თბილისი. სოციალური სამართლიანობის ცენტრის ინფორმაციით, ხმაური, გადატვირთულობა, სერვისებსა და ინფრასტრუქტურასთან შეზღუდული წვდომა - ეს იმ გამოწვევების არასრული ჩამონათვალია, რომელსაც ორხევის სოციალურ საცხოვრისში მცხოვრები ადამიანები ყოველდღიურად აწყდებიან. „საცხოვრისი განსაკუთრებით არასათანადოა შშმ პირებისა და ბავშვებისთვის. თბილისის მერიას დღემდე არ აქვს უსახლკარობასთან ბრძოლის პოლიტიკა და საბინაო ფონდი, რაც ადამიანებს ღირსეული საცხოვრისით უზრუნველყოფდა“. დამატებითი ინფორმაციისთვის, იხ. სოციალური სამართლიანობის ცენტრის დოკუმენტი - “სად არის პრობლემები საცხოვრისის პოლიტიკაში”.  ღია საზოგადოების ფონდის (OSGF) კვლევა - “ცხოვრება სოციალურ საცხოვრისში - მიზეზები, საჭიროებები.  სრულად... წყარო: socialjustice.org.ge

სამეგრელო. გაეროს განვითარების პროგრამის ინფორმაციით, სოფელ რუხში განახლებული და კეთილმოწყობილი მოხუცთა სახლი „ჩემი მორდუ“ გაიხსნა. „მისი მაცხოვრებლები კონფლიქტით დაზარალებული, დევნილი, ზრუნვას მოკლებული ან ოჯახური ძალადობის მსხვერპლი მოხუცები არიან“. სრულად... წყარო: www.ge.undp.org

თბილისი. სოციალური სამართლიანობის ცენტრი აქვეყნებს დოკუმენტს, რომელიც აანალიზებს პოლიტიკური პარტიების ხედვებს სოციალური პოლიტიკის განხორციელების მიმართულებით. „COVID-19-ის პანდემიამ კიდევ უფრო დაამძიმა მოსახლეობის სოციალურ-ეკონომიკური მდგომარეობა და ისინი უმწვავესი პრობლემების, მათ შორის, უკიდურესი სოციალურ-ეკონომიკური მოწყვლადობის, საკვების დეფიციტის, უსახლკარობის, წინაშე დააყენა. ამ პრობლემების მოგვარებაში მუნიციპალიტეტების როლი არსებითია - სწორედ ადგილობრივმა ხელისუფლებამ უნდა შეისწავლოს დეტალურად მოსახლეობის გამოწვევები და გაატაროს მათ საჭიროებებზე მორგებული, ეფექტიანი ინტერვენციები. სამწუხაროდ, მიუხედავად იმისა, რომ COVID-19-ის პანდემიამ გამოუსწორებელი ზიანი მიაყენა მოქალაქეების სოციალურ-ეკონომიკურ მდგომარეობას, პოლიტიკური პარტიების წინასაარჩევნო პროგრამები არ ითვალისწინებს წარმოშობილი სირთულეების დაძლევის კონკრეტულ, სპეციფიკურ გზებს“. სრულად... წყარო: socialjustice.org.ge

თბილისი. სოციალური სამართლიანობის ცენტრი შარტავას ქუჩაზე მიმდინარე მშენებლობას ეხმაურება. „შარტავას ქუჩაზე განახლებული მშენებლობა ქალაქში მიმდინარე განაშენიანების ახალი მასშტაბური ტალღის ნაწილია და ყიფშიძის N1-ში მიმდინარე უკანონო მშენებლობის ანალოგიური მაგალითია. აქაც, როგორც ყიფშიძის ქუჩის შემთხვევაში, ინვესტორი თბილისის მერიას შეჩერებული მშენებლობით დაზარალებული მოსახლეობის განსახლებას აღუთქვამს. სოციალური სამართლიანობის ცენტრი სრულად აცნობიერებს დაუმთავრებელი პროექტებით დაზარალებული მოსახლეობის მდგომარეობას თუმცა, იმისთვის, რომ დაზარალებული მოსახლეობის დაკმაყოფილებას ქალაქში ზიანის და საფრთხისშემცვლელი მშენებლობის ახალი ტალღა არ მოჰყვეს, მნიშვნელოვანია, რომ შეჩერებული მშენებლობების განახლება კანონის დაცვით და საჯარო ინტერესის გათვალისწინებით განხორციელდეს“, - აღნიშნულია განცხადებაში. სრულად...  წყარო: ორგანიზაციის ვებგვერდი

