩართულობის ცენტრის ორგანიზებით გაიმართა საჯარო დისკუსია თემაზე_ "ადგილობრივი არასამთავრობო ორგანიზაციების გამოწვევები და მონაწილეობა რეგიონში მიმდინარე პოლიტიკის ფორმირებაში". შეხვედრის მიზანს წარმოადგენდა საზოგადოებრივი ორგანიზაციების წინაშე არსებული პრობლემების და გამოწვევების დასახელება, ერთმანეთისათვის სახელმწიფო უწყებებთან  მუშაობის კუთხით გამოცდილების გაზიარება, ასევე ადგილობრივ ორგანიზაციებსა და მათვარობას  შორის თანამშრომლობის/მონაწილეობის გზების მექანიზმის შემუშავება რეგიონის  პოლიტიკის ფორმირების ფარგლებში. დისკუსიაში მონაწილეობას ღებულობდნენ ადგილობრივი არასამთავრობო ორგანიზაციები და მედიის წარმომადგენლები.

თბილისი. 12 ნოემბერს, კავკასიური ინსტიტუტის ოფისში გაიმართა  სამუშაო შეხვედრა სტუდენტურ დებატებთან დაკავშირებით. შეხვედრის დროს თბილისის სხვადასხვა უნივერსიტეტის სტუდენტები გაეცნენ დებატების წესებს და იმ თემებს, რომელზეც 25 ნოემბერს  იდებატებენ. შეხვედრა ორგანიზებული იყო მშვიდობის, დემოკრატიის და განვითარების კავკასიური ინსტიტუტის მიერ. სტუდენტური დებატები იმართება პროექტის  „სამოქალაქო საზოგადოება განვითარებისთვის: დეცენტრალიზაცია და მონაწილეობა საქართველოში - ფარგლებში" ნიდერლანდების საგარეო საქმეთა სამინისტროს ფინანსური მხარდაჭერით. სრულად წყარო: participate.ge

თბილისი. საზოგადოებრივი ორგანიზაცია „იდენტობა”19-20 იანვარს ლგბტ საკითხებში პირველი ქართული სტუდენტური კონფერენციის ჩატარებას გეგმავს. კონფერენციაში მონაწილეობა შეუძლია საქართველოში აკრედიტირებული ნებისმიერი უნივერსიტეტის ნებისმიერ საფეხურისა და სპეციალობის სტუდენტს. მონაწილეთათვის გათვალისწინებულია სტიპენდია 320 ლარის ოდენობით, რომელსაც, შერჩეული სტუდენტები, საკუთარი სურვილისამებრ,  გამოიყენებენ კვლევის ხარჯების დასაფარავად.  კონფერენციაზე მონაწილეობის მსურველებს შეუძლიათ აირჩიონ ნებისმიერი საკვლევი თემა, რომელიც საქართველოში ლგბტ ადამიანების სოციალურ, სამართლებრივ, ეკონომიკურ, კულტურულ და პოლიტიკურ მდგომარეობას ეხმიანება. კონფერენცია გაიმართება თბილისში. სტუდენტებისთვის, რომლებიც საქართველოს სხვადასხვა რეგიონიდან მიიღებენ მონაწილეობას, გათვალისწინებულია კვების, სატრანსპორტო და სასტუმროს ხარჯები. დაინტერესებულმა პირებმა 2012 წლის 30 ნოემბრამდე უნდა შეავსონ განაცხადის ფორმა. კონფერენცია ნიდერლანდების საელჩოს მხარდაჭერილი საგანმანათლებლო პროექტის ფარგლებში ჩატარდება. პროექტის მიზანია ქართველ სტუდენტებში ლგბტ (ლესბოსელი, გეი, ბი, ტრანსგენდერი) საკითხებისადმი ცნობიერების ამაღლება. სრულად წყარო: identoba.com

