თბილისი. საერთაშორისო გამჭვირვალობა - საქართველოს აქვეყნებს ბლოგპოსტს: ინტერნეტ მფლობელობა საქართველოში. „ინტერნეტის მნიშვნელობა, როგორც ყოველდღიური კომუნიკაციის, ასევე ინფორმაციის მიღების კუთხით, დღითიდღე იზრდება. მზარდია ინტერნეტ მომხმარებლების რაოდენობა და შესაბამისად, ინტერნეტ ინდუსტრიაც. ინტერნეტით მიღებული ინფორმაცია განსაკუთრებულ მნიშვნელობას წინასაარჩევნო პერიოდში იძენს და შესაძლოა, გადამწყვეტ როლსაც თამაშობდეს დეზინფორმაციის გაზრდილი საფრთხისა და მედიაწიგნიერების დაბალი კულტურის ფონზე. მაღალი საჯარო ინტერესის გათვალისწინებით, „საერთაშორისო გამჭვირვალობა-საქართველომ“ შეისწავლა 2018 წელს ფიქსირებული და მობილური ინტერნეტის ბაზარზე არსებული მსხვილი ოპერატორების მფლობელობა და მათი ბიზნესკავშირები. კვლევაში, ასევე, მიმოხილულია მოსახლეობაში ინტერნეტის გავრცელების და მოხმარების საკითხები“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ღია საზოგადოების ფონდი 2020 წლის 27 თებერვალი, ხუთშაბათს, საკონსულტაციო შეხვედრებს აწყობს. შეხვედრები ფონდის ოფისში, თამარ ჭოველიძის #10-ში, შემდეგი თანმიმდევრობით გიმართება: ეროვნული ინტეგრაცია – 11:00 სთ; საზოგადოებრივი ჯანმრთელობა – 12:00 სთ; მონაწილეობითი დემოკრატიის პროგრამა – 14:00; მედია – 15:00; ადამიანის უფლებები – 16:00 სთ; ევროინტეგრაცია- 17:00სთ; როგორ შევავსოთ საგრანტო განაცხადი ონლაინ – 17:30 სთ (ტექნიკური სესია). სრულად...  წყარო: ორგანიზაციის ვებგვერდი

2020 წლის 20 თებერვალს, საქართველოს წითელი ჯვრის საზოგადოების სიღნაღის ფილიალის წარმომადგენლებმა შეხვედრა გამართეს სიღნაღის მუნიციპალიტეტის რესურს ცენტრში, რომელსაც ესწრებოდნენ სკოლის დირექტორები და რესურს ცენტრის თანამშრომლები. ფილიალის წარმომადგენლებმა ისაუბრეს საქართველოს წითელი ჯვრის საქმიანობების შესახებ ადგილობრივ დონეზე და ზოგადად ქვეყნის მასშტაბით. სრულად... წყარო: ორგანიზაცის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, ჭიათურაში სოფელ შუქრუთის მოსახლეობამ კვლავ შეაჩერეს შპს „ჯორჯიან მანგანეზის” მაღაროს ფუნქციონირება. „ისინი კომპანიის საქმიანობის შედეგად მათი სახლებისა და გარემოსთვის მიყენებული ზიანის ანაზღაურებას ითხოვენ. EMC მოუწოდებს სახელმწიფოს შესაბამის უწყებებს, უზრუნველყონ დაზარალებულთა საცხოვრისისა და ჯანსაღ გარემოში ცხოვრების უფლებების დაცვა. ჩვენ ვაკვირდებით მიმდინარე პროცესებს და ვრცელ შეფასებას მოგვიანებით გავავრცელებთ”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ახალი ტყის კოდექსის მიღებასა და სხვა ნორმატიულ აქტებში დადგეგმილ საკნონმდებლო ცვლილებას, რომელიც ეკლესია-მონასტრებისთვის ტყის რესურსის გადაცემის შესაძლებლობას ადგენს და ეწინააღმდეგება ფუნდამენტურ კონსტიტუციურ პრინციპებს, სტრატეგიული ბუნებრივი რესურსების მართვის და განაწილების უსამართლო პრაქტიკას ქმნის და წინასაარჩევნო პერიოდში ეკლესიის ლოიალობის მოპოვების შინაარსი უფრო აქვს. „მართლმადიდებელი ეკლესიისთვის დამატებითი პრივილეგიების გადაცემის ამ ინიციატივას სავარაუდოდ წინასაარჩევნო კონტექსტში საპატრიარქოს ლოიალობის მოპოვების ინტერესი აქვს და რელიგიის პოლიტიკური ინსტრუმენტალიზების ნიშნებს აჩენს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: 2019 წელს რეგისტრირებული დანაშაულის სტატისტიკა. „თუ დავუშვებთ რომ 2018 წლიდან დანაშაულის სტატისტიკის აღრიცხვიანობის გაუმჯობესებული სისტემის დანერგვით სამინისტრომ უარი თქვა ე.