თბილისი. სოციალური სამართლიანობის ცენტრი აქვეყნებს კონსტანტინე ჩაჩიბაიასა და ტიგრან ტარზიანის მასალას - „კულაკები და უმიწაწყლოები ნინოწმინდის მუნიციპალიტეტში”.  „ნინოწმინდის მუნიციპალიტეტის ფაქტობრივად ყველა სოფელში მოსახლეობა დაასახელებს ერთ ან რამდენიმე ადამიანს, რომელსაც სოფლის მიმდებარე მიწების დიდი ნაწილი საკუთრებაში აქვს რეგისტრირებული. სტატიაზე მუშაობის პროცესში დავეყრდენით მიმდინარე წლის განმავლობაში სოციალური სამართლიანობის ცენტრის მიერ ნინოწმინდის მუნიციპალიტეტის 10 სოფელში ჩატარებულ საველე სამუშაოებს, სადაც მოსახლეობა ერთ-ერთ პრობლემად ხშირად გამოყოფდა მიწის რესურსების უთანასწორო განაწილებას. საკითხის უკეთ გასაცნობად დამატებით ინტერვიუები ჩავატარეთ ამ თემაზე ნინოწმინდის მუნიციპალიტეტის 2 სოფელში, სოფლის მეურნეობაში დასაქმებულ 10 გლეხთან და ფერმერთან, რომლებსაც ყველაზე მწვავედ ეხებათ ეს პრობლემა. ნინოწმინდის მუნიციპალიტეტში სულ 31 სოფელია, შესაბამისად ჩვენს მიერ მონახულებული სოფლების მდგომარეობის შესწავლა იძლევა შესაძლებლობას ვისაუბროთ პრობლემის სიმწვავეზე მთელი მუნიციპალიტეტის მასშტაბით. მით უფრო, რომ ადგილობრივი თვითთმართველობის წარმომადგენლებიც ადასტურებენ პრობლემის სისტემურობას“, - ვკითხულობთ მასალაში.  სრულად...   წყარო: ორგანიზაციის ვებგვერდი

თბილისი. სოციალური სამართლიანობის ცენტრი ნამახვანი ჰესის მშენებლობის შეჩერებისა და სამშენებლო ნებართვის გაუქმების მოთხოვნით სასამართლოს მიმართავს.  ორგანიზიაციის მიერ გავრცელებული ინფორაციის მიხედვით, „მშენებლობის ნებართვა ეკონომიკის სამინისტროს სსიპ ტექნიკური და ზედამხედველობის სააგენტომ 2020 წლის 22 აპრილს, საკანონმდებლო მოთხოვნების უხეში დარღვევებით, უსაფუძვლოდ გასცა. სოციალური სამართლიანობის ცენტრის მიერ მომზადებული სარჩელის მიხედვით, ნებართვის გამცემმა სააგენტომ უხეშად დაარღვია კანონის მოთხოვნები და შესაბამისი დასაბუთების გარეშე საგამონაკლისო წესით გასცა სამშენებლო ნებართვა“.  სრულად...   წყარო: ორგანიზაციის ვებგვერდი