კახეთი. საზოგადოებრივ ორგანიზაცია ,,მედია ცენტრ კახეთსა" და გმინა პლუჟნიცას განვითარების ასოციაცია პოლონეთს შორის გურჯაანში ურთიერთთანამშრომლობის მემორანდუმი გაფორმდა.  ,,მედია ცენტრი კახეთის" დირექტორის, მაია მამულაშვილის თქმით, ორგანიზაციებს შორის გაფორმებული მემორანდუმის თანახმად, ორგანიზაციები გაცვლიან ინფორმაციას და გაუზიარებენ გამოცდილებას განხორციელებულ და დაგემილ პროექტებზე: ,,ძალიან მნიშნელოვანი ფაქტია მემორანდუმის გაფორმება, რადგან ეს მოიტანს მჭიდრო კონტაქტებს პოლონეთის, პლუჟნიცას ერთ-ერთ ყველაზე ძლერ არასამთავრობო ქსელთან. ინიცირებას გავუწევთ და განვახორციელებთ ერთობლივ პროექტებს სამომავლოდ". გმინა პლუჟნიცას განვითარების ასოციაციის უფროსის, მიროსლავა ტომაშიკის თქმით კი ისინი მხარს დაუჭერენ სხვადასხვა ინიციატივებს. 

კახეთი. 12 ნოემბერს თელავის  მედია კაფეში  ,,სათემო განვითარების ცენტრის" მხარდაჭერით შეხვედრა გაიმართა. შეხვედრაზე საბჭოთა წარსულის კვლევის ლაბორატორიამ ფილმი ”დიდი საბჭოთა ტერორი: ადამიანური ისტორიები” წარადგინა. ფილმის ჩვენების შემდეგ გაიმართა დისკუსია ლიტერატურის მუზეუმის დირექტორის - ლაშა ბაქრაძისა და მკვლევარ ირაკლი ხვადაგიანის მონაწილეობით. ლაშა ბაქრაძის განცხადებით, მსგავსი შეხვედრები ახალგაზრდების მონაწილეობით ძალიან მნიშნელოვანია. შეხვედრას ესწრებოდნენ სტუდენტები, ლექტორები, ჟურნალისტები, არასამთავრობო სექტორის წარმომადგენლები და დაინტერსებული მოქალაქეები. შეხვედრა პროექტის ”რეგიონული პლატფორმა - საბჭოთა წარსულის გააზრება” ფარგლებში ჩატარდა. პროექტის მხარდამჭერია ”ღია საზოგადოება - საქართველო” და ხოციელდება სოვლაბის მიერ.

სამცხე–ჯავახეთი.  13 ნოემბერს, ახალციხის მუნიციპალიტეტის საკრებულოს თავმჯდომარესა და ადგილობრივი საზოგადოებრივი ორგანიზაციების წარმომადგენლებს შორის გაცნობითი შეხვედრა გაიმართა. შეხვედრის ინიციატორები არასამთავრობო სექტორის წარმომადგენლები იყვნენ. შეხვედრის ძირითადი თემა კი ადგილობრივი ბიუჯეტის საკითხები იყო. ახალციხის მუნიციპალიტეტის საკრებულოს თავმჯდომარემ მალხაზ გიქოშვილმა თანამდებობა გასულ კვირას დატოვა. საკრებულოს ახალ თავმჯდომარედ ფრაქცია ,, ქართული ოცნების"  წევრი ოლეგ სანდროშვილი აირჩიეს, რომელიც სულ მალე ტრადიციულ ონლაინ–კონფერენციის რეჟიმში მოსახლეობის შეკითხვებს უპასუხებს.  