წ. შელამაზებული სტატისტიკის წარმოებაზე, მაშინ დანაშაულის ტენდენციების რეალურ სურათს მხოლოდ 2019 და 2018 წლების მაჩვენებლების შედარება გვაჩვენებს. შინაგან საქმეთა სამინისტროს ვებგვერდზე გამოქვეყნებული სტატისტიკის მიხედვით, 2019 წელს სულ დარეგისტრირდა 64 123 დანაშაული, რაც დაახლოებით 10%-ით აღემატება 2018 წლის მაჩვენებელს. შესაბამისად, თანაბარი მეთოდოლოგიის და აღრიცხვიანობის პირობებშიც დანაშაულის რიცხვი კვლავ ზრდას განაგრძობს“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საზოგადოებრივი ორგანიზაციების ნაწილი ეხმაურება განხილვას საქართველოს პარლამენტში კანონპროექტის „ინფორმაციული უსაფრთხოების შესახებ“ საქართველოს კანონში შესატანი ცვლილებების თაობაზე. „2012 წელს მიღებული კანონის არაეფექტურობამ, გახმაურებულმა კიბერშეტევებმა და თანამედროვე გამოწვევებმა ცხადყო, რომ კიბერ უსაფრთხოებასთან დაკავშირებული საკანონმდებლო რეგულაციების განახლება ნამდვილად საჭიროა. თუმცა, მიგვაჩნია, რომ კანონპროექტით: ა) იქმნება სისტემა, რომელიც ვერ უზრუნველყოფს სახელმწიფო დონეზე ინფორმაციული უსაფრთხოების ეფექტურობას; ბ) შეიცავს ინფორმაციულ სისტემებზე და თუ მათში დაცულ პერსონალურ თუ კომერციული სახის ინფორმაციაზე ტოტალური კონტროლის რისკს; გ) ეწინააღმდეგება საქართველოს კონსტიტუციის ნორმებსა და საერთაშორისო ვალდებულებებს“, ნათქვამია ერთობლივ განცხადებაში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: მაღალი შენობები, ზედაპირული გადაწყვეტილებები. „ბათუმის კონცხზე, პორტთან ახლოს, მასშტაბური კომპლექსის მშენებლობა იგეგმება. 2019 წლის 22 აგვისტოს, ქალაქის საკრებულომ “ბათუმი რივიერას” განაშენიანების გეგმა დაამტკიცა ხოლო 2020 წლის იანვარში ცნობილი გახდა, რომ ეკონომიკის სამინისტრომ კომპლექსის შემადგენელი ერთი, 42-სართულიანი კორპუსის მშენებლობის ნებართვა გასცა. პროექტი სულ 5 მაღალსართულიან შენობას მოიცავს. 6 თებერვალს გაირკვა, რომ ეკონომიკის სამინისტრომ პროექტის კიდევ ერთი ნაწილის, ხელოვნური ლაგუნას მოწყობის ნებართვაც გასცა. დაგეგმილ მშენებლობას ადგილობრივი კულტურული მემკვიდრეობის დაცვისთვის ჩამოყალიბებული „დაიცავი ბათუმი” და მოძრაობა „მწვანე მომავალი” აპროტესტებენ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს სტრატეგიის და საერთაშორისო ურთიერთობების კვლევის ფონდი აქვეყნებს ირაკლი ჯღარკავას ბლოგპოსტს: რატომ უნდა გვაღელვებდეს ქართული „ტროლ-სკანდალი“. „საქართველოს გაუჭირდება მხარდაჭერის მოპოვება სამომავლო მტრული ინტერნეტკამპანიების წინააღმდეგ, თუ თავადვე იქნება მხილებული