თბილისი. ორგანიზაცია „ახალგაზრდა ადვოკატები“ სახელმწიფოს მხრიდან ტაქსის მომსახურე კომპანიების საქმიანობის მკაცრი შემოწმებისა და სამართლიანი სატარიფო პოლიტიკის განსაზღვრის მოთხოვნით, ქალაქ თბილისის მთავრობას და კონკურენციის სააგენტოს, ერთობლივად მიმართავს და სამართალწარმოების პროცესს იწყებს. „ახალგაზრდა ადვოკატების“ განცხადებით, შესწავლის საგანი უნდა გახდეს პანდემიის პერიოდში ქ. თბილისში მოქმედი ტაქსის კომპანიების მხრიდან თვითნებურად მიღებული გადაწყვეტილებები სატარიფო პოლიტიკის ცვლილებასთან, რამაც ბაზარზე მომსახურების ფასის არაგონივრული მაჩვენებელი წარმოქმნა, დაარღვია კერძო და საჯარო ინტერესები, მოსპო ბუნებრივი კონკურენცია, რაც უპირობოდ იწვევს სახელმწიფოს ჩარევის ვალდებულებას და საკითხის სამართლებრივ მოწესრიგებას. ორგანიზაციას მიაჩნია, რომ პრობლემა მთელი სირთულით დადგა ქ. თბილისის ადმინისტრაციულ საზღვრებში მოქმედი ტაქსით მომსახურების სფეროში, თუმცა საკითხის მოწესრიგება სრულად უნდა მოიცავდეს საქართველოს ყველა მუნიციპალიტეტში ტაქსით მომსახურებით სატარიფო პოლიტიკის განსაზღვრას და ხელვნურად მომსახურების ტარიფის ზრდის შეზღუდვას. სრულად...  წყარო: ორგანიზაციის ვებგვერდი

თბილისი. „ღირსეული შრომის პლატფორმა“ ეხმაურება ჯანდაცვის სამინისტროს ინიციატივას, შრომის ინსპექციის სამსახურის დახმარებით მოიკვლიოს ჰოსპიტალურ სექტორში დასაქმებული მედმუშაკების შრომისა და სახელფასო უფლებრივი მდგომარეობა.  „მიუხედავად უწყებებისგან დაგვიანებული რეაგირებისა, მივესალმებით ამ ნაბიჯს და იმედს გამოვთქვამთ, რომ მას შედეგად სამედიცინო პერსონალის შრომითი პირობების გაუმჯობესებისკენ მიმართული ქმედითი ნაბიჯები მოჰყვება“, - აცხადებს პლათფორმა, - „COVID-19-ის პანდემიამ საგრძნობლად გააუარესა მედმუშაკების (განსაკუთრებით ექთნებისა და სანიტრების) ისედაც მძიმე შრომითი პირობები. პანდემიურ მოცემულობაში ისინი დაუცველები აღმოჩდნენ. „პროფკავშირების ახალი გაერთაინების“ მონაცმებით სამუშაო მოვალეობის შესრულებისას კოვიდ-ინფექციით გარდაიცვალა 23 ექთანი, დასახელებული რიცხვი, მხოლოდ მათ ბაზაზე არსებულ მონაცემებს ასახავს. სახელმწიფოც და კერძო ჰოსპიტალური სექტორიც, რომლებიც წლების მანძილზე ორიენტირებული იყვნენ ჯანდაცვის მომსახურების საჯარო სიკეთიდან ბიზნესის მოგების ლოგიკაზე გადაყვანაზე, სრულიად მოუმზადებელი დახვდნენ კორონავირუსის პანდემიას. ეს განსაკუთრებით გამოვლინდა საკადრო და შრომის პოლიტიკაში“.  სრულად...   წყარო: gyla.ge