თბილისი. ოქტომბერის ბოლოს ქალთა ფონდმა მოაწყო სამდღიანი შეხვედრა გრანტის მიმღებ ორგანიზაციებთან. შეხვედრის მიზანი იყო გრანტის მიმღებებს შორის ქსელური მუშაობის და ქალთა მოძრაობაში მათი აქტიური ჩართვისა და ეფექტური თანამშრომლობის  ხელშეწყობა. შეხვედრას ესწრებოდა 70 გრანტის მიმღები ორგანიზაცია, რომლებიც გრანტებს ქალთა ფონდის შემდეგი საგრანტო პროგრამებისგან იღებდნენ:  ქალთა ეკონომიკური დამოუკიდებლობის პროგრამა (DGP), ღია კარის საგრანტო პროგრამა, სწრაფი რეაგირების საგრანტო პროგრამა და ქალთა უფლებების კულტურის დანერგვის საგრანტო პროგრამია (ქალთა ორგანიზაციების წარმომადგენლები, საინიციატივო ჯგუფები, ახალგაზრდა აქტივისტები, სოფლად მცხოვრები ქალები და ა.შ.) . გრანტის მიმღებმა ორგანიზაციებმა ერთამენთს გაუზიარეს  მიღწევები და გამოწვევები.  სრულად წყარო: womenfundgeorgia.org

აჭარა. 9 ნოემბერს, ბათუმის პრეს–კაფეში, „გაზეთ ბათუმელებისა" და პრეს–კაფეს ინციიატივით მოეწყო აქცია სახელწოდებით - „წიგნები და პრესა სახლში მიტანით".  აქციის მიზანია საზოგადოებაში წიგნისა და პრესისს კითხვის პოპულარიზაცია და ხელმოწერის კულტურის დანერგვა, ხელშეწყობა. აქციის ფარგლებში გამოიფინა სხვადასხვა გამომცემლობის - „დიოგენე", „პალიტრა L"-ის, „ბაკურ სულაკაურის", „ჯემალ ქარჩხაძის", „ლოგოს პრესის" გამოცემული წიგნები. აღსანიშნავია ის გარემოება, რომ აქცია ერთჯერადი ხასიათის არ არის, ის, ყიველკვირეულად გაიმართება ბათუმის სხვადასხვა უბანში, სხვადასხვა საჯარო, საგანმანათლებლო და კერძო დაწესებულებაში. პროექტი ხორციელდება ფონდი „ღია საზოგადოება–საქართველოს" ფინანსური მხარდაჭერით.

კახეთი.10 ნოემბერს, 12 საათზე სოფელ ნაფარეულში გაიმართება სოფლის ზეიმი. მცირე მასშტაბის სასოფლო ფესტივალის მიზანია სოფლის ცხოვრების გამრავალფეროვნება და სოფლის ტრადიციული კულტურის გაცნობა. ღონისძიების ადგილობრივი ორგანიზატორია კავშირი „ნაფარეული". აღნიშნული ღონისძიება სათემო განვითარების ცენტრის პროექტის – „შემოსავლების მომტანი საქმიანობებისა და რეგიონული განვითარების ხელშეწყობა კულტურულ–საგანმათლობლო პროგრამების მეშვეობით" – ფარგლებში იმართება, რომლის ფინანსურ მხარდაჭერას ახორციელებს გერმანული ორგანიზაცია – „პური მსოფლიოსთვის". წყარო: satemo.ge

თბილისი. 31 ოქტომბერს საქართველოს მცირე და საშუალო საწარმოთა ასოციაციამ გამართა ჰოლანდიური პროგრამების პრეზენტაცია. ეს პროგრამები ეხმარება ქართულ კომპანიებს ჰოლანდიაში პარტნიორის მოძიებაში და ასევე ითვალისწინებს ერთობლივი საწარმოების გრანტის სახით დაფინანსებას. შეხვედრაზე ასევე გაიმართა საქართველოს ტექნოლოგიური გადაცემის ცენტრის ინოვაციების კონკურსის პრეზენტაცია, რომელიც ითვალისწინებს კონკურსში გამარჯვებული 5 კომპანიიდან თითოეულისთვის დაფინანსებას მაქსიმუმ 20 000 ლარის ფარგლებში და უსასყიდლო საექსპერტო მხარდაჭერას საქართველოს ტექნოლიგიური ცენტრისგან.  სრულად წყარო: gsmea.ge