მსგავს აქტივობებში. ამ მხრივ სანდოობის დაკარგვამ შესაძლებელია მძიმე შედეგები მოუტანოს ქვეყნის ეროვნულ უსაფრთხოებას. ქვეყანა, რომელიც იმართება ვიწრო პოლიტიკური ინტერესების მქონე ჯგუფის მიერ, გაცვეთილი ტაქტიკის „მიზანი ამართლებს საშუალებას“ გამოყენებით, ძალაუფლების შენარჩუნების მიზნით, არ ემსახურება საქართველოს საუკეთესო ინტერესებს და, პირიქით, ხელს უშლის მისი გაცხადებული პოლიტიკის განხორციელებას - გააღრმავოს კავშირი დასავლურ პოლიტიკურ ინსტიტუტებსა და ორგანიზაციებთან“, ნათქვამია ორგანიზაციის ვებგვერდზე. სრულად... წყარო: www.gfsis.org

თბილისი. საგარეო ქმედებათა სამსახურისა და ევროკომისიის მიერ მომზადებულ ანგარიშში, რომელიც ასოცირების საბჭოს 2019 წლის მარტში ჩატარებული ბოლო შეხვედრის შემდგომ პერიოდს ასახავს, ჩანს, რომ საქართველო ასოცირების შესახებ შეთანხმების ფარგლებში აღებული ვალდებულებების და წამოწყებების ერთგულია. „საქართველოს კანონმდებლობის ევროკავშირის კანონთა კრებულთან (acquis) და ევროპულ სტანდარტებთან შესაბამისობაზე მუშაობა, განსაკუთრებით ადამიანის უფლებათა სფეროში, ეფექტიანად მიმდინარეობდა. ამასთანავე, კვლავ არსებობს გამოწვევები საარჩევნო რეფორმის, პოლიტიკური დიალოგისა და სასამართლო რეფორმის სფეროებში. შემდგომში, არსებითია, რომ საპარლამენტო არჩევნები ჩატარდეს თავისუფალ და სამართლიან გარემოში, ხოლო უზენაესი სასამართლოს მოსამართლეთა შერჩევის პროცესში გათვალისწინებული იყოს ვენეციის კომისიის ყველა რეკომენდაცია, პროცესი გამჭვირვალედ განხორციელდეს და კანდიდატთა წარდგენა ჭეშმარიტი დამსახურების შესაბამისად წარიმართოს. 2020 წლის განმავლობაში მნიშვნელოვანი იქნება საერთაშორისო რეკომენდაციების შესაბამისი საკანონმდებლო ცვლილებების და რეფორმების მეოთხე ტალღის განხორციელება“, ნათქვამია ევროკავშირის ვებგვერდზე. სრულად... წყარო: eeas.europa.eu

თბილისი. რონდელის ფონდში გაიმართა დისკუსია ეთნიკური უმცირესობების სამოქალაქო თანასწორობისა და ინტეგრაციის სახელმწიფო სტრატეგიისა და სამოქმედო გეგმის შესახებ. „დისკუსიაში მონაწილეობდნენ პოლიტიკური პარტიების ახალგაზრდული ორგანიზაციების წევრები და შერიგებისა და სამოქალაქო ინტეგრაციის სახელმწიფო მინისტრის აპარატის წარმომადგენელი თინათინ ღოღელიანი. შეხვედრა შედგა „ეროვნული უმცირესობების პოლიტიკურ პროცესებში ჩართულობა უკეთესი მომავლისათვის“ პროექტის ფარგლებში, რომელიც ეროვნული უმცირესობების საკითხებზე ეუთოს უმაღლესი კომისრის ოფისის აქტიური მხარდაჭერით მიმდინარეობს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „მითების დეტექტორი“ აქვეყნებს ბლოგპოსტს: როგორ გააყალბა „ქართული მარშის“ წევრმა ლევან ბერძენიშვილის ფეისბუქ პოსტი. „5 თებერვალს ანტილიბერალური ჯგუფის „ქართულის მარშის“ წევრმა ბექა ვარდოსანიძემ პირად ფეისბუქ გვერდზე გამოაქვეყნა რესპუბლიკური პარტიის წევრის ლევან ბერძენიშვილის ფეისბუქ პოსტის სქრინი, რომელიც 10 ივლისითაა დათარიღებული. ლევან ბერძენიშვილის ფეისბუქ პროფილის პოსტის სქრინი შეიცავდა უცენზურო სიტყვას საგარეო საქმეთა მინისტრის დავით ზალკალიანის მიმართ: „თუ გინდათ მომტყანით, მაინც ვიტყვი, რომ ზალკალიანს უყვარს სამშობლო”. აღნიშნულ პოსტს ერთვოდა „ქართული მარშის” წარმომადგენლის მინაწერი, სადაც ის ბერძენიშვილის უცენზურო გამონათქვამის გამო ბოდიშს იხდიდა: “ლიბერალების მთავარი ინწელექწუალი :) ბოდიში უცენზურობისთვის!!!”