თბილისი. გააღვიძე აქტივიზმი • Activate Activism-ის მოძრაობა დღეიდან კონკრეტულად ქალთა შრომითი უფლებების გასაუმჯობესებლად იმუშავებს. „ჩვენი გუნდი წლებია ამ საკითხებთან დაკავშირებით სხვადასხვა პლატფორმის აქტივობებშია ჩართული, ხოლო დღეიდან გააღვიძე აქტივიზმი იქნება მოძრაობა, რომელიც გაგვაერთიანებს საერთო ბრძოლაში - თანასწორობისა და სამართლიანობისთვის. გახსოვდეს, „ყოველი სოციალური წარმატების დასაწყისში იყო ქმედება.“ გააღვიძე აქტივიზმი და შეეწინააღმდეგე კაპიტალისტური ექსპლუატაციის ეკლებს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 30 ივნისის წერილით, ინფორმაციის თავისუფლების განვითარების ინსტიტუტი (IDFI) კიდევ ერთხელ მიმართავს საქართველოს მთავრობას რომ 2021 და 2022 წლის სახელმწიფო ბიუჯეტებით უზრუნველყოს რეპრესირებულთა საყოფაცხოვრებო სუბსიდიის 7-დან 44 ლარამდე გაზრდა. „აღნიშნული გადაწყვეტილება მცირედით, თუმცა, მაინც შეამსუბუქებს ასაკობრივ რისკ ჯგუფში მყოფ რეპრესირებულთა ოჯახის წევრების მძიმე ეკონომიკურ ვითარებას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ეკონომიკური პოლიტიკის კვლევის ცენტრის (EPRC) ინფორმაციით, საქართველოს დევნილთა, შრომის, ჯანმრთელობისა და სოციალური დაცვის სამინისტრო დღეს სოციალური კოდექსის შემუშავების დაწყებას აანონსებს. „ამ ფონზე კიდევ უფრო აქტუალური ხდება ეკონომიკური პოლიტიკის კვლევის ცენტრისა (EPRC) და USAID/Georgia-ის დემოკრატიული მმართველობის ინიციატივის (USAID Good Governance Initiative in Georgia - GGI) ერთობლივი პლატფორმის ფარგლებში ექსპერტთა ჯგუფის მიერ მომზადებული „სოციალური დაცვის სისტემის განვითარების სტრატეგიული ხედვა“. დოკუმენტი მოიცავს ავტორთა შორის შეჯერებულ ძირითად დებულებებს, რომელთაც, ჩვენი აზრით, უნდა დაემყაროს ქვეყნისა და საზოგადოებისათვის ოპტიმალური სოციალური დაცვის მოდელის შექმნა“. სრულად... პუბლიკაცია... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის განცხადებით, „ჯორჯიან მანგანეზი,” რომელიც წლების განმავლობაში ირიდებდა შეკითხვებს მოპოვების შედეგად მიყენებულ ზიანზე, შუქრუთის მოსახლეობის პროტესტის შედეგად იძულებული გახდა თავად გამხდარიყო მოლაპარაკების მხარე და ამით საკუთარი პასუხისმგებლობა ეღიარებინა. „სამწუხაროდ, საკანონმდებლო დონეზე სასარგებლო წიაღისეულის მოპოვების შედეგად დაზარალებული ადგილობრივი მოსახლეობისთვის ზიანის ანაზღაურების წესი და პირობები განსაზღვრული კვლავ არ არის. შესაბამისად, შუქრუთის მოსახლეობას, მიყენებული ზიანის კომპენსირების წესსა და ოდენობაზე უშუალოდ კომპანიასთან, კერძო ხასიათის მოლაპარაკებების გამართვა და სამოქალაქო წესით შეთანხმება მოუხდათ. ასევე, შეთანხმების შესახებ გავრცელებული ცნობები, ისევე როგორც მოლაპარაკებების პროცესის უთანასწორო და გაუმჭვირვალე ხასიათი, არსებითად პრობლემურია, რადგან კომპენსაციის შეთანხმებული მექანიზმის სამართლიანობა და სანდოობა საეჭვო რჩება, ხოლო პროტესტის მონაწილეთა მიმართ მიმდინარე სისხლისსამართლებრივი დევნის ფაქტები დამატებით კითხვებს აჩენს შეთანხმების საგანზე“, ნათქვამია ორგანიზაციის განცხადებაში. სრულად... წყარო: socialjustice.org.ge

თბილისი. ომბუდსმენი პირველივე დღეებიდან ადევნებს თვალს ჭიათურის მუნიციპალიტეტის სოფელ შუქრუთში მიმდინარე მოვლენებს, სადაც მოსახლეობა შპს „ჯორჯიან მანგანეზის“ მადნის მოპოვებითი სამუშაოების შედეგად დაზიანებული საკუთრების სანაცვლოდ, სამართლიან კომპენსაციებს ითხოვს. დაზარალებულები ასევე, პროცესში სახელმწიფოს ჩართვას ითხოვენ. „სახალხო დამცველი მოუწოდებს ეკონომიკისა და მდგრადი განვითრების სამინისტროს - ჩაერთოს შუქრუთის მოსახლეობასა და კომპანიასთან მოლაპარაკებების პროცესში, როგორც მედიატორი, რათა დაცული იყოს მოქალაქეთა როგორც საკუთრების ასევე, ჯანსაღ გარემოში ცხოვრების უფლება. ომბუდსმენი აგრძელებს საქმის შესწავლას ჯანსაღ გარემოში ცხოვრების უფლებით ჭრილში, ასევე შეკრების ერთ-ერთი მონაწილის მიმართ შესაძლო ზეწოლის განხორციელების ფაქტზე“. სრულად... წყარო: ombudsman.ge