თბილისი. საზოგადოებრივი ორგანიზაცია „იარე ფეხით" საზოგადოებას  ვიდეოების ციკლს სთავაზობს, სადაც ასახულია საქართველოს ქალაქებში არსებული პრობლემები, რომლებიც დაბრკოლებას უქმნის ფეხით სიარულის მოყვარულებს.  ერთ–ერთი ყველაზე ბოლოს გავრცელებული ვიდეო ეხება თბილისში მიმდინარე მშენებლობებს, შენობების სარესტავრაციო კონსტრუქციებს, ტროტუარის ხარისხსა და ანტისანიტარიას მიწისქვეშა გადასასვლელებში.  „იარე ფეხით" არის ორგანიზაცია, რომელიც მხარს უჭერს ფეხით სიარულს ქალაქებში, ცდილობს დაიცვას ფეხით მოსიარულეთა უფლებები და იმედოვნებს, რომ  შესძლებს ხელისუფლების დარწმუნებას, როგორც ეროვნულ, ისე მუნიციპალურ დონეზე, დაეხმაროს ფეხითმოსიარულეებს და, ამ კუთხით, უკეთესი პოლიტიკა გაატაროს. წყარო: ორგანიზაციის„იარე ფეხით" ოფიციალური გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუმა (IDFI) შექმნა სასამართლო სტატისტიკის ელექტრონული მოდული, რომელიც საქართველოს სასამართლო სისტემაში არსებული მნიშვნელოვანი სტატისტიკური ინფორმაციის რესურსია. სტატისტიკური და დინამიური მონაცემები კატეგორიების მიხედვით ვიზუალურადაა წარმოდგენილი, რაც მომხმარებელს ინფორმაციის მოძიების და მონაცემების ურთიერთშედარების შესაძლებლობას აძლევს. სასამართლო სტატისტიკის ელექტრონული მოდული უკვე  ხელმისაწვდომია  საქართველოს უზენაესი სასამართლოს ოფიციალურ ვებ-გვერდზე: www.supremecourt.ge. სასამართლო სტატისტიკის მოდული შეიქმნა ინფორმაციის თავისუფლების განვითარების ინსტიტუტის (IDFI) პროექტის - „საქართველოს სასამართლო სისტემის საზოგადოებრივი ანგარიშვალდებულებისა და გამჭვირვალობის ხარისხის გაუმჯობესება" - ფარგლებში. პროექტი ხორციელდება ევრაზიის თანამშრომლობის ფონდის (EPF) „სამოქალაქო ინიციატივა დამოუკიდებელი სასამართლოსთვის" პროგრამის ფარგლებში, რომელიც დაფინანსებულია ამერიკის შეერთებული შტატების საერთაშორისო განვითარების სააგენტოს (USAID) მიერ აღმოსავლეთ-დასავლეთის მართვის ინსტიტუტის (EWMI) მეშვეობით. მოდულის შექმნა შესაძლებელი გახდა საქართველოს უზენაეს სასამართლოსთან თანამშრომლობით. სრულად წყარო: idfi.ge

იმერეთი. საქველმოქმედო ჰუმანიტარულმა ცენტრმა „აფხაზეთმა" ბელგიელი EVS მოხალისის დახმარებით 500 ევროს შემოწირულობა მიიღო ორგანიზაციებისგან - „Gemeente Middelkerke" და „Cel Ontwikkelingssamenwerking". ცენტრ „აფხაზეთის" ოფიციალური ვებგვერდის მიხედვით, ეს თანხა მოხმარდება ლაგოდეხის რაიონის სოფელ ბაისუბნის საჯარო სკოლის სპორტული დარბაზის რეაბილიტაციას. სკოლაში 250-მდე მოზარდი სწავლობს, მათ შორის ბაისუბნის მცირე საოჯახო ტიპის სახლის აღსაზრდელები.  „სპორტული დარბაზის რეაბილიტაციის შემდეგ შესაძლებელი გახდება ზამთრის თვეებში ფეხბურთის, კალათბურთისა და სხვა წრეების ორგანიზება, რაც ხელს შეუწყობს ამ სოფელში მცხოვრები ბავშვების განვითარებას და სპორტულ აქტივობებში ჩართვას" – ნათქვამია ორგანიზაციის ვებგვერდზე გავრცელებულ განცხადებაში.  სრულად წყარო: chca.org.ge