. ლევან ბერძენიშვილის ფეისბუქ პოსტის სქრინი ფოტოშოპში ან მსგავს პროგრამაშია დამუშავებული, რადგან ორიგინალ პოსტში ფრაზა “თუ გინდათ მომკალით” წერია, რომელიც უცენზურო სიტყვით არის ჩაანაცვლებული. პოსტი, რომელიც 2019 წლის 10 ივლისით არის დათარიღებული “ქართული მარშის” წარმომადგენელმა 2020 წლის 5 თებერვალს საგარეო საქმეთა მინისტრის აშშ-ში ვიზიტის კონტექსტში ლიბერალების დისკრედიტაციის მიზნით გამოაქვეყნა“, ნათქვამია მითების დეტექტორის ვებგვერდზე. სრულად... წყარო: mythdetector.ge

თბილისი. IRCT-ის 2020 წლის საერთაშორისო სამეცნიერო სიმპოზიუმში მონაწილეობის მსურველთათვის რეგისტრაცია გრძელდება. „ღონისძიებაზე დასასწრებად და აბსტრაქტის წარსადგენად გადადით ბმულზე და გაეცანით დეტალებს. შეგახსენებთ, რომ სიმპოზიუმი IRCT-ისა და GCRT-ის ორგანიზებით თბილისში მიმდინარე წლის 5-7 ოქტომბერს ჩატარდება. 8-9 ოქტომბერს კი გენერალური ასამბლეა გაიმართება. სიმპოზიუმის თემაა „უკიდურესობის გადალახვა - ცხოვრება წამების შემდეგ“. სიმპოზიუმი მონაწილეებს სთავაზობს უნიკალურ შესაძლებლობას, გაეცნონ უახლეს სამეცნიერო კვლევებს და მხარი დაუჭირონ გლობალურ, რეგიონალურ და ლოკალურ სტრატეგიულ პრიორიტეტებს ფსიქიკური ჯანმრთელობისა და ადამიანის უფლებების მიმართულებით“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აგრძელებს სტატიების სერიების გამოქვეყნებას სხვადასხვა არადომინანტური ეთნიკური და რელიგიური თემის წარმომადგენლების ხედვებზე მათ მიმართ გაბატონებულ მზერასთან, პოლიტიკასთან და მის სოციალურ და კულტურულ შედეგებთან მიმართებით. ამჯერად, რესპონდენტი რიმა მარანგოზიანი საუბრობს როგორია სომეხი თემის მიმართ გაბატონებული წარმოდგენები. „საქართველოში მცხოვრები სომხები და ქართველები სინამდვილეში არ იცნობენ ერთმანეთს. ერთმანეთის შესახებ მხოლოდ ზოგადი წარმოდგენები აქვთ მაშინ, როცა საქართველოს მოსახლეობის 6%-ზე მეტი სომეხია. რადგან სომხების და ქართველების ერთმანეთთან ურთიერთობა იშვიათია, ერთი ადამიანის მაგალითი განზოგადდება სხვებზე, მაგრამ მთლიან ეთნიკურ ჯგუფზე ერთი ადამიანის მაგალითით შეხედულებების ჩამოყალიბება არასწორია. ვფიქრობ, ქართველების და სომხების ერთმანეთთან პირადი ურთიერთობა ძალიან მნიშვნელოვანია იმისთვის, რომ ერთმანეთს დავანახოთ, როგორები ვართ სინამდვილეში“, ამბობს რესპონდენტი რიმა მარანგოზიანი. სრულად... წყარო: emc.org.ge

თბილისი. 1-2 თებერვალს გაიმართა ადამიანის უფლებების სწავლებისა და მონიტორინგის ცენტრის (EMC) სოლიდარობის პლატფორმის მესამე ღონისძიება. „ღონისძიების ფარგლებში მიმდინარე დისკუსიები ეხებოდა განათლებისა და რელიგიის საკითხებს. სოლიდარობის პლატფორმის მეორე დღე დაეთმო არადომინანტურ რელიგიებს საქართველოში“, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეოს: „შეჩერებული რეფორმა - მოქმედი ნარკოპოლიტიკის მძიმე შედეგები“. სრულად... წყარო: emc.org.ge