თბილისი. სოციალური სამართლიანობის ცენტრმა (ყოფილი EMC) პრესკონფერენცია გამართა სოფელ შუქრუთის პროტესტის მონაწილეებთან ერთად მიმდინარე პროცესებთან დაკავშირებით.  „შუქრუთის მოსახლეობის პროტესტმა, რომელიც უკვე სამ თვეზე მეტია გრძელდება თბილისში გადმოინაცვლა. პროტესტის მონაწილეები მოპოვებითი საქმიანობის შედეგად დაზარალებული ოჯახების კომპენსირებისთვის სამართლიანი სტანდარტის განსაზღვრას ითხოვენ“. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) გთავაზობთ მარიამ ჯანიაშვილის სტატიას: გამოსახლების საფრთხეები COVID-19-ის პანდემიის დროს და მის შემდეგ. „COVID-19-ის პანდემიის დროს, საქართველოს იუსტიციის მინისტრის ბრძანებით, იძულებით გამოსახლებაზე დაწესდა მორატორიუმი, თუმცა სსიპ-აღსრულების ეროვნულ ბიუროში გამოსახლების შესახებ განცხადებების რეგისტრაცია და საქმისწარმოება არ შეწყვეტილა.  ...ცხადია, მორატორიუმის შესახებ მიღებული გადაწყვეტილება მნიშვნელოვანი წინგადადგმული ნაბიჯია, თუმცა, პრობლემას ქმნის არაერთი სხვა სამართლებრივი რეგულაცია და არსებული პრაქტიკა, რაც კიდევ უფრო მძიმედ გამოვლინდება COVID-19-ის პანდემიის დასრულებისას, მას შემდეგ, რაც მორატორიუმი გაუქმდება და ქვეყანაში გამოსახლებების ტალღების წარმოქმნის ხელშესახები რისკები შეიქმნება”, ნათქვამია სტატიაში. სრულად... წყარო: socialjustice.org.ge

თბილისი. სოციალური სამართლიანობის ცენტრი გთავაზობთ თამთა მელაშვილის სტატიას: „ემანსიპაციისა და ექსპლოატაციის მიღმა: ქალები საბჭოთა საქართველოს კოლექტიურ მეურნეობებში“.  „სტატიის საშუალებით შევეცდები, დაახლოებითი წარმოდგენა შევქმნა იმის შესახებ, თუ როგორი იყო საქართველოში ქალების კოლმეურნეობაში შრომის, და იშვიათ შემთხვევაში, კარიერული წინსვლის გამოცდილება, როგორ ნავიგირებდნენ ქალები კაცებისგან დომინირებულ ძალაუფლებრივ ველებში დაწინაურების შემთხვევაში და როგორი იყო მათი აგენტობა (agency).  შევეცდები იზოლდას გამოცდილება კომუნისტურ რეჟიმში ემანსიპირებული ქალის ან იმავე რეჟიმის მიერ ექსპლუატირებული ქალის დიქოტომიური რეპრეზენტაციის (Fidelis, 2010) მიღმა მოვათავსო”. სრულად... წყარო: socialjustice.org.ge

თბილისი. სოციალური სამართლიანობის ცენტრი (ყოფილი EMC) გთავაზობთ სტატიას კრებულიდან - „ექსტრაქტივისტული გადაკვეთები პოლიტიკა, ეკოლოგია და სოციალური ველი“: ექსტრაქტივიზმის ეკოლოგიური გეოპოლიტიკა საქართველოს ოქროსა და სპილენძის მომპოვებელ ინდუსტრიაში. „ფორმალურად, მოპოვების შედეგად დაგროვებული სიმდიდრის გადანაწილებას ქართული კანონმდებლობით გათვალისწინებული ლიცენზირებისა და საგადასახადო სისტემები განაპირობებენ. თუმცა ადგილზე არაფორმალური ეკონომიკური კავშირების არსებობა არანაკლებ მნიშვნელოვან როლს თამაშობს. ადგილობრივი მოსახლეობა ყოველდღიურობაში აწყდება როგორც ფორმალური, ისე არაფორმალური სისტემების შედეგებს. მომპოვებელი კომპანიის დომინაცია მათთვის ეკონომიკურ შესაძლებლობებს და საცხოვრისი საშუალებების კვლავწარმოებას ზღუდავს, საძოვრებს ღია კარიერებად გარდაქმნის და სიღარიბის გავრცელებას უწყობს ხელს“. სრულად... წყარო: socialjustice.org.ge

სამცხე-ჯავახეთი. სოციალური სამართლიანობის ცენტრი აქვეყნებს ვიდეოს, სადაც ადგილობრივი აქტივისტები და ახალგაზრდები ჯავახეთში საკუთარი ყოფის სირთულეებსა და სოციალურ გამოწვევებზე წუხილს გვიზიარებენ. „მაღალი მიგრაცია და მოქალაქეობის სტატუსის გარეშე დარჩენილი ათასობით ადგილობრივი, სიღარიბე, განუვითარებელი სოციალური ინფრასტრუქტურა, ახალქალაქში კაზინოების მყვლეფავი პრაქტიკა, ახალგაზრდების დასაქმების სუსტი პოლიტიკა - ეს იმ სოციალური პრობლემების ძირითადი ჩამონათვალია, რაც ჯავახეთში მცხოვრებ ადამიანებს აწუხებთ“. სრულად... წყარო: socialjustice.org.ge

შიდა ქართლი. ადამიანის უფლებათა ცენტრი აგრძელებს პროექტს „პანდემიის შედეგების შემსუბუქება მარტოხელა ხანდაზმულებისთვის შიდა ქართლში“.  მოხალისეებმა გორის, ქარელის, ხაშურის და კასპის მუნიციპალიტეტებში პირდაპირი ვიზიტებისას გამოკითხეს 200-ზე მეტი ხანდაზმული, რომლებიც ერთ-ერთ ყველაზე მოუგვარებელ პრობლემად დაურეგისტრირებელ მიწებს ასახელებენ. მიუხედავად იმისა, რომ მიწის რეგისტრაციის საპილოტე პროექტი სახელმწიფომ 2016 წლიდან დაიწყო, რეგიონში ჯერ კიდევ ბევრმა ოჯახმა ვერ შეძლო მიწის რეგისტრაცია.  სრულად...   წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციამ 2021 წლის 8 აპრილს, მ-მ-ს სახელით, საქართველოს საკონსტიტუციო სასამართლოს მიმართა.  საიას მიაჩნია, რომ მეხანძრისათვის დადგენილი საპენსიო ასაკი, 55 წელი, არ არის კონსტიტუციური და ეწინააღმდეგება თანასწორობის უფლებას. მეხანძრე ავტომატურად თავისუფლდება სამსახურიდან, როგორც კი მიაღწევს 55 წელს.  სრულად...   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრის (EMC) წარმომადგენლები ჩუღურეთში, „ოქროს უბანში“ იმ შენობაში წლობით მცხოვრებ ოჯახებს შეხვდნენ, რომელიც ამჟამად ბიზნესმენ თემურ უგულავას კომპანია “სითი ლოფტს” ეკუთვნის. ვრცლად გაეცანით ოჯახების პრობლემებს... წყარო: emc.org.ge

თბილისი. სოციალური მუშაკი ბექა გაბადაძე საუბრობს შრომითი უფლებების დაცვის მნიშვნელობაზე, შრომითი ურთიერთობების ადეკვატური რეგულირებისა და დამსაქმებელთა ინტერესების გათვალისწინების საჭიროებაზე. წყარო: emc.org.ge