თბილისი. მითების დეტექტორი აქვეყნებს ბლოგპოსტს: ბანანის კონსპირაციების დროის ხაზი: ებოლადან კორონავირუსამდე. „კორონავირუსის აღმოჩენას და მისი გავრცელებით გამოწვეულ ადამიანურ მსხვერპლს მსოფლიოს სხვადასხვა ქვეყანაში დეზინფორმაციისა და კონსპირაციების ახალი ტალღა მოჰყვა. საქართველოში ფეისბუკის მესენჯერით გავრცელებული ერთ-ერთი კონსპირაცია ბანანს უკავშირდებოდა. სქრინი, რომელიც ფეისბუქ გვერდმა “საქართველო უპირველეს ყოვლისა” გამოაქვეყნა, იუწყებოდა, რომ კორონავირუსს სხვადასხვა ქვეყნებში ბანანის მეშვეობით ავრცელებდნენ. გვერდის მტკიცებით, მათ მესენჯერით მსგავსი შეტყობინება 50-ზე მეტჯერ მიიღეს. კორონავირუსი ცოცხალი ორგანიზმებიდან - ცხოველებიდან - გავრცელდა და რაიმე მტკიცებულება, რომ ის ბანანით ან სხვა საკვებით გადადის, ჯერ არ გამოვლენილა. ამასთანავე ბანანი წლებია სხვადასხვა კონსპირაციების წყაროა და მას ხან ებოლას, ხან შიდსის და ღორის გრიპის გავრცელებას წყაროდ ყოველგვარი მეცნიერული დასაბუთების გარეშე აუსაფუძვლოდ ასახელებენ“, ნათქვამია პოსტში. სრულად... წყარო: www.mythdetector.ge

ქვემო ქართლი. 22 იანვარს, ადამიანის უფლებების სწავლებისა და მონიტორინგის ცენტრმა (EMC) მარნეულის სოფლების ხულდარას, აღმამედლოს, ქვემო სარალისა და კასუმლოს სათემო ცენტრების აქტივისტებთან ერთად, იმსჯელა ამ სოფლებში იდენტიფიცირებული სოციალური, სამართლებრივი და პოლიტიკური გამოწვევების შესახებ. „ბოლო თვეებში დემოკრატიული კვლევის მეთოდების გამოყენებით ადამიანის უფლებების სწავლებისა და მონიტორინგის ცენტრმა (EMC) აღნიშნული სოფლების საჭიროებები და წუხილები შეისწავლა და სოფლის მოსახლეობისა და სათემო აქვისტების მონაწილეობით სოციალური ცვლილებებისთვის მუშაობის ორგანიზებას გეგმავს. საჭიროებების კვლევა აჩვენებს ადგილობრივი თვითმმართველობის პროცესში მოსახლეობის დაბალი პოლიტიკური მონაწილეობის, სასიცოცხლო რესურსებზე (წყალი, მიწა) და საზოგადოებრივ სიკეთეებზე არასათანადო წვდომის, პოლიციის გულგრილობის, ქალთა საჭიროებების პოლიტიკიდან განდევნის და არაღიარების სერიოზულ და სისტემურ გამოწვევებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) საქართველოს იუსტიციის მინისტრის მხრიდან სახალხო დამცველის დისკრედიტაციის მძიმე შემთხვევებს ეხმიანება და საქართველოს მთავრობას მინისტრის პოლიტიკური პასუხისმგებლობის შესწავლასა და სახალხო დამცველისთვის ეფექტიანი და დამოუკიდებელი საქმიანობის გარანტიების შექმნისკენ მოუწოდებს. სრულად... წყარო: emc.org.ge

თბილისი. საქართველოს სტრატეგიის და საერთაშორისო ურთიერთობების კვლევის ფონდი აქვეყნებს ანალიტიკოს მამუკა კომახიას ბლოგპოსტს: პოლიტიკური კრიზისის ანატომია ოკუპირებულ აფხაზეთში. „აფხაზეთში დიდი ხანია საუბრობენ მესამე ძალის გამოჩენაზე, რომელიც მოქმედ პოლიტიკურ ლიდერებს ნელ-ნელა ჩაანაცვლებს. ამ კონტექსტში საინტერესო განცხადება გააკეთა რუსეთის პრეზიდენტის ადმინისტრაციის ყოფილმა თანამშრომელმა, დონბასელი სეპარატისტების ყოფილმა კურატორმა ინალ არძინბამ. არძინბა, რომელიც რუსეთის პოლიტიკური ელიტისთვის კარგად ნაცნობი ფიგურაა, არჩევნების შემდეგ აფხაზეთში ახალი პოლიტიკური პარტიის დაფუძნებას გეგმავს. არძინბას ეს განცხადება პირველი საჯარო განცხადებაა აფხაზურ პოლიტიკაში მისი მონაწილეობის შესახებ. როგორც ჩანს, კრემლი აფხაზური პოლიტიკისთვის ახალი თაობის პოლიტიკოსებს ამზადებს, რომლებსაც ნაკლები კავშირი აქვთ საქართველოსთან და რუსეთთან ინტეგრაციასაც, ძველი თაობის აფხაზი პოლიტიკოსებისგან განსხვავებით, მეტი ენთუზიაზმით უჭერენ მხარს“. სრულად... წყარო: www.gfsis.org

თბილისი. ადამიანის უფლებების სწავლებისა და მონიტორინგის ცენტრი (EMC) წარმოგიდგენთ სტატიების სერიას სხვადასხვა არადომინანტური ეთნიკური და რელიგიური თემის წარმომადგენლების ხედვებს მათ მიმართ გაბატონებულ მზერასთან, პოლიტიკასთან და მის სოციალურ და კულტურულ შედეგებთან დაკავშირებით. „საერთო კავკასიური წარმომავლობა და ისტორიული გამოცდილება მნიშვნელოვნად განაპირობებს ქართული საზოგადოების მზერას ქისტი თემის მიმართ და ქისტები აღქმულნი არიან, როგორც ქართველების მოძმე ხალხი. აღნიშნული მზერა ერთის მხრივ ემოციური და სასიამოვნოა ქისტებისთვის, თუმცა მეორეს მხრივ აქცევს მათ „შინაურ უცხოდ“ და აფერხებს სამოქალაქო თანასწორობის მიღწევას. აღნიშნული მზერის ნათელი მაგალითია, როცა 21 აპრილს ჰესების საკითხზე დაპირისპირების შემდგომ პანკისში ჩასულმა, დღეს უკვე პრემიერ მინისტრმა, გიორგი გახარიამ, ადგილზე შეკრებილ პანკისელ საქართველოს მოქალაქეებს უწოდა „ძმებო“ და ამით მოახდინა ხაზგასმა მათ ეთნიკურ კუთვნილებაზე, ვიდრე მოქალაქეობაზე“. სრულად... წყარო: emc.org.ge

თბილისი. 21 იანვარს, ინფორმაციის თავისუფლების განვითარების ინსტიტუტმა (IDFI) მონაცემთა გაცვლის სააგენტოსთან ერთად (DEA) გამართა შეხვედრა თემაზე: ღია მონაცემების პლატფორმის - WWW.DATA.GOV.GE-ის განვითარების გეგმები და პერსპექტივები. „ღონისძიების მიზანი იყო სამოქალაქო საზოგადოების, მედიის, ბიზნესისა და აკადემიური წრეების წარმომადგენლებთან ერთად განხილულიყო ღია მონაცემების პლატფორმის - WWW.DATA.GOV.GE-ის საჭიროებები, გამოწვევები და განვითარების გეგმები. საქართველოში ღია მონაცემების ხელმისაწვდომობის კუთხით მთავარი გამოწვევა შესაბამისი საკანონმდებლო ბაზისა და სტანდარტების არარსებობაა. სწორედ ამ პრობლემის გამო, მწირია იმ მონაცემების ჩამონათვალი, რომლებსაც საჯარო დაწესებულებები ღია და დამუშავებად ფორმატში აქვეყნებენ. მართალია, არსებობს ღია მონაცემების ერთიანი სახელმწიფო პორტალი, მაგრამ საჯარო დაწესებულებები კანონმდებლობით ვალდებულნი არ არიან ცალკეული მონაცემები ამ პორტალზე გამოაქვეყნონ და ეს მხოლოდ მათ კეთილ ნებასა და აქტიურობაზეა დამოკიდებული“, ნათქვამია ორგანიზაციის გვერდზე სოციალურ ქსელში. სრულად... წყარო: idfi.ge